၁ မိၤၡ့

၁ လၢအခီၣ်ထံးန့ၣ်​ ကစၢ်ယွၤတ့လီၤ မူခိၣ်ဒီးဟီၣ်ခိၣ်လီၤ.+

၂ ဒီးဟီၣ်ခိၣ်န့ၣ်​ တၢ်တအိၣ်လၢအပူၤ နီတမံၤဘၣ်​ ဒီးအအိၣ်ကလီဝဲလီၤ. ဒီးတၢ်ခံးသူလုၢ်ဘၢဝဲ ထံယိာ်တဖၣ်+ ဒီးကစၢ်ယွၤအသးစီဆှံ*+ ဟူးဂဲၤဝဲလၢထံအဖံးခိၣ်န့ၣ်လီၤ.+

၃ ကစၢ်ယွၤ တဲဝဲလၢ “မ်တၢ်ကပီၤ အိၣ်ထီၣ်တက့ၢ်.” ဒီးတၢ်ကပီၤ အိၣ်ထီၣ်ဝဲလီၤ.+ ၄ ဝံၤဒီးကစၢ်ယွၤ ထံၣ်ဝဲလၢ တၢ်ကပီၤန့ၣ်​ ဂ့ၤဝဲလီၤ. ဒီးကစၢ်ယွၤ နီၤဖးဝဲ တၢ်ကပီၤ ဒီးတၢ်ခံးလီၤ. ၅ တၢ်ကပီၤန့ၣ်​ ကစၢ်ယွၤ ကိးဝဲလၢမုၢ်နံၤ ဒီးတၢ်ခံးန့ၣ်​ ကိးဝဲလၢမုၢ်နၤလီၤ.+ ဒီးဟါခီအိၣ်ဝဲ ဒီးဂီၤခီအိၣ်ဝဲလီၤ. အဝဲအံၤမ့ၢ် မုၢ်နံၤအဆိကတၢၢ်တနံၤလီၤ.

၆ ကစၢ်ယွၤ တဲဝဲလၢ “မ်တၢ်လီၤဟိဖးလဲၢ်တတီၤ+ ဟဲအိၣ်ထီၣ်လၢ ထံတဖၣ်​ အဘၢၣ်စၢၤ ဒီးမ်တၢ်နီၤဖး ဟဲအိၣ်ထီၣ်လၢ ထံခံတီၤ အဘၢၣ်စၢၤတက့ၢ်.”+ ၇ ဒီးကစၢ်ယွၤဒုးကဲထီၣ်ဝဲ တၢ်လီၤဟိဖးလဲၢ် တတီၤလၢ အနီၤဖးဝဲထံလၢ တၢ်ဖီလာ် ဒီးထံလၢတၢ်ဖီခိၣ်န့ၣ်လီၤ.+ ဒီးတၢ်မၤအသး ဒ်န့ၣ်လီၤ. ၈ ကစၢ်ယွၤကိးဝဲ တၢ်လီၤဟိဖးလဲၢ်တတီၤအံၤလၢ မူခိၣ်လီၤ.* ဒီးဟါခီအိၣ်ဝဲ ဒီးဂီၤခီအိၣ်ဝဲလီၤ. အဝဲအံၤမ့ၢ် မုၢ်ခံနံၤတနံၤလီၤ.

၉ ကစၢ်ယွၤ တဲဝဲလၢ “မ်ထံလၢ မူခိၣ်အဖီလာ်တဖၣ်​ ပာ်ဖှိၣ်ထီၣ်အသး လၢတၢ်လီၢ်တပူၤဃီ ဒီးမ်ခိသူခိၣ်​ အိၣ်ဖျါထီၣ်တက့ၢ်.”+ ဒီးတၢ်မၤအသး ဒ်န့ၣ်လီၤ. ၁၀ ခိသူခိၣ်န့ၣ်​ ကစၢ်ယွၤ ကိးဝဲလၢဟီၣ်ခိၣ်+ မ့မ့ၢ် ထံပာ်ဖှိၣ်သးအလီၢ်န့ၣ်​ အကိးဝဲလၢ ပီၣ်လဲၣ်လီၤ.+ ဒီးကစၢ်ယွၤ ထံၣ်ဝဲလၢအဂ့ၤလီၤ.+ ၁၁ ဒီးကစၢ်ယွၤ တဲဝဲလၢ “မ်ဟီၣ်ခိၣ်​ ဒုးမဲထီၣ်​ နီၣ်ဧိၤမံၤဧိၤတဖၣ်, တၢ်မုၢ်တၢ်ဘိတဖၣ်လၢ အအိၣ်ဒီးအချံ ဒီးသ့ၣ်လၢ အသၣ်ထီၣ်​ တၤသၣ်လၢ အအိၣ်ဒီးအချံတဖၣ်​ ဒ်အကလုာ် အိၣ်ဝဲအသိးတက့ၢ်.” ဒီးတၢ်မၤအသး ဒ်န့ၣ်လီၤ. ၁၂ ဒီးဟီၣ်ခိၣ်န့ၣ်​ ဒုးမဲထီၣ်ဝဲ နီၣ်ဧိၤမံၤဧိၤတဖၣ်, ဒီးတၢ်မုၢ်တၢ်ဘိတဖၣ်လၢ အအိၣ်ဒီးအချံ+ ဒီးသ့ၣ်လၢ အသၣ်ထီၣ်တၤသၣ်လၢ အအိၣ်ဒီးအချံတဖၣ်​ ဒ်အကလုာ် အိၣ်ဝဲအသိးလီၤ. ဒီးကစၢ်ယွၤ ထံၣ်ဝဲလၢ အဂ့ၤလီၤ. ၁၃ ဒီးဟါခီအိၣ်ဝဲ ဒီးဂီၤခီအိၣ်ဝဲလီၤ. အဝဲအံၤမ့ၢ် မုၢ်သၢနံၤတနံၤလီၤ.

၁၄ ဒီးကစၢ်ယွၤ တဲဝဲလၢ “ဒ်သိးကနီၤဖး မုၢ်ဆါခီ ဒီးမုၢ်နၤခီအဂီၢ်+ မ်တၢ်ကပီၤအဖျၢၣ်တဖၣ်+ ဟဲဖျါထီၣ်လၢ တၢ်လီၤဟိဖးလဲၢ်တတီၤ လၢမူခိၣ်တက့ၢ်. ဒီးတၢ်သ့ၣ်တဖၣ်အံၤ ကကဲထီၣ်​ တၢ်ပနီၣ်တဖၣ်လၢ တၢ်အခ့အခါတဖၣ်, မုၢ်နံၤမုၢ်သီတဖၣ်​ ဒီးနံၣ်တဖၣ်အဂီၢ်လီၤ.+ ၁၅ အဝဲသ့ၣ်​ ကကဲထီၣ်​ တၢ်ကပီၤတဖၣ်လၢ တၢ်လီၤဟိဖးလဲၢ်တတီၤ လၢမူခိၣ်​ ဒီးကကပီၤလီၤဝဲဆူ ဟီၣ်ခိၣ်ချၢလီၤ.” ဒီးတၢ်မၤအသး ဒ်န့ၣ်လီၤ. ၁၆ ဒီးကစၢ်ယွၤ တ့လီၤဝဲ တၢ်ကပီၤဖးဒိၣ်ခံဖျၢၣ်လီၤ. တၢ်ကပီၤဖးဒိၣ်​ လၢအဒိၣ်တဖျၢၣ်န့ၣ်​ လၢမုၢ်ဆါခီအဂီၢ်+ ဒီးတၢ်ကပီၤဖးဒိၣ်လၢ အဆံးတဖျၢၣ်န့ၣ်​ လၢမုၢ်နၤခီအဂီၢ်လီၤ. ဒီးအတ့လီၤစ့ၢ်ကီး ဆၣ်တဖၣ်လီၤ.+ ၁၇ ဒီးကစၢ်ယွၤ ပာ်လီၤဝဲ တၢ်သ့ၣ်တဖၣ်အံၤလၢ တၢ်လီၤဟိဖးလဲၢ်တတီၤ လၢမူခိၣ်​ ဒ်သိးအကကပီၤလီၤလၢ ဟီၣ်ခိၣ်ချၢအဂီၢ်, ၁၈ ဒီးဒ်သိး အကကပီၤထီၣ်လၢ မုၢ်ဆါခီ ဒီးမုၢ်နၤခီအဂီၢ် ဒီးဒ်သိးကနီၤဖး တၢ်ကပီၤဒီးတၢ်ခံးအဂီၢ်လီၤ.+ ဒီးကစၢ်ယွၤ ထံၣ်ဝဲလၢ အဂ့ၤလီၤ. ၁၉ ဒီးဟါခီအိၣ်ဝဲ ဒီးဂီၤခီအိၣ်ဝဲလီၤ. အဝဲအံၤမ့ၢ် မုၢ်လွံၢ်နံၤတနံၤလီၤ.

၂၀ ဒီးကစၢ်ယွၤ တဲဝဲလၢ “မ်တၢ်သးသမူတဖၣ်* အိၣ်ထီၣ်လၢထံကျါ ဒီးမ်တၢ်သးသမူလၢ အယူၤတဖၣ်န့ၣ်​ ယူၤဝဲလၢ မူကပိာ်လိၤ* လၢဟီၣ်ခိၣ်အဖီခိၣ်တက့ၢ်.”+ ၂၁ ဒီးကစၢ်ယွၤ တ့လီၤဝဲ တၢ်သးသမူဖးဒိၣ်တဖၣ်လၢ ပီၣ်လဲၣ်အပူၤ ဒီးတၢ်သးသမူခဲလၢာ်လၢ အဟူးအဂဲၤလၢ အလဲၤတၢ်လၢ ထံကျါဒီဖုဒီဂီၢ် ဒ်အကလုာ် အိၣ်ဝဲအသိးလီၤ. ဒီးတ့လီၤဝဲ တၢ်သးသမူ ကိးကလုာ်ဒဲးလၢ အအိၣ်ဒီးအဒံး ဒီးယူၤဝဲ ဒ်အကလုာ် အိၣ်ဝဲအသိးန့ၣ်လီၤ. ဒီးကစၢ်ယွၤ ထံၣ်ဝဲလၢ အဂ့ၤလီၤ. ၂၂ ဒီးကစၢ်ယွၤဆိၣ်ဂ့ၤ အဝဲသ့ၣ်​ ဒီးတဲဝဲလၢ “သၣ်ထီၣ်​ ဒီးအါထီၣ်ဂီၢ်ထီၣ်​ ဒီးမၤပှဲၤထီၣ်​ ပီၣ်လဲၣ်တက့ၢ်.+ ဒီးမ်တၢ်သးသမူလၢ အယူၤတဖၣ်​ အါထီၣ်လၢ ဟီၣ်ခိၣ်ချၢတက့ၢ်.” ၂၃ ဒီးဟါခီအိၣ်ဝဲ ဒီးဂီၤခီအိၣ်ဝဲလီၤ. အဝဲအံၤမ့ၢ် မုၢ်ယဲၢ်နံၤတနံၤလီၤ.

၂၄ ဒီးကစၢ်ယွၤ တဲဝဲလၢ “မ်ဟီၣ်ခိၣ်ဒုးအိၣ်ထီၣ်​ တၢ်သးသမူ လၢအမ့ၢ် ဆၣ်ဖိကီၢ်ဖိအဒၢ, ဆၣ်ဖိကီၢ်ဖိလၢ အဟူးအဂဲၤ* ဒီးဆၣ်ဖိကီၢ်ဖိအမံၤ လၢဟီၣ်ခိၣ်ချၢ ဒ်အကလုာ် အိၣ်ဝဲအသိးတက့ၢ်.”+ ဒီးတၢ်မၤအသး ဒ်န့ၣ်လီၤ. ၂၅ ကစၢ်ယွၤ တ့လီၤဝဲ ဆၣ်ဖိကီၢ်ဖိအမံၤ လၢဟီၣ်ခိၣ်ချၢ ဒ်အကလုာ်အိၣ်ဝဲအသိး ဒီးဆၣ်ဖိကီၢ်ဖိအဒၢ ဒ်အကလုာ်အိၣ်ဝဲအသိး ဒီးကယဲၢ်ဆၣ်ဖိကီၢ်ဖိလၢ အဟူးအဂဲၤ* လၢဟီၣ်ခိၣ်ချၢ ဒ်အကလုာ်အိၣ်ဝဲအသိးလီၤ. ဒီးကစၢ်ယွၤ ထံၣ်ဝဲလၢ အဂ့ၤလီၤ.

၂၆ ဒီးကစၢ်ယွၤ တဲဝဲလၢ “မ်ပတ့လီၤ+ ပှၤဟီၣ်ခိၣ်ဖိ ဒ်ပက့ၢ်ပဂီၤအသိး,+ လီၤဂာ်ဒ် ပဝဲအသိးတက့ၢ်.+ ဒီးမ်အဝဲသ့ၣ်​ ကွၢ်ထွဲ ဟီၣ်ခိၣ်ဒီဘ့ၣ်ညါ ဒီးပၢညၣ်လၢအအိၣ်လၢ ပီၣ်လဲၣ်ပူၤ, တၢ်သးသမူလၢ အယူၤဝဲလၢ မူခိၣ်, ဆၣ်ဖိကီၢ်ဖိအဒၢ ဒီးကယဲၢ်ဆၣ်ဖိကီၢ်ဖိခဲလၢာ် လၢအဟူးဂဲၤလၢ ဟီၣ်ခိၣ်ချၢန့ၣ်တက့ၢ်.”+ ၂၇ ဒီးကစၢ်ယွၤတ့လီၤ ပှၤဟီၣ်ခိၣ်ဖိ ဒ်အက့ၢ်အဂီၤအသိးလီၤ. ကစၢ်ယွၤတ့လီၤဝဲ ပိာ်ခွါဒီးပိာ်မုၣ်​ ဒ်အက့ၢ်အဂီၤအသိးလီၤ.+ ၂၈ တကးဒံးဘၣ်​ ကစၢ်ယွၤဆိၣ်ဂ့ၤ အဝဲသ့ၣ်​ ဒီးတဲအဝဲသ့ၣ်လၢ “မ်သုသၣ်ထီၣ်​ ဒီးအါထီၣ်ဂီၢ်ထီၣ်​ ဒီးမၤပှဲၤထီၣ်ဟီၣ်ခိၣ်+ ဒီးမၤနၢၤအီၤ,+ ဒီးပၢ+ ညၣ်တဖၣ်လၢ ပီၣ်လဲၣ်ပူၤ, တၢ်သးသမူလၢ အယူၤဝဲလၢမူခိၣ်, ဒီးကယဲၢ်တၢ်သးမူ လၢအဟူးအဂဲၤလၢ ဟီၣ်ခိၣ်ချၢန့ၣ်တက့ၢ်.”

၂၉ ဒီးကစၢ်ယွၤ တဲဝဲလၢ “လၢဟီၣ်ခိၣ်ဒီဘ့ၣ်န့ၣ်​ ယဟ့ၣ်လီၤသုလၢ တၢ်မုၢ်တၢ်ဘိခဲလၢာ်လၢ အအိၣ်ဒီးအချံ ဒီးသ့ၣ်ခဲလၢာ်လၢ အသၣ်ထီၣ်တၤသၣ်လၢ အအိၣ်ဒီး အချံတဖၣ်န့ၣ်လီၤ. မ်အကဲထီၣ်​ တၢ်အီၣ်လၢ သုဂီၢ်တက့ၢ်.+ ၃၀ ဒီးကယဲၢ်ဆၣ်ဖိကီၢ်ဖိ အမံၤခဲလၢာ်လၢ ဟီၣ်ခိၣ်ချၢ ဒီးကယဲၢ်တၢ်သးသမူလၢ အယူၤဝဲလၢမူခိၣ်​ ဒီးကယဲၢ်တၢ်သးသမူ လၢအဟူးအဂဲၤလၢ ဟီၣ်ခိၣ်ချၢ လၢအမူဝဲန့ၣ်​ ယဟ့ၣ်လီၤအဝဲသ့ၣ်လၢ တၢ်မုၢ်တၢ်ဘိ အလါဟ့တဖၣ်​ လၢကအီၣ်ဝဲအဂီၢ်လီၤ.”+ ဒီးတၢ်ကဲထီၣ်အသး ဒ်န့ၣ်လီၤ.

၃၁ ဝံၤဒီးကစၢ်ယွၤ ထံၣ်ဝဲလၢ တၢ်လၢအတ့လီၤဝဲ ကိးမံၤဒဲးန့ၣ်​ ဂ့ၤဝဲဒိၣ်မးလီၤ.+ ဒီးဟါခီအိၣ်ဝဲ ဒီးဂီၤခီအိၣ်ဝဲလီၤ. အဝဲအံၤမ့ၢ် မုၢ်ဃုနံၤတနံၤန့ၣ်လီၤ.

၂ တၢ်တ့လီၤ မူခိၣ်ဒီးဟီၣ်ခိၣ်​ ဒီးတၢ်အိၣ်လၢအပူၤတဖၣ်​ ဝံၤဝဲခဲလၢာ်လီၤ.+ ၂ တချုးလၢ မုၢ်နွံနံၤတနံၤ တုၤဒံးဘၣ်န့ၣ်​ ကစၢ်ယွၤ မၤဝံၤအတၢ်မၤ ခဲလၢာ်လီၤ. ဒီးဖဲအတၢ်မၤ ဝံၤဝဲခဲလၢာ်အခါ အိၣ်ဘှံးဝဲလၢ မုၢ်နွံနံၤတနံၤလီၤ.+ ၃ ဒီးကစၢ်ယွၤဆိၣ်ဂ့ၤ မုၢ်နွံနံၤတနံၤန့ၣ်​ ဒီးပာ်စီဆှံအီၤ မ့ၢ်လၢ ဖဲမုၢ်နံၤအဝဲန့ၣ်န့ၣ်​ ကစၢ်ယွၤအိၣ်ဘှံးဝဲလၢ အတၢ်ဘၣ်တ့တၢ်မၤခဲလၢာ် လၢအတ့လီၤတၢ် ဒ်အတၢ်တိာ်ပာ်အိၣ်ဝဲအသိးလီၤ.

၄ ဖဲမုၢ်နံၤလၢ ယဟိဝၤယွၤ* တ့လီၤဝဲ ဟီၣ်ခိၣ်ဒီးမူခိၣ်န့ၣ်+ မူခိၣ်ဒီးဟီၣ်ခိၣ်​ ဘၣ်တၢ်တ့လီၤအီၤ ဒ်အံၤလီၤ.

၅ မ့ၢ်လၢ ယဟိဝၤယွၤ တဒုးစူၤလီၤ မူခိၣ်ထံလၢ ဟီၣ်ခိၣ်ဒံးဘၣ်​ ဒီးပှၤလၢအသူၣ်လီၤဖျးလီၤတၢ် တအိၣ်ဒံးဘၣ်အဃိ တပှီာ်ဒီးတၢ်မုၢ်တၢ်ဘိတဖၣ်​ တမဲထီၣ်လၢ တၢ်ပျီပူၤဒံးဘၣ်. ၆ ဘၣ်ဆၣ်​ ထံသဝံတဖၣ်​ ဟဲထီၣ်လၢဟီၣ်ခိၣ်​ ဒီးမၤဘၣ်စီၣ်ဝဲ ဟီၣ်ခိၣ်အမဲာ်ဖံးခိၣ်​ ဒီတဘ့ၣ်ညါလီၤ.

၇ ဒီးယဟိဝၤယွၤ တ့လီၤပိာ်ခွါလၢ ဟီၣ်ခိၣ်ကမူၣ်+ ဒီးအူသဖှိနုာ် တၢ်မူအသါ လၢအနါဒ့ပူၤ+ ဒီးပိာ်ခွါန့ၣ်​ ကဲထီၣ်ဝဲ ပှၤလၢအမူတဂၤလီၤ.*+ ၈ တကးဒံးဘၣ်​ ယဟိဝၤယွၤ သူၣ်လီၤဖျးလီၤဝဲ တၤသၣ်လီၢ်တခါ လၢဧ့ၤဒ့ၣ်+ အမုၢ်ထီၣ်တခီအပူၤ ဒီးအဝဲဒုးအိၣ်ဝဲ ပိာ်ခွါလၢ အတ့လီၤဝဲတဂၤ ဖဲန့ၣ်လီၤ.+ ၉ ဒီးယဟိဝၤယွၤ ဒုးမဲထီၣ်​ ကယဲၢ်သ့ၣ်လၢ အဃံအလၤဒီး အိၣ်ဒီးအသၣ်လၢ အလီၤအီၣ်လီၤအီတဖၣ်လီၤ. ဒီးအဝဲဒုးမဲထီၣ်စ့ၢ်ကီး သ့ၣ်တၢ်မူ+ လၢတၤသၣ်လီၢ် အခၢၣ်သး ဒီးသ့ၣ်သ့ၣ်ညါ တၢ်ဂ့ၤဒီးတၢ်အၢလီၤ.+

၁၀ ထံကျိအိၣ်ဝဲတဘိလၢ ဧ့ၤဒ့ၣ်အပူၤ လၢအမၤဘၣ်စီၣ်ဝဲ တၤသၣ်အလီၢ်န့ၣ်​ ယွၤလီၤဝဲ ဒီးဖးဒ့ထီၣ်အသး ဒီးကဲထီၣ်ဝဲ ထံကျိလွံၢ်ဘိလီၤ. ၁၁ ဒီးထံကျိ အဆိကတၢၢ်တဘိန့ၣ်​ အမံၤလၢ ပံၤၡိၣ်​ ဒီးယွၤလီၤဝးတရံးဝဲ ကီၢ်ဃဝံၤလၤ ဒီတဘ့ၣ်ညါ ဒီးတၢ်လီၢ်ဖဲန့ၣ်န့ၣ်​ ထူအိၣ်ဝဲလီၤ. ၁၂ ထူလၢအအိၣ်လၢ တၢ်လီၢ်အဝဲန့ၣ်​ ဂ့ၤမးလီၤ. တကးဒံးဘၣ်​ သ့ၣ်ဒဲလံယၢၤအထုး ဒီးတၢ်မျၢ်မဟူယၤ အိၣ်ဝဲဖဲန့ၣ်စ့ၢ်ကီးလီၤ. ၁၃ ဒီးထံကျိ ခံဘိတဘိန့ၣ်​ အမံၤလၢ ကံဃိၣ်​ ဒီးယွၤလီၤ ဝးတရံးဝဲ ကီၢ်ကူၤၡး* ဒီတဘ့ၣ်ညါလီၤ. ၁၄ ဒီးထံကျိ သၢဘိတဘိန့ၣ်​ အမံၤလၢ ဃံးဒက့လး*+ ဒီးယွၤလီၤဝဲလၢ ကီၢ်အၤၡူၢ် အမုၢ်ထီၣ်တခီလီၤ.+ ဒီးထံကျိ လွံၢ်ဘိတဘိန့ၣ်​ အမံၤလၢ ဖရၤသးလီၤ.+

၁၅ ယဟိဝၤယွၤ ပာ်လီၤဝဲ ပိာ်ခွါတဂၤအံၤလၢ ဧ့ၤဒ့ၣ်တၤသၣ်လီၢ်အပူၤ ဒ်သိးပိာ်ခွါတဂၤအံၤ ကသူၣ်အီၣ်ဖျးအီၣ်တၢ် ဒီးကအံးထွဲကွၢ်ထွဲ တၢ်လီၢ်အံၤအဂီၢ်လီၤ.+ ၁၆ ဒီးယဟိဝၤယွၤ မၤလိာ်အီၤလၢ “သ့ၣ်ခဲလၢာ်လၢ တၤသၣ်လီၢ်အပူၤန့ၣ်​ နအီၣ်အသၣ်​ သ့ဝဲလီၤ.+ ၁၇ မ့မ့ၢ် သ့ၣ်သ့ၣ်ညါ တၢ်ဂ့ၤဒီးတၢ်အၢ အသၣ်န့ၣ်​ နတဘၣ်​ အီၣ်အီၤတဂ့ၤ, မုၢ်တနံၤဖဲ နအီၣ်အီၤန့ၣ်​ နကသံ သပှၢ်ကတၢၢ်လီၤ.”+

၁၈ ဒီးယဟိဝၤယွၤ တဲဝဲလၢ “ပိာ်ခွါကဆဲးအိၣ်​ ထဲတဂၤန့ၣ်​ တဂ့ၤဘၣ်. ယကတ့န့ၢ်အီၤ ပှၤမၤစၢၤတၢ်တဂၤ လၢအကြၢးဒီးအီၤလီၤ.”+ ၁၉ ဆၣ်ဖိကီၢ်ဖိအမံၤ ဒီးတၢ်သးသမူ လၢအယူၤ လၢမူခိၣ်​ လၢယဟိဝၤယွၤ တ့လီၤဝဲလၢ ဟီၣ်ခိၣ်ကမူၣ်န့ၣ်​ ကစၢ်ယွၤ ဟဲကိးဝဲဆူ ပိာ်ခွါအံၤအအိၣ်​ ဒ်သိးပိာ်ခွါအံၤ ကကိးန့ၢ် အဝဲသ့ၣ်​ အမံၤအဂီၢ်လီၤ. ဒီးတၢ်လၢ ပိာ်ခွါအံၤ ကိးန့ၢ်ဝဲ တၢ်သးသမူ တခါစုာ်စုာ်အမံၤန့ၣ်​ အမံၤအိၣ်ဝဲ ဒ်န့ၣ်လီၤ.+ ၂၀ အဃိ ပိာ်ခွါန့ၣ်​ ကိးန့ၢ်ဝဲ ကယဲၢ်ဆၣ်ဖိကီၢ်ဖိအဒၢ ဒီးတၢ်သးသမူလၢ အယူၤဝဲလၢမူခိၣ်​ ဒီးဆၣ်ဖိကီၢ်ဖိအမံၤလၢ အအိၣ်လၢ တၢ်ပျီပူၤခဲလၢာ် အမံၤလီၤ. မ့မ့ၢ် ပိာ်ခွါန့ၣ်​ ပှၤမၤစၢၤတၢ်လၢ အကြၢးဒီးအီၤ တအိၣ်နီတဂၤဘၣ်. ၂၁ အဃိ ယဟိဝၤယွၤ ဒုးမံအီၤလၢ တၢ်မံဖးယိာ် ဒီးဖဲအမံအခါ ကစၢ်ယွၤ ဟံးန့ၢ်ဝဲ အဂုာ်ဃံတဘိ ဝံၤဒီးအဝဲ မၤဘၢက့ၤအလီၢ် လၢအညၣ်လီၤ. ၂၂ ဒီးဂုာ်ဃံတဘိလၢ ယဟိဝၤယွၤ ဟံးန့ၢ်ဝဲလၢ ပိာ်ခွါအအိၣ်န့ၣ်​ အဝဲတ့လီၤက့ၤဝဲလၢ ပိာ်မုၣ်တဂၤ ဒီးဟဲကိးအီၤဆူ ပိာ်ခွါအအိၣ်လီၤ.+

၂၃ ဒီးပိာ်ခွါန့ၣ်​ တဲဝဲလၢ

၂၄ လၢတၢ်ဂ့ၢ်အံၤအဃိ ပိာ်ခွါကပာ်တ့ၢ် အမိၢ်အပၢ် ဒီးကလဲၤအိၣ်ဒီးအမါ* ဒီးအဝဲသ့ၣ်​ ကကဲထီၣ်​ တၢ်တမံၤဃီလီၤ.+ ၂၅ ပှၤနီၢ်ဒီမါဝၤ ခံဂၤအံၤ အိၣ်ဘ့ၣ်ဆ့+ ဘၣ်ဆၣ်​ အဝဲသ့ၣ်​ တမဲာ်ဆှးဘၣ်.

၃ ဒီးတၢ်လၢဂုၢ်န့ၣ်+ အကူၣ်တၢ်သ့* အါန့ၢ်ဒံး ဆၣ်ဖိကီၢ်ဖိအမံၤ လၢယဟိဝၤယွၤ တ့လီၤဝဲခဲလၢာ် အကျါလီၤ. အဃိ အတဲဘၣ်​ ပိာ်မုၣ်လၢ “ကစၢ်ယွၤ တဲဝဲလၢ သုတဘၣ်အီၣ်​ သ့ၣ်ခဲလၢာ်လၢ အအိၣ်လၢ တၤသၣ်လီၢ်အပူၤ အသၣ်ဘၣ်န့ၣ်​ မ့ၢ်အနီၢ်ကီၢ်ဧါ.”+ ၂ ဒီးပိာ်မုၣ်န့ၣ်​ တဲဆၢဂုၢ်လၢ “သ့ၣ်အသၣ်လၢ တၤသၣ်အလီၢ်ပူၤန့ၣ်​ ပအီၣ်အီၤသ့လီၤ.+ ၃ မ့မ့ၢ် သ့ၣ်အိၣ်လၢ တၤသၣ်လီၢ် အခၢၣ်သးတထူၣ်အသၣ်န့ၣ်+ ကစၢ်ယွၤ တဲဝဲလၢ ‘သုတဘၣ်အီၣ်အီၤဘၣ်​ ဒီးသုတဘၣ်ထိးအီၤဘၣ်. သုမ့ၢ်မၤဒ်န့ၣ်န့ၣ်​ သုကသံလီၤ.’” ၄ ဒီးဂုၢ်တဲဘၣ်​ ပိာ်မုၣ်လၢ “လ့ၤတက့ၤ သုတသံဘၣ်.+ ၅ နီၢ်ကီၢ်န့ၣ်​ ကစၢ်ယွၤ သ့ၣ်ညါဝဲလၢ မုၢ်တနံၤလၢ သုအီၣ်အီၤန့ၣ်​ သုမဲာ်ကအိးထီၣ်အသး ဒီးသုကလီၤဂာ်ဒီး ကစၢ်ယွၤ ဒီးသ့ၣ်ညါ တၢ်ဂ့ၤဒီးတၢ်အၢလီၤ.”+

၆ ဒီးပိာ်မုၣ်န့ၣ်​ ထံၣ်ဝဲလၢ သ့ၣ်တထူၣ်န့ၣ်​ အသၣ်လီၤအီၣ်လီၤအီ, လီၤထုးန့ၢ်သူၣ်ထုးန့ၢ်သး ဒီးဖျါဂ့ၤဝဲလီၤ. အဃိ အဝဲဟံးန့ၢ်အသၣ်​ ဒီးအီၣ်ဝဲလီၤ.+ လၢခံန့ၣ်​ ဖဲအဝၤအိၣ်ဒီးအီၤအခါ အဝဲဟ့ၣ်လီၤအဝၤတနီၤ ဒီးအဝၤအီၣ်ဝဲလီၤ.+ ၇ ဒီးအဝဲသ့ၣ်​ ခံဂၤလၢာ် အမဲာ်အိးထီၣ်အသး ဒီးသ့ၣ်ညါလီၤအသး လၢအအိၣ်ဘ့ၣ်ဆ့လီၤ. အဃိ အဝဲသ့ၣ်​ ဆးထီၣ်ဝဲ ချၢၣ်ဒၢအလၣ်​ ဒီးမၤဘၢအသးလီၤ.*+

၈ လၢခံ အဆၢကတီၢ်ဖဲ ကလံၤဟဲအူကဖီကဖီ* အခါ ယဟိဝၤယွၤ ဟးဝဲလၢ တၤသၣ်အလီၢ်ပူၤ ဒီးအဝဲသ့ၣ်​ နၢ်ဟူဘၣ်​ အကလုၢ်လီၤ. ဒီးပိာ်ခွါဒီးအမါန့ၣ်​ အိၣ်ခူသူၣ်ဝဲ ယဟိဝၤယွၤ လၢသ့ၣ်ထူၣ်တဖၣ်အကျါ လၢတၤသၣ်အလီၢ်ပူၤန့ၣ်လီၤ. ၉ ယဟိဝၤယွၤ ကိးထီၣ်ဝဲ ပိာ်ခွါတဂၤအံၤ တဘျီဝံၤတဘျီ ဒီးတဲအီၤလၢ “နအိၣ်ဖဲလဲၣ်.” ၁၀ လၢခံပိာ်ခွါအံၤ တဲဝဲလၢ “ယနၢ်ဟူနကလုၢ်သီၣ်လၢ တၤသၣ်လီၢ်အပူၤ ဘၣ်ဆၣ်မ့ၢ်လၢ ယအိၣ်ဘ့ၣ်ဆ့အဃိ ယပျံၤတၢ် ဒီးယအိၣ်ခူသူၣ်လီၤ.” ၁၁ ကစၢ်ယွၤ တဲဝဲလၢ “မ့ၢ်မတဂၤ တဲနၤလၢ နအိၣ်ဘ့ၣ်ဆ့လဲၣ်.+ မ့ၢ်နအီၣ်​ သ့ၣ်သၣ်လၢ ယမၤလိာ်နၤလၢ အီၣ်အီၤတဂ့ၤန့ၣ်ဧါ.”+ ၁၂ ပိာ်ခွါအံၤ တဲဆၢဝဲလၢ “ပိာ်မုၣ်လၢ နဟ့ၣ်ယၤန့ၣ်​ ဟ့ၣ်အီၣ်ယၤ သ့ၣ်အဝဲန့ၣ်အသၣ်​ အဃိယအီၣ်အီၤလီၤ.” ၁၃ ဒီးယဟိဝၤယွၤ တဲဘၣ်ပိာ်မုၣ်လၢ “ဘၣ်မနုၤအဃိ နမၤဒ်န့ၣ်လဲၣ်.” ဒီးပိာ်မုၣ်န့ၣ်​ စံးဆၢက့ၤဝဲလၢ “မ့ၢ်လၢ ဂုၢ်လီန့ၢ်ယၤအဃိ ယအီၣ်အီၤလီၤ.”+

၁၄ ဒီးယဟိဝၤယွၤ တဲဘၣ်ဂုၢ်လၢ+ “မ့ၢ်လၢ နမၤဒ်အံၤအဃိ လၢဆၣ်ဖိကီၢ်ဖိ အဒၢခဲလၢာ် ဒီးလၢဆၣ်ဖိကီၢ်ဖိ အမံၤလၢ အအိၣ်လၢ တၢ်ပျီပူၤခဲလၢာ်အကျါန့ၣ်​ နဘၣ်တၢ်ဆိၣ်အၢလီၤ. နကဘျိၣ်လၢ နဟၢဖၢ ဒီးနကဘၣ်အီၣ်​ ဟီၣ်ခိၣ်ကမူၣ်​ တစိၤနသးလီၤ. ၁၅ ဒီးယကဒုးအိၣ်ထီၣ်​ တၢ်ထီဒုၣ်ထီဒါ+ လၢနၤ+ ဒီးပိာ်မုၣ်+ အဘၢၣ်စၢၤ ဒီးနချံနသၣ်+ ဒီးပိာ်မုၣ်အချံအသၣ်+ အဘၢၣ်စၢၤလီၤ. အဝဲ* ကမၤသဘှံးနခိၣ်+ ဒီးနကမၤဘၣ်ဒိ* အခီၣ်နၢၣ်ခံလီၤ.”+

၁၆ ကစၢ်ယွၤ တဲဘၣ်ပိာ်မုၣ်လၢ “ဖဲနဒၢအဆၢကတီၢ် နကတူၢ်ဘၣ်အဆါ နးထီၣ်ဒိၣ်မး* ဒီးဖဲနအိၣ်ဖျဲၣ်ထီၣ်​ နဖိအခါ ကဆါဝဲလီၤ. ဒီးနကအဲၣ်ဒိး အိၣ်ဒီးနဝၤ ဒီးအဝဲကဒိၣ်စိလၢ နဖီခိၣ်လီၤ.”

၁၇ ဒီးကစၢ်ယွၤတဲဘၣ်​ စီၤအၤဒၣ်လၢ* “မ့ၢ်လၢနဒိကနၣ်​ နမါအကလုၢ် ဒီးအီၣ်သ့ၣ်သၣ်လၢ ယမၤလိာ်နၤလၢ+ ‘နတဘၣ်အီၣ်အီၤတဂ့ၤ’ အဃိ ဟီၣ်ခိၣ်* ဘၣ်တၢ်ဆိၣ်အၢ လၢနဃိလီၤ.+ ဒီးနကဘၣ်​ သူၣ်အီၣ်ဖျးအီၣ်တၢ် ကီကီခဲခဲ တစိၤနသးလီၤ.+ ၁၈ ဟီၣ်ခိၣ်ကဒုးမဲထီၣ်န့ၢ်နၤ တၤဆှုၣ်တၤမဲ ဒီးနီၣ်ဧိၤမံၤဧိၤတဖၣ်​ ဒီးနကဘၣ်အီၣ်​ တၢ်မုၢ်တၢ်ဘိ လၢအအိၣ်လၢ တၢ်ပျီပူၤလီၤ. ၁၉ လၢနကအီၣ်ဘၣ်အီဘၣ်အဂီၢ် နကဘၣ်မၤတၢ်ဆူၣ်ဆူၣ်​ တုၤလၢနကပၢၤလီၤ တုၤလီၤလၢ နက့ၤကဒါက့ၤ လၢဟီၣ်ခိၣ်, မ့ၢ်လၢတၢ်ဟံးန့ၢ်နၤ လၢဟီၣ်ခိၣ်အဃိလီၤ.+ နမ့ၢ်ဟီၣ်ခိၣ်ကမူၣ်​ ဒီးနကကဲထီၣ်ကဒါက့ၤ ဟီၣ်ခိၣ်ကမူၣ်လီၤ.”+

၂၀ ဖဲန့ၣ်ဝံၤအလီၢ်ခံ စီၤအၤဒၣ်​ ကိးန့ၢ်ဝဲအမါအမံၤလၢ နီၢ်အံၣ်အု မ့ၢ်လၢ အဝဲကကဲထီၣ်​ ပှၤဟီၣ်ခိၣ်ဖိခဲလၢာ် အမိၢ်အဃိလီၤ.+ ၂၁ ဒီးယဟိဝၤယွၤ တ့ထီၣ်ဝဲ ဆ့ကၤဖးထီတဖၣ်လၢ ဆၣ်ဖိကီၢ်ဖိအဘ့ၣ်​ လၢစီၤအၤဒၣ်​ ဒီးအမါကသိးဝဲအဂီၢ်လီၤ.+ ၂၂ ဒီးယဟိဝၤယွၤ တဲဝဲလၢ “ခဲအံၤန့ၣ်​ ပှၤဟီၣ်ခိၣ်ဖိ ကဲထီၣ်ဒ်ပှၤ အသိး ခီဖျိလၢ အသ့ၣ်ညါ တၢ်ဂ့ၤဒီးတၢ်အၢလံ.+ ဒ်သိး အသုတယူာ်ထီၣ်အစု ဒီးဟံးန့ၢ်စ့ၢ်ကီး သ့ၣ်တၢ်မူ+ အသၣ်​ ဒီးအီၣ်အီၤဒီး မူဝဲလီၤထူလီၤယိာ် တဂ့ၤအဂီၢ်—” ၂၃ လၢတၢ်ဂ့ၢ်အံၤအဃိ ယဟိဝၤယွၤ နီဟးထီၣ်အီၤလၢ ဧ့ၤဒ့ၣ်တၤသၣ်လီၢ်အပူၤ+ ဒ်သိး အကသူၣ်အီၣ်ဖျးအီၣ်တၢ် လၢဟီၣ်ခိၣ်အဂီၢ်လီၤ.+ ၂၄ အဃိ အဝဲနီဟးထီၣ်ကွံာ် ပှၤဟီၣ်ခိၣ်ဖိ ဒီးပာ်လီၤဝဲ ခ့ရူာ်တဖၣ်လၢ+ ဧ့ၤဒ့ၣ်တၤသၣ်လီၢ် အမုၢ်ထီၣ်တခီ ဒီးနးမ့ၣ်အူတဘ့ၣ်လၢ အတရံးအသးထီဘိ ဒ်သိးကခိးဝဲ သ့ၣ်တၢ်မူအကျဲအဂီၢ်လီၤ.

၄ စီၤအၤဒၣ်​ မံဃုာ်ဒီး အမါနီၢ်အံၣ်အု ဒီးအမါန့ၣ်​ ဒၢထီၣ်ဝဲ+ ဒီးအိၣ်ဖျဲၣ်ထီၣ်​ အဖိခွါ စီၤကၤယံၣ်လီၤ. ဖဲအအိၣ်ဖျဲၣ်ထီၣ်အဖိခွါ စီၤကၤယံၣ်အခါ+ အတဲဝဲလၢ “ယအိၣ်ဖျဲၣ်ထီၣ်​ ဖိခွါအံၤလၢ ယဟိဝၤယွၤ အတၢ်မၤစၢၤအဃိလီၤ.” ၂ လၢခံ အဝဲဒၢထီၣ်ကဒီး ဒီးအိၣ်ဖျဲၣ်ထီၣ်ဝဲ စီၤကၤယံၣ်​ အပုၢ် စီၤဟ့းဘ့းလးလီၤ.+

စီၤဟ့းဘ့းလး ကဲထီၣ်ပှၤကွၢ်သိဖိ, မ့မ့ၢ်စီၤကၤယံၣ်န့ၣ်​ ကဲထီၣ်ဝဲ ပှၤသူၣ်အီၣ်ဖျးအီၣ်တၢ် တဂၤလီၤ. ၃ လၢခံန့ၣ်​ စီၤကၤယံၣ်​ ဟဲစိာ်ဝဲ တၤသူတၤသၣ်တနီၤ ဒ်သိးကလုၢ်ထီၣ်ဝဲဆူ ယဟိဝၤယွၤအအိၣ်လီၤ. ၄ မ့မ့ၢ် စီၤဟ့းဘ့းလးန့ၣ်​ ဟဲစိာ်စ့ၢ်ကီး အသိဖိဝဲၢ်ကိတနီၤ+ ဃုာ်ဒီးအသိအချါလီၤ. ဒီးယဟိဝၤယွၤ ဘၣ်သူၣ်ဘၣ်သးဝဲ စီၤဟ့းဘ့းလး ဒီးအတၢ်လုၢ်တၢ်ပာ်လီၤ.+ ၅ မ့မ့ၢ် စီၤကၤယံၣ်ဒီး အတၢ်လုၢ်တၢ်ပာ်န့ၣ်​ ကစၢ်ယွၤ တဘၣ်သူၣ်ဘၣ်သးဝဲ နီတစဲးဘၣ်. အဃိ စီၤကၤယံၣ်​ အသးပှံၢ်ထီၣ်တၢ် ဒီးအမဲာ်သၣ်​ တမုာ်လၢၤဘၣ်. ၆ ဒီးယဟိဝၤယွၤ တဲဘၣ်စီၤကၤယံၣ်လၢ “ဘၣ်မနုၤအဃိ နသးပှံၢ်ထီၣ်တၢ် ဒီးနမဲာ်သၣ်​ တမုာ်ဘၣ်လဲၣ်. ၇ နမ့ၢ်ဃၣ်က့ၤနသး ဒီးမၤတၢ်ဂ့ၤန့ၣ်​ နကဒိးန့ၢ်ဘၣ်က့ၤ ယတၢ်ဘၣ်သး တမ့ၢ်ဘၣ်ဧါ. ဘၣ်ဆၣ်​ နမ့ၢ်တဃၣ်က့ၤနသး ဒီးမၤတၢ်ဂ့ၤဘၣ်န့ၣ်​ တၢ်ဒဲးဘး အိၣ်ခိးလီၤနခိၣ်လၢ တြဲၤအခီၣ်ထံးလံ. ဒီးအအဲၣ်ဒိးဒိၣ်စိလၢ နဖီခိၣ်လီၤ. ဘၣ်ဆၣ်​ မ့ၢ်နကမၤနၢၤအီၤဧါ.”

၈ ဝံၤဒီးစီၤကၤယံၣ်​ တဲအပုၢ် စီၤဟ့းဘ့းလးလၢ “ပကလဲၤလၢ တၢ်ပျီပူၤမီၤ.” ဒီးဖဲအဝဲသ့ၣ်​ အိၣ်ဝဲလၢ တၢ်ပျီပူၤအခါ စီၤကၤယံၣ်​ မၤဒၢၣ်အပုၢ် စီၤဟ့းဘ့းလး ဒီးမၤသံအီၤလီၤ.+ ၉ လၢခံ ယဟိဝၤယွၤ တဲဘၣ်စီၤကၤယံၣ်လၢ “နပုၢ် စီၤဟ့းဘ့းလး အိၣ်ဖဲလဲၣ်.” ဒီးစီၤကၤယံၣ်​ တဲဆၢဝဲလၢ “ယတသ့ၣ်ညါဘၣ်. မ့ၢ်ယကဲပှၤလၢ အကွၢ်ထွဲယပုၢ်ဧါ.” ၁၀ ဖဲန့ၣ်ကစၢ်ယွၤ တဲဝဲလၢ “နမၤဘၣ်တၢ်မနုၤလဲၣ်. ကနၣ်မီၤ, နပုၢ်အသွံၣ်​ ကိးထီၣ်ယၤလၢ ဟီၣ်ခိၣ်လိၤလံ.+ ၁၁ ဒီးခဲအံၤ နဘၣ်တၢ်ဆိၣ်အၢ ဒီးတၢ်ကနီဟးထီၣ်ကွံာ်နၤလၢ ဟီၣ်ခိၣ်တကဝီၤအံၤလၢ အအိးထီၣ်အထးခိၣ်​ ဒ်သိး အကဒိးန့ၢ်ဘၣ်​ နပုၢ်အသွံၣ်လၢ နစုပူၤလီၤ.+ ၁၂ ဖဲနသူၣ်အီၣ်ဖျးအီၣ်တၢ်အခါ ဟီၣ်ခိၣ်တဟ့ၣ်ထီၣ်န့ၢ်နၤ တၢ်လၢအမဲထီၣ်​ သၣ်ထီၣ်တဖၣ်ဘၣ်. နကကဲထီၣ်​ ပှၤလၢအဟးဝ့ၤဝီၤတၢ် ဒီးပှၤလၢ အဃ့ၢ်ပူၤဖျဲးအသးလၢ ဟီၣ်ခိၣ်ချၢလီၤ.” ၁၃ ဒီးစီၤကၤယံၣ်​ တဲယဟိဝၤယွၤလၢ “တၢ်စံၣ်ညီၣ်လၢ ယကဘၣ်တူၢ်အီၤလၢ ယတၢ်ကမၣ်အဃိန့ၣ်​ နးတလၢလီၤ.” ၁၄ တနံၤအံၤ နကနီဟးထီၣ်ကွံာ်ယၤလၢ ဟီၣ်ခိၣ်တကဝီၤအံၤ ဒီးယကဘၣ်​ အိၣ်သဒၢလၢနမဲာ်ညါ ဒီးယကကဲထီၣ်​ ပှၤလၢအဟးဝ့ၤဝီၤတၢ် ဒီးပှၤလၢအဃ့ၢ်ပူၤဖျဲးအသး လၢဟီၣ်ခိၣ်ချၢလီၤ. ဒီးပှၤတဂၤဂ့ၤတဂၤဂ့ၤလၢ အထံၣ်ယၤန့ၣ်​ ကမၤသံယၤလီၤသၢၤ.” ၁၅ အဃိ ယဟိဝၤယွၤ တဲအီၤလၢ “မ့မ့ၢ်ဒ်န့ၣ်န့ၣ်​ ပှၤတဂၤဂၤ မ့ၢ်မၤသံစီၤကၤယံၣ်န့ၣ်​ အကဒိးန့ၢ်ဘၣ်​ တၢ်မၤကၣ်​ နွံစးလီၤ.”

အဃိ ယဟိဝၤယွၤ မၤတၢ်ပနီၣ်လၢ စီၤကၤယံၣ်အဂီၢ် ဒ်သိး ပှၤလၢအထံၣ်အီၤ တဂၤဂ့ၤတဂၤဂ့ၤ သုတမၤသံအီၤ တဂ့ၤအဂီၢ်လီၤ. ၁၆ ဒီးစီၤကၤယံၣ်​ ဟးထီၣ်ကွံာ်လၢ ယဟိဝၤယွၤအမဲာ်ညါ ဒီးလဲၤအိၣ်ဝဲလၢ ကီၢ်နိာ်* လၢအအိၣ်လၢဧ့ၤဒ့ၣ်​ မုၢ်ထီၣ်တခီလီၤ.+

၁၇ လၢခံ စီၤကၤယံၣ်​ မံဃုာ်ဒီးအမါ+ ဒီးအမါန့ၣ်​ ဒၢထီၣ်ဒီး အိၣ်ဖျဲၣ်ထီၣ်​ အဖိခွါ စီၤဃနိာ်လီၤ. ဒီးအဝဲ သူၣ်ထီၣ်ဝ့ၢ်တဝ့ၢ် ဒီးကိးန့ၢ်ဝ့ၢ်အံၤအမံၤ ဒ်အဖိခွါ စီၤဃနိာ် အမံၤအသိးလီၤ. ၁၈ ဒီးစီၤဃနိာ်န့ၣ်​ မ့ၢ်ဝဲ စီၤဧံၤရးအပၢ်, စီၤဧံၤရး မ့ၢ်ဝဲ စီၤမဃူယအ့လးအပၢ်, စီၤမဃူယအ့လး မ့ၢ်ဝဲ စီၤမသူၡ့ၤအ့လးအပၢ် ဒီးစီၤမသူၡ့ၤအ့လးန့ၣ်​ မ့ၢ်ဝဲ စီၤလ့ၤမ့းအပၢ်လီၤ.

၁၉ ဒီးစီၤလ့ၤမ့းန့ၣ်​ ဟံးအမါ ခံဂၤလီၤ. ဒီးအမါ အဆိကတၢၢ်တဂၤ အမံၤမ့ၢ်ဝဲ နီၢ်ဧဒၤ ဒီးခံဂၤတဂၤ အမံၤမ့ၢ်ဝဲ နီၢ်စံလၤလီၤ. ၂၀ နီၢ်ဧဒၤ အိၣ်ဖျဲၣ်ထီၣ်​ စီၤယၤဘလးလီၤ. စီၤယၤဘလးမ့ၢ် ပှၤအဆိကတၢၢ်တဂၤလၢ အအိၣ်ဆိးလၢဒဲပူၤ ဒီးဘုၣ်အီၣ်ဝဲ ဆၣ်ဖိကီၢ်ဖိ အဒၢတဖၣ်လီၤ. ၂၁ စီၤယၤဘလး အဒီပုၢ်ဝဲၢ်ခွါတဂၤ အမံၤမ့ၢ် စီၤယူၤဘလးလီၤ. စီၤယူၤဘလး မ့ၢ်ပှၤအဆိကတၢၢ်တဂၤ လၢပှၤလၢအဒ့တနၢ် ဒီးအူပံခဲလၢာ်အကျါန့ၣ်လီၤ. ၂၂ နီၢ်စံလၤ အိၣ်ဖျဲၣ်ထီၣ်​ စီၤတူၤဘလးက့ၤယံၣ်လီၤ. စီၤတူၤဘလးက့ၤယံၣ်န့ၣ်​ မ့ၢ်ပှၤလၢ အပိာ်ဝဲ တၢ်ပီးတၢ်လီ အကလုာ်ကလုာ် လၢတိၢ်ဘီ ဒီးထးန့ၣ်လီၤ. စီၤတူၤဘလးက့ၤယံၣ်​ အဒီပုၢ်ဝဲၢ်မုၣ်န့ၣ်​ မ့ၢ်ဝဲ နီၢ်နၤဧမၤလီၤ. ၂၃ ဒီးစီၤလ့ၤမ့းန့ၣ်​ ဒိဝဲထါလၢ အမါနီၢ်ဧဒၤ ဒီးနီၢ်စံလၤအဂီၢ် ဒ်အံၤ

၂၅ စီၤအၤဒၣ်​ မံဃုာ်ကဒီးဒီးအမါ ဒီးအမါအိၣ်ဖျဲၣ်ထီၣ်​ အဖိခွါတဂၤလီၤ. ဒီးနီၢ်အံၣ်အု ကိးန့ၢ်အမံၤလၢ စီၤၡ့သး+ မ့ၢ်လၢ အတဲဝဲလၢ “စီၤကၤယံၣ်မၤသံ စီၤဟ့းဘ့းလးအဃိ ကစၢ်ယွၤပာ်ထီၣ်န့ၢ်ယၤ တၢ်အချံအသၣ်အဂၤလၢ စီၤဟ့းဘ့းလးအလီၢ်န့ၣ်လီၤ.”+ ၂၆ ဒီးစီၤၡ့သး အဖိခွါ အိၣ်ဖျဲၣ်ထီၣ်တဂၤ ဒီးစီၤၡ့သး ကိးန့ၢ်ဝဲအမံၤလၢ စီၤအနိၣ်လီၤ.+ စးထီၣ်ဖဲန့ၣ်အဆၢကတီၢ် ပှၤကိးထီၣ်​ ယဟိဝၤယွၤအမံၤလီၤ.

၅ အအံၤမ့ၢ် တၢ်ကွဲးနီၣ်ဃာ်လၢ အဘၣ်ဃးဒီး စီၤအၤဒၣ်​ အစၢၤအသွဲၣ်န့ၣ်လီၤ. မုၢ်တနံၤ ဖဲကစၢ်ယွၤ တ့လီၤစီၤအၤဒၣ်န့ၣ်​ အဝဲတ့လီၤအီၤ လီၤဂာ်ဒ် ကစၢ်ယွၤအသိးလီၤ.+ ၂ ဒီးတ့လီၤဝဲ ပိာ်ခွါဒီးပိာ်မုၣ်လီၤ.+ မုၢ်တနံၤဖဲ ကစၢ်ယွၤတ့လီၤ အဝဲသ့ၣ်န့ၣ်+ ကစၢ်ယွၤဆိၣ်ဂ့ၤ အဝဲသ့ၣ်​ ဒီးကိးအဝဲသ့ၣ်လၢ ပှၤဟီၣ်ခိၣ်ဖိလီၤ.

၃ ဖဲစီၤအၤဒၣ်​ အိၣ်ဝဲအနံၣ်​ ၁၃၀ အခါ ထီၣ်ဖိဝဲ အဖိခွါတဂၤလၢ အလီၤဂာ်ဒ်အနီၢ်ကစၢ်အသိး ဒီးဒ်အက့ၢ်အဂီၤအသိး ဒီးကိးန့ၢ်ဝဲအမံၤ လၢစီၤၡ့သးလီၤ.+ ၄ ဖဲစီၤအၤဒၣ်​ ထီၣ်ဖိဝဲ စီၤၡ့သး ဝံၤအလီၢ်ခံ ဆဲးအိၣ်မူဝဲ အနံၣ်​ ၈၀၀ လီၤ. ဒီးအဝဲထီၣ်ဖိ အဖိမုၣ်ဖိခွါတဖၣ်လီၤ. ၅ စီၤအၤဒၣ်​ အိၣ်မူဝဲ အနံၣ်​ ၉၃၀ ဒီးသံဝဲလီၤ.+

၆ ဖဲစီၤၡ့သး အိၣ်ဝဲ ၁၀၅ နံၣ်အခါ ထီၣ်ဖိဝဲ စီၤအနိၣ်လီၤ.+ ၇ ဖဲစီၤၡ့သး ထီၣ်ဖိဝဲ စီၤအနိၣ်ဝံၤအလီၢ်ခံ ဆဲးအိၣ်မူဝဲ ၈၀၇ နံၣ်လီၤ. ဒီးအဝဲထီၣ်ဖိ အဖိမုၣ်ဖိခွါတဖၣ်လီၤ. ၈ စီၤၡ့သး အိၣ်မူဝဲ ၉၁၂ နံၣ်​ ဒီးသံဝဲလီၤ.

၉ ဖဲစီၤအနိၣ်​ အိၣ်ဝဲအနံၣ်​ ၉၀ အခါ ထီၣ်ဖိဝဲ စီၤက့ၤနၣ်လီၤ. ၁၀ ဖဲစီၤအနိၣ်ထီၣ်ဖိဝဲ စီၤက့ၤနၣ်​ ဝံၤအလီၢ်ခံ ဆဲးအိၣ်မူဝဲ ၈၁၅ နံၣ်လီၤ. ဒီးအဝဲထီၣ်ဖိ အဖိမုၣ်ဖိခွါတဖၣ်လီၤ. ၁၁ စီၤအနိၣ်​ အိၣ်မူဝဲ အနံၣ်​ ၉၀၅ နံၣ်​ ဒီးသံဝဲလီၤ.

၁၂ ဖဲစီၤက့ၤနၣ်​ အိၣ်ဝဲအနံၣ်​ ၇၀ အခါ ထီၣ်ဖိဝဲ စီၤမၤဟလၤလ့လးလီၤ.+ ၁၃ ဖဲစီၤက့ၤနၣ်​ ထီၣ်ဖိဝဲ စီၤမၤဟလၤလ့လး ဝံၤအလီၢ်ခံ ဆဲးအိၣ်မူဝဲ အနံၣ်​ ၈၄၀ လီၤ. ဒီးအဝဲထီၣ်ဖိဝဲ အဖိမုၣ်ဖိခွါတဖၣ်လီၤ. ၁၄ စီၤက့ၤနၣ်​ အိၣ်မူဝဲ အနံၣ်​ ၉၁၀ ဒီးသံဝဲလီၤ.

၁၅ ဖဲစီၤမၤဟလၤလ့လး အိၣ်ဝဲ ၆၅ နံၣ်အခါ ထီၣ်ဖိဝဲ စီၤယၤရ့းလီၤ.+ ၁၆ ဖဲစီၤမၤဟလၤလ့လး ထီၣ်ဖိဝဲ စီၤယၤရ့း ဝံၤအလီၢ်ခံ ဆဲးအိၣ်မူဝဲ အနံၣ်​ ၈၃၀ လီၤ. ဒီးအဝဲ ထီၣ်ဖိဝဲ အဖိမုၣ်ဖိခွါတဖၣ်လီၤ. ၁၇ စီၤမၤဟလၤလ့လး အိၣ်မူဝဲ ၈၉၅ နံၣ်​ ဒီးသံဝဲလီၤ.

၁၈ ဖဲစီၤယၤရ့း အိၣ်ဝဲ ၁၆၂ နံၣ်အခါ ထီၣ်ဖိဝဲ စီၤဃနိာ်လီၤ.+ ၁၉ ဖဲစီၤယၤရ့း ထီၣ်ဖိဝဲ စီၤဃနိာ် ဝံၤအလီၢ်ခံ ဆဲးအိၣ်မူဝဲ အနံၣ်​ ၈၀၀ လီၤ. ဒီးအဝဲထီၣ်ဖိဝဲ အဖိမုၣ်ဖိခွါတဖၣ်လီၤ. ၂၀ စီၤယၤရ့း အိၣ်မူဝဲ ၉၆၂ နံၣ်​ ဒီးသံဝဲလီၤ.

၂၁ ဖဲစီၤဃနိာ် အိၣ်ဝဲ ၆၅ နံၣ်အခါ ထီၣ်ဖိဝဲ စီၤမသူၤၡလၤလီၤ.+ ၂၂ ဖဲစီၤဃနိာ် ထီၣ်ဖိဝဲ စီၤမသူၤၡလၤ ဝံၤအလီၢ်ခံ အဝဲဆဲးလဲၤတၢ်ဒီးယွၤ လၢအမ့ၢ်အတီတဂၤ အနံၣ်​ ၃၀၀ လီၤ. ဒီးအဝဲထီၣ်ဖိဝဲ အဖိမုၣ်ဖိခွါတဖၣ်လီၤ. ၂၃ စီၤဃနိာ် အိၣ်မူဝဲ ၃၆၅ နံၣ်​ ဒီးသံဝဲလီၤ. ၂၄ စီၤဃနိာ် ဆဲးလဲၤတၢ်ဒီးယွၤ လၢအမ့ၢ်အတီတဂၤလီၤ.+ ဒီးမ့ၢ်လၢ ကစၢ်ယွၤ ထုးကွံာ်အီၤအဃိ တၢ်တထံၣ်ဘၣ်အီၤလၢၤဘၣ်.+

၂၅ ဖဲစီၤမသူၤၡလၤ အိၣ်ဝဲ ၁၈၇ နံၣ်အခါ ထီၣ်ဖိဝဲ စီၤလ့ၤမ့းလီၤ.+ ၂၆ ဖဲစီၤမသူၤၡလၤ ထီၣ်ဖိဝဲ စီၤလ့ၤမ့း ဝံၤအလီၢ်ခံ ဆဲးအိၣ်မူဝဲ ၇၈၂ နံၣ်လီၤ. ဒီးအဝဲထီၣ်ဖိဝဲ အဖိမုၣ်ဖိခွါတဖၣ်လီၤ. ၂၇ စီၤမသူၤၡလၤ အိၣ်မူဝဲ ၉၆၉ နံၣ်​ ဒီးသံဝဲလီၤ.

၂၈ ဖဲစီၤလ့ၤမ့း အိၣ်ဝဲ ၁၈၂ နံၣ်အခါ ထီၣ်ဖိဝဲ အဖိခွါတဂၤလီၤ. ၂၉ ဒီးအဝဲ ကိးဝဲအမံၤလၢ စီၤနိအၤ*+ ဒီးတဲဝဲလၢ “ယဟိဝၤယွၤ ဆိၣ်အၢဟီၣ်ခိၣ်* အဃိ ပဘၣ်မၤတၢ်ဆူၣ်ဆူၣ်​ ဒီးပဘၣ်မၤတၢ်လၢ ပစုကီကီခဲခဲ ဘၣ်ဆၣ်​ ဖိသၣ်အံၤ ကဟ့ၣ်ဒုးအိၣ်ဘှံးပှၤလီၤ.”+ ၃၀ ဖဲစီၤလ့ၤမ့း ထီၣ်ဖိဝဲ စီၤနိအၤ ဝံၤအလီၢ်ခံ ဆဲးအိၣ်မူဝဲ ၅၉၅ နံၣ်လီၤ. ဒီးအဝဲထီၣ်ဖိ အဖိမုၣ်ဖိခွါတဖၣ်လီၤ. ၃၁ စီၤလ့ၤမ့း အိၣ်မူဝဲ ၇၇၇ နံၣ်​ ဒီးသံဝဲလီၤ.

၃၂ လၢခံ ဖဲစီၤနိအၤအိၣ်ဝဲ အနံၣ်​ ၅၀၀ အခါ အဝဲထီၣ်ဖိဝဲ စီၤၡ့ၣ်,+ စီၤဃၣ်+ ဒီးစီၤယ့ဖ့းသးလီၤ.+

၆ ဖဲပှၤပိာ်ခွါတဖၣ်​ အနီၣ်ဂံၢ် ဟဲအါထီၣ်ဝဲ လၢဟီၣ်ခိၣ်ချၢ ဒီးအဝဲသ့ၣ်​ အဖိမုၣ်တဖၣ်​ ဟဲအိၣ်ဖျဲၣ်ထီၣ်ဝဲအခါ ၂ ကစၢ်ယွၤ အဖိခွါတဖၣ်*+ ပာ်သူၣ်ပာ်သးဝဲလၢ ပှၤပိာ်မုၣ်တဖၣ်အံၤ* ဒိၣ်တၢ်ဂ့ၤမးလီၤ. အဃိ အဝဲသ့ၣ်ဟံးန့ၢ် ပိာ်မုၣ်တဖၣ်အံၤ ဒ်အမါအသိး ဖဲဒၣ်အသးလီၤ. ၃ ဒီးယဟိဝၤယွၤ တဲဝဲလၢ “ပှၤဟီၣ်ခိၣ်ဖိန့ၣ်​ ပှဲၤဒီးတၢ်ဒဲးဘးအဃိ ယ* တဝံသးစူၤအီၤ လီၤထူလီၤယိာ်ဘၣ်.+ အဃိ အဝဲသ့ၣ်​ ကဆဲးအိၣ်မူဝဲ အနံၣ်​ ၁၂၀ လီၤ.”+

၄ ကစၢ်ယွၤအဖိခွါတဖၣ်​ မံဃုာ်ဒီး ပိာ်မုၣ်တဖၣ်​ ဒီးအဝဲသ့ၣ်​ အိၣ်ဖျဲၣ်ထီၣ်ဝဲ ဖိခွါတဖၣ်လီၤ. အဖိခွါတဖၣ်အံၤ မ့ၢ်ပှၤနီၢ်ဒိၣ်ဖိတဖၣ်​ ဒီးအိၣ်ဝဲလၢ ဟီၣ်ခိၣ်ချၢလီၤ. ဒီးအဝဲသ့ၣ်​ မ့ၢ်ပှၤလၢ အဂံၢ်ဆူၣ်ဘါဆူၣ်​ လၢအအိၣ်လၢပျၢၤတဖၣ်​ ဒီးအဝဲသ့ၣ်​ အမံၤဟူသၣ်ဖျါဝဲလီၤ.

၅ အဃိ ယဟိဝၤယွၤ ထံၣ်ဝဲလၢ ပှၤဟီၣ်ခိၣ်ဖိ အတၢ်အၢတၢ်သီန့ၣ်​ အိၣ်ဝဲ အါအါဂီၢ်ဂီၢ်လၢ ဟီၣ်ခိၣ်ချၢ ဒီးလၢအဝဲသ့ၣ်​ အသးပူၤန့ၣ်​ ဆိကမိၣ်ဝဲထဲ တၢ်အၢတၢ်သီ ကိးဆၢကတီၢ်ဒဲးလီၤ.+ ၆ ဒီးယဟိဝၤယွၤ အသးတမုာ်လၢၤဘၣ်လၢ အတ့လီၤဘၣ်​ ပှၤဟီၣ်ခိၣ်ဖိလၢ ဟီၣ်ခိၣ်ချၢ ဒီးအသးဘၣ်ဒိဝဲလီၤ.+ ၇ အဃိ ယဟိဝၤယွၤ တဲဝဲလၢ “ယသးတမုာ်လၢၤဘၣ်လၢ ယတ့လီၤဘၣ်​ ပှၤဟီၣ်ခိၣ်ဖိ အဃိလီၤ. အဃိ ပှၤဟီၣ်ခိၣ်ဖိလၢ ယတ့လီၤအီၤလၢ ဟီၣ်ခိၣ်ချၢအံၤ ယကမၤဟးဂီၤကွံာ် အဝဲသ့ၣ်​ ဃုာ်ဒီး ဆၣ်ဖိကီၢ်ဖိအဒၢ, ဆၣ်ဖိကီၢ်ဖိလၢ အဟူးအဂဲၤ ဒီးတၢ်အသးသမူလၢ အယူၤလၢ မူကပိာ်လိၤလီၤ.” ၈ ဘၣ်ဆၣ်မ့မ့ၢ် စီၤနိအၤန့ၣ်​ ယဟိဝၤယွၤ ဘၣ်သူၣ်ဘၣ်သးအီၤလီၤ.

၉ အအံၤမ့ၢ် တၢ်ကွဲးနီၣ်ဃာ်လၢ အဘၣ်ဃးဒီး စီၤနိအၤလီၤ.

စီၤနိအၤ မ့ၢ်ပှၤအတီအလိၤ တဂၤလီၤ.+ ဒီးပှၤလၢအအိၣ်မူ တစိၤဃီဒီးအီၤ တဖၣ်အကျါန့ၣ်​ အဝဲပာ်ဖျါထီၣ်လၢ အမ့ၢ်ပှၤလၢ တၢ်ပာ်ဒ့ၣ်ပာ်ကမၣ်အီၤ အလီၢ်တအိၣ်ဘၣ်လီၤ. ဒီးစီၤနိအၤ လဲၤတၢ်ဒီး ယွၤလၢ အမ့ၢ်အတီတဂၤလီၤ.+ ၁၀ လၢခံန့ၣ်​ စီၤနိအၤ အဖိခွါအိၣ်ဝဲသၢဂၤ လၢအမ့ၢ် စီၤၡ့ၣ်, စီၤဃၣ်​ ဒီးစီၤယ့ဖ့းသးလီၤ.+ ၁၁ ဘၣ်ဆၣ်​ လၢယွၤလၢ အမ့ၢ်အတီတဂၤ အတၢ်ထံၣ်န့ၣ်​ ဟီၣ်ခိၣ်ဟးဂီၤဝဲ ဒီးပှဲၤဝဲဒီး တၢ်မၤဆူၣ်မၤစိးလီၤ. ၁၂ ဒီးကစၢ်ယွၤ ကွၢ်လီၤဟီၣ်ခိၣ်​ ဒီးထံၣ်ဝဲလၢ အဟးဂီၤဝဲလီၤ.+ ပှၤခဲလၢာ်လၢ ဟီၣ်ခိၣ်ချၢန့ၣ်​ အတၢ်အိၣ်မူ လုၢ်လၢ်သကဲာ်ပဝး ဟးဂီၤဝဲလီၤ.+

၁၃ လၢခံန့ၣ်​ ကစၢ်ယွၤတဲဘၣ်​ စီၤနိအၤလၢ “ယဆၢတဲာ်လီၤယသးလၢ ယကမၤဟးဂီၤကွံာ် ပှၤဟီၣ်ခိၣ်ဖိခဲလၢာ် မ့ၢ်လၢ ဟီၣ်ခိၣ်ဒီဘ့ၣ်​ ပှဲၤဝဲဒီး တၢ်မၤဆူၣ်မၤစိးလၢ အဝဲသ့ၣ်အဃိလီၤ. အဃိ ယကမၤဟးဂီၤကွံာ် အဝဲသ့ၣ်​ ဒီးဟီၣ်ခိၣ်စ့ၢ်ကီးလီၤ.+ ၁၄ တ့ထီၣ်ကဘီလၢနဂီၢ် ဒီးတ့အီၤလၢ သ့ၣ်ကီးဖၢ်တက့ၢ်.+ ဒီးလၢကဘီပူၤန့ၣ်​ တ့အီၤဒီးဒၢးတဖၣ်​ ဒီးကဘီအပူၤမ့ၢ်ဂ့ၤ အချၢမ့ၢ်ဂ့ၤ ဖှူအီၤဒီးကျဲတံးတက့ၢ်.+ ၁၅ ဒီးနကဘၣ်တ့ထီၣ်​ ကဘီဒ်အံၤလီၤ. ကဘီန့ၣ်​ အထီကဘၣ်​ အိၣ်ဝဲအပျၢ်* ၃၀၀, အဒီၣ်ဃီၤ ကဘၣ်အိၣ်ဝဲ အပျၢ် ၅၀ ဒီးအကစီၤထီၣ်ထီ ကဘၣ်အိၣ်ဝဲ အပျၢ် ၃၀ လီၤ. ၁၆ ဒ်သိး တၢ်ကပီၤ ကဟဲနုာ်လီၤ လၢကဘီပူၤအဂီၢ် နကဘၣ်တ့ထီၣ်​ ပဲတြီဖိလၢ ကဘီအခိၣ်ဒုးဖီလာ် လၢအအိၣ်​ စီၤစုၤဒီးအခိၣ်ဒုးတပျၢ်လီၤ. ဒီးနကဘၣ်​ တ့ထီၣ်ကဘီ သၢကထြၢ ဒ်သိးကအိၣ်ဒီး အဖီလာ်တကထြၢ, အခၢၣ်သးတကထြၢ ဒီးအဖီခိၣ်တကထြၢအဂီၢ်လီၤ. ဒီးနဘၣ်တ့ထီၣ်တြဲၤလၢ ကဘီအကပၤလီၤ.+

၁၇ “မ့မ့ၢ်ယၤန့ၣ်​ ယကဒုးလုၢ်ဘၢ ဟီၣ်ခိၣ်လၢထံ+ ဒ်သိး ကမၤဟးဂီၤကွံာ် တၢ်သးသမူခဲလၢာ် လၢအအိၣ်ဒီးတၢ်မူအသါ လၢဟီၣ်ခိၣ်ချၢလီၤ. တၢ်ခဲလၢာ်လၢ အအိၣ်လၢ ဟီၣ်ခိၣ်ချၢန့ၣ်​ ကသံဝဲလီၤ.+ ၁၈ ယမၤ တၢ်အၢၣ်လီၤအီလီၤဒီးနၤလီၤ. နဖိခွါတဖၣ်, နမါ ဒီးနဖိခွါအမါတဖၣ်​ ကဘၣ်လဲၤနုာ်လီၤလၢ ကဘီပူၤ ဃုာ်ဒီးနၤလီၤ.+ ၁၉ ဒ်သိး ဆၣ်ဖိကီၢ်ဖိ အကလုာ်ကလုာ်+ ကပူၤဖျဲး ဃုာ်ဒီးနၤအဂီၢ် နကဘၣ်​ ဒုးနုာ်အီၤလၢ ကဘီပူၤ တကလုာ်ခံဒု, အမိၢ် ဒီးအဖါလီၤ.+ ၂၀ တၢ်သးသမူ လၢအယူၤ ဒ်အကလုာ်အသိး, ဆၣ်ဖိကီၢ်ဖိအဒၢ ဒ်အကလုာ်အသိး, ဆၣ်ဖိကီၢ်ဖိလၢ အဟူးအဂဲၤ လၢဟီၣ်ခိၣ်လိၤ ဒ်အကလုာ်အသိးန့ၣ်​ ကလဲၤနုာ်လီၤလၢ ကဘီပူၤဆူနအိၣ်​ တကလုာ်ခံဒု လၢကဘီပူၤ ဒ်သိး ကပူၤဖျဲးဝဲအဂီၢ်လီၤ.+ ၂၁ ဒီးနကဘၣ်​ ပာ်ဖှိၣ်ဒီးစိာ်ဃုာ် တၢ်အီၣ်ကိးကလုာ်ဒဲးလၢ+ နၤဒီးဆၣ်ဖိကီၢ်ဖိတဖၣ်​ ကအီၣ်ဝဲ အဂီၢ်လီၤ.”

၂၂ စီၤနိအၤ မၤဝဲဒ်ကစၢ်ယွၤ မၤလိာ်အီၤအသိး ကိးမံၤဒဲး ဒီးအမၤထွဲဝဲ လီၤတံၢ်လီၤဆဲးလီၤ.+

၇ ဒီးယဟိဝၤယွၤ တဲဘၣ်စီၤနိအၤလၢ “လၢပှၤတစိၤဃီဒီးနၤ အကျါန့ၣ်​ ယထံၣ်လၢ နမ့ၢ်ပှၤအတီအလိၤ တဂၤအဃိ နၤဒီးနဟံၣ်ဖိဃီဖိ ခဲလၢာ်န့ၣ်​ လဲၤနုာ်လီၤဆူ ကဘီပူၤတက့ၢ်.+ ၂ နကဘၣ်​ ကိးဃုာ်ဒီး ဆၣ်ဖိကီၢ်ဖိလၢ အကဆှီ ကိးကလုာ်ဒဲး, တကလုာ်န့ၣ်​ နွံဒု*+ အမိၢ်ဒီးအဖါလီၤ. ဒီးမ့မ့ၢ် ဆၣ်ဖိကီၢ်ဖိလၢ အတကဆှီဘၣ်​ ခဲလၢာ်န့ၣ်​ နကဘၣ်ကိးဃုာ်အီၤ ထဲခံဒုစုာ်စုာ်, အမိၢ်ဒီးအဖါလီၤ. ၃ ဒီးတၢ်သးသမူလၢ အယူၤဝဲလၢ မူခိၣ်န့ၣ်​ တကလုာ်နွံဘ့ၣ်* အမိၢ်ဒီးအဖါလီၤ. နကဘၣ်မၤဒ်န့ၣ်​ ဒ်သိးအစၢၤအသွဲၣ်တဖၣ်​ သုတလီၤတူာ်လၢ ဟီၣ်ခိၣ်ချၢ တဂ့ၤအဂီၢ်လီၤ.+ ၄ ဆူမဲာ်ညါနွံသီန့ၣ်​ ယကဒုးစူၤလီၤ မူခိၣ်ထံဆူ+ ဟီၣ်ခိၣ်ချၢ အနံၤ ၄၀ ဒီးအနၤ ၄၀ လီၤ.+ ဒီးယကမၤဟးဂီၤကွံာ် တၢ်သးသမူခဲလၢာ် လၢယတ့လီၤအီၤ လၢဟီၣ်ခိၣ်ချၢလီၤ.”+ ၅ ဒီးစီၤနိအၤ မၤဝဲ တၢ်ကိးမံၤဒဲးလၢ ယဟိဝၤယွၤ မၤလိာ်အီၤန့ၣ်လီၤ.

၆ ဖဲထံလုၢ်ဘၢတၢ်လၢ ဟီၣ်ခိၣ်ချၢအခါ စီၤနိအၤအိၣ်ဝဲ အနံၣ်​ ၆၀၀ လီၤ.+ ၇ အဃိ တချုးလၢ ထံလုၢ်ဘၢတၢ် ဟဲဒံးဘၣ်န့ၣ်​ စီၤနိအၤ ဒီးအဖိခွါတဖၣ်, စီၤနိအၤအမါ ဒီးအဖိခွါတဖၣ်အမါ လဲၤနုာ်လီၤလၢ ကဘီပူၤလီၤ.+ ၈ ဒီးကယဲၢ် ဆၣ်ဖိကီၢ်ဖိလၢ အကဆှီ, ဆၣ်ဖိကီၢ်ဖိလၢ အတကဆှီဘၣ်, တၢ်သးသမူလၢ အယူၤဝဲ ဒီးတၢ်လၢ အဟူးအဂဲၤလၢ ဟီၣ်ခိၣ်ချၢခဲလၢာ်+ ၉ လဲၤနုာ်လီၤလၢ ကဘီပူၤ ဆူစီၤနိအၤအအိၣ်​ ခံဒုခံဒု, အမိၢ်ဒီးအဖါ ဒ်ကစၢ်ယွၤ မၤလိာ် စီၤနိအၤအသိးန့ၣ်လီၤ. ၁၀ နွံသီ ဝံၤအလီၢ်ခံ မူခိၣ်စူၤလီၤဒီး ထံလုၢ်ဘၢတၢ်လၢ ဟီၣ်ခိၣ်ချၢန့ၣ်​ စးထီၣ်ဝဲလီၤ.

၁၁ ဖဲစီၤနိအၤ အသးအိၣ်အနံၣ်​ ၆၀၀, လါခံလါတလါ, လါထီၣ်​ ၁၇ သီတသီန့ၣ်​ ထံယိာ်အထံထီၣ်ပၢၢ်တဖၣ်​ ပိၢ်ဖးထီၣ်​ ဒီးမူခိၣ်အတြဲၤတဖၣ်​ အိးထီၣ်အသးလီၤ.+ ၁၂ ဒီးမူခိၣ်စူၤလီၤဖးဒိၣ်​ လၢဟီၣ်ခိၣ်ချၢ အနံၤ ၄၀ ဒီးအနၤ ၄၀ လီၤ. ၁၃ ဖဲတၢ်တနံၤန့ၣ်​ စီၤနိအၤ ဒီးအဖိခွါတဖၣ်​ လၢအမ့ၢ် စီၤၡ့ၣ်, စီၤဃၣ်, စီၤယ့ဖ့းသးန့ၣ်+ လဲၤနုာ်လီၤလၢ ကဘီပူၤလီၤ. ဒီးစီၤနိအၤ အမါ ဒီးအဖိခွါတဖၣ်​ အမါလဲၤနုာ်လီၤဝဲ စ့ၢ်ကီးလီၤ.+ ၁၄ ဒီးဆၣ်ဖိကီၢ်ဖိအမံၤ ကိးကလုာ်ဒဲး, ဆၣ်ဖိကီၢ်ဖိအဒၢ ကိးကလုာ်ဒဲး, ဆၣ်ဖိကီၢ်ဖိလၢ အဟူးအဂဲၤ လၢဟီၣ်ခိၣ်ချၢ ကိးကလုာ်ဒဲး ဒီးတၢ်သးသမူလၢ အယူၤဝဲ ကိးကလုာ်ဒဲး လၢအမ့ၢ် ကယဲၢ်ထိၣ်တဖၣ်​ ဒီးတၢ်သးသမူအဂၤ လၢအအိၣ်ဒီး အဒံးဆ့န့ၣ်​ လဲၤနုာ်လီၤဝဲ စ့ၢ်ကီးလီၤ. ၁၅ တၢ်သးသမူ ကိးကလုာ်ဒဲးလၢ အအိၣ်ဒီး တၢ်မူအသါန့ၣ်​ လဲၤနုာ်လီၤလၢ ကဘီပူၤ ခံဒုခံဒု ဆူစီၤနိအၤအအိၣ်လီၤ. ၁၆ ဒီးတၢ်သးသမူ ခဲလၢာ် လၢအမ့ၢ် အမိၢ်ဒီးအဖါန့ၣ်​ လဲၤနုာ်လီၤလၢ ကဘီပူၤ ဒ်ကစၢ်ယွၤမၤလိာ် စီၤနိအၤအသိးလီၤ. ဖဲန့ၣ်ဝံၤအလီၢ်ခံ ယဟိဝၤယွၤ ကးတံာ်ဝဲ တြဲၤလီၤ.

၁၇ ထံဆဲးဒိၣ်ထီၣ်ဝဲ လၢဟီၣ်ခိၣ်ချၢ အနံၤ ၄၀ ဒီးထံန့ၣ်​ အါထီၣ်ဝဲကွ့ၢ်ကွ့ၢ် ဒီးစးထီၣ်စိာ်ကဖီထီၣ်ဝဲ ကဘီလီၤ. ဒီးကဘီန့ၣ်​ ထီၣ်ဖီဝဲလၢ ထံဖးယိာ်အဖီခိၣ်လီၤ. ၁၈ ဒီးထံဟဲထီၣ်ဝဲချ့ချ့ ဒီးထံအါထီၣ်ဝဲလၢ ဟီၣ်ခိၣ်ချၢ ကွ့ၢ်ကွ့ၢ်လီၤ. ဘၣ်ဆၣ်​ ကဘီန့ၣ်​ ထီၣ်ဖီဝဲလၢ ထံဖီခိၣ်လီၤ. ၁၉ ဒီးထံဒိၣ်ထီၣ်လၢ ဟီၣ်ခိၣ်ချၢ တုၤဒၣ်လဲာ် ကစၢၢ်လၢ အထီကိးဖျၢၣ်ဒဲး လၢဟီၣ်ခိၣ်ဒီဘ့ၣ်ညါန့ၣ်​ လီၤဘျၢဝဲလီၤ.+ ၂၀ ဒီးထံန့ၣ်​ ဒိၣ်ထီၣ်ဝဲ ဒီးအိၣ်ဝဲလၢ ကစၢၢ်တဖၣ်အဖီခိၣ်​ တဆံယဲၢ်ပျၢ်လီၤ.*

၂၁ အဃိ ကယဲၢ်တၢ်သးသမူလၢ အဟူးဂဲၤလၢ ဟီၣ်ခိၣ်ချၢ+ လၢအမ့ၢ် တၢ်သးသမူလၢ အယူၤဝဲ, ဆၣ်ဖိကီၢ်ဖိအဒၢ, ဆၣ်ဖိကီၢ်ဖိအမံၤ, တၢ်သးသမူ လၢအလဲၤတၢ် ဒီဖုဒီဂီၢ် ဒီးပှၤဟီၣ်ခိၣ်ဖိခဲလၢာ်န့ၣ်​ သံဝဲလီၤ.+ ၂၂ ကယဲၢ်တၢ်သးသမူလၢ အကသါ* လၢအအိၣ်မူလၢ ခိသူခိၣ်န့ၣ်​ သံဝဲလီၤ.+ ၂၃ အဃိ ကစၢ်ယွၤ မၤဟးဂီၤကွံာ် တၢ်သးသမူခဲလၢာ် လၢဟီၣ်ခိၣ်ချၢ လၢအပၣ်ဃုာ်ဒီး ပှၤဟီၣ်ခိၣ်ဖိ, ဆၣ်ဖိကီၢ်ဖိ, ဆၣ်ဖိကီၢ်ဖိလၢ အဟူးဂဲၤလၢဟီၣ်ခိၣ်ချၢ ဒီးတၢ်သးသမူလၢ အယူၤဝဲလၢ မူခိၣ်လီၤ. အဝဲသ့ၣ်ခဲလၢာ် ဘၣ်တၢ်မၤဟးဂီၤကွံာ်အီၤ လၢဟီၣ်ခိၣ်ချၢလီၤ.+ ထဲဒၣ်စီၤနိအၤ ဒီးပှၤလၢအအိၣ်ဒီးအီၤ လၢကဘီပူၤန့ၣ်​ ပူၤဖျဲးဝဲလီၤ.+ ၂၄ ဒီးထံအိၣ်ဝဲအါအါဂီၢ်ဂီၢ်လၢ ဟီၣ်ခိၣ်ချၢ အသီ ၁၅၀ လီၤ.+

၈ ဘၣ်ဆၣ်​ ကစၢ်ယွၤနီၣ်ဘၣ်​ စီၤနိအၤ ဒီးဆၣ်ဖိကီၢ်ဖိအမံၤ ဒီးဆၣ်ဖိကီၢ်ဖိ အဒၢတဖၣ်​ လၢအအိၣ်ဒီးအီၤ လၢကဘီပူၤလီၤ.+ ဒီးကစၢ်ယွၤ ဒုးဟဲဝဲကလံၤ လၢဟီၣ်ခိၣ်ချၢ ဒီးထံစးထီၣ်​ လီၤသံးဝဲလီၤ. ၂ ထံယိာ် အထံထီၣ်ပၢၢ်တဖၣ်​ ဒီးမူခိၣ်အတြဲၤတဖၣ်န့ၣ်​ ဘၣ်တၢ်ကးတံာ်ဃာ်အီၤအဃိ မူခိၣ်တစူၤလၢၤဘၣ်.+ ၃ ဒီးထံလီၤသံးဝဲ ကယီကယီလၢ ဟီၣ်ခိၣ်ချၢလီၤ. ဒီးဖဲအသီ ၁၅၀ ဝံၤအလီၢ်ခံန့ၣ်​ ထံလီၤစှၤဝဲလီၤ. ၄ ဖဲလါနွံ လါတလါ, လါထီၣ်​ ၁၇ သီတသီန့ၣ်​ ကဘီပတုာ်ဝဲလၢ ကစၢၢ်အရၤရး အဖီခိၣ်လီၤ. ၅ ထံသ့ၣ်တဖၣ်​ လီၤစှၤဝဲကွ့ၢ်ကွ့ၢ် တုၤလီၤလၢ တဆံလါတလါန့ၣ်လီၤ. ဖဲတဆံလါတလါ အဆိကတၢၢ်တသီန့ၣ်​ ကစၢၢ်အခိၣ်စိၣ်​ ဟဲအိၣ်ဖျါထီၣ်ဝဲလီၤ.+

၆ ဖဲအသီ ၄၀ ဝံၤအလီၢ်ခံန့ၣ်​ စီၤနိအၤ အိးထီၣ်ဝဲ ကဘီအပဲတြီဖိလီၤ.+ ၇ ဒီးအဝဲပျၢ်ထီၣ်ဝဲ စိးဝၣ်ဃးလီၤ. ဒီးစိးဝၣ်ဃးန့ၣ်​ ဆဲးယူၤဝဲလၢတၢ်ချၢ ဒီးလဲၤဟဲက့ၤ လဲၤဟဲက့ၤ တုၤလၢထံလီၤသံးလၢ ဟီၣ်ခိၣ်ချၢ တစုန့ၣ်လီၤ.

