အ့းဖ့းစူး

၂ ခီဖျိလၢ သုတၢ်ကမၣ်ဒီး တၢ်ဒဲးဘးအဃိ လၢညါန့ၣ် သုလီၤဂာ်ဒ်သိးဒီးပှၤလၢအသံ ဘၣ်ဆၣ် ကစၢ်ယွၤ မၤမူထီၣ်က့ၤသုလီၤ.+ ၂ တဘျီခါ သုအိၣ်မူ ဒ်ဟီၣ်ခိၣ်အသိး ဒီးဒ်ဟီၣ်ခိၣ်အခိၣ်တဂၤ အတၢ်ပာ်သူၣ်ပာ်သးလၢ အဒိၣ်စိလၢ ပှၤဂၤအဖီခိၣ်အသိးလီၤ.+ အတၢ်ပာ်သူၣ်ပာ်သးန့ၣ်+ လီၤဂာ်ဒ်သိးဒီး ကလံၤရၤလီၤအသး+ ဒီးအမၤတၢ်လၢ ဆၢကတီၢ်ခဲအံၤလၢ ပှၤလၢ အတဒိကနၣ်တၢ်တဖၣ် အသးပူၤလီၤ. ၃ မ့ၢ်, တဘျီခါ ပဝဲခဲလၢာ် ပအိၣ်မူဒ် ပှၤတဖၣ်န့ၣ်အသိးလီၤ.+ ပမၤဒ်ပဖံးပညၣ် အတၢ်သူၣ်လီသးကွံ ဒီးဒ်ပတၢ်ဆိကမိၣ် အိၣ်ဝဲအသိးလီၤ.+ ဒီးဒ်ပှၤဂၤတဖၣ်အသိး စးထီၣ်လၢ ပအိၣ်ဖျဲၣ်ထီၣ်လံၤလံၤန့ၣ် ပဝဲစ့ၢ်ကီး ပမ့ၢ်ပှၤလၢအကြၢးဒီး ကစၢ်ယွၤ အတၢ်သးထီၣ်လီၤ.+ ၄ ဘၣ်ဆၣ် ကစၢ်ယွၤန့ၣ် အိၣ်ဒီးတၢ်သးကညီၤအါမး+ ဒီးအပာ်ဖျါထီၣ်တၢ်အဲၣ် အဒိၣ်အမုၢ်လၢ ပဖီခိၣ်လီၤ.+ ၅ အဃိ လၢညါ ဖဲပလီၤဂာ်ဒ်သိးဒီး ပှၤလၢအသံခီဖျိလၢ ပတၢ်ကမၣ်အဃိ အခါဒၣ်လဲာ် အဝဲမၤမူထီၣ်ပှၤ ဒ်သိးပကအိၣ်ဃူအိၣ်ဖိးဒီးခရံာ် အဂီၢ်လီၤ.+ မ့ၢ်လံ, သုဘၣ် တၢ်အုၣ်က့ၤခီၣ်က့ၤသု ခီဖျိလၢ တၢ်သးကညီၤ ဒိၣ်ဒိၣ်မုၢ်မုၢ် အဃိလီၤ. ၆ တကးဒံးဘၣ် ကစၢ်ယွၤ မၤဂဲၤဆၢထၢၣ်က့ၤပှၤ ဒီးဒုးဆ့ၣ်နီၤပှၤလၢ မူခိၣ်အလီၢ်တဖၣ်, မ့ၢ်လၢပကဲ ယ့ၣ်ၡူးခရံာ်အပျဲၢ်အဘီၣ် အဃိလီၤ.+ ၇ လၢတၢ်န့ၣ်အဃိ ခါဆူညါန့ၣ် ကစၢ်ယွၤ ကပာ်ဖျါထီၣ် အတၢ်သးကညီၤ ဒိၣ်ဒိၣ်မုၢ်မုၢ် ခီဖျိ အကမၤဂ့ၤ ပဝဲလၢအမ့ၢ် ယ့ၣ်ၡူးခရံာ် အပျဲၢ်အဘီၣ်တဖၣ်လီၤ.

