မးသဲ
၂၀ “မူခိၣ်အဘီအမုၢ်န့ၣ် လီၤဂာ်ဒီး စပံးကျီးကစၢ်တဂၤလၢ အလဲၤတၢ်ဂီၤဂီၤ ဒ်သိးကငါန့ၢ်ဝဲ ပှၤမၤတၢ်ဖိတဖၣ်လၢ အစပံးကျီးအဂီၢ်လီၤ.+ ၂ အဝဲတဲဘၣ် ပှၤမၤတၢ်ဖိတဖၣ်လၢ တနံၤန့ၣ် ကဟ့ၣ်အဝဲသ့ၣ် စ့ဒန့ၤရံၤတဘ့ၣ်* ဝံၤဒီး အမၢအဝဲသ့ၣ် လဲၤမၤတၢ်လၢ အစပံးကျီးအပူၤလီၤ. ၃ ဒီးလၢဂီၤခီ ၉ နၣ်ရံၣ်ဃၣ်ဃၣ်န့ၣ်* အလဲၤထံၣ်ဝဲ ပှၤလၢ အတၢ်မၤတအိၣ်ဘၣ်တဖၣ် ဆၢထၢၣ်ဝဲလၢ တၢ်ဆါတၢ်ပှ့ၤအလီၢ်လီၤ. ၄ ဒီးအဝဲတဲဘၣ်အဝဲသ့ၣ်လၢ ‘သုစ့ၢ်ကီး လဲၤမၤတၢ်လၢ ယစပံးကျီးအပူၤမီၤ. ယကဟ့ၣ်သုအဘူးအလဲဒ် အကြၢးဝဲဘၣ်ဝဲအသိးလီၤ.’ ၅ အဃိ အဝဲသ့ၣ် လဲၤမၤတၢ်လီၤ. ဒီးစပံးကျီးကစၢ်န့ၣ် လဲၤကဒီးဝဲလၢ မုၢ်ဆါခီ ၁၂ နၣ်ရံၣ်ဃၣ်ဃၣ်* ဒီးလၢဟါလီၤခီ ၃ နၣ်ရံၣ်ဃၣ်ဃၣ်* ဒ်သိး ကလဲၤငါန့ၢ်ဝဲ ပှၤမၤတၢ်ဖိတဖၣ် အဂီၢ်လီၤ. ၆ လၢခံကဘၣ်ဖဲ ဟါလီၤခီ ၅ နၣ်ရံၣ်ဃၣ်ဃၣ်န့ၣ်* အလဲၤကဒီးဝဲဒီးထံၣ်ဝဲ ပှၤအဂၤတနီၤ ဆၢထၢၣ်ဖဲန့ၣ် ဒီးအတဲအဝဲသ့ၣ်လၢ ‘ဘၣ်မနုၤအဃိ သုဆၢထၢၣ်ဖဲအံၤ ဒီတနံၤကျၢၤ ဒီးသုတမၤတၢ်မၤဘၣ်လဲၣ်.’ ၇ ဒီးအဝဲသ့ၣ် တဲဆၢဝဲလၢ ‘ပှၤတငါပှၤ နီတဂၤဒၢး.’ ဒီးအဝဲတဲဘၣ် အဝဲသ့ၣ်လၢ ‘မ့မ့ၢ်ဒ်န့ၣ်န့ၣ် သုဝဲစ့ၢ်ကီး လဲၤမၤတၢ်လၢ ယစပံးကျီးအပူၤမီၤ.’