၈ လၢခံအဝဲပျၢ်ထီၣ်ဝဲ ထိၣ်လွံၢ်ဒ်သိး ကသ့ၣ်ညါဝဲလၢ မ့ၢ်ထံလီၤသံးလၢ ဟီၣ်ခိၣ်ချၢလံဧါန့ၣ်လီၤ. ၉ ထိၣ်လွံၢ်န့ၣ်​ တထံၣ်ဝဲ တၢ်လီၢ်လၢ အကစီၢ်လီၤဝဲအဂီၢ်ဘၣ်. အဃိ ထိၣ်လွံၢ် ဟဲက့ၤကဒါက့ၤလၢ စီၤနိအၤအအိၣ်​ လၢကဘီပူၤ မ့ၢ်လၢ ထံန့ၣ်အိၣ်ဝဲလၢ ဟီၣ်ခိၣ်ချၢ ဒီဘ့ၣ်ဒံးအဃိလီၤ.+ အဃိ စီၤနိအၤ ယူာ်ဃီၤအစု ဒီးစိာ်နုာ်အီၤ လၢကဘီပူၤလီၤ. ၁၀ အဝဲ အိၣ်ခိးကဒီးဝဲ နွံသီ ဝံၤဒီးပျၢ်ထီၣ်ကဒီး ထိၣ်လွံၢ်လၢ ကဘီချၢလီၤ. ၁၁ ဖဲထိၣ်လွံၢ် ဟဲက့ၤလၢ ဟါလီၤခီ အဆၢကတီၢ်န့ၣ်​ အဝဲထံၣ်ဝဲလၢ ထိၣ်လွံၢ်အထးခိၣ်န့ၣ်​ အိၣ်ဝဲဒီး သ့ၣ်စၤယံး အလၣ်သံသိလီၤ. အဃိ စီၤနိအၤ သ့ၣ်ညါဝဲလၢ ထံလီၤစှၤဝဲလၢ ဟီၣ်ခိၣ်ချၢလံ.+ ၁၂ အဝဲ အိၣ်ခိးကဒီးဝဲ နွံသီလီၤ. ဒီးအဝဲပျၢ်ထီၣ်ကဒီး ထိၣ်လွံၢ် ဒီးထိၣ်လွံၢ်အံၤ တဟဲက့ၤလၢ အအိၣ်လၢၤဘၣ်.

၁၃ ဖဲစီၤနိအၤ အသးအိၣ်​ ၆၀၁ နံၣ်,+ လါအခီၣ်ထံးတလါ, လါထီၣ်အဆိကတၢၢ်တသီန့ၣ်​ ထံလီၤစှၤဝဲလၢ ဟီၣ်ခိၣ်ချၢ ဒိၣ်မးလံ. ဒီးစီၤနိအၤ ထုးထီၣ်ကွံာ် ကဘီအတၢ်ကျၢၢ်ဘၢတၢ် ဒီးထံၣ်ဝဲလၢ ဟီၣ်ခိၣ်အမဲာ်ဖံးခိၣ်န့ၣ်​ ဃ့ထီၣ်ဝဲ ကယီကယီလီၤ. ၁၄ ဖဲလါခံလါတလါ, လါထီၣ်​ ၂၇ သီတသီန့ၣ်​ ဟီၣ်ခိၣ်ဃ့ထီဝဲလီၤ.

၁၅ ကစၢ်ယွၤတဲဘၣ်​ စီၤနိအၤလၢ ၁၆ “နၤဒီးနမါ ဒီးနဖိခွါတဖၣ်​ ဒီးနဖိခွါတဖၣ်​ အမါန့ၣ်​ ဟးထီၣ်လၢ ကဘီပူၤတက့ၢ်.+ ၁၇ ဒီးဒုးဟးထီၣ်စ့ၢ်ကီး ကယဲၢ်တၢ်သးသမူ+ လၢအမ့ၢ် တၢ်သးသမူ လၢအယူၤဝဲ, ဆၣ်ဖိကီၢ်ဖိ အကလုာ်ကလုာ် ဒီးဆၣ်ဖိကီၢ်ဖိလၢ အဟူးအဂဲၤ လၢဟီၣ်ခိၣ်ချၢခဲလၢာ် ဒ်သိးကဖးထီၣ်ဝဲ ဒီးကအါထီၣ်ဝဲလၢ ဟီၣ်ခိၣ်ချၢ ဒီးကအိၣ်ဝဲ အါအါဂီၢ်ဂီၢ် လၢဟီၣ်ခိၣ်ချၢ န့ၣ်တက့ၢ်.”+

၁၈ ဒီးစီၤနိအၤ ဒီးအဖိခွါတဖၣ်+ ဒီးစီၤနိအၤအမါ ဒီးအဖိခွါတဖၣ်အမါစ့ၢ်ကီး ဟးထီၣ်ဝဲလီၤ. ၁၉ ကယဲၢ်တၢ်သးသမူ လၢအဟူးအဂဲၤ, ဆၣ်ဖိကီၢ်ဖိလၢ အဟူးအဂဲၤ လၢဟီၣ်ခိၣ်ချၢခဲလၢာ်, တၢ်သးသမူလၢ အယူၤဝဲခဲလၢာ် ဒီးတၢ်လၢ အဟူးအဂဲၤလၢ ဟီၣ်ခိၣ်ချၢခဲလၢာ်န့ၣ်​ ဟးထီၣ်ဝဲလၢ ကဘီအပူၤ ဒ်အကရူၢ်ဒၣ်ဝဲ အသိးလီၤ.+ ၂၀ စီၤနိအၤတ့ထီၣ်​ တၢ်လုၢ်လီၢ်လၢ+ ယဟိဝၤယွၤ အဂီၢ်လီၤ. အဝဲဟံးန့ၢ် ဆၣ်ဖိကီၢ်ဖိလၢ အကဆှီတနီၤ ဒီးထိၣ်လၢအကဆှီတနီၤ+ ဒီးလုၢ်ထီၣ်ဝဲဒ် တၢ်လုၢ်ဒွဲၣ်အူအသိး လၢတၢ်လုၢ်လီၢ် အဖီခိၣ်လီၤ.+ ၂၁ ဒီးယဟိဝၤယွၤ နၢဘၣ်​ တၢ်နၢမူ လၢအမၤမုာ်အသးအဃိ ယဟိဝၤယွၤ တဲလီၤအသးလၢ “ယတဆိၣ်အၢ ဟီၣ်ခိၣ်​ ခီဖျိလၢ ပှၤဟီၣ်ခိၣ်ဖိအဃိ နီတဘျီလၢၤဘၣ်.+ နီၢ်ကီၢ်န့ၣ်​ တၢ်အိၣ်လၢ ပှၤဟီၣ်ခိၣ်ဖိ အသးပူၤန့ၣ်​ မ့ၢ်တၢ်လၢ အအၢအသီ စးထီၣ်လၢ အမ့ၢ်ဖိသၣ်​ လံၤလံၤန့ၣ်လီၤ.+ ဒီးလၢခံန့ၣ်​ ယတမၤဟးဂီၤကွံာ် တၢ်လၢအမူဝဲ ကိးမံၤဒဲး ဒ်ယမၤတ့ၢ်အသိး နီတဘျီလၢၤဘၣ်.+ ၂၂ စးထီၣ်ခဲအံၤ ဖှံတၢ်အကတီၢ် ဒီးကူးတၢ်အကတီၢ်, တၢ်ဂိၢ်ဒီးတၢ်ကိၢ်, တၢ်ကိၢ်ခါ ဒီးတၢ်ဂိၢ်ခါ, မုၢ်ဆါဒီးမုၢ်နၤ ကအိၣ်ဝဲလၢ ဟီၣ်ခိၣ်ချၢ ထီဘိလီၤ.”+

၉ ဒီးကစၢ်ယွၤဆိၣ်ဂ့ၤ စီၤနိအၤ ဒီးအဖိခွါတဖၣ်​ ဒီးတဲအဝဲသ့ၣ်လၢ “မ်သုသၣ်ထီၣ်​ ဒီးအါထီၣ်ဂီၢ်ထီၣ်​ ဒီးမၤပှဲၤထီၣ်​ ဟီၣ်ခိၣ်တက့ၢ်.+ ၂ ဒီးတၢ်သးသမူ ခဲလၢာ်လၢ ဟီၣ်ခိၣ်ချၢ, တၢ်သးသမူခဲလၢာ်လၢ အယူၤဝဲလၢမူခိၣ်, တၢ်ခဲလၢာ်လၢ အဟူးအဂဲၤ လၢဟီၣ်ခိၣ်လိၤ ဒီးညၣ်ခဲလၢာ် လၢပီၣ်လဲၣ်ပူၤန့ၣ်​ ကပျံၤသုဒံးလီၤ. ဒီးတၢ်ဟ့ၣ်လီၤ တၢ်သ့ၣ်တဖၣ်န့ၣ်​ လၢသုစုပူၤလံ.+ ၃ ကယဲၢ်ဆၣ်ဖိကီၢ်ဖိ လၢအဟူးအဂဲၤ လၢအမူဝဲန့ၣ်​ သုအီၣ်အီၤသ့လီၤ.+ ယဟ့ၣ်လီၤသုလၢ အဝဲသ့ၣ်ခဲလၢာ် ဒ်ယဟ့ၣ်လီၤသု တၢ်မုၢ်တၢ်ဘိ အလါဟ့တဖၣ်​ အသိးလီၤ.+ ၄ ထဲဒၣ်​ တၢ်ဖံးတၢ်ညၣ်​ လၢအအိၣ်ဒံးဒီးအသွံၣ်+ လၢအမ့ၢ် အသးသမူန့ၣ်​ သုတဘၣ်အီၣ်အီၤတဂ့ၤ.+ ၅ တကးဒံးဘၣ်​ ယကဃ့က့ၤ တၢ်အပှ့ၤလၢ သုသွံၣ်လၢအမ့ၢ် သုသးသမူ အဂီၢ်လီၤ. ဆၣ်ဖိကီၢ်ဖိ မ့ၢ်လူလီၤ သုသွံၣ်န့ၣ်​ အကဘၣ်​ သံဝဲလီၤ. ဒီးပှၤတဂၤစုာ်စုာ်လၢ အဟံးန့ၢ် အဒီပုၢ်ဝဲၢ် အသးသမူန့ၣ်​ ယကဃ့က့ၤ တၢ်အပှ့ၤလၢ အအိၣ်လီၤ.+ ၆ ကစၢ်ယွၤတ့လီၤ ပှၤဟီၣ်ခိၣ်ဖိ ဒ်အက့ၢ်အဂီၤ အသိးအဃိ+ ပှၤတဂၤ မ့ၢ်မၤသံဘၣ်​ ပှၤတဂၤဂၤန့ၣ်* ပှၤကမၤသံက့ၤအီၤလီၤ.+ ၇ မ့မ့ၢ် သုဝဲသ့ၣ်တဖၣ်အံၤန့ၣ်​ သၣ်ထီၣ်ဒီး အါထီၣ်ဂီၢ်ထီၣ်​ ဒီးမၤအါထီၣ်​ သုဖိသုလံၤလၢ ဟီၣ်ခိၣ်ချၢ အါအါဂီၢ်ဂီၢ်တက့ၢ်.”+

၈ ဒီးကစၢ်ယွၤ တဲဘၣ်စီၤနိအၤ ဒီးအဖိခွါတဖၣ်လၢ ၉ “ယမၤ တၢ်အၢၣ်လီၤအီလီၤဒီးသု+ ဒီးသုစၢၤသုသွဲၣ်တဖၣ်​ ၁၀ ဒီးတၢ်သးသမူ ခဲလၢာ်လၢ အအိၣ်ဒီးသု လၢအမ့ၢ် ထိၣ်တဖၣ်, ဆၣ်ဖိကီၢ်ဖိတဖၣ်​ ဒီးတၢ်သးသမူ ခဲလၢာ်လၢအအိၣ်ဒီးသုလၢ ဟီၣ်ခိၣ်ချၢလီၤ. ယမၤတၢ်အၢၣ်လီၤအီလီၤအံၤဒီး ကယဲၢ်တၢ်သးသမူ ခဲလၢာ်လၢ အဟးထီၣ်လၢ ကဘီပူၤလီၤ.+ ၁၁ မ့ၢ်လံ, ယမၤ တၢ်အၢၣ်လီၤအီလီၤဒီးသုလၢ တၢ်သးသမူ ခဲလၢာ်န့ၣ်​ တဘၣ်တၢ်မၤဟးဂီၤကွံာ်အီၤ လၢထံလုၢ်ဘၢတၢ်အဃိ နီတဘျီလၢၤဘၣ်. ဒီးယတမၤဟးဂီၤ ဟီၣ်ခိၣ်လၢ ထံလုၢ်ဘၢတၢ် နီတဘျီလၢၤဘၣ်.”+

၁၂ ဒီးကစၢ်ယွၤ ဆဲးတဲဝဲလၢ “ယမၤတၢ်အၢၣ်လီၤအီလီၤဒီးသု ဒီးတၢ်သးသမူခဲလၢာ် လၢအိၣ်ဒီးသုလီၤ. ယတၢ်အၢၣ်လီၤအီလီၤအံၤ ကအိၣ်ဂၢၢ်ဆိးကျၢၤ အစိၤစိၤအဃၣ်ဃၣ်​ ဒီးတၢ်အၢၣ်လီၤအီလီၤအံၤ အတၢ်ပနီၣ်​ မ့ၢ်ဒ်အံၤလီၤ. ၁၃ ယပာ်လီၤ တၢၢ်ကွဲၤလၢ တၢ်အၢၣ်ကျါ ဒ်သိးအကကဲထီၣ်​ တၢ်ပနီၣ်လၢ အဘၣ်ဃးဒီး ယတၢ်အၢၣ်လီၤအီလီၤ လၢယၤဒီး ဟီၣ်ခိၣ်အဘၢၣ်စၢၤလီၤ. ၁၄ ဖဲယဒုးဟဲထီၣ်​ တၢ်အၢၣ်လၢ တၢ်ဖးဖီအခါ တၢၢ်ကွဲၤ ကအိၣ်ဖျါထီၣ်ဝဲလၢ တၢ်အၢၣ်ကျါ သပှၢ်ကတၢၢ်လီၤ. ၁၅ ဒီးဖဲန့ၣ်​ ယကသ့ၣ်နီၣ်ထီၣ်က့ၤ ယတၢ်အၢၣ်လီၤအီလီၤ လၢယၤဒီးသု ဒီးတၢ်သးသမူ ကိးကလုာ်ဒဲး အဘၢၣ်စၢၤလီၤ. ဒီးတၢ်သးသမူခဲလၢာ်န့ၣ်​ တဘၣ်တၢ်မၤဟးဂီၤကွံာ်အီၤလၢ ထံလုၢ်ဘၢတၢ်အဃိ နီတဘျီလၢၤဘၣ်.+ ၁၆ ဒီးတၢၢ်ကွဲၤ ကအိၣ်ဖျါထီၣ်လၢ တၢ်အၢၣ်ကျါ ဒီးယကထံၣ်အီၤ သပှၢ်ကတၢၢ် ဒီးယကနီၣ်ဘၣ်​ တၢ်အၢၣ်လီၤအီလီၤ အထူအယိာ် လၢအအိၣ်လၢ ယၤဒီး တၢ်သးသမူ ကိးကလုာ်ဒဲး လၢဟီၣ်ခိၣ်ချၢ အဘၢၣ်စၢၤန့ၣ်လီၤ.”

၁၇ ကစၢ်ယွၤ က့ၤတဲကဒီး စီၤနိအၤလၢ “တၢ်အဝဲန့ၣ်​ မ့ၢ်တၢ်ပနီၣ်တခါလၢ အပာ်ဖျါထီၣ်လၢ ယဒုးအိၣ်ထီၣ်​ တၢ်အၢၣ်လီၤအီလီၤလၢ ယၤဒီး တၢ်သးသမူခဲလၢာ်လၢ ဟီၣ်ခိၣ်ချၢအဘၢၣ်စၢၤလီၤ.”+

၁၈ စီၤနိအၤ အဖိခွါတဖၣ်​ လၢအဟးထီၣ်လၢ ကဘီပူၤန့ၣ်​ မ့ၢ်ဝဲ စီၤၡ့ၣ်, စီၤဃၣ်​ ဒီးစီၤယ့ဖ့းသးလီၤ.+ လၢခံ စီၤဃၣ်န့ၣ်​ ထီၣ်ဖိဝဲ စီၤကနၤဧၣ်လီၤ.+ ၁၉ အဝဲသ့ၣ်​ သၢဂၤန့ၣ်​ မ့ၢ်ဝဲ စီၤနိအၤအဖိခွါ ဒီးပှၤဟီၣ်ခိၣ်ဖိခဲလၢာ် လၢအရၤလီၤအသး လၢဟီၣ်ခိၣ်ချၢန့ၣ်​ ဟဲလီၤစၢၤလီၤသွဲၣ်လၢ အဝဲသ့ၣ်လီၤ.+

၂၀ စီၤနိအၤ မ့ၢ်ပှၤမၤစံာ်ဖိ ဒီးသူၣ်လီၤဝဲ စပံးတကျီးလီၤ. ၂၁ ဘၣ်တနံၤ ဖဲအဝဲအီ စပံးထံအခါ အမူၤဝဲ ဒီးဘ့ၣ်လီၤကွံာ် အတၢ်ကူတၢ်ကၤ လၢအဒဲပူၤန့ၣ်လီၤ. ၂၂ ဒီးစီၤကနၤဧၣ်အပၢ် စီၤဃၣ်န့ၣ်​ ထံၣ်ဝဲလၢ အပၢ်အိၣ်ဘ့ၣ်ဆ့အဃိ တဲဘၣ်ဝဲ အဒီပုၢ်ဝဲၢ်ခွါခံဂၤ လၢအအိၣ်လၢ တၢ်ချၢန့ၣ်လီၤ. ၂၃ အဃိ စီၤၡ့ၣ်ဒီး စီၤယ့ဖ့းသး ဟံးန့ၢ်ဆ့ကၤ ဖးထီတဘ့ၣ်​ ဒီးပာ်ထီၣ်ဝဲလၢ အဝဲသ့ၣ်​ အဖံဘၣ်ခိၣ်​ ဒီးအဝဲသ့ၣ်ဟးလၢ အချၢဃံတကပၤ ဒီးနုာ်လီၤဝဲလၢ ဒဲပူၤလီၤ. ဒီးဖဲအဝဲသ့ၣ်​ ဃၣ်ကွံာ်အမဲာ်အခါ အဝဲသ့ၣ်​ မၤဘၢဝဲအပၢ် အဃိ တထံၣ်ဘၣ်​ အပၢ်အိၣ်ဘ့ၣ်ဆ့ဘၣ်.

၂၄ ဖဲစီၤနိအၤ မံပၢၢ်ထီၣ်အခါ အတမူၤစပံးထံလၢၤဘၣ်ဒီး အသ့ၣ်ညါထီၣ်ဝဲတၢ်လၢ အဖိသဒါ မၤအီၤန့ၣ်လီၤ. ၂၅ ဒီးစီၤနိအၤ တဲဝဲလၢ

“မ်စီၤကနၤဧၣ်​ ဘၣ်တၢ်ဆိၣ်အၢတက့ၢ်.+

ဒီးမ်အကဲထီၣ်​ အဒီပုၢ်ဝဲၢ်ခွါတဖၣ်​ အကုၢ်လၢ အပတီၢ်ဖုၣ်ကတၢၢ် န့ၣ်တက့ၢ်.”+

၂၆ ဒီးစီၤနိအၤ ဆဲးတဲဝဲလၢ

“မ်ယဟိဝၤယွၤ လၢအမ့ၢ် စီၤၡ့ၣ်​ အကစၢ်ယွၤန့ၣ်​ ဘၣ်တၢ် စံးထီၣ်ပတြၢၤအီၤတက့ၢ်.

ဒီးမ်စီၤကနၤဧၣ်​ ကဲထီၣ်စီၤၡ့ၣ်​ အကုၢ်တက့ၢ်.+

၂၇ မ်ကစၢ်ယွၤ ဟ့ၣ်လီၤ စီၤယ့ဖ့းသး အတၢ်လီၢ်ဖးလဲၢ်တက့ၢ်.

မ်အဝဲအိၣ်ဝဲဆိးဝဲလၢ စီၤၡ့ၣ်​ အဒဲတဖၣ်အပူၤတက့ၢ်.

ဒီးမ်စီၤကနၤဧၣ်​ ကဲထီၣ်စ့ၢ်ကီး စီၤယ့ဖ့းသး အကုၢ်တက့ၢ်.”

၂၈ ဒီးထံလုၢ်ဘၢတၢ် ဝံၤအလီၢ်ခံန့ၣ်​ စီၤနိအၤ ဆဲးအိၣ်မူဒံးဝဲ အနံၣ်​ ၃၅၀ လီၤ.+ ၂၉ အဃိ စီၤနိအၤအနံၣ်​ ခဲလၢာ်ခဲဆ့ အိၣ်ဝဲ ၉၅၀ ဒီးသံဝဲလီၤ.

၁၀ အအံၤမ့ၢ် တၢ်ကွဲးနီၣ်ဃာ်လၢ အဘၣ်ဃးဒီး စီၤနိအၤ အဖိခွါတဖၣ်​ လၢအမ့ၢ် စီၤၡ့ၣ်,+ စီၤဃၣ်​ ဒီးစီၤယ့ဖ့းသးလီၤ.

ဖဲထံလုၢ်ဘၢတၢ် ဝံၤအလီၢ်ခံန့ၣ်​ အဝဲသ့ၣ်​ ထီၣ်ဖိဝဲ အဖိခွါတဖၣ်လီၤ.+ ၂ စီၤယ့ဖ့းသး အဖိခွါတဖၣ်န့ၣ်​ မ့ၢ်ဝဲ စီၤကိမၢၤ,+ စီၤမါကူး,+ စီၤမၤဒဲၤ, စီၤယၤဝၣ်, စီၤတူၤဘလး,+ စီၤမ့ၤၡ့း+ ဒီးစီၤတံရ့းလီၤ.+

၃ စီၤကိမၢၤ အဖိခွါတဖၣ်​ မ့ၢ်ဝဲ စီၤအၤၡကံနး,+ စီၤရံဖသး ဒီးစီၤတိကးရမၤလီၤ.+

၄ စီၤယၤဝၣ်​ အဖိခွါတဖၣ်​ မ့ၢ်ဝဲ စီၤအလံၡၤ,+ စီၤတၢ်ၡံၣ်,+ စီၤကံတံၣ်+ ဒီးစီၤဒိဒၤနံၣ်လီၤ.

၅ ပှၤလၢ အလဲၤအိၣ်လဲၤဆိးဝဲ လၢကီးတဖၣ်အပူၤန့ၣ်​ ဟဲလီၤစၢၤလီၤသွဲၣ်ဝဲလၢ ပှၤတဖၣ်အံၤအအိၣ်​ ဒီးအဝဲသ့ၣ်​ ရၤလီၤအသးလၢ အနီၢ်ကစၢ် အတၢ်လီၢ်တဖၣ်အပူၤ ဒ်အကျိာ်, အဒူၣ်ဖိထၢဖိ ဒီးအကလုာ် အိၣ်ဝဲအသိးလီၤ.

၆ စီၤဃၣ်​ အဖိခွါတဖၣ်​ မ့ၢ်ဝဲ စီၤကူၤၡး, စီၤမံးစရၤယံၣ်,+ စီၤပူၤတၤ+ ဒီးစီၤကနၤဧၣ်လီၤ.+

၇ စီၤကူၤၡး အဖိခွါတဖၣ်​ မ့ၢ်ဝဲ စီၤစဘၤ,+ စီၤဃဝံၤလၤ, စီၤစၤဘတၤ, စီၤရၤဧမၤ+ ဒီးစီၤစၤဘတံကၤလီၤ.

စီၤရၤဧမၤ အဖိခွါတဖၣ်​ မ့ၢ်ဝဲ စီၤၡဘၤ ဒီးစီၤဒဒၣ်လီၤ.

၈ စီၤကူၤၡး အဖိခွါ မ့ၢ်ဝဲ စီၤနံးမရိးလီၤ. စီၤနံးမရိး ကဲထီၣ်​ ပှၤဒူပှၤဃိၤ အဆိကတၢၢ်တဂၤ လၢဟီၣ်ခိၣ်ချၢလီၤ. ၉ အဝဲကဲထီၣ်​ ပှၤခးတၢ်ဖိ ဖးဒိၣ်တဂၤလၢ အထီဒါ ယဟိဝၤယွၤန့ၣ်လီၤ. လၢတၢ်န့ၣ်အဃိ ပှၤအိၣ်ဝဲတနီၤလၢ အတဲပှၤဂၤလၢ တၢ်ကတိၤတထံၣ်​ လၢအမ့ၢ် “နလီၤဂာ်ဒီး စီၤနံးမရိး လၢအမ့ၢ် ပှၤခးတၢ်ဖိဖးဒိၣ်​ တဂၤလၢ အထီဒါ ယဟိဝၤယွၤ” န့ၣ်လီၤ. ၁၀ ဝ့ၢ်အဆိကတၢၢ်တဖၣ်​ လၢစီၤနံးမရိး အဘီအမုၢ်ပူၤန့ၣ်​ မ့ၢ်ဝဲ ဝ့ၢ်ဘၤဘ့းလး,+ ဝ့ၢ်အ့ရ့း,+ ဝ့ၢ်အးကး ဒီးဝ့ၢ်ကၤလန့ၤလီၤ. ဒီးဝ့ၢ်တဖၣ်အံၤ အိၣ်ဝဲလၢ ကီၢ်ၡံနၢ်အပူၤလီၤ.+ ၁၁ ဒီးစီၤနံးမရိးန့ၣ်​ ဟးထီၣ်လၢ တၢ်လီၢ်အဝဲန့ၣ်​ ဒီးလဲၤဝဲဆူ ကီၢ်အၤၡူၢ်+ ဒီးသူၣ်ထီၣ်ဝဲ ဝ့ၢ်နံၤနဝ့,+ ဝ့ၢ်ရဃိဘိးယး, ဝ့ၢ်ကါလး ၁၂ ဒီးဝ့ၢ်ရ့စ့ၣ်လီၤ. ဒီးဝ့ၢ်ရ့စ့ၣ်န့ၣ်​ အိၣ်ဝဲလၢ ဝ့ၢ်နံၤနဝ့ ဒီးဝ့ၢ်ကါလး အဘၢၣ်စၢၤလီၤ. ဒီးဝ့ၢ်သ့ၣ်တဖၣ်အံၤန့ၣ်​ ပာ်ဖှိၣ်ထီၣ်အသး ဒီးကဲထီၣ်ဝဲ ဝ့ၢ်ဖးဒိၣ်တဖျၢၣ်လီၤ.

၁၃ စီၤမံးစရၤယံၣ်​ အဖိခွါတဖၣ်​ မ့ၢ်ဝဲ စီၤလူဒံၣ်,+ စီၤဧနၤမံၣ်, စီၤလဟါဘံၣ်, စီၤနၤဖထူဃံၣ်,+ ၁၄ စီၤပသြူစံၣ်,+ စီၤကၤစလူဃံၣ်​ (ပှၤဖလ့ၡသးဖိ+ ဟဲလီၤစၢၤလၢအီၤ) ဒီးစီၤကၤဖတိၢ်လီၤ.+

၁၅ ဒီးစီၤကနၤဧၣ်​ အဖိခွါဝဲၢ်ကိ မ့ၢ်ဝဲ စီၤစံဒိၣ်+ ဒီးအဖိခွါ လၢအဂၤတဂၤ မ့ၢ်ဝဲ စီၤဃ့သးလီၤ.+ ၁၆ ဒီးစီၤကနၤဧၣ်​ ကဲထီၣ်ဝဲ ဖုဖးဒိၣ်လၢ ပှၤယဘူၣ်ဖိ,+ ပှၤအမိၢ်ဖိ,+ ပှၤကံၢ်ကၣ်ဖိ, ၁၇ ပှၤဃံၤဝံဖိ,+ ပှၤဧၤရကၤဖိ, ပှၤစံၣ်ဖိ, ၁၈ ပှၤအၢ်ဝးဖိ,+ ပှၤစမၢ်ဖိ ဒီးပှၤဃမါသးဖိ+ အဂီၢ်လီၤ. လၢခံန့ၣ်​ ပှၤကနၤဧၣ်​ အဒူၣ်ဖိထၢဖိတဖၣ်​ လီၤပြံလီၤပြါဝဲလီၤ. ၁၉ အဃိ ပှၤကနၤဧၣ်ဖိ အကီၢ်ဆၢ စးထီၣ်လၢ ဝ့ၢ်စံဒိၣ်​ တုၤလၢ ဝ့ၢ်ကရၢ်+ လၢအအိၣ်ဘူးဒီး ဝ့ၢ်ဂါစၤ+ ပၢၢ်တုၤလၢ ဝ့ၢ်စဒိၣ်, ဝ့ၢ်ဂမိရၤ,+ ဝ့ၢ်အၤဒမၤ ဒီးစဘိအံၣ်လီၤ.+ ဝ့ၢ်သ့ၣ်တဖၣ်အံၤ အိၣ်ဘူးဒီး ဝ့ၢ်လါၡၤလီၤ. ၂၀ ပှၤသ့ၣ်တဖၣ်အံၤ မ့ၢ်စီၤဃၣ်​ အဖိအလံၤတဖၣ်​ ဒီးတၢ်ရဲၣ်လီၤအီၤ ဒ်အဒူၣ်ဖိထၢဖိ, အကျိာ်, အထံအကီၢ် ဒီးအကလုာ် အိၣ်ဝဲအသိးလီၤ.

၂၁ ပှၤဝဲၢ်ကိ စီၤယ့ဖ့းသး အပုၢ်စီၤၡ့ၣ်​ လၢအမ့ၢ် ပှၤဧၤဘ့ၢ်ဖိတဖၣ်+ အဖုဖးဒိၣ်န့ၣ်​ ထီၣ်ဖိဝဲ အဖိတဖၣ်လီၤ. ၂၂ စီၤၡ့ၣ်အဖိခွါတဖၣ်​ မ့ၢ်ဝဲ စီၤဧ့ၤလၣ်,+ စီၤအၤၡူၢ်,+ စီၤအၢ်ဖးၡး,+ စီၤလူး ဒီးစီၤအရၣ်လီၤ.+

၂၃ စီၤအရၣ်​ အဖိခွါတဖၣ်​ မ့ၢ်ဝဲ စီၤဧူစး, စီၤဃူလး, စီၤက့သၢ် ဒီးစီၤမၤစးလီၤ.

၂၄ စီၤအၢ်ဖးၡး အဖိခွါမ့ၢ်ဝဲ စီၤစ့ၤလါ+ ဒီးစီၤစ့ၤလါ အဖိခွါမ့ၢ်ဝဲ စီၤဧၤဘ့ၢ်လီၤ.

၂၅ စီၤဧၤဘ့ၢ်န့ၣ်​ အဖိခွါ အိၣ်ဝဲခံဂၤလီၤ. အဖိခွါတဂၤန့ၣ်​ အမံၤမ့ၢ်ဝဲ စီၤပ့ၤလ့း*+ မ့ၢ်လၢ အအိၣ်မူဘၣ်ဖဲ တၢ်လီၤမုၢ်လီၤဖး အိၣ်ထီၣ်လၢ ဟီၣ်ခိၣ်ချၢအဆၢကတီၢ် အဃိန့ၣ်လီၤ. ဒီးစီၤပ့ၤလ့း အဒီပုၢ်ဝဲၢ်ခွါ မ့ၢ်ဝဲ စီၤယးကတၣ်လီၤ.+

၂၆ စီၤယးကတၣ်​ အဖိခွါတဖၣ်​ မ့ၢ်ဝဲ စီၤအၤလမိဒး, စီၤၡ့လဖး, စီၤဃၤစရမၤဝ့း ဒီးစီၤယၤရၢ်,+ ၂၇ စီၤဟဒိၣ်ရၣ်, စီၤအူစလး, စီၤဒံးကလး, ၂၈ စီၤဧူဘလး, စီၤအဘံမအ့လး, စီၤၡဘၤ, ၂၉ စီၤအိဖ့ၢ်,+ စီၤဃဝံၤလၤ ဒီးစီၤယိၤဘာ်လီၤ. အဝဲသ့ၣ်​ ခဲလၢာ်န့ၣ်​ မ့ၢ်ဝဲ စီၤယးကတၣ်​ အဖိခွါတဖၣ်လီၤ.

၃၀ ဒီးအဝဲသ့ၣ်​ အတၢ်အိၣ်တၢ်ဆိး အလီၢ်န့ၣ်​ အိၣ်လၢ ကစၢၢ်ကလိတဖၣ်အကျါလၢ မုၢ်ထီၣ်တခီ စးထီၣ်လၢ မ့ၡၤ တုၤလီၤလၢ စဖၢ်လီၤ.

၃၁ ပှၤတဖၣ်အံၤ မ့ၢ်စီၤၡ့ၣ်​ အဖိအလံၤတဖၣ်​ လၢအအိၣ်လၢ အနီၢ်ကစၢ်အကီၢ်တဖၣ်အပူၤ ဒ်အဒူၣ်ဖိထၢဖိ, အကျိာ် ဒီးအကလုာ် အိၣ်ဝဲအသိးန့ၣ်လီၤ.+

၃၂ အဝဲသ့ၣ်တဖၣ်န့ၣ်​ မ့ၢ်စီၤနိအၤ အဖိအလံၤအဒူၣ်ဖိထၢဖိတဖၣ်ဒီး တၢ်ရဲၣ်လီၤအီၤ ဒ်အဒူၣ်ဖိထၢဖိ ဒီးအကလုာ် အိၣ်ဝဲအသိးလီၤ. ပှၤကလုာ်တဖၣ်​ လၢအရၤလီၤအသးလၢ ဟီၣ်ခိၣ်ချၢ ဖဲထံလုၢ်ဘၢတၢ် ဝံၤအလီၢ်ခံန့ၣ်​ ဟဲလီၤစၢၤလီၤသွဲၣ်​ လၢဒူၣ်ဖိထၢဖိတဖၣ်အံၤလီၤ.+

၁၁ ဒီးပှၤဟီၣ်ခိၣ်ဖိခဲလၢာ်* တဲကျိာ်တခါဃီ ဒီးသူတၢ်ကတိၤ ဒ်သိးသိးလီၤ. ၂ ဖဲအဝဲသ့ၣ်​ လဲၤတၢ်လၢ မုၢ်ထီၣ်တခီအခါ ထံၣ်ဝဲတၢ်ပၢၤခိၣ်​ လၢအအိၣ်လၢ ကီၢ်ၡံနၢ်အပူၤ+ ဒီးအဝဲသ့ၣ်​ အိၣ်ဝဲဆိးဝဲ ဖဲန့ၣ်လီၤ. ၃ ဒီးအဝဲသ့ၣ်​ တဲလိာ်အသး တဂၤဒီးတဂၤလၢ “ဟဲသၢၤ, ပကတ့ထီၣ်အူးခဲ ဒီးကုၢ်ကိၤထီၣ်အီၤလီၤ.” လၢလၢၢ်အလီၢ်န့ၣ်​ အဝဲသ့ၣ်သူဝဲ အူးခဲ ဒီးလၢဘံလၣ်မၠ့ၤ အလီၢ်န့ၣ်​ သူဝဲကျဲတံးန့ၣ်လီၤ. ၄ ဒီးအဝဲသ့ၣ်​ တဲဝဲလၢ “ဟဲသၢၤ, မ်ပသူၣ်ထီၣ်သကိး ဝ့ၢ်တဝ့ၢ် လၢပဂီၢ် ဒီးတၢးထီတဖျၢၣ်​ လၢအခိၣ်တုၤလၢ မူခိၣ်​ ဒ်သိးပမံၤကဟူသၣ်ကဖျါ ဒီးဒ်သိး ပသုတလီၤပြံလီၤပြါ လၢဟီၣ်ခိၣ်​ ဒီဘ့ၣ်ညါ တဂ့ၤအဂီၢ် န့ၣ်တက့ၢ်.”+

၅ ဒီးယဟိဝၤယွၤ ဟဲလီၤကွၢ်ဝ့ၢ် ဒီးတၢးထီတဖျၢၣ်လၢ ပှၤဟီၣ်ခိၣ်ဖိတဖၣ်​ တ့ထီၣ်ဝဲလီၤ. ၆ ဒီးယဟိဝၤယွၤ တဲဝဲလၢ “အဝဲသ့ၣ်​ မ့ၢ်ပှၤတဖုဃီ လၢအတဲကျိာ်တကျိာ်ဃီ+ ဒီးအဝဲသ့ၣ်​ စးထီၣ်မၤ တၢ်မနုၤလဲၣ်န့ၣ်​ ကွၢ်တက့ၢ်. ခဲအံၤ တၢ်လၢအဝဲသ့ၣ်​ ဆိကမိၣ်ထီၣ်​ တမံၤဂ့ၤတမံၤဂ့ၤန့ၣ် အဝဲသ့ၣ်​ မၤဝဲကန့ၢ် ခဲလၢာ်လီၤ. ၇ အဃိ ဟဲသၢၤ, ပ+ ကလဲၤလီၤဖဲန့ၣ်​ ဒီးမၤဘံဘူ အဝဲသ့ၣ်​ အကျိာ် ဒ်သိးအဝဲသ့ၣ်​ သုတနၢ်ပၢၢ်လိာ်သး အကျိာ်တဂၤဒီးတဂၤ တဂ့ၤအဂီၢ်လီၤ.” ၈ အဃိ ယဟိဝၤယွၤ မၤလီၤပြံလီၤပြါ အဝဲသ့ၣ်​ လၢဟီၣ်ခိၣ်ဒီတဘ့ၣ်+ ဒီးအဝဲသ့ၣ်​ တသူၣ်ထီၣ်ဝ့ၢ်အံၤလၢၤဘၣ်. ၉ မ့ၢ်လၢ ယဟိဝၤယွၤ မၤဘံဘူဝဲ ပှၤခဲလၢာ်* အကျိာ်ဖဲန့ၣ်​ ဒီးယဟိဝၤယွၤ မၤလီၤပြံလီၤပြါ အဝဲသ့ၣ်​ လၢဟီၣ်ခိၣ်ဒီဘ့ၣ်အဃိ ဝ့ၢ်အံၤ ဘၣ်တၢ်ကိးအီၤလၢ ဘၤဘ့းလးလီၤ.*+

၁၀ အအံၤမ့ၢ် တၢ်ကွဲးနီၣ်ဃာ်လၢ အဘၣ်ဃးဒီး စီၤၡ့ၣ်လီၤ.+

ဖဲထံလုၢ်ဘၢတၢ် ဝံၤအလီၢ်ခံ ခံနံၣ်န့ၣ်​ စီၤၡ့ၣ်အသးအိၣ်​ အနံၣ်​ ၁၀၀ ဒီးဖဲန့ၣ်အခါ အဝဲထီၣ်ဖိဝဲ စီၤအၢ်ဖးၡးလီၤ.+ ၁၁ ဖဲစီၤၡ့ၣ်​ ထီၣ်ဖိဝဲ စီၤအၢ်ဖးၡး ဝံၤအလီၢ်ခံ ဆဲးအိၣ်မူဝဲ အနံၣ်​ ၅၀၀ လီၤ. ဒီးအဝဲထီၣ်ဖိ အဖိမုၣ်ဖိခွါတဖၣ်လီၤ.+

၁၂ ဖဲစီၤအၢ်ဖးၡး အိၣ်ဝဲ ၃၅ နံၣ်အခါ ထီၣ်ဖိဝဲ စီၤစ့ၤလါလီၤ.+ ၁၃ ဖဲစီၤအၢ်ဖးၡး ထီၣ်ဖိဝဲ စီၤစ့ၤလါ ဝံၤအလီၢ်ခံ ဆဲးအိၣ်မူဝဲ ၄၀၃ နံၣ်လီၤ. ဒီးအဝဲထီၣ်ဖိ အဖိမုၣ်ဖိခွါတဖၣ်လီၤ.

၁၄ ဖဲစီၤစ့ၤလါ အိၣ်ဝဲ အနံၣ်​ ၃၀ အခါ ထီၣ်ဖိဝဲ စီၤဧၤဘ့ၢ်လီၤ.+ ၁၅ ဖဲစီၤစ့ၤလါ ထီၣ်ဖိဝဲ စီၤဧၤဘ့ၢ် ဝံၤအလီၢ်ခံ ဆဲးအိၣ်မူဝဲ ၄၀၃ နံၣ်လီၤ. ဒီးအဝဲထီၣ်ဖိ အဖိမုၣ်ဖိခွါတဖၣ်လီၤ.

၁၆ ဖဲစီၤဧၤဘ့ၢ် အိၣ်ဝဲ ၃၄ နံၣ်အခါ ထီၣ်ဖိဝဲ စီၤပ့ၤလ့းလီၤ.+ ၁၇ ဖဲစီၤဧၤဘ့ၢ် ထီၣ်ဖိဝဲ စီၤပ့ၤလ့း ဝံၤအလီၢ်ခံ ဆဲးအိၣ်မူဝဲ အနံၣ်​ ၄၃၀ လီၤ. ဒီးအဝဲထီၣ်ဖိ အဖိမုၣ်ဖိခွါတဖၣ်လီၤ.

၁၈ ဖဲစီၤပ့ၤလ့း အိၣ်ဝဲ အနံၣ်​ ၃၀ အခါ ထီၣ်ဖိဝဲ စီၤရူၤလီၤ.+ ၁၉ ဖဲစီၤပ့ၤလ့း ထီၣ်ဖိဝဲ စီၤရူၤ ဝံၤအလီၢ်ခံ ဆဲးအိၣ်မူဝဲ ၂၀၉ နံၣ်လီၤ. ဒီးအဝဲထီၣ်ဖိ အဖိမုၣ်ဖိခွါတဖၣ်လီၤ.

၂၀ ဖဲစီၤရူၤ အိၣ်ဝဲ ၃၂ နံၣ်အခါ ထီၣ်ဖိဝဲ စီၤစၤရူာ်လီၤ. ၂၁ ဖဲစီၤရူၤ ထီၣ်ဖိဝဲ စီၤစၤရူာ် ဝံၤအလီၢ်ခံ ဆဲးအိၣ်မူဝဲ ၂၀၇ နံၣ်လီၤ. ဒီးအဝဲထီၣ်ဖိ အဖိမုၣ်ဖိခွါတဖၣ်လီၤ.

၂၂ ဖဲစီၤစၤရူာ် အိၣ်ဝဲ အနံၣ်​ ၃၀ အခါ ထီၣ်ဖိဝဲ စီၤနၤဃိၢ်လီၤ. ၂၃ ဖဲစီၤစၤရူာ် ထီၣ်ဖိဝဲ စီၤနၤဃိၢ် ဝံၤအလီၢ်ခံ ဆဲးအိၣ်မူဝဲ အနံၣ်​ ၂၀၀ လီၤ. ဒီးအဝဲထီၣ်ဖိ အဖိမုၣ်ဖိခွါတဖၣ်လီၤ.

၂၄ ဖဲစီၤနၤဃိၢ် အိၣ်ဝဲ ၂၉ နံၣ်အခါ ထီၣ်ဖိဝဲ စီၤတ့ရၤလီၤ.+ ၂၅ ဖဲစီၤနၤဃိၢ် ထီၣ်ဖိဝဲ စီၤတ့ရၤ ဝံၤအလီၢ်ခံ ဆဲးအိၣ်မူဝဲ ၁၁၉ နံၣ်လီၤ. ဒီးအဝဲထီၣ်ဖိ အဖိမုၣ်ဖိခွါတဖၣ်လီၤ.

၂၆ စီၤတ့ရၤ အိၣ်ဝဲ အနံၣ်​ ၇၀ ဝံၤဒီး အဝဲထီၣ်ဖိ အဖိခွါတဖၣ်လီၤ. ဒီးအဖိခွါတဖၣ်န့ၣ်​ မ့ၢ်ဝဲ စီၤအၤဘြၣ်,+ စီၤနၤဃိၢ်+ ဒီးစီၤဟၤရၣ်လီၤ.

၂၇ အအံၤမ့ၢ် တၢ်ကွဲးနီၣ်ကွဲးဃါလၢ အဘၣ်ဃးဒီး စီၤတ့ရၤလီၤ.

စီၤတ့ရၤ ထီၣ်ဖိဝဲ စီၤအၤဘြၣ်, စီၤနၤဃိၢ် ဒီးစီၤဟၤရၣ်လီၤ. မ့မ့ၢ် စီၤဟၤရၣ်န့ၣ်​ ထီၣ်ဖိဝဲ စီၤလိာ်လီၤ.+ ၂၈ ဖဲစီၤတ့ရၤ အိၣ်မူဒံးဝဲ အဆၢကတီၢ်န့ၣ်​ အဖိခွါ စီၤဟၤရၣ်​ သံဝဲလၢ တၢ်လီၢ်လၢ အအိၣ်ဖျဲၣ်ထီၣ်ဝဲအလီၢ် လၢအမ့ၢ် ပှၤက့ၤစ့းဖိ+ အဝ့ၢ်အူၢ်ပူၤလီၤ.+ ၂၉ စီၤအၤဘြၣ်​ ဒီးစီၤနၤဃိၢ်န့ၣ်​ ဆီဟံၣ်ဆီဃီလီၤ. ဒီးစီၤအၤဘြၣ်​ အမါန့ၣ်​ အမံၤမ့ၢ်ဝဲ နီၢ်စၤရဲ,+ မ့မ့ၢ် စီၤနၤဃိၢ် အမါန့ၣ်​ အမံၤမ့ၢ်ဝဲ နီၢ်မံးလကၤလီၤ.+ နီၢ်မံးလကၤ ဒီးနီၢ်ယံၤစကၤ အပၢ်န့ၣ်​ မ့ၢ်ဝဲ စီၤဟၤရၣ်လီၤ. ၃၀ နီၢ်စၤရဲ မ့ၢ်ပှၤတူာ်ဖိ+ ဒီးအဖိတအိၣ်​ နီတဂၤဘၣ်.

၃၁ စီၤတ့ရၤ ကိးဃုာ်ဝဲအဖိခွါ စီၤအၤဘြၣ်, အလံၤခွါ စီၤလိာ်+ လၢအမ့ၢ် စီၤဟၤရၣ်အဖိခွါ ဒီးအဒဲၣ်မုၣ်​ နီၢ်စၤရဲ လၢအမ့ၢ် အဖိခွါ စီၤအၤဘြၣ်အမါ ဒီးအဝဲသ့ၣ်​ ဟးထီၣ်လၢဝ့ၢ်အူၢ် လၢအမ့ၢ် ပှၤက့ၤစ့းဖိ အဝ့ၢ်ပူၤ ဒ်သိးအကလဲၤလၢ ကီၢ်ကနၤဧၣ်န့ၣ်လီၤ.+ လၢခံ အဝဲသ့ၣ်​ လဲၤတုၤလၢ ဝ့ၢ်ဟၤရၣ်+ ဒီးအိၣ်ဝဲဆိးဝဲ ဖဲန့ၣ်လီၤ. ၃၂ စီၤတ့ရၤ အိၣ်မူဝဲ ၂၀၅ နံၣ်​ ဒီးသံဝဲ လၢဝ့ၢ်ဟၤရၣ်​ အပူၤလီၤ.

၁၂ ယဟိဝၤယွၤ တဲဘၣ်​ စီၤအၤဘြၣ်လၢ “ဟးထီၣ်လၢ နထံနကီၢ် ဒီးနဘူးနတံၢ်အကျါ ဒီးလၢနပၢ် အဒူၣ်ဖိထၢဖိအကျါ ဒီးလဲၤလၢ ကီၢ်တဘ့ၣ်လၢ ယကဒုးနဲၣ်နၤ န့ၣ်တက့ၢ်.+ ၂ ယကဒုးကဲထီၣ်နၤ လၢပှၤကလုာ်ဖးဒိၣ်​ တကလုာ် ဒီးယကဆိၣ်ဂ့ၤနၤ ဒီးယကဒုး ဟူထီၣ်သါလီၤနမံၤ ဒီးနကကဲထီၣ်​ တၢ်ဆိၣ်ဂ့ၤ လၢပှၤဂၤအဂီၢ်လီၤ.+ ၃ ပှၤလၢအဆိၣ်ဂ့ၤနၤန့ၣ်​ ယကဆိၣ်ဂ့ၤ အဝဲသ့ၣ်​ ဒီးပှၤလၢအဆိၣ်အၢနၤန့ၣ်​ ယကဆိၣ်အၢ အဝဲသ့ၣ်လီၤ.+ ဒီးပှၤကိးကလုာ်ဒဲး လၢဟီၣ်ခိၣ်ချၢ ကဘၣ်တၢ်ဆိၣ်ဂ့ၤ ခီဖျိလၢနၤ သပှၢ်ကတၢၢ်လီၤ.”+

၄ ဒီးစီၤအၤဘြၣ်​ လဲၤတၢ်ဒ် ယဟိဝၤယွၤ တဲအီၤအသိး ဒီးစီၤလိာ် လဲၤဒီးအီၤလီၤ. ဖဲစီၤအၤဘြၣ်​ ဟးထီၣ်လၢ ဝ့ၢ်ဟၤရၣ်အခါ+ အသးအိၣ်​ ၇၅ နံၣ်လီၤ. ၅ ဒီးစီၤအၤဘြၣ်​ ကိးထီၣ်အမါ နီၢ်စၤရဲ,+ အဖိဒိၣ်ခွါ စီၤလိာ်+ ဒီးကုၢ်လၢအဝဲသ့ၣ်​ န့ၢ်ဘၣ်ဝဲလၢ ဝ့ၢ်ဟၤရၣ်အပူၤ ကိးဂၤဒဲး ဒီးအဝဲသ့ၣ်​ ပာ်ဖှိၣ်ထီၣ်​ တၢ်ဖိတၢ်လံၤလၢ အမၤန့ၢ်ဝဲခဲလၢာ်+ ဒီးစးထီၣ်လဲၤဝဲလၢ ကီၢ်ကနၤဧၣ်န့ၣ်လီၤ.+ ဖဲအဝဲသ့ၣ်​ လဲၤတုၤလၢ ကီၢ်ကနၤဧၣ်အခါ ၆ စီၤအၤဘြၣ်​ လဲၤတၢ်လၢကီၢ်ပူၤ တုၤလီၤလၢ တၢ်လီၢ်လၢ ပှၤကိးအီၤလၢ ၡက့ၣ်+ လၢအအိၣ်ဘူးဒီး မိၤရံယၤ အသ့ၣ်ထူၣ်ဖးဒိၣ်တဖၣ်လီၤ.+ ဖဲန့ၣ်အခါ ပှၤကနၤဧၣ်ဖိ အိၣ်ဝဲလၢ ကီၢ်ပူၤလီၤ. ၇ ယဟိဝၤယွၤ လီၣ်ဖျါထီၣ်အသးလၢ စီၤအၤဘြၣ်အအိၣ်​ ဒီးတဲဝဲလၢ “ယကဟ့ၣ်လီၤ ကီၢ်တဘ့ၣ်အံၤ+ လၢနချံနသၣ်လီၤ.”+ အဃိ စီၤအၤဘြၣ်​ တ့ထီၣ်တၢ်လုၢ်လီၢ် လၢယဟိဝၤယွၤအဂီၢ် ဖဲတၢ်လီၢ်အံၤလၢ ကစၢ်ယွၤ လီၣ်ဖျါထီၣ်အသးလၢ အီၤန့ၣ်လီၤ. ၈ လၢခံ အဝဲဟးထီၣ်ဖဲန့ၣ်​ ဒီးလဲၤအိၣ်လၢ ကစၢၢ်ကလိအကျါ လၢဝ့ၢ်ဘ့ၤသ့လး အမုၢ်ထီၣ်တခီ+ ဒီးသူၣ်ထီၣ်အဒဲလီၤ. ဖဲန့ၣ်​ အဝဲအိၣ်ဝဲလၢ ဝ့ၢ်ဘ့ၤသ့လး ဒီးဝ့ၢ်ဂဲ အဘၢၣ်စၢၤ အဃိ ဝ့ၢ်ဘ့ၤသ့လး အိၣ်ဝဲလၢမုၢ်နုာ်တခီ ဒီးဝ့ၢ်ဂဲလၢ+ မုၢ်ထီၣ်တခီလီၤ. အဝဲတ့ထီၣ်​ တၢ်လုၢ်လီၢ်ဖဲန့ၣ်​ လၢယဟိဝၤယွၤအဂီၢ်+ ဒီးကိးထီၣ်ဝဲ ယဟိဝၤယွၤ အမံၤလီၤ.+ ၉ လၢခံ စီၤအၤဘြၣ်​ လဲၤဝဲဆူ နဲကဲၤတခီ+ ဒီးသုးဝဲအဒဲ လၢတၢ်လီၢ်တတီၤဝံၤ တတီၤလီၤ.

၁၀ လၢကီၢ်ကနၤဧၣ်အပူၤန့ၣ်​ တၢ်သၣ်ဝံၤလီၤဒိ အိၣ်ထီၣ်ဝဲလီၤ. မ့ၢ်လၢ တၢ်သၣ်ဝံၤလီၤဒိ အိၣ်ထီၣ်လၢ ကီၢ်ပူၤနးမးအဃိ+ စီၤအၤဘြၣ်​ လဲၤလီၤလၢ ကီၢ်အဲၤကူပတူးတခီ+ ဒ်သိးကအိၣ်ဖဲန့ၣ်​ တတီၤဖိအဂီၢ်လီၤ. ၁၁ ဖဲအဝဲ ဘူးကလဲၤနုာ်လီၤလၢ ကီၢ်အဲၤကူပတူးအခါ အဝဲတဲဘၣ်​ အမါနီၢ်စၤရဲလၢ “ဝံသးစူၤ ကနၣ်နီၤ, နမ့ၢ်ပိာ်မုၣ်လၢ အဒိၣ်တၢ်ဂ့ၤမးတဂၤလီၤ.+ ၁၂ အဃိ ဖဲပှၤအဲၤကူပတူးဖိတဖၣ်​ ထံၣ်နၤအခါ အဝဲသ့ၣ်​ ကတဲဝဲလၢ ‘အမ့ၢ်ပှၤတဂၤအံၤ အမါ’ လီၤ. ဝံၤဒီးအဝဲသ့ၣ်​ ကမၤသံယၤ ဘၣ်ဆၣ်​ ကပာ်မူနၤလီၤ. ၁၃ ဒ်သိးအဝဲသ့ၣ်​ ကရ့ယၤဂ့ၤဂ့ၤ လၢနဃိ ဒီးကပာ်မူယၤအဂီၢ် ဝံသးစူၤ တဲလၢ နမ့ၢ်ယဒီပုၢ်ဝဲၢ်မုၣ်နီၤ.”+

၁၄ ဖဲစီၤအၤဘြၣ်​ လဲၤနုာ်လီၤလၢ ကီၢ်အဲၤကူပတူး အပူၤအခါ ပှၤအဲၤကူပတူးဖိတဖၣ်​ ထံၣ်ဘၣ်ဝဲလၢ ပိာ်မုၣ်တဂၤအံၤ ဒိၣ်တၢ်ဂ့ၤမးလီၤ. ၁၅ ဒီးဖဲဖၤရိၤ အပဒိၣ်ဖးဒိၣ်သ့ၣ်တဖၣ်​ ထံၣ်ဘၣ်နီၢ်စၤရဲအခါ အဝဲသ့ၣ်​ ပတြၢၤအီၤလၢ ဖၤရိၤအမဲာ်ညါ အဃိ ပှၤက့ၤကိးအီၤလၢ ဖၤရိၤအဟံၣ်လီၤ. ၁၆ ဒီးဖၤရိၤန့ၣ်​ ရ့စီၤအၤဘြၣ်ဂ့ၤဂ့ၤ လၢနီၢ်စၤရဲအဃိ ဒီးစီၤအၤဘြၣ်​ ဒိးန့ၢ်ဘၣ်ဝဲ သိ, ကျီၢ်, ကသ့ၣ်ယီၤမိၢ် ဒီးကသ့ၣ်ယီၤဖါ, ကုၢ်ပိာ်မုၣ်​ ဒီးကုၢ်ပိာ်ခွါတဖၣ်​ ဒီးကီၤလၤအူးတဖၣ်လီၤ.+ ၁၇ ဒီးယဟိဝၤယွၤ တီၢ်ဖၤရိၤ ဒီးပှၤလၢအအိၣ်​ ဟံၣ်တဖျၢၣ်ဃီဒီးအီၤတဖၣ်​ လၢတၢ်ဆူးတၢ်ဆါ ဖးဒိၣ်တဖၣ်* လၢစီၤအၤဘြၣ်အမါ နီၢ်စၤရဲအဃိလီၤ.+ ၁၈ အဃိဖၤရိၤ ကိးန့ၢ်စီၤအၤဘြၣ်​ ဒီးတဲဝဲလၢ “နမၤယၤဒ်အံၤ ဘၣ်လဲၣ်. ဘၣ်မနုၤအဃိ နတတဲယၤလၢ အဝဲကဲနမါလဲၣ်. ၁၉ ဘၣ်မနုၤအဃိ နတဲလၢ အဝဲကဲ နဒီပုၢ်ဝဲၢ်မုၣ်လဲၣ်,+ ယဘူးကဟံးဘၣ်အီၤ လၢယမါလီၤ. အအံၤ နမါ, ဟံးက့ၤအီၤ ဒီးက့ၤသၢၤ.” ၂၀ အဃိ ဖၤရိၤဟ့ၣ်လီၤ အကလုၢ် ဒ်သိး အခ့အပှၤတဖၣ်​ ကဒုးဟးထီၣ်​ စီၤအၤဘြၣ်​ လၢထံကီၢ်အပူၤ ဃုာ်ဒီးအမါ ဒီးတၢ်လၢအအိၣ်ဒီးအီၤ ခဲလၢာ်လီၤ.+

၁၃ စီၤအၤဘြၣ်​ ဟးထီၣ်လၢ ကီၢ်အဲၤကူပတူး ဒီးလဲၤဝဲဆူ နဲကဲၤ+ ဒီးအဝဲလဲၤစိာ်တၢ်လၢ အအိၣ်ဒီးအီၤခဲလၢာ်လီၤ. ဒီးအမါ ဒီးစီၤလိာ် လဲၤပိာ်အခံလီၤ. ၂ စီၤအၤဘြၣ်န့ၣ်​ အိၣ်ဒီးအဆၣ်ဖိကီၢ်ဖိ ဒီးအထူဒီးအစ့ ဒီဒူၣ်လီၤ.+ ၃ ဒီးဖဲအဝဲလဲၤတၢ်လၢ နဲကဲၤ ဆူဝ့ၢ်ဘ့ၤသ့လးအခါ အအိၣ်ပတုာ်ဝဲ လၢတၢ်လီၢ် တတီၤဝံၤတတီၤ တုၤအလဲၤတုၤလၢ ဝ့ၢ်ဘ့ၤသ့လး ဒီးဝ့ၢ်ဂဲ အဘၢၣ်စၢၤ,+ ဖဲတၢ်လီၢ်လၢ အသူၣ်တ့ၢ် အဒဲ ၄ ဒီးအတ့ထီၣ်တ့ၢ်ဝဲ တၢ်လုၢ်လီၢ် လၢညါအလီၢ်လီၤ. ဒီးစီၤအၤဘြၣ်​ ကိးထီၣ်ဝဲ ယဟိဝၤယွၤအမံၤ ဖဲန့ၣ်လီၤ.

၅ စီၤလိာ်လၢ အလဲၤပိာ် စီၤအၤဘြၣ်အခံန့ၣ်​ အိၣ်စ့ၢ်ကီးဒီး သိ, ကျီၢ် ဒီးအဒဲတဖၣ်လီၤ. ၆ အဃိ အဝဲသ့ၣ်​ ကအိၣ်တပူၤဃီအဂီၢ် တၢ်လီၢ်တတြီၢ်ဘၣ်. မ့ၢ်လၢ အဝဲသ့ၣ်​ အတၢ်ဖိတၢ်လံၤတဖၣ်​ ဟဲအါထီၣ်ဝဲ ဒီဒူၣ်အဃိ အဝဲသ့ၣ်​ အိၣ်တပူၤဃီ လၢတၢ်လီၢ်အဝဲန့ၣ်​ တသ့လၢၤဘၣ်. ၇ အဃိ ပှၤလၢအကွၢ် စီၤအၤဘြၣ်​ အဆၣ်ဖိကီၢ်ဖိ ဒီးပှၤလၢအကွၢ် စီၤလိာ် အဆၣ်ဖိကီၢ်ဖိန့ၣ်​ အ့ၣ်လိာ်အသးလီၤ. (ဖဲန့ၣ်အဆၢကတီၢ် ပှၤကနၤဧၣ်ဖိ ဒီးပှၤပရးစၤဖိ အိၣ်ဝဲလၢ ထံလီၢ်ကီၢ်ပူၤလီၤ.)+ ၈ အဃိ စီၤအၤဘြၣ်​ တဲဘၣ်စီၤလိာ်လၢ+ “ယဃ့ဝံသးစူၤနၤလီၤ, မ့ၢ်လၢ ပဒီဘူးဒီတံၢ်အဃိ နၤဒီးယၤမ့ၢ်ဂ့ၤ ယပှၤကွၢ်ဆၣ်ဖိကီၢ်ဖိ ဒီးနပှၤကွၢ် ဆၣ်ဖိကီၢ်ဖိမ့ၢ်ဂ့ၤ တကြၢးအ့ၣ်လိာ်အသးဘၣ်. ၉ လၢကီၢ်ဒီဘ့ၣ်ညါအပူၤန့ၣ်​ တၢ်လီၢ်တတီၤဂ့ၤ တတီၤဂ့ၤ လၢနအဲၣ်ဒိးအိၣ်န့ၣ်​ နဃုထၢသ့လီၤ. ဝံသးစူၤ မၤလီၤဖးနသးဒီး ယၤတက့ၢ်. နမ့ၢ်လဲၤလၢ စုစ့ၣ်တခီန့ၣ်​ ယကလဲၤလၢ စုထွဲတခီလီၤ. ဘၣ်ဆၣ်​ နမ့ၢ်လဲၤလၢ စုထွဲတခီန့ၣ်​ ယကလဲၤလၢ စုစ့ၣ်တခီလီၤ.” ၁၀ အဃိ စီၤလိာ် ကျ့ၣ်ထီၣ်အမဲာ် ဒီးထံၣ်ဝဲလၢ ယၢ်ဒ့ၣ်အဟီၣ်ကဝီၤ ဒီဘ့ၣ်ညါ+ တုၤလၢ ဝ့ၢ်စိၤဧၢ်န့ၣ်+ မ့ၢ်တၢ်လီၢ်လၢ ထံအိၣ်ဝဲ အါအါဂီၢ်ဂီၢ် ဒ်ယဟိဝၤယွၤ အတၤသၣ်လီၢ်အသိး+ ဒီးဒ်ကီၢ်အဲၤကူပတူးအသိး (တချုးလၢ ယဟိဝၤယွၤ မၤဟးဂီၤ ဝ့ၢ်စဒိၣ်​ ဒီးဂမိရၤ ဒံးဘၣ်အခါ) န့ၣ်လီၤ. ၁၁ ဒီးစီၤလိာ်ဃုထၢဝဲ ယၢ်ဒ့ၣ်အဟီၣ်ကဝီၤ ဒီဘ့ၣ်ညါ လၢအနီၢ်ကစၢ်အဂီၢ် ဒီးအဝဲ လဲၤသုးအဒဲလၢ မုၢ်ထီၣ်တခီလီၤ. အဃိ အဝဲသ့ၣ်​ လီၤဖးလိာ်အသးလီၤ. ၁၂ စီၤအၤဘြၣ်​ အိၣ်ဝဲလၢ ကီၢ်ကနၤဧၣ်အပူၤ, မ့မ့ၢ် စီၤလိာ်န့ၣ်​ လဲၤအိၣ်ဘူးဒီး ဝ့ၢ်တဖၣ်လၢ အအိၣ်လၢ ယၢ်ဒ့ၣ်အဟီၣ်ကဝီၤအပူၤလီၤ.+ လၢခံ စီၤလိာ် သူၣ်ထီၣ်အဒဲ ဘူးဒီး ဝ့ၢ်စဒိၣ်လီၤ. ၁၃ ပှၤလၢအအိၣ်လၢ ဝ့ၢ်စဒိၣ်အပူၤတဖၣ်န့ၣ်​ အၢဝဲသီဝဲဒိၣ်မး ဒီးမၤတၢ်ဒဲးဘးလၢ အလီၤသးဘၣ်အၢလၢ အထီဒါ ယဟိဝၤယွၤန့ၣ်လီၤ.+

၁၄ ဖဲစီၤလိာ် လီၤဖးဒီး စီၤအၤဘြၣ်​ ဝံၤအလီၢ်ခံ ယဟိဝၤယွၤ တဲဘၣ်စီၤအၤဘြၣ်လၢ “ဝံသးစူၤ ကျ့ၣ်ထီၣ်နမဲာ်ဒီး ဖဲနအိၣ်အလီၢ်န့ၣ်​ ကွၢ်စိဃီၤတၢ်လၢ ကလံၤစိး ဒီးလၢကလံၤထံး ဒီးလၢမုၢ်ထီၣ်​ ဒီးလၢမုၢ်နုာ်တခီ န့ၣ်တက့ၢ်. ၁၅ ကီၢ်လၢ နထံၣ်ဘၣ်အီၤတဘ့ၣ်အံၤ ယကဟ့ၣ်လီၤနၤဒီး နချံနသၣ်​ ဒီးကကဲထီၣ်​ သုတၢ်အစိၤစိၤအဃၣ်ဃၣ်လီၤ.+ ၁၆ ဒီးယကမၤအါထီၣ်​ နချံနသၣ်​ အါအါဂီၢ်ဂီၢ် ဒ်ဟီၣ်ခိၣ်အကမူၣ်အသိး အဃိ ပှၤဂံၢ်ဟီၣ်ခိၣ်ကမူၣ်​ မ့ၢ်သ့န့ၣ်​ ပှၤဂံၢ်နချံနသၣ်​ ကသ့စ့ၢ်ကီးလီၤ.+ ၁၇ မ့ၢ်လၢ ယကဟ့ၣ်လီၤနၤ ကီၢ်အံၤအဃိ လဲၤတၢ်လၢ ကီၢ်ဒီဘ့ၣ်ညါ အပူၤတက့ၢ်.” ၁၈ ဒီးစီၤအၤဘြၣ်​ ဆဲးအိၣ်ဝဲလၢ ဒဲတဖၣ်အပူၤ လၢတၢ်လီၢ် တတီၤဝံၤတတီၤလီၤ. လၢခံ အဝဲလဲၤအိၣ်လၢ မးမရ့အသ့ၣ်ထူၣ်ဖးဒိၣ်တဖၣ်အကျါ+ လၢအအိၣ်လၢ ဝ့ၢ်ဃ့ဘြိၣ်​ အပူၤလီၤ.+ ဖဲန့ၣ်အဝဲ တ့ထီၣ်ဝဲ တၢ်လုၢ်လီၢ် လၢယဟိဝၤယွၤ အဂီၢ်လီၤ.+

၁၄ ဖဲန့ၣ်အဆၢကတီၢ် ၡံနၢ်+ အစီၤပၤ စီၤအးမရၤဖ့လး, အ့းလးစၢ် အစီၤပၤ စီၤအၤရယိာ်, ဧ့ၤလၣ်​ အစီၤပၤ+ စီၤကဒၢ်လဧိမ့ၢ်+ ဒီးကိဝဲၤ အစီၤပၤ စီၤတံးဒၤလး ၂ ဒုးတၢ်ဒီး စဒိၣ်​ အစီၤပၤ စီၤဘ့းရၤ,+ ဂမိရၤ အစီၤပၤ စီၤဘံးရၡၤ,+ အၤဒမၤ အစီၤပၤ စီၤၡံးနာ်, စဘိအံၣ်​ အစီၤပၤ စီၤၡ့မ့ၢ်ဘ့ၢ်+ ဒီးဘ့လၤအစီၤပၤလီၤ. ဒီးဘ့လၤန့ၣ်​ ပှၤကိးစ့ၢ်ကီးအီၤလၢ စိၤဧၢ်လီၤ. ၃ စီၤပၤယဲၢ်ဂၤအံၤန့ၣ်​ ပာ်ဖှိၣ်ထီၣ်အသးလၢ စံးဒံၣ်​ အတၢ်တြီၤပူၤလီၤ.+ ခဲအံၤ တၢ်လီၢ်အံၤမ့ၢ်ဝဲ ပီၣ်လဲၣ်အံသၣ်လီၤ.+

၄ စီၤပၤယဲၢ်ဂၤန့ၣ်​ အိၣ်လၢ စီၤကဒၢ်လဧိမ့ၢ် အတၢ်ပၢဖီလာ် ၁၂ နံၣ်​ ဘၣ်ဆၣ်​ ဖဲ ၁၃ နံၣ်တနံၣ်န့ၣ်​ အဝဲသ့ၣ်​ ထီဒါတၢ်လီၤ. ၅ ဖဲ ၁၄ နံၣ်တနံၣ်န့ၣ်​ စီၤကဒၢ်လဧိမ့ၢ် ဒီးစီၤပၤအဂၤတဖၣ်​ လၢအအိၣ်ဒီးအီၤ လဲၤမၤနၢၤဝဲ ပှၤရၤဖၤဖိ လၢအအိၣ်လၢ ဧၤၡတါရိၤကၢ်နါယံၣ်, ပှၤစူစၤဖိ လၢအအိၣ်လၢ ဝ့ၢ်ဃၣ်, ပှၤအ့ၣ်မ့းဖိလၢ+ အအိၣ်လၢ ၡၤဝ့ကးရယးသံၣ်​ ၆ ဒီးပှၤဃိၢ်ဖိ+ လၢအအိၣ်လၢ ကစၢၢ်စ့ဧၢ်+ တုၤလီၤလၢ အ့လးဖရၣ်​ လၢအအိၣ်လၢ ပှၢ်မုၢ်ကနၢ အဃၢၤလီၤ. ၇ ဝံၤဒီးအဝဲသ့ၣ်​ ဃၣ်ကဒါက့ၤအသး ဒီးလဲၤဝဲလၢ ဧ့ၣ်မံးၡပး လၢအမ့ၢ် ကၤဒ့ၣ်+ ဒီးမၤန့ၢ်ဝဲ ပှၤဧမၤလ့းဖိ အဟီၣ်ကဝီၤဒီဘ့ၣ်+ ဒီးမၤနၢၤစ့ၢ်ကီး ပှၤအမိၢ်ဖိ+ လၢအအိၣ်လၢ ဝ့ၢ်ဃၤစစိၣ်တါမၢ် အပူၤန့ၣ်လီၤ.+

၈ ဖဲန့ၣ်အခါ စဒိၣ်အစီၤပၤ လဲၤဃုာ်ဝဲဒီး ဂမိရၤ အစီၤပၤ, အၤဒမၤ အစီၤပၤ, စဘိအံၣ်​ အစီၤပၤ ဒီးဘ့လၤ လၢအမ့ၢ် စိၤဧၢ် အစီၤပၤလီၤ. ဒီးအဝဲသ့ၣ်​ လဲၤဝဲလၢစံးဒံၣ်​ တၢ်တြီၤပူၤ ဒီးအိၣ်ကတဲာ်ကတီၤအသးလၢ ကဒုး ၉ ဧ့ၤလၣ်​ အစီၤပၤ စီၤကဒၢ်လဧိမ့ၢ်, ကိဝဲၤ အစီၤပၤ စီၤတံးဒၤလး, ၡံနၢ် အစီၤပၤ စီၤအးမရၤဖ့လး ဒီးအ့းလးစၢ် အစီၤပၤ စီၤအၤရယိာ်+ အဃိ စီၤပၤလွံၢ်ဂၤန့ၣ်​ ဒုးတၢ်ဒီး စီၤပၤယဲၢ်ဂၤလီၤ. ၁၀ လၢစံးဒံၣ်​ အတၢ်တြီၤပူၤန့ၣ်​ ကျဲတံးအပူၤတဖၣ်​ အိၣ်ဝဲသကုၤဆးဒးလီၤ. စဒိၣ်​ အစီၤပၤ ဒီးဂမိရၤ အစီၤပၤ ဃ့ၢ်ပူၤဖျဲးလၢ အသးသမူအဂီၢ် သနာ်က့ လီၤတဲာ်လၢ တၢ်ပူၤတဖၣ်အံၤလီၤ. မ့မ့ၢ် ပှၤအဂၤတဖၣ်န့ၣ်​ လဲၤဃ့ၢ်ဝဲလၢ ကစၢၢ်ကလိအကျါလီၤ. ၁၁ ဒီးပှၤလၢအမၤနၢၤတၢ်တဖၣ်န့ၣ်​ ဟံးန့ၢ်ဝဲ စဒိၣ်​ ဒီးဂမိရၤ အတၢ်ဖိတၢ်လံၤခဲလၢာ် ဒီးအတၢ်အီၣ်တၢ်အီခဲလၢာ် ဒီးက့ၤဝဲလီၤ.+ ၁၂ တကးဒံးဘၣ်​ အဝဲသ့ၣ်​ က့ၤဖီၣ်​ စီၤအၤဘြၣ်​ အဖိဒိၣ်ခွါ* စီၤလိာ် လၢအအိၣ်လၢ ဝ့ၢ်စဒိၣ်အပူၤ+ ဒီးဟံးန့ၢ် အတၢ်ဖိတၢ်လံၤခဲလၢာ် ဒီးအဝဲသ့ၣ်​ က့ၤဝဲလီၤ.

၁၃ ဝံၤဒီး ပှၤလၢအထူၣ်ဖျဲးတဂၤ ဟဲတဲဘၣ်​ ပှၤဧ့ၤဘြံၤဖိ စီၤအၤဘြၣ်လီၤ. ဖဲန့ၣ်အခါ စီၤအၤဘြၣ်​ အိၣ်ဝဲဆိးဝဲလၢ ပှၤအမိၢ်ဖိ စီၤမးမရ့ အသ့ၣ်ထူၣ်ဖးဒိၣ်တဖၣ်​ အကျါလီၤ.+ စီၤမးမရ့ မ့ၢ်ဝဲ စီၤအ့ၡကိၤလး ဒီးစီၤဧၤန့ၢ်+ အဒီပုၢ်ဝဲၢ်ခွါ ဒီးပှၤတဖၣ်အံၤ မ့ၢ်ပှၤလၢအဖီၣ်လိာ်စုဒီး စီၤအၤဘြၣ်လီၤ. ၁၄ အဃိ စီၤအၤဘြၣ်​ နၢ်ဟူဝဲလၢ ပှၤဖီၣ်န့ၢ် အဘူးအတံၢ် တဂၤလီၤ.+ ဖဲန့ၣ်န့ၣ်​ အဝဲကိးဖှိၣ်​ အခ့အပှၤတဖၣ်လၢ အဒုးတၢ်သ့ ၃၁၈ ဂၤလၢ အအိၣ်ဖျဲၣ်ထီၣ်​ လၢအဟံၣ်ပူၤ ဒီးလဲၤလူၤပှၤတဖၣ်န့ၣ်​ တုၤလီၤလၢ ဝ့ၢ်ဒၣ်လီၤ.+ ၁၅ ဖဲမုၢ်နၤခီန့ၣ်​ စီၤအၤဘြၣ်​ နီၤဖးလီၤဝဲ အပှၤတဖၣ်လီၤ. ဒီးအဝဲဒီး အပှၤတဖၣ်န့ၣ်​ ဒုးအဝဲသ့ၣ်​ နၢၤဝဲလီၤ. ဒီးစီၤအၤဘြၣ်​ ဆဲးလူၤအဝဲသ့ၣ်​ တုၤလၢ ဃိဘၤ လၢအအိၣ်လၢ ဝ့ၢ်ဒၤမ့ၤစ့း အကလံၤစိး တခီလီၤ. ၁၆ ဒီးအဝဲ ဟဲက့ၤစိာ်ကဒါက့ၤ တၢ်ဖိတၢ်လံၤခဲလၢာ် ဒီးဟဲက့ၤကိးဃုာ်ဒီး စီၤလိာ် ဒီးအတၢ်ဖိတၢ်လံၤတဖၣ်, ပှၤပိာ်မုၣ်သ့ၣ်တဖၣ်​ ဒီးပှၤဂၤသ့ၣ်တဖၣ်လီၤ.

၁၇ စီၤအၤဘြၣ်​ မၤနၢၤဝဲ စီၤကဒၢ်လဧိမ့ၢ် ဒီးစီၤပၤလၢ အအိၣ်ဒီးအီၤတဖၣ်ဝံၤ ဖဲအဟဲက့ၤဝဲအခါ စဒိၣ်အစီၤပၤ လဲၤသဂၢၢ် စီၤအၤဘြၣ်လၢ ၡၤဝ့ အတၢ်တြီၤအပူၤ လၢအမ့ၢ် စီၤပၤ အတၢ်တြီၤပူၤန့ၣ်လီၤ.+ ၁၈ ဒီးၡၤလ့ၣ်+ အစီၤပၤ စီၤမၤလကံစဒ့း+ လၢအမ့ၢ် ကစၢ်ယွၤ လၢအထီကတၢၢ်တဂၤ အပှၤလုၢ်တၢ်ဒိၣ်န့ၣ်+ ဟဲစိာ်ဝဲ ကိၣ်​ ဒီးစပံးထံလီၤ.

ဒီးစီၤအၤဘြၣ်​ ဟ့ၣ်အီၤ တၢ်ဆံဆဲၣ်ပူတပူ လၢကယဲၢ်တၢ်လၢ အဒိးန့ၢ်ဘၣ်က့ၤဝဲ တဖၣ်အကျါလီၤ.+

၂၁ ဝံၤဒီး စဒိၣ်အစီၤပၤ တဲဘၣ်​ စီၤအၤဘြၣ်လၢ “ဟံးန့ၢ် တၢ်ဖိတၢ်လံၤတဖၣ်​ လၢနနီၢ်ကစၢ်အဂီၢ် ဘၣ်ဆၣ်​ ဟ့ၣ်က့ၤယၤ ယပှၤတဖၣ်တက့ၢ်.” ၂၂ ဘၣ်ဆၣ်​ စီၤအၤဘြၣ်တဲဘၣ်​ စဒိၣ်အစီၤပၤလၢ “ယယူာ်ထီၣ်ယစု ဒီးအၢၣ်လီၤ တၢ်ထီကတၢၢ်ကစၢ် ယဟိဝၤယွၤ လၢအတ့လီၤ မူခိၣ်ဒီးဟီၣ်ခိၣ်လၢ ၂၃ တၢ်လၢအကဲနတၢ်န့ၣ်​ ထဲလုၣ်တဘိ မ့တမ့ၢ် ခီၣ်ဖံးအပျံၤတဘိဒၣ်လဲာ် ယတဟံးန့ၢ် နီတမံၤဘၣ်. ယမၤဒ်အံၤ ဒ်သိးနသုတတဲဘၣ်ဖုးလၢ ‘ယဒုးထူးထီၣ်တီၤထီၣ်​ စီၤအၤဘြၣ်’ တဂ့ၤအဂီၢ်လီၤ. ၂၄ မ့တမ့ၢ်ဘၣ်တၢ်လၢ ပိာ်ခွါသးစၢ်သ့ၣ်တဖၣ်​ အီၣ်ပာ်စၢၤ ဝံၤလံတဖၣ်ဘၣ်န့ၣ်​ ယတဟံးန့ၢ် တၢ်အဂုၤအဂၤ နီတမံၤဘၣ်. မ့မ့ၢ် ပှၤလၢအလဲၤတၢ်ဒီးယၤ လၢအမ့ၢ် စီၤဧၤန့ၢ်, စီၤအ့ၡကိၤလး ဒီးစီၤမးမရ့န့ၣ်+ မ်အဝဲသ့ၣ်​ ဟံးန့ၢ်တၢ်လၢ အနီၢ်ကစၢ်အဂီၢ် တနီၤတက့ၢ်.”

၁၅ ဖဲန့ၣ်ဝံၤအလီၢ်ခံ လၢတၢ်ထံၣ်လၢညါခီအပူၤ ယဟိဝၤယွၤ တဲစီၤအၤဘြၣ်လၢ “စီၤအၤဘြၣ်ဧၢ, တဘၣ်ပျံၤတၢ်တဂ့ၤ.+ ယမ့ၢ်ကတီၤတဘ့ၣ်​ လၢနဂီၢ်လီၤ.+ နကဒိးန့ၢ်ဘၣ်​ ခိၣ်ဖး ဖးဒိၣ်တခါလီၤ.”+ ၂ စီၤအၤဘြၣ်​ တဲဆၢဝဲလၢ “တၢ်ပၢကစၢ် ယဟိဝၤယွၤဧၢ, နကဟ့ၣ်ယၤ တၢ်မနုၤလဲၣ်. ယဖိတအိၣ်ဘၣ်​ ဒီးပှၤလၢ အကန့ၢ်သါဘၣ်​ တၢ်လၢအအိၣ်ဒီးယၤ ခဲလၢာ်န့ၣ်​ မ့ၢ်ပှၤဒၤမ့ၤစ့းဖိ စီၤအလံၤဧ့စ့ၢ် တဂၤအံၤလီၤ.”+ ၃ စီၤအၤဘြၣ်​ တဲဝဲလၢ “နတဟ့ၣ်လီၤယၤ တၢ်အချံအသၣ်ဘၣ်.*+ ဒီးတၢ်အခ့အပှၤ တဂၤလၢ အအိၣ်လၢ ယဟံၣ်ပူၤန့ၣ်​ မ့ၢ်ပှၤလၢ ကန့ၢ်သါ ယတၢ်လီၤ.” ၄ ဘၣ်ဆၣ်​ ယဟိဝၤယွၤ တဲဆၢက့ၤအီၤလၢ “ပှၤတဂၤအံၤန့ၣ်​ တမ့ၢ်ပှၤလၢ အကန့ၢ်သါဘၣ်​ နတၢ်ဘၣ်. ပှၤလၢကန့ၢ်သါဘၣ်နတၢ်န့ၣ်​ မ့ၢ်နဖိခွါလီၤ.”+

၅ ဒီးကစၢ်ယွၤ ကိးထီၣ်အီၤ လၢတၢ်ချၢ ဒီးတဲဝဲလၢ “ဝံသးစူၤ ကွၢ်ထီၣ်လၢမူခိၣ်​ ဒီးနဂံၢ်ဆၣ်သ့ၣ်တဖၣ်အံၤ မ့ၢ်သ့န့ၣ်​ ဂံၢ်ကွၢ်တက့ၢ်.” ဒီးအဝဲဆဲးတဲ စီၤအၤဘြၣ်လၢ “နချံနသၣ်​ အနီၣ်ဂံၢ်ကအါထီၣ်ဒ် ဆၣ်လၢမူခိၣ်အသိးလီၤ.”+ ၆ ဒီးအဝဲနာ် ယဟိဝၤယွၤ+ ဒီးကစၢ်ယွၤ ပာ်ပနီၣ်အီၤ ဒ်ပှၤတီပှၤလိၤအသိးလီၤ.+ ၇ ဒီးကစၢ်ယွၤ တဲဝဲလၢ “ယမ့ၢ်ယဟိဝၤယွၤ လၢအဒုးဟးထီၣ်နၤ လၢပှၤက့ၤစ့းဖိ အဝ့ၢ်အူၢ်အပူၤ ဒ်သိးကဟ့ၣ်လီၤနၤ ကီၢ်တဘ့ၣ်အံၤ ဒ်နတၢ်အသိးလီၤ.”+ ၈ ဒီးစီၤအၤဘြၣ်​ တဲဝဲလၢ “တၢ်ပၢကစၢ် ယဟိဝၤယွၤဧၢ, ယကန့ၢ်ဘၣ်ကီၢ်အံၤ အနီၢ်ကီၢ်န့ၣ်​ ယသ့ၣ်ညါအီၤ ကသ့ဒ်လဲၣ်.” ၉ ဒီးကစၢ်ယွၤ တဲအီၤလၢ “ဟံးန့ၢ် ကျီၢ်မိၢ်တဒု လၢအအိၣ်သၢနံၣ်, မဲာ်တဲးလဲးမိၢ်တဒု လၢအအိၣ်သၢနံၣ်, သိဖါတဒု လၢအအိၣ်သၢနံၣ်, ထိၣ်လွံၢ်တဘ့ၣ်​ ဒီးထိၣ်ကးက့ၣ်ဖိတဘ့ၣ်​ တက့ၢ်.” ၁၀ အဃိ အဝဲဟံးန့ၢ် ဆၣ်ဖိကီၢ်ဖိတဖၣ်အံၤခဲလၢာ် ဒီးဒီၣ်တဲာ်ဝဲ ခံကူာ်ခံကူာ် ဒီးပာ်လီၤဝဲခံကျိၤ တကူာ်န့ၣ်တကပၤ တကူာ်န့ၣ်​ တကပၤလီၤ. မ့မ့ၢ် ထိၣ်သ့ၣ်တဖၣ်န့ၣ်​ အဝဲ တဒီၣ်တဲာ်ဝဲဘၣ်. ၁၁ ဝံၤဒီး ထိၣ်ဖးဒိၣ်တဖၣ်​ ဟဲလီၤလၢ တၢ်အစိၣ်တဖၣ်အံၤအလိၤ ဘၣ်ဆၣ်​ စီၤအၤဘြၣ်​ နီဟးထီၣ်ကွံာ်အီၤလီၤ.

