ယိၤၡူ
၅ ယဟိဝၤယွၤ မၤလီၤသံးဝဲ ထံကျိယၢ်ဒ့ၣ် လၢပှၤအံၣ်စရ့လးဖိ အမဲာ်ညါတုၤလၢ အဝဲသ့ၣ်လဲၤခီဝဲ ဝံၤတစုလီၤ. ဖဲပှၤအမိၢ်ဖိ+ အစီၤပၤခဲလၢာ် လၢအအိၣ်လၢ ထံကျိယၢ်ဒ့ၣ် အမုၢ်နုာ်တကပၤ ဒီးပှၤကနၤဧၣ်ဖိ+ အစီၤပၤခဲလၢာ်လၢ အအိၣ်လၢ ပီၣ်လဲၣ်အကပၤန့ၣ် နၢ်ဟူဝဲ တၢ်ဂ့ၢ်အံၤအခါ အဝဲသ့ၣ် သးလီၤကတုၤဒီး+ ပျံၤပှၤအံၣ်စရ့လးဖိ ဒိၣ်မးလီၤ.+
၂ ဖဲန့ၣ်အခါ ယဟိဝၤယွၤ တဲဘၣ်စီၤယိၤၡူလၢ “တ့န့ၢ်ဒီတဖၣ်လၢလၢၢ် ဝံၤဒီး ကူးတရံး*+ ပှၤအံၣ်စရ့လးဖိ အပိာ်ခွါတဖၣ်တက့ၢ်.” ၃ အဃိ စီၤယိၤၡူ တ့န့ၢ်ဒီတဖၣ်လၢလၢၢ် ဒီးကူးတရံးဝဲ ပှၤအံၣ်စရ့လးဖိ အပိာ်ခွါတဖၣ်ဖဲ က့ၤဘၤသၤဧၤရလိးန့ၣ်လီၤ.+ ၄ စီၤယိၤၡူ ကူးတရံး အဝဲသ့ၣ် မ့ၢ်လၢပိာ်ခွါလၢ အသးနံၣ်ပှဲၤလၢ ကကဲသုး ကိးဂၤဒဲးန့ၣ် ဖဲအဝဲသ့ၣ် ဟးထီၣ်လၢ ကီၢ်အဲၤကူပတူးဝံၤအလီၢ်ခံ သံဝဲလၢကျဲ လၢပှၢ်မုၢ်ကနၢ အပူၤလံအဃိလီၤ.+ ၅ ပှၤခဲလၢာ်လၢ အဟးထီၣ်လၢ ကီၢ်အဲၤကူပတူးအပူၤန့ၣ် ဒိးတၢ်ကူးတရံးဝံၤလံ. ဘၣ်ဆၣ် ဖဲအဝဲသ့ၣ် ဟးထီၣ်လၢ ကီၢ်အဲၤကူပတူးအပူၤ ဝံၤအလီၢ်ခံ ပှၤလၢအအိၣ်ဖျဲၣ်ထီၣ်လၢ ပှၢ်မုၢ်ကနၢအပူၤန့ၣ် တဒိးဘၣ်တၢ်ကူးတရံး နီတဂၤဒံးဘၣ်. ၆ ပှၤအံၣ်စရ့လးဖိ လဲၤတၢ်လၢ ပှၢ်မုၢ်ကနၢ အနံၣ် ၄၀ လီၤ.+ ဖဲန့ၣ်အခါ ပိာ်ခွါလၢ အဟးထီၣ်လၢ ကီၢ်အဲၤကူပတူးလၢ အသးနံၣ်ပှဲၤထီၣ်လၢ ကကဲသုးန့ၣ် သံဝဲကိးဂၤဒဲးလံ. အဝဲသ့ၣ် မ့ၢ်ပှၤလၢ အတဒိကနၣ် ယဟိဝၤယွၤအကလုၢ်ဘၣ်.+ အဃိ ကီၢ်လၢ တၢ်နုၢ်ထံဒီးကနဲစီ ယွၤလီၤဝဲလၢအပူၤလၢ+ ယဟိဝၤယွၤ အၢၣ်လီၤပာ်စၢၤ အဝဲသ့ၣ် အမိၢ်ပၢ်ဖံဖု လၢပျၢၤတဖၣ်လၢ အကဟ့ၣ်လီၤပှၤန့ၣ်+ ယဟိဝၤယွၤ အၢၣ်လီၤအဝဲသ့ၣ်လၢ အတဟ့ၣ်အခွဲးလၢ အဝဲသ့ၣ်ကထံၣ်ဘၣ်ဝဲ နီတဘျီဘၣ်.+ ၇ အဃိ အဝဲသ့ၣ် အဖိခွါတဖၣ်န့ၣ် နုာ်လီၤက့ၤလၢ အဝဲသ့ၣ်အလီၢ်လီၤ.+ ဘၣ်ဆၣ် လၢကျဲန့ၣ် အဖိခွါတဖၣ်အံၤ တဒိးတၢ်ကူးတရံးဒံးဘၣ်. အဃိ စီၤယိၤၡူ ကူးတရံး အဝဲသ့ၣ်လီၤ.
