၁ စီၤပၤ

၁ စီၤပၤဒၤဝံး သးပှၢ်ထီၣ်ဒိၣ်မးလီၤ.+ ဒီးပှၤဒုးလုးထီၣ်အီၤဒီးယၣ်​ ဘၣ်ဆၣ်​ အဝဲတကလၢၤထီၣ်ဘၣ်. ၂ အဃိ အခ့အပှၤတဖၣ်​ တဲအီၤလၢ “ကစၢ်စီၤပၤဧၢ, ဟ့ၣ်အခွဲးလၢ ပှၤကလဲၤဃုန့ၢ်နၤ မုၣ်ကနီၤဖိတဂၤ ဒ်သိးအဝဲကမၤန့ၢ်တၢ်လၢနဂီၢ် ဒီးကွၢ်ထွဲနၤမီၤ. အဝဲကမံနီၤလၢ နစုဒုၣ်လိၤ ဒ်သိး နကကလၢၤထီၣ်အဂီၢ်လီၤ.” ၃ အဝဲသ့ၣ်​ ဟးဃုဝဲ မုၣ်ကနီၤဖိ လၢအဒိၣ်တၢ်ဂ့ၤတဂၤ လၢအံၣ်စရ့လး အဟီၣ်ကဝီၤအပူၤ ဝးဝးလီၤ. ဒီးအဝဲသ့ၣ်​ ထံၣ်န့ၢ်ဝဲ ပှၤၡူန့ၣ်ဖိ+ နီၢ်အဘံၡး+ ဒီးက့ၤကိးအီၤလၢ စီၤပၤအအိၣ်လီၤ. ၄ ဒီးပိာ်မုၣ်ဖိန့ၣ်​ ဒိၣ်တၢ်ဂ့ၤဒိၣ်မးလီၤ. အဝဲမၤန့ၢ်တၢ်လၢ စီၤပၤအဂီၢ် ဒီးကွၢ်ထွဲ စီၤပၤလီၤ. ဘၣ်ဆၣ်​ စီၤပၤ တမံဃုာ်ဒီးအီၤဘၣ်.

၅ နီၢ်ဃးကံၤ အဖိခွါ စီၤအဒိနံၤယၤ+ ပာ်ထီၣ်ထီအသး ဒီးတဲဝဲလၢ “ယကကဲထီၣ်​ စီၤပၤလီၤ.” အဝဲအိၣ်ဒီး လ့ၣ်ကဟၣ်သုးတခိၣ်​ ဒီးပှၤဒိးကသ့ၣ်တဖၣ်​ ဒီးပှၤပိာ်ခွါ အဂၤ ယဲၢ်ဆံ လၢကဃ့ၢ်လၢ အမဲာ်ညါလီၤ.+ ၆ ဘၣ်ဆၣ်​ အပၢ်န့ၣ်​ တသိၣ်က့ၤသီက့ၤအီၤဘၣ်* ဒီးတတဲအီၤလၢ “ဘၣ်မနုၤအဃိ နဘၣ်မၤဒ်န့ၣ်လဲၣ်” နီတဘျီဘၣ်. အဝဲဒိၣ်တၢ်ဂ့ၤဒိၣ်မး ဒီးဖဲစီၤအးဘၡါလိၣ်​ အမိၢ်အိၣ်ဖျဲၣ်ထီၣ်အီၤ ဝံၤအလီၢ်ခံ စီၤအဒိနံၤယၤ အမိၢ်အိၣ်ဖျဲၣ်ထီၣ်အီၤလီၤ. ၇ စီၤအဒိနံၤယၤ တၢၣ်ပီၣ်တၢၣ်ပီလိာ်သးဒီး နီၢ်စရူယၤ အဖိခွါ စီၤယိၤအာ် ဒီးပှၤလုၢ်တၢ်ဒိၣ်​ စီၤအ့ဘယၤသၢ်+ ဒီးအဝဲသ့ၣ်​ သးအိၣ်ဆီၣ်ထွဲမၤစၢၤဝဲ စီၤအဒိနံၤယၤလီၤ.+ ၈ မ့မ့ၢ် ပှၤလုၢ်တၢ်ဒိၣ်​ စီၤစၤဒိး,+ စီၤယဟိၤယဒါ အဖိခွါ စီၤဘနါယၤ,+ ဝံနၤသၣ်,+ စီၤၡံမံၤ,+ စီၤရ့ဧံၤ ဒီးစီၤဒၤဝံး အပှၤသုးဖိလၢ အဂံၢ်ဆူၣ်ဘါဆူၣ်တဖၣ်န့ၣ်+ တဆီၣ်ထွဲ စီၤအဒိနံၤယၤဘၣ်.