၁၂ ဖဲမုၢ်ဘူးကလီၤနုာ်အခါ စီၤအၤဘြၣ်​ မံဘၣ်အသး လီၤကၢ်လီၤကုၤ ဒီးတၢ်ခံးဖးဒိၣ်လၢ အလီၤပျံၤလီၤဖုး လီၤဘၣ်အီၤလီၤ. ၁၃ ဒီးကစၢ်ယွၤတဲဘၣ်​ စီၤအၤဘြၣ်လၢ “နချံနသၣ်​ ကကဲထီၣ်​ ပှၤထံဂၤကီၢ်ဂၤဖိတဖၣ်​ လၢထံကီၢ်တဘ့ၣ်လၢ အတမ့ၢ် အဝဲသ့ၣ်​ အတၢ်ဘၣ်အပူၤလီၤ. ဒီးပှၤလၢ အအိၣ်ဖဲန့ၣ်တဖၣ်​ ကဒုးကဲထီၣ်​ အဝဲသ့ၣ်လၢကုၢ် ဒီးကမၤနးမၤဖှီၣ်​ အဝဲသ့ၣ်​ အနံၣ်​ ၄၀၀ လီၤ.+ ၁၄ ဘၣ်ဆၣ်​ ယကစံၣ်ညီၣ်​ ပှၤတကလုာ်လၢ အဒုးကဲကုၢ် အဝဲသ့ၣ်+ ဒီးအဝဲသ့ၣ်တဖၣ်​ ကဟးထီၣ်ဒီး ကက့ၤစိာ်ဃုာ်ဒီး တၢ်ဖိတၢ်လံၤ အါမးလီၤ.+ ၁၅ မ့မ့ၢ်နၤန့ၣ်​ နကသံဘၣ်​ မုာ်မုာ်ခုၣ်ခုၣ်​ ဖဲနသးပှၢ်ထီၣ်​ အဆၢကတီၢ် ဒီးပှၤကခူၣ်လီၤနၤ ဃုာ်ဒီးနမိၢ်ပၢ်ဖံဖု လၢပျၢၤတဖၣ်လီၤ.+ ၁၆ ဘၣ်ဆၣ်​ နစၢၤနသွဲၣ်တဖၣ်​ ကဟဲက့ၤအိၣ်​ ဖဲအံၤလၢ+ လွံၢ်စိၤတစိၤ အတီၢ်ပူၤ မ့ၢ်လၢ ပှၤအမိၢ်ဖိတဖၣ်​ အတၢ်ကမၣ်​ တတုၤထီၣ်ထီၣ်ဘး ဒံးဘၣ်အဃိလီၤ.”*+

၁၇ ဖဲမုၢ်လီၤနုာ် ဒီးတၢ်ခံးဒိၣ်မးအခါ ဖၣ်ကပူၤတဖျၢၣ်လၢ အမ့ၣ်အူခုၣ်ထီၣ်န့ၣ်​ အိၣ်ဖျါထီၣ်ဝဲ ဒီးဆှိလၢအကဲၤထီၣ်တဘိန့ၣ်​ လဲၤတၢ်လၢ ဆၣ်ဖိကီၢ်ဖိ အကူာ်တဖၣ်​ အဘၢၣ်စၢၤလီၤ. ၁၈ ဖဲမုၢ်နံၤ အဝဲန့ၣ်​ ယဟိဝၤယွၤ မၤတၢ်အၢၣ်လီၤအီလီၤဒီး စီၤအၤဘြၣ်+ ဒီးတဲဝဲလၢ “ယကဟ့ၣ်လီၤ နချံနသၣ်လၢ ကီၢ်တဘ့ၣ်အံၤ+ စးထီၣ်လၢ အဲၤကူပတူး အထံကျိ တုၤလၢ ထံကျိဖးဒိၣ်​ လၢအမ့ၢ် ထံကျိဖရၤသးန့ၣ်လီၤ.+ ၁၉ ဒီးကီၢ်လၢ ယကဟ့ၣ်သုအံၤ မ့ၢ်ဝဲပှၤက့ၣ်ဖိအကီၢ်,+ ပှၤကနးဖိအကီၢ်, ပှၤကးမိၣ်ဖိအကီၢ်, ၂၀ ပှၤဃ့ၤသးဖိအကီၢ်,+ ပှၤပရးစၤဖိအကီၢ်,+ ပှၤရၤဖၤဖိအကီၢ်,+ ၂၁ ပှၤအမိၢ်ဖိအကီၢ်, ပှၤကနၤဧၣ်ဖိအကီၢ်, ပှၤကံၢ်ကၣ်ဖိအကီၢ် ဒီးပှၤယဘူၣ်ဖိအကီၢ်လီၤ.”+

၁၆ စီၤအၤဘြၣ်​ အမါနီၢ်စၤရဲန့ၣ်​ တအိၣ်ဖျဲၣ်ထီၣ်န့ၢ်အီၤ အဖိနီတဂၤဘၣ်.+ ဘၣ်ဆၣ်​ နီၢ်စၤရဲ အကုၢ်ပိာ်မုၣ်​ အိၣ်ဝဲတဂၤလၢ အမံၤမ့ၢ် နီၢ်ဟၤကၢ်+ ဒီးအဝဲမ့ၢ် ပှၤအဲၤကူပတူးမုၣ်လီၤ. ၂ အဃိ နီၢ်စၤရဲ တဲစီၤအၤဘြၣ်လၢ “ဝံသးစူၤ ဒိကနၣ်မီၤ. ယဟိဝၤယွၤ တြီယၤဒ်သိး ယဖိသုတအိၣ်တဂ့ၤအဂီၢ်လီၤ. ဝံသးစူၤ မံဃုာ်ဒီး ယကုၢ်ပိာ်မုၣ်တက့ၢ်. ဘၣ်တဘၣ်​ ယကန့ၢ်ဘၣ်ယဖိတဖၣ်​ ခီဖျိလၢအီၤလီၤ.”+ အဃိ စီၤအၤဘြၣ်​ ဒိကနၣ်​ တၢ်လၢအမါတဲဝဲန့ၣ်လီၤ. ၃ ဖဲစီၤအၤဘြၣ်​ အိၣ်လၢ ကီၢ်ကနၤဧၣ်​ အနံၣ်တဆံ ဝံၤအလီၢ်ခံန့ၣ်​ နီၢ်စၤရဲကိးန့ၢ် အပျဲၢ်မုၣ်​ နီၢ်ဟၤကၢ် လၢအမ့ၢ် ပှၤအဲၤကူပတူးမုၣ်​ ဒီးဟ့ၣ်လီၤဝဲအဝၤ စီၤအၤဘြၣ်​ ဒ်အမါအသိးလီၤ. ၄ အဃိ စီၤအၤဘြၣ်​ မံဃုာ်ဒီး နီၢ်ဟၤကၢ်ဝံၤ နီၢ်ဟၤကၢ် ဒၢထီၣ်ဝဲလီၤ. ဖဲနီၢ်ဟၤကၢ် သ့ၣ်ညါဝဲလၢ အဒၢထီၣ်အခါ ဆိကမိၣ်ဆံး အကစၢ်မုၣ်လီၤ.

၅ အဃိ နီၢ်စၤရဲ တဲစီၤအၤဘြၣ်လၢ “ယဘၣ်တူၢ်ဘၣ်တၢ် ဒ်အံၤန့ၣ်​ အကဲနတၢ်ကမၣ်လီၤ. ယဟ့ၣ်လီၤ ယကုၢ်ပိာ်မုၣ်လၢ နစုပူၤ ဘၣ်ဆၣ်​ စးထီၣ်ဖဲ အဝဲသ့ၣ်ညါဝဲလၢ အဒၢထီၣ်အခါ အဝဲ ဆိကမိၣ်ဆံးယၤလီၤ. အဃိ မ့ၢ်မတဂၤ အတၢ်ကမၣ်အိၣ်လဲၣ်. နၤမ့ၢ်ယၤလဲၣ်န့ၣ်​ မ်ယဟိဝၤယွၤ စံၣ်ညီၣ်တက့ၢ်.” ၆ ဒီးစီၤအၤဘြၣ်​ တဲနီၢ်စၤရဲလၢ “နကုၢ်ပိာ်မုၣ်အံၤ အိၣ်လၢနစုပူၤလီၤ. မၤအီၤဖဲ နအဲၣ်ဒိးမၤ အသိးန့ၣ်တက့ၢ်.” ဝံၤဒီး နီၢ်စၤရဲ မၤမဲာ်ဆှး နီၢ်ဟၤကၢ်ဒိၣ်မး ဒီးနီၢ်ဟၤကၢ် ဃ့ၢ်ဟးထီၣ်ကွံာ်လၢ အအိၣ်လီၤ.

၇ လၢခံ ယဟိဝၤယွၤ အမူခိၣ်ကလူး ထံၣ်ဝဲနီၢ်ဟၤကၢ် လၢထံထီၣ်ပၢၢ်အကပၤ လၢပှၢ်မုၢ်ကနၢအပူၤလီၤ. ဒီးထံထီၣ်ပၢၢ်အံၤ အိၣ်ဝဲလၢ ကျဲလၢအလဲၤဆူ ၡူၢ်လီၤ.+ ၈ ဒီးအဝဲ တဲဝဲလၢ “နီၢ်စၤရဲ အကုၢ်မုၣ်​ နီၢ်ဟၤကၢ်ဧၢ, နဟဲလၢ တၢ်လီၢ်ဖဲလဲၣ်​ ဒီးနကလဲၤဖဲလဲၣ်.” နီၢ်ဟၤကၢ် တဲဝဲလၢ “ယဃ့ၢ်ဟးထီၣ်ကွံာ်လၢ ယကစၢ်မုၣ်​ နီၢ်စၤရဲအအိၣ်လီၤ.” ၉ ဒီးယဟိဝၤယွၤ အမူခိၣ်ကလူး တဲအီၤလၢ “က့ၤကဒါက့ၤလၢ နကစၢ်မုၣ်အအိၣ်​ ဒီးဆီၣ်လီၤနသးလၢ အဖီလာ်တက့ၢ်.” ၁၀ ဝံၤဒီးယဟိဝၤယွၤ အမူခိၣ်ကလူး တဲဝဲလၢ “ယကမၤအါထီၣ်​ နချံနသၣ်​ အါအါဂီၢ်ဂီၢ် တုၤလၢပှၤဂံၢ်အီၤ တသ့ဘၣ်န့ၣ်လီၤ.”+ ၁၁ ဒီးယဟိဝၤယွၤ အမူခိၣ်ကလူး ဆဲးတဲဝဲလၢ “နဒၢထီၣ်လံအဃိ နကအိၣ်ဖျဲၣ်ထီၣ်​ နဖိခွါတဂၤလီၤ. နကဘၣ်ကိးန့ၢ် အမံၤလၢ စီၤယံးၡမၤဧ့လး,* မ့ၢ်လၢ ယဟိဝၤယွၤ နၢ်ဟူလၢ နတူၢ်ဘၣ်​ တၢ်နးတၢ်ဖှီၣ်လံ အဃိလီၤ. ၁၂ အဝဲ ကမၤအသးဒ် ကသ့ၣ်ယီၤမံၤတဒု အသိးလီၤ. အစု ကထီဒါ ပှၤကိးဂၤဒဲး ဒီးပှၤကိးဂၤဒဲးအစု ကထီဒါအီၤလီၤ. ဒီးအဝဲကအိၣ်လီၤဖးဒီး အဒီပုၢ်ဝဲၢ်ခွါ ခဲလၢာ်လီၤ.”

၁၃ နီၢ်ဟၤကၢ် ကိးထီၣ်ယဟိဝၤယွၤအမံၤ ဒီးတဲအီၤလၢ “နမ့ၢ်ကစၢ်ယွၤလၢ အထံၣ်တၢ်”+ မ့ၢ်လၢ နီၢ်ဟၤကၢ် တဲလီၤအသးလၢ “ကစၢ်လၢ အထံၣ်ယၤန့ၣ်​ မ့ၢ်ယထံၣ်အီၤဖဲအံၤ အနီၢ်ကီၢ်ဧါ.” ၁၄ လၢတၢ်ဂ့ၢ်အံၤအဃိ ထံကမျၢ* အံၤဘၣ်တၢ်ကိးအီၤလၢ ဘ့ၤလဧရိၤလီၤ. (ထံကမျၢအံၤ အိၣ်လၢ ကၤဒ့ၣ်ဒီးဘ့ရ့း အဘၢၣ်စၢၤ.) ၁၅ နီၢ်ဟၤကၢ် အိၣ်ဖျဲၣ်ထီၣ်န့ၢ် စီၤအၤဘြၣ်​ အဖိခွါတဂၤလီၤ. ဒီးစီၤအၤဘြၣ်​ ကိးန့ၢ်အဖိခွါ အမံၤလၢ စီၤယံးၡမၤဧ့လးလီၤ.+ ၁၆ ဖဲနီၢ်ဟၤကၢ် အိၣ်ဖျဲၣ်ထီၣ်န့ၢ် စီၤအၤဘြၣ်​ အဖိခွါ စီၤယံးၡမၤဧ့လးအခါ စီၤအၤဘြၣ်​ အိၣ်ဝဲ ၈၆ နံၣ်လီၤ.

၁၇ ဖဲစီၤအၤဘြၣ်​ အသးအိၣ်​ ၉၉ နံၣ်အခါ ယဟိဝၤယွၤ လီၣ်ဖျါထီၣ်အသး လၢအအိၣ်​ ဒီးတဲအီၤလၢ “ယမ့ၢ်သ့တၢ်လၢာ် ကစၢ်ယွၤလီၤ. လဲၤတၢ်လၢ ယမဲာ်ညါ ဒီးပာ်ဖျါထီၣ်လၢ နမ့ၢ်ပှၤတဂၤလၢ တၢ်ပာ်ဒ့ၣ်ပာ်ကမၣ်အီၤအလီၢ် တအိၣ်ဘၣ်တက့ၢ်. ၂ ယကမၤဂၢၢ်ကျၢၤ ယတၢ်အၢၣ်လီၤအီလီၤဒီးနၤ+ ဒီးယကမၤအါထီၣ်​ နချံနသၣ်​ အါအါဂီၢ်ဂီၢ်လီၤ.”+

၃ ဖဲန့ၣ်​ စီၤအၤဘြၣ်​ ထိၣ်လီၤပှီၤအသး ဒီးကစၢ်ယွၤ ဆဲးတဲအီၤလၢ ၄ “ကနၣ်လၢအံၤ, ယမၤတၢ်အၢၣ်လီၤအီလီၤဒီးနၤ+ ဒီးနကကဲထီၣ်​ ပှၤအါကလုာ်အပၢ် သပှၢ်ကတၢၢ်လီၤ.+ ၅ တၢ်တကိး နမံၤလၢ စီၤအၤဘြၣ်* လၢၤဘၣ်. တၢ်ကကိးနမံၤလၢ စီၤအၤဘြၤဟၣ်* မ့ၢ်လၢ ယကဒုးကဲထီၣ်နၤလၢ ပှၤအါကလုာ်အပၢ် အဃိလီၤ. ၆ ယကဒုးသၣ်ထီၣ်နၤ အါအါဂီၢ်ဂီၢ် ဒ်သိး ပှၤအကလုာ်တဖၣ်​ ကဟဲလီၤစၢၤလီၤသွဲၣ်လၢနၤ ဒီးစီၤပၤတဖၣ်​ ကလီၤစၢၤလီၤသွဲၣ်​ လၢနၤအဂီၢ်လီၤ.+

၇ “ယကမၤလၢထီၣ်ပှဲၤထီၣ်​ ယတၢ်အၢၣ်လီၤအီလီၤဒီးနၤ+ လၢအဘၣ်ထွဲစ့ၢ်ကီးဒီး နချံနသၣ်​ လၢစိၤလၢအကဟဲလၢ ခါဆူညါတဖၣ်လီၤ. တၢ်အၢၣ်လီၤအီလီၤအံၤ မ့ၢ်ဝဲ တၢ်အၢၣ်လီၤအီလီၤ အထူအယိာ် ဒ်သိးယကမ့ၢ် ကစၢ်ယွၤ လၢနၤဒီးနချံနသၣ်​ အဂီၢ်န့ၣ်လီၤ. ၈ ဒီးကီၢ်တဘ့ၣ်လၢ နအိၣ်နဆိး လၢအပူၤ ဒ်ပှၤထံဂၤကီၢ်ဂၤဖိအသိး+ လၢအမ့ၢ် ကီၢ်ကနၤဧၣ်ဒီဘ့ၣ်ညါန့ၣ်​ ယကဟ့ၣ်လီၤနၤ ဒီးနချံနသၣ်​ ဒီးအကကဲထီၣ်သုတၢ် အစိၤစိၤအဃၣ်ဃၣ်လီၤ. ဒီးယကမ့ၢ် အဝဲသ့ၣ်​ အကစၢ်ယွၤလီၤ.”+

၉ ကစၢ်ယွၤတဲဘၣ်​ စီၤအၤဘြၤဟၣ်လၢ “မ့မ့ၢ်နၤန့ၣ်​ နကဘၣ်မၤဒ် ယတၢ်အၢၣ်လီၤအီလီၤအသိးလီၤ. ဒီးနချံနသၣ်​ လၢစိၤလၢအကဟဲလၢ ခါဆူညါတဖၣ်န့ၣ်​ ကဘၣ်မၤဝဲဒ်န့ၣ်​ စ့ၢ်ကီးလီၤ. ၁၀ တၢ်အၢၣ်လီၤအီလီၤလၢ ယၤဒီးသု အဘၢၣ်စၢၤလၢ နၤဒီးနစၢၤနသွဲၣ်တဖၣ်​ ကဘၣ်မၤထွဲဝဲန့ၣ်​ မ့ၢ်ဝဲ ပှၤပိာ်ခွါလၢ အအိၣ်ဒီးသု ခဲလၢာ်န့ၣ်​ ကဘၣ်ဒိး တၢ်ကူးတရံးလီၤ.+ ၁၁ သုကဘၣ်ဒိး ကူးတရံး သုတၢ်ခိၣ်ဖံးလီၤ. ဒီးအကကဲထီၣ်​ တၢ်ပနီၣ်လၢ အဘၣ်ဃးဒီး ယတၢ်အၢၣ်လီၤအီလီၤဒီးသုလီၤ.+ ၁၂ စိၤလၢအကဟဲလၢ ခါဆူညါတဖၣ်န့ၣ်​ ပှၤပိာ်ခွါလၢ သုကျါကိးဂၤဒဲး ကဘၣ်ဒိးတၢ်ကူးတရံး ဖဲအဝဲသ့ၣ်​ ပှဲၤထီၣ်ဃိးသီအခါလီၤ.+ ပှၤလၢအအိၣ်ဖျဲၣ်ထီၣ်​ လၢဟံၣ်ပူၤမ့ၢ်ဂ့ၤ, ပှၤလၢသုပှ့ၤအီၤဒီးစ့လၢ ပှၤထံဂၤကီၢ်ဂၤဖိအအိၣ်​ လၢအတမ့ၢ် နချံနသၣ်ဘၣ်မ့ၢ်ဂ့ၤ ကဘၣ်မၤဝဲဒ်န့ၣ်လီၤ. ၁၃ ပှၤပိာ်ခွါလၢ အအိၣ်ဖျဲၣ်ထီၣ်လၢ နဟံၣ်ပူၤ ကိးဂၤဒဲး ဒီးပှၤပိာ်ခွါလၢ နပှ့ၤအီၤဒီးနစ့ ကိးဂၤဒဲး ကဘၣ်တၢ်ကူးတရံးအီၤလီၤ.+ ဒီးယတၢ်အၢၣ်လီၤအီလီၤလၢ အအိၣ်လၢ သုဖံးသုညၣ်အပူၤန့ၣ်​ ကမ့ၢ်တၢ်အၢၣ်လီၤအီလီၤ လၢအအိၣ်ဂၢၢ်ဆိးကျၢၤဝဲလီၤ. ၁၄ ပှၤပိာ်ခွါတဂၤဂၤ မ့ၢ်တဒိး ကူးတရံး အတၢ်ခိၣ်ဖံးဘၣ်န့ၣ်​ အဝဲကဘၣ်​ တၢ်မၤသံကွံာ်အီၤ မ့ၢ်လၢ အဝဲမၤဟးဂီၤ ယတၢ်အၢၣ်လီၤအီလီၤ အဃိလီၤ.”

၁၅ ဒီးကစၢ်ယွၤ တဲဘၣ်စီၤအၤဘြၤဟၣ်လၢ “မ့မ့ၢ်နမါ နီၢ်စၤရဲန့ၣ်*+ နတဘၣ်ကိးအီၤလၢ နီၢ်စၤရဲလၢၤဘၣ်. အမံၤကမ့ၢ်ဝဲ နီၢ်စၤရါလီၤ.* ၁၆ ယကဆိၣ်ဂ့ၤအီၤ ဒီးယကဟ့ၣ်လီၤနၤ ဖိခွါတဂၤ ခီဖျိလၢအီၤလီၤ.+ ယကဆိၣ်ဂ့ၤအီၤ ဒီးပှၤအကလုာ်တဖၣ်​ ဒီးပှၤဂီၢ်မုၢ်တဖၣ်​ အစီၤပၤတဖၣ်န့ၣ်​ ကဟဲလီၤစၢၤလီၤသွဲၣ်​ လၢအီၤလီၤ.” ၁၇ ဒီးစီၤအၤဘြၤဟၣ်​ ထိၣ်လီၤပှီၤအသး ဒီးနံၤထီၣ်​ ဒီးတဲလီၤအသးလၢ+ “ပိာ်ခွါလၢ အသးအိၣ်အနံၣ်​ ၁၀၀ န့ၣ်​ အဖိကအိၣ်ဒံးဧါ. ဒီးနီၢ်စၤရါ လၢအသးအိၣ်​ အနံၣ်​ ၉၀ န့ၣ်​ မ့ၢ်အကအိၣ်ဖျဲၣ်ထီၣ်​ အဖိဒံးဧါ.”+

၁၈ အဃိ စီၤအၤဘြၤဟၣ်​ တဲယွၤအမ့ၢ်အတီတဂၤလၢ “မ်စီၤယံးၡမၤဧ့လး န့ၢ်ဘၣ်တၢ်ဆိၣ်ဂ့ၤတက့ၢ်.”+ ၁၉ ဒီးကစၢ်ယွၤ တဲဝဲလၢ “နမါနီၢ်စၤရါ ကအိၣ်ဖျဲၣ်ထီၣ်န့ၢ်နၤ ဖိခွါတဂၤ သပှၢ်ကတၢၢ် ဒီးနကဘၣ်ကိးန့ၢ် အမံၤလၢ စီၤအံၤစဲးလီၤ.*+ ဒီးယကမၤဂၢၢ်မၤကျၢၤ ယတၢ်အၢၣ်လီၤအီလီၤဒီးအီၤလီၤ. ဒီးကမ့ၢ်ဝဲ တၢ်အၢၣ်လီၤအီလီၤ အထူအယိာ် လၢအီၤ ဒီးအချံအသၣ်တဖၣ်​ အဂီၢ်လီၤ.+ ၂၀ မ့မ့ၢ် ဘၣ်ဃးဒီး စီၤယံးၡမၤဧ့လးန့ၣ်​ ယနၢ်ဟူ နတၢ်ကတိၤလံ. ယကဆိၣ်ဂ့ၤအီၤ ဒီးယကဒုးသၣ်ထီၣ်အီၤ ဒီးယကမၤအါထီၣ်​ အဖိအလံၤတဖၣ်​ အါအါဂီၢ်ဂီၢ်လီၤ. အဝဲကကဲထီၣ်​ ပှၤခိၣ်ပှၤနၢ် ၁၂ ဂၤအပၢ် ဒီးယကဒုးကဲထီၣ်အီၤလၢ ပှၤကလုာ်ဖးဒိၣ်​ တကလုာ်လီၤ.+ ၂၁ ဒီးယကမၤဂၢၢ်မၤကျၢၤ ယတၢ်အၢၣ်လီၤအီလီၤဒီး စီၤအံၤစဲးလီၤ.+ နီၢ်စၤရါ ကအိၣ်ဖျဲၣ်ထီၣ်န့ၢ်နၤ ပှၤတဂၤအံၤလၢ လၢခံတနံၣ်​ ဖဲအဆၢကတီၢ် ဒ်အံၤန့ၣ်လီၤ.”+

၂၂ ဖဲကစၢ်ယွၤ တဲတၢ်ဒီး စီၤအၤဘြၤဟၣ်ဝံၤအခါ အဝဲဟးထီၣ်ကွံာ် လၢစီၤအၤဘြၤဟၣ်​ အအိၣ်လီၤ. ၂၃ ဖဲနံၤအဝဲန့ၣ်န့ၣ်​ စီၤအၤဘြၤဟၣ်​ ကိးထီၣ်အဖိခွါ စီၤယံးၡမၤဧ့လး, ပှၤပိာ်ခွါလၢ အအိၣ်ဖျဲၣ်ထီၣ်လၢ အဟံၣ်ပူၤ ကိးဂၤဒဲး, ပှၤလၢအပှ့ၤဝဲဒီးစ့ ကိးဂၤဒဲး ဒီးပှၤပိာ်ခွါလၢ အအိၣ်လၢအဟံၣ်ပူၤ ကိးဂၤဒဲး ဒီးစီၤအၤဘြၤဟၣ်​ ကူးတရံးဝဲ အဝဲသ့ၣ်​ အတၢ်ခိၣ်ဖံး ဒ်ကစၢ်ယွၤ တဲတ့ၢ်အီၤအသိးန့ၣ်လီၤ.+ ၂၄ ဖဲစီၤအၤဘြၤဟၣ်​ ဒိးတၢ်ကူးတရံးအခါ အသးအိၣ်​ ၉၉ နံၣ်လီၤ.+ ၂၅ ဒီးဖဲအဖိခွါ စီၤယံးၡမၤဧ့လး ဒိးတၢ်ကူးတရံးအခါ အသးအိၣ်​ ၁၃ နံၣ်လီၤ.+ ၂၆ ဖဲမုၢ်နံၤအဝဲန့ၣ်န့ၣ်​ စီၤအၤဘြၤဟၣ်​ ဒီးအဖိခွါ စီၤယံးၡမၤဧ့လး ဒိးတၢ်ကူးတရံးလီၤ. ၂၇ စီၤအၤဘြၤဟၣ်​ ဒီးပှၤပိာ်ခွါလၢ အအိၣ်လၢအဟံၣ်ပူၤ ကိးဂၤဒဲး, ပှၤပိာ်ခွါလၢ အအိၣ်ဖျဲၣ်ထီၣ်လၢ အဟံၣ်ပူၤ ကိးဂၤဒဲး ဒီးပှၤလၢအပှ့ၤဝဲဒီးစ့ ကိးဂၤဒဲးန့ၣ်​ ဒိးတၢ်ကူးတရံးလီၤ.

၁၈ လၢခံန့ၣ်​ ယဟိဝၤယွၤ+ လီၣ်ဖျါထီၣ်အသးလၢ စီၤအၤဘြၤဟၣ်အအိၣ်​ လၢမးမရ့ အသ့ၣ်ထူၣ်​ ဖးဒိၣ်တဖၣ်အကျါလီၤ.+ ဖဲန့ၣ်အခါ အဝဲဆ့ၣ်နီၤလၢ ဒဲအကျဲစၢၤ ဒီးဘၣ်ဖဲ မုၢ်ကိၢ်ထီၣ်​ အဆူၣ်ကတၢၢ် အဆၢကတီၢ်လီၤ. ၂ အဝဲကွၢ်ထီၣ်တၢ် ဒီးထံၣ်ဘၣ်​ ပိာ်ခွါသၢဂၤ ဆၢထၢၣ်ဝဲ တယံၤတဘူးဒီးအီၤလီၤ.+ ဖဲစီၤအၤဘြၤဟၣ်ထံၣ်​ အဝဲသ့ၣ်အခါ အဝဲလဲၤဃ့ၢ်သဂၢၢ် အဝဲသ့ၣ်အခိၣ်​ ဒီးထိၣ်လီၤပှီၤအသး လၢဟီၣ်ခိၣ်လိၤလီၤ. ၃ ဒီးအဝဲတဲဝဲလၢ “ယဟိဝၤယွၤဧၢ,* နမ့ၢ်ဘၣ်သူၣ်ဘၣ်သးယၤန့ၣ်​ ဝံသးစူၤ တဘၣ်လဲၤတလၢကွံာ် နခ့နပှၤ ယၤအံၤတဂ့ၤ. ၄ ဝံသးစူၤ ပျဲပှၤဟဲစိာ် ထံတစဲး ဒီးသ့န့ၢ်သုခီၣ်တက့ၢ်.+ ဒီးအိၣ်ဘှံးလၢ သ့ၣ်ခီၣ်ထံးမီၤ. ၅ သုဟဲဖဲအံၤလၢ သုခ့သုပှၤ ယၤအံၤအအိၣ်​ အဃိ ဟ့ၣ်ယၤအခွဲးလၢ ယကဟဲစိာ် ကိၣ်တစဲး ဒ်သိး သုဂံၢ်သုဘါ ကထီၣ်အဂီၢ်တက့ၢ်. ဝံၤဒီး သုဆဲးလဲၤတၢ် သ့ဝဲလီၤ.” ဖဲန့ၣ်​ အဝဲသ့ၣ်​ တဲဝဲလၢ “ဂ့ၤလံ, နမၤဒ် နတဲအသိးသ့လီၤ.”

၆ အဃိ စီၤအၤဘြၤဟၣ်​ ကရီလဲၤလၢ နီၢ်စၤရါအအိၣ်​ လၢဒဲပူၤ ဒီးတဲဝဲလၢ “မၤမ့ၢ်ချ့, ဟံးန့ၢ်ကိၣ်ကမူၣ်​ လၢအဂ့ၤ သၢစ့အၤ,* စံၢ်ဃါအီၤ ဒီးတ့ထီၣ်ကိၣ်တက့ၢ်.” ၇ ဒီးစီၤအၤဘြၤဟၣ်​ လဲၤဃ့ၢ်လၢ ဆၣ်ဖိကီၢ်ဖိတဖၣ်အအိၣ်​ ဒီးဃုထၢဝဲ ကျီၢ်ဖါဖိလၢ အဂ့ၤဒီးအညၣ်ကပုာ်လုး တဒုလီၤ. ဒီးအဝဲဟ့ၣ်လီၤဝဲ အခ့အပှၤ ဒ်သိးကဖီဝဲ ချ့ချ့အဂီၢ်လီၤ. ၈ ဒီးစီၤအၤဘြၤဟၣ်​ ဟံးန့ၢ်ထီပး, တၢ်နုၢ်ထံ ဒီးကျီၢ်ညၣ်လၢ အကတဲာ်ကတီၤပာ်စၢၤဝဲ ဒီးပာ်လီၤဝဲ တၢ်အီၣ်တၢ်အီလၢ အဝဲသ့ၣ်​ အမဲာ်ညါလီၤ. ဒီးဖဲအဝဲသ့ၣ်​ အီၣ်တၢ်အခါ စီၤအၤဘြၤဟၣ်​ ဆၢထၢၣ်​ ဘူးဒီးအဝဲသ့ၣ်လၢ သ့ၣ်ခီၣ်ထံးလီၤ.+

၉ ဒီးအဝဲသ့ၣ်​ တဲအီၤလၢ “နမါနီၢ်စၤရါ အိၣ်ဖဲလဲၣ်.”+ ဒီးအဝဲ တဲဆၢဝဲလၢ “အိၣ်လၢဒဲပူၤလီၤ.” ၁၀ အဃိ လၢအဝဲသ့ၣ်အကျါတဂၤန့ၣ်​ တဲဝဲလၢ “လၢခံတနံၣ်​ ဖဲအဆၢကတီၢ်ဒ်အံၤအခါန့ၣ်​ ယကဟဲက့ၤကဒါက့ၤ လၢနအိၣ်​ သပှၢ်ကတၢၢ်လီၤ. ဒီးနမါ နီၢ်စၤရါ ကအိၣ်ဒီး အဖိခွါတဂၤလီၤ.”+ နီၢ်စၤရါ ဒိကနၣ်​ တၢ်လၢဒဲအကျဲစၢၤ လၢပှၤပိာ်ခွါတဂၤအံၤ အလီၢ်ခံလီၤ. ၁၁ ဒီးစီၤအၤဘြၤဟၣ်​ ဒီးနီၢ်စၤရါ အသးပှၢ်လံ+ ဒီးနီၢ်စၤရါ အလုၢ်အလၢ် တဟဲလၢၤဘၣ်.+ ၁၂ အဃိ နီၢ်စၤရါ နံၤဝဲလၢအသးပူၤ ဒီးတဲဝဲလၢ “ယသးပှၢ်သဃဲးလံ ဒီးယကစၢ်န့ၣ်​ အသးပှၢ်စ့ၢ်ကီးလံအဃိ မ့ၢ်ယကန့ၢ်ဘၣ်​ တၢ်သူၣ်မံသးမုာ်အံၤ နီၢ်ကီၢ်ဧါ.”+ ၁၃ ဒီးယဟိဝၤယွၤ တဲစီၤအၤဘြၤဟၣ်လၢ “ဘၣ်မနုၤအဃိ နီၢ်စၤရါ နံၤဒီးတဲဝဲလၢ ‘ယသးပှၢ်လံဒၢး, ယကအိၣ်ဖျဲၣ်ထီၣ်ယဖိ နီၢ်ကီၢ်ဧါ’ န့ၣ်လဲၣ်. ၁၄ တၢ်လၢ ယဟိဝၤယွၤ မၤဝဲတသ့ဘၣ်န့ၣ်​ ကအိၣ်တမံၤမံၤဧါ.+ လၢခံတနံၣ်​ ဖဲတၢ်ဆၢကတီၢ်ဒ်အံၤအခါ ယကဟဲက့ၤကဒါက့ၤ လၢနအိၣ်​ ဒီးနီၢ်စၤရါ ကအိၣ်ဒီး အဖိခွါတဂၤလီၤ.” ၁၅ ဘၣ်ဆၣ်​ မ့ၢ်လၢနီၢ်စၤရါ ပျံၤတၢ်အဃိ အဝဲတဲဝဲလၢ “ယတနံၤဘၣ်.” ဒီးကစၢ်ယွၤ တဲအီၤလၢ “တမ့ၢ်ဘၣ်, နနံၤလီၤ.”

၁၆ ဖဲပှၤပိာ်ခွါတဖၣ်​ ကက့ၤအခါ စီၤအၤဘြၤဟၣ်​ လဲၤဆှၢအဝဲသ့ၣ်​ လၢကျဲတကူာ် ဒီးပှၤပိာ်ခွါတဖၣ်န့ၣ်​ ကွၢ်ဃီၤတၢ် လၢဝ့ၢ်စဒိၣ်လီၤ.+ ၁၇ ယဟိဝၤယွၤ တဲဝဲလၢ “တၢ်လၢယကမၤန့ၣ်​ မ့ၢ်ယကြၢးပာ်ခူသူၣ်အီၤလၢ စီၤအၤဘြၤဟၣ်အမဲာ်ညါဒံးဧါ.+ ၁၈ တၢ်လၢ စီၤအၤဘြၤဟၣ်တဂၤအံၤန့ၣ်​ ကကဲထီၣ်​ ပှၤကလုာ်ဖးဒိၣ်တကလုာ် သပှၢ်ကတၢၢ် ဒီးပှၤကိးကလုာ်ဒဲး လၢဟီၣ်ခိၣ်ချၢ ကဘၣ်တၢ်ဆိၣ်ဂ့ၤ ခီဖျိလၢအီၤ အဃိလီၤ.+ ၁၉ ဒီးယသုးဘူးယသးဆူအအိၣ်​ ဒ်သိး အဝဲကမၤလိာ် အဖိခွါတဖၣ်​ ဒီးအစၢၤအသွဲၣ်​ လၢကပိာ် ယဟိဝၤယွၤအကျဲ ခီဖျိလၢ အမၤတၢ်အဘၣ်​ ဒီးတၢ်တီတၢ်လိၤန့ၣ်လီၤ.+ မ့မ့ၢ်ဒ်န့ၣ်န့ၣ်​ ယဟိဝၤယွၤ ကမၤတၢ်လၢ အအၢၣ်လီၤ စီၤအၤဘြၤဟၣ်န့ၣ်လီၤ.”

၂၀ ဒီးယဟိဝၤယွၤ တဲဝဲလၢ “တၢ်ကဒူးကဒ့ၣ်တၢ် ဘၣ်ဃးဒီး ဝ့ၢ်စဒိၣ်ဒီး ဂမိရၤန့ၣ်​ အိၣ်ဝဲဒီဒူၣ်+ ဒီးအဝဲသ့ၣ်​ အတၢ်ဒဲးဘးန့ၣ်​ အၢမးလီၤ.+ ၂၁ ယကလဲၤလီၤ ဒ်သိးယကထံၣ်လၢ မ့ၢ်အဝဲသ့ၣ်​ မၤဝဲဒ် တၢ်ကဒူးကဒ့ၣ်လၢ ယနၢ်ဟူဘၣ်အီၤ အသိးဧါန့ၣ်လီၤ. ဒီးမ့ၢ်အမ့ၢ်ဧါ တမ့ၢ်ဧါန့ၣ်​ ယကသ့ၣ်ညါဘၣ်လီၤ.”+

၂၂ ဒီးပှၤပိာ်ခွါတဖၣ်န့ၣ်​ ဟးထီၣ်ဖဲန့ၣ်​ ဒီးလဲၤဝဲလၢ ဝ့ၢ်စဒိၣ်လီၤ. ဘၣ်ဆၣ်​ မ့မ့ၢ် ယဟိဝၤယွၤန့ၣ်+ အိၣ်တ့ၢ်ဝဲဒီး စီၤအၤဘြၤဟၣ်လီၤ. ၂၃ စီၤအၤဘြၤဟၣ်​ သုးဘူးဃီၤအသး ဒီးတဲဝဲလၢ “နကမၤဟးဂီၤကွံာ် ပှၤတီပှၤလိၤ ဃုာ်ဒီးပှၤအၢပှၤသီ သပှၢ်ကတၢၢ်ဧါ.+ ၂၄ အဒိ ပှၤတီပှၤလိၤ အဂၤ ၅၀ မ့ၢ်အိၣ်ဘၣ်ဖုး လၢဝ့ၢ်ပူၤန့ၣ်​ မ့ၢ်နကမၤဟးဂီၤ အဝဲသ့ၣ်​ ခဲလၢာ်ဧါ. နတပျဲပူၤဖျဲး ဝ့ၢ်တဖျၢၣ်အံၤလၢ ပှၤတီပှၤလိၤ အဂၤ ၅၀ အဃိဘၣ်ဧါ. ၂၅ နတမ့ၢ်ပှၤလၢ အကမၤသံ ပှၤတီပှၤလိၤ ဃုာ်ဒီးပှၤတတီတလိၤ ဒ်န့ၣ်​ နီတဘျီဘၣ်.+ ဒီးတမ့ၢ်လၢ နကပျဲ ပှၤတီပှၤလိၤ ကဲထီၣ်အသး ဒ်ပှၤတတီတလိၤအသိး နီတဘျီဘၣ်.+ ဟီၣ်ခိၣ်ဒီဘ့ၣ်ညါ အပှၤစံၣ်ညီၣ်ကွီၢ်န့ၣ်​ ကမၤတၢ်တီတီလိၤလိၤ တမ့ၢ်ဘၣ်ဧါ.”+ ၂၆ ဒီးယဟိဝၤယွၤ တဲဝဲလၢ “ယမ့ၢ်ထံၣ်န့ၢ် ပှၤတီပှၤလိၤ အဂၤ ၅၀ လၢဝ့ၢ်စဒိၣ်အပူၤန့ၣ်​ ယကပျဲပူၤဖျဲး ဝ့ၢ်ဒီတဖျၢၣ်​ လၢအဝဲသ့ၣ်​ အဃိလီၤ.” ၂၇ ဘၣ်ဆၣ်​ စီၤအၤဘြၤဟၣ်​ တဲဆၢအီၤလၢ “ယဟိဝၤယွၤဧၢ, ယမ့ၢ်ဒၣ်ဟီၣ်ခိၣ်ကမူၣ်​ ဒီးဖၣ်ဆါကမူၣ်​ ဘၣ်ဆၣ်​ ဝံသးစူၤ ပျဲယတဲကဒီးတၢ် တက့ၢ်. ၂၈ ပှၤတီပှၤလိၤ ကပှဲၤ အဂၤ ၅၀ အဂီၢ် ဘၣ်သ့ၣ်သ့ၣ်​ ကလိၣ်ဝဲ ယဲၢ်ဂၤလီၤ. မ့မ့ၢ်ဒ်န့ၣ်န့ၣ်​ မ့ၢ်နကမၤဟးဂီၤ ဝ့ၢ်ဒီတဝ့ၢ် ခီဖျိလၢ အလိၣ်ဒံး ပှၤယဲၢ်ဂၤ အဃိဧါ.” ဒီးကစၢ်ယွၤ တဲဝဲလၢ “ယမ့ၢ်ထံၣ်န့ၢ် ပှၤတီပှၤလိၤ ၄၅ ဂၤဖဲဝ့ၢ်ပူၤန့ၣ်​ ယတမၤဟးဂီၤ ဝ့ၢ်အံၤဘၣ်.”+

၂၉ ဘၣ်ဆၣ်​ စီၤအၤဘြၤဟၣ်​ တဲကဒီးအီၤလၢ “ပှၤတီပှၤလိၤ အဂၤ ၄၀ မ့ၢ်အိၣ်ဘၣ်ဖုး ဖဲန့ၣ်မီၤ.” ဒီးကစၢ်ယွၤ တဲဆၢအီၤလၢ “ပှၤတီပှၤလိၤ မ့ၢ်အိၣ်ဝဲ အဂၤ ၄၀ န့ၣ်​ ယတမၤဟးဂီၤ ဝ့ၢ်အံၤဘၣ်.” ၃၀ ဘၣ်ဆၣ်​ စီၤအၤဘြၤဟၣ်​ ဆဲးတဲဝဲလၢ “ယဟိဝၤယွၤဧၢ, ဝံသးစူၤ သးထီၣ်တၢ်တဂ့ၤ.+ ဟ့ၣ်ယၤအခွဲးလၢ ယကတဲကဒီးတၢ်တက့ၢ်. ပှၤတီပှၤလိၤ အဂၤ ၃၀ မ့ၢ်အိၣ်ဘၣ်ဖုးဖဲန့ၣ်မီၤ.” ဒီးကစၢ်ယွၤ တဲဆၢဝဲလၢ “ယမ့ၢ်ထံၣ်န့ၢ် ပှၤတီပှၤလိၤ အဂၤ ၃၀ ဖဲဝ့ၢ်ပူၤန့ၣ်​ ယတမၤဟးဂီၤ ဝ့ၢ်အံၤဘၣ်.” ၃၁ ဘၣ်ဆၣ်​ စီၤအၤဘြၤဟၣ် တဲကဒီးအီၤလၢ “ယဟိဝၤယွၤဧၢ, ဝံသးစူၤ ပျဲယတဲကဒီးတၢ် တက့ၢ်. ပှၤတီပှၤလိၤ အဂၤ ၂၀ မ့ၢ်အိၣ်ဘၣ်ဖုးဖဲန့ၣ်မီၤ.” ဒီးကစၢ်ယွၤ တဲဆၢဝဲလၢ “ပှၤတီပှၤလိၤ မ့ၢ်အိၣ်ဝဲအဂၤ ၂၀ န့ၣ်ယတမၤဟးဂီၤ ဝ့ၢ်အံၤဘၣ်.” ၃၂ လၢခံကတၢၢ်န့ၣ်​ စီၤအၤဘြၤဟၣ်တဲဝဲလၢ “ယဟိဝၤယွၤဧၢ, ဝံသးစူၤ သးဒိၣ်ထီၣ်တၢ်တဂ့ၤ. ဟ့ၣ်ယၤအခွဲးလၢ ယကတဲတၢ်တဘျီဒံး. ပှၤတီပှၤလိၤ အဂၤတဆံ မ့ၢ်အိၣ်ဘၣ်ဖုးဖဲန့ၣ်မီၤ.” ကစၢ်ယွၤ တဲဆၢဝဲလၢ “ပှၤတီပှၤလိၤ မ့ၢ်အိၣ်ဝဲ အဂၤတဆံန့ၣ်​ ယတမၤဟးဂီၤ ဝ့ၢ်အံၤဘၣ်.” ၃၃ ဖဲယဟိဝၤယွၤ တဲတၢ်ဒီး စီၤအၤဘြၤဟၣ်​ ဝံၤအလီၢ်ခံ အဝဲလဲၤတၢ်+ ဒီးစီၤအၤဘြၤဟၣ်​ က့ၤဝဲလၢ အဒဲလီၤ.

၁၉ ဖဲဟါလီၤခီန့ၣ်​ မူခိၣ်ကလူးခံဂၤ လဲၤတုၤလၢ ဝ့ၢ်စဒိၣ်​ ဒီးစီၤလိာ်န့ၣ်​ ဆ့ၣ်နီၤဝဲလၢ ဝ့ၢ်အတြဲၤခီၣ်ထံးလီၤ. ဖဲစီၤလိာ် ထံၣ်အဝဲသ့ၣ်အခါ အဝဲဂဲၤဆၢထၢၣ်​ လဲၤသဂၢၢ်အီၤ ဒီးထိၣ်လီၤပှီၤအသး လၢဟီၣ်ခိၣ်လိၤလီၤ.+ ၂ ဒီးစီၤလိာ် တဲဝဲလၢ “ယကစၢ်သ့ၣ်ဧၢ, ဝံသးစူၤ တနၤအံၤ ဟဲအိၣ်လၢယဟံၣ်​ ဒီးပျဲပှၤသ့န့ၢ် သုခီၣ်တက့ၢ်. ခဲမုၢ်ဆ့ၣ်​ သုပၢၢ်ထီၣ်ဂီၤဂီၤ ဒီးသုဆဲးလဲၤတၢ် သ့ဝဲလီၤ.” အဝဲသ့ၣ်​ တဲဘၣ်အီၤလၢ “ဟၢၤအၢ, ပကအိၣ်​ လၢကျဲပူၤ ဒီတနၤလီၤ.” ၃ ဘၣ်ဆၣ်​ စီၤလိာ်မၢဆူၣ်​ အဝဲသ့ၣ်​ သပှၢ်တၢၢ်အဃိ အဝဲသ့ၣ်​ လဲၤပိာ်အခံ လၢအဟံၣ်လီၤ. ဒီးစီၤလိာ် ကတဲာ်ကတီၤန့ၢ် အဝဲသ့ၣ်​ တၢ်အီၣ်တၢ်အီ ဒီးကုၢ်ဝဲကိၣ်လၢ အတပၣ်ဃုာ်ဒီး ကိၣ်မံၣ်ဘၣ်​ ဒီးအဝဲသ့ၣ်​ အီၣ်တၢ်လီၤ.

၄ တချုးလၢ အဝဲသ့ၣ်​ မံဒံးဘၣ်န့ၣ်​ ပှၤပိာ်ခွါ လၢအအိၣ်လၢ ဝ့ၢ်စဒိၣ်အပူၤ အသးစၢ်မ့ၢ်ဂ့ၤ အသးပှၢ်မ့ၢ်ဂ့ၤ ပာ်ဖှိၣ်ထီၣ်အသး ဒ်ပှၤတဖုဃီအသိး ဒီးအဝဲသ့ၣ်ခဲလၢာ် ဟဲကဝီၤဃာ်ဝဲ စီၤလိာ်အဟံၣ်လီၤ. ၅ ဒီးအဝဲသ့ၣ်​ ကိးထီၣ်ဝဲ စီၤလိာ်တဘျီဝံၤတဘျီ ဒီးတဲဝဲလၢ “ပှၤပိာ်ခွါလၢ အဟဲလၢနအိၣ်​ တနၤအံၤန့ၣ်​ အိၣ်ဖဲလဲၣ်. ဟဲကိးအဝဲသ့ၣ်​ လၢပအိၣ်​ ဒ်သိး ပကမံဃုာ်ဒီးအီၤ အဂီၢ်သၢၤ.”+

၆ ဒီးစီၤလိာ် လဲၤလၢ အဝဲသ့ၣ်အအိၣ်​ ဖဲပဲတြီအခိၣ်ထိး ဒီးကးတံာ်ဃာ် ပဲတြီလၢ အလီၢ်ခံလီၤ. ၇ ဒီးအဝဲတဲဝဲလၢ “ယဒီပုၢ်ဝဲၢ်သ့ၣ်ဧၢ, ဝံသးစူၤ တဘၣ်မၤတၢ် အၢအၢသီသီ ဒ်န့ၣ်တဂ့ၤ. ၈ ယဖိမုၣ်လၢ အတမံဃုာ်ဒီး ပှၤပိာ်ခွါ နီတဘျီဒံးဘၣ်န့ၣ်​ အိၣ်ဖဲအံၤ ခံဂၤလီၤ. ဝံသးစူၤ ပျဲယဟဲကိးထီၣ်​ အဝဲသ့ၣ်​ လၢသုအိၣ်​ ဒ်သိးသုကမၤ အဝဲသ့ၣ်​ ဖဲသုအဲၣ်ဒိးမၤ န့ၣ်တက့ၢ်. မ့မ့ၢ် ပှၤပိာ်ခွါတဖၣ်အံၤန့ၣ်​ မ့ၢ်လၢ အဟဲအိၣ်လၢ ယဟံၣ်ကဒု အဖီလာ်* အဃိ တဘၣ်မၤ အဝဲသ့ၣ်​ နီတမံၤတဂ့ၤ.”+ ၉ ဘၣ်ဆၣ်​ အဝဲသ့ၣ်​ တဲဝဲလၢ “အိၣ်မ့ၢ်ယံၤ.” ဒီးအဝဲသ့ၣ်​ ဆဲးတဲဝဲလၢ “နကဲပှၤထံဂၤကီၢ်ဂၤဖိ လၢအဟဲအိၣ်ဖဲအံၤ ထဲနၤတဂၤလီၤဒၢး, နစံၣ်ညီၣ်ပှၤ ဖးဘူၣ်ညါ. ခဲအံၤ ပကမၤနၤ နးန့ၢ်ဒံး ပကမၤအဝဲသ့ၣ်ဒံး.” ဒီးအဝဲသ့ၣ်​ ဟဲဘၣ်တိဘၣ်ထံး စီၤလိာ် ဒီးသုးဘူးထီၣ်အသး ဒ်သိးကမၤလီၤပှီၢ် ပဲတြီအဂီၢ်လီၤ. ၁၀ ဘၣ်ဆၣ်​ ပှၤပိာ်ခွါခံဂၤ* လၢအအိၣ်လၢ ဟံၣ်ပူၤန့ၣ်​ ယူာ်ဃီၤအစု လၢစီၤလိာ်အအိၣ်​ ဒီးတွံၢ်နုာ်က့ၤအီၤ လၢဟံၣ်ပူၤ လၢအဝဲသ့ၣ်​ အအိၣ်လီၤ. ဒီးအဝဲသ့ၣ်​ ကးတံာ်ဃာ် ပဲတြီလီၤ. ၁၁ ဘၣ်ဆၣ်​ မ့မ့ၢ်ပှၤပိာ်ခွါတဖၣ်​ စးထီၣ်လၢ အဒိၣ်တုၤလၢအဆံး လၢအအိၣ်လၢ ပဲတြီအခိၣ်ထိးန့ၣ်​ အဝဲသ့ၣ်* မၤဘျီၣ်ဝဲ အမဲာ်ခဲလၢာ်လီၤ. အဃိ ပှၤပိာ်ခွါတဖၣ်န့ၣ်​ ဂုာ်ကျဲးစၢး ဃုပဲတြီ တုၤလၢအလီၤဘှံးလီၤတီၤလီၤ.

၁၂ ဒီးပှၤပိာ်ခွါခံဂၤန့ၣ်* တဲဘၣ်စီၤလိာ်လၢ “ဖဲအံၤန့ၣ်​ နဘူးနတံၢ် အိၣ်တဂၤဂၤဒံးဧါ. နမာ်တဖၣ်မ့ၢ်ဂ့ၤ, နဖိမုၣ်တဖၣ်မ့ၢ်ဂ့ၤ, နဖိခွါတဖၣ်မ့ၢ်ဂ့ၤ, နဘူးနတံၢ်လၢ အအိၣ်တ့ၢ် လၢဝ့ၢ်ပူၤ ကိးဂၤဒဲးန့ၣ်​ ဒုးဟးထီၣ်ကွံာ် အဝဲသ့ၣ်လၢ တၢ်လီၢ်အံၤတက့ၢ်. ၁၃ ပကမၤဟးဂီၤ တၢ်လီၢ်အဝဲအံၤ မ့ၢ်လၢ တၢ်ကဒူးကဒ့ၣ်​ တၢ်ဒိၣ်ဒိၣ်မုၢ်မုၢ် ဘၣ်ဃးဒီး ပှၤဝ့ၢ်ဖိတဖၣ်န့ၣ်​ တုၤလၢ ယဟိဝၤယွၤ အအိၣ်အဃိလီၤ.+ လၢတၢ်ဂ့ၢ်အံၤအဃိ ယဟိဝၤယွၤ ဆှၢလီၤပှၤ ဒ်သိး ပကမၤဟးဂီၤ ဝ့ၢ်အံၤလီၤ.” ၁၄ အဃိ စီၤလိာ် လဲၤလၢအမာ်တဖၣ်​ လၢအကဖျီအသးဒီး အဖိမုၣ်တဖၣ်အအိၣ်​ ဒီးတဲဘၣ်​ အဝဲသ့ၣ်​ တဘျီဝံၤတဘျီလၢ “မၤမ့ၢ်ချ့, ယဟိဝၤယွၤ ကမၤဟးဂီၤဝဲ ဝ့ၢ်အံၤအဃိ ဟးထီၣ်ကွံာ် ဖဲအံၤသၢၤ.” ဘၣ်ဆၣ်​ အမာ်တဖၣ်န့ၣ်​ ထံၣ်ဝဲ ဒ်သိးဒီး တၢ်တဲလိာ်ကွဲလီၤ.+

၁၅ တုၤလၢ မုၢ်ဆ့ၣ်ထီၣ်ဂီၤဂီၤန့ၣ်​ မူခိၣ်ကလူးတဖၣ်​ ဂုာ်ကျဲးစၢးဒ်သိး စီၤလိာ် ကမၤကရီတၢ် ဒီးတဲဝဲလၢ “မၤမ့ၢ်ချ့, ကိးဃုာ်ဒီး နမါဒီးနဖိမုၣ်ခံဂၤလၢ အအိၣ်ဖဲအံၤဒီးနၤ ဒ်သိး နသုတတုၤလၢ တၢ်ဟးဂီၤဃုာ်ဒီး ဝ့ၢ်တဖျၢၣ်အံၤ ခီဖျိလၢ အတၢ်ကမၣ်အဃိ တဂ့ၤအဂီၢ်န့ၣ်တက့ၢ်.”+ ၁၆ ဖဲစီၤလိာ် မၤယံာ်မၤနီၢ် အသးဒံးအခါ ခီဖျိလၢ ယဟိဝၤယွၤ သးကညီၤဘၣ်အီၤအဃိ+ ပိာ်ခွါတဖၣ်န့ၣ်​ ဖီၣ်ဃာ်အစု ဒီးအမါအစု ဒီးအဖိမုၣ်ခံဂၤအစု ဒီးဒုးဟးထီၣ်အီၤ ဒီးပာ်အီၤလၢ ဝ့ၢ်ချၢန့ၣ်လီၤ.+ ၁၇ တုၤလၢ ပိာ်ခွါတဖၣ်န့ၣ်​ ဒုးဟးထီၣ်​ အဝဲသ့ၣ်လၢ ဝ့ၢ်ချၢဝံၤအခါန့ၣ်​ ပိာ်ခွါလၢ အဝဲသ့ၣ်အကျါတဂၤ တဲဝဲလၢ “ဃ့ၢ်ပူၤဖျဲးနသးတက့ၢ်. ကွၢ်လီၤ လၢနလီၢ်ခံတဂ့ၤ.+ ဒီးတဘၣ်အိၣ်ပတုာ်လၢ ဟီၣ်ကဝီၤ* ဖဲန့ၣ်နီတပူၤတဂ့ၤ.+ ဒ်သိး နသုတတုၤလၢ တၢ်ဟးဂီၤတဂ့ၤအဂီၢ် လဲၤဃ့ၢ်ပူၤဖျဲးနသးလၢ ကစၢၢ်ကလိကျါတက့ၢ်.”

၁၈ စီၤလိာ် တဲဘၣ်အဝဲသ့ၣ်လၢ “ယဟိဝၤယွၤဧၢ, ဝံၤသးစူၤ ဒုးလဲၤယၤ ဖဲန့ၣ်တဂ့ၤ. ၁၉ ဝံသးစူၤ ခဲအံၤ နခ့နပှၤ ယၤအံၤ ဒိးန့ၢ်ဘၣ်​ နတၢ်ဘၣ်သး ဒီးနပာ်ဖျါထီၣ်​ တၢ်သူၣ်ဂ့ၤသးဝါ လၢယဖီခိၣ်ဒိၣ်မး ခီဖျိလၢ နပာ်မူယၤအဃိလီၤ.+ ဘၣ်ဆၣ်​ ယဘၣ်ယိၣ်တၢ်လၢ တၢ်နးတၢ်ဖှီၣ်​ ကချုးန့ၢ်ယၤဒီး ယကသံဘၣ်ဖုးအဃိ ယလဲၤဃ့ၢ်လၢ ကစၢၢ်ကလိကျါ တသ့ဘၣ်.+ ၂၀ ဝ့ၢ်အိၣ်ဝဲ ဘူးဘူးတဖျၢၣ်လီၤ. အမ့ၢ်ဝဲ ဝ့ၢ်ဆံးဆံးဖိတဖျၢၣ်​ ဒီးယလဲၤဃ့ၢ်ဖဲန့ၣ်​ သ့လီၤ. အဃိ ဝံသးစူၤ, ယလဲၤဃ့ၢ်အိၣ်ဖဲန့ၣ်​ သ့ဧါ. အမ့ၢ်ဝဲ ဝ့ၢ်ဆံးဆံးဖိတဖျၢၣ်​ ဒီးယသးသမူ ကပူၤဖျဲးလီၤ.” ၂၁ အဃိ အဝဲတဲ စီၤလိာ်လၢ “ဂ့ၤလံ. တဘျီအံၤစ့ၢ်ကီး ယဆိကမိၣ်န့ၢ် တၢ်လၢနဂီၢ်အဃိ+ ယတမၤဟးဂီၤ ဝ့ၢ်ဖိလၢ နတဲတဖျၢၣ်န့ၣ်ဘၣ်.+ ၂၂ မၤမ့ၢ်ချ့, ဃ့ၢ်ပူၤဖျဲးနသးဖဲန့ၣ်, နလဲၤမ့ၢ်တတုၤဘၣ်န့ၣ်​ ယမၤတၢ်တသ့ နီတမံၤဒံးဘၣ်.”+ လၢတၢ်န့ၣ်အဃိ အဝဲကိးန့ၢ်ဝဲ ဝ့ၢ်အံၤအမံၤလၢ စိၤဧၢ်လီၤ.+

၂၃ ဖဲစီၤလိာ် လဲၤတုၤဝဲလၢ ဝ့ၢ်စိၤဧၢ်အခါ မုၢ်ဟဲထီၣ်ဝဲလံ. ၂၄ ဝံၤဒီး ယဟိဝၤယွၤ ဒုးစူၤလီၤဝဲ ကးဒီးမ့ၣ်အူ လၢစဒိၣ်ဒီးဂမိရၤ အဖီခိၣ်လီၤ. ဒီးအဝဲအံၤ ဟဲလီၤလၢ ယဟိဝၤယွၤအအိၣ်​ လၢမူခိၣ်လီၤ.+ ၂၅ အဃိ အဝဲမၤဟးဂီၤကွံာ် ဝ့ၢ်တဖၣ်အံၤ ဒီးဟီၣ်ကဝီၤအံၤ ဒီဘ့ၣ်ညါ ဃုာ်ဒီး ကယဲၢ်ပှၤဝ့ၢ်ဖိ ဒီးတၢ်မုၢ်တၢ်ဘိ လၢဟီၣ်ခိၣ်လိၤန့ၣ်လီၤ.+ ၂၆ မ့မ့ၢ် စီၤလိာ်အမါ လၢအအိၣ်လၢ အလီၢ်ခံန့ၣ်​ ကွၢ်ကဒါက့ၤတၢ်လၢ အလီၢ်ခံ ဒီးကဲထီၣ်ဝဲ အံသၣ်ထူၣ်လီၤ.+

၂၇ စီၤအၤဘြၤဟၣ်​ ဂဲၤဆၢထၢၣ်ဂီၤဂီၤ ဒီးလဲၤဝဲလၢ တၢ်လီၢ်လၢ အဝဲဆၢထၢၣ်တ့ၢ် လၢယဟိဝၤယွၤ အမဲာ်ညါန့ၣ်လီၤ.+ ၂၈ ဖဲအဝဲ ကွၢ်လီၤတၢ်လၢ စဒိၣ်ဒီးဂမိရၤအအိၣ်​ ဒီးဟီၣ်ကဝီၤ ဒီဘ့ၣ်ညါအခါ အဝဲထံၣ်ဝဲလၢ မ့ၣ်အူခုၣ်ဖးဒိၣ်​ ဟဲထီၣ်လၢ ဟီၣ်ခိၣ်အဖီခိၣ်​ ဒ်မ့ၣ်အူခုၣ်ဖးဒိၣ်​ ဟဲထီၣ်လၢ ဖၣ်ကပူၤဖးဒိၣ်​ အသိးန့ၣ်လီၤ.+ ၂၉ ဘၣ်ဆၣ်​ ဖဲကစၢ်ယွၤ မၤဟးဂီၤ ဝ့ၢ်တဖၣ်လၢ အအိၣ်လၢ ဟီၣ်ကဝီၤအံၤအခါ မ့ၢ်လၢ ကစၢ်ယွၤနီၣ်ဘၣ်​ စီၤအၤဘြၤဟၣ်​ အဃိ ကစၢ်ယွၤ ဒုးဟးထီၣ်​ စီၤလိာ်လၢ ဝ့ၢ်တဖၣ်လၢ စီၤလိာ်အိၣ်ဆိးတ့ၢ်ဝဲ လၢအပူၤလီၤ.+

၃၀ လၢခံန့ၣ်​ မ့ၢ်လၢစီၤလိာ် အိၣ်လၢ ဝ့ၢ်စိၤဧၢ် တဘူၣ်လၢၤဘၣ်အဃိ+ အဝဲဒီးအဖိမုၣ်ခံဂၤ ဟးထီၣ်လၢ ဝ့ၢ်စိၤဧၢ် ဒီးလဲၤအိၣ်ဝဲလၢ ကစၢၢ်ကလိအကျါလီၤ.+ ဒီးအဝဲ ဒီးအဖိမုၣ်ခံဂၤန့ၣ်​ အိၣ်ဝဲလၢ လ့ကအိအပူၤလီၤ. ၃၁ ဒီးအဖိမုၣ်​ အဝဲၢ်ကိတဂၤန့ၣ်​ တဲဘၣ်​ အဆံးတဂၤလၢ “ပပၢ်န့ၣ်​ အသးပှၢ်လံ. ဖဲတၢ်လီၢ်အံၤန့ၣ်​ ပှၤပိာ်ခွါလၢ ကဆီဟံၣ်ဆီဃီဒီးပှၤ ဒ်ပှၤဂၤမၤဝဲအသိးန့ၣ်​ တအိၣ်နီတဂၤဘၣ်. ၃၂ ဟဲမီၤ, ပကဒုးအီ ပပၢ်လၢ စပံးထံ ဒီးပကမံဃုာ်ဒီးအီၤ ဒီးမၤန့ၢ်ဖိတဖၣ်​ လၢပပၢ်အအိၣ်လီၤ.”

၃၃ အဃိ တၢ်တနၤန့ၣ်​ အဝဲသ့ၣ်​ ဟ့ၣ်ဒုးအီအပၢ် လၢစပံးထံအါမး ဒီးအဖိမုၣ်ဝဲၢ်ကိတဂၤ လဲၤမံဃုာ်ဒီး အပၢ်လီၤ. ဘၣ်ဆၣ်​ ဖဲအဖိမုၣ်​ လဲၤမံနီၤလီၤအခါမ့ၢ်ဂ့ၤ ဂဲၤဆၢထၢၣ်အခါမ့ၢ်ဂ့ၤ အဝဲတသ့ၣ်ညါဘၣ်. ၃၄ ဒီးလၢခံတနံၤန့ၣ်​ အဖိမုၣ်ဝဲၢ်ကိတဂၤ တဲဘၣ်​ အဆံးတဂၤလၢ “ဖဲမနၤကၢာ်န့ၣ်​ ယလဲၤမံဃုာ်ဒီး ပပၢ်လီၤ. တနၤညါအံၤစ့ၢ်ကီး ပကဒုးအီအီၤ စပံးထံလီၤ. ဝံၤဒီး လဲၤမံဃုာ်ဒီးအီၤ ဒီးမ်ပမၤန့ၢ်ဖိတဖၣ်​ လၢပပၢ်အအိၣ်တက့ၢ်.” ၃၅ အဃိ တၢ်တနၤန့ၣ်​ အဝဲသ့ၣ်​ ဒုးအီဝဲအပၢ်လၢ စပံးထံအါမး စ့ၢ်ကီးလီၤ. ဒီးအဖိမုၣ်​ အဆံးတဂၤန့ၣ်​ လဲၤမံဃုာ်ဒီး အပၢ်လီၤ. ဘၣ်ဆၣ်​ ဖဲအဖိမုၣ်​ လဲၤမံနီၤလီၤအခါမ့ၢ်ဂ့ၤ ဂဲၤဆၢထၢၣ်အခါမ့ၢ်ဂ့ၤ အဝဲတသ့ၣ်ညါဘၣ်. ၃၆ အဃိ စီၤလိာ် အဖိမုၣ်ခံဂၤန့ၣ်​ ဒၢထီၣ်ဝဲ ခီဖျိလၢ အပၢ်လီၤ. ၃၇ ဒီးအဖိမုၣ်ဝဲၢ်ကိန့ၣ်​ အိၣ်ဖျဲၣ်ထီၣ်​ အဖိခွါတဂၤ ဒီးကိးန့ၢ်ဝဲအမံၤလၢ စီၤမိၤအး+ ဒီးပှၤမိၤအးဖိတဖၣ်​ ဟဲလီၤစၢၤ လၢအီၤလီၤ.+ ၃၈ မ့မ့ၢ် အဖိမုၣ်လၢ အဆံးတဂၤန့ၣ်​ အိၣ်ဖျဲၣ်ထီၣ်ဝဲ အဖိခွါတဂၤ ဒီးကိးန့ၢ်ဝဲ အမံၤလၢ စီၤဘ့ၣ်ဧၣ်မံ ဒီးပှၤဧၣ်မိၣ်ဖိတဖၣ်န့ၣ်+ ဟဲလီၤစၢၤ လၢအီၤလီၤ.

၂၀ စီၤအၤဘြၤဟၣ်​ လဲၤသုးအဒဲလၢ+ နဲကဲၤ အဟီၣ်ကဝီၤ ဒီးအိၣ်ဝဲလၢ ကၤဒ့ၣ်+ ဒီးၡူၢ်+ အဘၢၣ်စၢၤလီၤ. ဖဲစီၤအၤဘြၤဟၣ်​ အိၣ်ဝဲလၢ ကရၢ်+ အဆၢကတီၢ် ၂ ဘၣ်ဃးဒီး အမါနီၢ်စၤရါန့ၣ်​ အဝဲ တဲကဒီးဝဲလၢ “အဝဲမ့ၢ် ယဒီပုၢ်ဝဲၢ်မုၣ်လီၤ.”+ အဃိ ကရၢ်အစီၤပၤ အဘံၤမ့လ့းန့ၣ်​ မၢပှၤဟဲကိး နီၢ်စၤရါ ဆူအအိၣ်လီၤ.+ ၃ ဖဲန့ၣ်ဝံၤအလီၢ်ခံ လၢမုၢ်နၤခီန့ၣ်​ ကစၢ်ယွၤ ဟဲဝဲလၢ စီၤအဘံၤမ့လ့းအအိၣ်​ လၢတၢ်မံမီၢ်အပူၤ ဒီးတဲအီၤလၢ “ပိာ်မုၣ်တဂၤအံၤ ဆီဟံၣ်ဆီဃီဝံၤလံ ဒီးအကဲပှၤပိာ်ခွါအဂၤတဂၤ အတၢ်လီၤ.+ ဒီးနဟံးန့ၢ်အီၤအဃိ နကဘၣ်သံလီၤ.”+ ၄ ဘၣ်ဆၣ်​ စီၤအဘံၤမ့လ့းန့ၣ်​ တလဲၤဘူးဒီး နီၢ်စၤရါဒံးဘၣ်.* အဃိ အဝဲတဲဝဲလၢ “ယဟိဝၤယွၤဧၢ, မ့ၢ်နကမၤသံ ပှၤတကလုာ်လၢ အတၢ်ကမၣ်​ တအိၣ်ဘၣ်န့ၣ်ဧါ. ၅ ဒီးစီၤအၤဘြၤဟၣ်န့ၣ်​ တဲယၤလၢ ‘အဝဲမ့ၢ် ယဒီပုၢ်ဝဲၢ်မုၣ်’ ဒီးနီၢ်စၤရါန့ၣ်​ တဲစ့ၢ်ကီးဝဲလၢ ‘အဝဲမ့ၢ် ယဒီပုၢ်ဝဲၢ်ခွါ’ တမ့ၢ်ဧီၤ. အဃိ ယမၤတၢ်အံၤ လၢတၢ်သူၣ်ဘျၢသးဘျၢ ဒီးတၢ်သူၣ်ကဆှီသးဆှီ အပူၤလီၤ.” ၆ အဃိ လၢတၢ်မံမီၢ်အပူၤ ယွၤလၢ အမ့ၢ်အတီတဂၤ တဲအီၤလၢ “ယသ့ၣ်ညါလၢ နမၤတၢ်အံၤ လၢတၢ်သူၣ်ဘျၢသးဘျၢ အပူၤအဃိ ယတြီနၤ ဒ်သိးနသု တမၤကမၣ်ဘၣ်ယၤ တဂ့ၤအဂီၢ်လီၤ. လၢတၢ်န့ၣ်အဃိ ယတဟ့ၣ်အခွဲးလၢ နကထိးဘူး ပိာ်မုၣ်အံၤဘၣ်. ၇ အခဲအံၤ ဟ့ၣ်ကဒါက့ၤ ပှၤတဂၤန့ၣ်​ အမါတက့ၢ်. ဒီးမ့ၢ်လၢအမ့ၢ် ဝံတဂၤအဃိ+ အကဃ့ကညးန့ၢ် တၢ်လၢနဂီၢ်+ ဒီးနကဆဲးအိၣ်မူလီၤ. ဘၣ်ဆၣ်​ နမ့ၢ်တဟ့ၣ်ကဒါက့ၤ ပိာ်မုၣ်အံၤဘၣ်န့ၣ်​ နကဘၣ်နၢ်ပၢၢ်လၢ နၤဒီးပှၤလၢ အဘၣ်ဃးဒီးနၤ ခဲလၢာ်န့ၣ်​ ကသံဝဲ သပှၢ်ကတၢၢ်လီၤ.”

၈ စီၤအဘံၤမ့လ့း ဂဲၤဆၢထၢၣ်ဂီၤဂီၤ ဒီးကိးဖှိၣ်ဝဲ အခ့အပှၤခဲလၢာ် ဒီးတဲဘၣ်​ အဝဲသ့ၣ်​ လၢတၢ်ဂ့ၢ်အံၤ ခဲလၢာ်လီၤ. ဒီးအဝဲသ့ၣ်​ ပျံၤတၢ် ဒိၣ်မးလီၤ. ၉ ဒီးစီၤအဘံၤမ့လ့း ကိးစီၤအၤဘြၤဟၣ်​ ဒီးတဲအီၤလၢ “နမၤပှၤဒ်လဲၣ်. ဒ်သိးနကဒုးဟဲလီၤ တၢ်ဒဲးဘးလၢ အဒိၣ်ထဲအံၤတမံၤ လၢယဖီခိၣ်​ ဒီးလၢယဘီယမုၢ် အဖီခိၣ်အဂီၢ် မ့ၢ်ယမၤကမၣ်ဘၣ်နၤ ဒ်လဲၣ်. နမၤယၤ ဒ်အံၤန့ၣ်​ တဘၣ်ဘၣ်.” ၁၀ ဒီးစီၤအဘံၤမ့လ့း တဲဘၣ်​ စီၤအၤဘြၤဟၣ်လၢ “နမၤဒ်အံၤန့ၣ်​ နတၢ်တိာ်ပာ် အိၣ်ဒ်လဲၣ်.”+ ၁၁ ဒီးစီၤအၤဘြၤဟၣ်​ တဲဝဲလၢ “ယဆိကမိၣ်လၢ ‘တၢ်လီၢ်ဖဲအံၤန့ၣ်​ တမ့ၢ်လၢ ပှၤကပျံၤ ကစၢ်ယွၤ နီတစဲးဘၣ်. ဒီးအဝဲသ့ၣ်​ ကမၤသံယၤ ခီဖျိလၢ ယမါအဃိလီၤ.’+ ၁၂ ဒီးတကးဒံးဘၣ်​ အဝဲမ့ၢ် ယဒီပုၢ်ဝဲၢ်မုၣ်​ အနီၢ်ကီၢ်လီၤ. အဝဲမ့ၢ် ယပၢ်အဖိမုၣ်​ ဘၣ်ဆၣ်​ အတမ့ၢ် ယမိၢ်အဖိမုၣ်ဘၣ်. ဒီးအဝဲကဲထီၣ်​ ယမါလီၤ.+ ၁၃ ဒီးဖဲကစၢ်ယွၤ မၢယဟးထီၣ်လၢ ယပၢ်အဒူၣ်ဖိထၢဖိအကျါ ဒီးလဲၤတၢ်အခါ+ ယတဲနီၢ်စၤရါလၢ ‘မ်နပာ်ဖျါထီၣ်​ တၢ်အဲၣ်လၢအတီ လၢယဖီခိၣ်​ ဒ်အံၤတက့ၢ်. ဖဲပလဲၤ တၢ်လီၢ်တပူၤဂ့ၤတပူၤဂ့ၤအခါ နကဘၣ်တဲလၢ ယမ့ၢ်နဒီပုၢ်ဝဲၢ်ခွါလီၤ.’”+

၁၄ ဒီးစီၤအဘံၤမ့လ့း ဟံးန့ၢ်ဝဲ သိ, ကျီၢ်, အပျဲၢ်ပိာ်မုၣ်​ ဒီးအပျဲၢ်ပိာ်ခွါတဖၣ်​ ဒီးဟ့ၣ်လီၤဝဲ စီၤအၤဘြၤဟၣ်လီၤ. ဒီးအဝဲဟ့ၣ်ကဒါက့ၤအီၤ နီၢ်စၤရါ စ့ၢ်ကီးလီၤ. ၁၅ ဒီးစီၤအဘံၤမ့လ့း တဲစ့ၢ်ကီးဝဲလၢ “ယတၢ်လီၢ်တၢ်ကျဲတဖၣ်​ အိၣ်ဝဲလၢ နမဲာ်ညါလီၤ. ဖဲတၢ်လီၢ်လၢ နအဲၣ်ဒိးအိၣ်န့ၣ်​ နအိၣ်သ့လီၤ.” ၁၆ ဒီးအဝဲတဲ နီၢ်စၤရါလၢ “အအံၤ, ယဟ့ၣ်နဒီပုၢ်ဝဲၢ်ခွါ လၢစ့ညၣ်အဘ့ၣ်​ ၁,၀၀၀+ ဒီးအကဲ တၢ်အုၣ်အသးလၢ ကယဲၢ်ပှၤလၢ အအိၣ်ဒီးနၤ ဒီးပှၤကိးဂၤဒဲး အမဲာ်ညါလၢ နတမၤဘၣ်တၢ်ကမၣ်​ နီတမံၤဘၣ်. ဒီးတၢ်ပာ်ဒ့ၣ်ပာ်ကမၣ်နၤ အလီၢ်တအိၣ်လၢၤဘၣ်.” ၁၇ ဒီးစီၤအၤဘြၤဟၣ်​ ဃ့ကညး ယွၤလၢ အမ့ၢ်အတီတဂၤ ဒီးကစၢ်ယွၤန့ၣ်​ မၤဘျါက့ၤဝဲ စီၤအဘံၤမ့လ့း ဒီးအမါ ဒီးအကုၢ်ပိာ်မုၣ်တဖၣ်လီၤ. ဒီးအဝဲသ့ၣ်တဖၣ်န့ၣ်​ အိၣ်ဖျဲၣ်ထီၣ်အဖိ န့ၢ်ကဒီးလီၤ. ၁၈ လၢအပူၤကွံာ်န့ၣ်​ ယဟိဝၤယွၤ မၤဝဲဒ်သိး ပှၤပိာ်မုၣ်လၢ အအိၣ်လၢ စီၤအဘံၤမ့လး အဟံၣ်ပူၤခဲလၢာ် သုတဒၢထီၣ်တဂ့ၤအဂီၢ် ခီဖျိလၢ စီၤအၤဘြၤဟၣ်အမါ နီၢ်စၤရါအဃိလီၤ.+

၂၁ ယဟိဝၤယွၤ နီၣ်ဘၣ်က့ၤ နီၢ်စၤရါ ဒ်အတဲတ့ၢ်ဝဲအသိး ဒီးယဟိဝၤယွၤ မၤဝဲဒ် အအၢၣ်လီၤတ့ၢ် နီၢ်စၤရါ အသိးလီၤ.+ ၂ အဃိ ဖဲစီၤအၤဘြၤဟၣ်​ အသးပှၢ်ထီၣ်​ အဆၢကတီၢ်န့ၣ်​ နီၢ်စၤရါ ဒၢထီၣ်ဝဲ+ ဒီးအိၣ်ဖျဲၣ်ထီၣ်န့ၢ်အီၤ အဖိခွါတဂၤ ဖဲတၢ်ဆၢကတီၢ် လၢကစၢ်ယွၤ အၢၣ်လီၤတ့ၢ်အီၤ တုၤဃီၤဝဲ အခါန့ၣ်လီၤ.+ ၃ စီၤအၤဘြၤဟၣ်​ ကိးန့ၢ်ဝဲ အဖိခွါလၢ နီၢ်စၤရါ အိၣ်ဖျဲၣ်ထီၣ်န့ၢ်အီၤ သီသီတဂၤန့ၣ်​ အမံၤလၢ စီၤအံၤစဲးလီၤ.+ ၄ ဒ်ကစၢ်ယွၤ မၤလိာ် စီၤအၤဘြၤဟၣ်အသိး စီၤအၤဘြၤဟၣ်​ ကူးတရံးဝဲ အဖိခွါ စီၤအံၤစဲး ဖဲအပှဲၤထီၣ်​ ဃိးသီအခါန့ၣ်လီၤ.+ ၅ ဖဲစီၤအၤဘြၤဟၣ်​ အဖိခွါ စီၤအံၤစဲး အိၣ်ဖျဲၣ်ထီၣ်ဝဲအခါ စီၤအၤဘြၤဟၣ်​ အိၣ်ဝဲအနံၣ်​ ၁၀၀ လီၤ. ၆ ဒီးနီၢ်စၤရါ တဲဝဲလၢ “ကစၢ်ယွၤ မၤနံၤယၤလီၤ. ပှၤလၢ အနၢ်ဟူ တၢ်ဂ့ၢ်တခါအံၤ ကိးဂၤဒဲးန့ၣ်​ ကနံၤဃုာ်ဒီးယၤလီၤ.”* ၇ ဒီးအဝဲ ဆဲးတဲဝဲလၢ “ပှၤလၢအကတဲ စီၤအၤဘြၤဟၣ်လၢ ‘နီၢ်စၤရါ ကဒုးအီ အဖိနုၢ်’ န့ၣ်မ့ၢ်အကအိၣ်ဝဲ တဂၤဂၤဧါ. ဒ်လဲၣ်ဂ့ၤဒ်လဲၣ်ဂ့ၤ ယအိၣ်ဖျဲၣ်ထီၣ်န့ၢ်အီၤ အဖိခွါတဂၤ ဖဲအသးပှၢ်ထီၣ်​ အဆၢကတီၢ်လီၤ.”

၈ ဒီးဖိသၣ်န့ၣ်​ ဒိၣ်ထီၣ်ဝဲ ဒီးဖှၣ်နုၢ်လီၤ. ဒီးဖဲစီၤအံၤစဲး ဖှၣ်နုၢ်အနံၤန့ၣ်​ စီၤအၤဘြၤဟၣ်​ မၤဝဲတၢ်အီၣ်အမူးဖးဒိၣ်လီၤ. ၉ ဘၣ်ဆၣ်​ နီၢ်စၤရါ ထံၣ်ဝဲလၢ ဖိခွါလၢ ပှၤအဲၤကူပတူးမုၣ်​ နီၢ်ဟၤကၢ်+ အိၣ်ဖျဲၣ်ထီၣ်န့ၢ် စီၤအၤဘြၤဟၣ်​ တဂၤန့ၣ်​ ဒုၣ်ဒွဲၣ်စံးအၢဝဲ စီၤအံၤစဲးလီၤ.+ ၁၀ အဃိ အဝဲတဲ စီၤအၤဘြၤဟၣ်လၢ “နီဟးထီၣ်​ ကုၢ်မုၣ်တဂၤန့ၣ်​ ဒီးအဖိခွါတက့ၢ်. ကုၢ်မုၣ်တဂၤအံၤ အဖိခွါန့ၣ်​ တန့ၢ်သါဘၣ်တၢ် ဃုာ်ဒီးယဖိခွါ စီၤအံၤစဲးဘၣ်.”+ ၁၁ ဘၣ်ဆၣ်​ တၢ်လၢနီၢ်စၤရါ တဲဝဲဘၣ်ဃးဒီး စီၤအၤဘြၤဟၣ်​ အဖိခွါန့ၣ်​ ဘၣ်စီၤအၤဘြၤဟၣ်အသး တမုာ်နီတစဲးဘၣ်.+ ၁၂ အဃိ ကစၢ်ယွၤ တဲစီၤအၤဘြၤဟၣ်လၢ “တဘၣ်သးအုး ခီဖျိတၢ်လၢ နီၢ်စၤရါ တဲနၤဘၣ်ဃးဒီး ပိာ်ခွါသးစၢ်တဂၤအံၤ ဒီးနကုၢ်မုၣ်အဃိတဂ့ၤ. ပှၤလၢအကဘၣ်​ တၢ်ကိးအီၤလၢ နချံနသၣ်န့ၣ်​ ကဟဲခီဖျိလၢ စီၤအံၤစဲးအဃိ ဒိကနၣ်​ အကလုၢ်တက့ၢ်.+ ၁၃ ဘၣ်ဆၣ်​ ကုၢ်ပိာ်မုၣ်​ အဖိခွါန့ၣ်+ ယကဒုးကဲထီၣ်အီၤလၢ ပှၤတကလုာ်+ မ့ၢ်လၢ အမ့ၢ်စ့ၢ်ကီး နဖိခွါတဂၤ* အဃိလီၤ.”

