ဧ့စြၤ
၄ ယူဒၤ ဒီးဘံၣ်ယၤမံၣ်+ အပှၤဂီၢ်မုၢ် အဒုၣ်အဒါတဖၣ်န့ၣ် နၢ်ဟူဝဲလၢ ပှၤလၢအဟဲက့ၤတဖၣ်+ သူၣ်ထီၣ်ဝဲ အံၣ်စရ့လး အကစၢ် ယဟိဝၤယွၤ အဟံၣ်လီၤ. ၂ ဖဲန့ၣ်အခါ အဝဲသ့ၣ် လဲၤတဲ စီၤစရူဘၤဘ့လး ဒီးဒူၣ်ဖိထၢဖိတဖၣ် အခိၣ်အနၢ်တဖၣ်လၢ “ပအဲၣ်ဒိးတ့ထီၣ် တၢ်ဒီးသုလီၤ. ပဝဲနာ်က့ ပဘူၣ်ထီၣ်ဘါထီၣ် သုကစၢ်ယွၤ+ ဒ်သိးဒီးသုလီၤ. စးထီၣ်လၢ ကီၢ်အၤၡူၢ်အစီၤပၤ အ့ၤစၢ်ဃးဒိၣ်+ လၢအဟဲကိးပှၤဖဲအံၤ+ အစိၤလံၤလံၤန့ၣ် ပလုၢ်ထီၣ်တၢ်လၢ သုကစၢ်ယွၤ အအိၣ်လီၤ.” ၃ ဘၣ်ဆၣ် စီၤစရူဘၤဘ့လး, စီၤယ့ၤၡူ ဒီးအံၣ်စရ့လး အဒူၣ်ဖိထၢဖိ အခိၣ်အနၢ် အဂၤတဖၣ် တဲအဝဲသ့ၣ်လၢ “ပသူၣ်ထီၣ်ဟံၣ်လၢ ပကစၢ်ယွၤအဂီၢ်န့ၣ်+ တလိၣ်သုဟဲပၣ်ဃုာ်ဘၣ်. ဒ်ဖၢၡၢၣ် အစီၤပၤကိရ့ၣ် မၤလိာ်ပှၤအသိး ထဲဒၣ် ပဝဲသ့ၣ်တဖၣ်ကသူၣ်ထီၣ် အံၣ်စရ့လး အကစၢ်ယဟိဝၤယွၤ အဟံၣ်လီၤ.”+
၄ ဒီးပှၤကလုာ်လၢ အိၣ်လၢအဝဲသ့ၣ် အခိၣ်အဃၢၤတဖၣ်န့ၣ် ဆဲးမၤလီၤစၢ် ယူဒၤ အပှၤဂီၢ်မုၢ်တဖၣ်အသး ဒီးမၤတံာ်တာ် အဝဲသ့ၣ် ဒ်သိး အသုတသူၣ်ထီၣ် ဟံၣ်လၢၤတဂ့ၤ အဂီၢ်လီၤ.+ ၅ စးထီၣ်လၢ ဖၢၡၢၣ် အစီၤပၤကိရ့ၣ် အစိၤ တုၤလီၤလၢ ဖၢၡၢၣ် အစီၤပၤ ဒၤရယါဝ့ၣ်+ ပၢတၢ် အဆၢကတီၢ်န့ၣ် ပှၤကလုာ်တဖၣ် ငါဝဲ ပှၤဟ့ၣ်ကူၣ်တၢ်တဖၣ် ဒ်သိး ကထီဒါ ယူဒၤ အပှၤဂီၢ်မုၢ် အတၢ်ရဲၣ်တၢ်ကျဲၤတဖၣ်လီၤ.+ ၆ ဖဲစီၤအဃၤၡဝ့ရိၣ် စးထီၣ်ပၢတၢ်အခါ အဝဲသ့ၣ် ကွဲးဝဲ လံာ်ပရၢတဘ့ၣ် ဒ်သိးကပာ်ဒ့ၣ်ပာ်ကမၣ်ဝဲ ပှၤလၢအအိၣ်လၢယူဒၤ ဒီးဝ့ၢ်ယရူၤၡလ့ၣ်လီၤ. ၇ ဖဲဖၢၡၢၣ် အစီၤပၤ အၢ်တၤၡါၡတၤ* အစိၤန့ၣ် စီၤဘံးၡလၣ်, စီၤမံးသြၤဒး ဒီးစီၤတၤဘ့လး ဒီးပှၤလၢအမၤသကိးတၢ်ဒီးအီၤတဖၣ်န့ၣ် ကွဲးလံာ်ဆူ စီၤပၤအၢ်တၤၡါၡတၤ အအိၣ်လီၤ. ဒီးအဝဲသ့ၣ် ကွဲးကျိာ်ထံက့ၤလံာ်အံၤလၢ အရၣ်မ့းအကျိာ်+ ဒီးကွဲးဝဲလၢအရၣ်မ့း အလံာ်မဲာ်ဖျၢၣ်လီၤ.
