လီၣ်ဖျါ
၁၉ တၢ်န့ၣ်ဝံၤအလီၢ်ခံ ယနၢ်ဟူတၢ်လၢ အလီၤဂာ်ဒီး ပှၤဂီၢ်မုၢ်ဖးဒိၣ်တဒူၣ် အကလုၢ်သီၣ်ဖးဒိၣ် လၢမူခိၣ်လီၤ. အဝဲသ့ၣ်တဲဝဲလၢ “ဟါလ့ၤလူယၤ.*+ ပကစၢ်ယွၤန့ၣ် မ့ၢ်တၢ်အုၣ်က့ၤအီၣ်က့ၤကစၢ် ဒီးအပှဲၤဒီး တၢ်စိတၢ်ကမီၤ ဒီးတၢ်လၤကပီၤလီၤ. ၂ အတၢ်စံၣ်ညီၣ်တဖၣ်န့ၣ် မ့ၢ်ဝဲတီဝဲ ဒီးတီဝဲလိၤဝဲလီၤ.+ အဝဲစံၣ်ညီၣ် ပိာ်မုၣ်ဆါလီၤအီၣ်သး* တဂၤလၢ အမၤဘၣ်အၢ ဟီၣ်ခိၣ်လၢ အတၢ်မၤကမၣ်မုၣ်ကမၣ်ခွါ* အဃိန့ၣ်ဝံၤလံ. ဒီးအဟ့ၣ်ကၣ်က့ၤတၢ်လၢ အကုၢ်တဖၣ်အသွံၣ်လၢ အအိၣ်လၢ ပိာ်မုၣ်အံၤ အစုလိၤအဃိန့ၣ်+ ဝံၤလံ.” ၃ ဒီးတဘျီဃီန့ၣ် အဝဲသ့ၣ်တဲဝဲ ခံဘျီတဘျီလၢ “ဟါလ့ၤလူယၤ.*+ ဒီးမ့ၣ်အူလၢ အအီၣ်ကွံာ် ပိာ်မုၣ်အံၤန့ၣ် အခုၣ်ထီၣ်ဝဲ လီၤထူလီၤယိာ်လီၤ.”+
၄ ဒီးပှၤသူၣ်က့သးပှၢ် ၂၄ ဂၤ+ ဒီးခ့ရူာ် လွံၢ်ဂၤန့ၣ်+ ထိၣ်လီၤပှီၤအသး ဒီးဘူၣ်ထီၣ်ဘါထီၣ်ဝဲ ကစၢ်ယွၤလၢ အဆ့ၣ်နီၤလၢ လီၢ်ပစိာ်တဂၤန့ၣ် ဒီးတဲဝဲ “အၤမ့ၣ်, ဟါလ့ၤလူယၤ.”*+
၅ တကးဒံးဘၣ် လၢလီၢ်ပစိာ်အအိၣ်န့ၣ် တၢ်ကလုၢ်ဟဲလီၤဝဲ ဒီးတဲဝဲလၢ “သုဝဲခဲလၢာ်လၢ အမ့ၢ်ကစၢ်ယွၤအကုၢ်+ လၢအဒိၣ်မ့ၢ်ဂ့ၤ အဆံးမ့ၢ်ဂ့ၤ+ လၢအပျံၤ ကစၢ်ယွၤသ့ၣ်ဧၢ, စံးထီၣ်ပတြၢၤ ပကစၢ်ယွၤတက့ၢ်.”
၆ ဒီးယနၢ်ဟူတၢ်လၢ အလီၤဂာ်ဒ် ပှၤဂီၢ်မုၢ်ဖးဒိၣ် အကလုၢ်သီၣ်, ဒ်ထံ အါအါဂီၢ်ဂီၢ်သီၣ်ဝဲ ဒီးဒ်လီသီၣ်ဖးဒိၣ် အသိးလီၤ. အဝဲသ့ၣ်တဲဝဲလၢ “ဟါလ့ၤလူယၤ,*+ ပကစၢ် ယဟိဝၤယွၤ* လၢအမ့ၢ် သ့တၢ်လၢာ်ကစၢ်န့ၣ်+ စးထီၣ်ပၢတၢ် ဒ်စီၤပၤအသိးလံ.+ ၇ ခီဖျိလၢ သိဖိအတၢ်ဖျီ တုၤဃီၤလံ ဒီးအတလးမူးပိာ်မုၣ် အိၣ်ကတဲာ်ကတီၤထီၣ် အသးလံအဃိ မ်ပကသူၣ်ဖှံသးညီ ဒီးပှဲၤဒီးတၢ်သးခု ဒီးမ်ပဟ့ၣ်ကစၢ်ယွၤ တၢ်လၤကပီၤတက့ၢ်. ၈ သိဖိ အတလးမူးပိာ်မုၣ်န့ၣ် တၢ်ပျဲအီၤလၢ အကကၤဝဲ တၢ်ကူတၢ်ကၤဝါလၢ အညၣ်ဂ့ၤ, လၢအကဆှီ ဒီးကပြုၢ်ကပြီၤလီၤ. တၢ်လၢ တၢ်ကူတၢ်ကၤဝါလၢ အညၣ်ဂ့ၤန့ၣ် အဲၣ်ဒိးတဲဝဲ ပှၤစီဆှံတဖၣ်အတၢ်မၤ+ လၢအတီအလိၤတဖၣ်လီၤ.”