၈ “ဖဲမုၢ်ဟါလီၤအဆၢကတီၢ် စပံးကျီးကစၢ် တဲဘၣ် အပှၤကွၢ်ထွဲအတၢ်မၤတဂၤလၢ ‘ကိးန့ၢ် ပှၤမၤတၢ်ဖိတဖၣ် ဒီးဟ့ၣ်လီၤအဝဲသ့ၣ် အဘူးအလဲ+ စးထီၣ်လၢ ပှၤလၢအဟဲတုၤ အလီၢ်ခံကတၢၢ်တဖၣ် တုၤလီၤလၢ ပှၤလၢအဟဲတုၤ အဆိကတၢၢ်တဖၣ်တက့ၢ်.’ ၉ ဖဲပှၤလၢအလဲၤ စးထီၣ်မၤတၢ်မၤလၢ ဟါခီ ၅ နၣ်ရံၣ်ဟဲတုၤအခါ အဝဲသ့ၣ် ဒိးန့ၢ်ဘၣ် စ့ဒန့ၤရံၤ* တဂၤတဘ့ၣ်လီၤ. ၁၀ ဒီးဖဲပှၤလၢ အစးထီၣ်မၤတၢ်မၤ လၢအဆိကတၢၢ်တဖၣ် ဟဲတုၤအခါ အဝဲသ့ၣ် ဆိကမိၣ်ဝဲလၢ အကဒိးန့ၢ်ဘၣ်ဝဲ အါန့ၢ်အန့ၣ်လီၤ. ဘၣ်ဆၣ် အဝဲသ့ၣ်စ့ၢ်ကီး ဒိးန့ၢ်ဘၣ်ဝဲ စ့ဒန့ၤရံၤ တဂၤတဘ့ၣ်လီၤ. ၁၁ ဖဲအဝဲသ့ၣ် ဒိးန့ၢ်ဘၣ်ဝဲအခါ အဝဲသ့ၣ်ကဒူးကဒ့ၣ်ဝဲ စပံးကျီးကစၢ်လီၤ. ၁၂ ဒီးအဝဲသ့ၣ်တဲဝဲလၢ ‘ပှၤလၢ အဟဲတုၤလၢ အလီၢ်ခံကတၢၢ်တဖၣ် ဘၣ်မၤတၢ်ထဲ တနၣ်ရံၣ်လီၤ. ဘၣ်ဆၣ် နဟ့ၣ်အဝဲသ့ၣ် အဘူးအလဲ ထဲသိးဒီးပှၤ ဒီးပဘၣ်မၤတၢ်နးနး ဒီတနံၤ လၢတၢ်ကိၢ်ကျါလီၤ.’ ၁၃ ဒီးစပံးကျီးကစၢ် တဲဆၢက့ၤ ပှၤလၢ အဝဲသ့ၣ်အကျါတဂၤလၢ ‘ခွါဧၢ, ယတမၤကမၣ်နၤ နီတမံၤမၢၤ. နတူၢ်လိာ်လၢ ယကဟ့ၣ်နၤ စ့ဒန့ၤရံၤတဘ့ၣ် တမ့ၢ်ဧီၤ.+ ၁၄ ဟံးန့ၢ်နတၢ် ဒီးက့ၤတက့ၢ်. ယအဲၣ်ဒိးဟ့ၣ်လီၤ ပှၤလၢအဟဲတုၤ အလီၢ်ခံကတၢၢ် ပှဲၤသိးဒီးနၤလီၤ. ၁၅ ယသူ ယကျိၣ်ယစ့ ဖဲယအဲၣ်ဒိးသူန့ၣ် တန့ၢ်ဧီၤ. မ့ၢ်လၢယသးဂ့ၤ* လၢအဝဲသ့ၣ်အဖီခိၣ်အဃိ နသးက့ၣ်တၢ်ဧါ.’+ ၁၆ အဃိ ပှၤလၢအအိၣ်လၢ တၢ်လီၢ်ခံန့ၣ် ကအိၣ်က့ၤလၢ တၢ်မဲာ်ညါ ဒီးပှၤလၢအအိၣ်လၢ တၢ်မဲာ်ညါန့ၣ် ကအိၣ်က့ၤလၢ တၢ်လီၢ်ခံလီၤ.”+
