ကလီးစဲ
၂ ယအဲၣ်ဒိးလၢ သုကသ့ၣ်ညါလၢ ယဂုာ်ကျဲးစၢး ဆူၣ်ဆူၣ်လၢ သုဂီၢ်, လၢပှၤလီၤဒံၤကံဖိတဖၣ်အဂီၢ်+ ဒီးလၢပှၤလၢ အတထံၣ်ဘၣ်ယၤ နီတဘျီဘၣ်တဖၣ်အဂီၢ် ထဲလဲၣ်န့ၣ်လီၤ. ၂ ယမၤဒ်န့ၣ်န့ၣ် မ့ၢ်ဒ်သိး အဝဲသ့ၣ် အသးကမုာ်ထီၣ်+ ဒီးကအိၣ်ဃူအိၣ်ဖိးလၢ အသးတဖျၢၣ်ဃီလၢ တၢ်အဲၣ်တၢ်ကွံအပူၤလီၤ.+ အန့ၣ်မး အဝဲသ့ၣ်ကဒိးန့ၢ်ဘၣ် တၢ်ထူးတၢ်တီၤ* အနီၢ်ကီၢ် လၢအဟဲခီဖျိ တၢ်နၢ်ပၢၢ်လၢ အဝဲသ့ၣ်နာ်န့ၢ်ဝဲ လၢလၢပှဲၤပှဲၤ ဒီးကဒိးန့ၢ်ဘၣ် တၢ်သ့ၣ်ညါလီၤတံၢ်လီၤဆဲး ဘၣ်ဃးဒီး ကစၢ်ယွၤ အတၢ်ခူသူၣ်စီဆှံ လၢအမ့ၢ် ခရံာ်လီၤ.+ ၃ တၢ်ကူၣ်သ့ ဒီးတၢ်သ့ၣ်ညါလၢ အလုၢ်ဒိၣ်ပှ့ၤဒိၣ် ခဲလၢာ်န့ၣ် အိၣ်ခူသူၣ်ဝဲလၢ ခရံာ်အပူၤ လီၤတံၢ်လီၤဆဲးလီၤ.+ ၄ ယတဲဒ်အံၤန့ၣ် ဒ်သိး ပှၤသုတလံၣ်န့ၢ်လီန့ၢ်သုလၢ တၢ်ကတိၤလၢ အလီၤထုးန့ၢ်သူၣ်ထုးန့ၢ်သးတဖၣ် နီတဂၤတဂ့ၤ အဂီၢ်လီၤ. ၅ ယတအိၣ်ဒီးသု လၢနီၢ်ခိတခီဘၣ်. ဘၣ်ဆၣ် ယအိၣ်ဒီးသုလၢ သးတခီလီၤ. ဒီးယထံၣ်ဘၣ်လၢ သုရဲၣ်လီၤကျဲၤလီၤတၢ် ဂ့ၤဂ့ၤဘၣ်ဘၣ်+ ဒီးသုနာ် ခရံာ်လၢ သုသးဒီဖျၢၣ်ညါအဃိ+ ယသးခုလီၤ.
၆ အဃိ ဒ်သုတူၢ်လိာ် ကစၢ်ယ့ၣ်ၡူးခရံာ် အသိးန့ၣ် သုဘၣ်ဆဲးအိၣ်မူ ဒ်သိးဒီးအီၤလီၤ. ၇ ဒီးဒ်သုဘၣ် တၢ်သိၣ်လိသုလၢညါအသိး မ်သုဂံၢ်စဲၤလီၤအသး ကျၢၤကျၢၤ,+ အိၣ်သူၣ်ထီၣ်သုသးလၢ ခရံာ်အဖီခိၣ်, မၤဂၢၢ်မၤကျၢၤသုတၢ်နာ်+ ဒီးအိၣ်ဒီး တၢ်စံးဘျုးစံးဖှိၣ် ထီဘိတက့ၢ်.+