၈ ဖဲအဝဲသ့ၣ် ကူးတရံးဝဲ ပှၤအံၣ်စရ့လးဖိခဲလၢာ် ဝံၤအခါ အဝဲသ့ၣ်ဆဲးအိၣ်ဝဲဖဲ ဒဲကဝီၤအပူၤ တုၤလၢအဝဲသ့ၣ် ဘျါက့ၤဝဲတစုလီၤ.
၉ ဝံၤဒီးယဟိဝၤယွၤ တဲဘၣ်စီၤယိၤၡူလၢ “တနံၤညါအံၤ ယမၤလီၤမၢ်ကွံာ် ပှၤအဲၤကူပတူးဖိတဖၣ် အတၢ်ဒုၣ်ဒွဲၣ်စံးအၢသုလီၤ.” အဃိ တၢ်လီၢ်တတီၤအံၤ ဘၣ်တၢ်ကိးအီၤလၢ ဝ့ၢ်ကံးလကၤလး+ တုၤလၢမုၢ်မဆါတနံၤအံၤလီၤ.
၁၀ ပှၤအံၣ်စရ့လးဖိတဖၣ် ဆဲးအိၣ်ဝဲဖဲ ဝ့ၢ်ကံးလကၤလး ဒီးအဝဲသ့ၣ်မၤဝဲ ဘူၣ်လဲၤကပာ် ဖဲလါထီၣ် ၁၄ သီ+ ဟါလီၤခီန့ၣ်လီၤ. ဒီးအဝဲသ့ၣ်မၤဝဲဖဲ ဝ့ၢ်ယရံၤဃိ အတၢ်ပၢၤခိၣ်န့ၣ်လီၤ. ၁၁ ဖဲဘူၣ်လဲၤကပာ်ဝံၤ လၢခံတသီန့ၣ် အဝဲသ့ၣ်အီၣ်ဝဲ တၢ်လၢ အမဲထီၣ်သၣ်ထီၣ်လၢ ဟီၣ်ခိၣ်လၢအမ့ၢ် ကိၣ်လၢအတပၣ်ဒီးကိၣ်မံၣ်ဘၣ်+ ဒီးဘုအဝဲာ်တဖၣ်န့ၣ်လီၤ. ၁၂ ဖဲနံၤလၢ အဝဲသ့ၣ်စးထီၣ်အီၣ်ဝဲ တၢ်လၢ အမဲထီၣ်သၣ်ထီၣ်လၢ ဟီၣ်ခိၣ်န့ၣ် ကိၣ်မၤနၤ တဖျါထီၣ်လၢၤဘၣ်. လၢပှၤအံၣ်စရ့လးဖိတဖၣ်အဂီၢ်န့ၣ် ကိၣ်မၤနၤ တအိၣ်လၢၤဘၣ်.+ ဘၣ်ဆၣ် အဝဲသ့ၣ် စးထီၣ်အီၣ်ဝဲ တၢ်လၢ အမဲထီၣ်သၣ်ထီၣ်လၢ ကီၢ်ကနၤဧၣ်အပူၤ ဖဲနံၣ်အဝဲန့ၣ်လီၤ.+
၁၃ ဖဲစီၤယိၤၡူ အိၣ်ဘူးဒီး ဝ့ၢ်ယရံၤဃိအခါ အဝဲကွၢ်ထီၣ်တၢ်ဒီး ထံၣ်ဝဲပိာ်ခွါတဂၤ+ ဆၢထၢၣ်လၢ အမဲာ်ညါ အိၣ်ဒီး နးတဘ့ၣ်လၢအစုပူၤလီၤ.+ စီၤယိၤၡူ လဲၤလၢအအိၣ် ဒီးသံကွၢ်အီၤလၢ “နအိၣ်လၢ ပအိၣ်တကပၤဧါ မ့တမ့ၢ် လၢပဒုၣ်ပဒါ အအိၣ်တကပၤဧါ.” ၁၄ ဒီးပိာ်ခွါတဂၤန့ၣ် က့ၤတဲဆၢအီၤလၢ “တမ့ၢ်ဒ်န့ၣ်ဘၣ်. ဘၣ်ဆၣ် ယဟဲဒ် ယဟိဝၤယွၤ အသုးမုၢ်အခိၣ်တဂၤ အသိးလီၤ.”+ ဖဲန့ၣ်အခါ စီၤယိၤၡူ ထိၣ်လီၤပှီၤအသး ဒီးတဲအီၤလၢ “ယကစၢ်ဧၢ, နကတဲယၤ တၢ်မနုၤလဲၣ်.” ၁၅ ယဟိဝၤယွၤ အသုးမုၢ်အခိၣ်တဂၤန့ၣ် တဲဆၢက့ၤ စီၤယိၤၡူလၢ “တၢ်လီၢ်လၢ နအိၣ်အံၤန့ၣ် မ့ၢ်ဝဲတၢ်လီၢ်လၢ အစီဆှံအဃိ ဘ့ၣ်လီၤကွံာ် နခီၣ်ဖံးတက့ၢ်.” ဒီးစီၤယိၤၡူ မၤဝဲဒ်န့ၣ် တဘျီဃီလီၤ.+