၈ သုဝဲလၢအအိၣ်ဒီးတၢ်နာ်န့ၣ် သုဘၣ်တၢ်အုၣ်က့ၤခီၣ်က့ၤသု ခီဖျိလၢ တၢ်သးကညီၤ ဒိၣ်ဒိၣ်မုၢ်မုၢ်အံၤ အဃိလီၤ.+ ဒီးတၢ်ကဲထီၣ်အသးဒ်န့ၣ်န့ၣ် တမ့ၢ်လၢ သုနီၢ်ကစၢ် အတၢ်ဂုာ်ကျဲးစၢးအဃိဘၣ်, မ့ၢ်ဝဲကစၢ်ယွၤ အတၢ်ဟ့ၣ်လီၤ. ၉ ဒီးတၢ်ကဲထီၣ်အသးဒ်န့ၣ်န့ၣ် တမ့ၢ်ခီဖျိလၢ တၢ်မၤဘၣ်အဃိ+ ပှၤတအိၣ်ဒီးတၢ်ဂ့ၢ်လၢ ကပာ်ကဖၢလၢအသး အဂီၢ်နီတဂၤဘၣ်. ၁၀ ပမ့ၢ်ကစၢ်ယွၤ အစုတၢ်ဘၣ်တ့ ဒီးဒ်ပမ့ၢ်ပှၤလၢ အအိၣ်ဃူအိၣ်ဖိးဒီး ယ့ၣ်ၡူးခရံာ်အသိး+ ကစၢ်ယွၤတ့လီၤပှၤ+ ဒ်သိးပကမၤ တၢ်ဂ့ၤအဂီၢ်လီၤ. ဒီးကစၢ်ယွၤ ဆၢတဲာ်ပာ်စၢၤဝဲလၢ ပကမၤ တၢ်ဂ့ၤတဖၣ်အံၤလီၤ.

၁၁ အဃိ သုဝဲလၢအမ့ၢ် ပှၤကလုာ်တဖၣ်လၢ သွံၣ်ထံဖံးညၣ် တကပၤန့ၣ် သ့ၣ်နီၣ်ထီၣ်လၢ တဘျီခါ “ပှၤလၢအဒိးတၢ်ကူးတရံး” လၢဖံးညၣ်တကပၤ ခီဖျိလၢပှၤဟီၣ်ခိၣ်ဖိအစုန့ၣ် ကိးသုလၢ “ပှၤတဒိးဘၣ် တၢ်ကူးတရံးဘၣ်လီၤ.” ၁၂ ဖဲန့ၣ်အခါ သုတသ့ၣ်ညါ ခရံာ်ဘၣ် ဒီးသုတဘၣ်ဃးဒီး အံၣ်စရ့လး အပှၤကလုာ်ဘၣ်. ဒီးသုတပၣ်ဃုာ်လၢ တၢ်အၢၣ်လီၤအီလီၤတဖၣ်လၢ အဒိးသန့ၤထီၣ်အသးလၢ ကစၢ်ယွၤ အတၢ်စံးပာ် အဖီခိၣ်ဘၣ်.+ ဒီးဖဲန့ၣ်အခါ သုအိၣ်မူလၢ ဟီၣ်ခိၣ်ချၢဘၣ်ဆၣ် သုတသ့ၣ်ညါကစၢ်ယွၤဘၣ် ဒီးသုတၢ်မုၢ်လၢ်တအိၣ်ဘၣ်.+ ၁၃ တဘျီခါ သုအိၣ်ယံၤဒီးကစၢ်ယွၤ ဘၣ်ဆၣ် ခဲအံၤသုမ့ၢ် ယ့ၣ်ၡူးခရံာ်အပျဲၢ်အဘီၣ်တဖၣ် ဒီးသုဘူးထီၣ်ဒီးကစၢ်ယွၤ ခီဖျိခရံာ်အသွံၣ်လီၤ. ၁၄ ခရံာ်မ့ၢ် ပတၢ်ဃူတၢ်ဖိးလီၤ.+ ပှၤခံဒူၣ်န့ၣ် အဝဲဒုးကဲထီၣ်က့ၤဝဲလၢ ပှၤတဒူၣ်ဃီ+ ဒီးအဝဲမၤလီၤပှီၢ်ကွံာ် တၢ်ဒူၣ်လၢအအိၣ်လၢ တၢ်ဘၢၣ်စၢၤ လၢအမၤလီၤဖး ပှၤခံဒူၣ်န့ၣ်လီၤ.