၁ စီၤပၤ

၁၆ ယဟိဝၤယွၤ ဟ့ၣ်လီၤတၢ်ကစီၣ်လၢ အထီဒါ စီၤဘါၡၤ ခီဖျိလၢ စီၤဃနၤနံ+ အဖိခွါ ဝံယ့ၤဟူ+ ဒီးတဲဝဲလၢ ၂ “ယထုးထီၣ်နၤလၢ ပှၤလၢ အပတီၢ်ဖုၣ်တဖၣ်အကျါ* ဒီးယဒုးကဲထီၣ်နၤလၢ ယပှၤဂီၢ်မုၢ် အံၣ်စရ့လး အခိၣ်အနၢ်+ ဘၣ်ဆၣ်​ နအိၣ်မူပိာ်ထွဲဒ် စီၤယၤရၤဘၣ်​ အသိး ဒီးနဆီၣ်ထွဲ ယပှၤဂီၢ်မုၢ် အံၣ်စရ့လး လၢအဝဲသ့ၣ်​ ကမၤတၢ်ဒဲးဘးလၢ အမၤဆါယသးလီၤ.+ ၃ အဃိ ယကခွဲပျီကွံာ် စီၤဘါၡၤ ဒီးအစၢၤအသွဲၣ်​ ဒီးယကမၤ အစၢၤအသွဲၣ်ဒ် စီၤနဘး အဖိခွါ စီၤယၤရၤဘၣ်+ အစၢၤအသွဲၣ်အသိးလီၤ. ၄ ပှၤတဂၤဂ့ၤ တဂၤဂ့ၤလၢ အဘၣ်ဃးဒီး စီၤဘါၡၤ မ့ၢ်သံလၢဝ့ၢ်ပူၤန့ၣ်​ ထွံၣ်ကအီၣ်​ အဝဲသ့ၣ်လီၤ. ဒီးအဝဲသ့ၣ်​ တဂၤဂ့ၤ တဂၤဂ့ၤ မ့ၢ်သံလၢ ပျီပူၤန့ၣ်​ ထိၣ်လၢအယူၤလၢ တၢ်ဖးဖီန့ၣ်​ ကအီၣ်အဝဲသ့ၣ်လီၤ.”

၅ မ့မ့ၢ် စီၤဘါၡၤ အဂ့ၢ်လၢအဂၤတဖၣ်, တၢ်လၢအမၤဝဲ ဒီးအတၢ်မၤလၢ အဒိၣ်အမုၢ်တဖၣ်အဂ့ၢ်န့ၣ်​ ဘၣ်တၢ်ကွဲးလီၤအီၤလၢ အံၣ်စရ့လး အစီၤပၤ တၢ်စံၣ်စိၤတဲစိၤ အလံာ်ပူၤလီၤ. ၆ လၢခံ စီၤဘါၡၤ သံဝဲဒ် အမိၢ်ပၢ်ဖံဖု လၢပျၢၤတဖၣ်အသိး ဒီးဘၣ်တၢ်ခူၣ်လီၤအီၤလၢ ဝ့ၢ်တံးရစၢ် အပူၤလီၤ.+ ဒီးအဖိခွါ စီၤအ့လၤ ကဲထီၣ်စီၤပၤလၢ အလီၢ်လီၤ. ၇ လၢညါန့ၣ်​ ယဟိဝၤယွၤ ဟ့ၣ်လီၤတၢ်ကစီၣ်လၢ အထီဒါ စီၤဘါၡၤ ဒီးအစၢၤအသွဲၣ်​ ခီဖျိလၢ စီၤဃနၤနံ အဖိခွါ ဝံယ့ၤဟူလီၤ. အဝဲဟ့ၣ်လီၤ တၢ်ကစီၣ်အံၤ ခီဖျိလၢ စီၤဘါၡၤ ကဲထီၣ်ဒ် စီၤယၤရၤဘၣ်​ အစၢၤအအသွဲၣ်အသိး မ့ၢ်လၢ အမၤတၢ်အၢတၢ်သီ အါမံၤလၢ ယဟိဝၤယွၤ အမဲာ်ညါ ဒီးမၤသးထီၣ်​ ကစၢ်ယွၤ ခီဖျိတၢ်လၢ အမၤတ့ၢ်ဝဲတဖၣ်​ အဃိလီၤ. တကးဒံးဘၣ်​ အဝဲမၤသံ စီၤနၤဒး စ့ၢ်ကီးလီၤ.+