၉ ဒီးအဝဲ* တဲယၤလၢ “ကွဲးလီၤတက့ၢ်, ပှၤလၢအဘၣ် တၢ်ကွဲမုာ်အီၤလၢ သိဖိအတၢ်ဖျီအမူး+ အဟါတၢ်အီၣ်န့ၣ် ကသးခုဝဲလီၤ.” ဒီးအဝဲတဲစ့ၢ်ကီးယၤလၢ “တၢ်ကတိၤတဖၣ်အံၤမ့ၢ်ဝဲ ကစၢ်ယွၤ အတၢ်ကတိၤလၢ ပှၤနာ်န့ၢ်အီၤသ့လီၤ.” ၁၀ ဖဲန့ၣ်အခါ ယထိၣ်လီၤပှီၤယသးလၢ အခီၣ်ထံး ဒ်သိးယက ဘူၣ်ထီၣ်ဘါထီၣ်အီၤ အဂီၢ်လီၤ. ဘၣ်ဆၣ် အဝဲတဲယၤလၢ “ပလီၢ်နသးသၢၤ, တဘၣ်မၤဒ်န့ၣ်တဂ့ၤ.+ ဘူၣ်ထီၣ်ဘါထီၣ် ကစၢ်ယွၤဟီ.+ ယမ့ၢ်ဒၣ်ကုၢ်ကဒဲကဒဲ ဒ်သိးဒီး နၤဒီးနဒီပုၢ်ဝဲၢ်တဖၣ်လၢ အအိၣ်ဝဲဒီးတၢ်မၤလၢ ကအုၣ်အသးဘၣ်ဃးဒီး ယ့ၣ်ၡူးအဂ့ၢ်,+ မ့ၢ်လၢ ဝံအတၢ်စံးပာ်တဖၣ်+ အတၢ်တိာ်ပာ်န့ၣ် မ့ၢ်ဒ်သိး အကကဲထီၣ် တၢ်အုၣ်အသးဘၣ်ဃးဒီး ယ့ၣ်ၡူးအဂ့ၢ်လီၤ.”
၁၁ ယထံၣ်ဘၣ် မူခိၣ်အိးထီၣ်အသး ဒီးဖဲန့ၣ် ကသ့ၣ်ဝါအိၣ်ဝဲတဒုလီၤ.+ ဒီးပှၤလၢအဆ့ၣ်နီၤလၢ အလိၤတဂၤန့ၣ် တၢ်ကိးအီၤလၢ ပှၤလၢအသးတီ+ ဒီးမ့ၢ်ဝဲတီဝဲတဂၤလီၤ.+ အဝဲစံၣ်ညီၣ်တၢ် ဒီးဒုးတၢ်လၢ တၢ်တီတၢ်လိၤအပူၤလီၤ.+ ၁၂ ဒီးအမဲာ်ချံတဖၣ် လီၤဂာ်ဒီးမ့ၣ်အူလၣ်+ ဒီးခိၣ်သလုးအါဖျၢၣ် အိၣ်ဝဲလၢ အခိၣ်သၣ်ဃံအလိၤလီၤ. အဝဲအိၣ်ဒီးအမံၤတဖျၢၣ်လၢ အဘၣ်တၢ်ကွဲးလီၤအီၤလၢ အလိၤလၢ ပှၤတသ့ၣ်ညါဝဲ နီတဂၤဘၣ်, ဘၣ်ဆၣ် အနီၢ်ကစၢ်သ့ၣ်ညါဝဲလီၤ. ၁၃ ဒီးအဝဲကၤဝဲ တၢ်ကူတၢ်ကၤလၢ အဘၣ်အၢဒီးတၢ်သွံၣ် ဒီးတၢ်ကိးဝဲအမံၤလၢ ကစၢ်ယွၤအကလုၢ်လီၤ.+ ၁၄ တကးဒံးဘၣ် သုးမုၢ်သံၣ်ဘိလၢမူခိၣ် လၢအဒိးဝဲ ကသ့ၣ်ဝါတဖၣ်န့ၣ် ပိာ်ထီၣ်အခံ ဒီးအဝဲသ့ၣ် ကူကၤဝဲဒီး တၢ်ကူတၢ်ကၤဝါလၢ အညၣ်ဂ့ၤ ဒီးအကဆှီလီၤ. ၁၅ ဒီးနးဖးထီလၢ+ အကနၣ်အ့ၣ် ဂ့ၤဂ့ၤတဘ့ၣ်န့ၣ် ဟဲဖျိးထီၣ်လၢအကိာ်ပူၤ ဒီးအကသူဝဲ ဒ်သိးကမၤဟးဂီၤ ပှၤကလုာ်တဖၣ်အဂီၢ်လီၤ. ဒီးအကပၢဘၣ် အဝဲသ့ၣ်လၢ နီၣ်ထိးဘိထး+ တကးဒံးဘၣ် အဝဲကယီၢ်တၢ်လၢ သ့တၢ်လၢာ်ကစၢ်ယွၤ+ အတၢ်သးဒိၣ်ထီၣ် အစပံးထံအကျိးပူၤလီၤ. ၁၆ ဒီးလၢအတၢ်ကူတၢ်ကၤလၢ အအိၣ်လၢ အကံၣ်ဒုၣ်တကပၤ အလိၤန့ၣ် အမံၤအိၣ်ကွဲးအသးတဖျၢၣ် လၢအမ့ၢ် စီၤပၤတဖၣ် အစီၤပၤ ဒီးကစၢ်တဖၣ် အကစၢ်လီၤ.+