၁၇ ဖဲအဝဲသ့ၣ် လဲၤထီၣ်လၢ ဝ့ၢ်ယရူၤၡလ့ၣ်အခါ လၢကျဲန့ၣ် ယ့ၣ်ၡူးကိးဝဲ အပျဲၢ်အဘီၣ် ၁၂ ဂၤလၢ တၢ်ကပၤ ဒီးတဲအဝဲသ့ၣ်လၢ+ ၁၈ “ခဲအံၤပကလဲၤထီၣ်လၢ ယရူၤၡလ့ၣ် ဒီးပှၤကညီဖိခွါအံၤ ကဘၣ်တၢ်ဟ့ၣ်လီၤကွံာ်အီၤလၢ ပှၤလုၢ်တၢ်ဒိၣ်အခိၣ်တဖၣ် ဒီးပှၤကွဲးလံာ်ဖိတဖၣ် အစုပူၤလီၤ. ဒီးအဝဲသ့ၣ် ကစံၣ်ညီၣ်သံအီၤလီၤ.+ ၁၉ ဒီးအဝဲသ့ၣ် ကဟ့ၣ်လီၤကွံာ်အီၤလၢ ပှၤကလုာ်တဖၣ်အစုပူၤ ဒ်သိးပှၤကဒုၣ်ဒွဲၣ်အီၤ, ပှၤကတီၢ်အီၤ ဒီးပှၤကမၤသံအီၤလၢ သ့ၣ်တၢၣ်အလိၤလီၤ.+ ဘၣ်ဆၣ် လၢသၢသီတသီန့ၣ် အကဘၣ် တၢ်ဒုးဂဲၤဆၢထၢၣ်က့ၤအီၤလီၤ.”+
၂၀ စီၤစ့းဘ့းဒဲ အမါဒီးအဖိခွါခံဂၤ+ လဲၤလၢယ့ၣ်ၡူးအအိၣ် ဒီးချံးလီၤအခီၣ်လၢ တၢ်ယူးယီၣ်အပူၤ ဒီးဃ့တၢ်တမံၤလၢအအိၣ်လီၤ.+ ၂၁ ယ့ၣ်ၡူးတဲဘၣ်အီၤလၢ “နလီကီမနုၤလဲၣ်.” အဝဲတဲဆၢအီၤလၢ “ဟ့ၣ်လီၤနကလုၢ်ဒ်သိး ယဖိခွါခံဂၤအံၤ ကဆ့ၣ်နီၤလၢ နစုထွဲတဂၤ ဒီးလၢနစုစ့ၣ်တဂၤ လၢနဘီနမုၢ်အပူၤမီၤ.”+ ၂၂ ဒီးယ့ၣ်ၡူးတဲဆၢဝဲလၢ “သုဃ့တၢ်မနုၤလဲၣ်န့ၣ် သုတသ့ၣ်ညါဘၣ်. ခွးလၢယကအီအီၤန့ၣ် မ့ၢ်သုအီကကဲဧါ.”+ အဝဲသ့ၣ်တဲဆၢအီၤလၢ “ကဲဝဲသၢၤ.” ၂၃ ယ့ၣ်ၡူး တဲအဝဲသ့ၣ်လၢ “သုကအီခွးအံၤ သပှၢ်ကတၢၢ်လီၤ.+ ဘၣ်ဆၣ် မတဂၤကဆ့ၣ်နီၤလၢ ယစုထွဲလဲၣ်, မတဂၤ ကဆ့ၣ်နီၤလၢ ယစုစ့ၣ်လဲၣ်န့ၣ် ယတအိၣ်ဒီး တၢ်ခွဲးတၢ်ယာ်လၢ ယကရဲၣ်ကျဲၤတၢ်ဘၣ်. မတဂၤ ကဆ့ၣ်နီၤဘၣ် ဖဲန့ၣ်လဲၣ်န့ၣ် ယပၢ်ကဆၢတဲာ်ဝဲလီၤ.”+