၁၄ အဃိ စီၤအၤဘြၤဟၣ်​ ဂဲၤဆၢထၢၣ်ဂီၤဂီၤ ဒီးဟံးန့ၢ်ကိၣ်​ ဒီးထၢၣ်တၢ်ဖံးတဖျၢၣ်​ လၢထံအိၣ်လၢအပူၤ ဒီးဟ့ၣ်လီၤ နီၢ်ဟၤကၢ်လီၤ. စီၤအၤဘြၤဟၣ်​ ပာ်ထီၣ်တၢ်သ့ၣ်တဖၣ်အံၤ လၢနီၢ်ဟၤကၢ် အဖံဘၣ်ခိၣ်​ ဒီးမၢအဟးထီၣ်ဒီး အဖိခွါန့ၣ်လီၤ.+ အဃိ နီၢ်ဟၤကၢ်န့ၣ်​ ဟးထီၣ်ဝဲ ဒီးဟးဝ့ၤဝီၤဝဲလၢ ဘ့ၢ်ၡဘၤ အပှၢ်မုၢ်ကနၢ အပူၤန့ၣ်လီၤ.+ ၁၅ လၢခံန့ၣ်​ ထံလၢအအိၣ်လၢ ထၢၣ်တၢ်ဖံးအပူၤ လၢာ်ဝဲ ဒီးအဝဲ ဆီၣ်ဃီၤဝဲ ပိာ်ခွါသးစၢ်တဂၤန့ၣ်လၢ သပှီာ်တခိၣ်​ အဖီလာ်လီၤ. ၁၆ ဒီးအဝဲ လဲၤဆ့ၣ်နီၤဝဲ ထဲတဂၤ လၢအယံၤဒီးအီၤတစဲး* မ့ၢ်လၢ အတဲဝဲလၢ “ယတအဲၣ်ဒိးထံၣ်​ အဝဲသံဘၣ်.” အဃိ အဝဲ ဆ့ၣ်နီၤဝဲလၢ အယံၤတစဲး ဒီးဟီၣ်ဝဲဖးဒိၣ်​ ဒီးအမဲာ်ထံလီၤဝဲလီၤ.

၁၇ ဒီးကစၢ်ယွၤ နၢ်ဟူဝဲ ပိာ်ခွါသးစၢ် စီၤယံးၡမၤဧ့လး အကလုၢ်+ ဒီးကစၢ်ယွၤ အမူခိၣ်ကလူး လၢအအိၣ်​ လၢမူခိၣ်န့ၣ်​ ကိးဝဲနီၢ်ဟၤကၢ်+ ဒီးတဲဝဲလၢ “နီၢ်ဟၤကၢ်ဧၢ, နဘၣ်တၢ်မနုၤလဲၣ်. ပျံၤတၢ်တဂ့ၤ. ကစၢ်ယွၤနၢ်ဟူ ပိာ်ခွါသးစၢ် အကလုၢ် ဖဲအအိၣ်ဝဲ အလီၢ်န့ၣ်လီၤ. ၁၈ မ့ၢ်လၢ ယကဒုးကဲထီၣ်အီၤ လၢပှၤကလုာ်ဖးဒိၣ်​ တကလုာ်အဃိ ဂဲၤဆၢထၢၣ်, လဲၤတွံၢ်ထီၣ်အီၤ ဒီးဖီၣ်ဂၢၢ်အီၤလၢ နစုတက့ၢ်.”+ ၁၉ ဒီးကစၢ်ယွၤ အိးထီၣ်ဝဲ နီၢ်ဟၤကၢ်အမဲာ် ဒီးအထံၣ်ဝဲ ထံကမျၢလီၤ. ဒီးအဝဲလဲၤမၤပှဲၤ အထၢၣ်တၢ်ဖံးဒီးထံ ဒီးဒုးအီဝဲ ပိာ်ခွါသးစၢ်လီၤ. ၂၀ ဒီးကစၢ်ယွၤ အိၣ်ဒီးပိာ်ခွါသးစၢ်တဂၤအံၤ+ တုၤလီၤလၢ အဒိၣ်ထီၣ်တစုလီၤ. ဒီးအဝဲအိၣ်ဝဲလၢ ပှၢ်မုၢ်ကနၢအပူၤ ဒီးကဲထီၣ်ဝဲ ပှၤခးချံၣ်ဖိတဂၤလီၤ. ၂၁ ဒီးစီၤယံးၡမၤဧ့လး ဆဲးအိၣ်ဝဲလၢ ပၤရၣ်​ အပှၢ်မုၢ်ကနၢ အပူၤလီၤ.+ ဒီးအမိၢ် ဃုန့ၢ်အမါလၢ ပိာ်မုၣ်လၢ အအိၣ်လၢ ကီၢ်အဲၤကူပတူးအပူၤလီၤ.

၂၂ ဖဲန့ၣ်အဆၢကတီၢ် စီၤအဘံၤမ့လ့း ဒီးအပှၤသုးမုၢ်သံၣ်ဘိအခိၣ်​ စီၤဖံကိးလး တဲဘၣ်​ စီၤအၤဘြၤဟၣ်လၢ “ကစၢ်ယွၤ အိၣ်ဒီးနၤလၢ ကယဲၢ်တၢ်လၢ နမၤအီၤ ကိးမံၤဒဲးအပူၤလီၤ.+ ၂၃ အဃိ ခဲအံၤ အၢၣ်လီၤယၤ ဖဲအံၤလၢ ကစၢ်ယွၤ အမဲာ်ညါလၢ နတလံၣ်န့ၢ်လီန့ၢ်ယၤ ဒီးယဖိယလံၤ ဒီးယစၢၤယသွဲၣ်တဖၣ်ဘၣ်. ဒီးဒ်ယပာ်ဖျါထီၣ်​ တၢ်အဲၣ်လၢအတီ လၢနဖီခိၣ်အသိး အၢၣ်လီၤယၤလၢ နကမၤစ့ၢ်ကီး ယၤဒီးကီၢ်လၢ နအိၣ်ဘၣ်လၢအပူၤ တဘ့ၣ်အံၤ ဒ်န့ၣ်တက့ၢ်.”+ ၂၄ အဃိ စီၤအၤဘြၤဟၣ်​ တဲဝဲလၢ “ယအၢၣ်လီၤနၤလီၤ.”

၂၅ ဘၣ်ဆၣ်​ စီၤအၤဘြၤဟၣ်​ ကဒူးကဒ့ၣ်တၢ်လၢ စီၤအဘံၤမ့လ့းအလိၤ ဘၣ်ဃးဒီး ထံပူၤတပူၤလၢ စီၤအဘံၤမ့လ့း အခ့အပှၤ ဟံးန့ၢ်ဆူၣ်ဝဲန့ၣ်လီၤ.+ ၂၆ ဒီးစီၤအဘံၤမ့လ့း တဲဆၢက့ၤဝဲလၢ “မတဂၤ မၤလဲၣ်န့ၣ်​ ယတသ့ၣ်ညါဘၣ်. နတတဲဘၣ်ယၤ တၢ်ဂ့ၢ်တခါအံၤ နီတဘျီမၢၤ. ယနၢ်ဟူဘၣ်​ တၢ်ဂ့ၢ်တခါအံၤ တနံၤညါအံၤလီၤ.” ၂၇ ဖဲန့ၣ်​ စီၤအၤဘြၤဟၣ်​ ဟံးန့ၢ်ဝဲ သိဒီးကျီၢ် ဒီးဟ့ၣ်လီၤဝဲ စီၤအဘံၤမ့လ့းလီၤ. ဒီးအဝဲသ့ၣ်ခံဂၤ မၤဝဲတၢ်အၢၣ်လီၤအီလီၤလီၤ. ၂၈ ဖဲစီၤအၤဘြၤဟၣ်​ ပာ်လီၤဆီဝဲ သိမိၢ်နွံဒုအခါ ၂၉ စီၤအဘံၤမ့လ့း တဲဘၣ်​ စီၤအၤဘြၤဟၣ်လၢ “ဘၣ်မနုၤအဃိလၢ နပာ်လီၤဆီ သိမိၢ်နွံဒု ဖဲအံၤလဲၣ်.” ၃၀ ဒီးစီၤအၤဘြၤဟၣ်​ တဲဝဲလၢ “နကဘၣ်တူၢ်လိာ် သိမိၢ်နွံဒုအံၤ လၢယအိၣ်​ ဒ်သိး ကကဲထီၣ်​ တၢ်အုၣ်အသးလၢ ယခူၣ်ထံကမျၢအံၤ အဂီၢ်လီၤ.” ၃၁ ဒီးမ့ၢ်လၢ အဝဲသ့ၣ်ခံဂၤ မၤဝဲ တၢ်အၢၣ်လီၤအီလီၤ ဖဲန့ၣ်အဃိ အဝဲကိးဝဲ တၢ်လီၢ်တတီၤအံၤလၢ ဘ့ၢ်ၡဘၤလီၤ.+ ၃၂ ဖဲအဝဲသ့ၣ်​ မၤတၢ်အၢၣ်လီၤအီလီၤ+ ဖဲဘ့ၢ်ၡဘၤ ဝံၤအလီၢ်ခံ စီၤအဘံၤမ့လ့း ဒီးအပှၤသုးမုၢ်သံၣ်ဘိအခိၣ်​ စီၤဖံကိးလး က့ၤဆူ ကီၢ်ဖလ့ၡသး ဒ်သိးသိးလီၤ.+ ၃၃ ဝံၤဒီး စီၤအၤဘြၤဟၣ်​ သူၣ်လီၤသ့ၣ်ထးမရ့း* တထူၣ်လၢ ဘ့ၢ်ၡဘၤအပူၤ ဒီးဖဲန့ၣ်​ အဝဲကိးထီၣ်​ ယဟိဝၤယွၤ+ လၢအမ့ၢ် ယွၤအထူအယိာ်တဂၤ အမံၤလီၤ.+ ၃၄ ဒီးစီၤအၤဘြၤဟၣ်​ အိၣ်ဝဲလၢ ပှၤဖလ့ၡသးဖိ အကီၢ်ပူၤ ဖးယံာ်ညါလီၤ.+

၂၂ ဖဲန့ၣ်ဝံၤအလီၢ်ခံ ယွၤလၢအမ့ၢ်အတီတဂၤ မၤကွၢ် စီၤအၤဘြၤဟၣ်+ ဒီးတဲအီၤလၢ “စီၤအၤဘြၤဟၣ်ဧၢ” ဒီးစီၤအၤဘြၤဟၣ်​ တဲဆၢက့ၤအီၤလၢ “မ့ၢ်, ယကစၢ်ဧၢ.” ၂ ဒီးကစၢ်ယွၤ တဲအီၤလၢ “ဝံသးစူၤ ကိးထီၣ်နဖိခွါ စီၤအံၤစဲးလၢ+ နအဲၣ်အီၤဒိၣ်မးတဂၤ လၢအမ့ၢ် နဖိခွါထဲတဂၤဧိၤ+ ဒီးလဲၤဒီးအီၤဆူ ကီၢ်မိၤရံယၤ+ ဒီးလုၢ်ထီၣ်အီၤ ဒ်တၢ်လုၢ်ဒွဲၣ်အူအသိး ဖဲကစၢၢ်တဖျၢၣ်လၢ ယကဒုးနဲၣ်နၤန့ၣ်တက့ၢ်.”

၃ အဃိ စီၤအၤဘြၤဟၣ်​ ဂဲၤဆၢထၢၣ်ဂီၤဂီၤ ဒီးကတဲာ်ကတီၤထီၣ်​ အကသ့ၣ်ယီၤ ဒီးကိးဃုာ်ဝဲ အခ့အပှၤခံဂၤ ဒီးအဖိခွါစီၤအံၤစဲးလီၤ. အဝဲမၤသ့ၣ်ဖး သ့ၣ်မုၣ်လၢ တၢ်လုၢ်ဒွဲၣ်အူအဂီၢ် ဒီးအဝဲ စးထီၣ်လဲၤဝဲလၢ တၢ်လီၢ်လၢ ယွၤလၢအမ့ၢ်အတီတဂၤ တဲဘၣ်အီၤန့ၣ်လီၤ. ၄ ဒီးလၢသၢနံၤတနံၤန့ၣ်​ စီၤအၤဘြၣ်ဟၣ်​ ကွၢ်ထီၣ်တၢ်ဒီး ထံၣ်စိဝဲ တၢ်လီၢ်တတီၤန့ၣ်​ လၢအယံၤန့ၣ်လီၤ. ၅ ဒီးစီၤအၤဘြၤဟၣ်​ တဲဘၣ်​ အခ့အပှၤတဖၣ်လၢ “သုဝဲသ့ၣ်န့ၣ်​ အိၣ်ဖဲအံၤဒီး ကသ့ၣ်ယီၤတက့ၢ်. ဘၣ်ဆၣ်​ မ့မ့ၢ် ယၤဒီးယဖိခွါန့ၣ်​ ပကလဲၤ ဘူၣ်ထီၣ်ဘါထီၣ်တၢ် လၢန့ၣ်​ ဝံၤဒီးပကဟဲက့ၤကဒါက့ၤ လၢသုအိၣ်လီၤ.”

၆ ဒီးစီၤအၤဘြၤဟၣ်​ ဟံးထီၣ်သ့ၣ်မုၣ်​ လၢတၢ်လုၢ်ဒွဲၣ်အူအဂီၢ် ဒီးပာ်ထီၣ်ဝဲလၢ စီၤအံၤစဲး အဖံဘၣ်ခိၣ်လီၤ. မ့မ့ၢ်အီၤန့ၣ်​ အဝဲလဲၤစိာ်ဝဲ မ့ၣ်အူဒီး ဒီတဘ့ၣ်လီၤ. ဒီးအဝဲသ့ၣ်ခံဂၤန့ၣ်​ လဲၤသကိးတၢ် ဒ်သိးသိးလီၤ. ၇ ဘၣ်ဆၣ်​ စီၤအံၤစဲး တဲဘၣ်အပၢ် စီၤအၤဘြၤဟၣ်လၢ “ပၢ်ဧၢ” ဒီးစီၤအၤဘြၤဟၣ်​ တဲဆၢအီၤလၢ “မ့ၢ်, ယဖိခွါဧၢ” ဒီးစီၤအံၤစဲး တဲဝဲလၢ “မ့ၣ်အူ ဒီးသ့ၣ်မုၣ်န့ၣ်​ အိၣ်လံ. မ့မ့ၢ် သိလၢ တၢ်လုၢ်ဒွဲၣ်အူအဂီၢ်န့ၣ်​ အိၣ်ဖဲလဲၣ်.” ၈ ဒီးစီၤအၤဘြၤဟၣ်​ စံးဆၢဝဲလၢ “ဖိခွါဧၢ, ကစၢ်ယွၤ ကဟ့ၣ်လီၤဝဲ သိလၢ တၢ်လုၢ်ဒွဲၣ်အူအဂီၢ်လီၤ.”+ ဒီးအဝဲသ့ၣ်ခံဂၤ ဆဲးလဲၤတၢ် ဒ်သိးသိးလီၤ.

၉ လၢခံ အဝဲသ့ၣ်​ လဲၤတုၤဝဲလၢ တၢ်လီၢ်လၢ ယွၤလၢအမ့ၢ်အတီတဂၤ မၢအလဲၤန့ၣ်လီၤ. ဒီးစီၤအၤဘြၤဟၣ်​ တ့ထီၣ်​ တၢ်လုၢ်လီၢ်ဖဲန့ၣ်​ ဒီးရဲၣ်လီၤသ့ၣ်မုၣ်လၢ တၢ်လုၢ်လီၢ် အဖီခိၣ်လီၤ. ဒီးအဝဲ စၢဃာ် အဖိခွါ စီၤအံၤစဲး အစုဒီးအခီၣ်​ ဒီးပာ်အီၤလၢ တၢ်လုၢ်လီၢ် လၢသ့ၣ်မုၣ်​ အဖီခိၣ်လီၤ.+ ၁၀ ဒီးစီၤအၤဘြၤဟၣ်​ ထုးထီၣ်အဒီ ဒ်သိးကမၤသံ အဖိခွါအဂီၢ်လီၤ.+ ၁၁ ဘၣ်ဆၣ်​ ယဟိဝၤယွၤ အမူခိၣ်ကလူး လၢအအိၣ်လၢ မူခိၣ်န့ၣ်​ ကိးအီၤ ဒီးတဲဝဲလၢ “စီၤအၤဘြၤဟၣ်ဧၢ, စီၤအၤဘြၤဟၣ်ဧၢ” ဒီးစီၤအၤဘြၤဟၣ်​ ကိးဆၢဝဲလၢ “မ့ၢ်, ယကစၢ်ဧၢ.” ၁၂ ဒီးအဝဲ တဲဝဲလၢ “တဘၣ်မၤဘၣ်ဒိ ပိာ်ခွါသးစၢ်တဂ့ၤ ဒီးတဘၣ်မၤအီၤ နီတမံၤတဂ့ၤ. ခဲအံၤ ယသ့ၣ်ညါလၢ နပျံၤကစၢ်ယွၤ ခီဖျိလၢ နတဂ့ၢ်လိာ်လၢ နကဟ့ၣ်လီၤယၤ နဖိခွါ လၢအအိၣ်​ ထဲတဂၤဧိၤဘၣ်​ အဃိလီၤ.”+ ၁၃ ဒီးစီၤအၤဘြၤဟၣ်​ ကွၢ်ထီၣ်တၢ် ဒီးလၢအမဲာ်ညါန့ၣ်​ အဝဲထံၣ်ဝဲ သိဖါတဒု အနၢၤဘျးဝဲဒီး တပှီာ်လီၤ. အဃိ စီၤအၤဘြၤဟၣ်​ လဲၤဟံးန့ၢ်ဝဲ သိဖါတဒုန့ၣ်​ ဒီးဟ့ၣ်လုၢ်ထီၣ်အီၤ ဒ်တၢ်လုၢ်ဒွဲၣ်အူအသိး လၢအဖိခွါ အလီၢ်န့ၣ်လီၤ. ၁၄ ဒီးစီၤအၤဘြၤဟၣ်​ ကိးဝဲ တၢ်လီၢ်တတီၤအံၤ အမံၤလၢ ယဟိဝၤယံၤရၤလီၤ.* လၢတၢ်န့ၣ်အဃိ တုၤမုၢ်မဆါတနံၤအံၤဒၣ်လဲာ် ပှၤတဲဝဲလၢ “လၢယဟိဝၤယွၤ အကစၢၢ်အလိၤန့ၣ်​ အဝဲကဟ့ၣ်လီၤဝဲလီၤ.”+

၁၅ ယဟိဝၤယွၤ အမူခိၣ်ကလူး လၢအအိၣ်လၢ မူခိၣ်န့ၣ်​ ကိးဝဲစီၤအၤဘြၤဟၣ်​ ခံဘျီတဘျီ ၁၆ ဒီးယဟိဝၤယွၤ+ တဲဝဲလၢ “‘မ့ၢ်လၢနမၤဒ်အံၤ ဒီးနတဂ့ၢ်လိာ်လၢ နကဟ့ၣ်လီၤ နဖိခွါ ထဲတဂၤဧိၤဘၣ်အဃိ ယအၢၣ်လီၤလၢ ယနီၢ်ကစၢ် အမံၤအပူၤလၢ+ ၁၇ ယကဆိၣ်ဂ့ၤနၤ သပှၢ်ကတၢၢ် ဒီးယကမၤအါထီၣ်​ နချံနသၣ်​ သပှၢ်ကတၢၢ် တုၤလၢအအိၣ်အါ ထဲသိးဒီး ဆၣ်တဖၣ်​ လၢမူခိၣ်​ ဒီးမဲးလၢပီၣ်လဲၣ်နံၤ အသိးန့ၣ်လီၤ.+ ဒီးနချံနသၣ်​ ကမၤန့ၢ်ဘၣ်​ အဒုၣ်အဒါတဖၣ်​ အဝ့ၢ်ပဲတြီလီၤ.+ ၁၈ မ့ၢ်လၢ နဒိကနၣ်​ ယကလုၢ်အဃိ+ ပှၤကိးကလုာ်ဒဲး လၢဟီၣ်ခိၣ်ချၢန့ၣ်​ ကဘၣ်တၢ်ဆိၣ်ဂ့ၤအီၤ ခီဖျိလၢ နချံနသၣ်အဃိလီၤ.’”+

၁၉ ဖဲန့ၣ်ဝံၤအလီၢ်ခံ စီၤအၤဘြၤဟၣ်​ က့ၤကဒါက့ၤ လၢအခ့အပှၤတဖၣ်အအိၣ်​ ဒီးအဝဲသ့ၣ်​ ဆၢထၢၣ်ဒီး က့ၤဝဲလၢ ဘ့ၢ်ၡဘၤ ဒ်သိးသိးလီၤ.+ ဒီးစီၤအၤဘြၤဟၣ်​ ဆဲးအိၣ်ဝဲလၢ ဘ့ၢ်ၡဘၤ အပူၤလီၤ.

၂၀ လၢခံ ပှၤဟဲတဲဘၣ်​ စီၤအၤဘြၤဟၣ်လၢ “နီၢ်မံးလကၤ အိၣ်ဖျဲၣ်ထီၣ်န့ၢ်ဝဲ နဒီပုၢ်ဝဲၢ်ခွါ စီၤနၤဃိၢ် အဖိခွါတဖၣ်လီၤ.+ ၂၁ အဝဲၢ်ကိတဂၤန့ၣ်​ မ့ၢ်ဝဲစီၤဧူစး ဒီးစီၤဧူစး အဒီပုၢ်ဝဲၢ်ခွါတဖၣ်န့ၣ်​ မ့ၢ်ဝဲစီၤဘူစး, စီၤအၤရၣ်အပၢ် စီၤကမူၤအ့လး, ၂၂ စီၤက့ၤစ့း, စီၤဃစိၤ, စီၤပံးလဒၣ်, စီၤယံးဒလာ် ဒီးစီၤဘသူၤအ့လးလီၤ.”+ ၂၃ ဒီးစီၤဘသူၤအ့လးန့ၣ်​ အဖိမုၣ်မ့ၢ်ဝဲ နီၢ်ရံးဘကၤလီၤ.+ အဃိ နီၢ်မံးလကၤ အိၣ်ဖျဲၣ်ထီၣ်ဝဲ အဖိဃိးဂၤ လၢစီၤအၤဘြၤဟၣ်​ အဒီပုၢ်ဝဲၢ်ခွါ စီၤနၤဃိၢ် အဂီၢ်လီၤ. ၂၄ နီၢ်ရူမၤ လၢအမ့ၢ် စီၤနၤဃိၢ် အသံၣ်မါန့ၣ်* အိၣ်ဖျဲၣ်စ့ၢ်ကီး အဖိခွါတဖၣ်​ လၢအမ့ၢ် စီၤတ့ဘာ်, စီၤကဃၣ်, စီၤတဃာ် ဒီးစီၤမၤကၤလီၤ.

၂၃ နီၢ်စၤရါန့ၣ်​ အိၣ်မူဝဲ ၁၂၇ နံၣ်​ ဒီးအအိၣ်မူဘၣ်ဝဲ အနံၣ်ထဲန့ၣ်လီၤ.+ ၂ နီၢ်စၤရါန့ၣ်​ သံဝဲလၢ ဝ့ၢ်ကံးရယးအၢ်ဘၤ+ လၢအမ့ၢ် ဝ့ၢ်ဃ့ဘြိၣ်+ လၢအအိၣ်လၢ ကီၢ်ကနၤဧၣ်အပူၤလီၤ.+ ဒီးစီၤအၤဘြၤဟၣ်န့ၣ်​ သူၣ်အုးသးအုး ဒီးဟီၣ်ဝဲယၢၤဝဲ လၢနီၢ်စၤရါ အဃိလီၤ. ၃ ဒီးစီၤအၤဘြၤဟၣ်​ ဟးထီၣ်လၢ အမါအစိၣ်အမဲာ်ညါ ဒီးလဲၤတဲဝဲ စီၤဃ့သး အဖိခွါတဖၣ်လၢ+ ၄ “ယမ့ၢ် ပှၤထံဂၤကီၢ်ဂၤဖိတဂၤလၢ အအိၣ်တမှံၤ လၢသုကျါ+ သနာ်က့ ဟ့ၣ်ယၤ ဟီၣ်ခိၣ်တကဝီၤလၢ သုဟီၣ်ကဝီၤအပူၤ ဒ်သိးအကကဲထီၣ်​ တၢ်သွၣ်ခိၣ်လၢ ယကခူၣ်လီၤ ယမါအဂီၢ်တက့ၢ်.” ၅ ဒီးစီၤဃ့သး အဖိခွါတဖၣ်​ တဲဆၢစီၤအၤဘြၤဟၣ်လၢ ၆ “ကစၢ်ဧၢ, ကနၣ်မီၤ. ပပာ်နၤဒ် ခိၣ်နၢ်တဂၤလၢ ကစၢ်ယွၤ ဃုထၢအီၤလီၤ.+ နခူၣ်လီၤနမါလၢ ပတၢ်သွၣ်ခိၣ်လၢ အဂ့ၤကတၢၢ်တဖၣ်အကျါ သ့လီၤ. ပှၤလၢ အကတြီနၤ ဒ်သိးနသုတခူၣ်လီၤ နမါလၢ အတၢ်သွၣ်ခိၣ်အပူၤ တဂ့ၤအဂီၢ်န့ၣ်​ တအိၣ်ဘၣ်လၢပကျါ နီတဂၤဘၣ်.”

၇ ဒီးစီၤအၤဘြၤဟၣ်​ ဂဲၤဆၢထၢၣ်​ ဒီးသကူးလီၤအသးလၢ စီၤဃ့သး အဖိခွါတဖၣ်​ အမဲာ်ညါ+ ၈ ဒီးတဲ အဝဲသ့ၣ်လၢ “သုမ့ၢ်တူၢ်လိာ်လၢ ယကခူၣ်လီၤ ယမါန့ၣ်​ ဒိကနၣ်ယၤ ဒီးဃ့ကညးန့ၢ်ယၤ စီၤစိၤဃၢ် အဖိခွါ လၢအမ့ၢ် စီၤဧ့ၤဖရိၣ်​ ၉ ဒ်သိး အကဆါန့ၢ်ယၤလၢ မးကပ့လၤ အလ့ကအိ လၢအမ့ၢ်အတၢ် ဒီးအိၣ်ဝဲလၢ အဟီၣ်ခိၣ်အဃၢၤ န့ၣ်တက့ၢ်. မ်အဝဲ ဆါန့ၢ်ယၤလၢစ့ ဒ်အပှ့ၤအိၣ်ဝဲအသိး+ လၢသုမဲာ်ညါ ဒ်သိး ယကအိၣ်ဒီး တၢ်လီၢ်လၢ တၢ်သွၣ်ခိၣ်အဂီၢ် တက့ၢ်.”+

၁၀ ဒီးစီၤဧ့ၤဖရိၣ်န့ၣ်​ ဆ့ၣ်နီၤဝဲလၢ စီၤဃ့သး အဖိခွါတဖၣ်​ အကျါလီၤ. အဃိ ပှၤဃ့ၤသးဖိ စီၤဧ့ၤဖရိၣ်န့ၣ်​ တဲဆၢက့ၤဝဲ စီၤအၤဘြၤဟၣ်လၢ စီၤဃ့သး အဖိခွါတဖၣ်​ အမဲာ်ညါ ဒီးပှၤခဲလၢာ် လၢအဟဲနုာ်လီၤလၢ အဝ့ၢ်တြဲၤတဖၣ်အမဲာ်ညါ+ ဒီးတဲဝဲလၢ ၁၁ “ကစၢ်ဧၢ, တမ့ၢ်ဘၣ်. ဒိကနၣ်ယၤလၢအံၤ, ယကဟ့ၣ်လီၤနၤ ဟီၣ်ခိၣ်တကဝီၤ ဒီးလ့ကအိလၢ အအိၣ်လၢ ဟီၣ်ခိၣ်တကဝီၤအံၤအပူၤ စ့ၢ်ကီးလီၤ. ယကဟ့ၣ်လီၤနၤ တၢ်သ့ၣ်တဖၣ်အံၤ လၢယပှၤကလုာ်တဖၣ်​ အမဲာ်ညါလီၤ. ခူၣ်လီၤ နပှၤသံတက့ၢ်.” ၁၂ ဒီးဖဲန့ၣ်​ စီၤအၤဘြၤဟၣ်​ သကူးလီၤအသးလၢ အဝဲသ့ၣ်​ အမဲာ်ညါ ၁၃ ဒီးတဲတၢ်ဒီး စီၤဧ့ၤဖရိၣ်​ လၢအဝဲသ့ၣ်​ အမဲာ်ညါ ဒီးတဲဝဲလၢ “ဝံသးစူၤ ဒိကနၣ်ယၤမီၤ. ယကဟ့ၣ်နၤ စ့ညၣ်ပှဲၤပှဲၤ လၢဟီၣ်ခိၣ်တကဝီၤအံၤ အဂီၢ်လီၤ. ဟံးန့ၢ်စ့အံၤ လၢယအိၣ်​ ဒ်သိး ယကလဲၤခူၣ်လီၤ ယပှၤသံ ဖဲန့ၣ်အဂီၢ်တက့ၢ်.”

၁၄ ဒီးစီၤဧ့ၤဖရိၣ်​ စံးဆၢ စီၤအၤဘြၤဟၣ်လၢ ၁၅ “ယကစၢ်ဧၢ, ကနၣ်ယၤမီၤ. ဟီၣ်ခိၣ်တကဝီၤအံၤ အပှ့ၤအိၣ်ဝဲ စ့ၡက့လး* ၄၀၀ လီၤ. ဘၣ်ဆၣ်​ လၢနၤဒီးယၤ အဘၢၣ်စၢၤန့ၣ်​ တမ့ၢ်တၢ်လၢ အရ့ဒိၣ်ဘၣ်. အဃိ ခူၣ်လီၤနပှၤသံတက့ၢ်.” ၁၆ ဒီးစီၤအၤဘြၤဟၣ်​ တူၢ်လိာ်တၢ်လၢ စီၤဧ့ၤဖရိၣ်​ တဲဝဲလီၤ. ဒီးစီၤအၤဘြၤဟၣ်​ စီၤဝဲစ့ညၣ်​ လၢစီၤဧ့ၤဖရိၣ်အဂီၢ် အတယၢၢ်ထဲသိးဒီး စီၤဧ့ၤဖရိၣ်​ တဲတ့ၢ်ဝဲလၢ စီၤဃ့သး အဖိခွါတဖၣ်​ အမဲာ်ညါလီၤ. ဒီးစ့ညၣ်အတယၢၢ် လီၤလၢဝဲ စ့ၡက့လး* ၄၀၀ ဒ်ပှၤပနံာ်တၢ်ကၤတၢ်ဖိတဖၣ်​ ပာ်ပနီၣ်ဝဲအဃၢ အသိးန့ၣ်လီၤ.+ ၁၇ အဃိ စီၤဧ့ၤဖရိၣ်​ ဆါကွံာ်ဝဲ ဟီၣ်ခိၣ်တကဝီၤလၢ မးကပ့လၤ လၢအအိၣ်လၢ မးမရ့ အမဲာ်ညါလီၤ. လ့ကအိ လၢအအိၣ်ဖဲန့ၣ်​ ဒီးသ့ၣ်ခဲလၢာ်လၢ အအိၣ်လၢ ဟီၣ်ခိၣ်ဒီတကဝီၤအံၤ အပူၤန့ၣ်​ ဘၣ်တၢ်ဟ့ၣ်လီၤအီၤလၢ ၁၈ စီၤအၤဘြၤဟၣ်​ အစုပူၤ ဒီးဘၣ်တၢ်ပာ်ဂၢၢ်ပာ်ကျၢၤအီၤ လၢအမ့ၢ် စီၤအၤဘြၤဟၣ်​ အတၢ်စုလီၢ်ခီၣ်ခိၣ်​ လၢအပှ့ၤဝဲ လၢစီၤဃ့သး အစၢၤအသွဲၣ်တဖၣ်​ အမဲာ်ညါ ဒီးလၢပှၤခဲလၢာ်လၢ အအိၣ်လၢ ဝ့ၢ်အတြဲၤအမဲာ်ညါလီၤ. ၁၉ ဖဲန့ၣ်​ စီၤအၤဘြၤဟၣ်​ ခူၣ်လီၤဝဲ အမါနီၢ်စၤရါ လၢလ့ကအိပူၤ လၢမးကပ့လၤ လၢအအိၣ်လၢ မးမရ့ အမဲာ်ညါလီၤ. ဒီးမးမရ့ တၢ်လီၢ်အံၤ မ့ၢ်ဝဲ ဝ့ၢ်ဃ့ဘြိၣ်လၢ အအိၣ်လၢ ကီၢ်ကနၤဧၣ်​ အပူၤလီၤ. ၂၀ အဃိ ဟီၣ်ခိၣ်တကဝီၤ ဒီးလ့ကအိပူၤလၢ အအိၣ်ဖဲန့ၣ်န့ၣ်​ ဘၣ်တၢ်ဟ့ၣ်လီၤအီၤလၢ စီၤအၤဘြၤဟၣ်​ အအိၣ်လၢ စီၤဃ့သး အဖိခွါတဖၣ်​ အမဲာ်ညါ ဒ်တၢ်လီၢ်လၢ တၢ်သွၣ်ခိၣ်အဂီၢ်လီၤ.+

၂၄ စီၤအၤဘြၤဟၣ်​ အသးပှၢ်ထီၣ်လံ ဒီးယဟိဝၤယွၤ ဆိၣ်ဂ့ၤ စီၤအၤဘြၤဟၣ်လၢ တၢ်ခဲလၢာ်အပူၤလီၤ.+ ၂ စီၤအၤဘြၤဟၣ်​ ကိးဝဲ အခ့အပှၤလၢ အသးပှၢ်ကတၢၢ်တဂၤလၢ အဟံၣ်ပူၤ ဒီးအဝဲမ့ၢ် ပှၤလၢအကွၢ်ထွဲ တၢ်လၢအအိၣ်ဒီး စီၤအၤဘြၤဟၣ်​ ခဲလၢာ်လီၤ. စီၤအၤဘြၤဟၣ်​ တဲအီၤလၢ+ “ဝံသးစူၤ ပာ်နစုလၢ ယခီၣ်ကံၣ်ဒုၣ်​ အဖီလာ် ၃ ဒီးယကမၢ နအၢၣ်လီၤလၢ မူခိၣ်ဒီးဟီၣ်ခိၣ်​ အကစၢ် ယဟိဝၤယွၤ အမဲာ်ညါ ဒ်သိး နသုတဃုန့ၢ် ယဖိခွါအမါလၢ ပှၤကနၤဧၣ်ဖိလၢ ယအိၣ်လၢ အကျါတဂ့ၤအဂီၢ်လီၤ.+ ၄ လၢတၢ်န့ၣ်အလီၢ် နကဘၣ်လဲၤလၢ ယထံယကီၢ် ဒီးလၢယဘူးယတံၢ်အအိၣ်+ ဒီးဃုန့ၢ်ယဖိခွါ စီၤအံၤစဲး အမါလီၤ.”

၅ ဘၣ်ဆၣ်​ အခ့အပှၤတဂၤန့ၣ်​ တဲအီၤလၢ “ပိာ်မုၣ်​ မ့ၢ်တအဲၣ်ဒိး ဟဲပိာ်ယခံ လၢကီၢ်တဘ့ၣ်အံၤဘၣ်န့ၣ်​ ယဘၣ်မၤဒ်လဲၣ်. မ့ၢ်ယဘၣ်ဆှၢလီၤ နဖိခွါဆူ ကီၢ်လၢ နအိၣ်ဟဲလၢ အပူၤန့ၣ်ဧါ.”+ ၆ ဒီးစီၤအၤဘြၤဟၣ်​ တဲအီၤလၢ “နတဘၣ်​ လဲၤကိး ယဖိခွါဖဲန့ၣ်တဂ့ၤ.+ ၇ မူခိၣ်အကစၢ် ယဟိဝၤယွၤ လၢအဒုးဟးထီၣ်ယၤလၢ ယပၢ်အဒူၣ်ဖိထၢဖိအကျါ ဒီးလၢယဘူးယတံၢ် အကီၢ်ပူၤ တဂၤန့ၣ်+ တဲတၢ်ဒီးယၤ ဒီးအၢၣ်လီၤယၤလၢ+ ‘ယကဟ့ၣ်လီၤ ကီၢ်တဘ့ၣ်အံၤ+ လၢနချံနသၣ်လီၤ.’+ အဝဲ ကမၢအမူခိၣ်ကလူး လဲၤတၢ်လၢ နမဲာ်ညါ+ ဒီးနကထံၣ်န့ၢ် ယဖိခွါ အမါဖဲန့ၣ်​ သပှၢ်ကတၢၢ်လီၤ.+ ၈ ဘၣ်ဆၣ်​ ပိာ်မုၣ်မ့ၢ်တအဲၣ်ဒိး ဟဲပိာ်နခံဘၣ်န့ၣ်​ နကပူၤဖျဲးဒီး တၢ်အၢၣ်လီၤအံၤလီၤ. ဒ်လဲၣ်ဂ့ၤ ဒ်လဲၣ်ဂ့ၤ နတဘၣ်​ လဲၤကိးယဖိခွါ ဖဲန့ၣ်ဘၣ်.” ၉ ဒီးအခ့အပှၤန့ၣ်​ ပာ်အစုလၢ အကစၢ် စီၤအၤဘြၤဟၣ်​ အခီၣ်ကံၣ်ဒုၣ်​ အဖီလာ် ဒီးအၢၣ်လီၤအီၤ ဘၣ်ဃးဒီး တၢ်ဂ့ၢ်အံၤန့ၣ်လီၤ.+

၁၀ အဃိ အခ့အပှၤ ဟးထီၣ်ဒီး ကိးဃုာ်ဝဲ အကစၢ် အကီၤလၤအူး အဒုတဆံ ဒီးလဲၤစိာ်တၢ်ဟ့ၣ်​ ကိးမံၤဒဲး လၢအကစၢ် ဟ့ၣ်လီၤဝဲလီၤ. ဒီးအဝဲ လဲၤဝဲဆူ ဝ့ၢ်နၤဃိၢ် လၢအအိၣ်လၢ ကီၢ်မ့းစပတၤမံလီၤ. ၁၁ ဖဲအဝဲ လဲၤတုၤလၢ ထံကမျၢ* လၢအအိၣ်လၢ ဝ့ၢ်ချၢအခါ အဝဲဒုးကိာ်လီၤ အကီၤလၤအူးတဖၣ်လီၤ. ဖဲန့ၣ်အခါ ဘၣ်ဖဲ မုၢ်ဘူးကဟါအဃိ မ့ၢ်ဝဲတၢ်ဆၢကတီၢ် ဖဲပိာ်မုၣ်တဖၣ်​ ဟဲဒၢၣ်ထံန့ၣ်လီၤ. ၁၂ ဒီးအဝဲ တဲဝဲလၢ “ယကစၢ် စီၤအၤဘြၤဟၣ်​ အကစၢ် ယဟိဝၤယွၤဧၢ, ဝံသးစူၤ တနံၤအံၤ မ်နဆိၣ်ဂ့ၤယၤ ဒီးပာ်ဖျါထီၣ်​ နတၢ်အဲၣ်လၢအတီလၢ ယကစၢ် စီၤအၤဘြၤဟၣ်​ အဖီခိၣ်တက့ၢ်. ၁၃ ဖဲအံၤန့ၣ်​ ယဆၢထၢၣ်​ လၢထံထီၣ်ပၢၢ် အကပၤ ဒီးပိာ်မုၣ်တဖၣ်လၢ အအိၣ်လၢဝ့ၢ်ပူၤန့ၣ်​ ကဟဲဒၢၣ်ထံလီၤ. ၁၄ ဒီးမ်တၢ်မၤအသးလၢ ပိာ်မုၣ်သးစၢ်တဂၤ လၢယတဲအီၤလၢ ‘ဝံသးစူၤ ပာ်လီၤနထံဒၢ ဒ်သိးယကအီထံအဂီၢ်’ ဒီးအဝဲမ့ၢ်တဲဝဲလၢ ‘အီမီၤ, ယကဒုးအီစ့ၢ်ကီး နကီၤလၤအူးတဖၣ်’ န့ၣ်​ မ်အဝဲ ကမ့ၢ် ပှၤလၢနဃုထၢအီၤလၢ နခ့နပှၤ စီၤအံၤစဲး အဂီၢ်န့ၣ်တက့ၢ်. ဒီးတၢ်မ့ၢ်မၤအသး ဒ်န့ၣ်န့ၣ်​ ယကသ့ၣ်ညါလၢ နပာ်ဖျါထီၣ်​ နတၢ်အဲၣ်လၢအတီ လၢယကစၢ် အဖီခိၣ်လီၤ.”

၁၅ ဖဲအတဲတၢ် တချုးဝံၤဒံးဘၣ်န့ၣ်​ နီၢ်ရံးဘကၤ ဟဲဝဲဒီးယိးဝဲ အထံဒၢလၢ အဖံဘၣ်ခိၣ်လီၤ. နီၢ်ရံးဘကၤန့ၣ်​ မ့ၢ်ဝဲ စီၤဘသူၤအ့လး အဖိမုၣ်+ ဒီးစီၤဘသူၤအ့လးန့ၣ်​ မ့ၢ်ဝဲ စီၤအၤဘြၤဟၣ်​ အဒီပုၢ်ဝဲၢ်ခွါ စီၤနၤဃိၢ်အမါ+ နီၢ်မံးလကၤ အဖိခွါလီၤ.+ ၁၆ ပိာ်မုၣ်သးစၢ်တဂၤအံၤ ဒိၣ်တၢ်ဂ့ၤမး ဒီးအမ့ၢ်ဝဲ မုၣ်ကနီၤ လၢပှၤပိာ်ခွါ တမံဃုာ်အိၣ်ဃုာ်ဒီးအီၤ နီတဂၤဒံးဘၣ်လီၤ. အဝဲ လဲၤလီၤလၢ ထံထီၣ်ပၢၢ် အကပၤ, မၤပှဲၤဝဲ အထံဒၢ ဒီးဟဲက့ၤထီၣ်ဝဲလီၤ. ၁၇ ဖဲန့ၣ်န့ၣ်​ စီၤအၤဘြၤဟၣ်​ အခ့အပှၤတဂၤအံၤ လဲၤဃ့ၢ်သဂၢၢ်အီၤ ဒီးတဲအီၤလၢ “ဝံသးစူၤ ဒုးအီယၤ ထံလၢ နထံဒၢပူၤ တစဲးမီၤ.” ၁၈ ဒီးအဝဲ စိာ်လီၤဝဲ အထံဒၢချ့ချ့ ဒီးဖီၣ်ဃာ်ဝဲ ဒီးတဲဆၢက့ၤဝဲလၢ “အီမီၤ, ယကစၢ်ဧၢ.” ဒီးဒုးအီအီၤလီၤ. ၁၉ နီၢ်ရံးဘကၤ ဒုးအီအီၤထံ ဝံၤဒီးတဲဝဲလၢ “ယကဒၢၣ်ဒုးအီစ့ၢ်ကီး နကီၤလၤအူးတဖၣ်အထံ တုၤလၢ အဝဲသ့ၣ်​ အီဝဲဘျဲလီၤ.” ၂၀ အဃိ အဝဲလူလီၤထံလၢ ဆၣ်ဖိကီၢ်ဖိတဖၣ်​ အကျိးပူၤချ့ချ့ ဒီးလဲၤဃ့ၢ်ဒၢၣ်ထံလၢ ထံကမျၢပူၤ တဘျီဝံၤတဘျီ တုၤလၢ အဝဲဒၢၣ်ထံလၢ ကီၤလၤအူး ကိးဒုဒဲးအဂီၢ် ဝံၤဝဲလီၤ. ၂၁ ဒီးပှၤတဂၤအံၤ ကမၢကမၣ်ဝဲအဃိ ကွၢ်ထံအီၤ ဖးယံာ်ညါ ဒီးအဝဲ ဆိကမိၣ်ဝဲလၢ မ့ၢ်ယဟိဝၤယွၤ ဆိၣ်ဂ့ၤ အတၢ်လဲၤတဘျီအံၤဧါ တဆိၣ်ဂ့ၤဘၣ်ဧါ န့ၣ်လီၤ.

၂၂ ဖဲကီၤလၤအူးတဖၣ်​ အီထံဝံၤအခါ ပှၤတဂၤအံၤ ထုးထီၣ်န့ၢ်အီၤ ထူကွီၤလၢ နါဒ့အဂီၢ် လၢအတယၢၢ်ဃၢဝဲ ၡက့လးတဝာ်* ဒီးထံဖှံၣ်ထူ ခံကွီၤလၢ အတယၢၢ်ဃၢဝဲ ၡက့လးတဆံလီၤ.* ၂၃ ဒီးတဲဝဲလၢ “နမ့ၢ်မတဂၤ အဖိမုၣ်လဲၣ်. ဝံသးစူၤ တဲယၤမီၤ. ဒီးလၢနပၢ်အဟံၣ်န့ၣ်​ ဒၢးလၢ ပကမံလၢ တနၤအံၤအဂီၢ် အိၣ်စ့ၢ်ကီးဧါ.” ၂၄ ဒီးနီၢ်ရံးဘကၤ တဲဆၢအီၤလၢ “ယမ့ၢ် စီၤဘသူၤအ့လး အဖိမုၣ်လီၤ.+ ဒီးယပၢ်စီၤဘသူၤအ့လးန့ၣ်​ မ့ၢ်ဝဲ စီၤနၤဃိၢ် ဒီးနီၢ်မံးလကၤ အဖိခွါလီၤ.”+ ၂၅ ဒီးအဝဲတဲစ့ၢ်ကီးဝဲလၢ “ပအိၣ်ဒီးနီၣ်​ ဒီးဆၣ်ဖိကီၢ်ဖိ အဆၣ်အါမး ဒီးတၢ်လီၢ်လၢ ပှၤကမံအဂီၢ်စ့ၢ်ကီး အိၣ်ဝဲလီၤ.” ၂၆ ဒီးပှၤအံၤ ချံးလီၤအခီၣ်​ ဒီးထိၣ်လီၤပှီၤအသး လၢယဟိဝၤယွၤ အမဲာ်ညါ ၂၇ ဒီးအတဲဝဲလၢ “ယကစၢ် စီၤအၤဘြၤဟၣ်​ အကစၢ် ယဟိဝၤယွၤန့ၣ်​ ဆဲးပာ်ဖျါထီၣ်​ အတၢ်အဲၣ်လၢ အဒိၣ်အမုၢ် ဒီးအတၢ်သးတီလၢ ယကစၢ် အဖီခိၣ်​ အဃိ မ်အဘၣ်​ တၢ်စံးထီၣ်ပတြၢၤအီၤတက့ၢ်. ယဟိဝၤယွၤ ဟံးစုနဲၣ်ကျဲယၤ တုၤလၢ ယကစၢ် အဒီပုၢ်ဝဲၢ်တဖၣ်​ အဟံၣ်လီၤ.”

၂၈ ဒီးပိာ်မုၣ်သးစၢ်အံၤ က့ၤဃ့ၢ်တဲဘၣ်​ အမိၢ်အဟံၣ်ဖိဃီဖိလၢ တၢ်မၤအသးတဖၣ်အံၤလီၤ. ၂၉ နီၢ်ရံးဘကၤ အိၣ်ဒီးအဒီပုၢ်ဝဲၢ်ခွါတဂၤ လၢအမံၤမ့ၢ်ဝဲ စီၤလၤဘၣ်လီၤ.+ ဒီးစီၤလၤဘၣ်န့ၣ်​ လဲၤဃ့ၢ်ဆူ ပိာ်ခွါလၢ အအိၣ်လၢတၢ်ချၢ လၢထံထီၣ်ပၢၢ် အကပၤလီၤ. ၃၀ ဖဲစီၤလၤဘၣ်ထံၣ်ဝဲ ထူကွီၤလၢနါဒ့အဂီၢ် ဒီးထံဖှံၣ်လၢ အဒီပုၢ်ဝဲၢ်မုၣ်​ အစုလိၤ ဒီးနၢ်ဟူဘၣ်ဝဲ အဒီပုၢ်ဝဲၢ်မုၣ်​ နီၢ်ရံးဘကၤ တဲဝဲလၢ “ပှၤတဂၤအံၤ တဲယၤဒ်အံၤဒ်နုၤ” အခါ စီၤလၤဘၣ်​ လဲၤထံၣ်လိာ်အသးဒီး ပှၤတဂၤအံၤလၢ အဆၢထၢၣ်ဘူးဒီး ကီၤလၤအူးတဖၣ်လၢ ထံထီၣ်ပၢၢ် အကပၤလီၤ. ၃၁ ဖဲန့ၣ်န့ၣ်​ စီၤလၤဘၣ်​ တဲဝဲလၢ “ပှၤလၢအဘၣ်​ တၢ်ဆိၣ်ဂ့ၤလၢ ယဟိဝၤယွၤ တဂၤဧၢ, ဟဲသၢၤ. ဘၣ်မနုၤအဃိ နဆၢထၢၣ်အိၣ်​ လၢတၢ်ချၢလဲၣ်. ယကတဲာ်ကတီၤဟံၣ်​ ဒီးတၢ်လီၢ်လၢ ကီၤလၤအူးတဖၣ်အဂီၢ် ဝံၤလံ.” ၃၂ ဒီးပှၤတဂၤန့ၣ်​ လဲၤနုာ်လၢဟံၣ်ပူၤလီၤ. ဒီးအဝဲ* ဃဲၣ်လီၤ ကီၤလၤအူးတဖၣ်​ ဒီးဟ့ၣ်ဝဲ ကီၤလၤအူးတဖၣ်​ လၢနီၣ်ဒီးအဆၣ်တဖၣ်​ ဒီးဟ့ၣ်ဝဲထံ ဒ်သိးပှၤတဂၤန့ၣ်​ ဒီးပှၤလၢ အအိၣ်ဒီးအီၤတဖၣ်​ ကသ့အခီၣ်အဂီၢ်လီၤ. ၃၃ ဘၣ်ဆၣ်​ ဖဲပှၤပာ်လီၤ တၢ်အီၣ်တၢ်အီ လၢအမဲာ်ညါအခါ အဝဲတဲဝဲလၢ “ယကဘၣ်တဲနၤ တၢ်အိၣ်တခါ ဒီးယတဲနၤမ့ၢ်တဝံၤဘၣ်န့ၣ်​ ယတအီၣ်တၢ်ဒံးဘၣ်.” အဃိ စီၤလၤဘၣ်​ တဲဝဲလၢ “တဲသၢၤ.”

၃၄ ဒီးပှၤတဂၤအံၤ တဲဝဲလၢ “ယမ့ၢ်စီၤအၤဘြၤဟၣ်​ အခ့အပှၤလီၤ.+ ၃၅ ယဟိဝၤယွၤ ဆိၣ်ဂ့ၤ ယကစၢ်ဒိၣ်မး ဒီးဒုးထူးထီၣ်တီၤထီၣ်အီၤ ခီဖျိ အဟ့ၣ်လီၤအီၤ သိဒီးကျီၢ်, ထူဒီးစ့, ကုၢ်ပိာ်မုၣ်​ ဒီးကုၢ်ပိာ်ခွါတဖၣ်​ ဒီးကီၤလၤအူးဒီး ကသ့ၣ်ယီၤတဖၣ်လီၤ.+ ၃၆ တကးဒံးဘၣ်​ ယကစၢ်အမါ နီၢ်စၤရါန့ၣ်​ ဖဲအသးပှၢ်ထီၣ်​ အဆၢကတီၢ် အဝဲအိၣ်ဖျဲၣ်ထီၣ်န့ၢ် ယကစၢ်လၢ အဖိခွါတဂၤ+ ဒီးယကစၢ် ကဟ့ၣ်လီၤဝဲ အဖိခွါ တၢ်လၢအအိၣ်ဒီးအီၤ ခဲလၢာ်လီၤ.+ ၃၇ ဒီးယကစၢ် မၢယမၤ တၢ်အၢၣ်လီၤဒီးအီၤ ဒီးအတဲဝဲလၢ ‘နတဘၣ်​ ဃုန့ၢ်ယဖိခွါအမါ လၢပှၤကနၤဧၣ်မုၣ်​ လၢအအိၣ်လၢ ကီၢ်လၢယအိၣ်လၢ အပူၤန့ၣ်ဘၣ်.+ ၃၈ ဘၣ်ဆၣ်​ နကဘၣ်​ လဲၤဃုန့ၢ် ယဖိခွါအမါလၢ+ ယပၢ်အဒူၣ်ဖိထၢဖိအကျါလီၤ.’+ ၃၉ အဃိ ယတဲဘၣ်​ ယကစၢ်လၢ ‘ပိာ်မုၣ်န့ၣ်​ မ့ၢ်တအဲၣ်ဒိး ဟဲပိာ်ယခံဘၣ်မီၤ.’+ ၄၀ ဖဲန့ၣ်န့ၣ်​ အဝဲတဲယၤလၢ ‘မ့ၢ်လၢ ယလဲၤတၢ်ဒီး ယဟိဝၤယွၤအဃိ+ အဝဲကမၢ အမူခိၣ်ကလူး+ လဲၤတၢ်ဒီးနၤ ဒီးကဆိၣ်ဂ့ၤ နတၢ်လဲၤတဘျီအံၤ ဒီးနကထံၣ်န့ၢ် ယဖိခွါအမါလၢ ယပၢ်အဒူၣ်ဖိထၢဖိအကျါလီၤ.+ ၄၁ နမ့ၢ်လဲၤလၢ ယဒူၣ်ဖိထၢဖိအအိၣ်​ ဒီးအဝဲသ့ၣ်​ မ့ၢ်တဟ့ၣ်နၤ ပိာ်မုၣ်ဘၣ်န့ၣ်​ နကပူၤဖျဲးလၢ နတၢ်အၢၣ်လီၤအံၤလီၤ. ဒီးနမ့ၢ်မၤ ဒ်န့ၣ်န့ၣ်​ နကပူၤဖျဲးဒီး နတၢ်အၢၣ်လီၤအံၤ သပှၢ်တၢၢ်လီၤ.’+

၄၂ “တနံၤအံၤ ဖဲယဟဲတုၤလၢ ထံထီၣ်ပၢၢ်အခါ ယတဲလၢ ‘ယကစၢ် စီၤအၤဘြၤဟၣ်​ အကစၢ် ယဟိဝၤယွၤဧၢ, နမ့ၢ်ဆိၣ်ဂ့ၤ ယတၢ်လဲၤတဘျီအံၤန့ၣ်​ တၢ်ကဘၣ်မၤအသး ဒ်အံၤလီၤ. ၄၃ ခဲအံၤ ယအိၣ်လၢ ထံထီၣ်ပၢၢ် အကပၤလီၤ. ဖဲပိာ်မုၣ်သးစၢ်တဂၤ+ ဟဲဒၢၣ်ထံအခါ ယကတဲလၢ “ဝံသးစူၤ ဒုးအီယၤထံလၢ နထံဒၢအပူၤ တစဲးမီၤ.” ၄၄ ဒီးအဝဲ မ့ၢ်တဲယၤလၢ “အီ, ဒီးယကဒၢၣ်ဒုးအီ နကီၤလၤအူးတဖၣ်​ အထံစ့ၢ်ကီး” န့ၣ်​ မ်အကမ့ၢ် ပိာ်မုၣ်လၢ ယဟိဝၤယွၤ ဃုထၢဝဲလၢ ယကစၢ် အဖိခွါ အဂီၢ်တက့ၢ်.’+

၄၅ “ဖဲယတဲတၢ်လၢ ယသးပူၤ တချုးဝံၤဒံးဘၣ်န့ၣ်​ နီၢ်ရံးဘကၤ ဟဲယိးဝဲ အထံဒၢလၢ အဖံဘၣ်ခိၣ်​ ဒီးအလဲၤလီၤဒၢၣ်ထံ လၢထံထီၣ်ပၢၢ်လီၤ. ဒီးယတဲအီၤလၢ ‘ဝံသးစူၤ, ဒုးအီယၤထံမီၤ.’+ ၄၆ ဒီးအဝဲ ကရီစိာ်လီၤဝဲ အထံဒၢ လၢအဖံဘၣ်ခိၣ်​ ဒီးတဲဝဲလၢ ‘အီမီၤ,+ ယကဒုးအီ နကီၤလၤအူးတဖၣ်​ အထံစ့ၢ်ကီးလီၤ.’ ဒီးယအီထံ ဒီးအဝဲဒုးအီဝဲ ယကီၤလၤအူးတဖၣ်​ အထံလီၤ. ၄၇ ဝံၤဒီး ယသံကွၢ်အီၤလၢ ‘နမ့ၢ်မတဂၤ အဖိမုၣ်လဲၣ်.’ ဒီးအဝဲ စံးဆၢယၤလၢ ‘ယမ့ၢ် စီၤဘသူၤအ့လး အဖိမုၣ်လီၤ. ယပၢ်စီၤဘသူၤအ့လးန့ၣ်​ မ့ၢ်ဝဲ စီၤနၤဃိၢ် ဒီးနီၢ်မံးလကၤ အဖိခွါလီၤ.’ အဃိ ယဒုးဒံးထီၣ်​ အနါဒ့လၢ ထူကွီၤ ဒီးဒုးသိးထီၣ်အီၤ ထံဖှံၣ်တဖၣ်လၢ အစုလိၤလီၤ.+ ၄၈ ဒီးယချံးလီၤယခီၣ်​ ဒီးထိၣ်လီၤပှီၤယသး လၢယဟိဝၤယွၤ အမဲာ်ညါ ဒီးယစံးထီၣ်ပတြၢၤ ယကစၢ် စီၤအၤဘြၤဟၣ်​ အကစၢ် ယဟိဝၤယွၤလၢ+ အဆှၢယၤလိၤလိၤ ဒ်သိးယကထံၣ်န့ၢ် ယကစၢ် အဒီပုၢ်ဝဲၢ်ခွါ အဖိမုၣ်​ လၢယကစၢ် အဖိခွါအဂီၢ်လီၤ. ၄၉ ဒီးခဲအံၤ သုမ့ၢ်အဲၣ်ဒိး ပာ်ဖျါထီၣ်​ တၢ်အဲၣ်ဒီး တၢ်သးတီလၢ ယကစၢ် အဖီခိၣ်န့ၣ်​ တဲယၤတက့ၢ်. ဘၣ်ဆၣ်​ သုမ့ၢ်တအဲၣ်ဒိးဘၣ်န့ၣ်​ တဲယၤတက့ၢ်. သုမ့ၢ်တဲယၤဒီး ယကဘၣ်မၤ ဒ်လဲၣ်န့ၣ်​ ယကသ့ၣ်ညါလီၤ.”+

၅၀ စီၤလၤဘၣ်​ ဒီးစီၤဘသူၤအ့လး တဲဆၢဝဲလၢ “တၢ်ဂ့ၢ်တခါအံၤ ဟဲလၢ ယဟိဝၤယွၤ အအိၣ်အဃိ ပကတဲနၤလၢ မ့ၢ် မ့ၢ်ဂ့ၤ တမ့ၢ်ဘၣ်​ မ့ၢ်ဂ့ၤ တသ့နီတမံၤဘၣ်. ၅၁ နီၢ်ရံးဘကၤ အိၣ်လၢနမဲာ်ညါလီၤ. က့ၤကိးအီၤ ဒီးမ်အကဲထီၣ်​ နကစၢ် အဖိခွါအမါ ဒ်ယဟိဝၤယွၤ တဲပာ်စၢၤဝဲအသိးတက့ၢ်.” ၅၂ ဖဲစီၤအၤဘြၤဟၣ်​ အခ့အပှၤ နၢ်ဟူအဝဲသ့ၣ်​ အတၢ်ကတိၤတဖၣ်အံၤအခါ အဝဲထိၣ်လီၤပှီၤအသး လၢဟီၣ်ခိၣ်လိၤ လၢယဟိဝၤယွၤ အမဲာ်ညါ တဘျီဃီလီၤ. ၅၃ ဒီးစီၤအၤဘြၤဟၣ်​ အခ့အပှၤန့ၣ်​ ထုးထီၣ်ဝဲ တၢ်ကယၢကယဲ လၢပှၤတ့အီၤလၢ ထူဒီးစ့တဖၣ်ဒီး တၢ်ကူတၢ်ကၤတဖၣ်​ ဒီးဟ့ၣ်လီၤဝဲ နီၢ်ရံးဘကၤလီၤ. ဒီးအဝဲဟ့ၣ်လီၤ စ့ၢ်ကီးဝဲ နီၢ်ရံးဘကၤ အဒီပုၢ်ဝဲၢ်ခွါ ဒီးအမိၢ်လၢ တၢ်လုၢ်ဒိၣ်ပှ့ၤဒိၣ်တဖၣ်လီၤ. ၅၄ ဝံၤဒီး အဝဲဒီး ပှၤပိာ်ခွါလၢ အဟဲဒီးအီၤတဖၣ်​ အီၣ်တၢ်အီတၢ် ဒီးအိၣ်ဝဲဖဲန့ၣ်​ တနၤလီၤ.

ဒီးဖဲ အဝဲဂဲၤဆၢထၢၣ်​ လၢဂီၤခီအခါ အဝဲတဲဝဲလၢ “ပျဲက့ၤယၤလၢ ယကစၢ် အအိၣ်တက့ၢ်.” ၅၅ ဖဲန့ၣ်န့ၣ်​ နီၢ်ရံးဘကၤ အဒီပုၢ်ဝဲၢ်ခွါ ဒီးအမိၢ် တဲဝဲလၢ “ပျဲပိာ်မုၣ်သးစၢ် အိၣ်ဒီးပှၤ အသီတဆံဒံးမီၤ. မ့ၢ်ဝံၤန့ၣ်​ အဝဲလဲၤဝဲသ့လီၤ.” ၅၆ ဘၣ်ဆၣ်​ စီၤအၤဘြၤဟၣ်​ အခ့အပှၤ တဲအဝဲသ့ၣ်လၢ “တဘၣ်တြီယၤတဂ့ၤ, ယဟိဝၤယွၤ ဆိၣ်ဂ့ၤယတၢ်ဟဲ တဘျီအံၤအဃိ ပျဲက့ၤယၤဆူ ယကစၢ်အအိၣ်တက့ၢ်.” ၅၇ ဒီးအဝဲသ့ၣ်​ တဲဝဲလၢ “မ်ပကိးန့ၢ် ပိာ်မုၣ်သးစၢ် ဒီးသံကွၢ်အီၤတက့ၢ်.” ၅၈ အဃိ အဝဲသ့ၣ်​ ကိးဝဲနီၢ်ရံးဘကၤ ဒီးသံကွၢ်အီၤလၢ “နကလဲၤဒီး ပှၤတဂၤအံၤဧါ.” ဒီးအဝဲ တဲဆၢဝဲလၢ “ယကလဲၤလီၤ.”

၅၉ ဒီးအဝဲသ့ၣ်​ ပျဲလဲၤအဒီပုၢ်ဝဲၢ်မုၣ်​ နီၢ်ရံးဘကၤ+ ဒီးပိာ်မုၣ်လၢ အဒုးအီၣ်တ့ၢ်အီၤနုၢ်တဂၤ+ ဃုာ်ဒီးစီၤအၤဘြၤဟၣ်​ အခ့အပှၤ ဒီးပှၤပိာ်ခွါလၢ အဟဲဒီးအီၤတဖၣ်လီၤ. ၆၀ ဒီးအဝဲသ့ၣ်​ ဆိၣ်ဂ့ၤ နီၢ်ရံးဘကၤ ဒီးတဲအီၤလၢ “ပဒီပုၢ်ဝဲၢ်မုၣ်ဧၢ, မ်နဖိနလံၤ ကအိၣ်ဝဲလၢ အကကွဲၢ်တဖၣ်တက့ၢ်. ဒီးမ်နချံနသၣ်​ မၤန့ၢ်ပှၤလၢ အသးဟ့အီၤတဖၣ်​ အဝ့ၢ်ပဲတြီန့ၣ်တက့ၢ်.”+ ၆၁ ဒီးနီၢ်ရံးဘကၤ ဒီးအပျဲၢ်မုၣ်တဖၣ်​ ဆၢထၢၣ်​ ဒီးဒိးထီၣ်ဝဲ ကီၤလၤအူး ဒီးလဲၤပိာ် ပှၤတဂၤန့ၣ်အခံလီၤ. အဃိ စီၤအၤဘြၤဟၣ်​ အခ့အပှၤတဂၤန့ၣ်​ ကိးထီၣ်​ နီၢ်ရံးဘကၤ ဒီးက့ၤဝဲလီၤ.

၆၂ စီၤအံၤစဲးန့ၣ်​ အိၣ်ဝဲဆိးဝဲလၢ နဲကဲၤအဟီၣ်ကဝီၤအပူၤလီၤ.+ အဝဲဟဲက့ၤလၢ ကျဲလၢအလဲၤ ဆူဘ့ၤလဧရိၤ+ ၆၃ ဒီးအဟးလၢ စံာ်ပျီပူၤ ဒ်သိး အကဆိကမိၣ်ထံတၢ်လီၤ.+ ဖဲန့ၣ်အခါ ဘၣ်ဖဲမုၢ်ဟါလီၤသီသီ အဆၢကတီၢ်လီၤ. ဒီးဖဲအဝဲ ကွၢ်စိဃီၤတၢ်အခါ အဝဲထံၣ်ဝဲ ကီၤလၤအူးတဖၣ်​ ဟဲက့ၤဝဲလီၤ. ၆၄ ဒီးဖဲနီၢ်ရံးဘကၤ ကွၢ်စိဃီၤတၢ်အခါ အဝဲထံၣ်ဝဲ စီၤအံၤစဲး ဒီးကရီစံၣ်လီၤဝဲလၢ ကီၤလၤအူး အလိၤလီၤ. ၆၅ ဒီးအဝဲသံကွၢ်ဝဲ စီၤအၤဘြၤဟၣ်​ အခ့အပှၤလၢ “ပိာ်ခွါလၢ တၢ်ပျီပူၤ လၢအဟဲလၢ ပအိၣ်န့ၣ်​ မ့ၢ်မတဂၤလဲၣ်.” စီၤအၤဘြၤဟၣ်​ အခ့အပှၤ တဲဝဲလၢ “အဝဲမ့ၢ် ယကစၢ်လီၤ.” အဃိ နီၢ်ရံးဘကၤ ဟံးန့ၢ်ခိၣ်ဖၢၣ်​ ဒ်သိး ကဖၢၣ်အခိၣ်​ အဂီၢ်လီၤ. ၆၆ ဒီးစီၤအၤဘြၤဟၣ်​ အခ့အပှၤ တဲဘၣ်စီၤအံၤစဲးလၢ ကယဲၢ်တၢ်လၢ အမၤဝဲ ခဲလၢာ်လီၤ. ၆၇ ဒီးစီၤအံၤစဲး လဲၤဆှၢ နီၢ်ရံးဘကၤဆူ အမိၢ်နီၢ်စၤရါ အဒဲပူၤလီၤ.+ ဒီးအဝဲဟံးန့ၢ်အမါ လၢနီၢ်ရံးဘကၤ ဒီးအဲၣ်အီၤလီၤ.+ အဃိ အဝဲဒိးန့ၢ်ဘၣ်​ တၢ်မၤမုာ်ထီၣ်က့ၤ ဖဲအမိၢ်သံ အလီၢ်ခံန့ၣ်လီၤ.+

၂၅ ဒီးစီၤအၤဘြၤဟၣ်​ ဟံးကဒီးအမါတဂၤ ဒီးအမါ အမံၤမ့ၢ်ဝဲ နီၢ်ကတူရၤလီၤ. ၂ လၢခံ နီၢ်ကတူရၤ အိၣ်ဖျဲၣ်ထီၣ်ဝဲ စီၤစံးမရၣ်, စီၤယးကၡၣ်, စီၤမဒၣ်, စီၤမံးဒယၣ်,+ စီၤယံးၡဘး ဒီးစီၤၡူဧၤ+ လၢစီၤအၤဘြၤဟၣ်​ အဂီၢ်လီၤ.

၃ စီၤယးကၡၣ်​ ထီၣ်ဖိဝဲ စီၤၡဘၤ ဒီးစီၤဒဒၣ်လီၤ.

စီၤဒဒၣ်​ အဖိခွါတဖၣ်မ့ၢ်ဝဲ စီၤအၤၡူရး, စီၤလတူၡး ဒီးစီၤလူမးလီၤ.

၄ စီၤမံးဒယၣ်​ အဖိခွါတဖၣ်န့ၣ်မ့ၢ်ဝဲ စီၤဧ့ၤဖၣ်, စီၤဧ့ၤဖ့ၢ်, စီၤဃနိး, စီၤအဘံဒၤ ဒီးစီၤအ့ၤလဒါဧၤလီၤ.

ပှၤတဖၣ်န့ၣ်​ မ့ၢ်ဝဲ နီၢ်ကတူရၤ အလံၤခွါတဖၣ်လီၤ.

၅ လၢခံ စီၤအၤဘြၤဟၣ်​ ဟ့ၣ်လီၤဝဲ စီၤအံၤစဲး တၢ်လၢ အအိၣ်ဒီးအီၤ ခဲလၢာ်လီၤ.+ ၆ မ့မ့ၢ် အဖိခွါတဖၣ်လၢ အသံၣ်မါတဖၣ်* အိၣ်ဖျဲၣ်ထီၣ်ဝဲန့ၣ်​ စီၤအၤဘြၤဟၣ်​ ဟ့ၣ်အဝဲသ့ၣ်​ တၢ်ဟ့ၣ်တဖၣ်လီၤ. ဖဲစီၤအၤဘြၤဟၣ်​ အိၣ်မူဒံးအခါ အဝဲဆှၢလီၤ အဖိခွါတဖၣ်အံၤဆူ ကီၢ်မုၢ်ထီၣ်​ လၢအယံၤဝဲဒီး အဖိခွါ စီၤအံၤစဲးန့ၣ်လီၤ.+ ၇ ဒီးလၢစီၤအၤဘြၤဟၣ်​ အသးသမူဒီတစိၤန့ၣ်​ အသးနံၣ်အိၣ်ဝဲ ၁၇၅ နံၣ်လီၤ. ၈ အဃိ စီၤအၤဘြၤဟၣ်​ အိၣ်မူဝဲတုၤလၢ အသးပှၢ်ထီၣ်ဖးဒိၣ်​ ဒီးသံဝဲလၢ တၢ်သူၣ်မံသးမုာ်အပူၤ ဒီးအဘၣ်တၢ်ပာ်ဖှိၣ်အီၤ ဃုာ်ဒီးအမိၢ်ပၢ်ဖံဖု လၢပျၢၤတဖၣ်လီၤ. ၉ စီၤအၤဘြၤဟၣ်​ အဖိခွါ စီၤအံၤစဲး ဒီးစီၤယံးၡမၤဧ့လး ခူၣ်လီၤအီၤလၢ မးကပ့လၤ အလ့ကအိအပူၤ လၢအအိၣ်လၢ ပှၤဃ့ၤသးဖိ စီၤစိၤဃၢ် အဖိခွါ စီၤဧ့ၤဖရိၣ်​ အဟီၣ်ခိၣ်တကဝီၤလၢ အအိၣ်လၢ မးမရ့အမဲာ်ညါလီၤ.+ ၁၀ ဟီၣ်ခိၣ်တကဝီၤအံၤ စီၤအၤဘြၤဟၣ်​ ပှ့ၤဝဲလၢ စီၤဃ့သး အဖိခွါတဖၣ်​ အအိၣ်န့ၣ်လီၤ. ဒီးစီၤအၤဘြၤဟၣ် ဘၣ်တၢ်ခူၣ်လီၤအီၤ တပူၤဃီဒီး အမါနီၢ်စၤရါ ဖဲန့ၣ်လီၤ.+ ၁၁ ဖဲစီၤအၤဘြၤဟၣ်​ သံဝံၤအလီၢ်ခံ ကစၢ်ယွၤ ဆဲးဆိၣ်ဂ့ၤဝဲ အဖိခွါ စီၤအံၤစဲးလီၤ.+ ဒီးစီၤအံၤစဲးန့ၣ်​ အိၣ်ဝဲဆိးဝဲ ဘူးဒီး ဘ့ၤလဧရိၤလီၤ.+

၁၂ အအံၤမ့ၢ် တၢ်ကွဲးနီၣ်ဃာ်လၢ အဘၣ်ဃးဒီး စီၤယံးၡမၤဧ့လးလီၤ.+ အဝဲမ့ၢ် စီၤအၤဘြၤဟၣ်​ အဖိခွါလၢ ပှၤအဲၤကူပတူးမုၣ်​ နီၢ်ဟၤကၢ်+ လၢအမ့ၢ် နီၢ်စၤရါ အကုၢ်မုၣ်​ အိၣ်ဖျဲၣ်ထီၣ်န့ၢ် စီၤအၤဘြၤဟၣ်လီၤ.

၁၃ အအံၤမ့ၢ် စီၤယံးၡမၤဧ့လး အဖိခွါတဖၣ်​ အမံၤ ဒီးအစၢၤအသွဲၣ်တဖၣ်လီၤ. စီၤယံးၡမၤဧ့လး အဖိခွါဝဲၢ်ကိန့ၣ်​ မ့ၢ်ဝဲ စီၤနဘါယိး,+ ဝံၤဒီးစီၤက့ဒၢ်,+ စီၤအးဒဘအ့လး, စီၤမံးဘစၣ်,+ ၁၄ စီၤမံးၡမၤ, စီၤဒူမၤ, စီၤမၤစၤ, ၁၅ စီၤဃဒၢ်, စီၤတ့မၤ, စီၤယတူၢ်, စီၤနါဖံၣ်​ ဒီးစီၤက့ဒမၤလီၤ. ၁၆ အဝဲသ့ၣ်​ မ့ၢ်ဝဲ စီၤယံးၡမၤဧ့လး အဖိခွါတဖၣ်လီၤ. ဒီးဒူသဝီ ဒီးဒဲကဝီၤတဖၣ်လၢ အဝဲသ့ၣ်အိၣ်ဝဲန့ၣ်​ ဘၣ်တၢ်ကိးန့ၢ် အမံၤလၢ အဝဲသ့ၣ်အမံၤ ဒီးအဝဲသ့ၣ်မ့ၢ် ပှၤခိၣ်ပှၤနၢ် ၁၂ ဂၤဒ်အဝဲသ့ၣ်​ အဒူၣ်တဖၣ်​ အိၣ်ဝဲအသိးလီၤ.+ ၁၇ ဒီးစီၤယံးၡမၤဧ့လး အိၣ်မူဝဲ ၁၃၇ နံၣ်​ ဝံၤဒီးအဝဲသံဝဲ ဒီးအဘၣ်တၢ်ပာ်ဖှိၣ်အီၤ ဃုာ်ဒီးအမိၢ်ပၢ်ဖံဖု လၢပျၢၤတဖၣ်လီၤ. ၁၈ ဒီးအစၢၤအသွဲၣ်တဖၣ်​ အိၣ်ဝဲဆိးဝဲလၢ ဃဝံၤလၤ+ တုၤလီၤလၢ ကီၢ်အၤၡူၢ်လီၤ. ဃဝံၤလၤန့ၣ်​ အိၣ်ဘူးဒီးၡူၢ်+ ဒီးၡူၢ်န့ၣ်အိၣ်ဘူးဒီး ကီၢ်အဲၤကူပတူးလီၤ. ဒီးအဝဲသ့ၣ်​ အိၣ်ဝဲဆိးဝဲဘူးဒီး အဘူးအတံၢ်တဖၣ်လီၤ.+

၁၉ အအံၤမ့ၢ် တၢ်ကွဲးနီၣ်ဃာ်လၢ အဘၣ်ဃးဒီး စီၤအၤဘြၤဟၣ်အဖိခွါ စီၤအံၤစဲးလီၤ.+

စီၤအၤဘြၤဟၣ်​ မ့ၢ်ဝဲ စီၤအံၤစဲးအပၢ်လီၤ. ၂၀ ဖဲစီၤအံၤစဲး အိၣ်အနံၣ်​ ၄၀ အခါ အဝဲဆီဟံၣ်ဆီဃီဒီး နီၢ်ရံးဘကၤလီၤ. နီၢ်ရံးဘကၤမ့ၢ်ဝဲ ပှၤစူၤရံဖိ စီၤဘသူၤအ့လး+ လၢအအိၣ်လၢ ပၤဒနါရၣ်တဂၤန့ၣ်​ အဖိမုၣ်လီၤ. ဒီးအမ့ၢ်စ့ၢ်ကီး ပှၤစူၤရံဖိ စီၤလၤဘၣ်​ အဒီပုၢ်ဝဲၢ်မုၣ်လီၤ. ၂၁ ဒီးစီၤအံၤစဲး ဆဲးဃ့ကညး ယဟိဝၤယွၤ လၢအမါအဂီၢ် ခီဖျိလၢ အဖိအိၣ်​ တန့ၢ်ဘၣ်အဃိလီၤ. ဒီးယဟိဝၤယွၤ စံးဆၢ အတၢ်ဃ့ကညး ဒီးအမါ နီၢ်ရံးဘကၤ ဒၢထီၣ်ဝဲလီၤ. ၂၂ ဒီးအဖိခွါတဖၣ်န့ၣ်​ ကနိလိာ်အသး လၢအဟၢဖၢပူၤလီၤ.+ အဃိ အဝဲတဲဝဲလၢ “တၢ်မ့ၢ်မၤအသး ဒ်အံၤန့ၣ်​ ယအိၣ်မူ ဘၣ်ဆၣ်​ အဘျုးတအိၣ်လၢၤဘၣ်.” ဒီးအဝဲသံကွၢ်တၢ်လၢ ယဟိဝၤယွၤ အအိၣ်လီၤ. ၂၃ ယဟိဝၤယွၤ တဲအီၤလၢ “ပှၤကလုာ် ခံကလုာ်အိၣ်လၢ နဒၢလီၢ်အပူၤ+ ဒီးပှၤခံဒူၣ်လၢ အလီၤဆီလိာ်သး ကဟဲထီၣ်လၢနပူၤလီၤ.+ ဒီးတကလုာ်န့ၣ်​ အဂံၢ်ကဆူၣ်န့ၢ်ဒံး အဝဲတကလုာ်လီၤ.+ ဒီးအဒိၣ်တဂၤ ကမၤတၢ်အခ့အပှၤ အတၢ်မၤ လၢအဆံးတဂၤ အဂီၢ်လီၤ.”+

၂၄ လၢခံန့ၣ်​ တၢ်ဆၢကတီၢ်ဘၣ်လၢ နီၢ်ရံးဘကၤ ကအိၣ်ဖျဲၣ်ထီၣ်ဝဲ အဖိ ဒီးပှၤတဃံာ် အိၣ်ဝဲလၢ အဒၢလီၢ်ပူၤလီၤ. ၂၅ ဖဲအဆိကတၢၢ်တဂၤ ဟဲအိၣ်ဖျဲၣ်ထီၣ်အခါ အဂီၤဝဲဒီတဂၤ ဒီးအဆူၣ်အိၣ်ဝဲ အါမးလီၤ.+ အဃိ အဝဲသ့ၣ်​ ကိးန့ၢ်ဝဲအမံၤလၢ စီၤဧ့ၡီၤလီၤ.*+ ၂၆ ဖဲန့ၣ်ဝံၤအလီၢ်ခံ အပုၢ် ဟဲအိၣ်ဖျဲၣ်ထီၣ်ဝဲ ဒီးအဝဲဖီၣ်ဃာ် စီၤဧ့ၡီၤ အခီၣ်နၢၣ်ခံအဃိ+ အဘၣ်တၢ်ကိးအီၤ လၢစီၤယၤကိာ်လီၤ.*+ ဖဲနီၢ်ရံးဘကၤ အိၣ်ဖျဲၣ်ထီၣ်​ အဝဲသ့ၣ်အခါ စီၤအံၤစဲးန့ၣ်​ အသးအိၣ်ဝဲ အနံၣ်​ ၆၀ လီၤ.

၂၇ ဒီးပိာ်ခွါဖိတဖၣ်အံၤ ဒိၣ်ထီၣ်ဝဲ ဒီးစီၤဧ့ၡီၤကဲထီၣ်​ ပှၤခးတၢ်သ့ ဂ့ၤဂ့ၤတဂၤ+ လၢအအိၣ်မုာ်လၢ တၢ်ပျီပူၤလီၤ. မ့မ့ၢ် စီၤယၤကိာ်န့ၣ်​ မ့ၢ်ပှၤလၢ တၢ်ပာ်ဒ့ၣ်ပာ်ကမၣ်အီၤ အလီၢ်တအိၣ်ဘၣ်​ ဒီးအိၣ်ဝဲဆိးဝဲ လၢဒဲပူၤလီၤ.+ ၂၈ ဒီးစီၤအံၤစဲးန့ၣ်​ အဲၣ်ဝဲဒိၣ်လၢ စီၤဧ့ၡီၤ မ့ၢ်လၢ အဟဲက့ၤစိာ်န့ၢ်အီၤ တၢ်မံၤလာ် အညၣ်တဖၣ်​ အဃိလီၤ. မ့မ့ၢ် နီၢ်ရံးဘကၤန့ၣ်​ အဲၣ်ဝဲဒိၣ်လၢ စီၤယၤကိာ်လီၤ.+ ၂၉ ဘၣ်တဘျီ ဖဲစီၤယၤကိာ် ချီထီၣ်ဝဲ ပဲကသူထံအခါ စီၤဧ့ၡီၤ ဟဲက့ၤလၢ တၢ်ပျီပူၤ ဒီးလီၤဘှံးလီၤတီၤဝဲလီၤ. ၃၀ အဃိ စီၤဧ့ၡီၤ တဲစီၤယၤကိာ်လၢ “ဝံသးစူၤ မၤမ့ၢ်ချ့, ယလီၤဘှးလံအဃိ ကသူထံဂီၤဂီၤ လၢအအိၣ်ဒီးနၤ ဖဲန့ၣ်န့ၣ်​ ဟ့ၣ်ဒုးအီၣ်ယၤ တစဲးသၢၤ.” လၢတၢ်န့ၣ်အဃိ တၢ်ကိးဝဲ အမံၤလၢ စီၤအဒိၣ်လီၤ.*+ ၃၁ စီၤယၤကိာ် တဲဆၢဝဲလၢ “အဆိကတၢၢ်န့ၣ်​ ဆါန့ၢ်ယၤလၢ ဖိဝဲၢ်ကိ အတၢ်ခွဲးတၢ်ယာ်မီၤ.”+ ၃၂ ဒီးစီၤဧ့ၡီၤ တဲဝဲလၢ “ခဲအံၤ ယကသံလီၤ. တၢ်လၢ ဖိဝဲၢ်ကိ အတၢ်ခွဲးတၢ်ယာ် တခါအံၤ ကကဲဘျုးလၢယဂီၢ် ဒ်လဲၣ်.” ၃၃ ဒီးစီၤယၤကိာ် တဲဝဲလၢ “အၢၣ်လီၤဆိယၤသၢၤ.” အဃိ စီၤဧ့ၡီၤ အၢၣ်လီၤအီၤ ဒီးဆါန့ၢ် စီၤယၤကိာ် လၢဖိဝဲၢ်ကိ အတၢ်ခွဲးတၢ်ယာ်လီၤ.+ ၃၄ ဒီးစီၤယၤကိာ် ဟ့ၣ်လီၤစီၤဧ့ၡီၤ ကိၣ်ဒီးပဲကသူထံလီၤ. ဒီးအဝဲ အီၣ်ဝဲအီဝဲ ဝံၤဒီး ဂဲၤဆၢထၢၣ်​ ဒီးဟးထီၣ်ကွံာ်ဝဲလီၤ. အဃိ စီၤဧ့ၡီၤ တပာ်ကဲ ဖိဝဲၢ်ကိ အတၢ်ခွဲးတၢ်ယာ် နီတစဲးဘၣ်.