၈ * ဒ်သိး ကပာ်ဒ့ၣ်ပာ်ကမၣ် ဝ့ၢ်ယရူၤၡလ့ၣ် အပှၤဂီၢ်မုၢ်အဂီၢ် ပဒိၣ်ဖးဒိၣ်အခိၣ် စီၤရဃူၣ် ဒီးပှၤကွဲးလံာ်ဖိ စီၤၡံးမၡဲန့ၣ် ကွဲးလံာ်ပရၢလၢ စီၤပၤအၢ်တၤၡါၡတၤ အအိၣ် ဒ်လၢ လာ်ပာ်ဖျါဝဲ အသိးလီၤ. ၉ (လံာ်အံၤဟဲလၢ ပဒိၣ်ဖးဒိၣ်အခိၣ် စီၤရဃူၣ် ဒီးပှၤကွဲးလံာ်ဖိ စီၤၡံးမၡဲ ဒီးအဝဲသ့ၣ် အသကိးလၢ အဂၤတဖၣ် လၢအမ့ၢ် စံၣ်ညီၣ်ကွီၢ်တဖၣ်, ပဒိၣ်ပပှၢ်လၢ အဆံးတဖၣ်, နဲၣ်ရွဲၣ်တဖၣ်, ပှၤအ့ရ့းဖိ,+ ပှၤဘၤဘူၤလိၣ်ဖိ, ပှၤဧ့ၤလၣ်ဖိလၢ+ အအိၣ်လၢ ဝ့ၢ်ၡူၡၤ+ ၁၀ ဒီးပှၤကလုာ် အဂၤတဖၣ်လၢ စီၤပၤဖးဒိၣ် အၤစနးပၢ် ဟဲက့ၤဖီၣ် အဝဲသ့ၣ်ဒီး ဒုးအိၣ် အဝဲသ့ၣ်လၢ ၡၤမရံ အဝ့ၢ်တဖၣ်အပူၤ+ ဒီးပှၤလၢ အအိၣ်လၢ ထံကျိ* အဝၢ်ဘးခီ အအိၣ်လီၤ.) ၁၁ ဒီးလံာ်ပရၢ တဘ့ၣ်လၢ အဝဲသ့ၣ် ဆှၢန့ၢ်အီၤအံၤန့ၣ် တဲဝဲလၢ
“ဆူ စီၤပၤအၢ်တၤၡါၡတၤ, လံာ်အံၤဟဲလၢ နခ့နပှၤတဖၣ် လၢအအိၣ်လၢ ထံကျိဝၢ်ဘးခီ အအိၣ်လီၤ. ခဲအံၤန့ၣ် ၁၂ ပကွဲးဒုးသ့ၣ်ညါ စီၤပၤလၢ ပှၤယူဒၤဖိလၢ အအိၣ်လၢနအိၣ်တၢ်လီၢ်န့ၣ် ဟဲထီၣ်လၢ ပအိၣ် ဒီးတုၤလၢ ဝ့ၢ်ယရူၤၡလ့ၣ်လံ. ခဲအံၤအဝဲသ့ၣ် တ့ထီၣ်က့ၤဝဲ ဝ့ၢ်လၢ အပှဲၤဒီး တၢ်အၢတၢ်သီ ဒီးပှၤလၢ အထီဒါတၢ်တဖၣ်လီၤ. ဒီးအဝဲသ့ၣ် တ့ထီၣ်က့ၤ ဝ့ၢ်ဒူၣ်တဖၣ် ဘူးကဝံၤလံ+ ဒီးအဝဲသ့ၣ် ဘှီဘၣ်ထီၣ်က့ၤ တၢ်အခီၣ်ထံးခီၣ်ဘိတဖၣ်လၢ ဝ့ၢ်အဂီၢ်လံ. ၁၃ ပအဲၣ်ဒိးဒုးသ့ၣ်ညါ စီၤပၤလၢ ပှၤတ့ထီၣ် ဝ့ၢ်ဒီးအဒူၣ်တဖၣ် မ့ၢ်ဝံၤန့ၣ် တမ့ၢ်လၢ အဝဲသ့ၣ် ကဟ့ၣ်ဝဲတၢ်ခိတၢ်သွဲ+ နီတမံၤလၢၤဘၣ်. အဃိ စီၤပၤ* ဒိးန့ၢ်ဘၣ်ကျိၣ်စ့ ကစှၤလီၤဝဲလီၤ. ၁၄ မ့ၢ်လၢ ပန့ၢ်ဘၣ်တၢ်အဘူးအလဲလၢ နီပူၤအဃိ ပတအဲၣ်ဒိးလၢ စီၤပၤကဘၣ်ဒိ ဒ်အံၤဘၣ်. အဃိ ပဆှၢလီၤန့ၢ် စီၤပၤလၢ လံာ်ပရၢတဘ့ၣ်အံၤလီၤ. ၁၅ ဃုကွၢ်တၢ်လၢ အအိၣ်လၢ နမိၢ်ပၢ်ဖံဖုတဖၣ် အလံာ်ကွဲးနီၣ် အပူၤတက့ၢ်.+ လၢလံာ်ကွဲးနီၣ်အပူၤန့ၣ် နကထံၣ်ဘၣ်လၢ ပှၤလၢအအိၣ်လၢ ဝ့ၢ်တဖျၢၣ်အံၤအပူၤန့ၣ် မ့ၢ်ပှၤလၢအထီဒါတၢ်, အမၤဘၣ်ဒိစီၤပၤတဖၣ် ဒီးကီၢ်ရ့ၣ်တဖၣ်လီၤ. ဒီးလၢပျၢၤလံၤလံၤန့ၣ် အဝဲသ့ၣ် ဟ့ၣ်သဆၣ်ထီၣ်ပှၤလၢ ကထီဒါတၢ်အဂီၢ်လီၤ. အဃိ ဝ့ၢ်အံၤ ဘၣ်တၢ်မၤဟးဂီၤအီၤလီၤ.+ ၁၆ ပအဲၣ်ဒိးဒုးသ့ၣ်ညါ စီၤပၤလၢ ပှၤတ့ထီၣ် ဝ့ၢ်ဒီးအဒူၣ်တဖၣ် မ့ၢ်ဝံၤန့ၣ် နပၢ တၢ်လီၢ်လၢအအိၣ်လၢ ထံကျိ အဝၢ်ဘးခီ တန့ၢ်လၢၤဘၣ်.”+
၁၇ စီၤပၤဆှၢလီၤတၢ်ကလုၢ်လၢ ပဒိၣ်ဖးဒိၣ်အခိၣ် စီၤရဃူၣ် ဒီးပှၤကွဲးလံာ်ဖိ စီၤၡံးမၡဲ ဒီးအဝဲသ့ၣ် အသကိးလၢ အဂၤတဖၣ် လၢအအိၣ်လၢ ၡၤမရံ ဒီးတၢ်လီၢ်အဂၤလၢ ထံကျိဝၢ်ဘးခီ အအိၣ်လီၤ.
