၂ တံၤမသ့း

၃ ဘၣ်ဆၣ် သ့ၣ်ညါတၢ်ဂ့ၢ် အဝဲအံၤတက့ၢ်. လၢမုၢ်နံၤခံကတၢၢ်တဖၣ်အပူၤန့ၣ်+ တၢ်ဆၢကတီၢ်လီၤဆီလၢ အကီအခဲသပှၢ်တၢၢ်န့ၣ် ကဘၣ်ဝဲလီၤ. ၂ ပှၤဟီၣ်ခိၣ်ဖိ ကအဲၣ်လီၤထဲ အနီၢ်ကစၢ်အသး, ကအဲၣ်ကျိၣ်အဲၣ်စ့, ကပတြၢၤလီၤအသး, ကပာ်ထီၣ်ထီအသး, ကကတိၤထီဒါ ကစၢ်ယွၤဒီးပှၤဂၤ, တဒိကနၣ်အမိၢ်အပၢ် အကလုၢ်ဘၣ်, တသ့ၣ်ညါ စံးဘျုးစံးဖှိၣ်တၢ်ဘၣ်, အသးတတီဘၣ်, ၃ တအဲၣ်ပှၤဂၤဘၣ်,* ကမ့ၢ်ပှၤလၢအခိၣ်ကိၤ, ကတဲဟးဂီၤပှၤဂ့ၢ်, တအိၣ်ဒီး တၢ်ပၢၤသူၣ်ပၢၤသးဘၣ်, ကမ့ၢ်ပှၤလၢ အမၤဆူၣ်မၤစိးတၢ်, တအဲၣ်တၢ်လၢအဂ့ၤဘၣ်, ၄ ကမ့ၢ်ပှၤလၢ အဟ့ၣ်လီၤကွံာ်ပှၤဂၤ, ပှၤလၢအမၤဖဲအသး, ပှၤလၢ အပာ်ကဖၢလၢအသး ဒီးလၢကအဲၣ် ကစၢ်ယွၤအလီၢ် ကအဲၣ်ဝဲ တၢ်မုာ်တၢ်ပၠီၣ်လီၤ. ၅ ဒီးအဝဲသ့ၣ် တဲဝဲလၢ အဘူၣ်ထီၣ်ဘါထီၣ် ကစၢ်ယွၤ ဘၣ်ဆၣ် အဝဲသ့ၣ် အတၢ်အိၣ်မူန့ၣ် တပာ်ဖျါထီၣ်ဝဲလၢ အဘူၣ်ထီၣ်ဘါထီၣ် ကစၢ်ယွၤဘၣ်.+ အဃိ ဟးဆှဲးပှၤဒ်န့ၣ်တဖၣ်တက့ၢ်. ၆ လၢအဝဲသ့ၣ်အကျါန့ၣ် ပိာ်ခွါလၢ အလံၣ်န့ၢ်လီန့ၢ်တၢ်တဖၣ် ကဟဲပၢၢ်ထီၣ်ဝဲလီၤ. ဒီးလၢတၢ်ကူၣ်သ့အပူၤန့ၣ် အဝဲသ့ၣ် ကလဲၤနုာ်လီၤလၢ ပိာ်မုၣ်လၢ အဂံၢ်စၢ်ဘါစၢ် လၢအအိၣ်ဒီး တၢ်ဒဲးဘးအါတဖၣ် အဟံၣ်ပူၤ ဒီးကကွဲန့ၢ်လွဲန့ၢ်ဝဲ ပိာ်မုၣ်တဖၣ်အံၤလီၤ. ပိာ်မုၣ်တဖၣ်အံၤ ပိာ်ထွဲဝဲ တၢ်သူၣ်လီသးကွံ အကလုာ်ကလုာ်အခံလီၤ. ၇ ဒီးအဝဲသ့ၣ် မၤလိတၢ်ထီဘိ ဘၣ်ဆၣ် တသ့ၣ်ညါထီၣ် တၢ်မ့ၢ်တၢ်တီ လီၤတံၢ်လီၤဆဲး နီတဘျီဘၣ်.

