၁ ၡမူၤအ့လး
၁၃ ဖဲစီၤစီလူး ကဲထီၣ်စီၤပၤအခါ+ အသးနံၣ်အိၣ်ဝဲ . . .* ဒီးအဝဲပၢဝဲ ပှၤအံၣ်စရ့လးဖိ ခံနံၣ်လီၤ. ၂ စီၤစီလူး ဃုထၢထီၣ်ဝဲ ပှၤပိာ်ခွါ အဂၤ ၃,၀၀၀ လၢပှၤအံၣ်စရ့လးဖိ အကျါလီၤ. ပှၤအဂၤ ၂,၀၀၀ န့ၣ်အိၣ်ဒီး စီၤစီလူးလၢ မံးကမၣ် ဒီးလၢ ဝ့ၢ်ဘ့ၤသ့လး အကစၢၢ်ကလိကျါ ဒီးပှၤအဂၤ ၁,၀၀၀ န့ၣ်အိၣ်ဒီး စီၤယိနၤသၣ်+ လၢပှၤဘံၣ်ယၤမံၣ်ဖိ အဝ့ၢ်ကံဘဧၤလီၤ.+ မ့မ့ၢ်လၢ ပှၤအဂၤတဖၣ်န့ၣ် စီၤစီလူး ဒုးက့ၤအဝဲသ့ၣ်လၢ အနီၢ်ကစၢ် အဟံၣ်လီၤ. ၃ ဒီးစီၤယိနၤသၣ် လဲၤမၤနၢၤ ပှၤဖလ့ၡသးအသုးဖိတဒူၣ်+ လၢအအိၣ်လၢ ဝ့ၢ်က့ဘၤအပူၤ+ ဒီးပှၤဖလ့ၡသးဖိ နၢ်ဟူဘၣ်ဝဲ တၢ်ဂ့ၢ်တခါအံၤလီၤ. ဒီးစီၤစီလူး မၢပှၤအူကွဲၤလၢ+ ကီၢ်ဒီဘ့ၣ်ညါအပူၤ ဒီးတဲဝဲလၢ “မ်ပှၤဧ့ၤဘြံၤဖိတဖၣ် နၢ်ဟူတက့ၢ်.” ၄ ပှၤအံၣ်စရ့လးဖိခဲလၢာ် နၢ်ဟူဝဲ တၢ်ကစီၣ်လၢ “စီၤစီလူး လဲၤမၤနၢၤဝဲ ပှၤဖလ့ၡသးအသုးဖိတဒူၣ် ဒီးခဲအံၤန့ၣ် ပှၤဖလ့ၡသးဖိ သးဟ့ဝဲ ပှၤအံၣ်စရ့လးဖိလီၤ.” အဃိ ပှၤစိာ်တၢ်ကစီၣ်ဖိတဖၣ် ကိးဖှိၣ်ထီၣ် ပှၤဂီၢ်မုၢ် ဒ်သိးကလဲၤထံၣ်လိာ်သး ဒီးစီၤစီလူး လၢဝ့ၢ်ကံးလကၤလးလီၤ.+
၅ ဒီးပှၤဖလ့ၡသးဖိစ့ၢ်ကီး ပာ်ဖှိၣ်ထီၣ်အသး ဒ်သိးအကဒုးတၢ်ဒီး ပှၤအံၣ်စရ့လးဖိအဂီၢ်လီၤ. အဝဲသ့ၣ် အိၣ်ဒီးလ့ၣ်ကဟၣ်သုး အခိၣ် ၃၀,၀၀၀ ဒီးပှၤဒိးကသ့ၣ်သုးဖိ အဂၤ ၆,၀၀၀ ဒီးသုးဖိလၢ အနီၣ်ဂံၢ်အိၣ်ဝဲ အါအါဂီၢ်ဂီၢ် ဒ်မဲးလၢ ပီၣ်လဲၣ်နံၤအသိးလီၤ.+ ဒီးအဝဲသ့ၣ် လဲၤထီၣ်ဆီလီၤအသးလၢ မံးကမၣ် လၢအအိၣ်ဝဲလၢ ဘ့ၤသအၤဝ့ၣ် အမုၢ်ထီၣ်တခီလီၤ.