၂၆ လၢညါန့ၣ်​ တၢ်သၣ်ဝံၤလီၤဒိ အိၣ်ထီၣ်ဖဲ စီၤအၤဘြၤဟၣ်​ အိၣ်မူအဆၢကတီၢ်လီၤ.+ ဒီးခဲအံၤ တၢ်သၣ်ဝံၤလီၤဒိ အိၣ်ထီၣ်ကဒီးလၢ ကီၢ်အဝဲန့ၣ်အပူၤလီၤ. အဃိ စီၤအံၤစဲး လဲၤလၢပှၤဖလ့ၡသးဖိ အစီၤပၤ စီၤအဘံၤမ့လ့းအအိၣ်​ လၢကရၢ်လီၤ. ၂ ဒီးယဟိဝၤယွၤ လီၣ်ဖျါထီၣ်အသးလၢအအိၣ်​ ဒီးတဲဝဲလၢ “လဲၤလီၤလၢ ကီၢ်အဲၤကူပတူးတဂ့ၤ. အိၣ်လၢကီၢ်ပူၤ ဖဲတၢ်လီၢ်လၢ ယကတဲနၤ တတီၤဂ့ၤ တတီၤဂ့ၤန့ၣ်တက့ၢ်. ၃ အိၣ်လၢ ကီၢ်တဘ့ၣ်အံၤ ဒ်ပှၤထံဂၤကီၢ်ဂၤဖိတဂၤ အသိးတက့ၢ်.+ ဒီးယကဆဲးအိၣ်ဒီးနၤ ဒီးယကဆိၣ်ဂ့ၤနၤ မ့ၢ်လၢယကဟ့ၣ်လီၤ နၤဒီးနချံနသၣ်လၢ တၢ်လီၢ်တဖၣ်အံၤ ခဲလၢာ်လီၤ.+ ဒီးယကမၤဒ် တၢ်အၢၣ်လီၤလၢ ယအၢၣ်လီၤနပၢ် စီၤအၤဘြၤဟၣ်​ အသိးလီၤ.+ ၄ ယအၢၣ်လီၤအီၤလၢ ‘ယကမၤအါထီၣ်​ နချံနသၣ်​ တုၤလၢအအိၣ်အါ ထဲသိးဒီး ဆၣ်တဖၣ်​ လၢမူခိၣ်လီၤ.+ ဒီးယကဟ့ၣ်လီၤ နချံနသၣ်လၢ တၢ်လီၢ်တဖၣ်အံၤ ခဲလၢာ်+ ဒီးပှၤကိးကလုာ်ဒဲး လၢဟီၣ်ခိၣ်ချၢန့ၣ်​ ကဘၣ်တၢ်ဆိၣ်ဂ့ၤအီၤ ခီဖျိလၢ နချံနသၣ်အဃိလီၤ.’+ ၅ ယကမၤဒ်န့ၣ်​ မ့ၢ်လၢ စီၤအၤဘြၤဟၣ်​ ဒိကနၣ်​ ယကလုၢ် ဒီးမၤထွဲ ယတၢ်ဘျၢတဖၣ်, ယတၢ်မၤလိာ်တဖၣ်​ ဒီးယတၢ်သိၣ်တၢ်သီတဖၣ်​ အဃိလီၤ.”+ ၆ ဒီးစီၤအံၤစဲး ဆဲးအိၣ်ဝဲလၢ ကရၢ်လီၤ.+

၇ ဖဲပိာ်ခွါလၢ အအိၣ်ဖဲန့ၣ်တဖၣ်​ သံကွၢ်တၢ် ဘၣ်ဃးဒီး အမါအဂ့ၢ်အခါ အဝဲတဲဆၢဝဲလၢ “အဝဲမ့ၢ် ယဒီပုၢ်ဝဲၢ်မုၣ်လီၤ.”+ ခီဖျိလၢ အမါန့ၣ်​ ဒိၣ်တၢ်ဂ့ၤမးအဃိ အဝဲဆိကမိၣ်ဝဲလၢ “ဘၣ်သ့ၣ်သ့ၣ်​ ပိာ်ခွါလၢ အအိၣ်ဖဲအံၤတဖၣ်​ ကမၤသံယၤလၢ နီၢ်ရံးဘကၤ အဃိလီၤ.” လၢတၢ်န့ၣ်အဃိ အဝဲတဲဝဲလၢ “အဝဲမ့ၢ်ယမါ” တဘူၣ်ဘၣ်.+ ၈ လၢခံန့ၣ်​ ဖဲပှၤဖလ့ၡသးဖိ အစီၤပၤ စီၤအဘံၤမ့လ့း ကွၢ်စိတၢ်လၢ ပဲတြီဖိအခါ အထံၣ်ဝဲလၢ စီၤအံၤစဲး ပာ်ဖျါထီၣ်​ တၢ်အဲၣ်လၢ အမါနီၢ်ရံးဘကၤ အဖီခိၣ်လီၤ.+ ၉ ဒီးစီၤအဘံၤမ့လ့း ကိးန့ၢ်ဝဲ စီၤအံၤစဲး တဘျီဃီဒီး တဲအီၤလၢ “ပိာ်မုၣ်တဂၤအံၤ မ့ၢ်နမါလီၤ. ဘၣ်မနုၤအဃိ နတဲလၢ ‘အဝဲမ့ၢ် ယဒီပုၢ်ဝဲၢ်မုၣ်’ န့ၣ်လဲၣ်.” ဒီးစီၤအံၤစဲး တဲဆၢက့ၤအီၤလၢ “ယပျံၤလၢ ပှၤကမၤသံယၤလၢ ပိာ်မုၣ်တဂၤအံၤအဃိ ယတဲဒ်န့ၣ်လီၤ.”+ ၁၀ ဘၣ်ဆၣ်​ စီၤအဘံၤမ့လ့း ဆဲးတဲဝဲလၢ “နမၤပှၤဒ်လဲၣ်.+ ပှၤတဂၤဂၤ မ့ၢ်လဲၤ မံဘၣ်ဖုးဒီးနမါန့ၣ်​ တၢ်ကမၣ်​ ကလီၤတီ လၢပခိၣ်လိၤ လၢနဃိလီၤ.”+ ၁၁ ဒီးစီၤအဘံၤမ့လ့း ဟ့ၣ်လီၤတၢ်ကလုၢ်လၢ ပှၤကိးဂၤဒဲးအအိၣ်လၢ “ပှၤတဂၤဂၤလၢ အလဲၤမၤအၢမၤသီ ပှၤတဂၤအံၤ ဒီးပှၤတဂၤအံၤ အမါန့ၣ်​ ကဘၣ်​ တၢ်မၤသံအီၤ သပှၢ်တၢၢ်လီၤ.”

၁၂ စီၤအံၤစဲး စးထီၣ်ဖှံလီၤ တၢ်ချံလၢ ကီၢ်အဝဲန့ၣ်အပူၤ ဒီးတၢ်တနံၣ်န့ၣ်​ အကူးဘၣ်က့ၤ တၢ်လၢအဖှံလီၤဝဲတဖၣ်​ အစး ၁၀၀ ခီဖျိလၢ ယဟိဝၤယွၤ ဆိၣ်ဂ့ၤအီၤ အဃိလီၤ.+ ၁၃ အဝဲကဲထီၣ်​ ပှၤထူးပှၤတီၤ ဒီးဆဲးဘီၣ်ထီၣ်ညီထီၣ်​ တုၤလၢ အကဲထီၣ်​ ပှၤထူးပှၤတီၤဖးဒိၣ်​ တဂၤန့ၣ်လီၤ. ၁၄ အဝဲအိၣ်ဒီး သိဒီဒူၣ်, ကျီၢ်ဒီဒူၣ်​ ဒီးအခ့အပှၤ အိၣ်ဝဲဒီဒူၣ်ညါလီၤ.+ ဒီးပှၤဖလ့ၡသးဖိတဖၣ်​ သးက့ၣ်အီၤလီၤ.

၁၅ အဃိ ကယဲၢ်ထံကမျၢလၢ အပၢ် စီၤအၤဘြၤဟၣ်​ အခ့အပှၤတဖၣ်​ ခူၣ်ပာ်စၢၤဝဲ လၢညါ ဖဲစီၤအၤဘြၤဟၣ်​ အိၣ်မူအဆၢကတီၢ်န့ၣ်+ ပှၤဖလ့ၡသးဖိတဖၣ်​ မၤပှဲၤဝဲဒီး ဟီၣ်ခိၣ်လီၤ. ၁၆ ဒီးစီၤအဘံၤမ့လ့း တဲဘၣ်စီၤအံၤစဲးလၢ “မ့ၢ်လၢ သုအိၣ်အါန့ၢ်ဒံးပှၤ အဃိ ဟးထီၣ်ကွံာ်လၢ ပအိၣ်တက့ၢ်.” ၁၇ အဃိ စီၤအံၤစဲး ဟးထီၣ်ဖဲန့ၣ်​ ဒီးလဲၤသုးအသးလၢ ကရၢ်အတၢ်တြီၤပူၤ+ ဒီးအိၣ်ဝဲဖဲန့ၣ်လီၤ. ၁၈ ဒီးစီၤအံၤစဲး ခူၣ်ကဒီး ထံကမျၢတဖၣ်လၢ ပှၤခူၣ်အီၤဖဲ အပၢ်စီၤအၤဘြၤဟၣ်​ အိၣ်မူအဆၢကတီၢ်လီၤ. ဖဲစီၤအၤဘြၤဟၣ်​ သံဝံၤအလီၢ်ခံ ပှၤဖလ့ၡသးဖိ မၤပှဲၤထံကမျၢတဖၣ်အံၤ လၢဟီၣ်ခိၣ်လီၤ.+ ဒီးစီၤအံၤစဲး ကိးဝဲ ထံကမျၢ တဖၣ်အံၤအမံၤ ဒ်အပၢ် ကိးပာ်စၢၤဝဲ အသိးလီၤ.+

၁၉ ဖဲစီၤအံၤစဲး အခ့အပှၤတဖၣ်​ ခူၣ်ဝဲထံကမျၢလၢ တၢ်တြီၤပူၤအခါ အဝဲသ့ၣ်ထံၣ်ဝဲ ထံကမျၢတပူၤလၢ အထံဆှံလီၤ. ၂၀ ဒီးကရၢ် အပှၤကွၢ်သိသ့ၣ်တဖၣ်န့ၣ်​ အ့ၣ်လိာ်အသးဒီး စီၤအံၤစဲး အပှၤကွၢ်သိတဖၣ်​ ဒီးတဲဝဲလၢ “ထံအံၤမ့ၢ်ပတၢ်လီၤ.” အဃိ စီၤအံၤစဲး ကိးဝဲထံကမျၢအံၤ အမံၤလၢ ဧ့စ့း* မ့ၢ်လၢ ပှၤသ့ၣ်တဖၣ်န့ၣ်​ အ့ၣ်လိာ်အသး ဒီးအီၤအဃိလီၤ. ၂၁ ဒီးအဝဲသ့ၣ်​ ခူၣ်ဝဲ ထံကမျၢလၢ အသီတပူၤ ဒီးပှၤတဖၣ်န့ၣ်​ အ့ၣ်လိာ်အသးဒီး အဝဲသ့ၣ်​ လၢထံကမျၢတပူၤအံၤ အဃိစ့ၢ်ကီးလီၤ. အဃိ စီၤအံၤစဲး ကိးဝဲထံကမျၢအံၤ အမံၤလၢ စံးတနၤလီၤ.* ၂၂ လၢခံ အဝဲလဲၤအိၣ်လၢ တၢ်လီၢ်အဂၤ ဒီးခူၣ်လီၤ ထံကမျၢအဂၤတပူၤ ဘၣ်ဆၣ်​ အဝဲသ့ၣ်​ တအ့ၣ်လိာ်အသးလၢ ထံကမျၢအံၤ အဃိဘၣ်. အဃိ အဝဲ ကိးဝဲအမံၤလၢ ရဃိဘိး* ဒီးတဲဝဲလၢ “ခဲအံၤ ယဟိဝၤယွၤ ဟ့ၣ်လီၤပှၤ တၢ်လီၢ်ဖးလဲၢ် ဒီးဒုးအါထီၣ်​ ပဖိပလံၤသ့ၣ်တဖၣ်လၢ ကီၢ်ပူၤလီၤ.”+

၂၃ ဒီးစီၤအံၤစဲး ဟးထီၣ်ဖဲန့ၣ်​ ဒီးလဲၤဝဲလၢ ဘ့ၢ်ၡဘၤလီၤ.+ ၂၄ ဒီးတၢ်တနၤန့ၣ်​ ယဟိဝၤယွၤ လီၣ်ဖျါထီၣ်အသး လၢအအိၣ်ဒီး တဲအီၤလၢ “ယမ့ၢ် နပၢ် စီၤအၤဘြၤဟၣ်​ အကစၢ်ယွၤလီၤ.+ ယအိၣ်ဒီးနၤ အဃိ ပျံၤတၢ်တဂ့ၤ.+ ယကဆိၣ်ဂ့ၤနၤ ဒီးမၤအါထီၣ်​ နချံနသၣ်​ လၢယခ့ယပှၤ စီၤအၤဘြၤဟၣ်​ အဃိလီၤ.”+ ၂၅ အဃိ အဝဲတ့ထီၣ်​ တၢ်လုၢ်လီၢ်တခါ ဖဲန့ၣ်​ ဒီးကိးထီၣ်ဝဲ ယဟိဝၤယွၤ အမံၤလီၤ.+ ဒီးစီၤအံၤစဲး သူၣ်ထီၣ်ဝဲ အဒဲဖဲန့ၣ်+ ဒီးအခ့အပှၤတဖၣ်​ ခူၣ်ဝဲထံကမျၢတပူၤ ဖဲန့ၣ်လီၤ.

၂၆ လၢခံ စီၤအဘံၤမ့လ့း လၢအအိၣ်ဝဲလၢ ကရၢ် ဒီးအပှၤဟ့ၣ်ကူၣ်ဟ့ၣ်ဖးတၢ် စီၤအဃူးစး ဒီးအသုးမုၢ်အခိၣ်​ စီၤဖံကိးလးန့ၣ်​ လဲၤဝဲလၢ စီၤအံၤစဲး အအိၣ်လီၤ.+ ၂၇ ဒီးစီၤအံၤစဲး တဲအဝဲသ့ၣ်လၢ “သုသးဟ့ယၤ ဒီးနီဟးထီၣ်ယၤလၢ သုအိၣ်လီၤ. ခဲအံၤ ဘၣ်မနုၤအဃိ သုဟဲလၢ ယအိၣ်လဲၣ်.” ၂၈ ဒီးအဝဲသ့ၣ်​ တဲဝဲလၢ “ပထံၣ်ဘၣ်လၢ ယဟိဝၤယွၤ အိၣ်ဒီးနၤ သပှၢ်ကတၢၢ်လီၤ.+ အဃိ ပတဲလိာ်ပသးလၢ ‘မ်ပမၤတၢ်အၢၣ်လီၤအီလီၤ* လၢနၤဒီးပှၤအဘၢၣ်စၢၤ ဒီးမ်ပမၤ တၢ်အၢၣ်လီၤအီလီၤအံၤ+ ၂၉ ဒ်သိးနတမၤအၢမၤသီ ပှၤနီတမံၤဘၣ်​ ဒ်ပတမၤအၢမၤသီနၤဘၣ်​ အသိးလီၤ. ပမၤထဲ တၢ်ဂ့ၤလၢ နဖီခိၣ်​ ခီဖျိလၢ ပနီဟးထီၣ်နၤ မုာ်မုာ်လီၤ. ခဲအံၤ နမ့ၢ်ပှၤလၢ အဘၣ်ဆိၣ်ဂ့ၤလၢ ယဟိဝၤယွၤလီၤ.’” ၃၀ ဒီးစီၤအံၤစဲး မၤန့ၢ် တၢ်အီၣ်တၢ်အီ လၢအဝဲသ့ၣ်အဂီၢ် ဒီးအဝဲသ့ၣ်​ အီၣ်တၢ်အီတၢ်လီၤ. ၃၁ လၢဂီၤခီဂီၤဂီၤန့ၣ်​ အဝဲသ့ၣ်ဂဲၤဆၢထၢၣ်​ ဒီးမၤတၢ်အၢၣ်လီၤအီလီၤလီၤ.+ ဝံၤဒီး စီၤအံၤစဲး ပျဲက့ၤအဝဲသ့ၣ်​ ဒီးအဝဲသ့ၣ်က့ၤ လၢတၢ်မုာ်တၢ်ခုၣ်အပူၤလီၤ.

၃၂ ဖဲတၢ်တနံၤန့ၣ်​ စီၤအံၤစဲး အခ့အပှၤတဖၣ်​ ဟဲတဲဘၣ်အီၤ ဘၣ်ဃးဒီး ထံကမျၢလၢ အဝဲသ့ၣ်ခူၣ်ဝဲ တပူၤလီၤ.+ အဝဲသ့ၣ်​ တဲအီၤလၢ “ပထံၣ်န့ၢ်ထံလံ.” ၃၃ အဃိ စီၤအံၤစဲး ကိးန့ၢ်ဝဲ ထံကမျၢအံၤ အမံၤလၢ ၡဘၤလီၤ. လၢတၢ်န့ၣ်အဃိ ဝ့ၢ်တဖျၢၣ်အံၤ ပှၤကိးအီၤလၢ ဘ့ၢ်ၡဘၤ+ တုၤလၢ မုၢ်မဆါတနံၤအံၤလီၤ.

၃၄ ဖဲစီၤဧ့ၡီၤ အိၣ်အနံၣ်​ ၄၀ အခါ အဝဲဟံးန့ၢ်အမါလၢ ပှၤဃ့ၤသးဖိ စီၤဘအ့ရံၤ အဖိမုၣ်​ နီၢ်ယဟူဒံး ဒီးပှၤဃ့ၤသးဖိ စီၤအ့လိၣ်​ အဖိမုၣ်​ နီၢ်ဘၤစမးလီၤ.+ ၃၅ ဒီးအဝဲသ့ၣ်​ ဒုးအိၣ်ထီၣ်​ တၢ်သးအုးဖးဒိၣ်လၢ နီၢ်ရံးဘကၤ ဒီးစီၤအံၤစဲးအဂီၢ်လီၤ.+

၂၇ စီၤအံၤစဲး အသးပှၢ်ထီၣ်လံ ဒီးအမဲာ်ကဒု တုၤဒၣ်လဲာ် အတထံၣ်တၢ်လၢၤဘၣ်အဃိ အကိးဃီၤဝဲ အဖိခွါဝဲၢ်ကိ စီၤဧ့ၡီၤ+ ဆူအအိၣ်​ ဒီးတဲအီၤလၢ “ယဖိခွါဧၢ” ဒီးစီၤဧ့ၡီၤ တဲဆၢက့ၤအီၤလၢ “မ့ၢ်, ပၢ်ဧၢ.” ၂ ဒီးစီၤအံၤစဲး တဲဝဲလၢ “ခဲအံၤ ယသးပှၢ်ထီၣ်လံ ဒီးယကဆဲးအိၣ်မူဒံး ဆံးယံာ်လဲၣ်န့ၣ်​ ယတသ့ၣ်ညါဘၣ်. ၃ အဃိ ခဲအံၤန့ၣ်​ ဟံးန့ၢ်နစုကဝဲၤတဖၣ်​ လၢအမ့ၢ် နချံၣ်​ ဒီးနပျၢ် ဒီးလဲၤလၢ တၢ်ချၢ ဒီးခးဒုးအီၣ်ယၤ တၢ်မံၤလာ်အညၣ်တက့ၢ်.+ ၄ ဒီးကတဲာ်ကတီၤန့ၢ်ယၤ တၢ်အီၣ်ဝံၣ်ဝံၣ်တခွးလၢ ယအီၣ်အီၤဝံၣ်​ ဒီးဟဲစိာ်အီၤလၢ ယအိၣ်သၢၤ. ယအီၣ်အီၤ မ့ၢ်ဝံၤန့ၣ်​ ယကဆိၣ်ဂ့ၤနၤ တချုးလၢ ယသံဒံးဘၣ်လီၤ.”

၅ ဖဲစီၤအံၤစဲး တဲတၢ်ဒီးအဖိခွါ စီၤဧ့ၡီၤအခါ နီၢ်ရံးဘကၤ ဒိကနၣ်ဝဲလီၤ. ဒီးစီၤဧ့ၡီၤ ဟးထီၣ်ဝဲလၢတၢ်ချၢ ဒ်သိးကလဲၤခး တၢ်မံၤလာ် ဒီးဟဲက့ၤစိာ်ဝဲ အဂီၢ်လီၤ.+ ၆ ဒီးနီၢ်ရံးဘကၤ တဲဘၣ်အဖိခွါ စီၤယၤကိာ်လၢ+ “ဖဲမၢကိာ် ယနၢ်ဟူ နပၢ်တဲနကၠီ စီၤဧ့ၡီၤလၢ ၇ ‘ဟဲက့ၤစိာ် တၢ်မံၤလာ် ဒီးဖီဒုးအီၣ်ယၤ ကသူဝံၣ်ဝံၣ်တခွးတက့ၢ်. ယအီၣ်အီၤ မ့ၢ်ဝံၤန့ၣ်​ ယကဆိၣ်ဂ့ၤနၤလၢ ယဟိဝၤယွၤ အမဲာ်ညါ တချုးလၢ ယသံဒံးဘၣ်လီၤ.’+ ၈ အခဲအံၤ ယဖိခွါဧၢ, ဒိကနၣ်ယၤထံထံ ဒီးမၤဒ် ယတဲနၤအသိးတက့ၢ်.+ ၉ ဝံသးစူၤ လဲၤလၢ မဲာ်တဲးလဲးတဖုအအိၣ်​ ဒီးဟဲက့ၤစိာ်န့ၢ်ယၤ မဲာ်တဲးလဲးဖိလၢ အဂ့ၤကတၢၢ်ခံဒု ဒ်သိး ယကကတဲာ်ကတီၤ တၢ်အီၣ်ဝံၣ်ဝံၣ်တခွး လၢနပၢ်အဂီၢ် ဒ်အအီၣ်ဝဲဝံၣ်​ အသိးန့ၣ်တက့ၢ်. ၁၀ ဒီးလဲၤစိာ်ဒုးအီၣ်နပၢ် ဒ်သိး အကဆိၣ်ဂ့ၤနၤ တချုးလၢ အသံဒံးဘၣ်​ န့ၣ်တက့ၢ်.”

၁၁ ဒီးစီၤယၤကိာ် တဲဘၣ်အမိၢ် နီၢ်ရံးဘကၤလၢ “ယကၠီစီၤဧ့ၡီၤန့ၣ်​ မ့ၢ်ပှၤလၢ အအိၣ်ဒီး အဆူၣ်အါမး+ ဘၣ်ဆၣ်​ မ့မ့ၢ်ယၤန့ၣ်​ ယဘ့ၣ်ဘျ့လီၤ. ၁၂ ယပၢ် မ့ၢ်ပလၢၢ်ကွၢ်ယၤမီၤ.+ ကဖျါလၢ ယမၤလိာ်ကွဲအီၤ သပှၢ်ကတၢၢ် ဒီးယကဒုးအိၣ်ထီၣ်​ တၢ်ဆိၣ်အၢ လၢယဂီၢ် ဒီးတမ့ၢ် တၢ်ဆိၣ်ဂ့ၤဘၣ်.” ၁၃ ဒီးအမိၢ်တဲအီၤလၢ “ဖိခွါဧၢ, တၢ်ဆိၣ်အၢ လၢနဂီၢ်န့ၣ်​ မ်အလီၤဘၣ်ယၤတက့ၢ်. မၤဒ် ယတဲအသိး ဒီးလဲၤဒီး ဟဲက့ၤစိာ်န့ၢ်ယၤ မဲာ်တဲးလဲးဖိတဖၣ်န့ၣ်တက့ၢ်.”+ ၁၄ အဃိ အဝဲလဲၤဝဲ ဒီးဟဲက့ၤစိာ် မဲာ်တဲးလဲးဖိတဖၣ်​ ဆူအမိၢ်အအိၣ်​ ဒီးအမိၢ် ကတဲာ်ကတီၤ တၢ်အီၣ်ဝံၣ်ဝံၣ်တခွး ဒ်အပၢ် အီၣ်ဝဲဝံၣ်​ အသိးလီၤ. ၁၅ ဒီးနီၢ်ရံးဘကၤန့ၣ်​ ဟံးန့ၢ်ဝဲ အဖိခွါဒိၣ်​ စီၤဧ့ၡီၤ အဆ့ကူဆ့ကၤလၢ အဂ့ၤကတၢၢ်တဖၣ်​ လၢဟံၣ်ပူၤ ဒီးဒုးသိးထီၣ်ဝဲ အဖိခွါဆံး စီၤယၤကိာ်လီၤ.+ ၁၆ ဒီးနီၢ်ရံးဘကၤ ပာ်ထီၣ်ဝဲ မဲာ်တဲးလဲးဖိ အဘ့ၣ်လၢ စီၤယၤကိာ် အစုလိၤ ဒီးလၢအကိာ်ဘိအလိၤ လၢအဆူၣ်တအိၣ်ဘၣ်​ အလီၢ်န့ၣ်လီၤ.+ ၁၇ ဒီးအဝဲဟ့ၣ်လီၤဝဲ စီၤယၤကိာ် ကသူဝံၣ်ဝံၣ်တခွး ဒီးကိၣ်လၢ အတ့ဝဲန့ၣ်လီၤ.+

၁၈ အဃိ စီၤယၤကိာ်န့ၣ်​ လဲၤနုာ်လီၤလၢ အပၢ်အအိၣ်​ ဒီးတဲဝဲလၢ “ပါဧၢ” ဒီးစီၤအံၤစဲး တဲဆၢအီၤလၢ “မ့ၢ်, ဖိခွါဧၢ. နမ့ၢ်ဖဲလဲၣ်တဂၤလဲၣ်.” ၁၉ စီၤယၤကိာ် တဲအပၢ်လၢ “ယမ့ၢ်နဖိဝဲၢ်ကိ စီၤဧ့ၡီၤ+ ဒီးယမၤဒ် နတဲယၤအသိးလီၤ. အဃိ ဝံသးစူၤ ဝံၣ်ထီၣ်နသးဒီး ဆ့ၣ်နီၤအီၣ်​ တၢ်မံၤလာ်အညၣ်​ ဒ်သိး နကဆိၣ်ဂ့ၤယၤ အဂီၢ်တက့ၢ်.”+ ၂၀ ဒီးစီၤအံၤစဲးန့ၣ်​ တဲဘၣ်အဖိခွါလၢ “ဖိခွါဧၢ, နမၤန့ၢ်အီၤ ချ့ထဲအံၤညါ ဒ်လဲၣ်.” ဒီးစီၤယၤကိာ် တဲဆၢဝဲလၢ “မ့ၢ်လၢ နကစၢ် ယဟိဝၤယွၤ ဆှၢဃီၤအီၤလၢယအိၣ်​ အဃိလီၤ.” ၂၁ ဒီးစီၤအံၤစဲး တဲစီၤယၤကိာ်လၢ “ဖိခွါဧၢ, ဝံသးစူၤ သုးဘူးနသးလၢယအိၣ်​ ဒီးယကပလၢၢ်ကွၢ်နၤ ဒ်သိးယကသ့ၣ်ညါလၢ မ့ၢ်နကဲယဖိခွါ စီၤဧ့ၡီၤ အနီၢ်ကီၢ်ဧါ တနီၢ်ကီၢ်ဘၣ်ဧါ န့ၣ်လီၤ.”+ ၂၂ အဃိ စီၤယၤကိာ် သုးဘူးအသးလၢ အပၢ်စီၤအံၤစဲးအအိၣ်​ ဒီးအပၢ်ပလၢၢ်အီၤ ဝံၤဒီးတဲဝဲလၢ “အကလုၢ်န့ၣ်​ မ့ၢ်စီၤယၤကိာ် အကလုၢ် ဘၣ်ဆၣ်​ အစုန့ၣ်​ မ့ၢ်စီၤဧ့ၡီၤ အစုလီၤ.”+ ၂၃ ဒီးစီၤအံၤစဲးန့ၣ်​ တသ့ၣ်ညါဝဲလၢ အမ့ၢ်စီၤယၤကိာ်ဘၣ်​ မ့ၢ်လၢ အစုန့ၣ်အဆူၣ်အိၣ်အါ ဒ်အကၠီ စီၤဧ့ၡီၤ အစုအသိးလီၤ. အဃိ စီၤအံၤစဲး ဆိၣ်ဂ့ၤစီၤယၤကိာ်လီၤ.+

၂၄ ဒီးစီၤအံၤစဲး သံကွၢ်ဝဲလၢ “နမ့ၢ်ယဖိခွါ စီၤဧ့ၡီၤ အနီၢ်ကီၢ်ဧါ.” ဒီးစီၤယၤကိာ် စံးဆၢက့ၤဝဲလၢ “အနီၢ်ကီၢ်လီၤ.” ၂၅ ဒီးစီၤအံၤစဲး တဲဝဲလၢ “ဖိခွါဧၢ, ဟဲစိာ်န့ၢ်ယၤ တၢ်မံၤလာ် အညၣ်လၢ ယကအီၣ်အီၤအဂီၢ်တက့ၢ်. မ့ၢ်ဝံၤဒီး ယကဆိၣ်ဂ့ၤနၤလီၤ.” အဃိ စီၤယၤကိာ် ဟဲစိာ်န့ၢ်အီၤဒီး အဝဲအီၣ်ဝဲလီၤ. ဒီးအဝဲဟဲစိာ်စ့ၢ်ကီး စပံးထံ ဒီးအဝဲအီဝဲလီၤ. ၂၆ ဒီးစီၤအံၤစဲး တဲအီၤလၢ “ဖိခွါဧၢ, ဝံသးစူၤ သုးဘူးနသးလၢယအိၣ်​ ဒီးနၢမူယၤတက့ၢ်.”+ ၂၇ ဒီးအဝဲသုးဘူးအသးဒီး နၢမူအီၤလီၤ. ဒီးစီၤအံၤစဲးန့ၣ်​ နၢဘၣ်ဝဲ အဖိခွါ အဆ့ကၤအစိလီၤ.+ ဝံၤဒီးအဝဲ ဆိၣ်ဂ့ၤအီၤဒီး တဲဝဲလၢ

“ကွၢ်မီၤ, ယဖိခွါ အစိန့ၣ်​ နၢဝဲဒ်တၢ်ပျီ အစိလၢ ယဟိဝၤယွၤ ဆိၣ်ဂ့ၤဝဲ အသိးလီၤ. ၂၈ မ်ယွၤလၢ အမ့ၢ်အတီတဂၤ ဟ့ၣ်လီၤနၤလၢ မူခိၣ်အပစီၤထံ,+ ဟီၣ်ခိၣ်ညၣ်ထ့ၣ်​ လၢအဂ့ၤ+ ဒီးဘုဧိၤဟုဧိၤ ဒီးစပံးထံအသီ အါအါဂီၢ်ဂီၢ်တက့ၢ်.+ ၂၉ မ်ပှၤဂီၢ်မုၢ်တဖၣ်​ ကဲထီၣ်နခ့နပှၤ ဒီးမ်ပှၤကလုာ်တဖၣ်​ ဆှိလီၤအခိၣ်လၢ နမဲာ်ညါတက့ၢ်. မ်နဒိၣ်စိလၢ နဒီပုၢ်ဝဲၢ်တဖၣ်​ အဖီခိၣ်​ ဒီးမ်နမိၢ်အဖိခွါတဖၣ်​ ဆှိလီၤအခိၣ်လၢ နမဲာ်ညါတက့ၢ်.+ ပှၤလၢ အဆိၣ်အၢနၤ ကိးဂၤဒဲးန့ၣ်​ မ်အဘၣ်​ တၢ်ဆိၣ်အၢအီၤ ဒီးပှၤလၢ အဆိၣ်ဂ့ၤနၤ ကိးဂၤဒဲးန့ၣ်​ မ်အဘၣ်​ တၢ်ဆိၣ်ဂ့ၤအီၤတက့ၢ်.”+

၃၀ ဖဲစီၤအံၤစဲး ဆိၣ်ဂ့ၤဝဲအဖိခွါ စီၤယၤကိာ် ဝံၤဒီး စီၤယၤကိာ် ဟးထီၣ်လၢ အပၢ်အမဲာ်ညါ ပီဝံၤဝဲအခါ* အကၠီ စီၤဧ့ၡီၤလၢ အလဲၤခးအီၣ်တၢ်န့ၣ်​ ဟဲက့ၤတုၤဝဲလီၤ.+ ၃၁ ဒီးစီၤဧ့ၡီၤစ့ၢ်ကီး ကတဲာ်ကတီၤဝဲ တၢ်အီၣ်ဝံၣ်ဝံၣ်တခွး ဒီးဟဲစိာ်ဝဲလၢ အပၢ်အအိၣ်​ ဒီးတဲအပၢ်လၢ “ပၢ်ဧၢ, ဂဲၤထၢၣ်အီၣ်​ တၢ်မံၤလာ်အညၣ်လၢ ယဟဲစိာ်န့ၢ်နၤ ဒ်သိး နကဆိၣ်ဂ့ၤယၤ အဂီၢ်တက့ၢ်.” ၃၂ ဒီးအပၢ် စီၤအံၤစဲး တဲဘၣ်အီၤလၢ “နမ့ၢ်မတၤတဂၤလဲၣ်.” ဒီးအဝဲ စံးဆၢက့ၤအီၤလၢ “ယမ့ၢ်နဖိခွါဝဲၢ်ကိ စီၤဧ့ၡီၤလီၤ.”+ ၃၃ ဒီးစီၤအံၤစဲး ကနိးဝဲနးမး ဒီးတဲဝဲလၢ “မ့မ့ၢ်ဒ်န့ၣ်န့ၣ်​ ပှၤလၢအခးန့ၢ် တၢ်မံၤလာ် ဒီးဟဲစိာ်လၢ ယအိၣ်န့ၣ်​ ကဲမတၤ တဂၤလဲၣ်. တချုးလၢ နဟဲဒံးဘၣ်န့ၣ်​ ယအီၣ်တၢ်ဝံၤလံ ဒီးယဆိၣ်ဂ့ၤအီၤဝံၤလံ ဒီးအဝဲကဘၣ်​ တၢ်ဆိၣ်ဂ့ၤ သပှၢ်တၢၢ်လီၤ.”

၃၄ ဖဲစီၤဧ့ၡီၤ နၢ်ဟူအပၢ် အတၢ်ကတိၤတဖၣ်အခါ အဝဲဟီၣ်ကိးပသူထီၣ်ဝဲ ဒီးတဲအပၢ်လၢ “ပၢ်ဧၢ, ယၤမီၤ, ဆိၣ်ဂ့ၤယၤစ့ၢ်ကီးနီၤ.”+ ၃၅ ဘၣ်ဆၣ်​ စီၤအံၤစဲး တဲဝဲလၢ “နပုၢ်ဟဲလံၣ်န့ၢ်ယၤ ဒ်သိး အကန့ၢ်ဘၣ်​ တၢ်ဆိၣ်ဂ့ၤလၢ နလီၢ်န့ၣ်လီၤ.” ၃၆ ဖဲန့ၣ်​ စီၤဧ့ၡီၤ တဲဝဲလၢ “အဝဲဟံးန့ၢ်ယလီၢ် အိၣ်ခံဘျီလံ အဃိ အမံၤလၢ စီၤယၤကိာ်န့ၣ်* ကြၢးဝဲလီၤ.+ အဝဲဟံးန့ၢ်ကွံာ် ဖိဝဲၢ်ကိ အတၢ်ခွဲးတၢ်ယာ် လၢယအိၣ်ဝံၤလံ.+ ဒီးခဲအံၤန့ၣ်​ အဝဲဟံးန့ၢ်စ့ၢ်ကီး ယတၢ်ဆိၣ်ဂ့ၤလံ.”+ ဒီးစီၤဧ့ၡီၤ ဆဲးတဲဝဲလၢ “နတပာ်ဃာ်န့ၢ်ယၤ တၢ်ဆိၣ်ဂ့ၤ နီတမံၤလၢၤဧီၤ.” ၃၇ ဒီးစီၤအံၤစဲး တဲဆၢ စီၤဧ့ၡီၤလၢ “ခဲအံၤ ယပာ်ထီၣ်အီၤ ဒ်ကစၢ်အသိးလၢ နဖီခိၣ်လံ+ ဒီးယတဲပာ်စၢၤလၢ အဒီပုၢ်ဝဲၢ်ခဲလၢာ်ကကဲထီၣ်​ အပျဲၢ်လီၤ. ဒီးယဟ့ၣ်အီၤလၢ ဘုဧိၤဟုဧိၤ ဒီးစပံးထံအသီလၢ ကကဲထီၣ်​ တၢ်မၤစၢၤလၢ အဂီၢ်လီၤ.+ အဃိ ဖိခွါဧၢ, ယကဟ့ၣ်လီၤနၤအဂီၢ် တၢ်မနုၤ ကအိၣ်တ့ၢ်ဒံးလဲၣ်.”

၃၈ ဒီးစီၤဧ့ၡီၤ တဲဘၣ်အပၢ်လၢ “ပၢ်ဧၢ, တၢ်ဆိၣ်ဂ့ၤ ထဲတခါဧိၤဒၣ်လဲာ် တအိၣ်လၢၤဧီၤ. ပၢ်ဧၢ, ယၤမီၤ, ဆိၣ်ဂ့ၤယၤစ့ၢ်ကီးနီၤ.” ဒီးစီၤဧ့ၡီၤ ဟီၣ်ဝဲဖးဒိၣ်​ ဒီးအမဲာ်ထံလီၤဝဲလီၤ.+ ၃၉ ဒီးအပၢ် စီၤအံၤစဲး တဲဆၢက့ၤအီၤလၢ

“ကွၢ်မီၤ, နတအိၣ်ဘၣ်လၢ ဟီၣ်ခိၣ်ညၣ်လၢ အဂ့ၤသ့ၣ်တဖၣ်​ အိၣ်ဝဲ အလီၢ်ဘၣ်​ ဒီးနတဒိးန့ၢ်ဘၣ်​ မူခိၣ်​ အပစီၤထံဘၣ်.+ ၄၀ ဒီးနကမူလၢ နနးအဃိ+ ဒီးနကကဲ နပုၢ်အခ့အပှၤလီၤ.+ ဘၣ်ဆၣ်​ တုၤနတူၢ်အီၤ တကဲလၢၤဘၣ်အခါ နကမၤကၢ်ကွံာ် အနီၣ်ယိးဘိလၢ အအိၣ်လၢ နကိာ်လိၤန့ၣ်လီၤ.”+

၄၁ ဘၣ်ဆၣ်​ စီၤဧ့ၡီၤန့ၣ်​ သးဟ့ဝဲ စီၤယၤကိာ် မ့ၢ်လၢ အပၢ်ဆိၣ်ဂ့ၤအီၤ အဃိလီၤ.+ ဒီးစီၤဧ့ၡီၤ တဲထီၣ်ဝဲလၢ အသးပူၤလၢ “မုၢ်နံၤလၢ ယကဘၣ်ဟီၣ်လၢ ယပၢ်အတၢ်သံအဃိန့ၣ်​ ဘူးထီၣ်လံ.+ ဖဲန့ၣ်ဝံၤအလီၢ်ခံန့ၣ်​ ယကမၤသံ ယပုၢ် စီၤယၤကိာ်လီၤ.” ၄၂ ဖဲပှၤတဲဘၣ်​ နီၢ်ရံးဘကၤလၢ အဖိခွါဒိၣ်​ စီၤဧ့ၡီၤ အတၢ်ကတိၤတဖၣ်အံၤအခါ အဝဲမၢပှၤလဲၤကိးန့ၢ်အီၤ အဖိခွါဆံး စီၤယၤကိာ် ဒီးတဲအီၤလၢ “ကနၣ်မီၤ, နကၠီစီၤဧ့ၡီၤ ကူၣ်ထီၣ်ဝဲလၢ အကမၤသံနၤ ဒ်သိး ကမၤကၣ်နၤအဂီၢ်လီၤ. ၄၃ အခဲအံၤ ဖိခွါဧၢ, မၤဒ်ယတဲနၤအသိးတက့ၢ်. လဲၤဃ့ၢ်ဆူ ယဒီပုၢ်ဝဲၢ်ခွါ စီၤလၤဘၣ်​ လၢအအိၣ်လၢ ဟၤရၣ်​ အပူၤန့ၣ်တက့ၢ်.+ ၄၄ အိၣ်ဒီးအီၤဖဲန့ၣ်​ တတီၤဖိ တုၤလၢ နကၠီအသးတပှံၢ်ထီၣ်နၤလၢၤဘၣ်​ ၄၅ ဒီးတုၤလီၤလၢ နကၠီအတၢ်သးဒိၣ်လၢ နဖီခိၣ်ခုၣ်လီၤ ဒီးအသးပ့ၤနီၣ်ကွံာ် တၢ်လၢနမၤအီၤန့ၣ်တက့ၢ်. ဖဲန့ၣ်အခါ ယကမၢပှၤလဲၤဖဲန့ၣ်​ ဒီးဟဲက့ၤကိးနၤလီၤ. ယတအဲၣ်ဒိး တူၢ်ၡူသုခံဂၤလၢာ်လၢ တသီဃီအတီၢ်ပူၤဘၣ်.”

၄၆ တၢ်န့ၣ်ဝံၤအလီၢ်ခံ နီၢ်ရံးဘကၤ တဲစီၤအံၤစဲး တဘျီဝံၤတဘျီလၢ “ခီဖျိလၢ ပှၤဃ့ၤသးဖိ အဖိမုၣ်တဖၣ်အဃိ ယသးဟ့လီၤ ယတၢ်အိၣ်မူညါ.+ ပှၤဃ့ၤသးဖိ အဖိမုၣ်တဖၣ်န့ၣ်​ လီၤဂာ်ဒ်သိး ပိာ်မုၣ်လၢ ပခိၣ်ပဃၢၤတဖၣ်​ ဒီးစီၤယၤကိာ် မ့ၢ်န့ၢ်အမါလၢ အဝဲသ့ၣ်အကျါ တဂၤဂၤဒု ယဆဲးအိၣ်မူ တကဲလၢၤဘၣ်.”+

၂၈ ဒီးစီၤအံၤစဲး ကိးန့ၢ်စီၤယၤကိာ် ဒီးဆိၣ်ဂ့ၤအီၤ ဒီးမၤလိာ်အီၤလၢ “တဘၣ်ဟံးန့ၢ်နမါဒီး ပှၤကနၤဧၣ်ဖိ အဖိမုၣ်တဖၣ်တဂ့ၤ.+ ၂ လဲၤလၢ ကီၢ်ပၤဒနါရၣ်​ လၢနဖု* စီၤဘသူၤအ့လး အဒူၣ်ဖိထၢဖိအအိၣ်​ ဒီးဟံးန့ၢ်နမါလၢ နဖါတံၢ်* စီၤလၤဘၣ်​ အဖိမုၣ်တက့ၢ်.+ ၃ သ့တၢ်လၢာ် ကစၢ်ယွၤ ကဆိၣ်ဂ့ၤနၤ ဒီးကဒုးသၣ်ထီၣ်နၤ ဒီးကမၤအါထီၣ်ဂီၢ်ထီၣ်​ နဖိနလံၤတဖၣ်​ ဒီးနကကဲထီၣ်​ ပှၤဂီၢ်မုၢ်ဖးဒိၣ်​ တဖုလီၤ.+ ၄ ဒီးတၢ်ဆိၣ်ဂ့ၤလၢ စီၤအၤဘြၤဟၣ်​ န့ၢ်ဘၣ်ဝဲန့ၣ်+ ကစၢ်ယွၤ ကဟ့ၣ်လီၤနၤ ဒီးနချံနသၣ်​ ဒ်သိးနကမၤန့ၢ် ကီၢ်လၢ ကစၢ်ယွၤ ဟ့ၣ်လီၤ စီၤအၤဘြၤဟၣ်​ လၢအမ့ၢ် ကီၢ်လၢ နအိၣ်ပာ်စၢၤ လၢအပူၤ ဒ်ပှၤထံဂၤကီၢ်ဂၤဖိ အသိးလီၤ.”+

၅ ဒီးစီၤအံၤစဲး မၢစီၤယၤကိာ် လဲၤတၢ် ဒီးစီၤယၤကိာ် လဲၤဝဲလၢ ကီၢ်ပၤဒနါရၣ်လၢ စီၤဘသူၤအ့လး အဖိခွါ ပှၤစူၤရံဖိ စီၤလၤဘၣ်​ အအိၣ်လီၤ.+ စီၤလၤဘၣ်​ မ့ၢ်ဝဲ စီၤယၤကိာ် ဒီးစီၤဧ့ၡီၤအမိၢ် နီၢ်ရံးဘကၤ အဒီပုၢ်ဝဲၢ်ခွါလီၤ.+

၆ ဒီးစီၤဧ့ၡီၤ သ့ၣ်ညါဝဲလၢ စီၤအံၤစဲး ဆိၣ်ဂ့ၤ စီၤယၤကိာ် ဒီးဆှၢလီၤအီၤလၢ ကီၢ်ပၤဒနါရၣ်​ ဒ်သိး ကဟံးန့ၢ်အမါ ဖဲန့ၣ်လီၤ. စီၤအံၤစဲး ဆိၣ်ဂ့ၤစီၤယၤကိာ် ဒီးမၤလိာ်အီၤလၢ “တဘၣ်ဟံးန့ၢ်နမါဒီး ပှၤကနၤဧၣ်ဖိ အဖိမုၣ်တဖၣ်တဂ့ၤ.”+ ၇ ဒီးစီၤဧ့ၡီၤ သ့ၣ်ညါစ့ၢ်ကီးလၢ စီၤယၤကိာ် ဒိကနၣ်​ အမိၢ်အပၢ် အကလုၢ် ဒီးလဲၤဝဲလၢ ကီၢ်ပၤဒနါရၣ်လီၤ.+ ၈ ဖဲန့ၣ်အခါ စီၤဧ့ၡီၤ သ့ၣ်ညါဝဲလၢ အပၢ်စီၤအံၤစဲး တဘၣ်သူၣ်ဘၣ်သးဝဲ ပှၤကနၤဧၣ်ဖိ အဖိမုၣ်တဖၣ်ဘၣ်.+ ၉ အဃိ အဝဲလဲၤလၢ စီၤယံးၡမၤဧ့လး အအိၣ်​ ဒီးဟံးန့ၢ်ဝဲ စီၤအၤဘြၤဟၣ်အဖိခွါ စီၤယံးၡမၤဧ့လး အဖိမုၣ်​ နီၢ်မၤဃလး ဒ်အမါအသိးလီၤ. နီၢ်မၤဃလးန့ၣ်​ မ့ၢ်ဝဲ စီၤနဘါယိး အဒ့မုၣ်လီၤ. ဘၣ်ဆၣ်​ စီၤဧ့ၡီၤန့ၣ်​ အမါလၢအဂၤတဖၣ်​ အိၣ်ပာ်စၢၤလံ.+

၁၀ ဒီးစီၤယၤကိာ်န့ၣ်​ ဟးထီၣ်ဝဲလၢ ဘ့ၢ်ၡဘၤ ဒီးဆဲးလဲၤတၢ်လၢ ဝ့ၢ်ဟၤရၣ်လီၤ.+ ၁၁ လၢခံ အဝဲလဲၤတုၤလၢ တၢ်လီၢ်တတီၤ ဒီးမ့ၢ်လၢ မုၢ်လီၤနုာ်လံအဃိ အဝဲဆၢတဲာ်ဝဲလၢ အကမံဝဲဖဲန့ၣ်လီၤ. အဃိ အဝဲဟံးန့ၢ်လၢၢ် လၢအအိၣ်ဖဲန့ၣ်တဖျၢၣ်​ ဒီးပာ်လီၤဝဲ ဒ်ခိၣ်တခၢၣ်အသိး ဒီးမံဝဲဖဲန့ၣ်လီၤ.+ ၁၂ ဒီးအဝဲမံမီၢ်တၢ် ဒီးထံၣ်ဝဲ ဃီတဘိ ဒီးဃီအံၤန့ၣ်​ အိၣ်ပိာ်ထီၣ်အသးလၢ ဟီၣ်ခိၣ်ချၢ ဒီးအခိၣ်ထိး တုၤလၢမူခိၣ်လီၤ. ဒီးကစၢ်ယွၤ အမူခိၣ်ကလူးတဖၣ်​ လဲၤထီၣ်က့ၤလီၤ လၢအလိၤလီၤ.+ ၁၃ ဒီးယဟိဝၤယွၤ အိၣ်ဝဲလၢ ဃီအဖီခိၣ်ဒီး အတဲဝဲလၢ

“ယမ့ၢ်ယဟိဝၤယွၤ လၢအမ့ၢ် နဖုစီၤအၤဘြၤဟၣ်အယွၤ ဒီးစီၤအံၤစဲးအယွၤလီၤ.+ ကီၢ်လၢနမံလၢ အပူၤတဘ့ၣ်အံၤန့ၣ်​ ယကဟ့ၣ်လီၤနၤ ဒီးနချံနသၣ်လီၤ.+ ၁၄ ဒီးနချံနသၣ်​ ကအါဝဲဒ် ဟီၣ်ခိၣ်ကမူၣ်အသိး သပှၢ်ကတၢၢ်+ ဒီးနချံနသၣ်​ ကရၤလီၤအသး လၢမုၢ်နုာ် ဒီးလၢမုၢ်ထီၣ်​ ဒီးလၢကလံၤစိး ဒီးလၢကလံၤထံးလီၤ. ဒီးပှၤကိးကလုာ်ဒဲး လၢဟီၣ်ခိၣ်ချၢ ကဘၣ်တၢ်ဆိၣ်ဂ့ၤ ခီဖျိလၢနၤ ဒီးနချံနသၣ်အဃိ သပှၢ်ကတၢၢ်လီၤ.+ ၁၅ ယအိၣ်ဒီးနၤ ဒီးဖဲနလဲၤတၢ်လီၢ် တပူၤဂ့ၤတပူၤဂ့ၤန့ၣ်​ ယကဒီသဒၢနၤ ဒီးယကဒုးဟဲက့ၤနၤလၢ ကီၢ်တဘ့ၣ်အံၤလီၤ.+ တချုးလၢ ယမၤဒ်ယအၢၣ်လီၤနၤ အသိးဘၣ်န့ၣ်​ ယတလဲၤသဒၣ်နၤဘၣ်.”+

၁၆ ဒီးစီၤယၤကိာ် မံပၢၢ်ထီၣ်ဒီး တဲဝဲလၢ “ယဟိဝၤယွၤ အိၣ်ဖဲတၢ်လီၢ် တတီၤအံၤ သပှၢ်ကတၢၢ်န့ၣ်​ ယတသ့ၣ်ညါမၢၤ.” ၁၇ ဒီးစီၤယၤကိာ်ပျံၤတၢ် ဒီးတဲဝဲလၢ “တၢ်လီၢ်တတီၤအံၤ လီၤကမၢကမၣ်ဒိၣ်မးလီၤ. တၢ်လီၢ်အံၤ တမ့ၢ်တၢ်လီၢ်လၢအဂၤဘၣ်, ကဘၣ်မ့ၢ် ကစၢ်ယွၤအဟံၣ်+ ဒီးမ့ၢ်ဝဲ မူခိၣ်အတြဲၤလီၤ.”+ ၁၈ အဃိ စီၤယၤကိာ် ဂဲၤဆၢထၢၣ်ဂီၤဂီၤ ဒီးဟံးန့ၢ်လၢၢ်လၢ အမံတခၢၣ်ဝဲတဖျၢၣ်န့ၣ်​ ဒီးပာ်ဆၢထၢၣ်အီၤ ဒ်လၢၢ်ထူၣ်တထူၣ်အသိး ဒီးလူလီၤဝဲ သိလၢအဖီခိၣ်လီၤ.+ ၁၉ ဒီးအဝဲကိးန့ၢ်ဝဲ တၢ်လီၢ်အံၤအမံၤလၢ ဘ့ၤသ့လးလီၤ.* ဘၣ်ဆၣ်​ လၢညါန့ၣ်​ ဝ့ၢ်အံၤအမံၤလၢ လူးစးလီၤ.+

၂၀ ဒီးစီၤယၤကိာ် မၤတၢ်အၢၣ်လီၤလၢ “ကစၢ်ယွၤ မ့ၢ်ဆဲးအိၣ်ဒီးယၤ ဒီးဒီသဒၢယၤလၢ ယတၢ်လဲၤတၢ်က့ၤ ဒီးမ့ၢ်ဟ့ၣ်ယၤကိၣ်လၢ ယကအီၣ်အီၤ ဒီးတၢ်ကူတၢ်သိးလၢ ယကကူကသိးအဂီၢ် ၂၁ ဒီးယမ့ၢ်ဟဲက့ၤဘၣ်​ လၢယပၢ် အိၣ်တၢ်အလီၢ် လၢတၢ်မုာ်တၢ်ခုၣ်အပူၤန့ၣ်​ ယကသ့ၣ်ညါလၢ ယဟိဝၤ မ့ၢ်ဝဲယကစၢ်ယွၤ အနီၢ်ကီၢ်လီၤ. ၂၂ ဒီးလၢၢ်တဖျၢၣ်အံၤလၢ ယပာ်ဆၢထၢၣ်အီၤ ဒ်လၢၢ်ထူၣ်တထူၣ်အသိးန့ၣ်​ ကကဲထီၣ်​ ကစၢ်ယွၤအဟံၣ်+ ဒီးလၢတၢ်လၢ နကဟ့ၣ်လီၤယၤ ခဲလၢာ်အကျါန့ၣ်​ ယကဟ့ၣ်နၤ တၢ်ဆံဆဲၣ်ပူတပူ သပှၢ်ကတၢၢ်လီၤ.”

၂၉ ဝံၤဒီး စီၤယၤကိာ် ဆဲးလဲၤတၢ် ဒီးလဲၤတုၤဝဲလၢ ပှၤမုၢ်ထီၣ်ဖိ အထံကီၢ်လီၤ. ၂ ဖဲန့ၣ်န့ၣ်​ အဝဲထံၣ်ဝဲ ထံကမျၢ* တပူၤလၢ တၢ်ပျီပူၤ ဒီးဖဲထံကမျၢအံၤန့ၣ်​ ညီနုၢ် ပှၤဒုးအီသိတဖၣ်​ အထံအဃိ အဝဲထံၣ်ဝဲ သိသၢဖု မံနီၤလၢ ထံကမျၢ အကပၤလီၤ. ဒီးလၢၢ်ဖးဒိၣ်တဖျၢၣ်​ အိၣ်ဝဲလၢ ထံကမျၢ အခိၣ်ထိးလီၤ. ၃ ညီနုၢ်ဖဲသိသ့ၣ်တဖၣ်​ ဟဲပာ်ဖှိၣ်ထီၣ်အသး ဝံၤဝဲခဲလၢာ်အခါ ပှၤကွၢ်သိတဖၣ်​ သုးကွံာ်လၢၢ်လၢ ထံကမျၢအခိၣ်ထိး ဒီးဒုးအီဝဲ သိတဖၣ်အထံလီၤ. ဖဲန့ၣ်ဝံၤအလီၢ်ခံ အဝဲသ့ၣ်​ ပာ်ထီၣ်ကဒါက့ၤ လၢၢ်လၢထံကမျၢ အခိၣ်ထိးလီၤ.

၄ ဒီးစီၤယၤကိာ် သံကွၢ်အဝဲသ့ၣ်လၢ “ယဒီပုၢ်ဝဲၢ်သ့ၣ်ဧၢ, မ့ၢ်သုဟဲလၢ တၢ်လီၢ်ဖဲလဲၣ်.” ဒီးအဝဲသ့ၣ်​ စံးဆၢက့ၤဝဲလၢ “ပဟဲလၢ ဝ့ၢ်ဟၤရၣ်လီၤ.”+ ၅ ဒီးစီၤယၤကိာ် သံကွၢ် အဝဲသ့ၣ်လၢ “မ့ၢ်သုသ့ၣ်ညါ စီၤနၤဃိၢ် အလံၤခွါ+ စီၤလၤဘၣ်​ စ့ၢ်ကီးဧါ.”+ အဝဲသ့ၣ်​ စံးဆၢဝဲလၢ “ပသ့ၣ်ညါအီၤလီၤ.” ၆ ဖဲန့ၣ်​ စီၤယၤကိာ် သံကွၢ် အဝဲသ့ၣ်လၢ “မ့ၢ်အဝဲ အိၣ်ဆူၣ်အိၣ်ချ့စ့ၢ်ကီးဧါ.” အဝဲသ့ၣ်​ စံးဆၢက့ၤဝဲလၢ “အအိၣ်ဆူၣ်အိၣ်ချ့လီၤ. လၢန့ၣ်, အဖိမုၣ်​ နီၢ်ရၤဃ့လး+ ဟဲလီၤဒီး အသိတဖၣ်လီၤ.” ၇ ဒီးစီၤယၤကိာ် တဲဝဲလၢ “မုၢ်ဆါခီဒံးလီၤ, တၢ်ဆၢကတီၢ်တဘၣ်လၢ ပှၤကကိးဖှိၣ်​ သိအဖုတဖၣ်​ ဒံးဘၣ်. ဒုးအီသိအထံ ဝံၤဒီး လဲၤဒုးအီၣ်​ အဆၣ်သၢၤ.” ၈ ဒီးအဝဲသ့ၣ်​ တဲဆၢဝဲလၢ “တချုးလၢ ပှၤဒုးအိၣ်ဖှိၣ်​ သိကိးဖုဒဲးဒံးဘၣ်​ ဒီးတချုးလၢ အဝဲသ့ၣ်​ တလ့ၣ်ကွံာ်လၢၢ်လၢ ထံကမျၢ အခိၣ်ထိး ဒံးဘၣ်န့ၣ်​ ပမၤဒ်န့ၣ်​ တသ့ဒံးဘၣ်. တၢ်မၤအသးဒ်န့ၣ်​ မ့ၢ်ဝံၤမး ပဒုးအီ သိအထံသ့လီၤ.”

၉ ဖဲစီၤယၤကိာ် တဲတၢ် ဒီးအဝဲသ့ၣ်အခါ နီၢ်ရၤဃ့လး ဟဲဒီးအပၢ်အသိတဖၣ်​ မ့ၢ်လၢအဝဲမ့ၢ် ပှၤကွၢ်သိဖိ အဃိလီၤ. ၁၀ ဖဲစီၤယၤကိာ် ထံၣ်ဝဲ အမိၢ်အဒီပုၢ်ဝဲၢ်ခွါ စီၤလၤဘၣ်အဖိမုၣ်​ နီၢ်ရၤဃ့လး ဒီးစီၤလၤဘၣ်​ အသိသ့ၣ်တဖၣ်အခါ စီၤယၤကိာ်န့ၣ်​ လဲၤဝဲတဘျီဃီ ဒီးသုးကွံာ်ဝဲ လၢၢ်လၢ ထံကမျၢ အခိၣ်ထိး ဒီးဒုးအီဝဲ အဖါတံၢ် စီၤလၤဘၣ်​ အသိတဖၣ်​ အထံလီၤ. ၁၁ ဝံၤဒီး စီၤယၤကိာ် နၢမူ နီၢ်ရၤဃ့လး ဒီးဟီၣ်ဝဲလၢ အကလုၢ်ဖးဒိၣ်​ ဒီးအမဲာ်ထံ လီၤဝဲလီၤ. ၁၂ ဒီးစီၤယၤကိာ်န့ၣ်​ တဲဘၣ်ဝဲ နီၢ်ရၤဃ့လး လၢအဝဲမ့ၢ်ဝဲ အပၢ်အဘူးအတံၢ် ဒီးနီၢ်ရံးဘကၤ အဖိခွါလီၤ. ဒီးနီၢ်ရၤဃ့လးန့ၣ်​ က့ၤဃ့ၢ်တဲဘၣ်​ အပၢ်လီၤ.

၁၃ ဖဲစီၤလၤဘၣ်+ နၢ်ဟူဝဲ အဒ့မုၣ်အဖိခွါ စီၤယၤကိာ် အဂ့ၢ်အခါ အဝဲလဲၤဃ့ၢ်သဂၢၢ်အီၤ တဘျီဃီလီၤ. ဒီးအဖိးဟုဝဲ စီၤယၤကိာ် ဒီးနၢမူအီၤ ဒီးဟဲက့ၤကိးအီၤ ဆူအဟံၣ်လီၤ. ဒီးစီၤယၤကိာ်န့ၣ်​ တဲဘၣ်စီၤလၤဘၣ်လၢ ကယဲၢ်တၢ်လၢ အကဲထီၣ်အသး ဒီးအီၤတဖၣ်လီၤ. ၁၄ ဒီးစီၤလၤဘၣ်​ တဲအီၤလၢ “နမ့ၢ် ယဘူးယတံၢ်လီၤ.”* အဃိ စီၤယၤကိာ် အိၣ်ဒီးအီၤ တလါပှဲၤပှဲၤလီၤ.

၁၅ စီၤလၤဘၣ်​ တဲစီၤယၤကိာ်လၢ “နမ့ၢ်ယဘူးယတံၢ်+ သနာ်က့ အခီပညီ တမ့ၢ်လၢ နကြၢးမၤတၢ် လၢယဂီၢ် ကလီကလီဘၣ်. ယဘၣ်ဟ့ၣ်နၤ တၢ်အဘူးအလဲ ထဲလဲၣ်န့ၣ်​ တဲယၤမီၤ.”+ ၁၆ စီၤလၤဘၣ်န့ၣ်​ အဖိမုၣ်အိၣ်​ ခံဂၤလီၤ. အဒိၣ်တဂၤန့ၣ်​ အမံၤမ့ၢ်ဝဲ နီၢ်လ့ၤအၤ ဒီးအဆံးတဂၤန့ၣ်​ အမံၤမ့ၢ်ဝဲ နီၢ်ရၤဃ့လးလီၤ.+ ၁၇ ဘၣ်ဆၣ်​ နီၢ်လ့ၤအၤန့ၣ်​ အမဲာ်ချံ တဃံလၤဘၣ်. မ့မ့ၢ် နီၢ်ရၤဃ့လးန့ၣ်​ လီၤထုးန့ၢ်သူၣ်​ ထုးန့ၢ်သးဒိၣ်မး ဒီးမ့ၢ်ပိာ်မုၣ်လၢ အဒိၣ်တၢ်ဂ့ၤလီၤ. ၁၈ ဒီးစီၤယၤကိာ်န့ၣ်​ အဲၣ်ဘၣ်ဝဲ နီၢ်ရၤဃ့လးအဃိ အတဲဝဲလၢ “ဒ်သိးယကန့ၢ်ဘၣ်​ နဖိမုၣ်ဆံး နီၢ်ရၤဃ့လးအဂီၢ် ယကမၤနတၢ် နွံနံၣ်လီၤ.”+ ၁၉ ဒီးစီၤလၤဘၣ်​ တဲဆၢအီၤလၢ “ယမ့ၢ်ဘၣ်ဟ့ၣ်လီၤအီၤ လၢနအိၣ်န့ၣ်​ ဂ့ၤဒိၣ်န့ၢ်ဒံး ယကဘၣ်​ ဟ့ၣ်လီၤအီၤလၢ ပှၤပိာ်ခွါအဂၤအအိၣ်ဒံး. အဃိ ဆဲးအိၣ်ဒီးယၤတက့ၢ်.” ၂၀ ဒီးဒ်သိး စီၤယၤကိာ် ကန့ၢ်ဘၣ်​ နီၢ်ရၤဃ့လးအဂီၢ် အဝဲဘၣ်မၤတၢ်နွံနံၣ်+ ဘၣ်ဆၣ်​ မ့ၢ်လၢအအဲၣ်ဝဲ နီၢ်ရၤဃ့လးအဃိ လၢအတၢ်ထံၣ်န့ၣ်​ လီၤဂာ်ဒ် စှၤကိာ်သီအသိးလီၤ.

၂၁ ဒီးစီၤယၤကိာ် တဲစီၤလၤဘၣ်လၢ “တၢ်ဆၢကတီၢ်ဘၣ်လံ အဃိ ဟ့ၣ်ယၤယမါ ဒီးပျဲယမံဃုာ်အိၣ်ဃုာ် ဒီးအီၤတက့ၢ်.” ၂၂ အဃိ စီၤလၤဘၣ်​ မၤဝဲတၢ်ဖျီအမူး ဒီးကိးဖှိၣ်ဝဲ ပှၤလၢအခိၣ်အဃၢၤ ခဲလၢာ်လီၤ. ၂၃ ဘၣ်ဆၣ်​ ဖဲဟါလီၤခီန့ၣ်​ အဝဲလဲၤကိး နီၢ်လ့ၤအၤလၢ စီၤယၤကိာ်အအိၣ်​ ဒ်သိး စီၤယၤကိာ် ကမံဃုာ်အိၣ်ဃုာ်ဒီးအီၤ အဂီၢ်လီၤ. ၂၄ ဒီးစီၤလၤဘၣ်​ ဟ့ၣ်လီၤ အကုၢ်မုၣ်​ နီၢ်စံၤလပၤ ဆူအဖိမုၣ်​ နီၢ်လ့ၤအၤအအိၣ်​ ဒ်သိး အဝဲကကဲထီၣ်​ အကုၢ်မုၣ်အဂီၢ်လီၤ.+ ၂၅ လၢဂီၤခီန့ၣ်​ စီၤယၤကိာ် ထံၣ်ဝဲလၢ အမ့ၢ်နီၢ်လ့ၤအၤလီၤ. အဃိ အဝဲတဲ စီၤလၤဘၣ်လၢ “နမၤယၤ ဒ်လဲၣ်. ယမၤတၢ် လၢနဂီၢ် လၢယကန့ၢ်ဘၣ်​ နီၢ်ရၤဃ့လးအဂီၢ် တမ့ၢ်ဧီၤ. ဘၣ်မနုၤအဃိ နလံၣ်အီၣ်ယၤလဲၣ်.”+ ၂၆ ဒီးစီၤလၤဘၣ်​ တဲဆၢက့ၤဝဲလၢ “ဖဲအံၤန့ၣ်​ ပလုၢ်လၢ်တအိၣ်လၢ ပကဖျီဆိ ပဖိမုၣ်အဆံးတဂၤ လၢပဖိမုၣ်လၢ အဝဲၢ်ကိတဂၤ အမဲာ်ညါဘၣ်. ၂၇ မၤတၢ်သူၣ်ဖှံသးညီတနွံ လၢတၢ်ဖျီအမူးအဂီၢ်ဒီး ယဖိမုၣ်ဒိၣ်တဂၤအံၤမီၤ. မ့ၢ်ဝံၤန့ၣ်​ တၢ်ကဟ့ၣ်လီၤစ့ၢ်ကီးနၤလၢ အဒ့မုၣ်လီၤ. ဘၣ်ဆၣ်​ နကဘၣ်မၤတၢ် လၢယဂီၢ် ဆူညါနွံနံၣ်လီၤ.”+ ၂၈ ဒီးစီၤယၤကိာ် မၤတၢ်သူၣ်ဖှံသးညီ လၢတၢ်ဖျီအမူးအဂီၢ်ဒီး ပိာ်မုၣ်အံၤတနွံ ဝံၤဒီးစီၤလၤဘၣ်​ ဟ့ၣ်လီၤအီၤ နီၢ်ရၤဃ့လး ဒ်အမါအသိးလီၤ. ၂၉ ဒီးစီၤလၤဘၣ်​ ဟ့ၣ်လီၤ အကုၢ်မုၣ်​ နီၢ်ဘံၤလဟၤ+ ဆူအဖိမုၣ်​ နီၢ်ရၤဃ့လးအအိၣ်​ ဒ်သိး အဝဲကကဲထီၣ်​ အကုၢ်မုၣ်အဂီၢ်လီၤ.+

၃၀ ဒီးစီၤယၤကိာ်န့ၣ်​ မံဃုာ်အိၣ်ဃုာ်ဒီး နီၢ်ရၤဃ့လးလီၤ. ဒီးအအဲၣ်ဝဲ နီၢ်ရၤဃ့လး ဒိၣ်န့ၢ်ဒံး နီၢ်လ့ၤအၤလီၤ. ဒီးအဝဲဆဲးမၤ စီၤလၤဘၣ်​ အတၢ်မၤ နွံနံၣ်လီၤ.+ ၃၁ ဖဲယဟိဝၤယွၤ ထံၣ်ဝဲလၢ စီၤယၤကိာ် အဲၣ်ဝဲနီၢ်လ့ၤအၤ စှၤန့ၢ်ဒံး* နီၢ်ရၤဃ့လးအခါ အဝဲပျဲဝဲဒ်သိး နီၢ်လ့ၤအၤ ကဒၢထီၣ်အဂီၢ်လီၤ.+ မ့မ့ၢ် နီၢ်ရၤဃ့လးန့ၣ်​ မ့ၢ်ပှၤတူာ်ဖိလီၤ.+ ၃၂ အဃိ နီၢ်လ့ၤအၤ ဒၢထီၣ်ဝဲ ဒီးအိၣ်ဖျဲၣ်ထီၣ်​ အဖိခွါလီၤ. ဒီးအတဲဝဲလၢ “ယဟိဝၤယွၤ ထံၣ်ပာ်စၢၤ ယတၢ်နးတၢ်ဖှီၣ်တဖၣ်+ ဒီးခဲအံၤ ယဝၤကအဲၣ်ယၤလီၤ.” လၢတၢ်န့ၣ်အဃိ အဝဲကိးန့ၢ်ဝဲ အဖိခွါအမံၤလၢ စီၤရူၤဘ့ၣ်လီၤ.+ ၃၃ ဒီးအဝဲ ဒၢထီၣ်ကဒီးဝဲ ဒီးအိၣ်ဖျဲၣ်ထီၣ်​ အဖိခွါ ဒီးတဲဝဲလၢ “ယဟိဝၤယွၤ ဒိကနၣ်​ ယတၢ်ကဒူးကဒ့ၣ်​ လၢယဝၤ အဲၣ်ယၤစှၤအဃိ ဟ့ၣ်လီၤယၤလၢ အဝဲတဂၤအံၤ စ့ၢ်ကီးလီၤ.” ဒီးအဝဲ ကိးန့ၢ်အမံၤလၢ စီၤစူၤမ့းအိၣ်လီၤ.+ ၃၄ ဒီးအဝဲ ဒၢထီၣ်ကဒီး ဒီးအိၣ်ဖျဲၣ်ထီၣ်​ အဖိခွါ ဒီးတဲဝဲလၢ “တဘျီညါအံၤ ယဝၤ ကဘူးထီၣ်ဒီးယၤ မ့ၢ်လၢ ယအိၣ်ဖျဲၣ်ထီၣ်န့ၢ်အီၤ အဖိခွါ သၢဂၤလံ.” လၢတၢ်န့ၣ်အဃိ အဝဲကိးန့ၢ်အမံၤလၢ စီၤလ့ၤဝံလီၤ.+ ၃၅ ဒီးအဝဲ ဒၢထီၣ်ကဒီး ဒီးအိၣ်ဖျဲၣ်ထီၣ်အဖိခွါ ဒီးတဲဝဲလၢ “တဘျီအံၤ ယကစံးထီၣ်ပတြၢၤ ယဟိဝၤယွၤလီၤ.” အဃိ အဝဲကိးန့ၢ်ဝဲ အမံၤလၢ စီၤယူဒၤလီၤ.+ တၢ်န့ၣ်ဝံၤအလီၢ်ခံ အဝဲတအိၣ်ဖျဲၣ်ထီၣ်​ အဖိလၢၤဘၣ်​ တတီၤဖိလီၤ.

၃၀ ဖဲနီၢ်ရၤဃ့လး သ့ၣ်ညါဝဲလၢ အအိၣ်ဖျဲၣ်ထီၣ်န့ၢ် စီၤယၤကိာ်အဖိ တန့ၢ်ဘၣ်အခါ အသးက့ၣ်ဝဲ အနီဒီး တဲစီၤယၤကိာ်လၢ “ဟ့ၣ်ယၤဖိတဖၣ်သၢၤ, မ့တမ့ၢ်ဘၣ်န့ၣ်​ ယကသံလီၤ.” ၂ ဖဲန့ၣ်​ စီၤယၤကိာ် သးပှံၢ်ထီၣ်ဝဲ နီၢ်ရၤဃ့လး ဒီးတဲအီၤလၢ “မ့ၢ်ယအိၣ်လၢ ကစၢ်ယွၤအလီၢ်ဧါ. အဝဲမ့ၢ် ပှၤလၢအတြီနၤ ဒ်သိး နဖိသုတအိၣ်တဂ့ၤ အဂီၢ်လီၤ.” ၃ ဒီးနီၢ်ရၤဃ့လး တဲဝဲလၢ “မ့မ့ၢ်ဒ်န့ၣ်​ ဟံးန့ၢ် ယကုၢ်မုၣ်​ နီၢ်ဘံၤလဟၤ+ ဒီးမံဃုာ်ဒီးအီၤ ဒ်သိး အကအိၣ်ဖျဲၣ်ထီၣ်န့ၢ် အဖိလၢ ယဂီၢ်တက့ၢ်. ခီဖျိလၢ အီၤအဃိ ယၤစ့ၢ်ကီး ယကအိၣ်ဒီး ဖိတဖၣ်လီၤ.” ၄ ဝံၤဒီး အဝဲဟ့ၣ်လီၤ စီၤယၤကိာ်လၢ အကုၢ်မုၣ်​ နီၢ်ဘံၤလဟၤ ဒ်အမါအသိး ဒီးစီၤယၤကိာ် မံဃုာ်ဒီးအီၤလီၤ.+ ၅ နီၢ်ဘံၤလဟၤ ဒၢထီၣ်ဝဲ ဒီးလၢခံ အိၣ်ဖျဲၣ်ထီၣ်န့ၢ် စီၤယၤကိာ် အဖိခွါတဂၤလီၤ. ၆ ဒီးနီၢ်ရၤဃ့လး တဲဝဲလၢ “ကစၢ်ယွၤ ကဲယပှၤစံၣ်ညီၣ်ကွီၢ် ဒီးအဒိကနၣ်စ့ၢ်ကီး ယကလုၢ်အဃိ အဟ့ၣ်လီၤယၤ ဖိခွါတဂၤလီၤ.” လၢတၢ်န့ၣ်အဃိ အဝဲကိးန့ၢ် အမံၤလၢ စီၤဒၣ်လီၤ.+ ၇ နီၢ်ရၤဃ့လး အကုၢ်မုၣ်​ နီၢ်ဘံၤလဟၤ ဒၢထီၣ်ကဒီးတဘျီ ဒီးလၢခံ အိၣ်ဖျဲၣ်ထီၣ်န့ၢ် စီၤယၤကိာ် အဖိခွါ ခံဂၤတဂၤလီၤ. ၈ ဒီးနီၢ်ရၤဃ့လး တဲဝဲလၢ “ယဘၣ်ကနိဒီး ယနီသပှၢ်ကတၢၢ် ဒီးယမၤနၢၤတၢ်လီၤ.” အဃိ အဝဲ ကိးန့ၢ်အဖိခွါတဂၤအံၤ အမံၤလၢ စီၤနးသၤလံလီၤ.+

၉ ဖဲနီၢ်လ့ၤအၤ သ့ၣ်ညါဝဲလၢ အအိၣ်ဖျဲၣ်ထီၣ်အဖိ တန့ၢ်လၢၤဘၣ်အခါ အဝဲကိးန့ၢ် အကုၢ်မုၣ်​ နီၢ်စံၤလပၤ ဒီးဟ့ၣ်လီၤဝဲ စီၤယၤကိာ် ဒ်အမါအသိးလီၤ.+ ၁၀ ဒီးနီၢ်လ့ၤအၤ အကုၢ်မုၣ်​ နီၢ်စံၤလပၤန့ၣ်​ အိၣ်ဖျဲၣ်ထီၣ်န့ၢ် စီၤယၤကိာ် အဖိခွါတဂၤလီၤ. ၁၁ ဒီးနီၢ်လ့ၤအၤ တဲဝဲလၢ “ယဘူၣ်ယတီၢ်ဂ့ၤလီၤ.” အဃိ အဝဲကိးန့ၢ် အမံၤလၢ စီၤကးလီၤ.+ ၁၂ ဒီးနီၢ်လ့ၤအၤ အကုၢ်မုၣ်​ နီၢ်စံၤလပၤ ဒၢထီၣ်ကဒီးတဘျီ ဒီးလၢခံ အိၣ်ဖျဲၣ်ထီၣ်န့ၢ် စီၤယၤကိာ် အဖိခွါ ခံဂၤတဂၤလီၤ. ၁၃ ဒီးနီၢ်လ့ၤအၤ တဲဝဲလၢ “ယသးခုညါ. ဒီးပိာ်မုၣ်တဖၣ်​ ကတဲဝဲလၢ ယမ့ၢ်ပှၤလၢ အသးခုလီၤ.”+ အဃိ အဝဲကိးန့ၢ် အမံၤလၢ စီၤအၤၡ့ၢ်လီၤ.+

၁၄ ဒီးလၢ တၢ်ကူးဘုကၠူၣ်​ အဆၢကတီၢ်န့ၣ်​ စီၤရူၤဘ့ၣ်+ ဟးလၢ တၢ်ပျီပူၤ ဒီးထံၣ်န့ၢ်ဝဲ ဒူးဒးသၣ်တဖၣ်​ ဒီးဟဲက့ၤစိာ်ဝဲဆူ အမိၢ်နီၢ်လ့ၤအၤ အအိၣ်လီၤ. ဒီးနီၢ်ရၤဃ့လး တဲဘၣ်​ နီၢ်လ့ၤအၤလၢ “ဝံသးစူၤဟ့ၣ်ယၤ နဖိခွါ အဒူးဒးသၣ်​ တနီၤမီၤ.” ၁၅ ဒီးနီၢ်လ့ၤအၤ တဲဆၢအီၤလၢ “နဟံးန့ၢ်ယဝၤန့ၣ်​ အတလၢပှဲၤ လၢနဂီၢ်ဒံးဧီၤ.+ ခဲအံၤ နကဟံးန့ၢ်ယဖိခွါ အဒူးဒးသၣ်ဒံးဧါ.” ဒီးနီၢ်ရၤဃ့လး တဲဝဲလၢ “မ့မ့ၢ်ဒ်န့ၣ်န့ၣ်​ နမ့ၢ်ဟ့ၣ်ယၤ နဖိခွါ အဒူးဒးသၣ်တဖၣ်န့ၣ်​ တနၤအံၤ စီၤယၤကိာ် ကမံဒီးနၤလီၤ.”

၁၆ ဖဲဟါလီၤခီ အဆၢကတီၢ် စီၤယၤကိာ် ဟဲက့ၤလၢ တၢ်ပျီပူၤလီၤ. ဒီးနီၢ်လ့ၤအၤ လဲၤသဂၢၢ်အီၤ ဒီးတဲအီၤလၢ “မ့ၢ်လၢ ယဟ့ၣ်လီၤ နီၢ်ရၤဃ့လး လၢယဖိခွါ အဒူးဒးသၣ်​ ဒ်တၢ်အပှ့ၤလၢ ယကငါနၤအဂီၢ်အသိးအဃိ တနၤအံၤ နကဘၣ်မံဃုာ်ဒီးယၤလီၤ.” အဃိ တၢ်တနၤန့ၣ်​ စီၤယၤကိာ် မံဒီးအီၤလီၤ. ၁၇ ဒီးကစၢ်ယွၤ ဒိကနၣ်​ ဒီးစံးဆၢဝဲ နီၢ်လ့ၤအၤ အတၢ်ထုကဖၣ်လီၤ. အဃိ အဝဲဒၢထီၣ်​ ဒီးလၢခံ အအိၣ်ဖျဲၣ်ထီၣ်န့ၢ် စီၤယၤကိာ် အဖိခွါ ယဲၢ်ဂၤတဂၤလီၤ. ၁၈ ဒီးနီၢ်လ့ၤအၤ တဲဝဲလၢ “ယဟ့ၣ်ယကုၢ်ပိာ်မုၣ်လၢ ယဝၤအအိၣ်အဃိ ယွၤဟ့ၣ်လီၤယၤလၢ တၢ်အဘူးအလဲလံ.” အဃိ နီၢ်လ့ၤအၤ ကိးန့ၢ်ဝဲ အဖိခွါတဂၤအံၤအမံၤလၢ စီၤယံးစၣ်ကၢ်လီၤ.+ ၁၉ ဒီးနီၢ်လ့ၤအၤ ဒၢထီၣ်ကဒီးတဘျီ ဒီးလၢခံ အိၣ်ဖျဲၣ်ထီၣ်န့ၢ် စီၤယၤကိာ် အဖိခွါ ဃုဂၤတဂၤလီၤ.+ ၂၀ ဒီးနီၢ်လ့ၤအၤ တဲဝဲလၢ “ကစၢ်ယွၤ ဟ့ၣ်ယၤ တၢ်ဟ့ၣ်လၢ အဂ့ၤလံ. တဘျီအံၤ ယဝၤ ဝံသးစူၤယၤကကဲ+ မ့ၢ်လၢ ယအိၣ်ဖျဲၣ်ထီၣ်န့ၢ်အီၤ အဖိခွါ ဃုဂၤလံအဃိလီၤ.”+ အဃိ အဝဲကိးန့ၢ်ဝဲ အမံၤလၢ စီၤစဘူလိၣ်လီၤ.+ ၂၁ လၢခံ အဝဲအိၣ်ဖျဲၣ်ထီၣ်​ အဖိမုၣ်တဂၤ ဒီးကိးန့ၢ်ဝဲအမံၤလၢ နီၢ်ဒံနၤလီၤ.+

၂၂ လၢခံန့ၣ်​ ကစၢ်ယွၤ သ့ၣ်နီၣ်ထီၣ်က့ၤ နီၢ်ရၤဃ့လး ဒီးကစၢ်ယွၤ ဒိကနၣ်​ ဒီးစံးဆၢ အတၢ်ထုကဖၣ်​ ဒီးမၤစၢၤအီၤဒ်သိး အဒၢထီၣ်​ ကန့ၢ်အဂီၢ်လီၤ.+ ၂၃ ဒီးအဝဲဒၢထီၣ်​ ဒီးအိၣ်ဖျဲၣ်ထီၣ်​ အဖိခွါတဂၤ ဒီးတဲဝဲလၢ “ကစၢ်ယွၤ မၤလီၤမၢ်ကွံာ် တၢ်လၢ အမၤမဲာ်ဆှးယၤလံ.”+ ၂၄ အဃိ အဝဲကိးန့ၢ်ဝဲ အမံၤလၢ စီၤယိၤသး+ ဒီးတဲဝဲလၢ “ယဟိဝၤယွၤ ဟ့ၣ်အါထီၣ်ယၤ ဖိခွါအဂၤတဂၤလံ.”

၂၅ ဖဲနီၢ်ရၤဃ့လး အိၣ်ဖျဲၣ်ထီၣ်​ စီၤယိၤသး ဝံၤအလီၢ်ခံ စီၤယၤကိာ် တဲဘၣ်​ စီၤလၤဘၣ်​ တဘျီဃီလၢ “ပျဲက့ၤယၤဒ်သိး ယကက့ၤလၢ ယတၢ်လီၢ် ဒီးယထံယကီၢ် န့ၣ်တက့ၢ်.+ ၂၆ ဒ်သိး ယကန့ၢ်ဘၣ်​ ယဖိယမါတဖၣ်အဂီၢ် ယဘၣ်မၤနတၢ်မၤ ဆူၣ်ဆူၣ်ဒီး ယမၤန့ၢ်တၢ်လၢနဂီၢ် ထဲလဲၣ်န့ၣ်​ နသ့ၣ်ညါလီၤ. အဃိ ဒ်သိးယကက့ၤအဂီၢ် ဟ့ၣ်လီၤယၤ လၢအဝဲသ့ၣ်သၢၤ.”+ ၂၇ ဒီးစီၤလၤဘၣ်​ တဲအီၤလၢ “ယဃ့ကညးနၤ, ဝံသးစူၤ အိၣ်ဒီးယၤဖဲအံၤမီၤ. ခီဖျိလၢ ယကၢ်တၢ်ဒွးတၢ် အဃိ ယနၢ်ပၢၢ်လၢ ယဟိဝၤယွၤ ဆိၣ်ဂ့ၤယၤန့ၣ်​ မ့ၢ်ဝဲလၢနဃိလီၤ.” ၂၈ ဒီးအဝဲဆဲးတဲဝဲလၢ “နကဃ့ တၢ်အဘူးအလဲ ထဲလဲၣ်န့ၣ်​ တဲယၤ ဒီးယကဟ့ၣ်နၤလီၤ.”+ ၂၉ အဃိ စီၤယၤကိာ် တဲအီၤလၢ “ယမၤတ့ၢ်တၢ်လၢနဂီၢ် ထဲထဲလဲၣ်​ ဒီးယကွၢ်ထွဲ နသိဒီးနမဲာ်တဲးလဲး ဂ့ၤထဲလဲၣ်န့ၣ်​ နသ့ၣ်ညါလီၤ.+ ၃၀ တချုးလၢ ယဟဲဒံးဘၣ်န့ၣ်​ နတၢ်အိၣ်ထဲ တစဲးဖိလီၤ. ဘၣ်ဆၣ်​ စးထီၣ်ဖဲယဟဲတုၤန့ၣ်​ ယဟိဝၤယွၤ ဆိၣ်ဂ့ၤနၤ ဒီးနသိဒီးနမဲာ်တဲးလဲးတဖၣ်​ အါထီၣ်ဂီၢ်ထီၣ်ဝဲလီၤ. ယကမၤဘၣ်​ တၢ်တမံၤမံၤလၢ ယနီၢ်ကစၢ်ဟံၣ်ဖိဃီဖိအဂီၢ် ဆံးယံာ်လဲၣ်.”+

၃၁ ဒီးစီၤလၤဘၣ်​ တဲဝဲလၢ “ယကဘၣ်ဟ့ၣ်နၤ တၢ်မနုၤလဲၣ်.” စီၤယၤကိာ် တဲဝဲလၢ “နတလိၣ်ဟ့ၣ်ယၤ တၢ်နီတမံၤဘၣ်. ဘၣ်ဆၣ်​ နမ့ၢ်မၤန့ၢ်ယၤ တၢ်တမံၤန့ၣ်​ ယကကွၢ်ကဒါက့ၤ နသိဒီးနမဲာ်တဲးလဲး ဒီးဒီသဒၢအီၤလီၤ.+ ၃၂ တနံၤအံၤ ယကလဲၤလၢ နသိဒီးနမဲာ်တဲးလဲး ဒီတဖု အကျါလီၤ. ဒီးကယဲၢ်သိလၢ အကံၣ်စံၣ်ပိၣ်​ မ့တမ့ၢ် အကံၣ်ဃ့ ဒီးကယဲၢ်သိလၢ အဃးလၢ သိဖါတဖၣ်အကျါ ဒီးကယဲၢ်မဲာ်တဲးလဲးလၢ အကံၣ်ဃ့ မ့တမ့ၢ် အကံၣ်စံၣ်ပိၣ်လၢ မဲာ်တဲးလဲးမိၢ်တဖၣ်အကျါန့ၣ်​ နကဘၣ်ပာ်အီၤလၢ တၢ်ကပၤလီၤ. စးထီၣ်ခဲအံၤန့ၣ်​ တၢ်သ့ၣ်တဖၣ်အံၤ ကကဲထီၣ်​ ယဘူးယလဲလီၤ.+ ၃၃ ဒီးမုၢ်ကအိၣ်ဝဲတနံၤလၢ နကဟဲကွၢ် ယဘူးယလဲတဖၣ်​ ဒီးနကထံၣ်လၢ ယမၤတၢ် တီတီလိၤလိၤလီၤ. ဒီးနမ့ၢ်ထံၣ်လၢ ယအိၣ်ဒီး မဲာ်တဲးလဲးမိၢ် လၢအတကံၣ်ဃ့ဘၣ်မ့ၢ်ဂ့ၤ, အတကံၣ်စံၣ်ပိၣ်ဘၣ်မ့ၢ်ဂ့ၤ, သိဖါလၢ အတဃးဘၣ်မ့ၢ်ဂ့ၤန့ၣ်​ နပာ်အီၤဒ် ဆၣ်ဖိကီၢ်ဖိလၢ ယဟုၣ်အီၤအသိးသ့လီၤ.”

