ဖံၤလ့မိၣ်
၁ ယၤ, စီၤပီလူးအံၤ တၢ်စၢဃာ်ယၤလၢ+ ယ့ၣ်ၡူးခရံာ်အဃိ ဒီးယအိၣ်ဒီး ပဒီပုၢ်ဝဲၢ်စီၤတံၤမသ့းလီၤ.+ ပပှၤမၤသကိးတၢ်လၢ ပအဲၣ်အီၤ စီၤဖံၤလ့မိၣ်ဧၢ, ယကွဲးလံာ်အံၤဆူနအိၣ်, ၂ ဒီးဆူပဒီပုၢ်ဝဲၢ်မုၣ် နီၢ်အးဖံ ဒီးစီၤအၢ်ဃံးပူး+ လၢအမ့ၢ်ခရံာ်အသုးဖိ ဒ်သိးဒီးပှၤ ဒီးတၢ်အိၣ်ဖှိၣ်လၢ အအိၣ်ဖှိၣ်လၢ နဟံၣ်ပူၤန့ၣ်+ အအိၣ်လီၤ.
၃ မ်သုဒိးန့ၢ်ဘၣ် တၢ်သးကညီၤ ဒိၣ်ဒိၣ်မုၢ်မုၢ် ဒီးတၢ်ဃူတၢ်ဖိးလၢ အဟဲလၢပပၢ်ကစၢ်ယွၤ ဒီးလၢကစၢ် ယ့ၣ်ၡူးခရံာ် အအိၣ်န့ၣ်တက့ၢ်.
၄ ဖဲယယၢၤထီၣ်နဂ့ၢ်လၢ ယတၢ်ထုကဖၣ်အပူၤအခါ ယစံးဘျုး ယကစၢ်ယွၤ ထီဘိလီၤ.+ ၅ ဘၣ်ဃးဒီး နတၢ်နာ် ဒီးနတၢ်အဲၣ်လၢ ကစၢ်ယ့ၣ်ၡူး ဒီးပှၤစီဆှံခဲလၢာ်အဖီခိၣ်န့ၣ် ယနၢ်ဟူထီဘိလီၤ. ၆ ယဃ့ထုကဖၣ်ဒ်သိး တၢ်စူၢ်တၢ်နာ်တမံၤဃီလၢ အအိၣ်ဒီးပှၤန့ၣ် ကထိၣ်ဟူးထိၣ်ဂဲၤထီၣ်နၤလၢ နကအၢၣ်လီၤတူၢ်လိာ် တၢ်လၢအဂ့ၤကိးမံၤဒဲးလၢ အအိၣ်ဒီးပှၤခီဖျိခရံာ်လီၤ. ၇ ဒီပုၢ်ဝဲၢ်ဧၢ, ဖဲယနၢ်ဟူ လၢပှၤစီဆှံတဖၣ် အသးမုာ်ထီၣ်ခီဖျိလၢ နတၢ်အဲၣ်တၢ်ကွံအဃိအခါ ယသးခု ဒီးယသူၣ်မံသးမုာ် ဒိၣ်မးလီၤ.
၈ လၢတၢ်ဂ့ၢ်အံၤအဃိ ယမ့ၢ်အိၣ်ဒီး တၢ်သဘျ့ လၢလၢပှဲၤပှဲၤလၢ ယကမၤလိာ်နၤလၢ ခရံာ်အမံၤအပူၤ ဒ်သိးနကမၤတၢ်လၢ အကြၢးအဘၣ်အဂီၢ် သနာ်က့ ၉ ယအဲၣ်ဒိးဃ့ကညးနၤလၢ နကမၤဒ်အံၤ ခီဖျိနတၢ်အဲၣ်တၢ်ကွံအဃိ ဒီးမ့ၢ်လၢယၤ, စီၤပီလူး မ့ၢ်ပှၤသးပှၢ်တဂၤ ဒီးတၢ်စၢဃာ်စ့ၢ်ကီးယၤ ခဲအံၤလၢခရံာ်အဃိလီၤ. ၁၀ ယဃ့ကညးနၤလၢ ယဖိခွါစီၤအီးန့ၤစံမူးအဂီၢ်လီၤ.+ ဖဲတၢ်စၢဃာ်ယၤအခါ ယကဲထီၣ်ဒ်သိးဒီး အပၢ်တဂၤလီၤ.+ ၁၁ လၢအပူၤကွံာ်န့ၣ် အဝဲတကဲဘျုးလၢ နဂီၢ်နီတစဲးဘၣ်. ဘၣ်ဆၣ်ခဲအံၤ အဝဲကဲဘျုးလၢ နဂီၢ်ဒီးလၢယဂီၢ်လီၤ. ၁၂ ခဲအံၤ ပှၤလၢယအဲၣ်အီၤဒိၣ်မးတဂၤအံၤ ယကဆှၢက့ၤအီၤလၢ နအိၣ်လီၤ.