၈ ဖဲယူဒၤ အစီၤပၤအၤစါ ပၢတၢ် ၂၆ နံၣ်တနံၣ်န့ၣ်​ စီၤဘါၡၤ အဖိခွါ စီၤအ့လၤ ကဲထီၣ်အံၣ်စရ့လး အစီၤပၤလၢ ဝ့ၢ်တံးရစၢ်အပူၤ ဒီးအဝဲပၢဘၣ်တၢ် ခံနံၣ်လီၤ. ၉ ဘၣ်ဆၣ်​ ဘၣ်တဘျီ ဖဲစီၤအ့လၤ အိၣ်ဝဲလၢ ဝ့ၢ်တံးရစၢ်အပူၤ လၢစီၤအၢ်စၤ လၢအမ့ၢ် ပှၤလၢအတီခိၣ်ရိၤမဲတၢ်လၢ နီပူၤတဂၤန့ၣ်​ အဟံၣ်အခါ အဝဲအီမူၤအသးလီၤ. ဖဲန့ၣ်အခါ စီၤအ့လၤ အခ့အပှၤ စီၤစံၣ်ရံၤ လၢအမ့ၢ် စီၤပၤအလ့ၣ်ကဟၣ်သုး ခံပူတပူအခိၣ်တဂၤန့ၣ်​ ကူၣ်အၢအီၤလီၤ. ၁၀ အဃိ ဖဲယူဒၤ အစီၤပၤအၤစါ ပၢတၢ် ၂၇ နံၣ်တနံၣ်န့ၣ်​ စီၤစံၣ်ရံၤ ဟဲမၤသံကွံာ် စီၤအ့လၤ+ ဒီးအကဲထီၣ်​ စီၤပၤလၢ စီၤအ့လၤ အလီၢ်လီၤ. ၁၁ အဃိ စီၤစံၣ်ရံၤ ကဲထီၣ်စီၤပၤ ဒီးဖဲအဝဲဆ့ၣ်နီၤလၢ လီၢ်ပစိာ်အဖီခိၣ်​ တဘျီဃီန့ၣ်​ အဝဲမၤသံကွံာ်ဝဲ စီၤဘါၡၤ အစၢၤအသွဲၣ်​ ခဲလၢာ်လီၤ. ဒီးပှၤပိာ်ခွါလၢ အမ့ၢ်စီၤဘါၡၤ အဘူးအတံၢ်မ့ၢ်ဂ့ၤ* အသကိးမ့ၢ်ဂ့ၤ စီၤစံၣ်ရံၤ တပာ်မူဝဲနီတဂၤဘၣ်. ၁၂ ဒ်ယဟိဝၤယွၤ ဟ့ၣ်လီၤတၢ်ကစီၣ်လၢ အထီဒါ စီၤဘါၡၤ ခီဖျိလၢ ဝံယ့ၤဟူ အသိး စီၤစံၣ်ရံၤ မၤဟးဂီၤကွံာ်ဝဲ စီၤဘါၡၤ အစၢၤအသွဲၣ်​ ခဲလၢာ်လီၤ.+ ၁၃ တၢ်ကဲထီၣ်အသးဒ်အံၤ ခီဖျိလၢ စီၤဘါၡၤ ဒီးအဖိခွါ စီၤအ့လၤ အတၢ်ဒဲးဘးခဲလၢာ် ဒီးမ့ၢ်လၢ အဝဲသ့ၣ်ဆီၣ်ထွဲ ပှၤအံၣ်စရ့လးဖိလၢ ကမၤတၢ်ဒဲးဘးလၢ အဘၣ်ထွဲဒီး တၢ်ဂီၤတၢ်ဖှီၣ်လၢ အဘျုးတအိၣ်ဘၣ်တဖၣ်​ ဒီးမၤသးထီၣ်​ အံၣ်စရ့လး အကစၢ် ယဟိဝၤယွၤ အသးအဃိလီၤ.+ ၁၄ မ့မ့ၢ် စီၤအ့လၤ အဂ့ၢ်လၢ အဂၤတဖၣ်​ ဒီးတၢ်လၢအမၤဝဲ ခဲလၢာ်န့ၣ်​ ဘၣ်တၢ်ကွဲးလီၤအီၤလၢ အံၣ်စရ့လး အစီၤပၤ တၢ်စံၣ်စိၤတဲစိၤ အလံာ်ပူၤလီၤ.