ဒီးအတဲဝဲလၢ “ယဆၢဂ့ၤဆၢဝါသုလီၤ. ၁၈ လံာ်ပရၢ လၢသုဆှၢန့ၢ်ပှၤန့ၣ် ပှၤဖးန့ၢ်ယၤ လီၤတံၢ်လီၤဆဲး ဝံၤလံ. ၁၉ ယဟ့ၣ်လီၤတၢ်ကလုၢ် ဒီးပှၤဃုကွၢ်တၢ် ဝံၤလံ. ပှၤထံၣ်ဘၣ်လၢ လၢညါလံၤလံၤန့ၣ် ပှၤလၢအအိၣ်လၢ ဝ့ၢ်တဖျၢၣ်အံၤအပူၤန့ၣ် ထီဒါက့ၤ စီၤပၤတဖၣ် ဒီးပၢၢ်ဆၢက့ၤတၢ် ဒီးမၤတၢထီၣ်တၢလီၤတၢ်လီၤ.+ ၂၀ ဒီးလၢညါန့ၣ် ဝ့ၢ်ယရူၤၡလ့ၣ်အိၣ်ဒီး အစီၤပၤတဖၣ်လၢ အစိအကမီၤဒိၣ်ဝဲ ဒီးပၢဝဲ တၢ်လီၢ်ခဲလၢာ် လၢအအိၣ်လၢ ထံကျိဝၢ်ဘးခီ ဒီးပှၤဘၣ်ဟ့ၣ်အဝဲသ့ၣ် တၢ်ခိတၢ်သွဲတဖၣ်လီၤ. ၂၁ ဟ့ၣ်လီၤတၢ်ကလုၢ်လၢ ပှၤတဖၣ်န့ၣ် ကပာ်ပတုာ် အတၢ်မၤအံၤတက့ၢ်. ဒီးတချုးလၢ ယဟ့ၣ်လီၤတၢ်ကလုၢ် လၢအသီတဘျီဒံးဘၣ်န့ၣ် အဝဲသ့ၣ် တဘၣ်တ့ထီၣ်က့ၤ ဝ့ၢ်အံၤဘၣ်. ၂၂ ဒ်သိး စီၤပၤသု တဘၣ်ဒိလၢၤတဂ့ၤအဂီၢ် သုကဘၣ်မၤထွဲ ဒ်ယတဲသုအသိး လီၤတံၢ်လီၤဆဲး ဒီးတဘၣ်ထုးယံာ် တၢ်ဆၢကတီၢ်တဂ့ၤ.”+
၂၃ ဖဲပှၤဖး စီၤပၤ အၢ်တၤၡါၡတၤ အလံာ်ပရၢ လၢစီၤရဃူၣ် ဒီးပှၤကွဲးလံာ်ဖိ စီၤၡံးမၡဲ ဒီးအဝဲသ့ၣ် အသကိးလၢ အဂၤတဖၣ် အမဲာ်ညါ ဝံၤအခါ အဝဲသ့ၣ် ကရီလဲၤဝဲလၢ ဝ့ၢ်ယရူၤၡလ့ၣ်လီၤ. ဒီးအဝဲသ့ၣ် မၢဆူၣ် ပှၤယူဒၤဖိတဖၣ် လၢကပတုာ်ကွံာ် အတၢ်မၤလီၤ. ၂၄ အဃိ တၢ်သူၣ်ထီၣ် ကစၢ်ယွၤအဟံၣ် လၢဝ့ၢ်ယရူၤၡလ့ၣ်န့ၣ် ပတုာ်ကွံာ်ဝဲလီၤ. ဒီးအအိၣ်ဝဲဒ်န့ၣ် တုၤလၢ ဖၢၡၢၣ် အစီၤပၤ ဒၤရယါဝ့ၣ် ပၢတၢ် ခံနံၣ်တနံၣ်လီၤ.+