၁ စီၤပၤ
၆ ဖဲပှၤအံၣ်စရ့လးဖိ ဟးထီၣ်လၢ ကီၢ်အဲၤကူပတူးအပူၤ+ ၄၈၀ နံၣ်တနံၣ် ဒီးဖဲစီၤၡလိၤမိၤ ကဲထီၣ်စီၤပၤလၢ အံၣ်စရ့လးအဖီခိၣ် လွံၢ်နံၣ်တနံၣ် ဖဲလါစံာ်*+ (မ့ၢ်ဝဲ လါခံလါတလါ) န့ၣ်စီၤၡလိၤမိၤ စးထီၣ်တ့ထီၣ် ဟံၣ်လၢ ယဟိဝၤယွၤအဂီၢ်လီၤ.*+ ၂ ဟံၣ်လၢ စီၤၡလိၤမိၤ တ့ထီၣ်ဝဲလၢ ယဟိဝၤယွၤအဂီၢ်န့ၣ် အထီအိၣ်ဝဲ အပျၢ်* ၆၀, အဒီၣ်ဃီၤအိၣ်ဝဲ အပျၢ် ၂၀ ဒီးအကစီၤထီၣ်ထီ အိၣ်ဝဲ အပျၢ် ၃၀ လီၤ.+ ၃ တၢ်လုၢ်ဟံၣ်အဘျီၣ်ဒိၣ်လၢ+ အအိၣ်ဝဲလၢ အမဲာ်ညါတကပၤန့ၣ် အဒီၣ်ဃီၤအိၣ်ဝဲ အပျၢ် ၂၀ တုၤသိးသိးဒီး တၢ်လုၢ်ဟံၣ်အဒီၣ်ဃီၤလီၤ. ဒီးပှၤမ့ၢ်ဒွးစးထီၣ်လၢ တၢ်လုၢ်ဟံၣ် အမဲာ်ညါတကပၤန့ၣ် ဘျီၣ်ဒိၣ်တဖျၢၣ်အံၤ အထီအိၣ်ဝဲ အပျၢ်တဆံလီၤ.
၄ ဒီးအဝဲတ့ဝဲ တၢ်လုၢ်ဟံၣ်အပဲတြီဖိတဖၣ် လၢအကနူၤတဖၣ် အံၣ်လီၤအံၣ်လီၤဝဲလီၤ.+ ၅ တကးဒံးဘၣ် အဝဲတ့ထီၣ် တၢ်သူၣ်ထီၣ်တခါလၢ အဘုးတာ်လိာ်သးဒီး တၢ်လုၢ်ဟံၣ်အဒူၣ် ဒီးအအိၣ်ဝးတရံး တၢ်လုၢ်ဟံၣ်အဒူၣ်, တၢ်လီၢ်စီဆှံအဒူၣ်* ဒီးတၢ်လီၢ်စီဆှံကတၢၢ် အဒူၣ်လီၤ.*+ ဒီးအဝဲတ့ထီၣ် ဒၢးဖိတဖၣ်လၢ တၢ်သူၣ်ထီၣ်တခါအံၤ အပူၤဝးဝးလီၤ.+ ၆ ဒီးအဖီလာ်ကတၢၢ် တကထြၢလၢအအိၣ်ဒီး ဒၢးဖိတဖၣ်န့ၣ် အဒီၣ်ဃီၤအိၣ်ဝဲ ယဲၢ်ပျၢ်, အခၢၣ်သး တကထြၢန့ၣ် အဒီၣ်ဃီၤအိၣ်ဝဲ ဃုပျၢ် ဒီးသၢကထြၢတကထြၢန့ၣ် အဒီၣ်ဃီၤအိၣ်ဝဲနွံပျၢ်လီၤ. အဃိ တၢ်လုၢ်ဟံၣ်အဒူၣ်လၢ အဖီခိၣ် တကထြၢဘၣ် တကထြၢန့ၣ် ဘူန့ၢ်ဒံးလၢ အဖီလာ် တကထြၢစုာ်စုာ်ဒ်သိး တၢ်တီတဖၣ် တဘၣ်တၢ်သွီနုာ်အီၤလၢ တၢ်လုၢ်ဟံၣ်အဒူၣ် အလိၤတဂ့ၤအဂီၢ်လီၤ.+