၁၇ ဒီးယထံၣ်ဘၣ် မူခိၣ်ကလူးတဂၤ ဆၢထၢၣ်လၢ မုၢ်အခီၣ်ထံး ဒီးကိးပသူထီၣ်လၢ အကလုၢ်ဖးဒိၣ် ဒီးတဲဘၣ် ကယဲၢ်ထိၣ်လၢ အယူၤဝဲလၢ တၢ်ဖးဖီလၢ “ဟဲလၢအံၤ, ပာ်ဖှိၣ်ထီၣ်သုသးလၢ ကစၢ်ယွၤ အဟါတၢ်အီၣ်ဖးဒိၣ်အဂီၢ်+ ၁၈ ဒ်သိးသုကအီၣ် စီၤပၤအညၣ်, သုးခိၣ်တဖၣ်အညၣ်, ပှၤလၢ အဂံၢ်ဆူၣ်ဘါဆူၣ်အညၣ်,+ ကသ့ၣ်တဖၣ်အညၣ်, ပှၤလၢ အဒိးကသ့ၣ်တဖၣ်အညၣ်+ ဒီးပှၤခဲလၢာ်အညၣ် ပၣ်ဃုာ်ဒီး ပှၤလၢအအိၣ်ဒီး တၢ်သဘျ့မ့ၢ်ဂ့ၤ, ကုၢ်တဖၣ်မ့ၢ်ဂ့ၤ, ပှၤအဒိၣ်မ့ၢ်ဂ့ၤ, ပှၤအဆံးမ့ၢ်ဂ့ၤ အညၣ်အဂီၢ်န့ၣ်တက့ၢ်.”
၁၉ ဒီးယထံၣ် ဆၣ်ဖိကီၢ်ဖိလၢအအၢ ဒီးဟီၣ်ခိၣ်အစီၤပၤတဖၣ် ဒီးအဝဲသ့ၣ် အသုးမုၢ်သံၣ်ဘိတဖၣ် ပာ်ဖှိၣ်ထီၣ်အသး ဒ်သိးကဒုးဝဲ ပှၤလၢအဆ့ၣ်နီၤလၢ ကသ့ၣ်အလိၤ ဒီးအသုးမုၢ်သံၣ်ဘိ တဖၣ်လီၤ.+ ၂၀ ပှၤလၢ အဆ့ၣ်နီၤလၢ ကသ့ၣ် အလိၤတဂၤန့ၣ် ဖီၣ်န့ၢ်ဝဲ ဆၣ်ဖိကီၢ်ဖိလၢ အအၢတဒုန့ၣ် ဃုာ်ဒီး ဝံလၢအဘျၣ်+ လၢအမၤတ့ၢ် တၢ်ပနီၣ်လီၤလးတဖၣ်လၢ ဆၣ်ဖိကီၢ်ဖိလၢအအၢတဒုန့ၣ်+ အမဲာ်ညါလီၤ. ခီဖျိလၢ တၢ်ပနီၣ်လီၤလးတဖၣ်အံၤအဃိ ဝံလၢအဘျၣ် ဆှၢကမၣ်တ့ၢ် ပှၤလၢအဒိးန့ၢ်ဘၣ် ဆၣ်ဖိကီၢ်ဖိလၢအအၢ အတၢ်ပနီၣ် ဒီးပှၤလၢ အဘူၣ်ထီၣ်ဘါထီၣ် ဆၣ်ဖိကီၢ်ဖိလၢအအၢန့ၣ် အဂီၤလီၤ.+ ဒီးဆၣ်ဖိကီၢ်ဖိလၢ အအၢတဒု ဒီးဝံလၢအဘျၣ်န့ၣ် တၢ်ကွံာ်လီၤမူဒံး အဝဲသ့ၣ်လၢ နိၣ်မ့ၣ်အူလၢ အအိၣ်ဒီးကး*+ လၢအကဲၤကပျီၤထီၣ်န့ၣ် အပူၤလီၤ. ၂၁ ဘၣ်ဆၣ် ပှၤအဂၤတဖၣ် ဘၣ်တၢ်မၤသံစ့ၢ်ကီးအီၤလၢ နးလၢအဟဲထီၣ်လၢ ပှၤလၢအဒိးကသ့ၣ်တဂၤန့ၣ်+ အကိာ်ပူၤလီၤ. ဒီးထိၣ်ခဲလၢာ် အီၣ်အဝဲသ့ၣ်အညၣ် ဘျဲဘျဲလီၤ.+