၁၅ ဖဲယူဒၤ အစီၤပၤအၤစါ ပၢတၢ် ၂၇ နံၣ်တနံၣ်န့ၣ်​ စီၤစံၣ်ရံၤ ကဲဘၣ်စီၤပၤလၢ ဝ့ၢ်တံးရစၢ်အပူၤ နွံသီလီၤ. ဖဲန့ၣ်အဆၢကတီၢ် သုးဖိတဖု ဆီလီၤအသး ဒ်သိးကဒုးဝဲ ဝ့ၢ်ကံးဘသိၣ်+ လၢအအိၣ်လၢ ပှၤဖလ့ၡသးဖိ အတၢ်ပၢဖီလာ်န့ၣ်လီၤ. ၁၆ လၢခံ သုးဖိတဖုလၢ အဆီလီၤအသးန့ၣ်​ နၢ်ဟူဝဲ ပှၤတဲလၢ “စီၤစံၣ်ရံၤ ကူၣ်ထီၣ်တၢ်ဒီး မၤသံကွံာ်စီၤပၤလံ.” အဃိ လၢဒဲကဝီၤပူၤန့ၣ်​ ပှၤအံၣ်စရ့လးဖိ ခဲလၢာ် ဒုးကဲထီၣ်​ သုးခိၣ်ကျၢၢ် စီၤဧိၣ်ရံၤ+ လၢစီၤပၤ လၢအံၣ်စရ့လး အဖီခိၣ်​ ဖဲတၢ်တနံၤန့ၣ်လီၤ. ၁၇ စီၤဧိၣ်ရံၤ ဒီးပှၤအံၣ်စရ့လးဖိလၢ အအိၣ်ဒီးအီၤခဲလၢာ် ဟးထီၣ်ဝဲလၢ ဝ့ၢ်ကံးဘသိၣ်​ ဒီးအဝဲသ့ၣ်​ လဲၤကဝီၤဃာ်ဝဲ ဝ့ၢ်တံးရစၢ်လီၤ. ၁၈ ဖဲစီၤစံၣ်ရံၤ ထံၣ်ဝဲလၢ ပှၤမၤန့ၢ်ဝ့ၢ်လံအခါ အဝဲလဲၤနုာ်လီၤလၢ စီၤပၤအနီပူၤလၢ အကျၢၤကတၢၢ်တတီၤ ဒီးဖဲအဝဲအိၣ်လၢ နီပူၤအခါ အဝဲဒွဲၣ်အူထီၣ်ကွံာ်ဝဲနီ ဒီးမ့ၣ်အူ အီၣ်သံကွံာ်အီၤလီၤ.+ ၁၉ တၢ်ကဲထီၣ်အသးဒ်အံၤ ခီဖျိလၢ အနီၢ်ကစၢ် အတၢ်ဒဲးဘးလၢ အမၤဘၣ်ဝဲခီဖျိ အမၤတၢ်လၢ ယဟိဝၤယွၤ ထံၣ်ဝဲလၢအအၢ ဒီးအိၣ်မူပိာ်ထွဲဒ် စီၤယၤရၤဘၣ်အသိး ဒီးမ့ၢ်လၢ အဆီၣ်ထွဲ ပှၤအံၣ်စရ့လးဖိလၢ ကမၤတၢ်ဒဲးဘး အဃိလီၤ.+ ၂၀ မ့မ့ၢ် စီၤစံၣ်ရံၤ အဂ့ၢ်လၢအဂၤတဖၣ်​ ဒီးအတၢ်ကူၣ်အၢအဂ့ၢ်န့ၣ်​ ဘၣ်တၢ်ကွဲးလီၤအီၤလၢ အံၣ်စရ့လး အစီၤပၤ တၢ်စံၣ်စိၤတဲစိၤ အလံာ်ပူၤလီၤ.