၈ ဒ်စီၤယၣ်နံၤ ဒီးစီၤယၣ်ဘြံၤ ထီဒါစီၤမိၤၡ့အသိးန့ၣ် ပှၤတဖၣ်အံၤ ဆဲးထီဒါတၢ်မ့ၢ်တၢ်တီ ဒ်န့ၣ်အသိးစ့ၢ်ကီးလီၤ. ပှၤဒ်အံၤတဖၣ် အတၢ်ဆိကမိၣ်န့ၣ် ဘၣ်အၢဘၣ်သီ လၢာ်လၢာ်ဆ့ဆ့ ဒီးမ့ၢ်လၢ အဝဲသ့ၣ် တအိၣ်မူမၤထွဲဝဲဒ် ခရံာ်ဖိအတၢ်စူၢ်တၢ်နာ် အသိးဘၣ်အဃိ ကစၢ်ယွၤတဘၣ်သူၣ်ဘၣ်သး အဝဲသ့ၣ်ဘၣ်. ၉ ဒ်လဲၣ်ဂ့ၤဒ်လဲၣ်ဂ့ၤ ဒ်တၢ်ကဲထီၣ်အသးဒီး စီၤယၣ်နံၤ ဒီးစီၤယၣ်ဘြံၤအသိး ပှၤတဖၣ်အံၤစ့ၢ်ကီး အတၢ်မၤနါစိၤန့ၣ် ကအိၣ်ဖျါလၢ ပှၤခဲလၢာ်အမဲာ်ညါပျီပျီ အဃိ အဝဲသ့ၣ်မၤတၢ်န့ၣ် တကဲထီၣ်လိၣ်ထီၣ်လၢၤဘၣ်.+ ၁၀ ဘၣ်ဆၣ် မ့မ့ၢ်နၤန့ၣ် နမၤထွဲ ယတၢ်သိၣ်လိတဖၣ်ဂ့ၤဂ့ၤ ဒီးနကွၢ်လိမၤဒိး ယတၢ်အိၣ်မူ,+ ယတၢ်တိာ်ပာ်, ယတၢ်နာ်, ယတၢ်ဝံသးစူၤ, ယတၢ်အဲၣ် ဒီးယတၢ်တူၢ်န့ၢ်ခီၣ်ကဲတဖၣ်လီၤ. ၁၁ တၢ်မၤအၢမၤနး ဒီးတၢ်နးတၢ်ဖှီၣ်လၢ ယတူၢ်ဘၣ်အီၤလၢ ဝ့ၢ်အၣ်တံၤအီာ်,+ ဝ့ၢ်အံၤကနံၤ+ ဒီးလၢဝ့ၢ်လူစတြၤအပူၤန့ၣ်+ နသ့ၣ်ညါလီၤ. ယလဲၤခီဖျိ တၢ်မၤအၢမၤနးတဖၣ်အံၤ န့ၢ်ဝဲ ဒီးကစၢ်မၤပူၤဖျဲးယၤလၢ တၢ်သ့ၣ်တဖၣ်န့ၣ် ခဲလၢာ်အပူၤလီၤ.+ ၁၂ နီၢ်ကီၢ်န့ၣ် ပှၤလၢအအဲၣ်ဒိး တီဒီးကစၢ်ယွၤ ဒ်ယ့ၣ်ၡူးခရံာ်အပျဲၢ်တဂၤအသိးန့ၣ် ကဘၣ်တၢ်မၤနးမၤဖှီၣ် အဝဲသ့ၣ်ကိးဂၤဒဲးလီၤ.+ ၁၃ ဘၣ်ဆၣ် ပှၤအၢပှၤသီ ဒီးပှၤပာ်မၤအသးတဖၣ်န့ၣ် ကဒံးယံာ်ဒံးအၢထီၣ်ဝဲလီၤ. အဝဲသ့ၣ် ကဆှၢကမၣ်ပှၤဂၤ ဒီးပှၤဂၤကဆှၢကမၣ် အဝဲသ့ၣ်လီၤ.+

၁၄ မ့မ့ၢ်နၤန့ၣ် တၢ်လၢပှၤသိၣ်လိနၤ ဒီးဒုးနာ်န့ၢ်နၤတဖၣ်န့ၣ် ဆဲးမၤထွဲအီၤတက့ၢ်.+ ပှၤလၢအသိၣ်လိနၤ တၢ်ဂ့ၢ်တဖၣ်အံၤ မ့ၢ်ပှၤဒ်လဲၣ်န့ၣ် နသ့ၣ်ညါလီၤ. ၁၅ ဒီးစးထီၣ်လၢ နမ့ၢ်ဖိသၣ်အီနုၢ်လံၤလံၤန့ၣ်+ နသ့ၣ်ညါ တၢ်ကွဲးအသး စီဆှံတဖၣ်လီၤ.+ တၢ်သ့ၣ်တဖၣ်န့ၣ် ကဒုးကူၣ်သ့နၤ ဒ်သိးနကန့ၢ်ဘၣ် တၢ်အုၣ်က့ၤခီၣ်က့ၤ ခီဖျိလၢ တၢ်နာ်ယ့ၣ်ၡူးခရံာ် အဃိလီၤ.+ ၁၆ တၢ်ကွဲးအသးခဲလၢာ်န့ၣ် ဘၣ်တၢ်ကွဲးအီၤ ခီဖျိလၢ ကစၢ်ယွၤအသးစီဆှံ အတၢ်ဟံးစုနဲၣ်ကျဲ+ ဒီးကဲဘျုးလၢ တၢ်သိၣ်လိနဲၣ်လိတၢ်အဂီၢ်,+ လၢတၢ်သိၣ်ဃီၣ်တၢ်အဂီၢ်, လၢဃၣ်လိၤတၢ်အဂီၢ် ဒီးလၢသိၣ်က့ၤသီက့ၤတၢ်လၢ တၢ်တီတၢ်လိၤအပူၤအဂီၢ်+ ၁၇ ဒ်သိး ကစၢ်ယွၤ အခ့အပှၤတဂၤ ကတုၤထီၣ်ထီၣ်ဘး လၢလၢပှဲၤပှဲၤ ဒီးကအိၣ်ကတဲာ်ကတီၤအသး လၢလၢပှဲၤပှဲၤလၢ တၢ်မၤလၢအဂ့ၤ ကိးမံၤဒဲးအဂီၢ်လီၤ.