၃၄ ဒီးစီၤလၤဘၣ်​ တဲဝဲလၢ “ဂ့ၤလံ, ပကမၤ ဒ်နတဲအသိးလီၤ.”+ ၃၅ ဖဲတၢ်တနံၤန့ၣ်​ စီၤလၤဘၣ်​ ဟံးန့ၢ်ဝဲ ကယဲၢ်မဲာ်တဲးလဲးဖါ လၢအကွ့လ့ ဒီးအကံၣ်ဃ့ ဒီးကယဲၢ် မဲာ်တဲးလဲးမိၢ်လၢ အကံၣ်စံၣ်ပိၣ်​ ဒီးအကံၣ်ဃ့ ဒီးကယဲၢ်မဲာ်တဲးလဲးလၢ အဝါ အိၣ်တစဲးတစဲး ဒီးသိလၢအဃးသ့ၣ်တဖၣ်န့ၣ်​ ဟ့ၣ်လီၤဝဲလၢ အဖိခွါသ့ၣ်တဖၣ်​ ဒ်သိး ကကွၢ်ထွဲဝဲ အဂီၢ်လီၤ. ၃၆ ဝံၤဒီး စီၤလၤဘၣ်န့ၣ်​ ထုးယံၤထီၣ်အသးဒီး စီၤယၤကိာ် တၢ်ဒ့ၣ်စၢၤ ကအိၣ်ဝဲ သၢသီကျဲလီၤ. ဒီးစီၤယၤကိာ်န့ၣ်​ ကွၢ်ဝဲစီၤလၤဘၣ်အသိ လၢအအိၣ်တ့ၢ်တဖၣ်လီၤ.

၃၇ စီၤယၤကိာ် ဟံးန့ၢ်ဝဲ သ့ၣ်လံးဘန့ၤ, သ့ၣ်ၡၤကး ဒီးသ့ၣ်ဧၢ်မိၢ် အဒ့သံသိတဖၣ်​ ဒီးအဝဲသွဲၣ်လီၤဝဲ သ့ၣ်ဒ့တဖၣ်အံၤအဘ့ၣ်​ ဒ်သိး သ့ၣ်အညၣ်လၢ အဝါတဖၣ်​ ကဖျါထီၣ်ဝဲ တကဝီၤဘၣ်​ တကဝီၤ အဂီၢ်လီၤ. ၃၈ ဒီးသ့ၣ်ဒ့တဖၣ်​ လၢအသွဲၣ်လီၤဝဲလၢ သိဒီး မဲာ်တဲးလဲးတဖၣ်​ အမဲာ်ညါန့ၣ်​ အဝဲပာ်လီၤဝဲလၢ ထံအကျိးတဖၣ်အပူၤ ဖဲသိဒီး မဲာ်တဲးလဲးတဖၣ်​ ဟဲအီထံ အလီၢ်န့ၣ်လီၤ. အဝဲ မၤဝဲဒ်န့ၣ်န့ၣ်​ မ့ၢ်ဒ်သိး ဖဲသိဒီး မဲာ်တဲးလဲးတဖၣ်​ ဟဲအီထံအခါ ကဘၣ်စီ လၢသ့ၣ်ဒ့တဖၣ်အံၤ အမဲာ်ညါလီၤ.

၃၉ အဃိ သိဒီး မဲာ်တဲးလဲးသ့ၣ်တဖၣ်အံၤ ဘၣ်စီလၢ သ့ၣ်ဒ့တဖၣ်အံၤ အမဲာ်ညါ ဒီးအဝဲသ့ၣ်​ ဖှံလီၤ အဖိသ့ၣ်တဖၣ်လၢ အကွ့လ့, အကံၣ်စံၣ်ပိၣ်​ ဒီးအကံၣ်ဃ့လီၤ. ၄၀ ဒီးစီၤယၤကိာ် ပာ်လီၤဆီဝဲ သိဖါတဖၣ်လီၤ. ဒီးအဝဲဒုးကွၢ်ဃီၤဝဲ စီၤလၤဘၣ်​ အသိဒီးအမဲာ်တဲးလဲး ဒီတဖုန့ၣ်ဆူ သိဒီးမဲာ်တဲးလဲး သ့ၣ်တဖၣ်လၢ အကွ့လ့ ဒီးအဃးသ့ၣ်တဖၣ်​ အအိၣ်န့ၣ်လီၤ. လၢခံ အဝဲနီၤဖးဝဲ အနီၢ်ကစၢ်အသိဒီး မဲာ်တဲးလဲး ဒီးပာ်လီၤဆီဝဲဒီး စီၤလၤဘၣ်​ အသိဒီး အမဲာ်တဲးလဲးတဖၣ်လီၤ. ၄၁ ဒီးဖဲဆၣ်ဖိကီၢ်ဖိလၢ အဂံၢ်ဆူၣ်အဘါဆူၣ်တဖၣ်​ လူၤမိၢ်လူၤဖါ အဆၢကတီၢ်ဘၣ်အခါ စီၤယၤကိာ် ပာ်လီၤဝဲ သ့ၣ်ဒ့တဖၣ်လၢ ထံယွၤလီၤ အကျိၤတဖၣ်အပူၤ လၢဆၣ်ဖိကီၢ်ဖိတဖၣ်​ အမဲာ်ညါ ဒ်သိးအကဘၣ်စီလၢ သ့ၣ်ဒ့တဖၣ်အံၤ အကပိာ်ကပၤလီၤ. ၄၂ ဘၣ်ဆၣ်​ ဖဲဆၣ်ဖိကီၢ်ဖိ လၢအဂံၢ်စၢ်ဘါစၢ်တဖၣ်​ လူၤမိၢ်လူၤဖါ အဆၢကတီၢ် အဝဲတပာ်လီၤဝဲ သ့ၣ်ဒ့တဖၣ်​ ဖဲန့ၣ်ဘၣ်. အဃိ ထီဘိန့ၣ်​ ဆၣ်ဖိကီၢ်ဖိလၢ အဂံၢ်စၢ်ဘါစၢ်တဖၣ်န့ၣ်​ ကဲထီၣ်​ စီၤလၤဘၣ်အတၢ် ဒီးမ့မ့ၢ် ဆၣ်ဖိကီၢ်ဖိလၢ အဂံၢ်ဆူၣ်ဘါဆူၣ်တဖၣ်န့ၣ်​ ကဲထီၣ်​ စီၤယၤကိာ်အတၢ်လီၤ.+

၄၃ ဒီးစီၤယၤကိာ်န့ၣ်​ ထူးထီၣ်တီၤထီၣ်ဒိၣ်မး ဒီးအဝဲဒိးန့ၢ်ဘၣ်​ သိဒီးမဲာ်တဲးလဲး အါအါဂီၢ်ဂီၢ်, အကုၢ်ပိာ်မုၣ်​ ဒီးအကုၢ်ပိာ်ခွါတဖၣ်, ကီၤလၤအူး ဒီးကသ့ၣ်ယီၤတဖၣ်လီၤ.+

၃၁ လၢခံ စီၤယၤကိာ် နၢ်ဟူဝဲလၢ စီၤလၤဘၣ်​ အဖိခွါတဖၣ်​ တဲဝဲလၢ “တၢ်လၢအအိၣ်ဒီးပပၢ်န့ၣ်​ စီၤယၤကိာ် ဟံးန့ၢ်ဝဲ ခဲလၢာ်လံ. ဒီးတၢ်ထူးတၢ်တီၤလၢ အဝဲပာ်ဖှိၣ်ဝဲခဲလၢာ်န့ၣ်​ ဟဲအိၣ်ထီၣ်​ ခီဖျိလၢ ပပၢ်အတၢ်အဃိလီၤ.”+ ၂ ဖဲစီၤယၤကိာ် ကွၢ်စီၤလၤဘၣ်​ အမဲာ်သၣ်အခါ အသ့ၣ်ညါဝဲလၢ စီၤလၤဘၣ်​ အတၢ်ပာ်သူၣ်ပာ်သး လၢအဖီခိၣ်​ တဒ်သိး လၢညါလၢၤဘၣ်.+ ၃ ဒီးယဟိဝၤယွၤ တဲဘၣ်​ စီၤယၤကိာ်လၢ “က့ၤကဒါက့ၤလၢ နပၢ်အထံအကီၢ် ဒီးလၢ နဘူးနတံၢ်တဖၣ်​ အအိၣ်တက့ၢ်.+ ဒီးယကဆဲးအိၣ်ဒီးနၤလီၤ.” ၄ ဒီးစီၤယၤကိာ် ဆှၢလီၤတၢ်ကစီၣ်လၢ နီၢ်ရၤဃ့လး ဒီးနီၢ်လ့ၤအၤ အအိၣ်​ ဒ်သိး အဝဲသ့ၣ်ကလဲၤ လၢတၢ်ပျီပူၤ လၢအသိဒီး မဲာ်တဲးလဲးတဖၣ်​ အိၣ်ဝဲအလီၢ်န့ၣ်လီၤ. ၅ ဒီးစီၤယၤကိာ် တဲဘၣ်အဝဲသ့ၣ်လၢ

“ယထံၣ်ဘၣ်လၢ သုပၢ် အတၢ်ပာ်သူၣ်ပာ်သး လၢယဖီခိၣ်န့ၣ်​ ဆီတလဲအသးလံ.+ ဘၣ်ဆၣ်​ ယပၢ်အကစၢ်ယွၤ အိၣ်ဒီးယၤလီၤ.+ ၆ သုသ့ၣ်ညါ သပှၢ်တၢၢ်လၢ ယမၤသုပၢ်အတၢ်မၤ လၢာ်ဂံၢ်လၢာ်ဘါလီၤ.+ ၇ ဒီးသုပၢ် ဂုာ်ကျဲးစၢး လံၣ်အီၣ်ယၤ ဒီးအဝဲ ဆီတလဲ ယဘူးယလဲ အိၣ်အဘျီတဆံလံ. ဘၣ်ဆၣ်​ ကစၢ်ယွၤ တဟ့ၣ်အခွဲးလၢ အကမၤအၢယၤဘၣ်. ၈ ဒီးအဝဲမ့ၢ်တဲဝဲလၢ ‘အကံၣ်စံၣ်ပိၣ်​ ကကဲထီၣ်​ နဘူးနလဲ’ န့ၣ်သိဒီး မဲာ်တဲးလဲးခဲလၢာ် ဖှံလီၤဝဲ အဖိတဖၣ်လၢ အကံၣ်စံၣ်ပိၣ်လီၤ. ဘၣ်ဆၣ်​ အဝဲမ့ၢ်တဲဝဲလၢ ‘အကွ့လ့တဖၣ်​ ကကဲထီၣ်​ နဘူးနလဲ’ န့ၣ်သိဒီး မဲာ်တဲးလဲးခဲလၢာ် ဖှံလီၤဝဲ အဖိတဖၣ်လၢ အကွ့လ့လီၤ.+ ၉ အဃိ ကစၢ်ယွၤ ဟံးထီၣ်ကွံာ် သုပၢ်အဆၣ်ဖိကီၢ်ဖိတဖၣ်​ ဒီးဟ့ၣ်လီၤယၤလီၤ. ၁၀ ဘၣ်တဘျီ ဖဲဆၣ်ဖိကီၢ်ဖိတဖၣ်​ လူၤမိၢ်လူၤဖါ အဆၢကတီၢ်ဘၣ်အခါ ယကျ့ၣ်ထီၣ်ယမဲာ် ဒီးလၢတၢ်မံမီၢ်အပူၤ ယထံၣ်လၢ မဲာ်တဲးလဲးဖါတဖၣ်​ လၢအဘၣ်စီဒီး မဲာ်တဲးလဲးမိၢ်တဖၣ်န့ၣ်​ မ့ၢ်အကွ့လ့, အကံၣ်စံၣ်ပိၣ်​ ဒီးအကံၣ်ဃ့လီၤ.+ ၁၁ ဒီးယွၤအမ့ၢ်အတီ အမူခိၣ်ကလူးတဂၤ တဲယၤလၢ တၢ်မံမီၢ်အပူၤလၢ ‘စီၤယၤကိာ်ဧၢ’ ဒီးယတဲဆၢအီၤလၢ ‘မ့ၢ်, ယကစၢ်ဧၢ.’ ၁၂ ဒီးအဝဲ ဆဲးတဲဝဲလၢ ‘တၢ်လၢစီၤလၤဘၣ်​ မၤနၤန့ၣ်​ ယထံၣ်ခဲလၢာ်လီၤ. အဃိ ဝံသးစူၤ ကွၢ်မီၤ ဒီးနကထံၣ်လၢ ကယဲၢ်မဲာ်တဲးလဲးဖါလၢ အဘၣ်စီဒီး မဲာ်တဲးလဲးမိၢ်တဖၣ်န့ၣ်​ မ့ၢ်အကွ့လ့, အကံၣ်စံၣ်ပိၣ်​ ဒီးအကံၣ်ဃ့လီၤ.+ ၁၃ ယမ့ၢ်ယွၤ အမ့ၢ်အတီလၢ အလီၣ်ဖျါထီၣ်အသး လၢနမဲာ်ညါ လၢဘ့ၤသ့လးလီၤ.+ ဖဲန့ၣ်န့ၣ်​ နလူလီၤသိလၢ လၢၢ်ထူၣ်တထူၣ်န့ၣ်အလိၤ ဒီးနမၤတ့ၢ် တၢ်အၢၣ်လီၤအီလီၤဒီးယၤလီၤ.+ ခဲအံၤန့ၣ်​ ဆၢထၢၣ်​ ဒီးဟးထီၣ်လၢ ကီၢ်တဘ့ၣ်အံၤအပူၤ ဒီးက့ၤဆူ ကီၢ်လၢ နအိၣ်ဖျဲၣ်ထီၣ်​ လၢအပူၤန့ၣ်တက့ၢ်.’”+

၁၄ ဒီးနီၢ်ရၤဃ့လး ဒီးနီၢ်လ့ၤအၤ တဲဆၢအီၤလၢ “တၢ်လၢ ပကန့ၢ်သါဘၣ်အီၤ လၢပပၢ်အအိၣ်န့ၣ်​ အိၣ်တ့ၢ်ဒံး တမံၤမံၤဧါ. ၁၅ အဝဲပာ်ပှၤ ဒ်ပှၤထံဂၤကီၢ်ဂၤဖိအသိး တမ့ၢ်ဧီၤ. အဝဲဆါလီၤကွံာ်ပှၤ ဒီးစ့လၢ အန့ၢ်ဝဲလၢပဃိန့ၣ်​ အသူဝဲလၢာ်လံ တမ့ၢ်ဧီၤ.+ ၁၆ ကယဲၢ် တၢ်ထူးတၢ်တီၤလၢ ကစၢ်ယွၤ ဟံးန့ၢ်ကွံာ် လၢပပၢ်အအိၣ်န့ၣ်​ မ့ၢ်ဝဲပတၢ် ဒီးပဖိတဖၣ်​ အတၢ်လီၤ.+ အဃိ မၤဒ်တၢ်လၢ ကစၢ်ယွၤ မၢနမၤအသိး ခဲလၢာ်တက့ၢ်.”+

၁၇ ဒီးစီၤယၤကိာ် ပာ်ထီၣ်ဝဲ အဖိအမါတဖၣ်​ လၢကီၤလၤအူးအလိၤ+ ၁၈ ဒီးအဟံးန့ၢ်ဝဲ အဆၣ်ဖိကီၢ်ဖိ ဒီးတၢ်ဖိတၢ်လံၤ လၢအပာ်ဖှိၣ်ဃာ်ဝဲ+ ဒီးဆၣ်ဖိကီၢ်ဖိ လၢအဒိးန့ၢ်ဘၣ်ဝဲ လၢကီၢ်ပၤဒနါရၣ်အပူၤ ဒ်သိး အကက့ၤလၢ အပၢ်စီၤအံၤစဲးအအိၣ်​ လၢကီၢ်ကနၤဧၣ်န့ၣ်လီၤ.+

၁၉ ဖဲစီၤလၤဘၣ်လဲၤတံာ် အသိဆူၣ်အခါ နီၢ်ရၤဃ့လးဟုၣ်န့ၢ် အပၢ်+ အတရၤဖးတၢ်ဂီၤတၢ်ဖှီၣ်​ တဖၣ်လီၤ.*+ ၂၀ တကးဒံးဘၣ်​ လၢတၢ်ကူၣ်သ့အပူၤ စီၤယၤကိာ် ဃ့ၢ်ကွံာ်ဝဲ ဒီးတတဲကျၢဝဲ ပှၤစူၤရံဖိ စီၤလၤဘၣ်ဘၣ်. ၂၁ စီၤယၤကိာ် ဟံးန့ၢ် အတၢ်ဖိတၢ်လံၤခဲလၢာ် ဒီးစီၤယၤကိာ် ဒီးအဟံၣ်ဖိဃီဖိ ဃ့ၢ်ထီၣ်ကွံာ်ဝဲ ချ့ချ့လီၤ. ဒီးအဝဲသ့ၣ်​ လဲၤခီဂာ်ထံကျိဖးဒိၣ်*+ ဒီးလဲၤကျဲလၢ ကံးလဧးတကပၤ လၢအမ့ၢ် တၢ်လီၢ်လၢ အအိၣ်ဒီး ကစၢၢ်ကလိတဖၣ်လီၤ.+ ၂၂ ဖဲသၢသီတသီန့ၣ်​ ပှၤတဲဘၣ်​ စီၤလၤဘၣ်​ လၢစီၤယၤကိာ် ဃ့ၢ်ကွံာ်ဝဲလံ. ၂၃ အဃိ စီၤလၤဘၣ်​ ကိးန့ၢ်အဘူးအတံၢ်တဖၣ်​ ဒီးလဲၤလူၤဝဲ စီၤယၤကိာ်လီၤ. ဒီးဖဲနွံသီတသီန့ၣ်​ အဝဲချုးန့ၢ် စီၤယၤကိာ်လၢ ကံးလဧး အကစၢၢ်ကလိတဖၣ်အကျါလီၤ. ၂၄ ဒီးဖဲမုၢ်နၤခီန့ၣ်​ ကစၢ်ယွၤ ဟဲလၢပှၤစူၤရံဖိ စီၤလၤဘၣ်အအိၣ်+ လၢတၢ်မံမီၢ်အပူၤ+ ဒီးတဲအီၤလၢ “ပလီၢ်နသး ဘၣ်ဃးဒီးတၢ်လၢ နကတဲစီၤယၤကိာ် တမံၤဂ့ၤတမံၤဂ့ၤ န့ၣ်တက့ၢ်.”+

၂၅ ဖဲစီၤလၤဘၣ်​ လဲၤတုၤဝဲလၢ စီၤယၤကိာ် အအိၣ်အခါ ဘၣ်ဖဲစီၤယၤကိာ် သူၣ်လီၤဝဲအဒဲလၢ ကစၢၢ်ကလိအကျါလီၤ. ဒီးစီၤလၤဘၣ်​ ဒီးအဘူးအတံၢ်တဖၣ်န့ၣ်​ သူၣ်လီၤဝဲအဒဲလၢ ကံးလဧး အကစၢၢ်ကလိကျါလီၤ. ၂၆ ဒီးစီၤလၤဘၣ်​ တဲစီၤယၤကိာ်လၢ “နမၤဒ်အံၤ ဘၣ်လဲၣ်. ဘၣ်မနုၤအဃိ နဃ့ၢ်ထီၣ်ကွံာ်လၢ တၢ်ကူၣ်သ့အပူၤ ဒီးစိာ်ကွံာ် ယဖိမုၣ်တဖၣ်​ ဒ်ပှၤလၢအဘၣ်​ တၢ်ဖီၣ်န့ၢ်အီၤ လၢတၢ်ဒုးတၢ်ယၤအပူၤ အသိးလဲၣ်. ၂၇ ဘၣ်မနုၤအဃိ နဃ့ၢ်ထီၣ်ကွံာ် ကစုဒု လၢတၢ်ကူၣ်သ့အပူၤ ဒီးတတဲယၤ တၢ်နီတမံၤဘၣ်လဲၣ်. နမ့ၢ်တဲဆိယၤန့ၣ်​ ယကပျဲက့ၤနၤလၢ တၢ်သးခုအပူၤ ဃုာ်ဒီး တၢ်သူၣ်ဝံၣ်သးဆၢတဖၣ်, တၢ်ခြ့ခြ့ ဒီးတနၢ်တဖၣ်လီၤ. ၂၈ ဘၣ်ဆၣ်​ နတဟ့ၣ်ယၤအခွဲးလၢ ယကနၢမူဘၣ်​ ယဖိမုၣ်တဖၣ်​ ဒီးယလံၤတဖၣ်ဘၣ်. နဟးမၤ နါစိၤတၢ်လီၤ. ၂၉ ယအိၣ်ဒီး တၢ်စိတၢ်ကမီၤလၢ ယကမၤဘၣ်ဒိနၤလီၤ. ဘၣ်ဆၣ်​ ဖဲမနၤန့ၣ်​ နပၢ်အကစၢ်ယွၤ တဲယၤလၢ ‘ပလီၢ်နသး ဘၣ်ဃးဒီး တၢ်လၢနကတဲ စီၤယၤကိာ် တမံၤဂ့ၤတမံၤဂ့ၤ န့ၣ်တက့ၢ်.’+ ၃၀ နအဲၣ်ဒိးက့ၤလၢ နပၢ်အအိၣ်တၢ်လီၢ်အဃိ နက့ၤန့ၢ် ဘၣ်ဆၣ်​ ဘၣ်မနုၤအဃိ နက့ၤဟုၣ်​ ယယွၤ အတၢ်ဂီၤတၢ်ဖှီၣ်တဖၣ်လဲၣ်.”+

၃၁ စီၤယၤကိာ် တဲဆၢစီၤလၤဘၣ်လၢ “ယမၤဒ်အံၤန့ၣ်​ မ့ၢ်လၢ ယပျံၤတၢ်အဃိလီၤ. ယဆိကမိၣ်လၢ နကဟံးန့ၢ်ဆူၣ်က့ၤ နဖိမုၣ်တဖၣ်​ လၢယအိၣ်လီၤ. ၃၂ ပှၤတဂၤဂၤလၢ နထံၣ်န့ၢ် နယွၤတဖၣ်​ လၢအအိၣ်န့ၣ်​ ကဘၣ်သံလီၤ. ဃုကွၢ်အီၤလၢ ယတၢ်ဖိတၢ်လံၤတဖၣ်အကျါ လၢပဘူးပတံၢ်တဖၣ်အမဲာ်ညါ ဒီးတၢ်လၢအကဲနတၢ်န့ၣ်​ ဟံးန့ၢ်က့ၤ အီၤသၢၤ.” ဘၣ်ဆၣ်​ စီၤယၤကိာ် တသ့ၣ်ညါဝဲလၢ နီၢ်ရၤဃ့လး ဟုၣ်န့ၢ်ဝဲ တၢ်သ့ၣ်တဖၣ်န့ၣ်ဘၣ်. ၃၃ ဒီးစီၤလၤဘၣ်​ လဲၤနုာ်ဝဲလၢ စီၤယၤကိာ်အဒဲပူၤ ဒီးလၢ နီၢ်လ့ၤအၤအဒဲပူၤ ဒီးလၢကုၢ်မုၣ်ခံဂၤအဒဲပူၤ+ ဘၣ်ဆၣ်​ တထံၣ်န့ၢ်ဝဲ တၢ်သ့ၣ်တဖၣ်န့ၣ်ဘၣ်. ဒီးအဝဲဟးထီၣ်လၢ နီၢ်လ့ၤအၤအဒဲပူၤ ဒီးလဲၤနုာ်ဝဲဆူ နီၢ်ရၤဃ့လး အဒဲပူၤလီၤ. ၃၄ နီၢ်ရၤဃ့လး လဲၤပာ်လီၤပာ်စၢၤ တရၤဖး တၢ်ဂီၤတၢ်ဖှီၣ်တဖၣ်လၢ ကီၤလၤအူး အဂီၤကၢ်အထၢၣ်ပူၤ ဒီးဆ့ၣ်နီၤဝဲလၢ အဖီခိၣ်လီၤ. ဒီးစီၤလၤဘၣ်​ ဃုဝဲလၢ ဒဲဒီဖျၢၣ်အပူၤသနာ်က့ အဝဲဃုဝဲ တဘၣ်ဘၣ်. ၃၅ ဒီးနီၢ်ရၤဃ့လး တဲဘၣ်အပၢ်လၢ “ကစၢ်ဧၢ, တဘၣ်သးထီၣ်ယၤတဂ့ၤ. မ့ၢ်လၢယလုၢ်ယလၢ် ဟဲအဃိ ယဆၢထၢၣ်​ လၢနမဲာ်ညါ တသ့ဘၣ်.”+ ဒီးစီၤလၤဘၣ်​ ဃုကွၢ်တၢ် လီၤတံၢ်လီၤဆဲးဘၣ်ဆၣ်​ တထံၣ်န့ၢ်ဝဲ တရၤဖးတၢ်ဂီၤတၢ်ဖှီၣ်တဖၣ်ဘၣ်.+

၃၆ ဖဲန့ၣ်န့ၣ်​ စီၤယၤကိာ် သးပှံၢ်ထီၣ်တၢ် ဒီးပာ်ဒ့ၣ်ပာ်ကမၣ်​ စီၤလၤဘၣ်လီၤ. စီၤယၤကိာ် တဲဝဲ စီၤလၤဘၣ်လၢ “ယမၤကမၣ်ဘၣ်​ တၢ်မနုၤလဲၣ်, နဟဲလူၤပိာ်ယခံ လၢတၢ်သးထီၣ်အပူၤ လၢတၢ်ကမၣ်​ မနုၤအဃိလဲၣ်. ၃၇ နဟးဃုကွၢ် တၢ်လၢ ယတၢ်ဖိတၢ်လံၤ ခဲလၢာ်အကျါ ဒီးတၢ်လၢ အကဲနဟံၣ်ဖိဃီဖိအတၢ်န့ၣ်​ မ့ၢ်နထံၣ်တမံၤမံၤဧါ. နမ့ၢ်ထံၣ်န့ၣ်​ ပာ်လီၤအီၤလၢ ယဘူးယတံၢ် ဒီးနဘူးနတံၢ်တဖၣ်​ အမဲာ်ညါ ဒီးမၢအဝဲသ့ၣ်​ စံၣ်ညီၣ်န့ၢ်တၢ် လၢပဂီၢ်သၢၤ. ၃၈ ဖဲယအိၣ်ဒီးနၤ အနံၣ်​ ၂၀ အံၤအတီၢ်ပူၤ နသိ ဒီးနမဲာ်တဲးလဲးတဖၣ်​ အဟုးတဟးဂီၤ နီတဘျီဘၣ်.+ ဒီးယတအီၣ်ဘၣ်​ နသိဖါတဖၣ်​ နီတဘျီဘၣ်. ၃၉ ယတဟဲက့ၤစိာ်န့ၢ်နၤ နဆၣ်ဖိကီၢ်ဖိလၢ အဘၣ်​ တၢ်ဖှီသံအီၤ လၢဆၣ်ဖိကီၢ်ဖိ အအၢတဖၣ်ဘၣ်.+ လၢတၢ်န့ၣ်အလီၢ် ယလိးက့ၤအပှ့ၤ လၢယနီၢ်ကစၢ်လီၤ. ဒီးလၢမုၢ်ဆါခီမ့ၢ်ဂ့ၤ လၢမုၢ်နၤခီမ့ၢ်ဂ့ၤ နဆၣ်ဖိကီၢ်ဖိ မ့ၢ်ဘၣ်တၢ်ဟုၣ်အီၤန့ၣ်​ နမၢယဟံးမူဒါလီၤ. ၄၀ လၢမုၢ်ဆါခီန့ၣ်​ ယဘၣ်တူၢ်တၢ်ကိၢ် ဒီးလၢမုၢ်နၤခီန့ၣ်​ ယဘၣ်တူၢ်တၢ်ဂိၢ် ဒီးယမံဘၣ်တဘျဲဘၣ်.+ ၄၁ ယဘၣ်အိၣ်ဒီးနၤ ဒ်အံၤ ပှဲၤထီၣ်အနံၣ်​ ၂၀ လံ. ယဘၣ်မၤ နတၢ်မၤ ၁၄ နံၣ်​ လၢနဖိမုၣ်ခံဂၤအဂီၢ် ဒီးယဘၣ်မၤတၢ် ၆ နံၣ်လၢနသိ ဒီးမဲာ်တဲးလဲးတဖၣ်အဂီၢ် ဒီးနဆီတလဲ ယဘူးယလဲ အဘျီတဆံညါ.+ ၄၂ ယပၢ်အယွၤ+ လၢအမ့ၢ် စီၤအၤဘြၤဟၣ်အယွၤ ဒီးယွၤလၢ စီၤအံၤစဲး ပျံၤဝဲတဂၤန့ၣ်+ အဝဲမ့ၢ်တအိၣ်လၢ ယအိၣ်တကပၤဘၣ်န့ၣ်​ နကဒုးက့ၤယၤ ခီလီလီလီၤ. ကစၢ်ယွၤ ထံၣ်ပာ်စၢၤလၢ ယဘၣ်နးဘၣ်ဖှီၣ်​ ဒီးယဘၣ်မၤတၢ် နးနးကျံၤကျံၤအဃိ အဝဲသိၣ်နၤ ဖဲမနၤကၢာ်လီၤ.”+

၄၃ စီၤလၤဘၣ်​ တဲဆၢ စီၤယၤကိာ်လၢ “ပိာ်မုၣ်တဖၣ်န့ၣ်​ မ့ၢ်ယဖိမုၣ်​ ဒီးဖိသၣ်တဖၣ်န့ၣ်​ မ့ၢ်ယတၢ် ဒီးသိဒီးမဲာ်တဲးလဲးတဖၣ်န့ၣ်​ မ့ၢ်ယတၢ် ဒီးနမ့ၢ်ကွၢ် တၢ်သ့ၣ်တဖၣ်အံၤ ခဲလၢာ်န့ၣ်​ အကဲယတၢ် ဒီးယဖိမုၣ်တဖၣ်​ အတၢ်လီၤ. ယမၤဆါ အဝဲသ့ၣ်​ ဒီးအဝဲသ့ၣ်​ အဖိလၢ အအိၣ်ဖျဲၣ်ထီၣ်ဝဲတဖၣ်​ ကလီၤဧါ. ၄၄ အဃိ မ်ပမၤသကိး တၢ်အၢၣ်လီၤအီလီၤ ဒ်သိးအကကဲထီၣ်​ တၢ်အုၣ်အသးလၢ နၤဒီးယၤ အဘၢၣ်စၢၤတက့ၢ်.” ၄၅ အဃိ စီၤယၤကိာ် ဟံးန့ၢ် လၢၢ်တဖျၢၣ်​ ဒီးပာ်ဆၢထၢၣ်အီၤ ဒ်လၢၢ်ထူၣ်တထူၣ်အသိးလီၤ.+ ၄၆ ဒီးစီၤယၤကိာ် တဲဘၣ်အပှၤလၢ “ဟံးထီၣ်​ လၢၢ်တဖၣ်တက့ၢ်.” ဒီးအဝဲသ့ၣ်​ ဟံးထီၣ်လၢၢ်တဖၣ်​ ဒီးပူၣ်ထီၣ်ဝဲ လၢၢ်တပူၣ်လီၤ. ဝံၤဒီး အဝဲသ့ၣ်​ အီၣ်တၢ်လၢ လၢၢ်တပူၣ်အံၤအခီၣ်ထံးလီၤ. ၄၇ ဒီးစီၤလၤဘၣ်​ ကိးဝဲ လၢၢ်တပူၣ်အံၤလၢ ယကၢ်စၤဒူသၤ ဘၣ်ဆၣ်​ စီၤယၤကိာ်န့ၣ်​ ကိးဝဲလၢၢ်တပူၣ်အံၤလၢ က့းလဧးလီၤ.

၄၈ ဒီးစီၤလၤဘၣ်​ တဲဝဲလၢ “လၢၢ်တပူၣ်အံၤ မ့ၢ်တၢ်အုၣ်အသးလၢ နၤဒီးယၤအဘၢၣ်စၢၤလၢ တနံၤအံၤလီၤ.” လၢတၢ်န့ၣ်အဃိ တၢ်ကိးဝဲအမံၤလၢ က့းလဧး+ ၄၉ ဒီးတၢးထီခိးတၢ်, မ့ၢ်လၢ အဝဲတဲဝဲလၢ “ဖဲပအိၣ်လီၤဖးအခါ မ်ယဟိဝၤယွၤ ခိးကွၢ်နၤဒီးယၤတက့ၢ်. ၅၀ နမ့ၢ်တရ့ဒီး ယဖိမုၣ်တဖၣ်ဂ့ၤဂ့ၤဘၣ်​ ဒီးနမ့ၢ်ဟံးန့ၢ် အါထီၣ်နမါန့ၣ်​ သ့ၣ်နီၣ်ထီၣ်လၢ ပှၤလၢအကကဲ ပှၤအုၣ်အသးလၢ နၤဒီးယၤ အဘၢၣ်စၢၤန့ၣ်​ တမ့ၢ်ပှၤဟီၣ်ခိၣ်ဖိဘၣ်, မ့ၢ်ကစၢ်ယွၤလီၤ.” ၅၁ ဒီးစီၤလၤဘၣ်​ ဆဲးတဲ စီၤယၤကိာ်လၢ “လၢၢ်တပူၣ်​ ဒီးလၢၢ်ထူၣ်တထူၣ်လၢ ယပာ်ဆၢထၢၣ်အီၤဖဲအံၤန့ၣ်​ မ့ၢ်ဝဲလၢ နၤဒီးယၤအဘၢၣ်စၢၤလီၤ. ၅၂ လၢၢ်တပူၣ်အံၤန့ၣ်​ မ့ၢ်ဝဲတၢ်အုၣ်အသးတခါ ဒီးလၢၢ်ထူၣ်အံၤ မ့ၢ်ဝဲ တၢ်တမံၤလၢ အအုၣ်အသးလၢ+ ယတလဲၤတလၢကွံာ် လၢၢ်တပူၣ်​ ဒ်သိး ယကမၤဆါနၤအဂီၢ်ဘၣ်​ ဒီးလၢနတလဲၤတလၢကွံာ် လၢၢ်တပူၣ်​ ဒီးလၢၢ်ထူၣ်တထူၣ်​ ဒ်သိးနကမၤဆါယၤအဂီၢ်ဘၣ်. ၅၃ မ်စီၤအၤဘြၤဟၣ်​ အယွၤ+ ဒီးစီၤနၤဃိၢ်အယွၤ လၢအမ့ၢ်စ့ၢ်ကီး အဝဲသ့ၣ်အပၢ် အယွၤန့ၣ်​ စံၣ်ညီၣ်တၢ်လၢ ပဘၢၣ်စၢၤတက့ၢ်.” ဒီးစီၤယၤကိာ် မၤတၢ်အၢၣ်လီၤလၢ ကစၢ်ယွၤလၢ အပၢ်စီၤအံၤစဲး ပျံၤဝဲတဂၤ အမံၤပူၤလီၤ.+

၅၄ တၢ်န့ၣ်ဝံၤအလီၢ်ခံ စီၤယၤကိာ် လုၢ်ထီၣ်တၢ်လၢ ကစၢၢ်လိၤ ဒီးကိးဒုးအီၣ်​ အဘူးအတံၢ်တဖၣ်ကိၣ်လီၤ. ဒီးအဝဲသ့ၣ်​ အီၣ်တၢ် ဒီးအိၣ်တ့ၢ်ဝဲလၢ ကစၢၢ်လိၤ တနၤလီၤ. ၅၅ ဒီးစီၤလၤဘၣ်​ ဂဲၤဆၢထၢၣ်ဂီၤဂီၤ ဒီးနၢမူဝဲအလံၤတဖၣ်+ ဒီးအဖိမုၣ်တဖၣ်​ ဒီးဆိၣ်ဂ့ၤ အဝဲသ့ၣ်လီၤ.+ ဝံၤဒီး စီၤလၤဘၣ်​ ဟးဖးဒီးအဝဲသ့ၣ်​ ဒီးက့ၤလၢအဟံၣ်လီၤ.+

၃၂ ဒီးစီၤယၤကိာ် ဆဲးလဲၤတၢ်ဆူညါ ဒီးကစၢ်ယွၤ အမူခိၣ်ကလူးတဖၣ်​ ထံၣ်လိာ်သးဒီးအီၤလီၤ. ၂ ဖဲစီၤယၤကိာ် ထံၣ်အဝဲသ့ၣ်အခါ အတဲဝဲလၢ “တၢ်လီၢ်အံၤ မ့ၢ်ဝဲ ကစၢ်ယွၤ အသုးမုၢ်ဂီၢ်မုၢ် အဒဲကဝီၤလီၤ.” အဃိ စီၤယၤကိာ် ကိးဝဲ တၢ်လီၢ်အံၤလၢ မၤဃန့ၤလီၤ.

၃ ဒီးစီၤယၤကိာ် ဆှၢလီၤဆိ ပှၤဆှၢတၢ်ကစီၣ်တဖၣ်​ လၢအကၠီစီၤဧ့ၡီၤအအိၣ်​ လၢစ့ဧၢ်လၢ+ အအိၣ်လၢ ကီၢ်အဒိၣ်အဟီၣ်ကဝီၤ အပူၤန့ၣ်လီၤ.+ ၄ ဒီးစီၤယၤကိာ် မၤလိာ်အဝဲသ့ၣ်လၢ “သုကဘၣ်တဲဘၣ်​ ယကစၢ် စီၤဧ့ၡီၤလၢ ‘နခ့နပှၤ စီၤယၤကိာ် တဲဝဲလၢ “ယအိၣ်တမှံၤလၢ စီၤလၤဘၣ်အအိၣ်​ ဖးယံာ်ညါလီၤ.+ ၅ ဒီးယဒိးန့ၢ်ဘၣ်​ ကျီၢ်တဖၣ်, ကသ့ၣ်ယီၤတဖၣ်, သိတဖၣ်​ ဒီးကုၢ်ပိာ်မုၣ်​ ဒီးကုၢ်ပိာ်ခွါတဖၣ်လီၤ.+ ယဆှၢလီၤ တၢ်ကစီၣ်အံၤလၢ ယကစၢ်အအိၣ်​ ဒ်သိး အကဘၣ်သူၣ်ဘၣ်သးယၤ အဂီၢ်လီၤ.”’”

၆ လၢခံ ပှၤစိာ်တၢ်ကစီၣ်တဖၣ်​ ဟဲက့ၤတဲဘၣ်​ စီၤယၤကိာ်လၢ “ပထံၣ်လိာ်သးဒီး နကၠီ စီၤဧ့ၡီၤ ဝံၤလံ. ဒီးခဲအံၤ အဝဲဒီးပှၤအဂၤ ၄၀၀ ဟဲလၢနအိၣ်လံ.”+ ၇ ဒီးစီၤယၤကိာ် ပျံၤတၢ် ဒီးအသူၣ်ကိၢ်သးဂီၤတၢ် ဒိၣ်မးလီၤ.+ အဃိ အဝဲနီၤဖးလီၤဝဲ ပှၤလၢအအိၣ်ဒီးအီၤတဖၣ်, သိဒီးမဲာ်တဲးလဲး, ကျီၢ် ဒီးကီၤလၤအူးတဖၣ်​ ခံဖုလီၤ. ၈ ဒီးစီၤယၤကိာ် တဲဝဲလၢ “စီၤဧ့ၡီၤ မ့ၢ်ဟဲဒုးဘၣ်ဖုး ပှၤလၢအံၤတဖုန့ၣ်​ အဝဲတဖု ဃ့ၢ်ပူၤဖျဲးအသးသ့လီၤ.”

၉ ဒီးစီၤယၤကိာ် တဲဝဲလၢ “ယဖု စီၤအၤဘြၤဟၣ်​ အယွၤ ဒီးယပၢ်စီၤအံၤစဲး အယွၤ လၢအမ့ၢ် ယဟိဝၤယွၤဧၢ, နတဲယၤလၢ ‘က့ၤကဒါက့ၤလၢ နထံနကီၢ် ဒီးနဘူးနတံၢ်တဖၣ်​ အအိၣ်​ ဒီးယကမၤဂ့ၤတၢ်လၢနဖီခိၣ်လီၤ.’+ ၁၀ ယတကြၢးဒီး နတၢ်အဲၣ်လၢအတီ ဒီးနတၢ်သူၣ်ဂ့ၤသးဝါလၢ နပာ်ဖျါထီၣ်လၢ နခ့နပှၤယၤအံၤ အဖီခိၣ်ဘၣ်.+ ဖဲယခီဂာ် ထံကျိယၢ်ဒ့ၣ်အခါ ယစိာ်ဒၣ်ထဲ ယနီၣ်ထိးဘိ ဘၣ်ဆၣ်​ ခဲအံၤ ယအိၣ်ဒီးယပှၤ ဒီးယဆၣ်ဖိကီၢ်ဖိတဖၣ်​ တုၤဒၣ်လဲာ် ယနီၤဖးအီၤခံဖု သ့ဝဲလီၤ.+ ၁၁ ယဃ့ဘါထုကဖၣ်​ တၢ်လၢနအိၣ်လီၤ.+ မ့ၢ်လၢယပျံၤလၢ ယကၠီ စီၤဧ့ၡီၤ ကဟဲဒုးယၤဒီး+ ယဖိယမါတဖၣ်​ အဃိ မၤပူၤဖျဲးယၤ လၢအစုပူၤတက့ၢ်. ၁၂ ဒီးနတဲလၢ ‘ယကမၤဂ့ၤတၢ်လၢ နဖီခိၣ်​ သပှၢ်ကတၢၢ် ဒီးယကမၤအါထီၣ်​ နချံနသၣ်တုၤလၢအအိၣ်အါ ထဲသိးဒီး ပီၣ်လဲၣ်အမဲးတဖၣ်လၢ ပှၤဂံၢ်အီၤတလၢာ်ဘၣ်.’”+

၁၃ ဒီးစီၤယၤကိာ် အိၣ်တ့ၢ်ဝဲဖဲန့ၣ်​ တနၤလီၤ. ဒီးဒ်သိး အကဟ့ၣ်လီၤ အကၠီ စီၤဧ့ၡီၤ တၢ်ဟ့ၣ်အဂီၢ်+ အဝဲ ကတဲာ်ကတီၤ တၢ်လၢအအိၣ်ဒီးအီၤတနီၤ လၢအမ့ၢ် ၁၄ မဲာ်တဲးလဲးမိၢ် အဒု ၂၀၀, မဲာ်တဲးလဲးဖါ အဒု ၂၀, သိမိၢ်အဒု ၂၀၀, သိဖါအဒု ၂၀ ၁၅ ကီၤလၤအူး အဒု ၃၀ လၢအဒုးအီၣ်အဖိနုၢ်, ကျီၢ်မိၢ် အဒု ၄၀, ကျီၢ်ဖါအဒု ၁၀, ကသ့ၣ်ယီၤမိၢ် အဒု ၂၀ ဒီးကသ့ၣ်ယီၤဖါတံၢ် အဒု ၁၀ လီၤ.+

၁၆ ဒီးအဝဲဟ့ၣ်လီၤဝဲ တၢ်သ့ၣ်တဖၣ်အံၤလၢ အခ့အပှၤတဖၣ်​ အစုပူၤ တဖုဘၣ်တဖု ဒီးအဝဲတဲဘၣ်​ အခ့အပှၤတဖၣ်လၢ “လဲၤဆိလၢ ယမဲာ်ညါ ဒီးသုကဘၣ်​ အိၣ်စီၤစုၤယံၤလိာ်အသး တဖုဘၣ်တဖုလီၤ.” ၁၇ စီၤယၤကိာ် မၤလိာ်အခ့အပှၤ အခီၣ်ထံးတဂၤလၢ “ယကၠီ စီၤဧ့ၡီၤ မ့ၢ်ထံၣ်ဘၣ်ဖုးနၤ ဒီးသံကွၢ်နၤလၢ ‘နကစၢ် မ့ၢ်မတဂၤလဲၣ်, နကလဲၤဖဲလဲၣ်​ ဒီးဆၣ်ဖိကီၢ်ဖိတဖၣ်​ လၢအအိၣ်လၢ နမဲာ်ညါန့ၣ်​ မ့ၢ်မတဂၤအတၢ်လဲၣ်’ န့ၣ်​ ၁၈ နကဘၣ်တဲလၢ ‘နခ့နပှၤ စီၤယၤကိာ် အတၢ်လီၤ. တၢ်သ့ၣ်တဖၣ်အံၤ မ့ၢ်တၢ်ဟ့ၣ်လၢ ယကစၢ် စီၤဧ့ၡီၤ အဂီၢ်လီၤ.+ ဒီးစီၤယၤကိာ် အိၣ်ဝဲလၢ ပလီၢ်ခံလီၤ.’” ၁၉ ဒီးစီၤယၤကိာ် မၤလိာ်စ့ၢ်ကီး အခ့အပှၤ ခံဂၤတဂၤ, သၢဂၤတဂၤ ဒီးပှၤလၢ အလဲၤတၢ်ဒီး ဆၣ်ဖိကီၢ်ဖိ အဖုတဖၣ်​ ကိးဂၤဒဲးလၢ “ဖဲသုထံၣ်​ စီၤဧ့ၡီၤအခါ သုကဘၣ်တဲ ဒ်န့ၣ်လီၤ. ၂၀ ဒီးသုကြၢးတဲစ့ၢ်ကီးလၢ ‘နခ့နပှၤ စီၤယၤကိာ် အိၣ်ဝဲလၢ ပလီၢ်ခံလီၤ.’” စီၤယၤကိာ် ဆိကမိၣ်ဝဲလၢ ‘ယမ့ၢ်ဆှၢလီၤအီၤ တၢ်ဟ့ၣ်န့ၣ်​ အသးကခုၣ်လီၤဒီး+ လၢခံ ဖဲအဝဲထံၣ်ယၤအခါ ဘၣ်သ့ၣ်သ့ၣ်​ အကတူၢ်လိာ်ယၤ ဂ့ၤဂ့ၤလီၤ.’ ၂၁ အဃိ အဝဲဆှၢလီၤဆိဝဲ တၢ်ဟ့ၣ်တဖၣ်ဆူ ထံကျိဖိအဝၢ်ခီ ဒီးမ့မ့ၢ် အနီၢ်ကစၢ်န့ၣ်​ အိၣ်တ့ၢ်ဝဲလၢ ဒဲကဝီၤပူၤ တနၤလီၤ.

၂၂ ဒီးဖဲတၢ်တနၤန့ၣ်​ အဝဲဂဲၤဆၢထၢၣ်​ ဒီးကိးထီၣ်အမါခံဂၤ,+ အကုၢ်မုၣ်ခံဂၤ+ ဒီးအဖိခွါ ၁၁ ဂၤ ဒီးခီဂာ်ဝဲ ထံကျိဖိယးဘိးလီၤ.+ ၂၃ ဒီးစီၤယၤကိာ် ကိးထီၣ်အဝဲသ့ၣ်​ ဒီးဒုးခီဂာ် အဝဲသ့ၣ်လၢ ထံကျိဖိ ဒီးအဝဲလဲၤစိာ်ဃုာ် တၢ်လၢအအိၣ်ဒီးအီၤ ခဲလၢာ်လီၤ.

၂၄ လၢခံ ဖဲစီၤယၤကိာ် အိၣ်ဝဲထဲတဂၤအခါ ပှၤတဂၤ ဟဲကနိဒီးအီၤ တုၤလီၤလၢ မုၢ်ဝါထီၣ်လီၤ.+ ၂၅ ဖဲပှၤတဂၤအံၤ သ့ၣ်ညါဝဲလၢ အကနိ စီၤယၤကိာ် တနၢၤဘၣ်အခါ အဝဲထိးဝဲ စီၤယၤကိာ် အကံၣ်ဒုၣ်​ ဒီးစီၤယၤကိာ် အကံၣ်ဒုၣ်အဆၢ တလံာ်ကွံာ်ဝဲလီၤ.+ ၂၆ ဝံၤဒီး ပှၤတဂၤအံၤ တဲအီၤလၢ “မုၢ်ကဝါထီၣ်လီၤ. ပျၢ်ယၤသၢၤ.” ဒီးစီၤယၤကိာ် တဲဝဲလၢ “နမ့ၢ်တဆိၣ်ဂ့ၤယၤဘၣ်န့ၣ်​ ယတပျၢ်နၤဘၣ်.”+ ၂၇ အဃိ ပှၤတဂၤအံၤ သံကွၢ်အီၤလၢ “နမံၤဒ်လဲၣ်.” ဒီးအဝဲ စံးဆၢဝဲလၢ “စီၤယၤကိာ်” လီၤ. ၂၈ ဒီးပှၤတဂၤအံၤ တဲဝဲလၢ “မ့ၢ်လၢ နကနိလိာ်သးဒီး ကစၢ်ယွၤဒီး+ နကနိလိာ်သးစ့ၢ်ကီးဒီး ပှၤဟီၣ်ခိၣ်ဖိတဖၣ်​ ဒီးနမၤနၢၤတၢ်လံအဃိ နမံၤတမ့ၢ် စီၤယၤကိာ်လၢၤဘၣ်. နမံၤကမ့ၢ် စီၤအံၣ်စရ့လးလီၤ.”*+ ၂၉ ဒီးစီၤယၤကိာ် တဲအီၤလၢ “ဝံသးစူၤ တဲဘၣ်ယၤ နမံၤမီၤ.” ဘၣ်ဆၣ်​ အဝဲတဲဝဲလၢ “ဘၣ်မနုၤအဃိ နသံကွၢ်ယမံၤလဲၣ်.”+ ဒီးအဝဲဆိၣ်ဂ့ၤ စီၤယၤကိာ် ဖဲန့ၣ်လီၤ. ၃၀ လၢတၢ်န့ၣ်အဃိ စီၤယၤကိာ် ကိးန့ၢ်ဝဲ တၢ်လီၢ်အံၤ အမံၤလၢ ပနံၤအ့လး*+ ဒီးတဲဝဲလၢ “ယထံၣ်ဘၣ်ယွၤ လၢမဲာ်သကိးမဲာ် ဘၣ်ဆၣ်​ ယသးသမူ ပူၤဖျဲးလီၤ.”+

၃၁ ဖဲစီၤယၤကိာ် လဲၤခီဂာ်ဝဲ ပနူၤအ့လးအခါ မုၢ်ဟဲထီၣ်လံ. ဘၣ်ဆၣ်​ မ့ၢ်လၢအကံၣ်ဒုၣ်​ ဘၣ်ဒိအဃိ အဝဲဘၣ်ဟးဝဲ တကျဲၢ်တကျဲၢ်လီၤ.+ ၃၂ ဒီးမ့ၢ်လၢ ပှၤတဂၤအံၤထိးဝဲ စီၤယၤကိာ် အကံၣ်ဒုၣ်အဆၢလၢ အဘူးဒီး တၢ်အထူၣ်အပျၢ်တဘိ လၢအကံၣ်ဒုၣ်လာ်အဃိ တုၤလၢ မုၢ်မဆါတနံၤအံၤ ပှၤအံၣ်စရ့လးဖိတဖၣ်​ အလုၢ်လၢ် အိၣ်ဝဲလၢ အဝဲသ့ၣ်​ တအီၣ်ဝဲ တၢ်အထူၣ်အပျၢ်တဘိလၢ ကံၣ်ဒုၣ်လာ်န့ၣ်ဘၣ်.

၃၃ ဒီးစီၤယၤကိာ် ကွၢ်ထီၣ်တၢ် ဒီးထံၣ်ဝဲ စီၤဧ့ၡီၤ ဟဲဝဲဒီးပှၤအဂၤ ၄၀၀ လီၤ.+ အဃိ အဝဲနီၤဖးလီၤဝဲ ဖိသၣ်သ့ၣ်တဖၣ်ဆူ နီၢ်လ့ၤအၤ, နီၢ်ရၤဃ့လး ဒီးအကုၢ်မုၣ်ခံဂၤ အအိၣ်လီၤ.+ ၂ ဒီးအဝဲပာ်ဝဲ ကုၢ်မုၣ်ဒီးအဖိတဖၣ်​ လၢတၢ်မဲာ်ညါ+ ဒီးနီၢ်လ့ၤအၤ ဒီးအဖိတဖၣ်န့ၣ်​ ပာ်ဝဲလၢ အဝဲသ့ၣ်အလီၢ်ခံ+ ဒီးမ့မ့ၢ် နီၢ်ရၤဃ့လး+ ဒီးစီၤယိၤသးန့ၣ်​ ပာ်ဝဲလၢ အဝဲသ့ၣ်ခဲလၢာ် အလီၢ်ခံလီၤ. ၃ ဒီးစီၤယၤကိာ်န့ၣ်​ လဲၤလၢ အဝဲသ့ၣ်အမဲာ်ညါလီၤ. ဒီးဒ်အလဲၤဘူးထီၣ်ဒီး အကၠီအသိး အဝဲထိၣ်လီၤပှီၤအသး လၢဟီၣ်ခိၣ်လိၤ နွံဘျီလီၤ.

၄ ဘၣ်ဆၣ်​ စီၤဧ့ၡီၤ လဲၤဃ့ၢ်ဝဲလၢအအိၣ်​ ဒီးဖိးဟုနၢမူအီၤ ဒီးအဝဲသ့ၣ်​ ဟီၣ်ဝဲ ခံဂၤလၢာ်လီၤ. ၅ ဖဲစီၤဧ့ၡီၤ ကွၢ်ထီၣ်တၢ်အခါ အထံၣ်ဘၣ်ဝဲပိာ်မုၣ်​ ဒီးဖိသၣ်တဖၣ်​ အဃိ အတဲဝဲလၢ “ပှၤလၢ အအိၣ်ဒီးနၤတဖၣ်အံၤ မ့ၢ်မတၤလဲၣ်.” စီၤယၤကိာ် တဲဆၢဝဲလၢ “ဖိသၣ်တဖၣ်အံၤ ကစၢ်ယွၤဟ့ၣ်လီၤ နခ့နပှၤ ယၤအံၤလီၤ.”+ ၆ ဒီးဖဲန့ၣ်​ ကုၢ်ပိာ်မုၣ်ဒီး အဖိတဖၣ်န့ၣ်​ ဟဲထိၣ်လီၤပှီၤအသး ၇ ဒီးနီၢ်လ့ၤအၤ ဒီးအဖိတဖၣ်​ ဟဲထိၣ်လီၤပှီၤအသးလီၤ. ဝံၤဒီး နီၢ်ရၤဃ့လး ဒီးစီၤယိၤသး ဟဲစ့ၢ်ကီး ဒီးအဝဲသ့ၣ်​ ထိၣ်လီၤပှီၤအသးလီၤ.+

၈ စီၤဧ့ၡီၤ တဲဝဲလၢ “ယထံၣ်ဘၣ်​ ပှၤတဖၣ်န့ၣ်​ ဒီးဆၣ်ဖိကီၢ်ဖိတဖၣ်, ဘၣ်မနုၤအဃိ နဆှၢလီၤ အဝဲသ့ၣ်လဲၣ်.”+ စီၤယၤကိာ် တဲဆၢဝဲလၢ “ယကစၢ်ဧၢ, မ့ၢ်ဒ်သိး ယကဒိးန့ၢ်ဘၣ်​ နတၢ်ဘၣ်သးအဂီၢ်လီၤ.”+ ၉ ဒီးစီၤဧ့ၡီၤ တဲဝဲလၢ “ပုၢ်ဧၢ, ယတၢ်အိၣ်​ ဒီဒူၣ်ဒီထၢလံ.+ တၢ်လၢ အကဲနတၢ်န့ၣ်​ ပာ်ဃာ်အီၤသၢၤ.” ၁၀ ဘၣ်ဆၣ်​ စီၤယၤကိာ် တဲဝဲလၢ “ဝံသးစူၤ မၤဒ်န့ၣ်တဂ့ၤ. ယဟဲစိာ် တၢ်ဟ့ၣ်တခါအံၤ ဒ်သိး ယကထံၣ်ဘၣ်​ နမဲာ်အဂီၢ်အဃိ ယမ့ၢ်ဒိးန့ၢ်ဘၣ်​ နတၢ်ဘၣ်သးန့ၣ်​ က့ၤစိာ် ယတၢ်ဟ့ၣ်အံၤနီၤ. ဒီးယထံၣ်ဘၣ်နမဲာ်န့ၣ်​ လီၤဂာ်ဒ် ယထံၣ်ဘၣ်​ ကစၢ်ယွၤအမဲာ်အသိး ခီဖျိလၢ နတူၢ်လိာ်ယၤလၢ တၢ်သးခုအပူၤ အဃိလီၤ.+ ၁၁ ကစၢ်ယွၤ ဘၣ်သူၣ်ဘၣ်သးယၤ ဒီးတၢ်လၢ ယလိၣ်ဘၣ်န့ၣ်​ အိၣ်ဒီးယၤ ခဲလၢာ်လံ+ အဃိ ဝံသးစူၤ က့ၤစိာ် ယတၢ်ဟ့ၣ်* လၢအဘၣ်တၢ်ဟဲစိာ်အီၤလၢ နအိၣ်တက့ၢ်.”+ ဒီးစီၤယၤကိာ် ဃ့ကညးအီၤ သပှၢ်ကတၢၢ်အဃိ အက့ၤစိာ်ဝဲလီၤ.

၁၂ လၢခံ စီၤဧ့ၡီၤ တဲဝဲလၢ “မ်ပဟးထီၣ်ဖဲအံၤ ဒီးဆဲးလဲၤတၢ်တက့ၢ်. ဒီးယကလဲၤဆိ လၢနမဲာ်ညါလီၤ.” ၁၃ ဘၣ်ဆၣ်​ စီၤယၤကိာ် တဲအီၤလၢ “ယကစၢ်ဧၢ, နသ့ၣ်ညါလၢ ဖိသၣ်သ့ၣ်တဖၣ်အံၤန့ၣ်​ အညါဘီၣ်ဒံး+ ဒီးတကးဒံးဘၣ်​ ယသိဒီး ယကျီၢ်သ့ၣ်တဖၣ်​ အိၣ်ဒီးအဖိဆံးအဃိ ယဘၣ်ကွၢ်ထွဲအီၤလီၤ. ပှၤမ့ၢ်နီအီၤချ့ချ့ လၢတနံၤဃီ အတီၢ်ပူၤန့ၣ်​ ဆၣ်ဖိကီၢ်ဖိ ကသံဝဲဒီတဖုလီၤ. ၁၄ ယကစၢ်ဧၢ, ဝံသးစူၤ လဲၤဆိလၢ ယမဲာ်ညါမီၤ. မ့မ့ၢ်ယၤန့ၣ်​ ယကလဲၤတၢ် ကယီကယီ ဒ်ယဆၣ်ဖိကီၢ်ဖိ ဒီးဖိသၣ်တဖၣ်လဲၤတၢ် ကဲဝဲအသိး ဒီးယကထံၣ်လိာ်သးဒီးနၤဖဲ စ့ဧၢ်လီၤ.”+ ၁၅ ဒီးစီၤဧ့ၡီၤ တဲဝဲလၢ “ဝံသးစူၤ ပျဲယပာ်တ့ၢ်န့ၢ်နၤ ယပှၤတနီၤမီၤ.” စီၤယၤကိာ် တဲဆၢဝဲလၢ “ဘၣ်မနုၤအဃိ နဘၣ်မၤ ဒ်န့ၣ်လဲၣ်. ယကစၢ်ဧၢ, ထဲဒၣ်​ ယမ့ၢ်ဒိးန့ၢ်ဘၣ်​ နတၢ်ဘၣ်သးန့ၣ်​ လၢပှဲၤလံ.” ၁၆ အဃိ ဖဲတၢ်တနံၤန့ၣ်​ စီၤဧ့ၡီၤ က့ၤကဒါက့ၤဝဲဆူ စ့ဧၢ်လီၤ.

၁၇ ဒီးစီၤယၤကိာ် လဲၤဝဲလၢ စူးကိၤသး+ ဒီးတ့ထီၣ်ဝဲ ဟံၣ်တဖျၢၣ်​ လၢအနီၢ်ကစၢ်အဂီၢ် ဒီးတ့ထီၣ်စ့ၢ်ကီးဝဲ တၢ်လီၢ်လၢ အဆၣ်ဖိကီၢ်ဖိတဖၣ်​ အဂီၢ်လီၤ. အဃိ အကိးန့ၢ်ဝဲ တၢ်လီၢ်အံၤလၢ စူးကိၤသးလီၤ.*

၁၈ ဖဲစီၤယၤကိာ် အတၢ်ဟဲက့ၤ စးထီၣ်လၢ ကီၢ်ပၤဒနါရၣ်+ ဝံၤအလီၢ်ခံ အဝဲလဲၤတုၤလၢ ဝ့ၢ်ၡက့ၣ်​ ပူၤပူၤဖျဲးဖျဲးလီၤ.+ ဝ့ၢ်ၡက့ၣ်န့ၣ်​ အိၣ်ဝဲလၢ ကီၢ်ကနၤဧၣ်အပူၤ+ ဒီးစီၤယၤကိာ် သူၣ်အဒဲလၢ အဘူးဒီး ဝ့ၢ်အံၤလီၤ. ၁၉ ဒီးစီၤယၤကိာ် ပှ့ၤန့ၢ် ဟီၣ်ခိၣ်တကဝီၤ လၢအအိၣ်ဖဲ တၢ်လီၢ်လၢ အဝဲသူၣ်ဒဲအလီၢ်လီၤ. အဝဲပှ့ၤဝဲ ဟီၣ်ခိၣ်တကဝီၤအံၤလၢ စီၤဃမိၢ် အဖိခွါတဖၣ်အအိၣ်​ လၢစ့အဘ့ၣ်​ ၁၀၀ လီၤ.+ ဒီးစီၤၡက့ၣ်န့ၣ်​ မ့ၢ်ဝဲ စီၤဃမိၢ် အဖိခွါတဂၤလီၤ. ၂၀ ဒီးစီၤယၤကိာ် တ့ထီၣ်ဝဲ တၢ်လုၢ်လီၢ်တခါ ဒီးကိးန့ၢ်ဝဲအမံၤလၢ ကစၢ်ယွၤ လၢအမ့ၢ် အံၣ်စရ့လး အကစၢ်ယွၤလီၤ.+

၃၄ စီၤယၤကိာ် အဖိမုၣ်​ နီၢ်ဒံနၤ လၢနီၢ်လ့ၤအၤ အိၣ်ဖျဲၣ်ထီၣ်ဝဲန့ၣ်+ ညီနုၢ်အဝဲ လဲၤရ့လိာ်အသးဒီး ပှၤပိာ်မုၣ်သးစၢ်တဖၣ်လၢ အအိၣ်လၢ တၢ်လီၢ်ဖဲန့ၣ်လီၤ.+ ၂ ဒီးစီၤဃမိၢ် လၢအမ့ၢ် ပှၤဃံၤဝံၤဖိ+ ဒီးထံကီၢ် အခိၣ်အနၢ်တဂၤန့ၣ်​ အဖိခွါမ့ၢ်ဝဲ စီၤၡက့ၣ်လီၤ. စီၤၡက့ၣ်ထံၣ်​ နီၢ်ဒံနၤ ဒီးဖီၣ်ဆူၣ်အီၤလီၤ. ၃ ဒီးစီၤၡက့ၣ်​ အသးစဲဘူးဒီး စီၤယၤကိာ်အဖိမုၣ်​ နီၢ်ဒံနၤ သပှၢ်ကတၢၢ် ဒီးအဲၣ်ဘၣ်ဝဲ ပိာ်မုၣ်သးစၢ်တဂၤအံၤ အဃိ အဝဲတဲတၢ်ဒ်သိး အကထုးန့ၢ် နီၢ်ဒံနၤ အသးအဂီၢ်လီၤ. ၄ ဒီးစီၤၡက့ၣ်​ တဲအပၢ် စီၤဃမိၢ်လၢ+ “လဲၤဃ့န့ၢ်ယၤ ပိာ်မုၣ်သးစၢ်တဂၤအံၤ ဒ်သိး ကကဲထီၣ်​ ယမါအဂီၢ်တက့ၢ်.”

၅ ဖဲစီၤယၤကိာ် နၢ်ဟူဝဲလၢ စီၤၡက့ၣ်​ မၤဟးဂီၤ အဖိမုၣ်​ နီၢ်ဒံနၤ အသူးသ့ၣ်လၤကပီၤအခါ စီၤယၤကိာ် အဖိခွါတဖၣ်​ အိၣ်ဒီးအဆၣ်ဖိကီၢ်ဖိတဖၣ်​ လၢတၢ်ပျီပူၤလီၤ. အဃိ စီၤယၤကိာ် အိၣ်ဘှ့ၣ်ကလာ် တုၤလၢ အဝဲသ့ၣ်​ ဟဲက့ၤဝဲ တစုလီၤ. ၆ လၢခံ စီၤၡက့ၣ်အပၢ် စီၤဃမိၢ်န့ၣ်​ ဟဲတဲသကိးတၢ်ဒီး စီၤယၤကိာ်လီၤ. ၇ ဘၣ်ဆၣ်​ စီၤယၤကိာ် အဖိခွါတဖၣ်​ လၢအအိၣ်လၢ တၢ်ပျီပူၤန့ၣ်​ ဖဲအဝဲသ့ၣ်နၢ်ဟူဝဲ ဘၣ်ဃးဒီး တၢ်ဂ့ၢ်အံၤအခါ အဝဲသ့ၣ်​ ဟဲက့ၤထီၣ်ဝဲ တဘျီဃီလီၤ. မ့ၢ်လၢ စီၤၡက့ၣ်​ မၤတၢ်လၢ အတကြၢးမၤဘၣ်​ ဒီးမၤမဲာ်ဆှး အံၣ်စရ့လး ခီဖျိလၢ အမံဃုာ်ဒီး စီၤယၤကိာ် အဖိမုၣ်အဃိ+ အဝဲသ့ၣ်​ သးဆါအီၤ ဒီးအသးဒိၣ်ထီၣ်တၢ် ဒိၣ်မးလီၤ.+

၈ ဒီးစီၤဃမိၢ် တဲအဝဲသ့ၣ်လၢ “ယဖိခွါစီၤၡက့ၣ်​ လီကီသုဖိမုၣ်လီၤ. ဝံသးစူၤ ဟ့ၣ်လီၤအီၤ ဒ်သိးအကကဲထီၣ်​ ယဖိခွါအမါ ၉ ဒီးပကဒီဒိၣ်လိာ် ပသးမီၤ. ဟ့ၣ်လီၤပှၤ သုဖိမုၣ်တဖၣ်​ ဒီးဟံးန့ၢ် ပဖိမုၣ်တဖၣ်လၢ သုနီၢ်ကစၢ်အဂီၢ်တက့ၢ်.+ ၁၀ သုအိၣ်တပူၤဃီဒီးပှၤသ့ ဒီးလၢ ကီၢ်တဘ့ၣ်အံၤအပူၤန့ၣ်​ သုမၤတၢ် တမံၤဂ့ၤတမံၤဂ့ၤသ့လီၤ. အိၣ်ဆိးဖဲအံၤ ဒီးပနံာ်တၢ်ကၤတၢ် လၢကီၢ်အံၤ အပူၤတက့ၢ်.” ၁၁ ဒီးစီၤၡက့ၣ်​ တဲဘၣ်​ နီၢ်ဒံနၤအပၢ် ဒီးအဒီပုၢ်ဝဲၢ်ခွါတဖၣ်လၢ “ဝံသးစူၤ တူၢ်လိာ်ယၤမီၤ. ဒီးယကဟ့ၣ်သု ကယဲၢ်တၢ်လၢ သုဃ့ယၤ တမံၤဂ့ၤတမံၤဂ့ၤလီၤ. ၁၂ သုဃ့ယၤ တၢ်ဟ့ၣ်​ ဒီးတလးမူးပိာ်မုၣ်​ အပှ့ၤမ့ၢ်ဒိၣ်ဝဲဖးဒိၣ်+ ဘၣ်ဆၣ်​ ယကဟ့ၣ်သု တၢ်လၢသုဃ့ယၤလီၤ. ဟ့ၣ်လီၤယၤ ထဲဒၣ်​ ပိာ်မုၣ်သးစၢ်တဂၤအံၤ ဒ်ယမါအသိးတက့ၢ်.”

၁၃ ဒီးစီၤယၤကိာ် အဖိခွါတဖၣ်​ တဲဆၢ စီၤၡက့ၣ်​ ဒီးအပၢ်စီၤဃမိၢ် လၢတၢ်လံၣ်တၢ်လီအပူၤ မ့ၢ်လၢ စီၤၡက့ၣ်​ မၤဟးဂီၤ အဒီပုၢ်ဝဲၢ်မုၣ်​ နီၢ်ဒံနၤ အသူးသ့ၣ်လၤကပီၤ အဃိလီၤ. ၁၄ အဝဲသ့ၣ်​ တဲဝဲလၢ “ပဟ့ၣ်လီၤ ပဒီပုၢ်ဝဲၢ်မုၣ်လၢ ပိာ်ခွါလၢ အတဒိး တၢ်ကူးတရံးဘၣ်တဂၤအအိၣ်​ လ့ၤတက့ၤ တသ့ဘၣ်.+ ပမ့ၢ်မၤဒ်န့ၣ်န့ၣ်​ အကကဲထီၣ်​ တၢ်မဲာ်ဆှး လၢပဂီၢ်လီၤ. ၁၅ ဒ်သိးပကတူၢ်လိာ်သုအဂီၢ် ကျဲအိၣ်ထဲတဘိလီၤ. သုပိာ်ခွါခဲလၢာ် ကဘၣ်ကဲထီၣ်​ ဒ်သိးဒီးပှၤ ခီဖျိလၢ သုဒိးတၢ်ကူးတရံးလီၤ.+ ၁၆ ဖဲန့ၣ်ဝံၤအလီၢ်ခံ ပကဟ့ၣ်လီၤသုလၢ ပဖိမုၣ်တဖၣ်​ ဒီးပကဟံးန့ၢ် သုဖိမုၣ်တဖၣ်လၢ ပနီၢ်ကစၢ်အဂီၢ်လီၤ. ဒီးပကအိၣ်ဒီးသု ဒီးပကကဲထီၣ်​ ပှၤတဒူၣ်ဃီလီၤ. ၁၇ ဘၣ်ဆၣ်​ သုမ့ၢ်တဒိကနၣ်ပှၤ ဒီးမ့ၢ်တဒိး တၢ်ကူးတရံးဘၣ်န့ၣ်​ ပကဟံးန့ၢ် ပဖိမုၣ်​ ဒီးပကလဲၤတၢ်လီၤ.”

၁၈ စီၤဃမိၢ်+ ဒီးအဖိခွါ စီၤၡက့ၣ်န့ၣ်+ ဘၣ်သူၣ်ဘၣ်သးဝဲ တၢ်လၢ အဝဲသ့ၣ်​ တဲဝဲတဖၣ်လီၤ. ၁၉ ဒီးစီၤၡက့ၣ်​ အဲၣ်ဘၣ်ဝဲ စီၤယၤကိာ် အဖိမုၣ်​ ဒီးအဝဲမ့ၢ် ပှၤလၢအလီၤပာ်ကဲ ဒိၣ်ကတၢၢ်တဂၤလၢ အပၢ်အဟံၣ်ပူၤအဃိ အတထုး တၢ်ဆၢကတီၢ်လၢ အကမၤဝဲဒ် အဝဲသ့ၣ်​ မၢအီၤအသိးဘၣ်.+

၂၀ အဃိ စီၤဃမိၢ် ဒီးအဖိခွါ စီၤၡက့ၣ်​ လဲၤဝဲလၢဝ့ၢ်အတြဲၤ ဒီးတဲဘၣ်ဝဲ ပိာ်ခွါတဖၣ်လၢ အအိၣ်လၢ အဝ့ၢ်ပူၤလၢ+ ၂၁ “ပှၤတဖၣ်အံၤ အဲၣ်ဒိးအိၣ်ဃူအိၣ်ဖိးဒီးပှၤလီၤ. ကီၢ်တဘ့ၣ်အံၤ လဲၢ်ဝဲအဃိ အဝဲသ့ၣ်အိၣ်လၢအပူၤ န့ၢ်ဝဲလီၤ. မ်အဝဲသ့ၣ်​ အိၣ်ဆိးလၢ ကီၢ်တဘ့ၣ်အံၤ ဒီးပနံာ်တၢ်ကၤတၢ် လၢအပူၤတက့ၢ်. ပန့ၢ်မါလၢ အဝဲသ့ၣ်​ အဖိမုၣ်တဖၣ်သ့ ဒီးပဟ့ၣ်လီၤ အဝဲသ့ၣ်​ ပဖိမုၣ်တဖၣ်​ သ့ဝဲစ့ၢ်ကီးလီၤ.+ ၂၂ ဘၣ်ဆၣ်​ ဒ်သိးအဝဲသ့ၣ်​ ကတူၢ်လိာ်လၢ ကအိၣ်ဒီးပှၤ ဒီးကကဲထီၣ်​ ပှၤတဒူၣ်ဃီဒီးပှၤအဂီၢ်န့ၣ်​ ကျဲအိၣ်ထဲတဘိလီၤ. ပဝဲလၢ အကဲပှၤပိာ်ခွါကိးဂၤဒဲးန့ၣ်​ ကဘၣ်ဒိးတၢ်ကူးတရံး ဒ်အဝဲသ့ၣ်​ ဒိးတၢ်ကူးတရံးအသိးလီၤ.+ ၂၃ ပမ့ၢ်မၤဒ်န့ၣ်န့ၣ်​ တၢ်လၢအအိၣ်ဒီး အဝဲသ့ၣ်မ့ၢ်ဂ့ၤ, အတၢ်ထူးတၢ်တီၤမ့ၢ်ဂ့ၤ, အဆၣ်ဖိကီၢ်ဖိ ခဲလၢာ်မ့ၢ်ဂ့ၤ ကကဲထီၣ်ပတၢ် တမ့ၢ်ဘၣ်ဧါ. အဃိ ဒ်သိးအဝဲသ့ၣ်​ ကအိၣ်ဒီးပှၤအဂီၢ် မ်ပတူၢ်လိာ် အဝဲသ့ၣ်တက့ၢ်.” ၂၄ ပှၤလၢ အပာ်ဖှိၣ်ထီၣ်အသး လၢအဝ့ၢ်အတြဲၤ ကိးဂၤဒဲးန့ၣ်​ ဒိကနၣ်​ စီၤဃမိၢ် ဒီးအဖိခွါ စီၤၡက့ၣ်အကလုၢ် ဒီးပှၤပိာ်ခွါ ကိးဂၤဒဲးလၢ အအိၣ်လၢ ဝ့ၢ်တဖျၢၣ်အံၤအပူၤန့ၣ်​ ဒိးတၢ်ကူးတရံးလီၤ.

၂၅ ဘၣ်ဆၣ်​ လၢသၢသီတသီ ဖဲအဝဲသ့ၣ်​ တူၢ်ဘၣ်လၢအဆါဒံး အခါန့ၣ်​ စီၤယၤကိာ် အဖိခွါခံဂၤ လၢအမ့ၢ် နီၢ်ဒံနၤအကၠီ စီၤစူၤမ့းအိၣ်​ ဒီးစီၤလ့ၤဝံန့ၣ်+ ဟံးန့ၢ်ဝဲအနး ဒီးလဲၤနုာ်လီၤဝဲလၢ ဝ့ၢ်ပူၤ ဖဲပှၤတပာ်သူၣ်ပာ်သးဝဲ အဆၢကတီၢ် ဒီးမၤသံဝဲ ပှၤပိာ်ခွါ ကိးဂၤဒဲးလီၤ.+ ၂၆ အဝဲသ့ၣ်​ မၤသံဝဲ စီၤဃမိၢ် ဒီးအဖိခွါ စီၤၡက့ၣ်လၢနး ဝံၤဒီးဟံးန့ၢ်က့ၤ နီၢ်ဒံနၤ လၢစီၤၡက့ၣ်အဟံၣ်ပူၤ ဒီးက့ၤဝဲလီၤ. ၂၇ ဖဲပှၤပိာ်ခွါခဲလၢာ် သံဝံၤအလီၢ်ခံ စီၤယၤကိာ် အဖိခွါလၢ အဂၤတဖၣ်​ လဲၤဟံးန့ၢ်ဆူၣ်ဝဲ တၢ်လၢအအိၣ်လၢ ဝ့ၢ်ပူၤ မ့ၢ်လၢ ပှၤမၤဟးဂီၤ အဒီပုၢ်ဝဲၢ်မုၣ်​ အသူးသ့ၣ်လၤကပီၤ အဃိလီၤ.+ ၂၈ အဝဲသ့ၣ်​ ဟံးန့ၢ်ဝဲ ပှၤသ့ၣ်တဖၣ်န့ၣ်​ အသိ, အမဲာ်တဲးလဲး, အကျီၢ်, အကသ့ၣ်ယီၤတဖၣ်​ ဒီးကယဲၢ် တၢ်လၢအအိၣ်လၢဝ့ၢ်ပူၤ ဒီးတၢ်လၢအအိၣ်လၢ တၢ်ပျီပူၤလီၤ. ၂၉ တကးဒံးဘၣ်​ အဝဲသ့ၣ်​ ဟံးန့ၢ်ဝဲ ပှၤသ့ၣ်တဖၣ်န့ၣ်​ အတၢ်စုလီၢ်ခီၣ်ခိၣ်ခဲလၢာ် ဒီးဖီၣ်န့ၢ်ဝဲ ပှၤသ့ၣ်တဖၣ်န့ၣ်​ အဖိအမါတဖၣ်​ ဒီးဟံးန့ၢ်ဝဲ တၢ်ခဲလၢာ်လၢ အအိၣ်လၢ ပှၤဟံၣ်ပူၤလီၤ.

၃၀ ဒီးစီၤယၤကိာ် တဲစီၤစူၤမ့းအိၣ်​ ဒီးစီၤလ့ၤဝံလၢ+ “သုဒုးအိၣ်ထီၣ်​ တၢ်ကီတၢ်ခဲဖးဒိၣ်​ လၢယဂီၢ်လံ. လၢသုဃိန့ၣ်​ ပှၤကီၢ်ဖိတဖၣ်​ လၢအမ့ၢ် ပှၤကနၤဧၣ်ဖိ ဒီးပှၤပရးစၤဖိ သးဟ့ယၤလံ. ယပှၤအိၣ်ထဲစှၤဂၤ အဃိ အဝဲသ့ၣ်​ ကပာ်ဖှိၣ်ထီၣ်အသး ဒ်သိးကဒုးယၤအဂီၢ် ဒီးယၤဒီး ယဟံၣ်ဖိဃီဖိတဖၣ်​ ကတုၤလၢ တၢ်ဟးဂီၤလီၤ.” ၃၁ ဘၣ်ဆၣ်​ အဝဲသ့ၣ်​ တဲဝဲလၢ “ပှၤပာ်ပဒီပုၢ်ဝဲၢ်မုၣ်​ ဒ်ပိာ်မုၣ်ဟးဂီၤအသိး မ့ၢ်ကကြၢးဧါ.”

၃၅ လၢခံ ကစၢ်ယွၤတဲဘၣ်​ စီၤယၤကိာ်လၢ “လဲၤလၢ ဘ့ၤသ့လး+ ဒီးအိၣ်ဆိးဖဲန့ၣ်​ ဒီးတ့ထီၣ်​ တၢ်လုၢ်လီၢ် လၢယဂီၢ် ဖဲန့ၣ်တက့ၢ်. ယမ့ၢ် ယွၤလၢအမ့ၢ်အတီတဂၤ လၢအလီၣ်ဖျါထီၣ်အသး လၢနအိၣ်​ ဖဲနဃ့ၢ်ထီၣ်ကွံာ်လၢ နကၠီစီၤဧ့ၡီၤ အအိၣ်အခါလီၤ.”+

၂ ဒီးစီၤယၤကိာ်တဲဘၣ်​ အဟံၣ်ဖိဃီဖိ ဒီးပှၤလၢအအိၣ်ဒီးအီၤ ကိးဂၤဒဲးလၢ “တၢ်ဂီၤတၢ်ဖှီၣ်တဖၣ်​ လၢအအိၣ်ဒီးသုန့ၣ်​ တၢၤကွံာ်အီၤတက့ၢ်.+ မၤကဆှီထီၣ်သုသး ဒီးဆီတလဲ သုတၢ်ကူတၢ်သိးတဖၣ်​ ၃ ဒီးမ်ပလဲၤလၢ ဘ့ၤသ့လးတက့ၢ်. ယကတ့ထီၣ်​ တၢ်လုၢ်လီၢ်ဖဲန့ၣ်တခါ လၢယွၤလၢ အမ့ၢ်အတီတဂၤ အဂီၢ်လီၤ. အဝဲ စံးဆၢယၤဖဲ ယဘၣ်ကီဘၣ်ခဲ အမုၢ်နံၤ ဒီးလၢညါ ဖဲယလဲၤ တပူၤဂ့ၤတပူၤဂ့ၤန့ၣ်​ အဝဲအိၣ်ဒီးယၤလီၤ.”+ ၄ အဃိ အဝဲသ့ၣ်ဟ့ၣ်လီၤ စီၤယၤကိာ်လၢ အတၢ်ဂီၤတၢ်ဖှီၣ်တဖၣ်ခဲလၢာ် ဒီးအနၢ်ဒံးတဖၣ်လၢ အအိၣ်လၢ အဝဲသ့ၣ်​ အနၢ်လိၤလီၤ. ဒီးစီၤယၤကိာ် ခူၣ်လီၤကွံာ် တၢ်သ့ၣ်တဖၣ်အံၤလၢ သ့ၣ်ဖးဒိၣ်​ တထူၣ်အဖီလာ်လီၤ. ဒီးသ့ၣ်တထူၣ်အံၤန့ၣ်​ အိၣ်ဘူးဒီး ဝ့ၢ်ၡက့ၣ်လီၤ.