၉ လၢခံ စီၤအဒိနံၤယၤ လုၢ်ထီၣ်ဝဲ+ သိ, ကျီၢ် ဒီးဆၣ်ဖိကီၢ်ဖိလၢ အဘီၣ်တဖၣ်လၢ လၢၢ်စိၤဃ့လ့း အကပၤလၢအဘူးဒီး ဧ့ၣ်ရိၤက့လးန့ၣ်လီၤ. ဒီးအဝဲကွဲမုာ် အဒီပုၢ်ဝဲၢ်ခဲလၢာ်လၢ အမ့ၢ် စီၤပၤအဖိခွါ ဒီးပှၤပိာ်ခွါခဲလၢာ်လၢ ယူဒၤအဒူၣ်ကျါ လၢအကဲစီၤပၤ အခ့အပှၤန့ၣ်လီၤ. ၁၀ ဘၣ်ဆၣ်​ အဝဲတကွဲမုာ် ဝံနၤသၣ်, စီၤဘနါယၤ, ပှၤသုးဖိလၢ အဂံၢ်ဆူၣ်ဘါဆူၣ်တဖၣ်​ ဒီးအဒီပုၢ်ဝဲၢ်ခွါ စီၤၡလိၤမိၤဘၣ်. ၁၁ ဒီးဝံနၤသၣ်+ တဲဘၣ်​ စီၤၡလိၤမိၤအမိၢ်+ နီၢ်ဘၤသၡ့ဘၤလၢ+ “နနၢ်ဟူဘၣ်လံဧါ. နီၢ်ဃးကံၤ အဖိခွါ စီၤအဒိနံၤယၤ+ ကဲထီၣ်စီၤပၤလံ. ဘၣ်ဆၣ်​ ဘၣ်ဃးဒီးတၢ်ဂ့ၢ်အံၤ ပကစၢ် စီၤဒၤဝံး တသ့ၣ်ညါ တၢ်နီတမံၤဘၣ်. ၁၂ ဒ်သိး နကမၤပူၤဖျဲး နသးသမူ ဒီးနဖိခွါ စီၤၡလိၤမိၤ အသးသမူအဂီၢ် ခဲအံၤ ယကဟ့ၣ်ကူၣ်နၤ တၢ်တမံၤ.+ ၁၃ လဲၤလၢ စီၤပၤဒၤဝံး အအိၣ်ဒီး တဲအီၤလၢ ‘ကစၢ်စီၤပၤဧၢ, နအၢၣ်လီၤယၤလၢ “နဖိခွါ စီၤၡလိၤမိၤ ကကဲထီၣ်စီၤပၤလၢ ယလီၢ် ဒီးကဆ့ၣ်နီၤလၢ ယလီၢ်ပစိာ်အဖီခိၣ်” တမ့ၢ်ဧီၤ.+ ဘၣ်ဆၣ်​ ဘၣ်မနုၤအဃိ စီၤအဒိနံၤယၤ ကဲထီၣ်စီၤပၤလဲၣ်.’ ၁၄ ဖဲနတဲတၢ်ဒီး စီၤပၤအဆၢကတီၢ် ယကလဲၤနုာ်လီၤ ဒီးယကတဲစီၤပၤလၢ နတဲတၢ်န့ၣ်အဘၣ်လီၤ.”