+ ၁၅ ဒီးခီဖျိလၢ အဟ့ၣ်လုၢ်ထီၣ်အနီၢ်ခိ* အဃိ အဝဲမၤလီၤမၢ်ကွံာ် တၢ်လၢအဒုးအိၣ်ထီၣ် တၢ်ထီဒုၣ်ထီဒါ လၢအမ့ၢ် စီၤမိၤၡ့ အတၢ်သိၣ်တၢ်သီ လၢအအိၣ်ဒီးတၢ်မၤလိာ် ဒီးတၢ်သိၣ်တၢ်သီတဖၣ်လီၤ. ဒီးပှၤခံဒူၣ်လၢအမ့ၢ် အပျဲၢ်အဘီၣ်တဖၣ်န့ၣ် အဝဲဒုးကဲထီၣ်ဝဲလၢ ပှၤအသီတဒူၣ်ဃီ*+ ဒီးဒုးအိၣ်ထီၣ် တၢ်ဃူတၢ်ဖိးလီၤ. ၁၆ ဒီးခီဖျိလၢ အသံလၢ တၢ်မၤအၢမၤနး အသ့ၣ်တၢၣ်အလိၤ*+ အဃိ အဝဲမၤလီၤမၢ်ကွံာ် တၢ်လၢအဒုးအိၣ်ထီၣ် တၢ်ထီဒုၣ်ထီဒါန့ၣ်လီၤ.+ ဒီးပှၤခံဒူၣ်န့ၣ် အဝဲမၤဘၣ်လိာ်ဖိးဒ့က့ၤဝဲဒီး ကစၢ်ယွၤ လၢာ်လၢာ်ဆ့ဆ့ ဒ်သိးပှၤခံဒူၣ်ကကဲထီၣ် နီၢ်ခိတဂၤဃီအဂီၢ်လီၤ. ၁၇ ဒီးအဝဲ လဲၤစံၣ်တဲၤတဲလီၤ တၢ်သးခုကစီၣ် ဘၣ်ဃးဒီး တၢ်ဃူတၢ်ဖိးအဂ့ၢ်လၢ သုဝဲလၢ အအိၣ်ယံၤဒီးကစၢ်ယွၤ ဒီးလၢပှၤလၢ အအိၣ်ဘူးဒီး ကစၢ်ယွၤန့ၣ် အအိၣ်စ့ၢ်ကီးလီၤ. ၁၈ ခီဖျိလၢအဝဲအဃိ ပဝဲခံဒူၣ်အံၤ ပဃ့ထုကဖၣ်လၢ ပၢ်အအိၣ်သ့ပျီပျီ ခီဖျိ သးစီဆှံတမံၤဃီလီၤ.

၁၉ အဃိ သုတမ့ၢ် ပှၤထံဂၤကီၢ်ဂၤဖိလၢၤဘၣ်.+ ဒ်ပှၤစီဆှံအဂၤတဖၣ်အသိး သုမ့ၢ်ပှၤထံဖိကီၢ်ဖိဒ်သိးသိး+ ဒီးကစၢ်ယွၤ အဒူၣ်ဖိထၢဖိတဖၣ်လီၤ.+ ၂၀ ဒီးကစၢ်ယွၤ သူၣ်ထီၣ်သုလၢ တၢ်သူၣ်ထီၣ်အခီၣ်ထံး လၢအမ့ၢ် တၢ်မၢဖိဒီးဝံတဖၣ်န့ၣ်+ အဖီခိၣ်လီၤ. မ့မ့ၢ် ယ့ၣ်ၡူးခရံာ်န့ၣ် မ့ၢ်တၢ်သူၣ်ထီၣ် အခီၣ်ထံးအလၢၢ်လၢ အရ့ဒိၣ်ကတၢၢ်တဖျၢၣ်လီၤ.+ ၂၁ ဒီးလၢခရံာ်အပူၤ တၢ်သူၣ်ထီၣ်ဒီတဖျၢၣ်န့ၣ် အလၢၢ်ခဲလၢာ် ဘုးတာ်လိာ်အသးဃူဃူလီၤ.+ ဒီးတၢ်သူၣ်ထီၣ်အံၤ ဒိၣ်ထီၣ်ဝဲ ဒ်သိးအကကဲထီၣ် တၢ်လုၢ်ဟံၣ်စီဆှံလၢ ယဟိဝၤယွၤ* အဂီၢ်လီၤ.+ ၂၂ သုဝဲသ့ၣ်အံၤ မ့ၢ်လၢသုအိၣ်ဃူအိၣ်ဖိးဒီးခရံာ်အဃိ ကစၢ်ယွၤသူၣ်ထီၣ်စ့ၢ်ကီးသု တပူၤဃီ ဒီးပှၤဂၤတဖၣ် ဒ်သိးကကဲထီၣ် ဟံၣ်လၢ ကစၢ်ယွၤ ကအိၣ်ဝဲဆိးဝဲ ခီဖျိလၢ အသးစီဆှံလီၤ.+