၁၃ ယအဲၣ်ဒိး မၢအဆဲးအိၣ်ဒီးယၤဖဲအံၤ ဒ်သိးဖဲတၢ်စၢဃာ်ယၤ ဒ်အံၤလၢ တၢ်သးခုကစီၣ်+ အဃိအခါ အဝဲကမၤစၢၤယၤလၢ နလီၢ်န့ၣ်လီၤ. ၁၄ ဘၣ်ဆၣ် နမ့ၢ်တဟ့ၣ်အခွဲးဘၣ်န့ၣ် ယတအဲၣ်ဒိးမၤတၢ် နီတမံၤဘၣ်. ဒီးဖဲနမၤတၢ်လၢ အဂ့ၤတမံၤအံၤအခါန့ၣ် ယတအဲၣ်ဒိးလၢ နကမၤအီၤလၢ တၢ်မၢဆူၣ်အဃိဘၣ်. ယအဲၣ်ဒိးလၢ နကမၤအီၤလၢ နသးအိၣ်နီၢ်ကီၢ်အဃိလီၤ.+ ၁၅ ဘၣ်သ့ၣ်သ့ၣ် အဝဲဟးဖးဒီးနၤတစိၢ်ဖိန့ၣ် မ့ၢ်ဒ်သိး နကဒိးန့ၢ်ဘၣ်က့ၤအီၤ လီၤထူလီၤယိာ်အဂီၢ်လီၤ. ၁၆ ဒီးနကဒိးန့ၢ်ဘၣ်က့ၤအီၤန့ၣ် တမ့ၢ်ထဲ ဒ်သိးဒီးကုၢ်တဂၤအသိးလၢၤဘၣ်.+ နကဒိးန့ၢ်ဘၣ်က့ၤအီၤ ဒ်ဒီပုၢ်ဝဲၢ်လၢ အဘၣ်တၢ်အဲၣ်အီၤတဂၤလၢ+ အလုၢ်ဒိၣ်ပှ့ၤဒိၣ်န့ၢ်ဒံးကုၢ်တဂၤ အသိးလီၤ. ယအဲၣ်အီၤဒိၣ်မး ဒီးနၤစ့ၢ်ကီးနကအဲၣ်အီၤ ဒိၣ်န့ၢ်ယအဲၣ်အီၤ ဒ်အမ့ၢ်ကုၢ်တဂၤ ဒီးခရံာ်ဖိ ဒီပုၢ်ဝဲၢ်တဂၤ အသိးလီၤ. ၁၇ အဃိ နမ့ၢ်ပာ်ယၤဒ်သိးဒီး နသကိးတဂၤန့ၣ် တူၢ်လိာ်က့ၤအီၤလၢ တၢ်အဲၣ်တၢ်ကွံအပူၤ ဒ်နတူၢ်လိာ်ယၤအသိးတက့ၢ်. ၁၈ ဒီးအဝဲမ့ၢ်မၤကမၣ်တ့ၢ်နၤ တမံၤမံၤ မ့တမ့ၢ် အကမၢ်မ့ၢ်အိၣ်ဒီးနၤ တမံၤမံၤန့ၣ် ပာ်က့ၤအီၤဒ်ကမၢ်လၢ ယဘၣ်ဟ့ၣ်က့ၤနၤတက့ၢ်. ၁၉ ယၤ, စီၤပီလူးအံၤ ယကွဲးန့ၢ်နၤလၢ ယနီၢ်ကစၢ်အစုလၢ ယကလိးက့ၤနၤလီၤ. ဘၣ်ဆၣ် နီၢ်ကီၢ်န့ၣ် နသ့ၣ်ညါလၢ နကမၢ်အိၣ်ဒီးယၤအါမး, ပၣ်ဃုာ်ဒီး နသးသမူလီၤ. ၂၀ မ့ၢ်လံ, ဒီပုၢ်ဝဲၢ်ဧၢ, မ်ယဒိးန့ၢ်ဘၣ် တၢ်မၤစၢၤတခါအံၤလၢနအိၣ် လၢကစၢ်အဃိတက့ၢ်. မၤမုာ်ယသးလၢ ခရံာ်အဃိတက့ၢ်.
၂၁ ယနာ်လၢ နကမၤ ဒ်တၢ်လၢယဃ့နၤအသိးလီၤ. ဒီးယကွဲးန့ၢ်နၤ လံာ်တဘ့ၣ်အံၤ မ့ၢ်လၢ ယသ့ၣ်ညါလၢ နကမၤအါန့ၢ်ဒံး တၢ်လၢယဃ့အဃိလီၤ. ၂၂ တကးဒံးဘၣ် ကတဲာ်ကတီၤန့ၢ်ယၤ တၢ်လီၢ်လၢ ယကအိၣ်အဂီၢ်တက့ၢ်. ယမုၢ်လၢ်လၢ ခီဖျိလၢ သုတၢ်ဃ့ထုကဖၣ်အဃိ ယကဟဲက့ၤဘၣ်ကဒါက့ၤလၢ သုအိၣ်လီၤ.+
၂၃ စီၤအ့းပၤဖြါ+ လၢအမ့ၢ် ပှၤလၢ အဘၣ်တၢ်စၢဃာ်အီၤ ဃုာ်ဒီးယၤ လၢယ့ၣ်ၡူးခရံာ်အဃိန့ၣ် ဆၢဂ့ၤဆၢဝါနၤလီၤ. ၂၄ ဒီးယပှၤမၤသကိးတၢ်တဖၣ် လၢအမ့ၢ် စီၤမၢ်ကူး, စီၤအရံစတၢ်ဃူး,+ စီၤဒ့မၤ+ ဒီးစီၤလူၤကၣ်န့ၣ်+ ဆၢဂ့ၤဆၢဝါနၤစ့ၢ်ကီးလီၤ.
၂၅ မ့ၢ်လၢ သုအိၣ်ဒီး တၢ်ပာ်သူၣ်ပာ်သး လၢအဂ့ၤအဃိ မ်ကစၢ် ယ့ၣ်ၡူးခရံာ် ပာ်ဖျါထီၣ် အတၢ်သးကညီၤ ဒိၣ်ဒိၣ်မုၢ်မုၢ် လၢသုဖီခိၣ်တက့ၢ်.