၇ ဖဲပှၤတ့ထီၣ် တၢ်လုၢ်ဟံၣ်အခါ ဒ်သိး ပှၤသုတနၢ်ဟူ တူၤမ့ၢ်ဂ့ၤ ကွါမ့ၢ်ဂ့ၤ ဒီးတၢ်ပီးတၢ်လီထး အသီၣ်တဂ့ၤအဂီၢ် တၢ်လုၢ်ဟံၣ်န့ၣ် ဘၣ်တၢ်သူၣ်ထီၣ်အီၤလၢ လၢၢ်လၢ ဘၣ်တၢ်ခူၣ်န့ၢ်အီၤ ဒီးကတဲာ်ကတီၤ ပာ်စၢၤအီၤန့ၣ်လီၤ.+ ၈ ဒၢးဖိတဖၣ်လၢ တၢ်ဖီလာ်ကတၢၢ် တကထြၢ အတၢ်နုာ်လီၤအလီၢ်န့ၣ် အိၣ်ဝဲလၢ တၢ်လုၢ်ဟံၣ် အကလံၤထံး တကပၤလီၤ.+ ဒီးဖဲန့ၣ် အိၣ်ဒီးဃီသွါလၢ အလဲၤတရံးအသးဆူ အခၢၣ်သးတကထြၢ ဒီးလၢတၢ်ခၢၣ်သး တကထြၢန့ၣ် ဆူသၢကထြၢ တကထြၢလီၤ. ၉ ဒီးအဝဲဆဲးတ့ထီၣ် တၢ်လုၢ်ဟံၣ် တုၤလၢအဝံၤဝဲလီၤ.+ အဝဲတ့ထီၣ် တၢ်လုၢ်ဟံၣ် အခိၣ်ဒုးလၢ ကျူတဖၣ်ဒီး သ့ၣ်ဘ့ၣ်ဘၣ်တဖၣ်လၢ အဘၣ်တၢ်မၤအီၤလၢ သ့ၣ်ဆှိအ့ရ့း အသ့ၣ်ဘၣ်လီၤ.+ ၁၀ အဝဲတ့ထီၣ်ဝဲ ဒၢးဖိတဖၣ်လၢ အအိၣ်ဝးတရံး တၢ်လုၢ်ဟံၣ်လီၤ.+ ဒီးတဒၢးစုာ်စုာ်န့ၣ် အထီအိၣ်ဝဲ ယဲၢ်ပျၢ် ဒီးဒၢးတဖၣ်အံၤ ဘၣ်တၢ်မၤဘုးတာ်အီၤဒီး တၢ်လုၢ်ဟံၣ် လၢသ့ၣ်ဆှိအ့ရ့း အသ့ၣ်ဘၣ်တဖၣ်လီၤ.
၁၁ ဒီးယဟိဝၤယွၤ တဲဘၣ် စီၤၡလိၤမိၤလၢ ၁၂ “နမ့ၢ်လဲၤတၢ် ဒ်ယတၢ်ဘျၢတဖၣ်အသိး ဒီးအိၣ်မူမၤထွဲ ယတၢ်သိၣ်တၢ်သီ ဒီးယတၢ်မၤလိာ်ခဲလၢာ်န့ၣ်+ ယကမၤလၢပှဲၤထီၣ် ယတၢ်အၢၣ်လီၤလၢ ယအၢၣ်လီၤပာ်စၢၤ နပၢ်စီၤဒၤဝံးလၢ အဘၣ်ဃးဒီး ဟံၣ်လၢနတ့ထီၣ် တဖျၢၣ်အံၤလီၤ.+ ၁၃ ဒီးယကအိၣ်လၢ ယပှၤဂီၢ်မုၢ် အံၣ်စရ့လးအကျါ+ ဒီးယတပာ်တ့ၢ် အဝဲသ့ၣ်ဘၣ်.”+
၁၄ စီၤၡလိၤမိၤ ဆဲးသူၣ်ထီၣ်တၢ် ဒ်သိးတၢ်လုၢ်ဟံၣ် ကဝံၤအဂီၢ်လီၤ. ၁၅ တၢ်ဒူၣ်တဖၣ်လၢ တၢ်လုၢ်ဟံၣ် အကိပူၤန့ၣ် အဝဲတ့ထီၣ်ဝဲလၢ သ့ၣ်ဆှိအ့ရ့း အသ့ၣ်ဘၣ်တဖၣ် စးထီၣ်လၢအဒါ တုၤလၢအခိၣ်ဒုးလၢ အကိပူၤတကပၤလီၤ. ဒီးတၢ်ဒါခိၣ်န့ၣ် အဝဲဒါလီၤအီၤဒီး သ့ၣ်ကၠူနံးဖၢၤ အသ့ၣ်ဘၣ်တဖၣ်လီၤ.