၂၄ ဖဲအပျဲၢ်အဘီၣ် အဂၤတဆံ နၢ်ဟူဘၣ်ဝဲ တၢ်ဂ့ၢ်တခါအံၤအခါ အဝဲသ့ၣ် သးဒိၣ်ထီၣ် ပှၤဒီပုၢ်ဝဲၢ်ခွါ ခံဂၤအံၤလီၤ.+ ၂၅ ဘၣ်ဆၣ် ယ့ၣ်ၡူးကိးဃီၤ အဝဲသ့ၣ်လၢအအိၣ် ဒီးတဲဝဲလၢ “သုသ့ၣ်ညါလၢ ပှၤကလုာ်အခိၣ်နၢ်တဖၣ်န့ၣ် ပၢပှၤဂၤဖဲအသး ဒီးပှၤဒိၣ်ပှၤပှၢ်တဖၣ်န့ၣ် သူအတၢ်စိတၢ်ကမီၤ ဒ်သိး ကပၢပှၤဂၤအဂီၢ်လီၤ.+ ၂၆ မ့မ့ၢ်သုန့ၣ် သုတဘၣ်မၤဒ်န့ၣ်ဘၣ်.+ ပှၤမ့ၢ်အဲၣ်ဒိး ကဲထီၣ်ပှၤလၢအဒိၣ်တဂၤလၢ သုကျါန့ၣ် အကဘၣ်ကဲထီၣ် သုခ့သုပှၤလီၤ.+ ၂၇ ဒီးပှၤလၢ အအဲၣ်ဒိးန့ၢ်ဘၣ် လီၢ်လၤလၢ အဒိၣ်ကတၢၢ်လၢသုကျါန့ၣ် ကဘၣ်ကဲသုကုၢ်လီၤ.+ ၂၈ ဒ်န့ၣ်အသိး ပှၤကညီဖိခွါဟဲလီၤန့ၣ် တမ့ၢ်လၢ ပှၤကမၤန့ၢ်တၢ်လၢအဂီၢ်ဘၣ်. အဟဲလီၤဒ်သိး အကမၤန့ၢ်တၢ်လၢ ပှၤဂၤအဂီၢ်+ ဒီးဟ့ၣ်လီၤအသးသမူ လၢပှၤအါဂၤအဂီၢ် ဒ်တၢ်ပှ့ၤက့ၤအသိးလီၤ.”+
၂၉ ဖဲအဝဲသ့ၣ်ဟးထီၣ်လၢ ဝ့ၢ်ယရံၤဃိအခါ ပှၤဂီၢ်မုၢ်ဖးဒိၣ် ပိာ်ထီၣ်အခံလီၤ. ၃၀ ဒီးပှၤမဲာ်တထံၣ်တၢ်ခံဂၤ ဆ့ၣ်နီၤလၢကျဲကပၤ ဒီးဖဲအဝဲသ့ၣ် နၢ်ဟူဝဲယ့ၣ်ၡူး ဟဲဝဲဒီးကလဲၤတလၢ အဝဲသ့ၣ်အခါ အဝဲသ့ၣ်ကိးပသူထီၣ်လၢ “စီၤဒၤဝံးအဖိခွါ ကစၢ်ဧၢ, သးကညီၤပှၤမီၤ.”+ ၃၁ ပှၤဂီၢ်မုၢ်တဖၣ် အ့န့အဝဲသ့ၣ် ဒီးမၢအဝဲသ့ၣ် အိၣ်ဘှ့ၣ်လီၤ. ဘၣ်ဆၣ် အဝဲသ့ၣ် ကိးပသူထီၣ် ဒိၣ်န့ၢ်ဒံးအလီၢ်လၢ “စီၤဒၤဝံးအဖိခွါ ကစၢ်ဧၢ, သးကညီၤပှၤမီၤ.” ၃၂ အဃိ ယ့ၣ်ၡူးအိၣ်ပတုာ် ဒီးကိးအဝဲသ့ၣ် ဒီးတဲဝဲလၢ “သုအဲၣ်ဒိးလၢ ယကမၤန့ၢ်သု တၢ်မနုၤလဲၣ်.” ၃၃ အဝဲသ့ၣ် တဲဘၣ်ယ့ၣ်ၡူးလၢ “ကစၢ်ဧၢ, ပအဲၣ်ဒိး ထံၣ်ထီၣ်က့ၤတၢ်လီၤ.” ၃၄ ယ့ၣ်ၡူးသးကညီၤ အဝဲသ့ၣ်အဃိ အဝဲထိးအဝဲသ့ၣ်အမဲာ်ချံ+ ဒီးအဝဲသ့ၣ် ထံၣ်ထီၣ်က့ၤတၢ် တဘျီဃီလီၤ. ဒီးအဝဲသ့ၣ်ပိာ်ထီၣ် ယ့ၣ်ၡူးအခံလီၤ.