၂၁ ဖဲန့ၣ်အခါ တၢ်လီၤမုၢ်လီၤဖး အိၣ်ထီၣ်လၢ အံၣ်စရ့လး အပှၤဂီၢ်မုၢ်အကျါ ဒီးအဝဲသ့ၣ်လီၤဖး ခံဖုလီၤ. တဖုန့ၣ်​ အိၣ်ဃူဝဲ စီၤကံနး အဖိခွါ စီၤတံးဘနံၤ ဒီးအဲၣ်ဒိး ဒုးကဲထီၣ်အီၤလၢ စီၤပၤလီၤ. ဒီးအဝဲတဖုန့ၣ်​ အိၣ်ဃူဝဲ စီၤဧိၣ်ရံၤလီၤ. ၂၂ ဘၣ်ဆၣ်​ ပှၤလၢအအိၣ်ဃူ စီၤဧိၣ်ရံၤန့ၣ်​ မၤနၢၤဝဲ ပှၤလၢအအိၣ်ဃူ စီၤကံနး အဖိခွါ စီၤတံးဘနံၤလီၤ. အဃိ စီၤတံးဘနံၤ သံဝဲ ဒီးစီၤဧိၣ်ရံၤ ကဲထီၣ်က့ၤ စီၤပၤလီၤ.

၂၃ ဖဲယူဒၤ အစီၤပၤအၤစါ ပၢတၢ် ၃၁ နံၣ်တနံၣ်န့ၣ်​ စီၤဧိၣ်ရံၤ ကဲထီၣ်စီၤပၤလၢ အံၣ်စရ့လးအဖီခိၣ်​ ဒီးအဝဲပၢဘၣ်တၢ် ၁၂ နံၣ်လီၤ. အဝဲပၢတၢ်လၢ ဝ့ၢ်တံးရစၢ်အပူၤ ဃုနံၣ်လီၤ. ၂၄ စီၤဧိၣ်ရံၤ ပှ့ၤန့ၢ်ဝဲ ကစၢၢ်ၡၤမရံ လၢစီၤၡ့မ့ၢ် အအိၣ်လၢ စ့ညၣ်​ ခံတၤလၣ်* ဒီးအဝဲတ့ထီၣ်ဝဲ ဝ့ၢ်လၢကစၢၢ်လိၤလီၤ. ဝ့ၢ်လၢ အတ့ထီၣ်ဝဲတဖျၢၣ်န့ၣ်​ အဝဲကိးဝဲလၢ ၡၤမရံ*+ ဒ်ကစၢၢ်တဖျၢၣ်န့ၣ်​ အကစၢ်စီၤၡ့မ့ၢ် အမံၤအသိးလီၤ. ၂၅ စီၤဧိၣ်ရံၤ မၤဝဲ တၢ်လၢ ယဟိဝၤယွၤ ထံၣ်ဝဲလၢအအၢ တလီၢ်လီၢ် ဒီးစီၤဧိၣ်ရံၤန့ၣ်​ အအၢဒိၣ်န့ၢ်ဒံး ပှၤလၢအပၢတၢ်လၢ အမဲာ်ညါ ခဲလၢာ်လီၤ.+ ၂၆ စီၤဧိၣ်ရံၤ အိၣ်မူပိာ်ထွဲဒ် စီၤနဘး အဖိခွါ စီၤယၤရၤဘၣ်​ အသိးလၢ တၢ်ခဲလၢာ်အပူၤလီၤ. ဒီးအဝဲမၤ တၢ်ဒဲးဘးလၢ စီၤယၤရၤဘၣ်​ ဆီၣ်ထွဲ ပှၤအံၣ်စရ့လးဖိလၢ ကမၤဝဲလၢအဘၣ်ထွဲဒီး တၢ်ဂီၤတၢ်ဖှီၣ်လၢ အဘျုးတအိၣ်ဘၣ်တဖၣ်လီၤ. တၢ်ဒဲးဘးတခါန့ၣ်​ မၤဆါ အံၣ်စရ့လး အကစၢ် ယဟိဝၤယွၤ အသးလီၤ.+ ၂၇ မ့မ့ၢ် စီၤဧိၣ်ရံၤ အဂ့ၢ်လၢအဂၤတဖၣ်, တၢ်လၢအမၤဝဲ ဒီးအတၢ်မၤလၢအဒိၣ်အမုၢ်တဖၣ်အဂ့ၢ်န့ၣ်​ ဘၣ်တၢ်ကွဲးလီၤအီၤလၢ အံၣ်စရ့လး အစီၤပၤ တၢ်စံၣ်စိၤတဲစိၤ အလံာ်ပူၤလီၤ. ၂၈ ဒီးစီၤဧိၣ်ရံၤ သံဝဲဒ် အမိၢ်ပၢ်ဖံဖု လၢပျၢၤတဖၣ်အသိး ဒီးဘၣ်တၢ်ခူၣ်လီၤကွံာ်အီၤလၢ ဝ့ၢ်ၡၤမရံ အပူၤလီၤ. ဒီးအဖိခွါ စီၤအၤဃာ်+ ကဲထီၣ်​ စီၤပၤလၢ အလီၢ်လီၤ.