၅ ဖဲအဝဲသ့ၣ်​ လဲၤတၢ်အခါ တၢ်ပျံၤတၢ်ဖုးလၢ အဟဲလၢ ကစၢ်ယွၤအအိၣ်န့ၣ်​ လီၤဘၣ်လၢ ပှၤဝ့ၢ်ဖိလၢ အအိၣ်ဝးတရံးအဝဲသ့ၣ်​ အလိၤလီၤ. အဃိ ပှၤဝ့ၢ်ဖိသ့ၣ်တဖၣ်အံၤ တလူၤဝဲစီၤယၤကိာ် အဖိခွါတဖၣ်ဘၣ်. ၆ လၢခံ စီၤယၤကိာ် ဒီးပှၤလၢအအိၣ်ဒီးအီၤ ခဲလၢာ်န့ၣ်​ လဲၤတုၤဝဲလၢ ဝ့ၢ်လူးစး+ လၢအမ့ၢ် ဘ့ၤသ့လး လၢအအိၣ်လၢ ကီၢ်ကနၤဧၣ်​ အပူၤန့ၣ်လီၤ. ၇ ဖဲန့ၣ်န့ၣ်​ အဝဲတ့ထီၣ်ဝဲ တၢ်လုၢ်လီၢ်တခါ ဒီးကိးန့ၢ်ဝဲ တၢ်လီၢ်အံၤ အမံၤလၢ အ့လးဘ့ၤသ့လး* မ့ၢ်လၢဖဲန့ၣ်န့ၣ်​ ယွၤလၢအမ့ၢ်အတီတဂၤ လီၣ်ဖျါထီၣ်တ့ၢ်အသး လၢအမဲာ်ညါ ဖဲအဝဲ ဃ့ၢ်ပူၤဖျဲးအသးလၢ အကၠီအအိၣ်အခါန့ၣ်လီၤ.+ ၈ လၢခံ နီၢ်ဒဘိရၤ+ လၢအမ့ၢ် ပှၤလၢအဒုးအီနုၢ် နီၢ်ရံးဘကၤတဂၤန့ၣ်​ သံဝဲ ဒီးဘၣ်တၢ်ခူၣ်လီၤအီၤ ဘူးဒီးဘ့ၤသ့လး လၢသ့ထိးဖၣ်တထူၣ်​ အဖီလာ်လီၤ. အဃိ စီၤယၤကိာ် ကိးန့ၢ်သ့ၣ်တထူၣ်အံၤ အမံၤလၢ အးလိၣ်ဘၤကူာ်လီၤ.

၉ ဖဲစီၤယၤကိာ် ဟးထီၣ်လၢ ပၤဒနါရၣ်အခါ ကစၢ်ယွၤ လီၣ်ဖျါထီၣ်ကဒီး အသးလၢ အမဲာ်ညါ ဒီးဆိၣ်ဂ့ၤအီၤလီၤ. ၁၀ ဒီးကစၢ်ယွၤ တဲအီၤလၢ “နမံၤမ့ၢ် စီၤယၤကိာ်+ ဘၣ်ဆၣ်​ တၢ်တကိးနမံၤလၢ စီၤယၤကိာ်လၢၤဘၣ်. တၢ်ကကိးက့ၤ နမံၤလၢ စီၤအံၣ်စရ့လးလီၤ.” ဒီးအဝဲ စးထီၣ်ကိးအီၤလၢ စီၤအံၣ်စရ့လးလီၤ.+ ၁၁ ကစၢ်ယွၤ ဆဲးတဲအီၤလၢ “ယမ့ၢ်သ့တၢ်လၢာ် ကစၢ်လီၤ.+ သၣ်ထီၣ်​ ဒီးအါထီၣ်ဂီၢ်ထီၣ်တက့ၢ်. ပှၤကလုာ်တဖၣ်​ ဒီးပှၤကလုာ်တဖၣ်​ အတၢ်အိၣ်ဖှိၣ်တဖု ကဟဲလီၤစၢၤလၢနၤ+ ဒီးစီၤပၤတဖၣ်​ ကဟဲလီၤစၢၤလီၤသွဲၣ်​ လၢနၤလီၤ.+ ၁၂ ကီၢ်တဘ့ၣ်လၢ ယဟ့ၣ်လီၤ စီၤအၤဘြၤဟၣ်​ ဒီးစီၤအံၤစဲးန့ၣ်​ ယကဟ့ၣ်လီၤနၤလီၤ. ဒီးယကဟ့ၣ်လီၤစ့ၢ်ကီး ကီၢ်တဘ့ၣ်အံၤလၢ နစၢၤနသွဲၣ်တဖၣ်လီၤ.”+ ၁၃ ဒီးကစၢ်ယွၤ ဟးထီၣ်ကွံာ်လၢ စီၤယၤကိာ်အအိၣ်​ ဖဲတၢ်လီၢ်လၢ အတဲတၢ်ဒီးအီၤန့ၣ်လီၤ.

၁၄ ဒီးစီၤယၤကိာ် ပာ်ဆၢထၢၣ်ဝဲ လၢၢ်ထူၣ်တထူၣ်​ ဖဲတၢ်လီၢ်လၢ ကစၢ်ယွၤ တဲတၢ်ဒီးအီၤန့ၣ်လီၤ. ဒီးစီၤယၤကိာ် လူလီၤဝဲ စပံးထံ ဒီးသိလၢ လၢၢ်ထူၣ်အံၤ အလိၤလီၤ.+ ၁၅ ဒီးတၢ်လီၢ်လၢ ကစၢ်ယွၤ တဲတၢ်ဒီးအီၤန့ၣ်​ စီၤယၤကိာ် ဆဲးကိးဝဲလၢ ဘ့ၤသ့လးလီၤ.+

၁၆ ဒီးအဝဲသ့ၣ်​ ဟးထီၣ်ဝဲလၢ ဘ့ၤသ့လးလီၤ. ဖဲအဝဲသ့ၣ်​ အိၣ်ယံၤဒံးဝဲဒီး အ့ဖရးသးအခါ ဆၢကတီၢ်ဘၣ်လၢ နီၢ်ရၤဃ့လး ကအိၣ်ဖျဲၣ်အဖိ ဒီးအဟုးဆါထီၣ်ဝဲ နးမးလီၤ. ၁၇ ဘၣ်ဆၣ်​ ဖဲအဟုးဆါ နးမးအခါ ပှၤတဂၤလၢ အဒုးအိၣ်ဖျဲၣ်ထီၣ်စၢၤပှၤဖိန့ၣ်​ တဲဘၣ်အီၤလၢ “နကအိၣ်ဖျဲၣ်ထီၣ်​ ဖိခွါလၢ အသီတဂၤအဃိ ပျံၤတၢ်တဂ့ၤ.”+ ၁၈ ဖဲနီၢ်ရၤဃ့လး အသးသမူ ဘူးကဟးထီၣ်အခါ (မ့ၢ်ဒၣ်​ အဘူးထီၣ်လၢ အကသံ) အဝဲကိးန့ၢ်ဝဲ အမံၤလၢ စီၤဘံၣ်အိနံလီၤ. ဘၣ်ဆၣ်​ အပၢ်န့ၣ်​ ကိးန့ၢ်ဝဲအမံၤလၢ စီၤဘံၣ်ယၤမံၣ်လီၤ.+ ၁၉ ဒီးနီၢ်ရၤဃ့လးသံဝဲ ဒီးဘၣ်တၢ်ခူၣ်လီၤအီၤ လၢကျဲလၢ အလဲၤဆူ ဝ့ၢ်အ့ဖရးသးလီၤ. ဝ့ၢ်အံၤမ့ၢ်ဝဲ ဝ့ၢ်ဘ့ၤသလ့ဃ့ၣ်လီၤ.+ ၂၀ စီၤယၤကိာ် ပာ်ဆၢထၢၣ်ဝဲ လၢၢ်ထူၣ်တထူၣ်လၢ နီၢ်ရၤဃ့လး အသွၣ်ခိၣ်​ အဖီခိၣ်​ ဒီးလၢၢ်ထူၣ်အံၤမ့ၢ်ဝဲ နီၢ်ရၤဃ့လး အသွၣ်ခိၣ်​ အလၢၢ်ထူၣ်​ တုၤလၢ မုၢ်မဆါတနံၤအံၤလီၤ.

၂၁ ဖဲန့ၣ်ဝံၤအလီၢ်ခံ စီၤအံၣ်စရ့လး ဟးထီၣ်ဝဲဒီး လဲၤတလၢ ဧ့ဒ့ၢ်အတၢး ဝံၤဒီးသူၣ်လီၤအဒဲလီၤ. ၂၂ ဘၣ်တဘျီ ဖဲစီၤအံၣ်စရ့လး အိၣ်ဝဲလၢ တၢ်လီၢ်ဖဲန့ၣ်အခါ စီၤရူၤဘ့ၣ်​ လဲၤမံဃုာ်ဒီး အပၢ်အသံၣ်မါ နီၢ်ဘံၤလဟၤလီၤ. ဒီးစီၤအံၣ်စရ့လး နၢ်ဟူဘၣ်ဝဲ တၢ်ဂ့ၢ်အံၤလီၤ.+

စီၤယၤကိာ်န့ၣ်​ အဖိခွါအိၣ်ဝဲ ၁၂ ဂၤလီၤ. ၂၃ နီၢ်လ့ၤအၤန့ၣ်​ အိၣ်ဖျဲၣ်ထီၣ်န့ၢ် ဖိခွါတဖၣ်​ လၢစီၤယၤကိာ်အဂီၢ်လီၤ. အဖိခွါဝဲၢ်ကိတဂၤန့ၣ်​ မ့ၢ်ဝဲ စီၤရူၤဘ့ၣ်+ ဒီးအဖိခွါ အဂၤတဖၣ်န့ၣ်​ မ့ၢ်ဝဲ စီၤစူၤမ့းအိၣ်, စီၤလ့ၤဝံ, စီၤယူဒၤ, စီၤယံးစၣ်ကၢ် ဒီးစီၤစဘူလိၣ်လီၤ. ၂၄ နီၢ်ရၤဃ့လး အဖိခွါတဖၣ်​ မ့ၢ်ဝဲ စီၤယိၤသး ဒီးစီၤဘံၣ်ယၤမံၣ်လီၤ. ၂၅ မ့မ့ၢ် နီၢ်ရၤဃ့လး အကုၢ်မုၣ်​ နီၢ်ဘံၤလဟၤန့ၣ်​ အဖိခွါတဖၣ်​ မ့ၢ်ဝဲ စီၤဒၣ်​ ဒီးစီၤနးသၤလံလီၤ. ၂၆ ဒီးနီၢ်လ့ၤအၤ အကုၢ်ပိာ်မုၣ်​ နီၢ်စံၤလပၤ အဖိခွါတဖၣ်​ မ့ၢ်ဝဲ စီၤကး ဒီးစီၤအၤၡ့ၢ်လီၤ. အဝဲသ့ၣ်တဖၣ်န့ၣ်​ မ့ၢ်ဝဲ စီၤယၤကိာ် အဖိခွါတဖၣ်လၢ အအိၣ်ဖျဲၣ်ထီၣ်ဝဲလၢ ပၤဒနါရၣ်အပူၤလီၤ.

၂၇ လၢခံန့ၣ်​ စီၤယၤကိာ် လဲၤတုၤဝဲလၢ အပၢ်စီၤအံၤစဲး အိၣ်တၢ်အလီၢ်လၢအမ့ၢ် မးမရ့+ လၢအဘူးဒီး ကံးရယးအၢ်ဘၤ လၢအမ့ၢ် ဝ့ၢ်ဃ့ဘြိၣ်လီၤ. ဖဲတၢ်လီၢ်ဝဲန့ၣ်န့ၣ်​ စီၤအၤဘြၤဟၣ်​ ဒီးစီၤအံၤစဲး အိၣ်ဆိးတ့ၢ်ဝဲ ဒ်ပှၤထံဂၤကီၢ်ဂၤဖိ အသိးလီၤ.+ ၂၈ စီၤအံၤစဲး အိၣ်မူဘၣ်ဝဲ အနံၣ်​ ၁၈၀ လီၤ.+ ၂၉ ဒီးစီၤအံၤစဲးန့ၣ်​ အိၣ်မူဝဲ ပှဲၤဒီးတၢ်သူၣ်မံသးမုာ် တုၤလၢ အသးပှၢ်ထီၣ်ဖးဒိၣ်​ ဒီးသံဝဲလီၤ. ဒီးအဘၣ်​ တၢ်ပာ်ဖှိၣ်အီၤ ဃုာ်ဒီး အမိၢ်ပၢ်ဖံဖု လၢပျၢၤတဖၣ်လီၤ. ဒီးအဖိခွါ စီၤဧ့ၡီၤ ဒီးစီၤယၤကိာ် ခူၣ်လီၤအီၤလီၤ.+

၃၆ အအံၤမ့ၢ် တၢ်ကွဲးနီၣ်ကွဲးဃါလၢ အဘၣ်ဃးဒီး စီၤဧ့ၡီၤလီၤ. အဝဲမ့ၢ်ဝဲ စီၤအဒိၣ်လီၤ.+

၂ စီၤဧ့ၡီၤ ဟံးန့ၢ်အမါလၢ ပှၤကနၤဧၣ်မုၣ်တဖၣ်​ လၢအမ့ၢ် ပှၤဃ့ၤသးဖိ+ စီၤအ့လိၣ်​ အဖိမုၣ်​ နီၢ်ဧဒၤ+ ဒီးပှၤဃံၤဝံဖိ စီၤစံးဘဧိၣ်​ အလံၤမုၣ်​ လၢအမ့ၢ် စီၤဧနၤ အဖိမုၣ်​ နီၢ်အဟိးလံးဘါမၤ+ ၃ ဒီးစီၤယံးၡမၤဧ့လး အဖိမုၣ်​ နီၢ်ဘၤစမး+ လၢအမ့ၢ် စီၤနဘါယိး အဒီပုၢ်ဝဲၢ်မုၣ်လီၤ.+

၄ စီၤဧ့ၡီၤအမါ နီၢ်ဧဒၤန့ၣ်​ အိၣ်ဖျဲၣ်ထီၣ်ဝဲ စီၤအလံဖးစး ဒီးမ့မ့ၢ် နီၢ်ဘၤစမးန့ၣ်​ အိၣ်ဖျဲၣ်ထီၣ်ဝဲ စီၤရဧူၤအ့လးလီၤ.

၅ ဒီးနီၢ်အဟိးလံးဘါမၤ အိၣ်ဖျဲၣ်ထီၣ်ဝဲ စီၤဧူၡး, စီၤယၤဧလၣ်​ ဒီးစီၤကိၤရးလီၤ.+

အဝဲသ့ၣ်တဖၣ်န့ၣ်​ မ့ၢ်ဝဲ စီၤဧ့ၡီၤ အဖိခွါလၢ အအိၣ်ဖျဲၣ်ထီၣ်လၢ ကီၢ်ကနၤဧၣ်​ အပူၤလီၤ. ၆ လၢခံ စီၤဧ့ၡီၤ ကိးထီၣ်အမါတဖၣ်, အဖိမုၣ်ဖိခွါတဖၣ်, ပှၤလၢ အအိၣ်လၢအဟံၣ်ပူၤ ကိးဂၤဒဲး, အဆၣ်ဖိကီၢ်ဖိခဲလၢာ် ဒီးအတၢ်ထူးတၢ်တီၤလၢ အဒိးန့ၢ်ဘၣ်ဝဲလၢ+ ကီၢ်ကနၤဧၣ်​ အပူၤခဲလၢာ် ဒီးအဝဲလဲၤသုးအသးလၢ ကီၢ်အဂၤတဘ့ၣ်လၢ အယံၤဒီး အပုၢ်စီၤယၤကိာ်လီၤ.+ ၇ မ့ၢ်လၢ အဝဲသ့ၣ်​ အတၢ်ဖိတၢ်လံၤတဖၣ်​ အါထီၣ်​ ဒီးတၢ်လီၢ်လၢ အဝဲသ့ၣ်အိၣ်ဝဲန့ၣ်​ အံၣ်တလၢ လၢအဝဲသ့ၣ်​ အဆၣ်ဖိကီၢ်ဖိအဂီၢ်အဃိ အဝဲသ့ၣ်​ အိၣ်ဝဲတပူၤဃီ တသ့လၢၤဘၣ်. ၈ ဒီးစီၤဧ့ၡီၤ လဲၤအိၣ်ဝဲလၢ စ့ဧၢ်ကစၢၢ်ကလိ အကျါလီၤ.+ စီၤဧ့ၡီၤန့ၣ်​ မ့ၢ်ဝဲ စီၤအဒိၣ်လီၤ.+

၉ အအံၤမ့ၢ် တၢ်ကွဲးနီၣ်ဃာ်လၢ အဘၣ်ဃးဒီး စီၤဧ့ၡီၤလီၤ. ပှၤအဒိၣ်ဖိတဖၣ်​ ဟဲလီၤစၢၤလီၤသွဲၣ်​ လၢအီၤ ဒီးအဝဲသ့ၣ်​ အိၣ်လၢ စ့ဧၢ်ကစၢၢ်ကလိအကျါလီၤ.+

၁၀ အအံၤမ့ၢ် စီၤဧ့ၡီၤ အဖိခွါတဖၣ်​ အမံၤလီၤ. စီၤအလံဖးစးန့ၣ်​ မ့ၢ်ဝဲ စီၤဧ့ၡီၤအမါ နီၢ်ဧဒၤ အဖိခွါ ဒီးစီၤရဧူၤအ့လးန့ၣ်​ မ့ၢ်ဝဲ စီၤဧ့ၡီၤအမါ နီၢ်ဘၤစမး အဖိခွါလီၤ.+

၁၁ စီၤအလံဖးစး အဖိခွါတဖၣ်န့ၣ်​ မ့ၢ်ဝဲ စီၤတ့ၤမၣ်,+ စီၤအိမၢ်, စီၤစဖိၤ, စီၤကၤတၣ်​ ဒီးစီၤကနးစးလီၤ.+ ၁၂ စီၤဧ့ၡီၤအဖိခွါ စီၤအလံဖးစး အသံၣ်မါ* မ့ၢ်ဝဲ နီၢ်တံးမနၤလီၤ. ဒီးနီၢ်တံးမနၤ အိၣ်ဖျဲၣ်ထီၣ်ဝဲ စီၤဧမၤလ့း+ လၢစီၤအလံဖးစး အဂီၢ်လီၤ. အဝဲသ့ၣ်တဖၣ်မ့ၢ်ဝဲ စီၤဧ့ၡီၤအမါ နီၢ်ဧဒၤ အဖိအလံၤတဖၣ်လီၤ.

၁၃ စီၤရဧူၤအ့လး အဖိခွါတဖၣ်​ မ့ၢ်ဝဲ စီၤနၤဃး, စီၤစ့ရၤ, စီၤၡးမၤ ဒီးစီၤမံစၤလီၤ. အဝဲသ့ၣ်တဖၣ်န့ၣ်​ မ့ၢ်ဝဲစီၤဧ့ၡီၤ အမါနီၢ်ဘၤစမး+ အဖိအလံၤတဖၣ်လီၤ.

၁၄ စီၤဧနၤ အဖိမုၣ်​ လၢအမ့ၢ် စီၤစံးဘဧိၣ်​ အလံၤမုၣ်​ နီၢ်အဟိးလံးဘါမၤန့ၣ်​ အိၣ်ဖျဲၣ်ထီၣ်ဝဲ အဖိခွါတဖၣ်​ လၢစီၤဧ့ၡီၤအဂီၢ်လီၤ. စီၤဧ့ၡီၤအမါ နီၢ်အဟိးလံးဘါမၤန့ၣ်​ အိၣ်ဖျဲၣ်ထီၣ်ဝဲ စီၤဧူၡး, စီၤယၤဧလၣ်​ ဒီးစီၤကိၤရးလီၤ.

၁၅ ပှၤခိၣ်ပှၤနၢ်တဖၣ်​ လၢအဟဲလီၤစၢၤလီၤသွဲၣ်​ လၢစီၤဧ့ၡီၤန့ၣ်+ မ့ၢ်ဝဲ စီၤဧ့ၡီၤ အဖိခွါဝဲၢ်ကိ စီၤအလံဖးစး အဖိခွါတဖၣ်လီၤ. အဝဲသ့ၣ်မ့ၢ်ဝဲ စီၤတ့ၤမၣ်, စီၤအိမၢ်, စီၤစဖိၤ, စီၤကနးစး,+ ၁၆ စီၤကိၤရး, စီၤကၤတၣ်​ ဒီးစီၤဧမၤလ့းလီၤ. ပှၤခိၣ်ပှၤနၢ်တဖၣ်အံၤ အိၣ်ဝဲလၢ ကီၢ်အဒိၣ်အပူၤ ဒီးအဝဲသ့ၣ်​ ဟဲလီၤစၢၤလီၤသွဲၣ်လၢ စီၤအလံဖးစးလီၤ.+ ဒီးအဝဲသ့ၣ်မ့ၢ်ဝဲ နီၢ်ဧဒၤ အဖိအလံၤတဖၣ်လီၤ.

၁၇ ပှၤခိၣ်ပှၤနၢ်တဖၣ်​ လၢအဟဲလီၤစၢၤလီၤသွဲၣ်​ လၢစီၤဧ့ၡီၤအဖိခွါ စီၤရဧူၤအ့လးန့ၣ်​ မ့ၢ်ဝဲ စီၤနၤဃး, စီၤစ့ရၤ, စီၤၡးမၤ ဒီးစီၤမံစၤလီၤ. ပှၤခိၣ်ပှၤနၢ်တဖၣ်အံၤ အိၣ်ဝဲလၢ ကီၢ်အဒိၣ်အပူၤ+ ဒီးအဝဲသ့ၣ်​ ဟဲလီၤစၢၤလီၤသွဲၣ်လၢ စီၤရဧူၤအ့လးလီၤ. ဒီးအဝဲသ့ၣ်မ့ၢ်ဝဲ စီၤဧ့ၡီၤအမါ နီၢ်ဘၤစမး အဖိအလံၤတဖၣ်လီၤ.

၁၈ စီၤဧ့ၡီၤအမါ နီၢ်အဟိးလံးဘါမၤ အဖိခွါတဖၣ်န့ၣ်​ မ့ၢ်ဝဲ ပှၤခိၣ်ပှၤနၢ်တဖၣ်​ ဒီးအဝဲသ့ၣ်အမံၤမ့ၢ်ဝဲ စီၤဧူၡး, စီၤယၤဧလၣ်​ ဒီးစီၤကိၤရးလီၤ. ပှၤခိၣ်ပှၤနၢ်တဖၣ်အံၤ ဟဲလီၤစၢၤလီၤသွဲၣ်လၢ စီၤဧ့ၡီၤအမါ နီၢ်အဟိးလံးဘါမၤ လၢအမ့ၢ် စီၤဧနၤ အဖိမုၣ်လီၤ.

၁၉ ပှၤတဖၣ်န့ၣ်​ မ့ၢ်ဝဲ စီၤဧ့ၡီၤ လၢအမ့ၢ် စီၤအဒိၣ်+ အဖိအလံၤတဖၣ်​ ဒီးအဝဲသ့ၣ်​ အပှၤခိၣ်ပှၤနၢ်တဖၣ်လီၤ.

၂၀ ပှၤဃိၢ်ဖိ စီၤစ့ဧၢ် အဖိအလံၤတဖၣ်​ လၢအမ့ၢ် ပှၤလၢအအိၣ်ဆိး ပာ်စၢၤလၢ ကီၢ်ပူၤန့ၣ်+ မ့ၢ်ဝဲ စီၤလိတၣ်, စီၤၡိဘလး, စီၤစံးဘဧိၣ်, စီၤဧနၤ,+ ၂၁ စီၤဒံၡ, စီၤဧ့စ့ၢ် ဒီးစီၤဒံၡၣ်လီၤ.+ ပှၤတဖၣ်န့ၣ်​ မ့ၢ်ဝဲပှၤဃိၢ်ဖိ အခိၣ်အနၢ်တဖၣ်လၢ အအိၣ်ဝဲလၢ ကီၢ်အဒိၣ်အပူၤ ဒီးအဝဲသ့ၣ်​ ဟဲလီၤစၢၤလီၤသွဲၣ်လၢ စီၤစ့ဧၢ်လီၤ.

၂၂ စီၤလိတၣ်​ အဖိခွါတဖၣ်န့ၣ်​ မ့ၢ်ဝဲ စီၤဃိရံၤ ဒီးစီၤဟ့ၣ်မၣ်လီၤ. စီၤလိတၣ် အဒီပုၢ်ဝဲၢ်မုၣ်န့ၣ်​ မ့ၢ်ဝဲ နီၢ်တံးမနၤလီၤ.+

၂၃ စီၤၡိဘလး အဖိခွါတဖၣ်န့ၣ်​ မ့ၢ်ဝဲ စီၤဧးလဝၣ်, စီၤမနၤဃး, စီၤဧ့ၤဘါလး, စီၤၡဖိၤ ဒီးစီၤအိၣ်နၣ်လီၤ.

၂၄ စီၤစံးဘဧိၣ်​ အဖိခွါတဖၣ်န့ၣ်+ မ့ၢ်ဝဲ စီၤအၤယၤ ဒီးစီၤဧနၤလီၤ. စီၤဧနၤန့ၣ်​ ထံၣ်န့ၢ်ဝဲ ထံကိၢ်အထံထီၣ်ပၢၢ် လၢပှၢ်မုၢ်ကနၢ ဖဲအကွၢ်ဝဲ အပၢ်စီၤစံးဘဧိၣ်​ အကသ့ၣ်ယီၤတဖၣ်​ အခါလီၤ.

၂၅ စီၤဧနၤ အဖိတဖၣ်န့ၣ်​ မ့ၢ်ဝဲ စီၤဒံၡ ဒီးနီၢ်အဟိးလံးဘါမၤလီၤ.

၂၆ စီၤဒံၡ အဖိခွါတဖၣ်န့ၣ်​ မ့ၢ်ဝဲ စီၤဃ့းမဒၣ်, စီၤအ့းၡဘၣ်, စီၤယံးသရၣ်​ ဒီးစီၤကရၣ်လီၤ.+

၂၇ စီၤဧ့စ့ၢ် အဖိခွါတဖၣ်န့ၣ်​ မ့ၢ်ဝဲ စီၤဘံးလဟၣ်, စီၤစၤဧဝၣ်​ ဒီးစီၤယၤဧကၣ်လီၤ.

၂၈ စီၤဒံၡၣ်​ အဖိခွါတဖၣ်န့ၣ်​ မ့ၢ်ဝဲ စီၤဧူစး ဒီးစီၤအၤရၣ်လီၤ.+

၂၉ ပှၤဃိၢ်ဖိ အခိၣ်အနၢ်တဖၣ်န့ၣ်​ မ့ၢ်ဝဲ စီၤလိတၣ်, စီၤၡိဘလး, စီၤစံးဘဧိၣ်, စီၤဧနၤ, ၃၀ စီၤဒံၡ, စီၤဧ့စ့ၢ် ဒီးစီၤဒံၡၣ်လီၤ.+ အဝဲသ့ၣ်တဖၣ်န့ၣ်​ မ့ၢ်ဝဲ ပှၤဃိၢ်ဖိ အခိၣ်အနၢ်တဖၣ်လၢ အအိၣ်လၢ စ့ဧၢ်အပူၤလီၤ.

၃၁ တချုးလၢ ပှၤအံၣ်စရ့လးဖိတဖၣ်​ အစီၤပၤ အိၣ်ထီၣ်ဒံးဘၣ်အခါ+ စီၤပၤတဖၣ်​ ပၢတၢ်လၢ ကီၢ်အဒိၣ်+ အပူၤလီၤ. ၃၂ စီၤဘဧိၢ် အဖိခွါ စီၤဘ့လၤန့ၣ်​ ပၢတၢ်လၢ ကီၢ်အဒိၣ်လီၤ. ဒီးအဝ့ၢ်အမံၤ မ့ၢ်ဝဲ ဝ့ၢ်ဒံးနဟးဘၤလီၤ. ၃၃ ဖဲစီၤဘ့လၤ သံဝဲအခါ စီၤစ့ရၤ အဖိခွါ စီၤယိၤဘာ် လၢအအိၣ်ဟဲလၢ ဝ့ၢ်ဘိးစရၤန့ၣ်​ ပၢတၢ်လၢ စီၤဘ့လၤ အလီၢ်လီၤ. ၃၄ ဖဲစီၤယိၤဘာ် သံဝဲအခါ စီၤဃူၡၣ်​ လၢအအိၣ်ဟဲလၢ ပှၤတ့ၤမၣ်ဖိအကီၢ်န့ၣ်​ ပၢတၢ်လၢ စီၤယိၤဘာ် အလီၢ်လီၤ. ၃၅ ဖဲစီၤဃူၡၣ်​ သံဝဲအခါ စီၤဘဒး အဖိခွါ စီၤဃဒၢ် လၢအမၤနၢၤဝဲ ပှၤမံးဒယၣ်ဖိလၢ+ မိၤအးအဟီၣ်ကဝီၤန့ၣ်​ ပၢက့ၤတၢ်လၢ စီၤဃူၡၣ်​ အလီၢ်လီၤ. ဒီးအဝ့ၢ်အမံၤ မ့ၢ်ဝဲ ဝ့ၢ်ဧဝံးလီၤ. ၃၆ ဖဲစီၤဃဒၢ် သံအခါ စီၤစးမလၤလၢ အအိၣ်ဟဲလၢ မးစရ့ကၤန့ၣ်​ ပၢတၢ်လၢ စီၤဃဒၢ် အလီၢ်လီၤ. ၃၇ ဖဲစီၤစးမလၤ သံအခါ စီၤၡီအူး လၢအအိၣ်ဟဲလၢ ဝ့ၢ်ရဃိဘိး လၢထံကျိအနံၤန့ၣ်​ ပၢတၢ်လၢ စီၤစးမလၤ အလီၢ်လီၤ. ၃၈ ဖဲစီၤၡီအူး သံအခါ စီၤဧးကဘိၢ် အဖိခွါ စီၤဘဧၤလဃါနၣ်​ ပၢတၢ်လၢ စီၤၡီအူး အလီၢ်လီၤ. ၃၉ ဖဲစီၤဧးကဘိၢ် အဖိခွါ စီၤဘဧၤလဃါနၣ်​ သံအခါ စီၤဃဒါ ပၢတၢ်လၢ စီၤဘဧၤလဃါနၣ်​ အလီၢ်လီၤ. ဒီးအဝ့ၢ်အမံၤ မ့ၢ်ဝဲ ဝ့ၢ်ဖၤဧူၤ ဒီးအမါ အမံၤမ့ၢ်ဝဲ နီၢ်မဟ့တးဘးအ့လးလီၤ. ဒီးနီၢ်မဟ့တးဘးအ့လးန့ၣ်​ မ့ၢ်ဝဲ နီၢ်မးတရ့း အဖိမုၣ်​ ဒီးမ့စဟး အလံၤမုၣ်လီၤ.

၄၀ ပှၤခိၣ်ပှၤနၢ် လၢအဟဲလီၤစၢၤလၢ စီၤဧ့ၡီၤ ဒ်အနီၢ်ကစၢ် အဒူၣ်ဖိထၢဖိ ဒီးဒ်အနီၢ်ကစၢ် အတၢ်လီၢ်တၢ်ကျဲ အိၣ်ဝဲအသိးန့ၣ်​ အမံၤမ့ၢ်ဝဲ စီၤတံးမနၤ, စီၤဧးလဝၣ်, စီၤယသ့း,+ ၄၁ စီၤအဟိးလံးဘါမၤ, စီၤအ့လၤ, စီၤပံနိၣ်, ၄၂ စီၤကနးစး, စီၤတ့ၤမၣ်, စီၤမံးဘစၢ်, ၄၃ စီၤမးကဒံအ့လး ဒီးစီၤဧံရၣ်လီၤ. ပှၤတဖၣ်န့ၣ်​ မ့ၢ်ပှၤအဒိၣ်ဖိ အပှၤခိၣ်ပှၢ်နၢ်တဖၣ်​ ဒ်အဝဲသ့ၣ်​ အနီၢ်ကစၢ် အဟီၣ်ကဝီၤလၢ အဒိးန့ၢ်ဘၣ်ဝဲ အသိးလီၤ.+ အဝဲန့ၣ်မ့ၢ် စီၤဧ့ၡီၤ အစၢၤအသွဲၣ်တဖၣ်​ လၢအမ့ၢ် ပှၤအဒိၣ်ဖိလီၤ.+

၃၇ စီၤယၤကိာ် ဆဲးအိၣ်ဝဲလၢ ကီၢ်ကနၤဧၣ်အပူၤ လၢအမ့ၢ် တၢ်လီၢ်လၢ အပၢ်အိၣ်တမှံၤဝဲ ဒ်ပှၤထံဂၤကီၢ်ဂၤဖိ အသိးန့ၣ်လီၤ.+

၂ အဝဲအံၤမ့ၢ် တၢ်ကွဲးနီၣ်ဃာ်လၢ အဘၣ်ဃးဒီး စီၤယၤကိာ် အဟံၣ်ဖိဃီဖိလီၤ.*

ဖဲပှၤပိာ်ခွါသးစၢ် စီၤယိၤသး+ အသးနံၣ်အိၣ်ဝဲ ၁၇ နံၣ်အခါ အဝဲကွၢ်သိ+ ဃုာ်ဒီး အဒီပုၢ်ဝဲၢ်တဖၣ်​ လၢအမ့ၢ် အပၢ်အမါ နီၢ်ဘံၤလဟၤ+ ဒီးနီၢ်စံၤလပၤ+ အဖိခွါတဖၣ်လီၤ. ဒီးစီၤယိၤသး ဟဲက့ၤတဲဘၣ်အပၢ် ဘၣ်ဃးဒီး တၢ်အၢတၢ်သီလၢ အဒီပုၢ်ဝဲၢ်တဖၣ်​ မၤဝဲအဂ့ၢ်လီၤ. ၃ ဒီးစီၤအံၣ်စရ့လး အဲၣ်စီၤယိၤသး ဒိၣ်န့ၢ်ဒံး အဖိခွါအဂၤခဲလၢာ်+ မ့ၢ်လၢ အဒိးန့ၢ်ဘၣ်​ အဖိခွါ စီၤယိၤသး ဖဲအသးပှၢ် အဆၢကတီၢ်အဃိလီၤ. ဒီးအဝဲမၤန့ၢ် ဆ့ဖးထီ လီၤဆီတဘ့ၣ်​ လၢစီၤယိၤသး အဂီၢ်လီၤ. ၄ ဖဲအဒီပုၢ်ဝဲၢ်ခွါတဖၣ်​ ထံၣ်ဝဲလၢ အပၢ်အဲၣ်အီၤ ဒိၣ်န့ၢ်အအဲၣ်​ အဝဲသ့ၣ်ခဲလၢာ်အခါ အဝဲသ့ၣ်​ သးဟ့အီၤ ဒီးတဲတၢ်ဒီးအီၤမုာ်မုာ် တကဲလၢၤဘၣ်.

၅ ဒီးလၢခံ စီၤယိၤသး မံမီၢ်တၢ်မံမီၢ်တခါလီၤ. ဒီးအဝဲတဲဘၣ်​ အဒီပုၢ်ဝဲၢ်ခွါတဖၣ်လၢ အတၢ်မံမီၢ် အဃိ+ အဝဲသ့ၣ်​ သးဟ့အီၤ အါန့ၢ်ဒံးလၢညါလီၤ. ၆ စီၤယိၤသး တဲဘၣ်အဝဲသ့ၣ်လၢ “ဝံသးစူၤ ဒိကနၣ်​ တၢ်မံမီၢ် လၢယမံမီၢ်အီၤမီၤ. ၇ ဖဲပစၢကဒိၣ်ထီၣ်​ ဘုလၢစံာ်ပျီပူၤအခါ ယဘုကဒိၣ်​ ဝံၢ်ထီၣ်အသး ဒီးအိၣ်ဆၢထၢၣ်ဝဲဘျၢဘျၢလီၤ. ဖဲန့ၣ်အခါ သုဘုကဒိၣ်တဖၣ်န့ၣ်​ အိၣ်ဝးတရံးဝဲ ယဘုကဒိၣ်​ ဒီးတကူးလီၤအသး လၢယဘုကဒိၣ်​ အမဲာ်ညါလီၤ.”+ ၈ မ့ၢ်လၢ စီၤယိၤသး အတၢ်မံမီၢ် ဒီးတၢ်လၢ အတဲဝဲတဖၣ်အဃိ အဒီပုၢ်ဝဲၢ်ခွါတဖၣ်​ သးဟ့အီၤ နးန့ၢ်ဒံးလၢညါ ဒီးတဲအီၤလၢ “နအဲၣ်ဒိးတဲလၢ နကကဲစီၤပၤ လၢပဖီခိၣ်​ ဒီးပၢပှၤ အနီၢ်ကီၢ်ဧီၤ.”+

၉ လၢခံ စီၤယိၤသး မံမီၢ်တၢ်မံမီၢ်အဂၤတခါ ဒီးတဲဘၣ်​ အဒီပုၢ်ဝဲၢ်ခွါတဖၣ်လၢ “ယမံမီၢ် တၢ်မံမီၢ်တခါဒံး. တဘျီအံၤ မုၢ်, လါ ဒီးဆၣ်​ ၁၁ ဖျၢၣ်​ ထိၣ်လီၤပှီၤအသး လၢယမဲာ်ညါလီၤ.”+ ၁၀ ဒီးစီၤယိၤသး တဲဘၣ်အပၢ် ဒီးအဒီပုၢ်ဝဲၢ်ခွါတဖၣ်​ လၢအတၢ်မံမီၢ်လီၤ. ဒီးအပၢ်သိၣ်အီၤ ဒီးတဲအီၤလၢ “နတၢ်မံမီၢ်တခါအံၤ အခီပညီ ဒ်လဲၣ်. ယၤ ဒီးနမိၢ် ဒီးနဒီပုၢ်ဝဲၢ်ခွါတဖၣ်န့ၣ်​ မ့ၢ်ပကဟဲထိၣ်လီၤပှီၤပသး လၢနမဲာ်ညါ နီၢ်ကီၢ်ဧါ.” ၁၁ အဃိ အဒီပုၢ်ဝဲၢ်ခွါတဖၣ်​ သးက့ၣ်အီၤ+ ဘၣ်ဆၣ်​ တၢ်လၢစီၤယိၤသး တဲဝဲတဖၣ်န့ၣ်​ အပၢ်တိၢ်နီၣ်ဃာ်ဝဲ လၢအသးပူၤလီၤ.

၁၂ စီၤယိၤသး အဒီပုၢ်ဝဲၢ်ခွါတဖၣ်​ လဲၤကွၢ်ဝဲ အပၢ်အသိလၢ အဘူးဒီး ဝ့ၢ်ၡက့ၣ်လီၤ.+ ၁၃ လၢခံ စီၤအံၣ်စရ့လး တဲဘၣ်စီၤယိၤသးလၢ “နကၠီသ့ၣ်တဖၣ်​ လဲၤကွၢ်သိလၢ အဘူးဒီးဝ့ၢ်ၡက့ၣ်, တမ့ၢ်ဧီၤ. ဟဲလၢအံၤ, ယကမၢနလဲၤ လၢအဝဲသ့ၣ်အအိၣ်လီၤ.” ဒီးစီၤယိၤသး တဲဆၢအီၤလၢ “မ့ၢ်, ယကလဲၤလီၤ.” ၁၄ အဃိ စီၤအံၣ်စရ့လး တဲအီၤလၢ “မ့ၢ်နကၠီတဖၣ်​ အိၣ်ဆူၣ်အိၣ်ချ့ဧါ ဒီးသိတဖၣ်​ မၤသးဒ်လဲၣ်န့ၣ်​ ဝံသးစူၤ လဲၤကွၢ် ဒီးဟဲက့ၤတဲဘၣ်ယၤနီၤ.” ဒီးအဝဲမၢ စီၤယိၤသး ဟးထီၣ်လၢဃ့ဘြိၣ်​ အတၢ်တြီၤပူၤ+ ဒီးစီၤယိၤသးန့ၣ်​ ဟးထီၣ်ဝဲ ဒီးလဲၤလၢဝ့ၢ်ၡက့ၣ်​ တခီလီၤ. ၁၅ လၢခံ ဖဲပှၤတဂၤ ထံၣ်ဝဲ စီၤယိၤသး ဟးဝ့ၤဝီၤ လၢတၢ်ပျီပူၤအခါ အဝဲသံကွၢ်အီၤလၢ “နဟးဃု တၢ်မနုၤလဲၣ်.” ၁၆ စီၤယိၤသး တဲအီၤလၢ “ယဟးဃု ယဒီပုၢ်ဝဲၢ်ခွါတဖၣ်လီၤ. အဝဲသ့ၣ်​ ကွၢ်သိဖဲလဲၣ်န့ၣ်​ ဝံသးစူၤ တဲယၤမီၤ.” ၁၇ ဒီးပှၤတဂၤန့ၣ်​ တဲဝဲလၢ “အဝဲသ့ၣ်​ ဟးထီၣ်ဖဲအံၤလံ. ဒီးယနၢ်ဟူ အဝဲသ့ၣ်​ တဲဝဲလၢ ‘ပကလဲၤလၢ ဝ့ၢ်ဒိၤသၣ်လီၤ.’” အဃိ စီၤယိၤသးစ့ၢ်ကီး လဲၤလူၤပိာ် အဒီပုၢ်ဝဲၢ်ခွါတဖၣ်အခံ ဒီးထံၣ်အဝဲသ့ၣ်လၢ ဝ့ၢ်ဒိၤသၣ်လီၤ.

၁၈ အဝဲသ့ၣ်​ ထံၣ်စိဃီၤ စီၤယိၤသးလၢအယံၤ ဒီးတချုးအဟဲတုၤလၢ အဝဲသ့ၣ်​ အအိၣ်ဒံးဘၣ်န့ၣ်​ အဝဲသ့ၣ်စးထီၣ်​ ကူၣ်ထီၣ်ဖးလီၤဝဲလၢ ကမၤသံအီၤလီၤ. ၁၉ အဃိ အဝဲသ့ၣ်​ တဲလိာ်အသး တဂၤဒီးတဂၤလၢ “ကွၢ်လၢန့ၣ်, တၢ်မံမီၢ်ကစၢ် ဟဲလံ.+ ၂၀ အဃိ ဟဲသၢၤ. ပကမၤသံအီၤ ဒီးကွံာ်လီၤအီၤလၢ တၢ်ပူၤလီၤ. ဒီးပကတဲလၢ ဆၣ်ဖိကီၢ်ဖိ အမံၤတဒု အီၣ်ကွံာ်အီၤ ဒီးအတၢ်မံမီၢ်တဖၣ်​ ကမၤအသးဒ်လဲၣ်န့ၣ်​ ပကကွၢ်သၢၤ.” ၂၁ ဖဲစီၤရူၤဘ့ၣ်+ နၢ်ဟူဘၣ်ဝဲ ဒ်န့ၣ်အခါ အဝဲဂုာ်ကျဲးစၢး မၤပူၤဖျဲး စီၤယိၤသးလၢ အဝဲသ့ၣ်​ အစုပူၤလီၤ. စီၤရူၤဘ့ၣ်​ တဲဝဲလၢ “ပတဘၣ်မၤသံအီၤဘၣ်.”+ ၂၂ ဒီးစီၤရူၤဘ့ၣ်​ တဲအဝဲသ့ၣ်လၢ “တဘၣ်လူလီၤ တၢ်သွံၣ်တဂ့ၤ.+ ကွံာ်လီၤအီၤလၢ တၢ်ပူၤလၢ အအိၣ်လၢ ပှၢ်မုၢ်ကနၢ န့ၣ်တက့ၢ်. ဘၣ်ဆၣ်​ တဘၣ်မၤဘၣ်ဒိအီၤ တဂ့ၤ.”+ စီၤရူၤဘ့ၣ်​ အတၢ်တိာ်ပာ်န့ၣ်​ မ့ၢ်ဒ်သိး ကမၤပူၤဖျဲးဝဲ စီၤယိၤသး လၢအဝဲသ့ၣ်​ အစုပူၤ ဒီးက့ၤဆှၢက့ၤအီၤလၢ အပၢ်အအိၣ်လီၤ.

၂၃ ဖဲစီၤယိၤသး ဟဲတုၤလၢ အဒီပုၢ်ဝဲၢ်ခွါတဖၣ်​ အအိၣ်အခါ တဘျီဃီန့ၣ်​ အဝဲသ့ၣ်​ ဘ့ၣ်လီၤကွံာ် စီၤယိၤသး အဆ့ကၤဖးထီ လီၤဆီတဘ့ၣ်​ လၢအသိးဝဲန့ၣ်လီၤ.+ ၂၄ ဒီးအဝဲသ့ၣ်​ ဖီၣ်န့ၢ်စီၤယိၤသး ဒီးကွံာ်လီၤအီၤလၢ တၢ်ပူၤလီၤ. ဖဲန့ၣ်အဆၢကတီၢ် တၢ်ပူၤအံၤန့ၣ်​ ထံတအိၣ်လၢအပူၤဘၣ်.

၂၅ ဝံၤဒီး အဝဲသ့ၣ်​ ဆ့ၣ်နီၤအီၣ်တၢ်လီၤ. ဖဲအဝဲသ့ၣ်​ ကွၢ်ထီၣ်တၢ်အခါ ထံၣ်ဝဲ ပှၤယံးၡမၤဧ့လးဖိတဒူၣ်လၢ+ အအိၣ်ဟဲလၢ ကံးလဧး အဟီၣ်ကဝီၤန့ၣ်​ ဟဲဝဲလီၤ. အဝဲသ့ၣ်​ အကီၤလၤအူးတဖၣ်​ တီၣ်ဝဲသ့ၣ်အထုးတဖၣ်+ လၢအမ့ၢ်တၢ်နၢမူနၢဆှီ ဒီးကသံၣ်ကသီ* ဒီးအဝဲသ့ၣ်​ ကလဲၤဝဲလၢ ကီၢ်အဲၤကူပတူးလီၤ. ၂၆ ဒီးဖဲန့ၣ်​ စီၤယူဒၤတဲဘၣ်​ အဒီပုၢ်ဝဲၢ်ခွါတဖၣ်လၢ “ပမ့ၢ်မၤသံ ပပုၢ် ဒီးကျၢၢ်ဘၢ အသွံၣ်န့ၣ်​ မ့ၢ်အဘျုးကအိၣ်​ ဒ်လဲၣ်.+ ၂၇ ဟဲသၢၤ. ပကဆါလီၤအီၤလၢ+ ပှၤယံးၡမၤဧ့လးတဖၣ်အအိၣ်​ ဘၣ်ဆၣ်​ မၤဘၣ်ဒိအီၤတဂ့ၤ. အဝဲမ့ၢ် ပဒီပုၢ်ဝဲၢ်ခွါ, ပသွံၣ်ထံဖံးညၣ်လီၤ.” ဒီးအဒီပုၢ်ဝဲၢ်တဖၣ်န့ၣ်​ ဒိကနၣ်အီၤလီၤ. ၂၈ ဒီးဖဲပှၤမံးဒယၣ်ဖိလၢ+ အပနံာ်တၢ်ကၤတၢ်တဖၣ်​ ဟဲဝဲဖဲန့ၣ်အခါ စီၤယိၤသး အဒီပုၢ်ဝဲၢ်တဖၣ်​ ထုးထီၣ်ဝဲ စီၤယိၤသး လၢတၢ်ပူၤ ဒီးဆါလီၤကွံာ်အီၤ လၢပှၤယံးၡမၤဧ့လးဖိအအိၣ်​ လၢစ့ညၣ်အဘ့ၣ်​ ၂၀ လီၤ.+ ဒီးပှၤသ့ၣ်တဖၣ်န့ၣ်​ လဲၤကိးဝဲ စီၤယိၤသး လၢကီၢ်အဲၤကူပတူးလီၤ.

၂၉ လၢခံ စီၤရူၤဘ့ၣ်န့ၣ်​ က့ၤကဒါက့ၤ လၢတၢ်ပူၤ ဒီးဖဲအဝဲ တထံၣ်​ စီၤယိၤသးအိၣ်လၢ တၢ်ပူၤလၢၤဘၣ်အခါ အဝဲဖှီညာ်ဝဲ အနီၢ်ကစၢ် အဆ့ကၤလီၤ. ၃၀ ဖဲအက့ၤတုၤလၢ အဒီပုၢ်ဝဲၢ်တဖၣ်​ အအိၣ်အခါ အတဲဝဲလၢ “ပပုၢ်လီၤမၢ်လံ. ယၤဒု ယကဘၣ်​ မၤဒ်လဲၣ်.”

၃၁ အဃိ အဝဲသ့ၣ်​ ဟံးန့ၢ်ဝဲ စီၤယိၤသး အဆ့ကၤဖးထီ ဒီးမၤသံဝဲ မဲာ်တဲးလဲးဖါတဒု ဒီးစုၣ်လီၤဝဲ ဆ့ကၤဖးထီတဘ့ၣ်အံၤ လၢတၢ်သွံၣ်အကျါလီၤ. ၃၂ အဝဲသ့ၣ်​ ဆှၢလီၤဆ့ကၤဖးထီ လီၤဆီတဘ့ၣ်အံၤ လၢအပၢ်အအိၣ်​ ဒီးတဲဝဲလၢ “ပထံၣ်န့ၢ် ဆ့ကၤတဘ့ၣ်အံၤလီၤ. မ့ၢ်အကဲ နဖိခွါ အဆ့ကၤဧါ တကဲဘၣ်ဧါန့ၣ်​ ဝံသးစူၤ ကွၢ်ထံအီၤမီၤ.”+ ၃၃ ဒီးစီၤယၤကိာ် ကွၢ်ထံဝဲ ဆ့ကၤတဘ့ၣ်အံၤ ဒီးတဲဝဲလၢ “အဝဲအံၤမ့ၢ် ယဖိခွါ အဆ့ကၤဖးထီတဘ့ၣ်လီၤ. ဆၣ်ဖိကီၢ်ဖိ အမံၤတဒု အီၣ်ကွံာ်အီၤလံ. ဒီးစီၤယိၤသး ဘၣ်တၢ်အ့ၣ်ဖှီအီၤ လီၤတံၢ်လံ.” ၃၄ အဃိ စီၤယၤကိာ်န့ၣ်​ ဖှီညာ်ဝဲအနီၢ်ကစၢ်အဆ့ကၤ ဒီးကူထီၣ်ဝဲ ထၢၣ်တၢ်ကံးညာ်* လၢအယီၢ်ဒ့ ဒီးသးအုးဝဲလၢ အဖိခွါအဃိ အါနံၤအါသီလီၤ. ၃၅ ဒီးအဖိမုၣ်ဖိခွါခဲလၢာ် ဂုာ်ကျဲးစၢး မၤမုာ်ထီၣ်အသး ဘၣ်ဆၣ်​ အဝဲတအဲၣ်​ ပှၤမၤမုာ်ထီၣ်က့ၤအီၤဘၣ်. ဒီးအတဲဝဲလၢ “ယကသးအုးလၢ ယဖိခွါအဃိ တုၤလၢ ယလဲၤလီၤလၢ တၢ်သွၣ်ခိၣ်အပူၤလီၤ.”*+ ဒီးအပၢ် ဆဲးဟီၣ်ဝဲလၢ အဃိလီၤ.

၃၆ ဒီးပှၤမံးဒယၣ်ဖိတဖၣ်န့ၣ်​ ဆါလီၤကွံာ် စီၤယိၤသးလၢ ကီၢ်အဲၤကူပတူးအပူၤ ဆူစီၤပိၤတံၤဖၢ် အအိၣ်လီၤ. စီၤပိၤတံၤဖၢ်န့ၣ်​ မ့ၢ်ဝဲဖၤရိၤ အပဒိၣ်တဂၤ+ ဒီးပှၤခိးတၢ်ဖိ အခိၣ်တဂၤလီၤ.+

၃၈ ဖဲန့ၣ်ဝံၤအလီၢ်ခံ စီၤယူဒၤ ဟးထီၣ်ကွံာ် လၢအဒီပုၢ်ဝဲၢ်ခွါတဖၣ်အအိၣ်​ ဒီးသူၣ်ဝဲအဒဲ ဘူးဒီး ပှၤဧဒူးလၣ်ဖိတဂၤ လၢအမံၤမ့ၢ် စီၤဃံရၤလီၤ. ၂ စီၤယူဒၤ ထံၣ်ဘၣ်ဝဲ ပှၤကနၤဧၣ်ဖိ+ စီၤၡူဧၤ အဖိမုၣ်​ ဖဲန့ၣ်လီၤ. ဒီးအဝဲဟံးန့ၢ်အီၤ ဒီးမံဃုာ်အိၣ်ဃုာ်ဒီးအီၤလီၤ. ၃ ဒီးပိာ်မုၣ်အံၤ ဒၢထီၣ်ဝဲ ဒီးအိၣ်ဖျဲၣ်ထီၣ်န့ၢ် အဖိခွါတဂၤ ဒီးစီၤယူဒၤ ကိးန့ၢ်ဝဲ အမံၤလၢ စီၤအ့ၢ်လီၤ.+ ၄ ဒီးအဝဲဒၢထီၣ်ကဒီးဝဲ ဒီးအိၣ်ဖျဲၣ်ထီၣ်ဝဲ ဖိခွါတဂၤ ဒီးကိးန့ၢ်ဝဲအမံၤလၢ စီၤအိၤနၣ်လီၤ. ၅ ဒီးအဝဲ အိၣ်ဖျဲၣ်ထီၣ်ကဒီး အဖိခွါအဂၤတဂၤ ဒီးကိးန့ၢ်ဝဲအမံၤလၢ စီၤစ့ၤလါလီၤ. ဖဲအဝဲအိၣ်ဖျဲၣ်ထီၣ်​ စီၤစ့ၤလါအခါ စီၤယူဒၤန့ၣ်​ အိၣ်လၢ ဝ့ၢ်အၤကစံာ်လီၤ.+

၆ လၢခံ စီၤယူဒၤ ဃုန့ၢ်ဝဲ အဖိခွါဝဲၢ်ကိ စီၤအ့ၢ် အမါ ဒီးအမံၤမ့ၢ်ဝဲ နီၢ်တၤမၢ်လီၤ.+ ၇ ဘၣ်ဆၣ်​ ယဟိဝၤယွၤ တဘၣ်သူၣ်ဘၣ်သး စီၤယူဒၤ အဖိခွါဝဲၢ်ကိ စီၤအ့ၢ်ဘၣ်အဃိ ယဟိဝၤယွၤ မၤသံအီၤလီၤ. ၈ လၢတၢ်န့ၣ်အဃိ စီၤယူဒၤတဲဘၣ်​ စီၤအိၤနၣ်လၢ “ဟံးန့ၢ် နကၠီလၢအသံဝဲတဂၤ အမါ ဒီးမံဃုာ်အီၤ ဒ်သိး နကၠီအစၢၤအသွဲၣ်​ ကဟဲအိၣ်ထီၣ်​ ခီဖျိလၢ နၤတက့ၢ်.”+ ၉ ဘၣ်ဆၣ်​ စီၤအိၤနၣ်န့ၣ်​ သ့ၣ်ညါဝဲလၢ တမ့ၢ်လၢ တၢ်ကပာ်ပနီၣ်​ ဖိသၣ်တဖၣ်အံၤ လၢအဖိဘၣ်.+ အဃိ ဒ်သိး အသုတဒုးအိၣ်ထီၣ်န့ၢ် အကၠီအဖိတဂ့ၤအဂီၢ် ဖဲအဝဲမံဃုာ်အိၣ်ဃုာ်ဒီး အကၠီအမါအခါ အဝဲဒုးဟးထီၣ်ကွံာ် ပိာ်ခွါအချံအသၣ်​ အထံလၢ ဟီၣ်ခိၣ်အလိၤလီၤ.+ ၁၀ တၢ်လၢ စီၤအိၤနၣ်မၤဝဲန့ၣ်​ မ့ၢ်တၢ်အၢလၢ ယဟိဝၤယွၤ အမဲာ်ညါအဃိ ကစၢ်ယွၤ မၤသံကွံာ်အီၤ စ့ၢ်ကီးလီၤ.+ ၁၁ ဒီးစီၤယူဒၤ တဲဘၣ်​ အဒဲၣ်မုၣ်​ နီၢ်တၤမၢ်လၢ “အိၣ်မုၣ်ကမဲလၢ နပၢ်အဟံၣ်ပူၤ တုၤလီၤလၢ ယဖိခွါ စီၤစ့ၤလါ ဒိၣ်ထီၣ်တက့ၢ်.” စီၤယူဒၤ တဲဝဲဒ်န့ၣ်န့ၣ်​ မ့ၢ်လၢ အဘၣ်ယိၣ်တၢ်လၢ အဖိခွါ စီၤစ့ၤလါစ့ၢ်ကီး ကသံဘၣ်ဖုး ဒ်အကၠီတဖၣ်အသိး အဃိလီၤ.+ အဃိ နီၢ်တၤမၢ်န့ၣ်​ က့ၤအိၣ်ဝဲလၢ အပၢ်အဟံၣ်လီၤ.

၁၂ လၢခံ စီၤယူဒၤအမါ လၢအမ့ၢ် စီၤၡူဧၤ+ အဖိမုၣ်န့ၣ်​ သံဝဲလီၤ. အဃိ စီၤယူဒၤ သးအုးဝဲလၢ အဃိ တုၤလၢ တၢ်ဆၢကတီၢ် ပှဲၤထီၣ်တစုလီၤ. လၢခံ အဝဲလဲၤဒီး အသကိး ပှၤဧဒူးလၣ်ဖိ+ စီၤဃံရၤ ဆူဝ့ၢ်တံးမနး+ လၢအပှၤတံာ်သိဆူၣ်တဖၣ်​ အအိၣ်လီၤ. ၁၃ ဒီးပှၤတဲဘၣ်​ နီၢ်တၤမၢ်လၢ “နမံၤပှၢ်ပိာ်ခွါန့ၣ်​ လဲၤလၢ ဝ့ၢ်တံးမနး ဒ်သိးကလဲၤတံာ် အသိဆူၣ်လီၤ.” ၁၄ အဃိ နီၢ်တၤမၢ် ဘ့ၣ်လီၤကွံာ် မုၣ်ကမဲ အကူအသိးတဖၣ်​ ဒီးမၤဘၢအမဲာ် လၢနီၢ်ကျၢၢ်ဘၢတၢ် ဒီးကၤထီၣ်ဝဲ* ခိၣ်ဖၢၣ်လီၤ. ဒီးမ့ၢ်လၢ အထံၣ်ဘၣ်ဝဲလၢ စီၤစ့ၤလါ ဒိၣ်ထီၣ်လံ ဘၣ်ဆၣ်​ တၢ်တဟ့ၣ်လီၤအီၤ ဒ်သိးအကကဲထီၣ်​ စီၤစ့ၤလါ အမါဒံးဘၣ်အဃိ+ အဝဲဆ့ၣ်နီၤဝဲလၢ အံန့ၢ်အပဲတြီ အခီၣ်ထံးလီၤ. တၢ်လၢအံန့ၢ်န့ၣ်​ မ့ၢ်တၢ်လီၢ်တတီၤလၢ အအိၣ်ဖဲ ကျဲလၢအလဲၤဆူ ဝ့ၢ်တံးမနးလီၤ.

၁၅ မ့ၢ်လၢ နီၢ်တၤမၢ် မၤဘၢအမဲာ်အဃိ ဖဲစီၤယူဒၤ ထံၣ်အီၤအခါ ဆိကမိၣ်ဝဲ တဘျီဃီလၢ အမ့ၢ်ပိာ်မုၣ်လၢ အဆါလီၤအီၣ်အသးလီၤ. ၁၆ အဃိ စီၤယူဒၤ ဃၣ်အသးဒီး လဲၤဝဲဆူအအိၣ်​ လၢကျဲကပၤ ဒီးမ့ၢ်လၢ စီၤယူဒၤ တသ့ၣ်ညါဝဲလၢ အမ့ၢ်အဒဲၣ်မုၣ်ဘၣ်အဃိ+ အဝဲတဲဝဲလၢ “ဝံသးစူၤ ဟ့ၣ်ယၤအခွဲးလၢ ယကမံဃုာ်ဒီးနၤမီၤ.” ဘၣ်ဆၣ်​ နီၢ်တၤမၢ် တဲဝဲလၢ “ဒ်သိး နကမံဃုာ်ဒီးယၤအဂီၢ် နကဟ့ၣ်ယၤ တၢ်မနုၤလဲၣ်.” ၁၇ ဒီးစီၤယူဒၤ တဲဝဲလၢ “ယကဆှၢလီၤန့ၢ်နၤ မဲာ်တဲးလဲးဖိတဒု လၢယမဲာ်တဲးလဲးတဖု အကျါလီၤ.” ဒီးပိာ်မုၣ်န့ၣ်​ တဲအီၤလၢ “တချုးလၢ နဆှၢလီၤန့ၢ်ယၤဘၣ်န့ၣ်​ နကဟ့ၣ်လီၤဆိယၤ တၢ်မနုၤတမံၤ ဒ်တၢ်အုၣ်အသးအသိးလဲၣ်.” ၁၈ စီၤယူဒၤ တဲဝဲလၢ “ယကဘၣ်​ ဟ့ၣ်လီၤဆိနၤ တၢ်မနုၤတမံၤလဲၣ်.” ဒီးပိာ်မုၣ်န့ၣ်​ တဲအီၤလၢ “ဟ့ၣ်ယၤ နပသံးတဘိ+ ဒီးအပျံၤ ဒီးနနီၣ်ထိးဘိတဘိ လၢအအိၣ်လၢ နစုပူၤမီၤ.” ဒီးစီၤယူဒၤ ဟ့ၣ်လီၤအီၤ တၢ်သ့ၣ်တဖၣ်န့ၣ်​ ဒီးမံဃုာ်ဒီးအီၤလီၤ. ဒီးနီၢ်တၤမၤန့ၣ်​ ဒၢထီၣ်ဝဲလၢ အဃိလီၤ. ၁၉ ဝံၤဒီး နီၢ်တၤမၢ်က့ၤဝဲ ဒီးဘ့ၣ်လီၤကွံာ် အခိၣ်ဖၢၣ်​ ဒီးကူထီၣ်သိးထီၣ်က့ၤ မုၣ်ကမဲ အကူအသိးလီၤ.

၂၀ ဒီးစီၤယူဒၤ မၢအသကိး ပှၤဧဒူးလၣ်ဖိ+ လဲၤဆှၢဝဲ မဲာ်တဲးလဲးဖိတဒု ဒ်သိးအကဒိးန့ၢ်ဘၣ်က့ၤဝဲ အတၢ်ဖိတၢ်လံၤတဖၣ်​ လၢအဟ့ၣ်လီၤဆိဝဲ ဒ်တၢ်အုၣ်အသးအသိးလၢ ပိာ်မုၣ်တဂၤန့ၣ်​ အအိၣ်လီၤ. ဘၣ်ဆၣ်​ ပှၤတဂၤန့ၣ်​ ဃုပိာ်မုၣ်တဂၤအံၤ တဘၣ်ဘၣ်. ၂၁ အဃိ ပှၤတဂၤန့ၣ်​ သံကွၢ်ဝဲ ပှၤပိာ်ခွါ လၢအအိၣ်​ ဖဲန့ၣ်တဖၣ်လၢ “ပိာ်မုၣ်​ ဆါလီၤအီၣ်အသးတဂၤ* လၢအအိၣ်လၢ အံန့ၢ်အကျဲကပၤန့ၣ်​ အိၣ်ဖဲလဲၣ်.” ဘၣ်ဆၣ်​ အဝဲသ့ၣ်​ တဲဝဲလၢ “ပိာ်မုၣ်​ ဆါလီၤအီၣ်အသးန့ၣ်​ တအိၣ်လၢ တၢ်လီၢ်ဖဲအံၤ နီတဘျီဘၣ်.” ၂၂ ဒီးပှၤတဂၤန့ၣ်​ က့ၤကဒါက့ၤလၢ စီၤယူဒၤအအိၣ်​ ဒီးတဲအီၤလၢ “ယတထံၣ်အီၤဘၣ်. ဒီးပိာ်ခွါလၢ အအိၣ်ဖဲန့ၣ်တဖၣ်​ တဲဝဲလၢ ‘ပိာ်မုၣ်​ ဆါလီၤအီၣ်အသးန့ၣ်​ တအိၣ်လၢ တၢ်လီၢ်ဖဲအံၤ နီတဘျီဘၣ်.’” ၂၃ အဃိ စီၤယူဒၤ တဲဝဲလၢ “တၢ်သ့ၣ်တဖၣ်န့ၣ်​ အဝဲကဟံးဒၣ်ဝဲ, ပမ့ၢ်ဆဲးဃုအီၤန့ၣ်​ ပကဒိးန့ၢ်ဘၣ်​ တၢ်မဲာ်ဆှးလီၤ. ဒ်လဲၣ်ဂ့ၤ ဒ်လဲၣ်ဂ့ၤ ယဆှၢလီၤ မဲာ်တဲးလဲးဖိတဒုအံၤ ဝံၤလံ သနာ်က့ နဃုအီၤတဘၣ်ဘၣ်.”

၂၄ ဘၣ်ဆၣ်​ ဖဲသၢလါဝံၤအလီၢ်ခံ ပှၤတဲဘၣ်​ စီၤယူဒၤလၢ “နဒဲၣ်မုၣ်​ နီၢ်တၤမၢ် ဆါလီၤအီၣ်အသး အဃိ အဝဲဒၢထီၣ်ဝဲလံ.” ဒီးစီၤယူဒၤ တဲဝဲလၢ “ဟဲကိးထီၣ်အီၤ ဒီးဒွဲၣ်အူအီၤလၢ မ့ၣ်အူတက့ၢ်.”+ ၂၅ ဖဲပှၤကကိးထီၣ်အီၤအခါ အဝဲဆှၢလီၤ တၢ်ကစီၣ်လၢ အမံၤပှၢ်ပိာ်ခွါအအိၣ်လၢ “ယဒၢထီၣ်လၢ တၢ်တဖၣ်အံၤ အကစၢ်အဃိလီၤ.” ဒီးအဝဲ ဆဲးတဲဝဲလၢ “တၢ်သ့ၣ်တဖၣ်အံၤ လၢအမ့ၢ် ပသံးတဘိ ဒီးအပျံၤ ဒီးနီၣ်ထိးဘိတဘိန့ၣ်​ ကဲမတဂၤ အတၢ်လဲၣ်, ဝံသးစူၤ ကွၢ်လီၤတံၢ်လီၤဆဲးမီၤ.”+ ၂၆ ဒီးစီၤယူဒၤ ကွၢ်ဝဲတၢ်သ့ၣ်တဖၣ်အံၤ လီၤတံၢ်လီၤဆဲး ဒီးတဲဝဲလၢ “အဝဲတီဒိၣ်န့ၢ်ဒံးယၤ မ့ၢ်လၢ ယတဟ့ၣ်လီၤအီၤ လၢယဖိခွါ စီၤစ့ၤလါဘၣ်​ အဃိလီၤ.”+ ဒီးဖဲန့ၣ်​ ဝံၤအလီၢ်ခံ အဝဲတမံဃုာ်ဒီးအီၤ နီတဘျီလၢၤဘၣ်.

၂၇ ဖဲတၢ်ဆၢကတီၢ် ဘၣ်လၢ အကအိၣ်ဖျဲၣ်ထီၣ်​ အဖိအခါ ပှၤသဃံာ် အိၣ်ဝဲလၢ အဟၢဖၢပူၤလီၤ. ၂၈ ဒီးဖဲအဝဲ အိၣ်ဖျဲၣ်ထီၣ်အဖိ အဆၢကတီၢ် ဖိသၣ်တဂၤ ယူာ်ဃီၤအစု ဒီးပိာ်မုၣ်တဂၤလၢ အဒုးအိၣ်ဖျဲၣ်ထီၣ်စၢၤ ပှၤဖိန့ၣ်​ ဟံးန့ၢ်ဝဲ လုၣ်ဂီၤဆှုၣ်ကလာ်တဘိ တဘျီဃီ ဒီးစၢဝဲလၢ အစုအလိၤ ဒီးတဲဝဲလၢ “ဖိသၣ်တဂၤအံၤ ဟဲဖျိးထီၣ်ဆိဝဲလီၤ.” ၂၉ ဘၣ်ဆၣ်​ ဖဲဖိသၣ်တဂၤအံၤ ထုးကဒါက့ၤ အစုအခါ အဒီပုၢ်ဝဲၢ်ခွါတဂၤ ဟဲဖျိးထီၣ်ဝဲလီၤ. ဒီးပိာ်မုၣ်တဂၤန့ၣ်​ တဲဝဲလၢ “နဘၢၣ်ဖျိထီၣ်တၢ် ထဲထဲအံၤညါ.” အဃိ အဘၣ်တၢ်ကိးန့ၢ် အမံၤလၢ စီၤဖ့ၤရ့းလီၤ.+ ၃၀ ဝံၤဒီး အဒီပုၢ်ဝဲၢ်တဂၤလၢ ပှၤစၢဃာ်အစုလၢ လုၣ်ဂီၤဆှုၣ်ကလာ်တဘိန့ၣ်​ ဟဲဖျိးထီၣ်ဝဲ ဒီးတၢ်ကိးန့ၢ် အမံၤလၢ စီၤစ့ရၤလီၤ.+

၃၉ ဒီးပှၤယံးၡမၤဧ့လးဖိတဖၣ်​ လဲၤကိးဝဲ စီၤယိၤသး ဆူကီၢ်အဲၤကူပတူး အပူၤလီၤ.+ ဒီးပှၤအဲၤကူပတူးဖိ စီၤပိၤတံၤဖၢ်+ လၢအမ့ၢ် ဖၤရိၤအပဒိၣ်​ ဒီးအပှၤခိးတၢ်ဖိ အခိၣ်တဂၤန့ၣ်​ ပှ့ၤဝဲ စီၤယိၤသး လၢပှၤယံးၡမၤဧ့လးဖိတဖၣ်+ အအိၣ်လီၤ. ၂ ဘၣ်ဆၣ်​ ယဟိဝၤယွၤ အိၣ်ဒီးစီၤယိၤသးလီၤ.+ အဃိ တၢ်လၢ စီၤယိၤသး မၤဝဲတဖၣ်န့ၣ်​ ကဲထီၣ်လိၣ်ထီၣ်​ ဒီးအဝဲဒိးန့ၢ်ဘၣ်​ မူဒါတဖၣ်​ လၢအကစၢ် ပှၤအဲၤကူပတူးဖိတဂၤန့ၣ်​ အဟံၣ်ပူၤလီၤ. ၃ ဒီးအကစၢ် ထံၣ်ဘၣ်ဝဲလၢ ယဟိဝၤယွၤအိၣ်ဒီး အဝဲ ဒီးအထံၣ်ဘၣ်ဝဲလၢ ယဟိဝၤယွၤ ဒုးကဲထီၣ်လိၣ်ထီၣ်​ တၢ်လၢအမၤဝဲ ကိးမံၤဒဲးလီၤ.

၄ ဒီးအကစၢ် ဘၣ်သူၣ်ဘၣ်သးအီၤ ဒီးအဝဲကဲထီၣ်ဝဲ အခ့အပှၤ လၢအကစၢ် နာ်အီၣ်အီၤလီၤ. အဃိ အကစၢ် ပာ်ထီၣ်အီၤလၢ အကတီခိၣ်ရိၤမဲတၢ်လၢ အဟံၣ်ပူၤ ဒီးအးလီၤဝဲ တၢ်လၢအအိၣ်ဒီးအီၤခဲလၢာ် လၢအစုပူၤလီၤ. ၅ စးထီၣ်ဖဲအဝဲ ပာ်ထီၣ်အီၤလၢ အကတီခိၣ်ရိၤမဲတၢ်လၢ အဟံၣ်ပူၤ ဒီးအးလီၤဝဲ တၢ်လၢအအိၣ်ဒီးအီၤ ခဲလၢာ်လၢအစုပူၤန့ၣ်​ ယဟိဝၤယွၤ ဆိၣ်ဂ့ၤဝဲ ပှၤလၢအအိၣ်လၢ ပှၤအဲၤကူပတူးဖိ တဂၤအံၤအဟံၣ်ပူၤ ခီဖျိလၢ စီၤယိၤသး အဃိလီၤ. တကးဒံးဘၣ်​ ယဟိဝၤယွၤ ဆိၣ်ဂ့ၤစ့ၢ်ကီး တၢ်ခဲလၢာ်လၢ အအိၣ်လၢ အဟံၣ်ပူၤ ဒီးအစံာ်ပူၤလီၤ.+ ၆ အဃိ လၢခံကတၢၢ်န့ၣ်​ အဝဲအးလီၤ တၢ်လၢအအိၣ်ဒီးအီၤ ခဲလၢာ်လၢ စီၤယိၤသး အတၢ်ကွၢ်ထွဲ အဖီလာ်လီၤ. ဒီးမ့တမ့ၢ် တၢ်အီၣ်လၢ အဝဲအီၣ်ဝဲတဖၣ်ဘၣ်န့ၣ်​ အဝဲတလိၣ်​ ဘၣ်ယိၣ်​ တၢ်လၢအဂုၤအဂၤ နီတမံၤဘၣ်. အဂၤတမံၤန့ၣ်​ စီၤယိၤသးန့ၣ်​ အဒုၣ်အဒ့ဂ့ၤဒီး အဒိၣ်တၢ်ဂ့ၤမးလီၤ.

၇ လၢခံ အကစၢ်အမါ ကွၢ်ဝဲစီၤယိၤသး ဒီးလီကီအီၤအဃိ အဝဲတဲအီၤလၢ “ဟဲမံဃုာ်ဒီးယၤမီၤ.” ၈ ဘၣ်ဆၣ်​ အဝဲဂ့ၢ်လိာ်ဝဲ ဒီးတဲဝဲ အကစၢ်အမါလၢ “ယကစၢ် တဘၣ်ယိၣ်တၢ် ဘၣ်ဃးဒီး တၢ်လၢအအိၣ်ဒီးယၤ လၢဟံၣ်ပူၤ နီတမံၤဘၣ်​ ဒီးအအးလီၤ တၢ်လၢအအိၣ်ဒီးအီၤခဲလၢာ် လၢယစုပူၤလီၤ. ၉ လၢဟံၣ်တဖျၢၣ်အံၤအပူၤ ပှၤလၢအဒိၣ်န့ၢ်ယၤ တအိၣ်နီတဂၤဘၣ်. ဒီးမ့တမ့ၢ် နၤဘၣ်န့ၣ်​ အတတြီဘၣ်တၢ်လၢယၤ နီတမံၤဘၣ်. အတြီယၤ ထဲနၤတဂၤ, မ့ၢ်လၢနကဲ အမါအဃိလီၤ. အဃိ ယမၤတၢ်အၢတၢ်သီ လၢအဒိၣ်တမံၤအံၤ ဒီးမၤကမၣ်ဘၣ်​ ကစၢ်ယွၤ ကသ့ဒ်လဲၣ်.”+

၁၀ တနံၤဘၣ်တနံၤန့ၣ်​ အဝဲဂုာ်ကျဲးစၢး ကွဲန့ၢ်လွဲန့ၢ်စီၤယိၤသး ဘၣ်ဆၣ်​ ကမံဃုာ်ဒီးအီၤမ့ၢ်ဂ့ၤ ကအိၣ်ဒီးအီၤမ့ၢ်ဂ့ၤ စီၤယိၤသး တတူၢ်လိာ်ဝဲ နီတဘျီဘၣ်. ၁၁ ဘၣ်ဆၣ်​ ဘၣ်တနံၤန့ၣ်​ စီၤယိၤသး လဲၤနုာ်လီၤလၢ ဟံၣ်ပူၤဒ်သိး ကမၤအတၢ်မၤ အဂီၢ်လီၤ. ဒီးတၢ်အခ့အပှၤတဖၣ်​ တအိၣ်လၢဟံၣ်ပူၤ နီတဂၤဘၣ်. ၁၂ ဒီးအဝဲ ဖီၣ်ထုးဃာ် စီၤယိၤသး အဆ့ကၤ ဒီးတဲဝဲလၢ “မံဃုာ်ဒီးယၤမီၤ.” ဘၣ်ဆၣ်​ စီၤယိၤသး ပာ်တ့ၢ်ကွံာ် အဆ့ကၤလၢ အစုပူၤ ဒီးဃ့ၢ်ထီၣ်ကွံာ် ဆူတၢ်ချၢလီၤ. ၁၃ ဘၣ်ဆၣ်​ ဖဲအထံၣ်ဝဲလၢ စီၤယိၤသး ဃ့ၢ်ထီၣ်ကွံာ် ဆူတၢ်ချၢ ဒီးအဆ့ကၤ အိၣ်တ့ၢ်လၢ အစုပူၤအခါ ၁၄ အဝဲ ကိးပသူထီၣ်​ လၢအကလုၢ်ဖးဒိၣ်​ ဆူအခ့အပှၤတဖၣ်အအိၣ်​ ဒီးတဲအဝဲသ့ၣ်လၢ “ကွၢ်မီၤ, ပှၤဧ့ၤဘြံၤဖိတဂၤ လၢယဝၤဟဲက့ၤကိး လၢပအိၣ်န့ၣ်​ အဝဲအဲၣ်ဒိး မၤမဲာ်ဆှးပှၤလီၤ. ပှၤဧ့ၤဘြံၤဖိတဂၤအံၤ ဟဲလၢယအိၣ်​ ဒ်သိးကမံဃုာ်ဒီးယၤလီၤ. ဘၣ်ဆၣ်​ ယကိးပသူထီၣ်​ လၢယကလုၢ် ဖးဒိၣ်လီၤ. ၁၅ ဖဲအနၢ်ဟူလၢ ယကိးပသူထီၣ်လၢ ယကလုၢ်ဖးဒိၣ်အခါ အဝဲပာ်တ့ၢ်ကွံာ် အဆ့ကၤ လၢယကပၤ ဒီးဃ့ၢ်ထီၣ်ကွံာ် ဆူတၢ်ချၢလီၤ.” ၁၆ ဝံၤဒီး အဝဲပာ်လီၤဝဲ စီၤယိၤသး အဆ့ကၤလၢအကပၤ တုၤလၢစီၤယိၤသး အကစၢ် ဟဲက့ၤလၢဟံၣ်လီၤ.

၁၇ ဒီးအဝဲတဲဘၣ်အဝၤ တၢ်ဂ့ၢ်တမံၤဃီ လၢအမ့ၢ် “ပှၤဧ့ၤဘြံၤဖိ လၢအကဲကုၢ်လၢ နဟဲကိးအီၤလၢ ပအိၣ်တဂၤန့ၣ်​ ဟဲလၢယအိၣ်​ ဒ်သိး အကမၤ မဲာ်ဆှးယၤအဂီၢ်လီၤ. ၁၈ ဘၣ်ဆၣ်​ ဖဲယကိးပသူထီၣ်လၢ ယကလုၢ်ဖးဒိၣ်အခါ အပာ်တ့ၢ်ကွံာ် အဆ့ကၤ လၢယကပၤ ဒီးဃ့ၢ်ထီၣ်ကွံာ် ဆူတၢ်ချၢလီၤ.” ၁၉ ဒီးဖဲ အကစၢ် နၢ်ဟူဝဲ အမါအတၢ်ကတိၤတဖၣ်​ လၢအမ့ၢ် “နကုၢ်တဂၤ မၤယၤဒ်အံၤဒ်နုၤ” အခါ အသးဒိၣ်ထီၣ်တၢ် ဒိၣ်မးလီၤ. ၂၀ အဃိ စီၤယိၤသး အကစၢ်န့ၣ်​ ဖီၣ်အီၤ ဒီးထၢနုာ်အီၤ လၢဃိာ်ပူၤ ဖဲတၢ်လီၢ်လၢ စီၤပၤစၢဃာ် ပှၤဃိာ်ဖိတဖၣ်လီၤ. ဒီးစီၤယိၤသး ဘၣ်ဆဲးအိၣ်ဝဲလၢ ဃိာ်ပူၤဖဲန့ၣ်လီၤ.+

၂၁ ဘၣ်ဆၣ်​ ယဟိဝၤယွၤ အိၣ်ဒီးစီၤယိၤသး ဒီးဆဲးပာ်ဖျါထီၣ်​ တၢ်အဲၣ်လၢအတီ လၢအဖီခိၣ်​ ဒီးဆိၣ်ဂ့ၤအီၤ ဒ်သိး ဃိာ်ခိၣ်တဂၤ ကဘၣ်သူၣ်ဘၣ်သးအီၤ အဂီၢ်လီၤ.+ ၂၂ အဃိ ဃိာ်ခိၣ်တဂၤ ပာ်ထီၣ်စီၤယိၤသးလၢ ပှၤဃိာ်ဖိလၢ အအိၣ်လၢဃိာ်ပူၤ ကိးဂၤဒဲး အဖီခိၣ်​ ဒီးတၢ်လၢ အဝဲသ့ၣ်မၤဝဲ ကိးမံၤဒဲး အဖီခိၣ်လီၤ. ဒီးစီၤယိၤသး မ့ၢ်ပှၤလၢ အအံးထွဲကွၢ်ထွဲ တၢ်မၤခဲလၢာ်လီၤ.+ ၂၃ မ့ၢ်လၢ ယဟိဝၤယွၤ အိၣ်ဒီးစီၤယိၤသး ဒီးယဟိဝၤယွၤ ဒုးကဲထီၣ်လိၣ်ထီၣ်​ တၢ်လၢ စီၤယိၤသး မၤဝဲကိးမံၤဒဲးအဃိ တၢ်လၢအအိၣ်လၢ စီၤယိၤသး အတၢ်ကွၢ်ထွဲ အဖီလာ်န့ၣ်​ ဃိာ်ခိၣ်​ တလိၣ်​ ဘၣ်ယိၣ်တၢ် နီတမံၤဘၣ်.+

၄၀ လၢခံ အဲၤကူပတူး အစီၤပၤ အပှၤစိာ်စပံးထံ အခိၣ်တဂၤ+ ဒီးအပှၤကုၢ်ကိၣ်​ အခိၣ်တဂၤ မၤကမၣ်ဘၣ်​ အဝဲသ့ၣ်​ အကစၢ် လၢအမ့ၢ် အဲၤကူပတူး အစီၤပၤလီၤ. ၂ အဃိ ဖၤရိၤ သးဒိၣ်ထီၣ်ဝဲ အပဒိၣ်ခံဂၤ လၢအမ့ၢ် ပှၤစိာ်စပံးထံ အခိၣ်တဂၤ ဒီးပှၤကုၢ်ကိၣ်​ အခိၣ်တဂၤ+ ၃ ဒီးထၢနုာ် အဝဲသ့ၣ်လၢ ဃိာ်ပူၤလၢ ပှၤခိးတၢ်ဖိ အခိၣ်တဂၤအဟံၣ်+ လၢအမ့ၢ် တၢ်လီၢ်လၢ ပှၤပာ်စီၤယိၤသး အလီၢ်န့ၣ်လီၤ.+ ၄ ဒီးပှၤခိးတၢ်ဖိအခိၣ်န့ၣ်​ ဟ့ၣ်လီၤစီၤယိၤသး မူဒါလၢ အကအိၣ်ဒီး အဝဲသ့ၣ်​ ဒီးကကွၢ်ထွဲ အဝဲသ့ၣ်လီၤ.+ ဒီးအဝဲသ့ၣ်​ ဘၣ်ဆဲးအိၣ်ဝဲ လၢဃိာ်ပူၤ တတီၤဖိလီၤ.

၅ အဲၤကူပတူး အစီၤပၤ အပှၤစိာ် စပံးထံတဂၤ ဒီးအပှၤကုၢ်ကိၣ်တဂၤ လၢအအိၣ်လၢ ဃိာ်ပူၤန့ၣ်​ မံမီၢ်တၢ်မံမီၢ် တဂၤတမံၤ လၢတနၤဃီ အတီၢ်ပူၤလီၤ. ဒီးတၢ်မံမီၢ်ခံခါအံၤ အခီပညီ လီၤဆီလိာ်သးလီၤ. ၆ လၢခံတဂီၤ ဖဲစီၤယိၤသး ဟဲနုာ်လီၤ ဒီးထံၣ်အဝဲသ့ၣ်အခါ ဖျါလၢ အဝဲသ့ၣ်​ သးအုးလီၤ. ၇ အဃိ စီၤယိၤသး သံကွၢ် ဖၤရိၤအပဒိၣ်တဖၣ်အံၤလၢ “တနံၤအံၤ ဘၣ်မနုၤအဃိ သုဖျါသးအုးလဲၣ်.” ၈ အဝဲသ့ၣ်​ တဲအီၤလၢ “ပမံမီၢ်တၢ်မံမီၢ် တဂၤတမံၤလီၤ. ဘၣ်ဆၣ်​ ပှၤလၢအကဖးန့ၢ် ပတၢ်မံမီၢ်အခီပညီန့ၣ်​ တအိၣ်နီတဂၤဘၣ်.” ဒီးစီၤယိၤသး တဲအဝဲသ့ၣ်လၢ “ပှၤလၢ အပာ်ဖျါထီၣ်​ အခီပညီသ့န့ၣ်​ မ့ၢ်ဒၣ်​ ကစၢ်ယွၤ တမ့ၢ်ဘၣ်ဧါ.+ အဃိ ဝံသးစူၤ တဲဘၣ်ယၤမီၤ.”