၈ ဒ်သိး ပှၤသုတဖီၣ်န့ၢ်သု ခီဖျိလၢ ဟီၣ်ခိၣ်အတၢ်ကူၣ်သ့ ဒီးတၢ်လီတၢ်ဝ့ၤ ကလီကလီ နီတဂၤတဂ့ၤအဂီၢ် ပလီၢ်သုသးတက့ၢ်.+ တၢ်သ့ၣ်တဖၣ်အံၤ ဒိးသန့ၤထီၣ်အသးလၢ ပှၤဟီၣ်ခိၣ်ဖိ အလုၢ်အလၢ် ဒီးဟီၣ်ခိၣ်အတၢ်ထံၣ်လီၤ.* အတဒိးသန့ၤထီၣ်အသးလၢ ခရံာ်အတၢ်သိၣ်လိဘၣ်. ၉ ကစၢ်ယွၤ အတၢ်ဂ့ၤတၢ်ဝါခဲလၢာ် အိၣ်ဝဲဆိးဝဲလၢ ခရံာ်အပူၤ လၢလၢပှဲၤပှဲၤလီၤ.+ ၁၀ ဒီးခီဖျိလၢ ခရံာ်လၢအမ့ၢ် တၢ်ပၢတၢ်ပြး ဒီးတၢ်စိတၢ်ကမီၤခဲလၢာ် အခိၣ်တဂၤအံၤ အဃိ သုအိၣ်ဒီးတၢ်လၢ အလၢအပှဲၤလီၤ.+ ၁၁ သုဘၣ်ထွဲလိာ်သးဒီးအီၤအဃိ သုဒိးတၢ်ကူးတရံး တမ့ၢ်ခီဖျိလၢ ပှၤစုဘၣ်. သုဒိးတၢ်ကူးတရံး ခီဖျိလၢ သုဘ့ၣ်လီၤကွံာ် သုနီၢ်ခိလၢအအိၣ်ဒီး တၢ်ဒဲးဘးအဃိလီၤ.+ တၢ်အဝဲအံၤ မ့ၢ်ဝဲတၢ်ကူးတရံး ဘၣ်ဃးဒီးခရံာ်လီၤ.+ ၁၂ တၢ်ခူၣ်လီၤသု ဃုာ်ဒီးအီၤလၢ အတၢ်ဒိးဘျၢအပူၤလီၤ.+ ဒီးသုဘၣ်ထွဲလိာ်သးဒီးအီၤအဃိ သုဘၣ် တၢ်မၤဂဲၤဆၢထၢၣ်သု+ ဃုာ်ဒီးအီၤ ခီဖျိလၢ သုတၢ်နာ် ကစၢ်ယွၤ အစိကမီၤလီၤ. ကစၢ်ယွၤမ့ၢ်ပှၤလၢ အမၤဂဲၤဆၢထၢၣ်က့ၤအီၤလၢ တၢ်သံလီၤ.+
၁၃ တကးဒံးဘၣ် လၢညါန့ၣ် ခီဖျိလၢ သုတၢ်ကမၣ်အဃိ သုလီၤဂာ်ဒ်သိးဒီး ပှၤလၢအသံ ဒီးသုတဒိး တၢ်ကူးတရံးဘၣ် သနာ်က့ ကစၢ်ယွၤ မၤမူထီၣ်က့ၤသု ဒ်သိးသုကအိၣ်ဃူအိၣ်ဖိးဒီး ခရံာ်အဂီၢ်လီၤ.+ ဒီးလၢတၢ်သူၣ်ဂ့ၤသးဝါအပူၤန့ၣ် အဝဲပျၢ်ကွံာ် ပတၢ်ကမၣ် ခဲလၢာ်လီၤ.+ ၁၄ ဒီးအဝဲထူးသံကွံာ်ဝဲ တၢ်သိၣ်တၢ်သီ+ လၢအဘၣ်တၢ်ကွဲးအီၤလၢစု+ လၢအထီဒါပှၤလီၤ.+ ဒီးကစၢ်ယွၤ ထုးထီၣ်ကွံာ် တၢ်သိၣ်တၢ်သီခီဖျိ ပျၤထီကွံာ်ဝဲလၢ တၢ်မၤအၢမၤနး အသ့ၣ်တၢၣ်* အလိၤလီၤ.+ ၁၅ ခီဖျိလၢ တၢ်မၤအၢမၤနး အသ့ၣ်တၢၣ်အဃိ ဒ်သုးဖိတဖၣ်လၢ အဒုးတၢ်နၢၤ ဒီးဟဲက့ၤဖီၣ်န့ၢ် ပှၤအဂၤတဖၣ်အသိး အဝဲမၤနၢၤမၤဃၣ်+ တၢ်ပၢတၢ်ပြး ဒီးတၢ်စိတၢ်ကမီၤတဖၣ် ဒီးအဝဲဆှၢအဝဲသ့ၣ်လၢ ပှၤခဲလၢာ်အမဲာ်ညါ ဒ်တၢ်ကွၢ်ကီအသိးလီၤ.
