၂ သ့းစၤလနံ
၃ လၢခံကတၢၢ်န့ၣ် ဒီပုၢ်ဝဲၢ်သ့ၣ်ဧၢ, ဃ့ထုကဖၣ်န့ၢ်တၢ်လၢပဂီၢ်+ ဒ်သိးယဟိဝၤယွၤ* အကလုၢ်ကထါ ကဆဲးရၤလီၤအသးချ့ချ့+ ဒီးကဘၣ် တၢ်မၤလၤကပီၤအီၤ ဒ်အဘၣ်တၢ်မၤလၤကပီၤအီၤလၢ သုကျါအသိးတက့ၢ်. ၂ ဒီးဃ့စ့ၢ်ကီးလၢ ကစၢ်ယွၤ ကဒီသဒၢပှၤလၢ ပှၤအၢပှၤသီ ဒီးပှၤလၢအသးအၢအစုပူၤ,+ မ့ၢ်လၢ ပှၤတအိၣ်ဒီးတၢ်နာ် ကိးဂၤဒဲးဘၣ်အဃိလီၤ.+ ၃ ဘၣ်ဆၣ် ကစၢ်န့ၣ် အကလုၢ်တီလီၤ. ဒီးအကဒုးဆူၣ်ထီၣ်သု ဒီးကဒီသဒၢသုလၢ မုၣ်ကီၤလံၢ်* အစုပူၤလီၤ. ၄ တကးဒံးဘၣ် ဒ်ပမ့ၢ် ကစၢ်အပျဲၢ်အဘီၣ်အသိး ပနာ်န့ၢ်သုလီၤ. ဒီးပတၢ်ဟံးစုနဲၣ်ကျဲတဖၣ်န့ၣ် ပနာ်လၢ သုမၤထွဲအီၤလံ ဒီးသုကဆဲးမၤထွဲအီၤ ဆူညါဒံးလီၤ. ၅ မ်ကစၢ်ဆဲးဟံးစုနဲၣ်ကျဲသုသး ဒ်သိးသုကအဲၣ်ကစၢ်ယွၤဒီး+ အိၣ်ဒီးတၢ်တူၢ်န့ၢ်ခီၣ်ကဲ+ လၢခရံာ်အဂီၢ်တက့ၢ်.
၆ ဒီပုၢ်ဝဲၢ်သ့ၣ်ဧၢ, ခဲအံၤ ပကဟ့ၣ်လီၤသု တၢ်ဟံးစုနဲၣ်ကျဲလၢ ပကစၢ်ယ့ၣ်ၡူးခရံာ် အမံၤအပူၤလီၤ. ဒီပုၢ်ဝဲၢ်လၢ အအိၣ်မူ တကြၢးတဘၣ်ဘၣ်+ ဒီးတမၤထွဲ တၢ်ဟံးစုနဲၣ်ကျဲလၢ သုဒိးန့ၢ်အီၤလၢ ပအိၣ်ဘၣ်န့ၣ် ထုးယံၤထီၣ်သုသး လၢအီၤတက့ၢ်.+ ၇ သုကြၢးကွၢ်လိမၤဒိး ပဝဲသ့ၣ်တဖၣ်ဒ်လဲၣ်န့ၣ် သုနီၢ်ကစၢ်သ့ၣ်ညါလီၤ.+ ဖဲပအိၣ်ဒီးသုအခါ ပတအိၣ်မူလၢ အတကြၢးတဘၣ်ဘၣ်. ၈ ဒီးပတအီၣ်ကလီ ပှၤဂၤအတၢ်အီၣ် နီတဂၤဘၣ်.+ ဒ်သိးပသုတပာ်ထီၣ် တၢ်ဝံတၢ်ယိးဃၢလၢ ကျိၣ်စ့တကပၤလၢ သုလိၤနီတဂၤတဂ့ၤအဂီၢ် ပမၤတၢ်ဆူၣ်ဆူၣ် ဒီးပထဲးဂံၢ်ထဲးဘါလၢ မုၢ်ဆါဒီးလၢမုၢ်နၤလီၤ.