+ ၆ အဃိ ပှၤအံၣ်စရ့လးဖိ အိၣ်ဒီး တၢ်ကီတၢ်ခဲဖးဒိၣ် ဒီးအဝဲသ့ၣ် ဘၣ်ကိၢ်ဘၣ်ဂီၤလီၤ. ဒီးအဝဲသ့ၣ် လဲၤအိၣ်ခူသူၣ်လၢ လ့ကိတဖၣ်အပူၤ,+ လၢလၢၢ်ပူၤ, လၢဟီၣ်ခိၣ်ပူၤ ဒီးလၢတၢ်ပူၤတဖၣ်လီၤ. ၇ တကးဒံးဘၣ် ပှၤဧ့ၤဘြံၤဖိတနီၤန့ၣ် လဲခီဂာ် ထံကျိယၢ်ဒ့ၣ် လၢပှၤကးဖိ အဟီၣ်ကဝီၤ ဒီးကံးလဧး အဟီၣ်ကဝီၤလီၤ.+ ဘၣ်ဆၣ် စီၤစီလူးန့ၣ် အိၣ်ဒံးလၢ ဝ့ၢ်ကံးလကၤလး ဒီးပှၤလၢ အပိာ်အခံတဖၣ်န့ၣ် ကနိးကစုာ်ဝဲလီၤ. ၈ ဒ်စီၤၡမူၤအ့လး ပာ်ပနီၣ်ဝဲ တၢ်ဆၢကတီၢ်အသိး စီၤစီလူး ဆဲးအိၣ်ခိးဝဲ နွံသီလီၤ. ဘၣ်ဆၣ် စီၤၡမူၤအ့လး တဟဲတုၤလၢ ဝ့ၢ်ကံးလကၤလးဒံးဘၣ် ဒီးပှၤအံၣ်စရ့လးသုးဖိလၢ အအိၣ်ဒီး စီၤစီလူးန့ၣ် လီၤမုၢ်ပြံပြါ ကွံာ်ဝဲလီၤ. ၉ အဃိ စီၤစီလူး တဲဝဲလၢ “ဟဲစိာ်န့ၢ်ယၤ တၢ်လုၢ်ဒွဲၣ်အူ ဒီးတၢ်လုၢ်အိၣ်ဃူအိၣ်ဖိးတဖၣ် တက့ၢ်.” ဒီးအဝဲ လုၢ်ထီၣ်ဝဲ တၢ်လုၢ်ဒွဲၣ်အူလီၤ.+
၁၀ ဘၣ်ဆၣ် ဖဲစီၤစီလူး လုၢ်ထီၣ် တၢ်လုၢ်ဒွဲၣ်အူ ဝံၤအခါ စီၤၡမူၤအ့လး ဟဲတုၤဝဲလီၤ. အဃိ စီၤစီလူး လဲၤထီၣ်သဂၢၢ်အီၤ ဒီးဆၢဂ့ၤဆၢဝါ* အီၤလီၤ. ၁၁ ဝံၤဒီးစီၤၡမူၤအ့လး တဲဝဲလၢ “ဘၣ်မနုၤအဃိ နမၤဒ်အံၤလဲၣ်.” စီၤစီလူး တဲဆၢဝဲလၢ “ပှၤသုးဖိလၢ အအိၣ်ဒီးယၤတဖၣ်န့ၣ် လီၤမုၢ်ပြံပြါကွံာ်ဝဲ+ ဒီးနတဟဲ ဒ်တၢ်ဆၢကတီၢ်လၢ အဘၣ်တၢ်ပာ်ပနီၣ်ဃာ်အီၤ အသိးဘၣ် ဒီးပှၤဖလ့ၡသးဖိ ပာ်ဖှိၣ်ထီၣ်အသးလၢ မံးကမၣ်+ ၁၂ အဃိ ယတဲလီၤယသးလၢ ‘ပှၤဖလ့ၡသးဖိ ကဟဲလီၤဒုးယၤ ဖဲဝ့ၢ်ကံးလကၤလးအံၤ ဒီးယတဃ့ ယဟိဝၤယွၤ အတၢ်မၤစၢၤဒံးဘၣ်.’ အဃိ ယတူၢ်ဘၣ်လၢ ယဘၣ်ဟ့ၣ်လုၢ်ထီၣ်န့ၢ်ဆူၣ် တၢ်လုၢ်ဒွဲၣ်အူလီၤ.”