၁၆ အဃိ ဘၣ်ဃးဒီး တၢ်လၢသုအီၣ်အီၤ ဒီးသုအီအီၤမ့ၢ်ဂ့ၤ,+ တၢ်မၤဘူၣ်ဧိၤပွဲဧိၤမ့ၢ်ဂ့ၤ, လါထီၣ်သီမ့ၢ်ဂ့ၤ,+ မုၢ်အိၣ်ဘှံးနံၤမ့ၢ်ဂ့ၤ+ တဘၣ်ပျဲ ပှၤပာ်ဒ့ၣ်ပာ်ကမၣ်သု နီတဂၤတဂ့ၤ. ၁၇ တၢ်သ့ၣ်တဖၣ်န့ၣ် မ့ၢ်ဝဲတၢ်အကဒုလၢ အပာ်ဖျါထီၣ်တၢ်လၢအကဟဲခါဆူညါလီၤ.+ ဘၣ်ဆၣ် တၢ်လၢအမ့ၢ်တၢ်နီၢ်ကီၢ်န့ၣ် မ့ၢ်ဝဲခရံာ်လီၤ.+ ၁၈ ပှၤလၢ အပာ်မၤအသး ဒ်အဆီၣ်လီၤအသးအသိး ဒီးဘါထီၣ် မူခိၣ်ကလူးတဖၣ်န့ၣ်* တဘၣ်ပျဲအဝဲသ့ၣ် တြီသုလၢ သုကန့ၢ်ဘၣ် ခိၣ်ဖးအဂီၢ်တဂ့ၤ.+ အဝဲသ့ၣ် “အိၣ်ဆၢထၢၣ်လၢ” တၢ်လၢအဝဲသ့ၣ် ထံၣ်ဝဲတဖၣ်အဂီၢ်လီၤ. ဒီးခီဖျိလၢ အဝဲသ့ၣ် ဆိကမိၣ်တၢ်ဒ် တၢ်ဖံးတၢ်ညၣ် အတၢ်သူၣ်လီသးကွံအသိးအဃိ အဝဲသ့ၣ် ပာ်ထီၣ်ထီအသး ကလီကလီလီၤ. ၁၉ ဒီးအဝဲသ့ၣ် တမၤထွဲဝဲဒ် ခိၣ်န့ၣ်အသိးဘၣ်.+ တၢ်လၢခိၣ်န့ၣ် ဟ့ၣ်ဝဲနီၢ်ခိ ဒီတဂၤညါလၢ တၢ်လၢအလိၣ်ဘၣ်ဝဲတဖၣ် ဒီးအသူဝဲတၢ်အဆၢ ဒီးတၢ်အထူၣ်အပျၢ်တဖၣ် ဒ်သိးနီၢ်ခိ ကဘုးတာ်လိာ်အသး ဃူဃူအဂီၢ်လီၤ. တကးဒံးဘၣ် အဒုးဒိၣ်ထီၣ်ဝဲ နီၢ်ခိခီဖျိလၢ ကစၢ်ယွၤ အတၢ်စိတၢ်ကမီၤလီၤ.+
၂၀ သုမ့ၢ်သံတ့ၢ်ဃုာ်ဒီးခရံာ် ဒီးထူၣ်ဖျဲးထီၣ်ကွံာ်လၢ ဟီၣ်ခိၣ်အတၢ်ထံၣ်န့ၣ် ဘၣ်မနုၤအဃိ သုအိၣ်မူဒံး ဒ်ပှၤလၢအဘၣ်ဃးဒီး ဟီၣ်ခိၣ်အသိးလဲၣ်.+ ဒီးဘၣ်မနုၤအဃိ သုဒိကနၣ်ဒံး တၢ်မၤလိာ်တဖၣ်+ ဒ်သိးဒီး ၂၁ “တဘၣ်ဟံးန့ၢ်တဂ့ၤ, တဘၣ်လ့ၣ်ကွၢ်တဂ့ၤ, တဘၣ်ဖီၣ်တဂ့ၤ” န့ၣ်လဲၣ်. ၂၂ တၢ်မၤလိာ်တဖၣ်အံၤ တဲဝဲဘၣ်ဃးဒီး တၢ်လၢပှၤအီၣ်အီၤအီအီၤ ဝံၤဒီး ဟးဂီၤကွံာ်ဝဲအဂ့ၢ်လီၤ. ဒီးတၢ်မၤလိာ်တဖၣ်အံၤ မ့ၢ်ဝဲပှၤဟီၣ်ခိၣ်ဖိတဖၣ် အတၢ်သိၣ်လိလီၤ.+ ၂၃ တၢ်မၤလိာ်တဖၣ်အံၤ ဖျါလၢအအိၣ်ဒီးတၢ်ကူၣ်သ့ ဘၣ်ဆၣ်မ့ၢ်ဝဲ တၢ်ဘူၣ်ထီၣ်ဘါထီၣ်တၢ် ဒ်အနီၢ်ကစၢ် အတၢ်ဘၣ်သး ဒီးတၢ်ဆီၣ်လီၤသးလၢ တၢ်ပာ်မၤအသးအပူၤ ဒီးတၢ်မၤအၢမၤနးလီၤက့ၤ အနီၢ်ခိလီၤ.+ ဒီးတကဲဘျုးလၢ ပှၤကတြီဆၢ တၢ်ဖံးတၢ်ညၣ် အတၢ်သူၣ်လီသးကွံအဂီၢ် နီတစဲးဘၣ်.