+ ၉ နီၢ်ကီၢ်န့ၣ် ပအိၣ်ဒီးတၢ်ခွဲးတၢ်ယာ်လၢ ပကဒိးန့ၢ်ဘၣ်တၢ်+ ဘၣ်ဆၣ်ပအဲၣ်ဒိး ပာ်ဖျါထီၣ်ပသး ဒ်တၢ်အဒိအတဲာ်လၢ သုကကွၢ်လိအီၤ အဂီၢ်လီၤ.+ ၁၀ ဒီးဖဲပအိၣ်ဒီးသုအခါ ပဟ့ၣ်လီၤသုတၢ်ဟံးစုနဲၣ်ကျဲလၢ “ပှၤတဂၤဂၤ မ့ၢ်တအဲၣ်ဒိး မၤတၢ်ဘၣ်န့ၣ် အတကြၢးအီၣ်တၢ်ဘၣ်.”+ ၁၁ ပနၢ်ဟူလၢ ပှၤလၢသုကျါတနီၤန့ၣ် အိၣ်မူတကြၢးတဘၣ်ဘၣ်+ ဒီးတမၤတၢ် နီတစဲးဘၣ်. ဒီးအဝဲသ့ၣ် မၤဘၣ်ထွဲလိာ်အသးဒီး တၢ်ဂ့ၢ်လၢ အတဘၣ်ဃးဒီးအီၤဘၣ်.+ ၁၂ ပှၤဒ်န့ၣ်အသိးတဖၣ်န့ၣ် ပမၤလိာ် ဒီးဟ့ၣ်သဆၣ်ထီၣ် အဝဲသ့ၣ်လၢ ကစၢ်ယ့ၣ်ၡူးခရံာ်အမံၤလၢ အဝဲသ့ၣ်ကြၢးအိၣ်မူကစုဒု, မၤတၢ်မၤ ဒီးအီၣ်တၢ်အီၣ်လၢ အနီၢ်ကစၢ်မၤန့ၢ်ဝဲလီၤ.+
၁၃ ဒီပုၢ်ဝဲၢ်သ့ၣ်ဧၢ, မ့မ့ၢ်သုန့ၣ် တဘၣ်တူၢ်ၡူသုသးလၢ သုကဆဲးမၤတၢ်ဂ့ၤ အဂီၢ်တဂ့ၤ. ၁၄ ဒီးပှၤတဂၤဂၤမ့ၢ်တဒိကနၣ် ပကလုၢ်ခီဖျိလၢ လံာ်ပရၢတဘ့ၣ်အံၤဘၣ်န့ၣ် ပာ်ပနီၣ်အီၤ ဒီးပတုာ် တၢ်ရ့လိာ်သးဒီးအီၤ+ ဒ်သိးအကမဲာ်ဆှး အဂီၢ်တက့ၢ်. ၁၅ ဘၣ်ဆၣ် တဘၣ်ပာ်အီၤ ဒ်ဒုၣ်ဒါတဂၤ အသိးတဂ့ၤ. ဆဲးဟ့ၣ်ကူၣ်ဟ့ၣ်ဖးအီၤ+ ဒ်အမ့ၢ်ဒီပုၢ်ဝဲၢ်တဂၤ အသိးတက့ၢ်.
၁၆ ကစၢ်လၢအဟ့ၣ်လီၤ တၢ်သူၣ်မံသးမုာ်န့ၣ် မ်အဟ့ၣ်သု တၢ်သူၣ်မံသးမုာ်ထီဘိ လၢကျဲကိးဘိဒဲးတက့ၢ်.+ ဒီးမ်ကစၢ်အိၣ်ဒီး သုဝဲခဲလၢာ်တက့ၢ်.
၁၇ ယၤ, စီၤပီလူးအံၤ ယကွဲးန့ၢ်သု တၢ်ဆၢဂ့ၤဆၢဝါအံၤလၢ ယနီၢ်ကစၢ်အစုလီၤ.+ လၢယလံာ်ပရၢ ကိးဘ့ၣ်ဒဲးအပူၤန့ၣ် ယကွဲးအီၤဒ်အံၤထီဘိ ဒ်သိး သုကသ့ၣ်ညါလၢ ပှၤလၢအကွဲးလံာ်န့ၣ် မ့ၢ်ယၤလီၤ.
၁၈ မ်သုကိးဂၤဒဲး ဒိးန့ၢ်ဘၣ် ပကစၢ်ယ့ၣ်ၡူးခရံာ် အတၢ်သးကညီၤ ဒိၣ်ဒိၣ်မုၢ်မုၢ်တက့ၢ်.