+ ၁၆ ဒီးအဝဲတ့ထီၣ် တၢ်လီၢ်တတီၤ လၢအအိၣ်ဝဲအပျၢ် ၂၀ လၢတၢ်လုၢ်ဟံၣ်အပူၤ အလီၢ်ခံတကပၤလီၤ. အဝဲတ့ထီၣ်ဝဲလၢ သ့ၣ်ဆှိအ့ရ့း အသ့ၣ်ဘၣ်တဖၣ် စးထီၣ်လၢ အဒါ တုၤလၢအခိၣ်ဒုးလၢ အကိပူၤတကပၤလီၤ. လၢတၢ်လီၢ်တတီၤအံၤအပူၤန့ၣ် အဝဲတ့ထီၣ် တၢ်လီၢ်စီဆှံကတၢၢ်+ လၢအမ့ၢ် ဒၢးလၢအလီၢ်ခံတဖျၢၣ်လီၤ.+ ၁၇ ဒီးတၢ်လီၢ်စီဆှံ*+ လၢအအိၣ်လၢ တၢ်လီၢ်စီဆှံကတၢၢ် အမဲာ်ညါန့ၣ် အိၣ်ဝဲ အပျၢ် ၄၀ လီၤ. ၁၈ သ့ၣ်ဆှိအ့ရ့း လၢအအိၣ်လၢ တၢ်လုၢ်ဟံၣ် အကိပူၤန့ၣ် ပှၤစိးပျၤ ထံလူၤသၣ်အဂီၤ+ ဒီးဖီဖးထီၣ်အဂီၤတဖၣ် လၢအလိၤလီၤ.+ တၢ်လုၢ်ဟံၣ် အဒူၣ်ခဲလၢာ်န့ၣ် ဘၣ်တၢ်ကျးဘၢအီၤလၢ သ့ၣ်ဆှိအ့ရ့း အဃိ လၢၢ်တဖျါ နီတဖျၢၣ်ဘၣ်.
၁၉ လၢတၢ်လုၢ်ဟံၣ်အပူၤန့ၣ် အဝဲကတဲာ်ကတီၤထီၣ် ပာ်စၢၤဝဲ တၢ်လီၢ်စီဆှံကတၢၢ်*+ ဒ်သိးကပာ်လီၤဝဲ ယဟိဝၤယွၤ အတၢ်အၢၣ်လီၤအီလီၤ အတလါအဂီၢ်လီၤ.+ ၂၀ တၢ်လီၢ်စီဆှံကတၢၢ်န့ၣ် အထီအိၣ်ဝဲ အပျၢ် ၂၀, အဒီၣ်ဃီၤအိၣ်ဝဲ အပျၢ် ၂၀ ဒီးအကစီၤထီၣ်ထီအိၣ်ဝဲ အပျၢ် ၂၀ လီၤ.+ ဒီးအဝဲကျးဝဲ ဒၢးပူၤလၢထူစီ အကဘျၣ်လီၤ. ဒီးအဝဲကျးဝဲ တၢ်လုၢ်လီၢ်လၢ+ သ့ၣ်ဆှိအ့ရ့းလီၤ. ၂၁ စီၤၡလိၤမိၤ ကျးဝဲ တၢ်လုၢ်ဟံၣ်အကိပူၤလၢ ထူစီအကဘျၣ်+ ဒီးလၢတၢ်လီၢ်စီဆှံကတၢၢ်+ လၢဘၣ်တၢ်ကျးအီၤလၢ ထူစီအကဘျၣ် အမဲာ်ညါန့ၣ် အဝဲတြီဃာ်ဝဲလၢ ပျံၤထူတဖၣ်လီၤ. ၂၂ စီၤၡလိၤမိၤ ကျးဝဲ တၢ်လုၢ်ဟံၣ်ဒီတဖျၢၣ်လၢ ထူကဘျၣ် တုၤလၢအဝံၤလီၤ. ဒီးတၢ်လုၢ်လီၢ်လၢ အအိၣ်ဘူးဒီး တၢ်လီၢ်စီဆှံကတၢၢ်န့ၣ် အဝဲကျးစ့ၢ်ကီး ဝဲလၢထူကဘျၣ် ဒီတဖျၢၣ်လီၤ.+