၁၅ နီၢ်ဘၤသၡ့ဘၤ လဲၤနုာ်လီၤလၢ စီၤပၤအအိၣ်​ လၢအဒၢးပူၤလီၤ. ဒီးစီၤပၤန့ၣ်​ အသးပှၢ်ထီၣ်ဒိၣ်မး ဒီးပှၤၡူန့ၣ်ဖိ နီၢ်အဘံၡး+ မၤန့ၢ်တၢ်လၢ စီၤပၤအဂီၢ်လီၤ. ၁၆ ဒီးနီၢ်ဘၤသၡ့ဘၤ ထိၣ်လီၤပှီၤအသးလၢ စီၤပၤအမဲာ်ညါ ဒီးစီၤပၤတဲအီၤလၢ “နကဃ့တၢ်မနုၤလဲၣ်.” ၁၇ အဝဲတဲဆၢက့ၤဝဲလၢ “ကစၢ်ဧၢ, နအၢၣ်လီၤပာ်စၢၤယၤလၢ ယဟိဝၤယွၤ အမဲာ်ညါလၢ ပဖိခွါ စီၤၡလိၤမိၤ ကကဲစီၤပၤလၢ နလီၢ်ဒီး ကဆ့ၣ်နီၤလၢ နလီၢ်ပစိာ်အဖီခိၣ်လီၤ.+ ၁၈ ဘၣ်ဆၣ်​ စီၤအဒိနံၤယၤ ကဲထီၣ်စီၤပၤလံ. ဒီးဘၣ်ဃးဒီး တၢ်ဂ့ၢ်အံၤန့ၣ်​ စီၤပၤတသ့ၣ်ညါ တၢ်နီတမံၤဘၣ်.+ ၁၉ အဝဲ ဟ့ၣ်လုၢ်ထီၣ်ဝဲ ကျီၢ်ဖါတဖၣ်, ဆၣ်ဖိကီၢ်ဖိလၢ အဘီၣ်တဖၣ်​ ဒီးသိအါအါဂီၢ်ဂီၢ် ဒီးအဝဲကွဲမုာ်ဝဲ ကစၢ်စီၤပၤ အဖိခွါခဲလၢာ်, ပှၤလုၢ်တၢ်ဒိၣ်​ စီၤအ့ဘယၤသၢ် ဒီးသုးခိၣ်ကျၢၢ် စီၤယိၤအာ်လီၤ.+ ဘၣ်ဆၣ်​ အဝဲတကွဲမုာ် နဖိခွါ စီၤၡလိၤမိၤဘၣ်.+ ၂၀ ကစၢ်စီၤပၤဧၢ, ခဲအံၤ ပှၤအံၣ်စရ့လးဖိခဲလၢာ် အိၣ်ခိးနၤဒ်သိး နကတဲဘၣ်အဝဲသ့ၣ်လၢ မတဂၤ ကဆ့ၣ်နီၤလၢ နလီၢ်ပစိာ် အဖီခိၣ်လဲၣ်န့ၣ်လီၤ. ၂၁ ကစၢ်စီၤပၤဧၢ, နမ့ၢ်တမၤဒ်န့ၣ်ဘၣ်န့ၣ်​ ဖဲနသံဒ် နမိၢ်ပၢ်ဖံဖု လၢပျၢၤတဖၣ်​ အသိးအခါ ပှၤကပာ်ယၤ ဒီးယဖိခွါ စီၤၡလိၤမိၤ ဒ်ပှၤထီဒါတၢ်ဖိ အသိးလီၤ.”