၂၉ ဖဲယူဒၤ အစီၤပၤအၤစါ ပၢတၢ် ၃၈ နံၣ်တနံၣ်န့ၣ်​ စီၤဧိၣ်ရံၤ အဖိခွါ စီၤအၤဃာ် ကဲထီၣ်စီၤပၤလၢ အံၣ်စရ့လး အဖီခိၣ်လီၤ. စီၤဧိၣ်ရံၤ အဖိခွါ စီၤအၤဃာ် ပၢဘၣ်တၢ်လၢ အံၣ်စရ့လးအဖီခိၣ်​ လၢဝ့ၢ်ၡၤမရံအပူၤ+ ၂၂ နံၣ်လီၤ. ၃၀ ယဟိဝၤယွၤ ထံၣ်ဝဲလၢ စီၤဧိၣ်ရံၤ အဖိခွါ စီၤအၤဃာ်န့ၣ်​ အအၢဒိၣ်န့ၢ်ဒံး ပှၤလၢအပၢတၢ်လၢ အမဲာ်ညါခဲလၢာ်လီၤ.+ ၃၁ အဝဲ မၤတၢ်ဒဲးဘး ဒ်စီၤနဘး အဖိခွါ စီၤယၤရၤဘၣ်+ မၤဝဲအသိး သနာ်က့ ဖျါလီၤဂာ်လၢ အမၤဝဲတဘျဲဒံးဘၣ်​ အဃိ အဝဲဟံးန့ၢ်အမါလၢ ပှၤစံဒိၣ်ဖိ+ အစီၤပၤအ့သဘၤလး အဖိမုၣ်​ နီၢ်အံၤစ့ဘ့ၤလး+ ဒီးဘူၣ်ထီၣ်ဘါထီၣ်​ ဘဧၤလးန့ၣ်လီၤ.+ ၃၂ တကးဒံးဘၣ်​ လၢဘဧၤလး အဟံၣ်* လၢအတ့ထီၣ်ဝဲလၢ ဝ့ၢ်ၡၤမရံအပူၤန့ၣ်​ အဝဲဆီလီၤဝဲ တၢ်လုၢ်လီၢ်တဖျၢၣ်လၢ ဘဧၤလးအဂီၢ်လီၤ.+ ၃၃ စီၤအၤဃာ် တ့ထီၣ်စ့ၢ်ကီး တၢ်စီဆှံအထူၣ်*+ ဒီးစီၤအၤဃာ် မၤဆါ အံၣ်စရ့လး အကစၢ် ယဟိဝၤယွၤ အသးဒိၣ်န့ၢ်ဒံး အံၣ်စရ့လး အစီၤပၤတဖၣ်​ လၢအပၢတၢ် လၢအမဲာ်ညါ ခဲလၢာ်လီၤ.

၃၄ ဖဲအဝဲပၢတၢ် အဆၢကတီၢ်န့ၣ်​ ပှၤဘ့ၤသ့လးဖိ စီၤဃံၤအ့လး သူၣ်ထီၣ်ကဒါက့ၤ ဝ့ၢ်ယရံၤဃိလီၤ. ဒ်ယဟိဝၤယွၤ တဲဆိပာ်စၢၤ ခီဖျိ စီၤနိၣ်အဖိခွါ စီၤယိၤၡူအသိးန့ၣ်​ ဖဲအဝဲသူၣ်ထီၣ်​ ဝ့ၢ်အခီၣ်ထံးအခါ အဝဲတူၢ်ၡူကွံာ် အဖိဝဲၢ်ကိ စီၤအဘံရၣ်​ ဒီးဖဲအဝဲသူၣ်ထီၣ်​ ဝ့ၢ်အတြဲၤတဖၣ်အခါ အဝဲတူၢ်ၡူကွံာ် အဖိသဒါ စီၤစကံာ်လီၤ.+