၂၃ လၢတၢ်လီၢ်စီဆှံကတၢၢ်အပူၤန့ၣ် အဝဲတ့ထီၣ် ခ့ရူာ်အဂီၤခံဒု+ လၢသ့ၣ်ဆှိလီၤ. ဒီးခ့ရူာ်တဒုစုာ်စုာ်န့ၣ် အထီအိၣ်ဝဲ အပျၢ်တဆံလီၤ.+ ၂၄ ဒီးခ့ရူာ် အဒံးဆ့တဘ့ၣ် အိၣ်ဝဲယဲၢ်ပျၢ် ဒီးအဒံးဆ့ အဝဲတဘ့ၣ် အိၣ်ဝဲ ယဲၢ်ပျၢ်လီၤ. အဃိ စးထီၣ်လၢ အဒံးဆ့တဘ့ၣ် အစိးနါ တုၤလၢ အဒံးဆ့အဝဲတဘ့ၣ် အစိးနါန့ၣ် အိၣ်ဝဲအပျၢ် တဆံလီၤ. ၂၅ ခ့ရူာ်ခံဒုတဒုန့ၣ် အိၣ်စ့ၢ်ကီး အပျၢ်တဆံလီၤ. ခ့ရူာ်ခံဒုလၢာ်န့ၣ် အက့ၢ်အဂီၤ ဒီးအဒိၣ်အထီ ဒ်သိးလိာ်အသးလီၤ. ၂၆ ခ့ရူာ်တဒုန့ၣ် အထီအိၣ်ဝဲ အပျၢ်တဆံ ဒီးလၢအဝဲတဒုန့ၣ် အထီအိၣ်ဝဲထဲန့ၣ် စ့ၢ်ကီးလီၤ. ၂၇ ဒီးအဝဲပာ် ခ့ရူာ်ခံဒုလၢ+ ဒၢးလၢအမ့ၢ် တၢ်လီၢ်စီဆှံကတၢၢ် အပူၤလီၤ. ဒီးခ့ရူာ်ခံဒုန့ၣ် အဒံးဆ့တဖၣ် သလၣ်ထီၣ်အသး ဒ်သိး အဒံးဆ့ တဘ့ၣ်ဒီးတဘ့ၣ် ကထိးလိာ်သးလၢ ဒၢးအံၤအခၢၣ်သးလီၤ. ဒီးခ့ရူာ်တဒုန့ၣ် အဒံးဆ့အဝဲတဘ့ၣ် တုၤလၢ တၢ်ဒူၣ်အအံၤတကပၤ ဒီးခ့ရူာ်အဝဲတဒု အဒံးဆ့အဝဲတဘ့ၣ်န့ၣ် တုၤလၢ တၢ်ဒူၣ်အဝဲတကပၤလီၤ. ၂၈ ဒီးခ့ရူာ်တဖၣ်န့ၣ် ဘၣ်တၢ်ကျးအီၤလၢ ထူကဘျၣ်လီၤ.
၂၉ ဒီးအဝဲစိးပျၤဝဲ ခ့ရူာ်တဖၣ်အဂီၤ,+ သ့ၣ်စူၣ်ပလိၣ်တဖၣ်အဂီၤ+ ဒီးဖီဖးထီၣ်အဂီၤတဖၣ်+ လၢတၢ်လုၢ်ဟံၣ် အဒူၣ်ခဲလၢာ်အလိၤလၢ တၢ်လီၢ်စီဆှံကတၢၢ်အပူၤ ဒီးလၢတၢ်လီၢ်စီဆှံအပူၤ ဝးဝးန့ၣ်လီၤ. ၃၀ တၢ်လုၢ်ဟံၣ် အတၢ်လီၢ်စီဆှံကတၢၢ်အဒါ ဒီးတၢ်လီၢ်စီဆှံ အဒါန့ၣ် အဝဲကျးဝဲလၢထူ ကဘျၣ်လီၤ. ၃၁ လၢတၢ်လီၢ်စီဆှံကတၢၢ် အတၢ်နုာ်လီၤအလီၢ်အဂီၢ်န့ၣ် အဝဲတ့ထီၣ်တြဲၤခံဘ့ၣ် လၢသ့ၣ်ဆှိ, တၢ်အထူၣ်လၢ အကပၤခံထူၣ် ဒီးတြဲၤအထူၣ်တဖၣ် ဒ်အမ့ၢ်ယဲၢ်ပူတပူလီၤ.* ၃၂ ပဲတြီခံဘ့ၣ်န့ၣ် မ့ၢ်ဝဲသ့ၣ်ဆှိ ဒီးအဝဲစိးပျၤ ခ့ရူာ်တဖၣ်အဂီၤ, သ့ၣ်စူၣ်ပလိၣ်တဖၣ်အဂီၤ ဒီးဖီဖးထီၣ်အဂီၤတဖၣ် လၢပဲတြီခံဘ့ၣ်န့ၣ် အလိၤ ဒီးကျးလီၤအီၤဒီး ထူကဘျၣ်တဖၣ်လီၤ. ဒီးအဝဲဒိတံၢ်ဝဲ ထူတဖၣ်အံၤလၢ ခ့ရူာ် ဒီးသ့ၣ်စူၣ်ပလိၣ်အဂီၤတဖၣ် အလိၤလီၤ. ၃၃ ဒီးအဝဲတ့ထီၣ် ပဲတြီအထူၣ်တဖၣ် ဒ်န့ၣ်အသိးစ့ၢ်ကီး လၢတၢ်လီၢ်စီဆှံ အတၢ်နုာ်လီၤအလီၢ် အဂီၢ်လီၤ. ဒီးပဲတြီအထူၣ်တဖၣ်န့ၣ် မ့ၢ်ဝဲသ့ၣ်ဆှိ ဒီးအနၢၣ်လွံၢ်နၢၣ်လၢ* အကနူၤထဲသိးလိာ်အသးလီၤ. ၃၄ အဝဲတ့ထီၣ် ပဲတြီခံဘ့ၣ်လၢ သ့ၣ်ကၠူနံးဖၢၤ အသ့ၣ်ဘၣ်တဖၣ်လီၤ. ပဲတြီတဘ့ၣ်န့ၣ် အိၣ်ဒီးအလၣ် ခံခီလၢ အတရံးအသးလၢ နီၣ်တရံးသးအဖီခိၣ် ဒီးပဲတြီလၢ အဝဲတဘ့ၣ်န့ၣ် အိၣ်ဒီးအလၣ် ခံခီလၢ အတရံးအသးလၢ နီၣ်တရံးသးအဖီခိၣ်န့ၣ်လီၤ.+ ၃၅ လၢပဲတြီခံဘ့ၣ် အလိၤန့ၣ် အဝဲ စိးပျၤဝဲ ခ့ရူာ်တဖၣ်အဂီၤ, သ့ၣ်စူၣ်ပလိၣ်တဖၣ်အဂီၤ ဒီးဖီဖးထီၣ်အဂီၤတဖၣ် ဒီးကျးထီၣ်ဝဲဒီး ထူဘူဘူဖိ အကဘျၣ်တဖၣ်လီၤ.
၃၆ အဝဲတ့ထီၣ်ဝဲ တၢ်ဒူၣ်လၢ အအိၣ်ဝးတရံး တၢ်ပျီလၢအအံၣ်တဘ့ၣ်လီၤ.+ ဒီးအဝဲတ့ထီၣ် တၢ်ဒူၣ်အံၤလၢ လၢၢ်လၢအဘၣ်တၢ်စိးပျၤအီၤ သၢဂ့ၢ် ဒီးသ့ၣ်ဆှိအ့ရ့း အသ့ၣ်ဘၣ်တကျိၤလီၤ.+
၃၇ ဖဲစီၤၡလိၤမိၤ ပၢတၢ် လွံၢ်နံၣ်တနံၣ် ဖဲလါစံာ်န့ၣ်* ပှၤပာ်လီၤ ယဟိဝၤယွၤ အတၢ်လုၢ်ဟံၣ် အခီၣ်ထံးဝံၤဝဲလီၤ.+ ၃၈ ဖဲစီၤၡလိၤမိၤ ပၢတၢ် ၁၁ နံၣ်အနံၣ် ဖဲလါဘူလး* (မ့ၢ်ဝဲ ဃိးလါတလါ) န့ၣ် ပှၤတ့ထီၣ် တၢ်လုၢ်ဟံၣ်ဝံၤဝဲ ခဲလၢာ် ဒ်တၢ်ရဲၣ်လီၤကျဲၤလီၤအီၤ အသိးလီၤ.+ အဃိ စီၤၡလိၤမိၤ တ့ထီၣ်တၢ်လုၢ်ဟံၣ် ယံာ်ဝဲ နွံနံၣ်လီၤ.