၂၂ ဖဲနီၢ်ဘၤသၡ့ဘၤ တဲတၢ်ဒီး စီၤပၤအဆၢကတီၢ် ဝံနၤသၣ်​ ဟဲနုာ်လီၤဝဲလီၤ.+ ၂၃ တဘျီဃီန့ၣ်​ ပှၤတဲဘၣ်​ စီၤပၤလၢ “ဝံနၤသၣ်​ အိၣ်ဖဲအံၤလီၤ.” ဝံနၤသၣ်​ ဟဲလၢ စီၤပၤအမဲာ်ညါ ဒီးထိၣ်လီၤပှီၤအသးလီၤ. ၂၄ ဒီးဝံနၤသၣ်​ တဲဝဲလၢ “ကစၢ်စီၤပၤဧၢ, မ့ၢ်နတဲလၢ စီၤအဒိနံၤယၤ ကကဲစီၤပၤလၢ နလီၢ်ဒီး ကဆ့ၣ်နီၤလၢ နလီၢ်ပစိာ်အဖီခိၣ်ဧါ.+ ၂၅ တနံၤအံၤ အဝဲလဲၤလုၢ်ထီၣ်ဝဲ+ ကျီၢ်ဖါတဖၣ်, ဆၣ်ဖိကီၢ်ဖိလၢ အဘီၣ်တဖၣ်​ ဒီးသိတဖၣ်​ အါအါဂီၢ်ဂီၢ်လီၤ. အဝဲကွဲမုာ် စီၤပၤ အဖိခွါခဲလၢာ်, သုးခိၣ်တဖၣ်​ ဒီးပှၤလုၢ်တၢ်ဒိၣ်​ စီၤအ့ဘယၤသၢ်လီၤ.+ အဝဲသ့ၣ်​ အီၣ်သကိးအီသကိးတၢ်ဒီး စီၤအဒိနံၤယၤ ဒီးတဲဝဲတဘျီဝံၤတဘျီလၢ ‘မ်စီၤပၤ အဒိနံၤယၤ အိၣ်မူဘၣ်​ ယံာ်ယံာ်တက့ၢ်.’ ၂၆ ဘၣ်ဆၣ်​ အဝဲတကွဲမုာ်ယၤ, ပှၤလုၢ်တၢ်ဒိၣ်​ စီၤစၤဒိး,+ စီၤယဟိၤယဒါ အဖိခွါ စီၤဘနါယၤ ဒီးနဖိခွါ စီၤၡလိၤမိၤဘၣ်. ၂၇ အဃိ မ့ၢ်ကစၢ်စီၤပၤ တူၢ်လိာ်လၢ အကမၤဝဲဒ်န့ၣ်ဧါ. ဒီးမ့ၢ်မတဂၤ ကထီၣ်စီၤပၤအလီၢ် ဒီးဆ့ၣ်နီၤလၢ နလီၢ်ပစိာ်အဖီခိၣ်လဲၣ်န့ၣ်​ နတတဲကျၢဆိယၤဘၣ်ဧါ.”

၂၈ စီၤပၤဒၤဝံး တဲဆၢဝဲလၢ “မၢနီၢ်ဘၤသၡ့ဘၤ ဟဲလၢယအိၣ်တက့ၢ်.” ဒီးနီၢ်ဘၤသၡ့ဘၤ ဟဲဆၢထၢၣ်ဝဲလၢ စီၤပၤ အမဲာ်ညါလီၤ. ၂၉ စီၤပၤအၢၣ်လီၤတၢ် ဒီးတဲဝဲလၢ “ယဟိဝၤယွၤ လၢအမၤပူၤဖျဲးယၤလၢ တၢ်နးတၢ်ဖှီၣ်ခဲလၢာ် အပူၤတဂၤန့ၣ်+ ယအၢၣ်လီၤတၢ်လၢ အမဲာ်ညါလၢ ၃၀ ဒ်ယအၢၣ်လီၤပာ်စၢၤနၤလၢ အံၣ်စရ့လးအကစၢ် ယဟိဝၤယွၤ အမဲာ်ညါလၢ ‘နဖိခွါ စီၤၡလိၤမိၤ ကကဲထီၣ်​ စီၤပၤလၢယလီၢ် ဒီးအဝဲကဆ့ၣ်နီၤလၢ ယလီၢ်ပစိာ်အဖီခိၣ်’ အသိးန့ၣ်​ တနံၤအံၤ ယကမၤဒ်န့ၣ်လီၤ.” ၃၁ ဒီးနီၢ်ဘၤသၡ့ဘၤ ဆုးလီၤအခိၣ်​ ဒီးထိၣ်လီၤပှီၤအသးလၢ စီၤပၤအမဲာ်ညါ ဒီးတဲဝဲလၢ “မ်ယကစၢ် စီၤပၤဒၤဝံး အိၣ်မူဘၣ်​ လီၤထူလီၤယိာ်တက့ၢ်.”