၁၃ စီၤၡမူၤအ့လး တဲဘၣ် စီၤစီလူးလၢ “နဟးမၤနါစိၤတၢ်လံ. နကစၢ်ယဟိဝၤယွၤ အတၢ်မၤလိာ် လၢအမၤလိာ်နၤန့ၣ် နတဒိကနၣ်ဘၣ်.+ နမ့ၢ်ဒိကနၣ်န့ၣ် ယဟိဝၤယွၤ ကဒုးအိၣ်ဂၢၢ်ဆိးကျၢၤ နဘီနမုၢ် လၢအံၣ်စရ့လးအဖီခိၣ် လီၤထူလီၤယိာ်လီၤ. ၁၄ ဘၣ်ဆၣ် ခဲအံၤန့ၣ် နဘီနမုၢ် တအိၣ်ဂၢၢ်ဆိးကျၢၤလၢၤဘၣ်.+ ခီဖျိလၢ နတဒိကနၣ် တၢ်လၢယဟိဝၤယွၤ မၤလိာ်နၤဘၣ်အဃိ+ ယဟိဝၤယွၤ ကဃုန့ၢ် ပှၤတဂၤလၢ အဘၣ်အသး+ ဒီးယဟိဝၤယွၤ ကဒုးကဲထီၣ်အီၤလၢ အပှၤဂီၢ်မုၢ်အခိၣ်လီၤ.”+
၁၅ ဝံၤဒီး စီၤၡမူၤအ့လး ဟးထီၣ်ဝဲလၢ ဝ့ၢ်ကံးလကၤလး ဒီးလဲၤဝဲ လၢပှၤဘံၣ်ယၤမံၣ်ဖိ အဝ့ၢ်ကံဘဧၤလီၤ. ဒီးစီၤစီလူး ဂံၢ်ဝဲပှၤလၢ အအိၣ်တ့ၢ်ဒီးအီၤ ဒီးပှၤသုးဖိ ကအိၣ်ဒံး အဂၤ ၆၀၀ လီၤ.+ ၁၆ စီၤစီလူး, အဖိခွါ စီၤယိနၤသၣ် ဒီးပှၤသုးဖိတဖၣ်လၢ အအိၣ်ဒီးအဝဲသ့ၣ်န့ၣ် အိၣ်ဝဲဖဲ ပှၤဘံၣ်ယၤမံၣ်ဖိ အဝ့ၢ်ကံဘၤလီၤ.+ ဒီးပှၤဖလ့ၡသးဖိ ဆီလီၤပာ်အသး လၢမံးကမၣ်လီၤ.+ ၁၇ လၢပှၤဖလ့ၡသးဖိ အဒဲကဝီၤပူၤန့ၣ် ပှၤဖလ့ၡသးသုးဖိ ဟးထီၣ်ဝဲ သၢဒူၣ်လီၤ. တဒူၣ်န့ၣ် လဲၤဝဲကျဲလၢ ဝ့ၢ်ဧိးဖြၤ လၢအလဲၤတုၤလီၤလၢ ကီၢ်ၡူဧၤလးလီၤ. ၁၈ အဂၤတဒူၣ်န့ၣ် လဲၤဝဲကျဲလၢ ဝ့ၢ်ဘ့ၤသဃိရိၣ်+ ဒီးသၢဒူၣ်တဒူၣ်န့ၣ် လဲၤဝဲကျဲလၢ ကီၢ်ဆၢလၢ စဘိဧံၣ်အတၢ်တြီၤအမဲာ်ညါ လၢအအိၣ်လၢ ပှၢ်မုၢ်ကနၢ တခီလီၤ.
၁၉ မ့ၢ်လၢ ပှၤဖလ့ၡသးဖိ တအဲၣ်ဒိးလၢ ပှၤဧ့ၤဘြံၤဖိ ပိာ်ဝဲ နးဒီးဘီတဖၣ်ဘၣ်အဃိ လၢအံၣ်စရ့လး အကီၢ်ပူၤန့ၣ် ပှၤပိာ်ထးဖိ တအိၣ်နီတဂၤဘၣ်. ၂၀ ဒီးပှၤအံၣ်စရ့လးဖိ ခဲလၢာ် ဘၣ်လဲၤလီၤလၢ ပှၤဖလ့ၡသးဖိအအိၣ် ဒ်သိး ပှၤကကျ့အ့ၣ်ထီၣ် အဝဲသ့ၣ် အထဲၣ်ကနၣ်, နီၣ်ဖျး, ကွါ ဒီးထါဂဲာ်တဖၣ် အဂီၢ်လီၤ. ၂၁ ဒီးဒ်သိး ပှၤကကျ့အ့ၣ်ထီၣ် ထဲၣ်ကနၣ်မ့ၢ်ဂ့ၤ, နီၣ်ဖျးမ့ၢ်ဂ့ၤ, နီၣ်ဆဲးလၢ အမဲအိၣ်သၢဘိမ့ၢ်ဂ့ၤ, ကွါမ့ၢ်ဂ့ၤ ဒီးဒ်သိး ကထီထီၣ် နီၣ်ခိၣ်စူအဂီၢ်န့ၣ် ပှၤဘၣ်ဟ့ၣ်ဝဲအပှ့ၤ တဖ့ၤလီၤ.* ၂၂ ဖဲတၢ်ဒုးကဲထီၣ်အခါ အံၣ်စရ့လးအသုးဖိလၢ အအိၣ်ဒီး စီၤစီလူး ဒီးစီၤယိနၤသၣ်န့ၣ်+ အနးမ့ၢ်ဂ့ၤ အဘီမ့ၢ်ဂ့ၤ တပၣ်နီတဂၤဘၣ်. ထဲစီၤစီလူး ဒီးအဖိခွါ စီၤယိနၤသၣ်န့ၣ် အိၣ်ဒီးတၢ်စုကဝဲၤလီၤ.
၂၃ ဒီးပှၤဖလ့ၡသးသုးဖိတဒူၣ် လဲၤထီၣ်လၢ ကျဲလၢ အအိၣ်ဖဲ မံးကမၣ်အတၢ်တြီၤလီၤ.+