၃၂ တဘျီဃီန့ၣ်​ စီၤပၤဒၤဝံး တဲဝဲလၢ “မၢပှၤလုၢ်တၢ်ဒိၣ်​ စီၤစၤဒိး, ဝံနၤသၣ်​ ဒီးစီၤယဟိၤယဒါ+ အဖိခွါ စီၤဘနါယၤ+ ဟဲလၢယအိၣ်တက့ၢ်.” အဃိ အဝဲသ့ၣ်​ ဟဲလၢစီၤပၤအအိၣ်လီၤ. ၃၃ စီၤပၤတဲဘၣ်​ အဝဲသ့ၣ်လၢ “ကိးထီၣ်​ ယခ့ယပှၤတဖၣ်​ ဒီးဒုးဒိး ယဖိခွါ စီၤၡလိၤမိၤလၢ ယကသ့ၣ်ယီၤ*+ ဒီးလဲၤဆှၢအီၤလၢ ကံဃိၣ်​ အထံထီၣ်ပၢၢ်တက့ၢ်.+ ၃၄ ဖဲန့ၣ်ပှၤလုၢ်တၢ်ဒိၣ်​ စီၤစၤဒိး ဒီးဝံနၤသၣ်​ ကဒိးဖှူအီၤ+ ဒ်စီၤပၤတဂၤအသိး လၢအံၣ်စရ့လး အဖီခိၣ်လီၤ. ဝံၤဒီး အူထီၣ်ကွဲၤဒီး တဲလၢ ‘မ်စီၤပၤၡလိၤမိၤ အိၣ်မူဘၣ်ဝဲ ယံာ်ယံာ်တက့ၢ်.’+ ၃၅ ဝံၤဒီး ဟဲက့ၤပိာ်ကဒါက့ၤ အခံတက့ၢ်. အဝဲကဟဲက့ၤ ဆ့ၣ်နီၤလၢ ယလီၢ်ပစိာ်အဖီခိၣ်​ ဒီးကကဲထီၣ်​ စီၤပၤလၢ ယလီၢ်လီၤ. ဒီးယကပာ်ထီၣ်အီၤလၢ အံၣ်စရ့လး ဒီးယူဒၤအဒူၣ်​ အခိၣ်လီၤ.” ၃၆ တဘျီဃီန့ၣ်​ စီၤယဟိၤယဒါ အဖိခွါ စီၤဘနါယၤ တဲဝဲလၢ “အၤမ့ၣ်, မ်ယကစၢ်စီၤပၤ အကစၢ် ယဟိဝၤယွၤ ပာ်ဂၢၢ်ပာ်ကျၢၤ တၢ်ဂ့ၢ်တခါအံၤတက့ၢ်. ၃၇ မ်ယဟိဝၤယွၤ အိၣ်ဒီးစီၤၡလိၤမိၤ ဒ်အအိၣ်ဒီး ကစၢ်စီၤပၤ အသိးတက့ၢ်.+ မ်အဝဲ မၤဒိၣ်ထီၣ်​ အစိကမီၤ ဒိၣ်န့ၢ်ဒံး ကစၢ်စီၤပၤဒၤဝံး အစိကမီၤန့ၣ်တက့ၢ်.”+

၃၈ ဒီးပှၤလုၢ်တၢ်ဒိၣ်​ စီၤစၤဒိး, ဝံနၤသၣ်, စီၤယဟိၤယဒါ အဖိခွါ စီၤဘနါယၤ,+ ပှၤကရံသးဖိ ဒီးပှၤပလ့သးဖိတဖၣ်+ လဲၤဝဲဒီး ဒုးဒိးထီၣ်​ စီၤၡလိၤမိၤလၢ စီၤပၤဒၤဝံး အကသ့ၣ်ယီၤ+ ဒီးအဝဲသ့ၣ်လဲၤဆှၢအီၤလၢ ကံဃိၣ်​ အထံထီၣ်ပၢၢ်လီၤ.+ ၃၉ ပှၤလုၢ်တၢ်ဒိၣ်​ စီၤစၤဒိး ဟံးန့ၢ် တၢ်အနၢၤတဘိလၢ အပူၤအိၣ်ဒီးသိ+ လၢအအိၣ်လၢ ဒဲအပူၤ*+ ဒီးဒိးဖှူဝဲ စီၤၡလိၤမိၤလီၤ.+ ဒီးအဝဲသ့ၣ်​ အူထီၣ်ကွဲၤ ဒီးပှၤခဲလၢာ် ကိးပသူထီၣ်ဝဲလၢ “မ်စီၤပၤၡလိၤမိၤ အိၣ်မူဘၣ်ယံာ်ယံာ်တက့ၢ်.” ၄၀ ဝံၤဒီးပှၤဂီၢ်မုၢ်ခဲလၢာ် ပိာ်ထီၣ်အခံ ဒီးလဲၤထီၣ်ဝဲတခီခီ အူထီၣ်ဝဲပံတခီခီ ဒီးသူၣ်ဖှံသးညီဝဲဒိၣ်မးလီၤ. ဒီးမ့ၢ်လၢ အဝဲသ့ၣ်သီၣ်ဝဲဒိၣ်မးအဃိ ဟီၣ်ခိၣ်သထြုးသထြီဝဲလီၤ.+

၄၁ ဖဲစီၤအဒိနံၤယၤ ဒီးပှၤလၢအကွဲမုာ်ဝဲတဖၣ်​ အီၣ်တၢ်ဝံၤအခါ အဝဲသ့ၣ်​ နၢ်ဟူဝဲ တၢ်သီၣ်တဖၣ်အံၤလီၤ.+ ဒီးဖဲစီၤယိၤအာ် နၢ်ဟူဝဲ ကွဲၤသီၣ်အခါ အတဲဝဲလၢ “ဘၣ်မနုၤအဃိ တၢ်သီၣ်သထြုးသထြီလၢ ဝ့ၢ်ပူၤထဲအံၤညါလဲၣ်.” ၄၂ ဒီးဖဲစီၤယိၤအာ် တဲတၢ်အဆၢကတီၢ် ပှၤလုၢ်တၢ်ဒိၣ်​ စီၤအ့ဘယၤသၢ် အဖိခွါ စီၤယိနၤသၣ်+ ဟဲတုၤဝဲလီၤ. ဒီးစီၤအဒိနံၤယၤ တဲဝဲလၢ “ဟဲနုာ်လီၤဟီ, နကဲပှၤဂ့ၤအဃိ နကဟဲစိာ် တၢ်ကစီၣ်လၢ အမုာ်လီၤသၢၤ.” ၄၃ ဘၣ်ဆၣ်​ စီၤယိနၤသၣ်​ တဲဆၢ စီၤအဒိနံၤယၤလၢ “ယတဟဲစိာ် တၢ်သးခုကစီၣ်ဘၣ်. ပကစၢ်စီၤပၤဒၤဝံး ဒုးကဲထီၣ်စီၤၡလိၤမိၤလၢ စီၤပၤလံ. ၄၄ စီၤပၤဆှၢလီၤအီၤဃုာ်ဒီး ပှၤလုၢ်တၢ်ဒိၣ်​ စီၤစၤဒိး, ဝံနၤသၣ်, စီၤယဟိၤယဒါ အဖိခွါ စီၤဘနါယၤ, ပှၤကရံသးဖိ, ပှၤပလ့သးဖိ ဒီးအဝဲသ့ၣ်​ ဒုးဒိးအီၤလၢ စီၤပၤအကသ့ၣ်ယီၤလီၤ.+ ၄၅ ပှၤလုၢ်တၢ်ဒိၣ်​ စီၤစၤဒိး ဒီးဝံနၤသၣ်​ ဒိးဖှူစီၤၡလိၤမိၤ ဒ်စီၤပၤအသိး ဖဲကံဃိၣ်​ အထံထီၣ်ပၢၢ်လီၤ. ဝံၤဒီး ပှၤခဲလၢာ်ဟးထီၣ်ဖဲန့ၣ်​ လၢတၢ်သူၣ်ခုသးခုအပူၤ ဒီးတၢ်သီၣ်သထြုးသထြီ လၢဝ့ၢ်ပူၤလီၤ. တၢ်အသီၣ်​ လၢသုနၢ်ဟူန့ၣ်​ အကဲတၢ်အသီၣ်​ တခါန့ၣ်လီၤ. ၄၆ ဒီးစီၤၡလိၤမိၤ ဆ့ၣ်နီၤလၢ စီၤပၤအလီၢ်ပစိာ် အဖီခိၣ်လံ. ၄၇ တကးဒံးဘၣ်​ စီၤပၤအခ့အပှၤတဖၣ်န့ၣ်​ ဟဲပတြၢၤ ပကစၢ် စီၤပၤဒၤဝံးလၢ ‘မ်နကစၢ်ယွၤ မၤဒိၣ်ထီၣ်​ စီၤၡလိၤမိၤအမံၤ ဒိၣ်န့ၢ်နမံၤ ဒီးမ်အဝဲ မၤဒိၣ်ထီၣ်အစိကမီၤ ဒိၣ်န့ၢ်ဒံး ပကစၢ်စီၤပၤဒၤဝံး အစိကမီၤန့ၣ်တက့ၢ်.’ ဒီးစီၤပၤဒၤဝံး ဘူၣ်ထီၣ်ဘါထီၣ်​ ကစၢ်ယွၤလၢ အလီၢ်မံခိၣ်လီၤ. ၄၈ ဒီးစီၤပၤ တဲစ့ၢ်ကီးဝဲလၢ ‘အံၣ်စရ့လး အကစၢ် ယဟိဝၤယွၤလၢ အဟ့ၣ်ယၤ ပှၤတဂၤလၢ ကဆ့ၣ်နီၤလၢ ယလီၢ်ပစိာ် ဒီးဟ့ၣ်ယၤအခွဲးလၢ ယကထံၣ်ဘၣ်လၢ ယမဲာ်န့ၣ်​ မ်အဘၣ်တၢ် စံးထီၣ်ပတြၢၤအီၤတက့ၢ်.’”

၄၉ ဒီးပှၤလၢ စီၤအဒိနံၤယၤ ကွဲမုာ်အီၤတဖၣ်န့ၣ်​ ပျံၤထီၣ်တၢ်ဒိၣ်မးဒီး အဝဲသ့ၣ်​ ဂဲၤဆၢထၢၣ်က့ၤဝဲ ကိးဂၤဒဲးလီၤ. ၅၀ ဒီးစီၤအဒိနံၤယၤ စ့ၢ်ကီး ပျံၤဝဲစီၤၡလိၤမိၤ အဃိ အဝဲဂဲၤဆၢထၢၣ်​ ဒီးလဲၤဝဲလၢ တၢ်လုၢ်လီၢ် ဒီးဖီၣ်တံၢ်ဃာ်ဝဲ တၢ်လုၢ်လီၢ် အနၢၤတဖၣ်လီၤ.+ ၅၁ ဒီးပှၤတဲဘၣ်​ စီၤၡလိၤမိၤလၢ “စီၤပၤၡလိၤမိၤဧၢ, စီၤအဒိနံၤယၤ ပျံၤနၤအဃိ အဝဲဖီၣ်တံၢ်ဃာ် တၢ်လုၢ်လီၢ် အနၢၤတဖၣ်​ ဒီးတဲဝဲလၢ ‘မၢစီၤပၤၡလိၤမိၤ မၤဆိတၢ်အၢၣ်လီၤဒီးယၤလၢ အဝဲတမၤသံယၤ လၢနးဘၣ်န့ၣ်တက့ၢ်.’” ၅၂ ဒီးစီၤၡလိၤမိၤတဲဝဲလၢ “အဝဲမ့ၢ်အိၣ်မူ မူာ်မူာ်နီၢ်နီၢ်န့ၣ်​ အခိၣ်ဆူၣ်တဘိမး တလီၤတဲာ်လၢ ဟီၣ်ခိၣ်အလိၤဘၣ်. ဘၣ်ဆၣ်​ ခဲကၢာ်အဝဲမ့ၢ် မၤတၢ်အၢန့ၣ်+ အဝဲကဘၣ်သံလီၤ.” ၅၃ အဃိ စီၤပၤၡလိၤမိၤ မၢပှၤလဲၤကိးန့ၢ် စီၤအဒိနံၤယၤ လၢတၢ်လုၢ်လီၢ်လီၤ. ဒီးစီၤအဒိနံၤယၤ ဟဲထိၣ်လီၤပှီၤအသးလၢ စီၤပၤၡလိၤမိၤ အမဲာ်ညါလီၤ. ဒီးစီၤၡလိၤမိၤ တဲအီၤလၢ “က့ၤလၢနဟံၣ်တက့ၢ်.”