၉ အဃိ ပှၤစိာ်စပံးထံ အခိၣ်တဂၤ တဲဘၣ်​ စီၤယိၤသးလၢ အတၢ်မံမီၢ်လီၤ. ဒီးအတဲဝဲလၢ “လၢယတၢ်မံမီၢ်အပူၤန့ၣ်​ ယထံၣ်စပံးမုၢ် တမုၢ်အိၣ်လၢ ယမဲာ်ညါလီၤ. ၁၀ ဒီးလၢစပံးမုၢ်အလိၤန့ၣ်​ အဒ့ဟဲထီၣ်ဝဲ သၢဒ့ ဒီးအဒိးထီၣ်​ ဒီးအဖီထီၣ်ဝဲ ဒီးအသၣ်လၢ အချုၣ်လိၤန့ၣ်​ မံထီၣ်ဝဲလီၤ. ၁၁ ဒီးစီၤပၤ ဖၤရိၤ အထံခွးန့ၣ်​ အိၣ်လၢယစုပူၤလီၤ. ဒီးယဟံးန့ၢ် စပံးသၣ်တဖၣ်​ ဒီးယစံၢ်လီၤအထံလၢ စီၤပၤဖၤရိၤ အထံခွးအပူၤလီၤ. ဝံၤဒီး ယဟ့ၣ်လီၤ ထံခွးအံၤလၢ စီၤပၤဖၤရိၤ အစုပူၤလီၤ.” ၁၂ ဒီးစီၤယိၤသး တဲအီၤလၢ “တၢ်မံမီၢ်တခါအံၤ အခီပညီဒ်အံၤလီၤ. အဒ့သၢဒ့န့ၣ်​ မ့ၢ်ဝဲ သၢသီလီၤ. ၁၃ ဖဲသၢသီတသီန့ၣ်​ ဖၤရိၤကကိးထီၣ်နၤ ဒီးကဟ့ၣ်က့ၤနၤ နမူဒါ+ ဒီးနကဟ့ၣ်လီၤ ဖၤရိၤအထံခွးလၢ အစုပူၤ ဒ်နမၤအီၤ လၢညါအသိး ဖဲနကဲ ပှၤစိာ်စပံးထံ အခိၣ်အခါန့ၣ်လီၤ.+ ၁၄ ဘၣ်ဆၣ်​ ဖဲနတၢ်အိၣ်သး ဂ့ၤထီၣ်အခါ နကဘၣ်နီၣ်ဘၣ်ယၤနီၤ. ဝံသးစူၤ ပာ်ဖျါထီၣ်​ တၢ်အဲၣ်လၢအတီ လၢယဖီခိၣ်​ ဒီးတဲဘၣ်​ ဖၤရိၤလၢယဂ့ၢ် ဒ်သိး ယကဟးထီၣ်ဘၣ်​ ဖဲအံၤအဂီၢ်တက့ၢ်. ၁၅ နီၢ်ကီၢ်န့ၣ်​ ပှၤစံၣ်စိာ်န့ၢ်ဆူၣ်ယၤ ဖဲယအိၣ်လၢ ပှၤဧ့ၤဘြံၤဖိ အထံကီၢ်အခါ+ ဒီးမ့မ့ၢ် တၢ်လီၢ်ဖဲအံၤန့ၣ်​ ဒ်သိးပှၤကထၢနုာ်ယၤလၢ ဃိာ်ပူၤအဂီၢ် ယတမၤဘၣ်​ တၢ်နီတမံၤဘၣ်.”+

၁၆ ပှၤကုၢ်ကိၣ်အခိၣ်​ ထံၣ်ဘၣ်ဝဲလၢ စီၤယိၤသး ဖးန့ၢ်အဝဲတဂၤ အတၢ်မံမီၢ် အခီပညီန့ၣ်​ ဖျါဂ့ၤဘၣ်အီၤအဃိ အဝဲတဲ စီၤယိၤသးလၢ “ယၤစ့ၢ်ကီး ယမံမီၢ်တၢ်တမံၤလီၤ. ကိၣ်အဝါသၢနာ် အိၣ်လၢယခိၣ်လိၤလီၤ. ၁၇ ဒီးလၢအဖီခိၣ်ကတၢၢ် တနာ်အပူၤန့ၣ်​ ကိၣ်လၢဖၤရိၤအဂီၢ် အိၣ်ဝဲ အကလုာ်ကလုာ်လီၤ. ဒီးထိၣ်သ့ၣ်တဖၣ်​ ဟဲအီၣ်ဝဲ ကိၣ်လၢ အအိၣ်လၢ နာ်အဖီခိၣ်ကတၢၢ်အပူၤ လၢအအိၣ်လၢ ယခိၣ်လိၤန့ၣ်လီၤ.” ၁၈ ဒီးစီၤယိၤသး တဲအီၤလၢ “တၢ်မံမီၢ်တခါအံၤ အခီပညီ ဒ်အံၤလီၤ. နာ်သၢဖျၢၣ်န့ၣ်​ မ့ၢ်ဝဲ သၢသီလီၤ. ၁၉ ဖဲသၢသီတသီန့ၣ်​ ဖၤရိၤ ကကျီကွံာ်နခိၣ်​ ဒီးကဘျးထီၣ်နၤလၢ သ့ၣ်တတၢၣ်အလိၤ ဒီးထိၣ်တဖၣ်​ ကဟဲအီၣ်​ နညၣ်လီၤ.”+

၂၀ ဒီးသၢသီတသီန့ၣ်​ မ့ၢ်ဝဲဖၤရိၤ အတၢ်အိၣ်ဖျဲၣ်ဆၢက့ၤ အမုၢ်နံၤ+ ဒီးအဝဲ မၤတၢ်အီၣ်အမူးလၢ အခ့အပှၤ ခဲလၢာ်အဂီၢ်လီၤ. ဒီးအဝဲကိးထီၣ်​ ပှၤစိာ်စပံးထံအခိၣ်​ ဒီးပှၤကုၢ်ကိၣ်အခိၣ်​ လၢအခ့အပှၤတဖၣ်​ အမဲာ်ညါလီၤ. ၂၁ ဒီးဖၤရိၤဟ့ၣ်က့ၤ ပှၤစိာ်စပံးထံ အခိၣ်တဂၤလၢ အမူဒါ ဒ်ပှၤစိာ်စပံးထံအခိၣ်အသိး ဒီးအဝဲဆဲးကဲဘၣ်ဝဲ ပှၤလၢအဟ့ၣ်လီၤထံခွး လၢဖၤရိၤ အစုပူၤလီၤ. ၂၂ ဒီးဒ်စီၤယိၤသး ဖးန့ၢ်တၢ်လၢ အဝဲသ့ၣ်အဂီၢ်အသိး ပှၤကုၢ်ကိၣ်​ အခိၣ်တဂၤန့ၣ်​ ဖၤရိၤ ဘျးထီၣ်အီၤလီၤ.+ ၂၃ ဘၣ်ဆၣ်​ ပှၤစိာ်စပံးထံ အခိၣ်တဂၤန့ၣ်​ တသ့ၣ်နီၣ်ထီၣ်​ စီၤယိၤသးလၢၤဘၣ်. ဒီးအဝဲသးပ့ၤနီၣ်ကွံာ်အီၤလီၤ.+

၄၁ ဖဲခံနံၣ်​ ပှဲၤထီၣ်အခါ ဖၤရိၤ မံမီၢ်ဝဲလၢ+ အဆၢထၢၣ်လၢ ထံကျိနံၤလါ အကပၤလီၤ. ၂ ဖဲန့ၣ်န့ၣ်​ ကျီၢ်မိၢ်နွံဒု လၢအဖျါဂ့ၤ ဒီးအဘီၣ်အသိန့ၣ်​ ဟဲထီၣ်ဝဲလၢ ထံကျိပူၤ ဒီးအဝဲသ့ၣ်​ အီၣ်ဝဲနီၣ်လၢ ထံကျိနံၤလါ အကပၤလီၤ.+ ၃ ဝံၤဒီး ကျီၢ်မိၢ်လၢ အဂၤနွံဒု လၢအဖျါလာ်အၢ ဒီးအဃဲၤသံန့ၣ်​ ဟဲထီၣ်စ့ၢ်ကီးဝဲလၢ ထံကျိနံၤလါအပူၤလီၤ. ဒီးအဝဲသ့ၣ်​ ဆၢထၢၣ်ဝဲလၢ ကျီၢ်မိၢ်လၢ အဘီၣ်တဖၣ်အကပၤ လၢထံကျိနံၤလါ အကၢၢ်နံၤလီၤ. ၄ ဒီးကျီၢ်မိၢ်လၢ အဖျါလာ်အၢ ဒီးအဃဲၤသံတဖၣ်န့ၣ်​ အီၣ်ကွံာ်ဝဲ ကျီၢ်မိၢ်နွံဒု လၢအဖျါဂ့ၤ ဒီးအဘီၣ်အသိန့ၣ်လီၤ. ဒီးဖဲန့ၣ်​ ဖၤရိၤ မံပၢၢ်ထီၣ်ဝဲလီၤ.

၅ ဒီးအဝဲ က့ၤမံကဒါက့ၤဝဲ ဒီးမံမီၢ်ကဒီးတၢ် ခံဘျီတဘျီလီၤ. ဘုအစဲၤနွံစဲၤလၢ အဖျၢၣ်ကၢ ဒီးအဂ့ၤန့ၣ်​ ဒိၣ်ထီၣ်ဝဲလၢ ဘုထူၣ်တထူၣ်ဃီ အလိၤလီၤ.+ ၆ ဝံၤဒီးဘုအစဲၤနွံစဲၤ ဒိၣ်ထီၣ်ဝဲလၢ ဘုအဂၤတထူၣ်အလိၤ သနာ်က့ အဖျၢၣ်သွံးဒီး ဃ့ထီကွံာ်ဝဲ ခီဖျိလၢ ကလံၤကိၢ်လၢ အဟဲလၢ မုၢ်ထီၣ်တခီ အဃိန့ၣ်လီၤ. ၇ ဒီးဘုအစဲၤလၢ အဖျၢၣ်သွံးန့ၣ်​ ယူၢ်လီၤကွံာ်ဝဲ ဘုအစဲၤလၢ အဖျၢၣ်ကၢ ဒီးအဂ့ၤန့ၣ်လီၤ. ဒီးဖၤရိၤ မံပၢၢ်ထီၣ်ဝဲ ဒီးသ့ၣ်ညါဝဲလၢ အကဲတၢ်မံမီၢ်လီၤ.

၈ ဘၣ်ဆၣ်​ လၢဂီၤခီန့ၣ်​ အသးဘၣ်တံာ်တာ်အဃိ အမၢပှၤလဲၤကိးန့ၢ်အီၤ အဲၤကူပတူး အပှၤအူတၢ်သမူတၢ် ဒီးအပှၤကူၣ်ဘၣ်ကူၣ်သ့ ကိးဂၤဒဲးလီၤ. ဒီးဖၤရိၤတဲဘၣ်​ အဝဲသ့ၣ်လၢ အတၢ်မံမီၢ်တဖၣ်​ ဘၣ်ဆၣ်​ ပှၤဖးန့ၢ် ဖၤရိၤအတၢ်မံမီၢ်တဖၣ်​ တဘၣ်နီတဂၤဘၣ်.

၉ ဒီးပှၤစိာ်စပံးထံ အခိၣ်န့ၣ်​ တဲဘၣ်ဖၤရိၤလၢ “တနံၤအံၤ ယကအၢၣ်လီၤ ယတၢ်ကမၣ်လီၤ. ၁၀ လၢညါန့ၣ်​ နသးဒိၣ်ထီၣ်​ နခ့နပှၤတဖၣ်​ လၢအမ့ၢ် ယၤဒီးပှၤကုၢ်ကိၣ်အခိၣ်​ အဃိ နထၢနုာ်ပှၤလၢ ဃိာ်ပူၤလၢ အအိၣ်လၢ ပှၤခိးတၢ်ဖိ အခိၣ်တဂၤ အဟံၣ်လီၤ.+ ၁၁ လၢခံ ပမံမီၢ် တၢ်မံမီၢ် တဂၤတမံၤလၢ တနၤဃီ အတီၢ်ပူၤလီၤ. ဒီးယၤဒီးအီၤန့ၣ်​ ပတၢ်မံမီၢ် အခီပညီ လီၤဆီလိာ်သးလီၤ.+ ၁၂ ဖဲန့ၣ်​ ပှၤဧ့ၤဘြံၤဖိသးစၢ်တဂၤ အိၣ်ဒီးပှၤ ဒီးအဝဲမ့ၢ် ပှၤခိးတၢ်ဖိ အခိၣ်တဂၤအကုၢ်လီၤ.+ ဖဲပတဲဘၣ်အီၤလၢ ပတၢ်မံမီၢ် သ့ၣ်တဖၣ်အံၤအခါ+ အဝဲဖးန့ၢ် ပတၢ်မံမီၢ် တခါစုာ်စုာ်လီၤ. ၁၃ ဒီးတၢ်ကဲထီၣ်အသး ဒ်အဖးန့ၢ်ပှၤ အသိး လီၤတံၢ်လီၤဆဲးလီၤ. မ့မ့ၢ်ယၤန့ၣ်​ ယန့ၢ်ဘၣ်က့ၤ ယမူဒါ ဘၣ်ဆၣ်​ မ့မ့ၢ် အဝဲတဂၤန့ၣ်​ ဘၣ်တၢ်ဘျးထီၣ်အီၤလီၤ.”+

၁၄ အဃိ စီၤပၤဖၤရိၤ မၢပှၤလဲၤကိးန့ၢ်အီၤ စီၤယိၤသး+ ဒီးအဝဲသ့ၣ်​ ဟဲကိးထီၣ်အီၤ လၢဃိာ်ပူၤ ချ့ချ့လီၤ.+ ဒီးအဝဲလူၤက့ၤ အခိၣ်ဆူၣ်ခၣ်ဆူၣ်​ ဒီးဆီတလဲ အတၢ်ကူတၢ်ကၤ ဒီးလဲၤဝဲဆူ ဖၤရိၤအအိၣ်လီၤ. ၁၅ ဒီးဖၤရိၤတဲဘၣ်​ စီၤယိၤသးလၢ “ယမံမီၢ် တၢ်မံမီၢ်တခါ ဘၣ်ဆၣ်​ ပှၤဖးန့ၢ်ယၤ တဘၣ်နီတဂၤဘၣ်. ယနၢ်ဟူ ပှၤတဲလၢ နဖးတၢ်မံမီၢ် အခီပညီသ့လီၤ.”+ ၁၆ ဒီးစီၤယိၤသး တဲဆၢ ဖၤရိၤလၢ “တမ့ၢ်ယၤဘၣ်. ပှၤလၢအကတဲဘၣ်​ ဖၤရိၤ လၢတၢ်ကစီၣ်လၢအမုာ်န့ၣ်​ မ့ၢ်ကစၢ်ယွၤလီၤ.”+

၁၇ ဒီးဖၤရိၤတဲဘၣ်​ စီၤယိၤသးလၢ “လၢယတၢ်မံမီၢ်အပူၤန့ၣ်​ ယဆၢထၢၣ်လၢ ထံကျိနံၤလါ အကၢၢ်နံၤလီၤ. ၁၈ ဖဲန့ၣ်န့ၣ်​ ကျီၢ်မိၢ်နွံဒု လၢအဖျါဂ့ၤ ဒီးအဘီၣ်အသိန့ၣ်​ ဟဲထီၣ်ဝဲလၢ ထံကျိပူၤ ဒီးအဝဲသ့ၣ်​ အီၣ်ဝဲနီၣ်လၢ ထံကျိနံၤလါ အကပၤလီၤ.+ ၁၉ ဒီးကျီၢ်မိၢ်အဂၤ နွံဒုလၢ အဂံၢ်အဘါတအိၣ်ဘၣ်​ အဖျါလာ်အၢဒိၣ်မး ဒီးအဃဲၤသံန့ၣ်​ ဟဲထီၣ်လၢ ကျီၢ်မိၢ်နွံဒု လၢအဖျါဂ့ၤ ဒီးအဘီၣ်အသိန့ၣ်​ အလီၢ်ခံလီၤ. ဒီးလၢ ကီၢ်အဲၤကူပတူးအပူၤ ယတထံၣ်ဘၣ်​ ကျီၢ်မိၢ်လၢ အဖျါလာ်အၢ ထဲအံၤညါ နီတဘျီဘၣ်. ၂၀ ဒီးကျီၢ်မိၢ်လၢ အဃဲၤသံ ဒီးအဖျါလာ်အၢန့ၣ်​ အီၣ်ကွံာ်ဝဲ ကျီၢ်မိၢ်လၢ အဘီၣ်နွံဒုန့ၣ်လီၤ. ၂၁ ဘၣ်ဆၣ်​ ဖဲအဝဲသ့ၣ်​ အီၣ်ဝဲဝံၤအခါဒၣ်လဲာ် အဝဲသ့ၣ်​ ဖျါလာ်အၢ ဒ်အလီၢ်လီၢ် အဃိ ပှၤတသ့ၣ်ညါလၢ အဝဲသ့ၣ်အီၣ်ဝဲဘၣ်. ဒီးယမံ ပၢၢ်ထီၣ်လီၤ.

၂၂ “ဝံၤဒီး လၢယတၢ်မံမီၢ် အပူၤန့ၣ်​ ယထံၣ်​ ဘုအစဲၤနွံစဲၤလၢ အဖျၢၣ်ကၢ ဒီးအဂ့ၤန့ၣ်​ ဒိၣ်ထီၣ်ဝဲလၢ ဘုထူၣ်တထူၣ်ဃီ အလိၤလီၤ.+ ၂၃ လၢခံ ဘုအစဲၤနွံစဲၤ ဒိၣ်ထီၣ်ဝဲလၢ ဘုအဂၤတထူၣ်အလိၤ သနာ်က့ အဖျၢၣ်သွံးဒီး ဃ့ထီကွံာ်ဝဲ ခီဖျိလၢ ကလံၤကိၢ်လၢ အဟဲလၢ မုၢ်ထီၣ်တခီ အဃိန့ၣ်လီၤ. ၂၄ ဒီးဘုအစဲၤလၢ အသွံးအံၤ ယူၢ်လီၤကွံာ်ဝဲ ဘုအစဲၤလၢ အဂ့ၤန့ၣ်လီၤ. ဒီးယတဲဘၣ်​ ပှၤအူတၢ်သမူတၢ်တဖၣ်+ လၢယတၢ်မံမီၢ် သနာ်က့ အဝဲသ့ၣ်​ တဲဘၣ်ယၤ အခီပညီတဘၣ်​ နီတဂၤဘၣ်.”+

၂၅ ဒီးစီၤယိၤသး တဲဘၣ်​ ဖၤရိၤလၢ “နတၢ်မံမီၢ်တဖၣ်န့ၣ်​ အခီပညီ မ့ၢ်တၢ်တမံၤဃီ ဒီးမ့ၢ်တၢ်ဒ်သိးသိးလီၤ. မ့ၢ်ဒၣ်​ ယွၤလၢ အမ့ၢ်အတီတဂၤ တဲဘၣ်နၤ တၢ်လၢ အကမၤဝဲတဖၣ်လီၤ.+ ၂၆ ကျီၢ်မိၢ်နွံဒု လၢအဂ့ၤန့ၣ်​ အဲၣ်ဒိးတဲဝဲ နွံနံၣ်လီၤ. ဒ်န့ၣ်အသိး ဘုစဲၤနွံစဲၤလၢ အဂ့ၤန့ၣ်​ အဲၣ်ဒိးတဲဝဲ နွံနံၣ်လီၤ. တၢ်မံမီၢ်တဖၣ်န့ၣ်​ အခီပညီ မ့ၢ်တၢ်တမံၤဃီ ဒီးမ့ၢ်တၢ်ဒ်သိးသိးလီၤ. ၂၇ ကျီၢ်မိၢ်နွံဒု လၢအဃဲၤ ဒီးအလာ်အၢ လၢအဟဲထီၣ်လၢ ကျီၢ်မိၢ်နွံဒု လၢအဂ့ၤ အလီၢ်ခံန့ၣ်​ အဲၣ်ဒိးတဲဝဲ နွံနံၣ်​ ဒီးဘုအသိၣ်​ နွံစဲၤလၢ အဘၣ်ဒီး ကလံၤကိၢ်လၢ အဟဲလၢ မုၢ်ထီၣ်တခီန့ၣ်​ အဲၣ်ဒိးတဲဝဲ တၢ်သၣ်ဝံၤလီၤဒိ ကအိၣ်ဝဲ နွံနံၣ်လီၤ. ၂၈ ဒ်ယတဲတ့ၢ် နၤအသိး ယွၤလၢအမ့ၢ်အတီတဂၤ ဒုးသ့ၣ်ညါ နၤလၢ တၢ်လၢ အကမၤဝဲတဖၣ်လီၤ.

၂၉ “တၢ်အီၣ်တၢ်အီ ကအိၣ်ဝဲ အါအါဂီၢ်ဂီၢ်လၢ ကီၢ်အဲၤကူပတူး ဒီဘ့ၣ်ညါ အပူၤ နွံနံၣ်လီၤ. ၃၀ တၢ်န့ၣ်ဝံၤအလီၢ်ခံ တၢ်သၣ်ဝံၤလီၤဒိ ကအိၣ်ဝဲနွံနံၣ်​ ဒီးပှၤကသးပ့ၤနီၣ်ကွံာ် ဆၢကတီၢ်ဖဲ တၢ်အီၣ်တၢ်အီ အိၣ်ဝဲအါအါဂီၢ်ဂီၢ်လၢ ကီၢ်အဲၤကူပတူးအပူၤလီၤ. ဒီးတၢ်သၣ်ဝံၤလီၤဒိအံၤ ကမၤဟးဂီၤ ထံကီၢ်လီၤ.+ ၃၁ လၢညါ တၢ်အီၣ်တၢ်အီ အိၣ်ဝဲ လၢကီၢ်ပူၤ အါအါဂီၢ်ဂီၢ် သနာ်က့ ပှၤတသ့ၣ်နီၣ်ထီၣ်​ အီၤလၢၤဘၣ်​ မ့ၢ်လၢ တၢ်သၣ်ဝံၤလီၤဒိ ကအိၣ်ထီၣ်ဝဲ ဒီးတၢ်သၣ်ဝံၤလီၤဒိအံၤ ကအိၣ်ထီၣ်ဝဲ နးမးအဃိလီၤ. ၃၂ ဖၤရိၤ မံမီၢ်ဝဲ တၢ်မံမီၢ်အံၤ ခံဘျီ ခီဖျိလၢ ယွၤလၢအမ့ၢ်အတီတဂၤ ပာ်ဂၢၢ်ပာ်ကျၢၤဝဲ တၢ်ဂ့ၢ်တခါအံၤ လီၤတံၢ်လီၤဆဲး ဒီးတယံာ်လၢၤဘၣ်န့ၣ်​ ယွၤလၢအမ့ၢ်အတီတဂၤ ကဒုးကဲထီၣ်အီၤလီၤ.

၃၃ “အဃိ ဖၤရိၤဧၢ, ဃုကွၢ် ပှၤတဂၤလၢအကူၣ်တၢ်သ့ ဒီးအသူၣ်ဆးအသးဆး ဒီးပာ်ထီၣ်အီၤလၢ ကီၢ်အဲၤကူပတူး အဖီခိၣ်တက့ၢ်. ၃၄ ဒီးဃုထၢထီၣ်​ ပှၤကွၢ်ထွဲတၢ်တဖၣ်လၢ ထံကီၢ်အပူၤ ဒီးဖဲတၢ်အီၣ်တၢ်အီ အိၣ်ဝဲအါအါဂီၢ်ဂီၢ် နွံနံၣ်အတီၢ်ပူၤန့ၣ်​ နကြၢးပာ်ဖှိၣ်​ တၢ်လၢအမဲထီၣ်သၣ်ထီၣ်​ ယဲၢ်ပူတပူလၢ ကီၢ်အဲၤကူပတူး အပူၤန့ၣ်လီၤ.+ ၃၅ ဖဲနံၣ်လၢ တၢ်အီၣ်တၢ်အီ အိၣ်ဝဲအါအါဂီၢ်ဂီၢ် အဆၢကတီၢ်န့ၣ်​ မၢအဝဲသ့ၣ်​ ပာ်ဖှိၣ်ဃာ် တၢ်အီၣ်ကိးကလုာ်ဒဲးတက့ၢ်. မၢအဝဲသ့ၣ်​ ပာ်ဖှိၣ်ဃာ် ဘုဧိၤဟုဧိၤ လၢဖၤရိၤ အဘုဖီ လၢဝ့ၢ်တဖၣ်အပူၤ ဒီးပာ်ဃာ်အီၤဂ့ၤဂ့ၤတက့ၢ်.+ ၃၆ ဖဲတၢ်သၣ်ဝံၤလီၤဒိ အိၣ်ထီၣ်လၢ ကီၢ်အဲၤကူပတူး နွံနံၣ်အခါ တၢ်အီၣ်တၢ်အီတဖၣ်အံၤ ကကဲထီၣ်​ တၢ်အီၣ်လၢ ပှၤကညီ ဒီးဆၣ်ဖိကီၢ်ဖိတဖၣ်အဂီၢ် ဒ်သိးထံကီၢ်အံၤ သုတဟးဂီၤလၢ တၢ်သၣ်ဝံၤလီၤဒိ အဃိတဂ့ၤအဂီၢ်လီၤ.”+

၃၇ ဒီးဖၤရိၤ ဒီးအခ့အပှၤ ကိးဂၤဒဲးန့ၣ်​ ဘၣ်သူၣ်ဘၣ်သးဝဲ တၢ်ဟ့ၣ်ကူၣ်အံၤလီၤ. ၃၈ ဒီးဖၤရိၤတဲဘၣ်​ အခ့အပှၤတဖၣ်လၢ “မ့ၢ်ပဃုထံၣ်န့ၢ် ပှၤပိာ်ခွါတဂၤလၢ အလီၤဂာ်ဒီးအီၤ လၢယွၤအသးစီဆှံ အိၣ်လၢအပူၤန့ၣ်​ ကဘၣ်စ့ၢ်ကီးဧါ.” ၃၉ ဒီးဖၤရိၤ တဲစီၤယိၤသးလၢ “မ့ၢ်လၢ ကစၢ်ယွၤ ဒုးသ့ၣ်ညါနၤ တၢ်ဂ့ၢ်တဖၣ်အံၤ ခဲလၢာ်အဃိ ပှၤလၢအကူၣ်တၢ်သ့ ဒီးအသူၣ်ဆးအသးဆး ထဲသိးဒီးနၤ တအိၣ်ဝဲ နီတဂၤဘၣ်. ၄၀ နကတီခိၣ်ရိၤမဲတၢ်လၢ ယဟံၣ်အဖီခိၣ်​ ဒီးယပှၤဂီၢ်မုၢ် ကိးဂၤဒဲး ကဒိကနၣ်​ နကလုၢ်လၢ တၢ်ကိးမံၤဒဲး အပူၤလီၤ.+ ထဲဒၣ်လၢ ယမူဒါ ဒ်စီၤပၤအသိးန့ၣ်​ ယကဒိၣ်န့ၢ်နၤလီၤ.” ၄၁ ဒီးဖၤရိၤတဲဘၣ်​ စီၤယိၤသးလၢ “ကွၢ်မီၤ, ယကပာ်ထီၣ်နၤလၢ ကီၢ်အဲၤကူပတူး ဒီဘ့ၣ်ညါ အဖီခိၣ်လီၤ.”+ ၄၂ ဒီးဖၤရိၤ ဘ့ၣ်လီၤကွံာ် အပသံးတဘိလၢ အစုလိၤ ဒီးဒုးဖျီၣ်ထီၣ်ဝဲလၢ စီၤယိၤသး အစုလိၤ ဒီးဒုးသိးအီၤလၢ ဆ့ကူဆ့ကၤလၢ အညၣ်ဂ့ၤ ဒီးဒုးလံာ်ထီၣ်​ ဖဲထူတဘိလၢ အကိာ်ဘိအလိၤလီၤ. ၄၃ ဒီးဒုးဒိးထီၣ်အီၤလၢ ဖၤရိၤအလ့ၣ်ကဟၣ်​ လၢအဂ့ၤကတၢၢ် ခံခိၣ်တခိၣ်​ ဒီးပှၤကိးထီၣ်ဝဲလၢ အမဲာ်ညါလၢ “အၤဘရဲၣ်” လီၤ.* ဒီးဖၤရိၤန့ၣ်​ ပာ်ထီၣ်အီၤလၢ ကီၢ်အဲၤကူပတူး ဒီဘ့ၣ်ညါ အဖီခိၣ်လီၤ.

၄၄ ဒီးဖၤရိၤ တဲဘၣ်​ စီၤယိၤသးလၢ “ယမ့ၢ်ဖၤရိၤ ဘၣ်ဆၣ်​ နမ့ၢ်တဟ့ၣ်အခွဲးဘၣ်န့ၣ်​ လၢကီၢ်အဲၤကူပတူး ဒီတဘ့ၣ်ညါအပူၤ ပှၤတဂၤဂ့ၤ တဂၤဂ့ၤ မၤတၢ်တန့ၢ် နီတမံၤဘၣ်.”+ ၄၅ ဝံၤဒီးဖၤရိၤ ကိးန့ၢ်ဝဲ စီၤယိၤသးအမံၤလၢ စီၤစးဖနးသဖၤန့ၤ ဒီးဟ့ၣ်လီၤအီၤလၢ ဝ့ၢ်အိၣ်​ အပှၤလုၢ်တၢ်ဒိၣ်​ စီၤပိၤတံၤဖ့ရၤ အဖိမုၣ်​ နီၢ်အၤစနး+ ဒ်အမါအသိးလီၤ. ဒီးစီၤယိၤသး ကွၢ်ထွဲဝဲ ကီၢ်အဲၤကူပတူး ဒီဘ့ၣ်ညါလီၤ.+ ၄၆ ဖဲစီၤယိၤသး ဆၢထၢၣ်လၢ ကီၢ်အဲၤကူပတူး အစီၤပၤဖၤရိၤ အမဲာ်ညါအခါ အသးအိၣ်အနံၣ်​ ၃၀ လီၤ.+

ဒီးစီၤယိၤသး ဟးထီၣ်လၢ ဖၤရိၤအမဲာ်ညါ ဒီးလဲၤဝဲလၢ ကီၢ်အဲၤကူပတူး ဒီဘ့ၣ်ညါအပူၤလီၤ. ၄၇ ဖဲတၢ်အီၣ်တၢ်အီ အိၣ်ဝဲအါအါဂီၢ်ဂီၢ် လၢနွံနံၣ်အတီၢ်ပူၤန့ၣ်​ ဟီၣ်ခိၣ်ဒုးမဲထီၣ်တၢ် အါအါဂီၢ်ဂီၢ်လီၤ. ၄၈ ဒီးဖဲနွံနံၣ်​ အတီၢ်ပူၤန့ၣ်​ အဝဲထၢဖှိၣ်ဝဲ တၢ်အီၣ်တၢ်အီလၢ အအိၣ်လၢ ကီၢ်အဲၤကူပတူးအပူၤခဲလၢာ် ဒီးပာ်ဖှိၣ်ဃာ်ဝဲလၢ ဝ့ၢ်တဖၣ်​ အပူၤလီၤ. လၢဝ့ၢ်တဖျၢၣ်စုာ်စုာ် အပူၤန့ၣ်​ အဝဲပာ်ဖှိၣ်ဃာ် တၢ်အီၣ်တၢ်အီ လၢအအိၣ်လၢ စံာ်ပျီတဖၣ်လၢ ဝ့ၢ်တဖျၢၣ်စုာ်စုာ် အကပိာ်ကပၤန့ၣ်လီၤ. ၄၉ ဒီးစီၤယိၤသး ပာ်ဖှိၣ်ဝဲ ဘုဧိၤဟုဧိၤ န့ၢ်ဝဲအါအါဂီၢ်ဂီၢ် တုၤလၢ အအိၣ်အါဝဲထဲသိးဒီး မဲးလၢပီၣ်လဲၣ်နံၤ အသိးလီၤ. ဒီးမ့ၢ်လၢ အဝဲသ့ၣ်​ ဂံၢ်ဝဲဒွးဝဲ တဘၣ်ဘၣ်အဃိ တဂံၢ်ဝဲဒွးဝဲလၢၤဘၣ်.

၅၀ တချုးလၢ တၢ်သၣ်ဝံၤလီၤဒိ အိၣ်ထီၣ်ဒံးဘၣ်န့ၣ်​ ဝ့ၢ်အိၣ်​ အပှၤလုၢ်တၢ်ဒိၣ်​ စီၤပိၤတံၤဖ့ရၤ အဖိမုၣ်​ နီၢ်အၤစနး အိၣ်ဖျဲၣ်ထီၣ်န့ၢ် စီၤယိၤသး အဖိခွါခံဂၤလီၤ.+ ၅၁ ဒီးစီၤယိၤသး ကိးန့ၢ်ဝဲ အဖိခွါဝဲၢ်ကိ အမံၤလၢ စီၤမနၤၡ့ၤ,+ မ့ၢ်လၢ အတဲဝဲလၢ “ကစၢ်ယွၤ ဒုးသးပ့ၤနီၣ်ယၤလၢ ယတၢ်ကီတၢ်ခဲ ခဲလၢာ် ဒီးယတၢ်သးသယုၢ် ယပၢ်အဟံၣ်ဖိဃီဖိ ခဲလၢာ်လံ.” ၅၂ ဒီးစီၤယိၤသး ကိးန့ၢ်ဝဲ အဖိခွါခံဂၤတဂၤ အမံၤလၢ စီၤအ့ဖရဲၣ်,+ မ့ၢ်လၢ အတဲဝဲလၢ “ကစၢ်ယွၤ ဒုးသၣ်ထီၣ်အါထီၣ်​ ယၤလၢထံကီၢ်လၢ ယဘၣ်နးဘၣ်ဖှီၣ်​ လၢအပူၤန့ၣ်လီၤ.”+

၅၃ ဒီးတၢ်အီၣ်တၢ်အီ အိၣ်ဝဲအါအါဂီၢ်ဂီၢ်လၢ နွံနံၣ်အတီၢ်ပူၤန့ၣ်​ ဝံၤဝဲလီၤ.+ ၅၄ ဒီးတၢ်သၣ်ဝံၤလီၤဒိ နွံနံၣ်​ စးထီၣ်အသး ဒ်စီၤယိၤသး တဲဝဲအသိးလီၤ.+ တၢ်သၣ်ဝံၤလီၤဒိ အိၣ်ထီၣ်ဝဲလၢ ထံကီၢ်ကိးဘ့ၣ်ဒဲး ဘၣ်ဆၣ်​ လၢကီၢ်အဲၤကူပတူး ဒီဘ့ၣ်ညါအပူၤန့ၣ်​ တၢ်အီၣ်အိၣ်ဝဲလီၤ.+ ၅၅ လၢခံန့ၣ်​ တၢ်သၣ်ဝံၤလီၤဒိ အိၣ်ထီၣ်လၢ ကီၢ်အဲၤကူပတူးအပူၤ ဝးဝးလီၤ. အဃိ ပှၤထံဖိကီၢ်ဖိတဖၣ်​ ဃ့ထီၣ်တၢ်အီၣ်လၢ ဖၤရိၤအအိၣ်လီၤ.+ ဒီးဖၤရိၤ တဲဘၣ်​ ပှၤအဲၤကူပတူးဖိ ခဲလၢာ်လၢ “လဲၤလၢ စီၤယိၤသးအအိၣ်​ ဒီးမၤဒ် အတဲသုအသိးတက့ၢ်.”+ ၅၆ ဒီးတၢ်သၣ်ဝံၤလီၤဒိ ဆဲးအိၣ်ဝဲလၢ ဟီၣ်ခိၣ်ချၢ ဒီဘ့ၣ်ညါလီၤ.+ ဒီးစီၤယိၤသးအိးထီၣ်​ ဘုဖီကိးဖျၢၣ်ဒဲးလၢ အအိၣ်ဒီး အဝဲသ့ၣ်​ ဒီးဆါဝဲ ဘုဧိၤဟုဧိၤဆူ ပှၤအဲၤကူပတူးဖိအအိၣ်+ မ့ၢ်လၢ တၢ်သၣ်ဝံၤလီၤဒိ အိၣ်ထီၣ်ဝဲနးမး လၢကီၢ်အဲၤကူပတူး အပူၤအဃိလီၤ. ၅၇ တကးဒံးဘၣ်​ တၢ်သၣ်ဝံၤလီၤဒိ အိၣ်ထီၣ်ဝဲနးမးလၢ ဟီၣ်ခိၣ်ဒီဘ့ၣ်​ စ့ၢ်ကီးလီၤ. အဃိ ပှၤအိၣ်လၢ ဟီၣ်ခိၣ်ဒီဘ့ၣ်န့ၣ်​ လဲၤဝဲလၢ ကီၢ်အဲၤကူပတူးအပူၤ ဒ်သိးကပှ့ၤ တၢ်လၢ စီၤယိၤသး အအိၣ်လီၤ.+

၄၂ ဖဲစီၤယၤကိာ် သ့ၣ်ညါဝဲလၢ ဘုဧိၤဟုဧိၤ အိၣ်ဝဲလၢ ကီၢ်အဲၤကူပတူးပူၤအခါ+ အဝဲတဲဘၣ်​ အဖိခွါတဖၣ်လၢ “ဘၣ်မနုၤအဃိ သုကွၢ်လိာ်သုသး တဂၤဒီးတဂၤလဲၣ်.” ၂ ဒီးစီၤယၤကိာ် ဆဲးတဲဝဲလၢ “ယနၢ်ဟူလၢ ဘုဧိၤဟုဧိၤ အိၣ်ဝဲလၢ ကီၢ်အဲၤကူပတူး အပူၤလီၤ. ဒ်သိး ပသုတသံတဂ့ၤအဂီၢ် လဲၤလီၤဖဲန့ၣ်​ ဒီးပှ့ၤဘုဧိၤဟုဧိၤ လၢပဂီၢ်တနီၤတက့ၢ်.”+ ၃ အဃိ စီၤယိၤသး အဒီပုၢ်ဝဲၢ်ခွါ အဂၤတဆံန့ၣ်+ လဲၤလီၤလၢ ကီၢ်အဲၤကူပတူးအပူၤ ဒ်သိး ကပှ့ၤဘုဧိၤဟုဧိၤ အဂီၢ်လီၤ. ၄ မ့မ့ၢ် စီၤယိၤသးအပုၢ် စီၤဘံၣ်ယၤမံၣ်န့ၣ်+ စီၤယၤကိာ် တမၢအလဲၤတၢ်ဒီး အဒီပုၢ်ဝဲၢ်ခွါ အဂၤတဖၣ်ဘၣ်, မ့ၢ်လၢ စီၤယၤကိာ် တဲဝဲလၢ “ဘၣ်သ့ၣ်သ့ၣ်​ တၢ်ကကဲထီၣ်အသး တမံၤမံၤ ဒီးအဝဲ ကသံဘၣ်ဖုး”+ အဃိလီၤ.

၅ မ့ၢ်လၢ တၢ်သၣ်ဝံၤလီၤဒိ အိၣ်ထီၣ်စ့ၢ်ကီးဝဲလၢ ကီၢ်ကနၤဧၣ်​ အပူၤအဃိ စီၤအံၣ်စရ့လး အဖိခွါတဖၣ်န့ၣ်​ လဲၤတၢ်တပူၤဃီဒီး ပှၤအဂၤတဖၣ်​ ဒ်သိး ကပှ့ၤတၢ်အဂီၢ်လီၤ.+ ၆ စီၤယိၤသးန့ၣ်​ အိၣ်ဒီးတၢ်စိတၢ်ကမီၤလၢ ကီၢ်ပူၤဒီး+ မ့ၢ်ပှၤတဂၤလၢ အဆါန့ၢ်ဝဲ ပှၤခဲလၢာ်လၢ အအိၣ်လၢ ဟီၣ်ခိၣ်ဒီဘ့ၣ်လၢ ဘုဧိၤဟုဧိၤလီၤ.+ အဃိ စီၤယိၤသး အဒီပုၢ်ဝဲၢ်ခွါတဖၣ်​ ဟဲထိၣ်လီၤပှီၤအသးလၢ အမဲာ်ညါ ဒီးအဝဲသ့ၣ်​ ကျးလီၤအမဲာ် လၢဟီၣ်ခိၣ်လိၤလီၤ.+ ၇ ဖဲစီၤယိၤသး ထံၣ်ဘၣ်​ အဒီပုၢ်ဝဲၢ်ခွါတဖၣ်အခါ အဝဲကွၢ်နီၣ်​ အဝဲသ့ၣ်ဘၣ်​ တဘျီဃီလီၤ. ဘၣ်ဆၣ်​ အဝဲမ့ၢ် မတဂၤလဲၣ်န့ၣ်​ အတပာ်ဖျါထီၣ်န့ၢ် အဝဲသ့ၣ်ဘၣ်.+ ဒီးအတဲတၢ်ဒီး အဝဲသ့ၣ်​ ဆူၣ်ဆူၣ်ကိၤကိၤလၢ “သုဟဲဖဲလဲၣ်.” အဝဲသ့ၣ်​ တဲဆၢဝဲလၢ “ပဟဲလၢ ကီၢ်ကနၤဧၣ်​ ဒ်သိး ပကပှ့ၤတၢ်အီၣ်အဂီၢ်မီၤ.”+

၈ ဒီးစီၤယိၤသး ကွၢ်နီၣ်​ အဒီပုၢ်ဝဲၢ်ခွါတဖၣ်​ ဘၣ်ဝဲ ဘၣ်ဆၣ်​ အဝဲသ့ၣ်န့ၣ်​ ကွၢ်နီၣ်အီၤ တဘၣ်ဘၣ်. ၉ စီၤယိၤသး နီၣ်ဘၣ်က့ၤ တၢ်မံမီၢ်တဖၣ်​ လၢအမံမီၢ်ဝဲ ဘၣ်ဃးဒီး အဝဲသ့ၣ်အဂ့ၢ် တဘျီဃီ+ ဒီးတဲအဝဲသ့ၣ်လၢ “သုမ့ၢ် တၢ်မဲာ်ချံတဖၣ်လီၤသၢၤ. သုဟဲဒ်သိး သုကထံၣ်ဘၣ်လၢ ပထံပကီၢ် အတၢ်ဂံၢ်စၢ်ဘါစၢ်တဖၣ်​ အိၣ်ဖဲလဲၣ်န့ၣ်လီၤ.” ၁၀ အဝဲသ့ၣ်​ တဲအီၤလၢ “တမ့ၢ်ဘၣ်. ကစၢ်ဧၢ, ပဝဲ နခ့နပှၤတဖၣ်အံၤ ပဟဲလၢ ပကပှ့ၤတၢ်အီၣ်​ အဂီၢ်လီၤ. ၁၁ ပဝဲဒီပုၢ်ဝဲၢ်ခဲလၢာ်န့ၣ်​ ပပၢ်မ့ၢ်တဂၤဃီလီၤ. ပမ့ၢ်ပှၤလၢ အတဲတၢ် တီတီလိၤလိၤလီၤ. ပဝဲနခ့နပှၤတဖၣ်အံၤ တမ့ၢ် တၢ်မဲာ်ချံတဖၣ်ဘၣ်.” ၁၂ ဘၣ်ဆၣ်​ စီၤယိၤသး တဲအဝဲသ့ၣ်လၢ “တမ့ၢ်ဒ်န့ၣ်ဘၣ်. သုဟဲဒ်သိး သုကထံၣ်ဘၣ်လၢ ပထံပကီၢ် အတၢ်ဂံၢ်စၢ်ဘါစၢ်တဖၣ်​ အိၣ်ဖဲလဲၣ်န့ၣ်လီၤ.” ၁၃ ဒီးအဝဲသ့ၣ်​ တဲဝဲလၢ “ပဝဲနခ့နပှၤတဖၣ်အံၤ ပဒီပုၢ်ဝဲၢ်ခွါ အိၣ်ဝဲ ၁၂ ဂၤလီၤ.+ ဒီးပပၢ်မ့ၢ် တဂၤဃီ+ ဒီးအအိၣ်လၢ ကီၢ်ကနၤဧၣ်​ အပူၤလီၤ. ဒီးပဒ့ခွါလၢ အသဒါတဂၤန့ၣ်​ အအိၣ်ဒီး ပပၢ်+ ဒီးမ့မ့ၢ် အဝဲတဂၤန့ၣ်​ တအိၣ်လၢၤဘၣ်.”+

၁၄ ဘၣ်ဆၣ်​ စီၤယိၤသး တဲအဝဲသ့ၣ်လၢ “ဒ်ယတဲသုအသိး ‘သုမ့ၢ် တၢ်မဲာ်ချံတဖၣ်လီၤ.’ ၁၅ မ့ၢ်သုတဲတၢ် တီဧါ တတီဧါန့ၣ်​ ယကမၤကွၢ်သုတထံၣ်. ယအၢၣ်လီၤလၢ ဖၤရိၤအမံၤပူၤလၢ တချုးလၢ သုဒ့ခွါသဒါ ဟဲတုၤဖဲအံၤဒံးဘၣ်န့ၣ် သုဟးထီၣ်လၢ တၢ်လီၢ်ဖဲအံၤတန့ၢ်ဘၣ်.+ ၁၆ အဃိ မၢပှၤလၢ သုကျါတဂၤ က့ၤကိးန့ၢ် သုပုၢ် ဒီးမ့မ့ၢ် သုဝဲအဂၤတဖၣ်န့ၣ်​ ကဘၣ်တၢ်စၢဃာ်သုလီၤ. ယမ့ၢ်မၤဒ်အံၤမး ယမၤကွၢ်သုကသ့ ဒီးယကသ့ၣ်ညါလၢ သုတဲတၢ် တီဧါ တတီဧါန့ၣ်လီၤ. ဒီးသုတဲတၢ် မ့ၢ်တတီဘၣ်န့ၣ်​ ယအၢၣ်လီၤလၢ ဖၤရိၤအမံၤပူၤလၢ သုမ့ၢ် တၢ်မဲာ်ချံတဖၣ်လီၤ.” ၁၇ ဒီးစီၤယိၤသး ပာ်အဝဲသ့ၣ်လၢ တၢ်လီၢ်တပူၤဃီ သၢသီလီၤ.

၁၈ လၢသၢသီတသီန့ၣ်​ စီၤယိၤသး တဲအဝဲသ့ၣ်လၢ “ယမ့ၢ်ပှၤတဂၤလၢ အပျံၤကစၢ်ယွၤလီၤ. အဃိ မၤဒ်သိး ယတဲသု ဒီးသုကဆဲးမူလီၤ. ၁၉ သုမ့မ့ၢ် ပှၤလၢအတဲတၢ် တီတီလိၤလိၤန့ၣ်​ မ်ပှၤလၢသု ဒီပုၢ်ဝဲၢ်တဖၣ်အကျါတဂၤ အိၣ်တ့ၢ်လၢဟံၣ်​ ဖဲတၢ်စၢဃာ်သု အလီၢ်တက့ၢ်. မ့မ့ၢ် သုဒီပုၢ်ဝဲၢ် အဂၤတဖၣ်န့ၣ်​ သုက့ၤစိာ်ဘုဧိၤဟုဧိၤလၢ ကမၤစၢၤ သုဟံၣ်ဖိဃီဖိလၢ အလီၤဒိတဖၣ်အဂီၢ် သ့ဝဲလီၤ.+ ၂၀ သုမ့ၢ်ဟဲကိး သုဒ့ခွါသဒါ လၢယအိၣ်မး ယနာ်အီၣ်​ သုတၢ်ကတိၤကသ့ ဒီးသုတသံလၢၤဘၣ်.” ဒီးအဝဲသ့ၣ်​ တူၢ်လိာ်ဝဲလၢ အကမၤဒ်န့ၣ်လီၤ.

၂၁ ဒီးအဝဲသ့ၣ်​ တဲလိာ်အသးလၢ “လၢပပုၢ်အဃိ တၢ်စံၣ်ညီၣ်လီၤဘၣ်ပှၤလံ.+ လၢတၢ်သူၣ်ကိၢ်သးဂီၤအပူၤ အဝဲဃ့ကညးပှၤလၢ ပကပာ်ဖျါထီၣ်​ တၢ်သးကညီၤ ဘၣ်ဆၣ်​ ပတကနၣ်ဘၣ်. အဃိ ပတူၢ်ဘၣ်​ တၢ်သူၣ်ကိၢ်သးဂီၤတခါအံၤလံ.” ၂၂ ဒီးစီၤရူၤဘ့ၣ်​ တဲအဝဲသ့ၣ်လၢ “ယတဲသုလၢ ‘မၤဘၣ်ဒိ ဖိသၣ်တဂၤန့ၣ်တဂ့ၤ’ ဘၣ်ဆၣ်​ သုတကနၣ်ယၤဘၣ်.+ ခဲအံၤ တၢ်ဃ့က့ၤအသွံၣ်​ လၢပအိၣ်လံ.”+ ၂၃ ဒီးမ့ၢ်လၢ ပှၤဘၣ်တဲကျိာ်ထံန့ၢ်တၢ် လၢအဝဲသ့ၣ်​ အဂီၢ်အဃိ အဝဲသ့ၣ်​ တသ့ၣ်ညါဝဲလၢ စီၤယိၤသးနၢ်ပၢၢ် အဝဲသ့ၣ်ဘၣ်. ၂၄ စီၤယိၤသး ဟးထီၣ်ကွံာ် လၢအဝဲသ့ၣ်အအိၣ်​ ဒီးဟီၣ်ဝဲလီၤ.+ ဖဲအဟဲက့ၤ တဲသကိးတၢ်ဒီး အဝဲသ့ၣ်အခါ အဝဲဟံးန့ၢ်ဝဲ စီၤစူၤမ့းအိၣ်+ လၢအဝဲသ့ၣ်အအိၣ်​ ဒီးစၢဃာ်အီၤလၢ အဝဲသ့ၣ်​ အမဲာ်ညါလီၤ.+ ၂၅ ဒီးစီၤယိၤသး ဟ့ၣ်လီၤတၢ်ကလုၢ်လၢ ပှၤကမၤပှဲၤန့ၢ် အဝဲသ့ၣ်အထၢၣ်တဖၣ်​ လၢဘုဧိၤဟုဧိၤ ဒီးဖၢနုာ်က့ၤ အဝဲသ့ၣ်တဂၤစုာ်စုာ် အစ့လၢ အဝဲသ့ၣ်အနီၢ်ကစၢ် အထၢၣ်ပူၤ ဒီးဟ့ၣ်လီၤအဝဲသ့ၣ်​ တၢ်အီၣ်တၢ်အီ လၢတၢ်လဲၤတၢ်က့ၤအဂီၢ်လီၤ. ဒီးပှၤမၤန့ၢ် အဝဲသ့ၣ်ဒ်န့ၣ်လီၤ.

၂၆ ဒီးအဝဲသ့ၣ်​ တီၣ်ထီၣ်​ ဘုဧိၤဟုဧိၤလၢ အကသ့ၣ်ယီၤတဖၣ်အလိၤ ဒီးဟးထီၣ်ဝဲ ဖဲန့ၣ်လီၤ. ၂၇ ဒီးပှၤလၢ အဝဲသ့ၣ်အကျါတဂၤ အိးထီၣ်အထၢၣ်​ ဒ်သိး အကဒုးအီၣ်​ အကသ့ၣ်ယီၤအဆၣ်​ ဖဲတၢ်လီၢ်လၢ အဝဲသ့ၣ်​ ကမံဝဲ ဒီးထံၣ်ဝဲလၢ အစ့အိၣ်ဝဲလၢ အထၢၣ်ပူၤလီၤ. ၂၈ ဒီးအတဲဘၣ်​ အဒီပုၢ်ဝဲၢ်ခွါတဖၣ်လၢ “ပှၤဟ့ၣ်က့ၤ ယစ့လံ ဒီးအအိၣ်ဖဲအံၤ လၢယထၢၣ်ပူၤလီၤ.” ဒီးအဝဲသ့ၣ်​ အသးချံၣ်လီၤ ဒီးအဝဲသ့ၣ်​ ကနိးဝဲ ဒီးတဲလိာ်အသး တဂၤဒီးတဂၤလၢ “ဘၣ်မနုၤအဃိ ကစၢ်ယွၤ မၤပှၤဒ်အံၤလဲၣ်.”

၂၉ ဖဲအဝဲသ့ၣ်​ က့ၤတုၤလၢ အပၢ်စီၤယၤကိာ်အအိၣ်​ လၢကီၢ်ကနၤဧၣ်​ အပူၤအခါ အဝဲသ့ၣ်တဲဘၣ်အီၤ လၢတၢ်မၤအသးဒီး အဝဲသ့ၣ်ခဲလၢာ်အဂ့ၢ် ဒီးတဲဝဲလၢ ၃၀ “ပှၤလၢအကဲ ထံကီၢ်အခိၣ်​ တဂၤန့ၣ်​ တဲတၢ်ဒီးပှၤ ဆူၣ်ဆူၣ်ကိၤကိၤ+ ဒီးပာ်ဒ့ၣ်ပာ်ကမၣ်ပှၤလၢ ပလဲၤကွၢ်ဟုၣ်တၢ် လၢအကီၢ်ပူၤလီၤ. ၃၁ ဘၣ်ဆၣ်​ ပတဲအီၤလၢ ‘ပမ့ၢ်ပှၤလၢ အတဲတၢ် တီတီလိၤလိၤလီၤ. ပတမ့ၢ် တၢ်မဲာ်ချံတဖၣ်ဘၣ်.+ ၃၂ ပဒီပုၢ်ဝဲၢ်ခွါအိၣ်ဝဲ ၁၂ ဂၤ+ ဒီးပပၢ်မ့ၢ် တဂၤဃီလီၤ. ဒီးပဒ့ခွါသဒါန့ၣ်​ အိၣ်ဒီးပပၢ်လၢ ကီၢ်ကနၤဧၣ်အပူၤ+ ဒီးမ့မ့ၢ် အဝဲတဂၤန့ၣ်​ တအိၣ်လၢၤဘၣ်.’+ ၃၃ ဘၣ်ဆၣ်​ ပှၤလၢအကဲ ထံကီၢ်အခိၣ်​ တဂၤန့ၣ်​ တဲပှၤလၢ ‘ပာ်တ့ၢ် သုဒီပုၢ်ဝဲၢ်ခွါတဂၤဂၤ လၢယအိၣ်+ ဒီးမ့မ့ၢ် သုဒီပုၢ်ဝဲၢ် အဂၤတဖၣ်န့ၣ်​ သုက့ၤစိာ်ဘုဧိၤဟုဧိၤလၢ ကမၤစၢၤ သုဟံၣ်ဖိဃီဖိလၢ အလီၤဒိတဖၣ်အဂီၢ် သ့ဝဲလီၤ. သုမ့ၢ်မၤဒ်န့ၣ်န့ၣ်​ ယကသ့ၣ်ညါလၢ သုတဲတၢ် တီတီလိၤလိၤလီၤ.+ ၃၄ ဒီးဒ်သိး ယကသ့ၣ်ညါလၢ သုမ့ၢ်ပှၤလၢ အတဲတၢ် တီတီလိၤလိၤ ဒီးသုတမ့ၢ် တၢ်မဲာ်ချံတဖၣ်ဘၣ်အဂီၢ် ဟဲကိး သုဒ့ခွါသဒါ လၢယအိၣ်တက့ၢ်. ဝံၤဒီးယကဟ့ၣ်က့ၤသုလၢ သုဒီပုၢ်ဝဲၢ်တဂၤန့ၣ်​ ဒီးသုဟဲပှ့ၤတၢ် လၢသုလိၣ်ဘၣ်အီၤတဖၣ်​ လၢပထံပကီၢ် အပူၤသ့လီၤ.’”

၃၅ ဖဲအဝဲသ့ၣ်​ လူလီၤဝဲ အထၢၣ်အခါ အဝဲသ့ၣ်​ တဂၤစုာ်စုာ်န့ၣ်​ အစ့ဘိၣ်​ အိၣ်ဝဲလၢ အထၢၣ်ပူၤလီၤ. ဖဲအဝဲသ့ၣ်​ ဒီးအပၢ် ထံၣ်ဝဲ စ့အဘိၣ်တဖၣ်အခါ အဝဲသ့ၣ်​ ပျံၤတၢ်လီၤ. ၃၆ အဝဲသ့ၣ်အပၢ် စီၤယၤကိာ် တဲဝဲလၢ “သုမၤလီၤမၢ် ယဖိတဖၣ်လံ.+ စီၤယိၤသး တအိၣ်လၢၤဘၣ်+ ဒီးစီၤစူၤမ့းအိၣ်စ့ၢ်ကီး တအိၣ်လၢၤဘၣ်.+ ဒီးခဲအံၤ သုကဟံးန့ၢ် စီၤဘံၣ်ယၤမံၣ်ဒံး. ဘၣ်မနုၤအဃိ တၢ်သ့ၣ်တဖၣ်အံၤခဲလၢာ် ဟဲဘၣ်ယၤလဲၣ်.” ၃၇ ဒီးစီၤရူၤဘ့ၣ်​ တဲဘၣ်အပၢ်လၢ “ယမ့ၢ်တဟဲက့ၤကိး စီၤဘံၣ်ယၤမံၣ်​ လၢနအိၣ်ဘၣ်န့ၣ်​ နမၤသံကွံာ် ယဖိခွါ ခံဂၤသ့လီၤ.+ အးလီၤ စီၤဘံၣ်ယၤမံၣ်လၢယစုပူၤ ဒီးယက ဟဲက့ၤကိးအီၤ လၢနအိၣ်လီၤ.”+ ၃၈ ဘၣ်ဆၣ်​ စီၤယၤကိာ် တဲဝဲလၢ “ယဖိခွါ တဘၣ်လဲၤလီၤဒီးသုဘၣ်. အကၠီန့ၣ်​ သံလံ ဒီးအိၣ်တ့ၢ် ထဲအီၤတဂၤလီၤ.+ ဖဲသုလဲၤတၢ်အခါ တၢ်မ့ၢ်ကဲထီၣ်အသး တမံၤမံၤ ဒီးအဝဲ မ့ၢ်သံဘၣ်ဖုးန့ၣ်​ သုကဒုးလဲၤလီၤယၤလၢ တၢ်သွၣ်ခိၣ်အပူၤ*+ လၢတၢ်သးအုးအဃိ ဖဲယခိၣ်ဆူၣ်ဝါ ဒ်အံၤအခါလီၤ.”+

၄၃ တၢ်သၣ်ဝံၤလီၤဒိ အိၣ်ဝဲလၢ ကီၢ်ပူၤနးမးလီၤ.+ ၂ ဖဲအဝဲသ့ၣ်​ အီၣ်ဝဲ ဘုဧိၤဟုဧိၤလၢ အဝဲသ့ၣ်​ ဟဲက့ၤစိာ်ဝဲလၢ ကီၢ်အဲၤကူပတူးအပူၤ+ လၢာ်ဝဲအခါ အပၢ်တဲ အဝဲသ့ၣ်လၢ “လဲၤပှ့ၤကဒီး တၢ်အီၣ်လၢ ပဂီၢ်တစဲးမီၤ.” ၃ စီၤယူဒၤ တဲအီၤလၢ “ပှၤတဂၤန့ၣ်​ ဟ့ၣ်ပလီၢ်ပှၤ လီၤတံၢ်လီၤဆဲးလၢ ‘သုဒ့ခွါ မ့ၢ်တဟဲဒီးသုဘၣ်န့ၣ်​ သုတဘၣ်​ ဟဲထံၣ်ယၤလၢၤတဂ့ၤ.’+ ၄ နမ့ၢ်မၢ ပဒ့ခွါ လဲၤပိာ်ပခံန့ၣ်​ ပကလဲၤလီၤပှ့ၤန့ၢ်နၤ တၢ်အီၣ်လီၤ. ၅ ဘၣ်ဆၣ်​ နမ့ၢ်တမၢပဒ့ခွါ လဲၤပိာ်ပခံဘၣ်န့ၣ်​ ပတလဲၤလီၤဘၣ်​ မ့ၢ်လၢ ပှၤတဂၤန့ၣ်​ ဟ့ၣ်ပလီၢ်ပှၤ လီၤတံၢ်လီၤဆဲးလၢ ‘သုဒ့ခွါ မ့ၢ်တဟဲဒီးသုဘၣ်န့ၣ်​ သုတဘၣ်​ ဟဲထံၣ်ယၤလၢၤတဂ့ၤ.’”+ ၆ ဒီးစီၤအံၣ်စရ့လး+ တဲဝဲလၢ “ဘၣ်မနုၤအဃိ သုဒုးအိၣ်ထီၣ်​ တၢ်ကီတၢ်ခဲ တခါအံၤ လၢယဂီၢ် ခီဖျိလၢ သုတဲပှၤတဂၤန့ၣ် လၢသုဒီပုၢ်ဝဲၢ်ခွါ အိၣ်ဒံးတဂၤလဲၣ်.” ၇ အဝဲသ့ၣ်​ တဲဆၢဝဲလၢ “အဝဲသံကွၢ်ပဂ့ၢ် ဒီးပဟံၣ်ဖိဃီဖိအဂ့ၢ် လိၤလိၤလၢ ‘သုပၢ်အိၣ်မူဒံးဧါ. သုဒီပုၢ်ဝဲၢ်ခွါ အိၣ်ဒံးတဂၤဂၤဧါ.’ ဒီးပတဲဘၣ်အီၤ တၢ်ဂ့ၢ်ဝဲန့ၣ်.+ ဒီးအဝဲကတဲလၢ ‘ဟဲက့ၤကိးဃုာ်ဒီး သုဒ့ခွါ’ န့ၣ်​ ပသ့ၣ်ညါဆိ ကသ့ဒ်လဲၣ်.”+

၈ စီၤယူဒၤ တဲအပၢ် စီၤအံၣ်စရ့လးလၢ “ဒ်သိး နၤဒီးပှၤ ဒီးပဖိပလံၤတဖၣ်+ သုတသံတဂ့ၤ အဂီၢ်+ ပကလဲၤတၢ်လီၤ. အဃိ မၢပဒ့ခွါသဒါ လဲၤဒီးယၤမီၤ.+ ၉ ဘၣ်ဃးဒီးအီၤန့ၣ်​ ယကဟံးမူဒါလီၤ.+ တၢ်မ့ၢ်ကဲထီၣ်အသးဒီးအီၤ တမံၤမံၤန့ၣ်​ နဟံးန့ၢ်အရ့ လၢယအိၣ်သ့လီၤ. ယမ့ၢ် တဟဲက့ၤကိးအီၤ လၢနအိၣ်​ ဒီးပာ်အီၤလၢ နမဲာ်ညါဘၣ်န့ၣ်​ မ်ယတၢ်ဒဲးဘး အိၣ်လၢနမဲာ်ညါ တစိၤယသးတက့ၢ်. ၁၀ လၢညါ ပမ့ၢ်တမၤယံာ်မၤနီၢ် ပသးဘၣ်န့ၣ်​ ပလဲၤဒီးဟဲက့ၤ ကန့ၢ်ခံဘျီလံ.”

၁၁ ဒီးအပၢ် စီၤအံၣ်စရ့လးန့ၣ်​ တဲအဝဲသ့ၣ်လၢ “ကျဲလၢအဂၤမ့ၢ်တအိၣ်ဘၣ်ဒု မၤဒ်အံၤနီၤ. တၢ်လၢအဂ့ၤကတၢၢ်လၢ ထံကီၢ်အံၤအပူၤန့ၣ်​ ထၢနုာ်အီၤလၢ သုထၢၣ်ပူၤ ဒီးလဲၤစိာ်န့ၢ် ပှၤတဂၤန့ၣ်​ ဒ်တၢ်ဟ့ၣ်အသိးတက့ၢ်.+ လဲၤစိာ်န့ၢ်အီၤ သ့ၣ်စရံအထုး တစဲး,+ ကနဲစီတစဲး, နီၣ်တြူးနကိးအဃ့, သ့ၣ်လိးအထုး,+ သ့အီၣ်ဘိတၣ်အသၣ်​ ဒီးၡၤကးသၣ်တက့ၢ်. ၁၂ သုကဘၣ်​ လဲၤစိာ် စ့ခံစး ဒီးစ့လၢပှၤထၢနုာ်က့ၤလၢ သုထၢၣ်တဖၣ်​ အပူၤန့ၣ်​ ဘၣ်သ့ၣ်သ့ၣ်​ ပှၤထၢနုာ်ကမၣ်အဃိ သုကဘၣ်​ လဲၤစိာ်ဃုာ်စ့တဖၣ်န့ၣ်စ့ၢ်ကီးနီၤ.+ ၁၃ ကိးထီၣ်သုဒ့ခွါ ဒီးလဲၤလၢ ပှၤတဂၤန့ၣ်​ အအိၣ်တက့ၢ်. ၁၄ မ်သ့တၢ်လၢာ်ကစၢ် မၤစၢၤသု ဒ်သိးပှၤတဂၤန့ၣ်​ ကသးကညီၤသု ဒီးကပျၢ်န့ၢ်သုလၢ သုဒီပုၢ်ဝဲၢ်ခွါ အဝဲတဂၤ ဒီးစီၤဘံၣ်ယၤမံၣ်​ န့ၣ်တက့ၢ်. မ့မ့ၢ်ယၤန့ၣ်​ ယမ့ၢ်ဘၣ်​ တူၢ်ၡူကွံာ်ယဖိန့ၣ်​ ယဘၣ်တူၢ်ၡူကွံာ်ဝဲန့ၣ်.”+

၁၅ ဒီးအဝဲသ့ၣ်​ လဲၤစိာ်ဝဲ တၢ်ဟ့ၣ်အံၤဒီး လဲၤစိာ်စ့ၢ်ကီး စ့ခံစးလၢ အစုပူၤလီၤ. တကးဒံးဘၣ်​ လဲၤကိးဃုာ်ဝဲဒီး စီၤဘံၣ်ယၤမံၣ်လီၤ. အဝဲသ့ၣ်​ လဲၤလီၤလၢ ကီၢ်အဲၤကူပတူးအပူၤ ဒ်သိး ကလဲၤထံၣ်လိာ်သးဒီး စီၤယိၤသး လၢအသီတဘျီ အဂီၢ်လီၤ.+ ၁၆ ဖဲစီၤယိၤသး ထံၣ်ဝဲလၢ စီၤဘံၣ်ယၤမံၣ်​ ဟဲပိာ်အဝဲသ့ၣ်​ အခံအခါ အဝဲတဲဝဲ ပှၤလၢအပၢဘၣ်​ အဟံၣ်တဂၤလၢ “လဲၤကိး ပှၤသ့ၣ်တဖၣ်အံၤ ဆူယဟံၣ်တက့ၢ်. အဝဲသ့ၣ်​ ကအီၣ်သကိးတၢ်ဒီးယၤ ဖဲမုၢ်ထူၣ်ခါအဃိ မၤသံဆၣ်ဖိကီၢ်ဖိတဖၣ်​ ဒီးကတဲာ်ကတီၤ တၢ်အီၣ်တၢ်အီတက့ၢ်.” ၁၇ ပှၤတဂၤန့ၣ်​ မၤဝဲဒ် စီၤယိၤသး တဲအီၤအသိး တဘျီဃီ+ ဒီးလဲၤကိး အဝဲသ့ၣ်လၢ စီၤယိၤသး အဟံၣ်လီၤ. ၁၈ ဘၣ်ဆၣ်​ ဖဲပှၤလဲၤကိး အဝဲသ့ၣ်လၢ စီၤယိၤသး အဟံၣ်အခါ အဝဲသ့ၣ်ပျံၤတၢ် ဒီးတဲဝဲလၢ “ပှၤဟဲကိးပှၤ ဖဲအံၤ ခီဖျိလၢ စ့လၢပှၤပၢနုာ်ကဒါက့ၤအီၤလၢ ပထၢၣ်ပူၤ လၢညါတဘျီ အဃိလီၤ. ခဲအံၤ အဝဲသ့ၣ်​ ကဖီၣ်ပှၤ ဒီးကဒုးကဲကုၢ်ပှၤ ဒီးဟံးန့ၢ် ပကသ့ၣ်ယီၤတဖၣ်လီၤ.”+

၁၉ အဃိ အဝဲသ့ၣ်လဲၤလၢ ပှၤလၢအပၢဘၣ်​ စီၤယိၤသး အဟံၣ်တဂၤအအိၣ်​ ဒီးတဲတၢ်ဒီးအီၤလၢ ဟံၣ်ပဲတြီ အခိၣ်ထိးန့ၣ်လီၤ. ၂၀ ဒီးအဝဲသ့ၣ်​ တဲဝဲလၢ “ကစၢ်ဧၢ, ဝံသးစူၤပှၤနီၤ, ပဟဲလီၤပှ့ၤတၢ်အီၣ်​ လၢညါတဘျီလံ.+ ၂၁ ဘၣ်ဆၣ်​ ဖဲပက့ၤတုၤလၢ တၢ်လီၢ်လၢ ပကမံအခါ ပအိးထီၣ်ပထၢၣ်တဖၣ်​ ဒီးပစ့ခဲလၢာ် အိၣ်ဝဲလၢ ပဝဲတဂၤစုာ်စုာ် အထၢၣ်ပူၤလီၤ.+ အဃိ ပအဲၣ်ဒိး ဟ့ၣ်က့ၤ စ့တဖၣ်အံၤ လၢပနီၢ်ကစၢ်လီၤ. ၂၂ ဒီးပဟဲစိာ်အါထီၣ်​ စ့လၢ ပကပှ့ၤ တၢ်အီၣ်အဂီၢ် စ့ၢ်ကီးလီၤ. မ့ၢ်မတဂၤ ပၢနုာ်က့ၤပစ့လၢ ပထၢၣ်တဖၣ်​ အပူၤလဲၣ်န့ၣ်​ ပတသ့ၣ်ညါဘၣ်.”+ ၂၃ ဒီးပှၤလၢအပၢဘၣ်​ စီၤယိၤသး အဟံၣ်တဂၤန့ၣ်​ တဲဝဲလၢ “ဘၣ်နီမံၤဘၣ်, တဘၣ်ပျံၤတၢ်တဂ့ၤ. ယန့ၢ်ဘၣ်ဆိ သုစ့ ဝံၤဒီးသုကစၢ်ယွၤ ဒီးသုပၢ် အကစၢ်ယွၤန့ၣ်​ ထၢနုာ်ဝဲ တၢ်လုၢ်ဒိၣ်ပှ့ၤဒိၣ်တဖၣ်​ လၢသုထၢၣ်တဖၣ်​ အပူၤလီၤ.” ဖဲန့ၣ်ဝံၤအလီၢ်ခံ အဝဲဟဲကိးဝဲ စီၤစူၤမ့းအိၣ်​ လၢအဝဲသ့ၣ်​ အအိၣ်လီၤ.+

၂၄ ဒီးပှၤတဂၤန့ၣ်​ လဲၤကိးအဝဲသ့ၣ်​ လၢစီၤယိၤသးအဟံၣ်ပူၤ ဒီးဟ့ၣ်လီၤအဝဲသ့ၣ်ထံ ဒ်သိး ကသ့အခီၣ်အဂီၢ် ဒီးဟ့ၣ်လီၤစ့ၢ်ကီးဝဲ အဝဲသ့ၣ်​ အကသ့ၣ်ယီၤတဖၣ်​ အဆၣ်လီၤ. ၂၅ အဝဲသ့ၣ်​ နၢ်ဟူဝဲလၢ စီၤယိၤသး ကဟဲလၢ မုၢ်ထူၣ်​ ဒီးအီၣ်သကိးတၢ်ဒီး အဝဲသ့ၣ်ဖဲန့ၣ်+ အဃိ အဝဲသ့ၣ်​ ကတဲာ်ကတီၤ တၢ်ဟ့ၣ်လၢ အဂီၢ်လီၤ.+ ၂၆ ဖဲစီၤယိၤသး လဲၤနုာ်လၢ ဟံၣ်ပူၤအခါ အဝဲသ့ၣ်​ ဟဲစိာ်ဝဲ တၢ်ဟ့ၣ်လၢအဂီၢ် ဒီးအဝဲသ့ၣ်​ ထိၣ်လီၤပှီၤအသး လၢအမဲာ်ညါ လၢဟီၣ်ခိၣ်လိၤလီၤ.+ ၂၇ ဒီးစီၤယိၤသး သံကွၢ်တၢ် ဘၣ်ဃးဒီး အဝဲသ့ၣ်​ အတၢ်အိၣ်ဆူၣ်အိၣ်ချ့အဂ့ၢ် ဝံၤဒီးတဲဝဲလၢ “သုပၢ်သးပှၢ်တဂၤလၢ သုတဲတ့ၢ်အဂ့ၢ်န့ၣ်​ အမၤသးဒ်လဲၣ်, အအိၣ်မူဒံးဧါ.”+ ၂၈ အဝဲသ့ၣ်​ တဲဆၢဝဲလၢ “နခ့နပှၤ လၢအမ့ၢ် ပပၢ်န့ၣ်​ အိၣ်မူဒံး ဒီးအအိၣ်ဆူၣ်အိၣ်ချ့လီၤ.” ဝံၤဒီး အဝဲသ့ၣ်​ ထိၣ်လီၤပှီၤအသးလီၤ.+

၂၉ ဖဲအဝဲ ကွၢ်ထီၣ်တၢ် ဒီးထံၣ်ဘၣ်​ အမိၢ်အဖိခွါ လၢအမ့ၢ် အဒ့ခွါ စီၤဘံၣ်ယၤမံၣ်အခါ+ အတဲဝဲလၢ “အဝဲအံၤကဲ သုဒ့ခွါသဒါလၢ သုတဲယၤတဂၤန့ၣ်ဧါ.”+ ဒီးစီၤယိၤသး တဲအီၤလၢ “ဖိခွါဧၢ, မ်ကစၢ်ယွၤ ဆိၣ်ဂ့ၤနၤတက့ၢ်.” ၃၀ လၢအဒ့ခွါအဃိ စီၤယိၤသး ပၢၤအသး တန့ၢ်လၢၤဘၣ်​ ဒီးကရီဟးထီၣ်​ ဃုတၢ်လီၢ်ဒ်သိး အကဟီၣ်ဝဲအဂီၢ်လီၤ. အဝဲ လဲၤနုာ်လီၤအိၣ်လၢ ဒၢးတဖျၢၣ်အပူၤ ထဲတဂၤ ဒီးအမဲာ်ထံလီၤ ဖဲန့ၣ်လီၤ.+ ၃၁ ဖဲန့ၣ်ဝံၤအလီၢ်ခံ အပျၢ်ကွံာ်အမဲာ် ဒီးဟးထီၣ်ကွံာ်ဖဲန့ၣ်လီၤ. ဒီးအပၢၤအသးန့ၢ်လံ ဒီးတဲဝဲလၢ “ပာ်လီၤတၢ်အီၣ်တက့ၢ်.” ၃၂ အဝဲသ့ၣ်​ ပာ်လီၤန့ၢ်တၢ်အီၣ်​ လၢစီၤယိၤသးအဂီၢ်လၢ စီၢ်နီၤခိၣ်တဖျၢၣ်အလိၤ ဒီးတၢ်အီၣ်လၢ အဒီပုၢ်ဝဲၢ်ခွါတဖၣ်အဂီၢ် လၢစီၢ်နီၤခိၣ်​ အဂၤတဖျၢၣ်အလိၤ ဒီးပှၤအဲၤကူပတူးဖိလၢ အအိၣ်ဒီး စီၤယိၤသးန့ၣ်​ အီၣ်တၢ်လၢ စီၢ်နီၤခိၣ်​ အဂၤတဖျၢၣ်လီၤ. တၢ်လၢ ပှၤအဲၤကူပတူးဖိတဖၣ်န့ၣ်​ အီၣ်သကိးတၢ်ဒီး ပှၤဧ့ၤဘြံၤဖိတဖၣ်​ တသ့ဘၣ်, ခီဖျိလၢ အမ့ၢ်တၢ်လၢ အလီၤသးဘၣ်အၢတမံၤ လၢပှၤအဲၤကူပတူးဖိ အဂီၢ် အဃိလီၤ.+

၃၃ ဒီးစီၤယိၤသး ဒုးဆ့ၣ်နီၤ အဒီပုၢ်ဝဲၢ်ခွါတဖၣ်​ လၢအမဲာ်ညါ ဒ်အဝဲသ့ၣ်​ အသးနံၣ်​ အိၣ်ဝဲအသိး စးထီၣ်လၢ အဝဲၢ်ကိ ဒ်အဝဲၢ်ကိ အတၢ်ခွဲးတၢ်ယာ် အိၣ်ဝဲအသိး+ တုၤလၢ အဆံးကတၢၢ်တဂၤလီၤ. ဒီးအဝဲသ့ၣ်​ ကမၢကမၣ်ဝဲ ဒီးကွၢ်လိာ်အသး တဂၤဒီးတဂၤလီၤ. ၃၄ ဒီးတၢ်အီၣ်လၢ အဘၣ်တၢ်ပာ်လီၤအီၤလၢ စီၤယိၤသးအစီၢ်နီၤခိၣ်န့ၣ်​ စီၤယိၤသးဆှၢလီၤဝဲ တနီၤလၢ အဝဲသ့ၣ်​ အစီၢ်နီၤခိၣ်​ တဘျီဝံၤတဘျီလီၤ. ဘၣ်ဆၣ်​ အဝဲဆှၢလီၤန့ၢ် စီၤဘံၣ်ယၤမံၣ်​ အါန့ၢ်ဒံး အဒီပုၢ်ဝဲၢ် အဂၤတဖၣ်​ ယဲၢ်စးညါလီၤ.+ ဒီးအဝဲသ့ၣ်​ အီၣ်တၢ်အီတၢ် ဘျဲဘျဲလီၤ.

၄၄ လၢခံ စီၤယိၤသး မၤလိာ် ပှၤလၢအပၢဘၣ်​ အဟံၣ်တဂၤလၢ “ထၢနုာ်တၢ်အီၣ်လၢ အဝဲသ့ၣ်​ အထၢၣ်ပူၤအါအါ ဒ်အစိာ်ဝဲ န့ၢ်အသိး ဒီးထၢနုာ်က့ၤ အဝဲသ့ၣ်​ တဂၤစုာ်စုာ်အစ့ လၢအထၢၣ်ပူၤတက့ၢ်.+ ၂ ဘၣ်ဆၣ်​ ယထံခွးစ့တဖျၢၣ်န့ၣ်​ နဘၣ်ထၢနုာ်အီၤလၢ အသဒါတဂၤန့ၣ်​ အထၢၣ်ပူၤ ဃုာ်ဒီးအစ့လၢ အကပှ့ၤ ဘုဧိၤဟုဧိၤ အဂီၢ်လီၤ.” အဃိ အဝဲမၤဝဲဒ် စီၤယိၤသး တဲအီၤအသိးလီၤ.

၃ ဖဲဂီၤခီ မုၢ်ဝါထီၣ်အခါ ပှၤပျဲက့ၤအဝဲသ့ၣ်​ ဒီးအကသ့ၣ်ယီၤတဖၣ်လီၤ. ၄ ဘၣ်ဆၣ်​ ဖဲအဝဲသ့ၣ်​ ဟးထီၣ်တယံၤဒီး ဝ့ၢ်ပူၤ အါအါဒံးဘၣ်အခါ စီၤယိၤသး တဲဘၣ်​ ပှၤလၢအပၢဘၣ်​ အဟံၣ်တဂၤလၢ “ဂဲၤဆၢထၢၣ်, လဲၤလူၤ ပှၤတဖၣ်န့ၣ်သၢၤ. ဖဲနလူၤအဝဲသ့ၣ်​ ချုးအခါ တဲအဝဲသ့ၣ်လၢ ‘ဘၣ်မနုၤအဃိ သုဟ့ၣ်ဆၢက့ၤ တၢ်ဂ့ၤ လၢတၢ်အၢလဲၣ်. ၅ ထံခွးတဖျၢၣ်အံၤ ယကစၢ် အီတၢ်လၢအပူၤ ဒီးအဝဲသူဝဲ ဒ်သိးအက ကၢ်တၢ်ဒွးတၢ် လီၤတံၢ်လီၤဆဲးအဂီၢ် တမ့ၢ်ဧီၤ. သုမၤတၢ်တခါအံၤ အၢသီဒိၣ်မးလီၤ.’”

၆ အဃိ ဖဲအဝဲလူၤ အဝဲသ့ၣ်ချုးအခါ အဝဲတဲအဝဲသ့ၣ်​ ဒ်န့ၣ်လီၤ. ၇ ဘၣ်ဆၣ်​ အဝဲသ့ၣ်​ တဲဆၢအီၤလၢ “ကစၢ်ဧၢ, ဘၣ်မနုၤအဃိ နတဲဒ်အံၤလဲၣ်. ပဝဲနခ့နပှၤတဖၣ်​ လ့ၤတက့ၤ တမၤဝဲဒ်န့ၣ်​ နီတဘျီဘၣ်. ၈ စ့လၢ ပထံၣ်န့ၢ်အီၤလၢ ပထၢၣ်တဖၣ်​ အပူၤဒၣ်လဲာ်န့ၣ်​ ပဟးထီၣ်လၢ ကီၢ်ကနၤဧၣ်​ ဒီးပဟဲက့ၤ ဆှၢလၢနအိၣ်လီၤ.+ မ့ၢ်ပကဟုၣ်စ့ မ့တမ့ၢ် ထူလၢ နကစၢ်အဟံၣ်ပူၤဧါ. ၉ ပှၤမ့ၢ်ထံၣ်န့ၢ် ထံခွးအံၤလၢ ပဝဲတဂၤဂၤ အအိၣ်န့ၣ်​ မ်အဝဲ သံတက့ၢ်. ဒီးမ့မ့ၢ် ပဝဲလၢ အအိၣ်တ့ၢ်တဖၣ်န့ၣ်​ ပကကဲကုၢ်လၢ ယကစၢ်အဂီၢ်လီၤ.” ၁၀ ဒီးအဝဲတဲဝဲလၢ “ဒ်သုတဲအသိး ပှၤတဂၤဂၤလၢ ပှၤထံၣ်န့ၢ် ထံခွးအံၤ လၢအအိၣ်န့ၣ်​ ကကဲထီၣ်ယကုၢ် ဘၣ်ဆၣ်​ မ့မ့ၢ် သုဝဲအဂၤတဖၣ်န့ၣ်​ ကပူၤဒီးတၢ်ကမၣ်လီၤ.” ၁၁ ဒီးအဝဲသ့ၣ်​ တဂၤစုာ်စုာ်န့ၣ်​ ပာ်လီၤအထၢၣ်လၢ ဟီၣ်ခိၣ်လိၤချ့ချ့ ဒီးအဝဲသ့ၣ်​ အိးထီၣ်ဝဲအထၢၣ်လီၤ. ၁၂ ဒီးအဝဲ ဃုကွၢ်ဝဲ အဝဲသ့ၣ်အထၢၣ်​ လီၤတံၢ်လီၤဆဲး စးထီၣ်လၢ ပှၤအဒိၣ်ကတၢၢ် တုၤလၢ ပှၤအဆံးကတၢၢ်တဂၤ အအိၣ်လီၤ. လၢခံကတၢၢ်န့ၣ်​ အဝဲထံၣ်န့ၢ် ထံခွးအံၤလၢ စီၤဘံၣ်ယၤမံၣ်​ အထၢၣ်ပူၤလီၤ.+

၁၃ အဃိ အဝဲသ့ၣ်​ ဖှီညာ်ဝဲ အနီၢ်ကစၢ် အဆ့ကၤ ဒီးအဝဲသ့ၣ်​ တဂၤစုာ်စုာ်န့ၣ်​ တီၣ်ထီၣ်ကဒါက့ၤ အထၢၣ်လၢ အကသ့ၣ်ယီၤအလိၤ ဒီးက့ၤကဒါက့ၤဆူ ဝ့ၢ်ပူၤလီၤ. ၁၄ ဖဲစီၤယူဒၤ+ ဒီးအဒီပုၢ်ဝဲၢ်ခွါတဖၣ်​ လဲၤနုာ်လၢ စီၤယိၤသး အဟံၣ်ပူၤအခါ စီၤယိၤသး အိၣ်ဒံးဖဲန့ၣ်လီၤ. ဒီးအဝဲသ့ၣ်​ ထိၣ်လီၤပှီၤအသး လၢအမဲာ်ညါလီၤ.+ ၁၅ ဒီးစီၤယိၤသး တဲအဝဲသ့ၣ်လၢ “ဘၣ်မနုၤအဃိ သုမၤဒ်အံၤလဲၣ်. ပှၤဒ်သိးဒီးယၤအံၤန့ၣ်​ ယကၢ်တၢ်ဒွးတၢ် ဘၣ်လီၤတံၢ်လီၤဆဲးန့ၣ်​ မ့ၢ်သုတသ့ၣ်ညါဧီၤ.”+ ၁၆ စီၤယူဒၤ တဲဆၢဝဲလၢ “ကစၢ်ဧၢ, ပဘၣ်တဲနၤ ဒ်လဲၣ်, ပတဲကဘၣ်ဧါ. ဒီးပပာ်ဖျါထီၣ်လၢ ပတၢ်ကမၣ်​ တအိၣ်ဘၣ်န့ၣ်​ ကသ့ဒ်လဲၣ်. ယွၤလၢ အမ့ၢ်အတီတဂၤန့ၣ်​ ထံၣ်န့ၢ် ပတၢ်ကမၣ်လံ.+ ခဲအံၤ ကစၢ်ဧၢ, ပဝဲဒီး ပှၤတဂၤလၢ ပှၤထံၣ်န့ၢ် ထံခွးလၢ အအိၣ်န့ၣ်​ ကကဲထီၣ်​ နကုၢ်လီၤ.” ၁၇ ဘၣ်ဆၣ်​ စီၤယိၤသး တဲဝဲလၢ “လ့ၤတက့ၤ ယတမၤဒ်န့ၣ်ဘၣ်. ထဲဒၣ်​ ပှၤတဂၤလၢ ပှၤထံၣ်န့ၢ် ထံခွးလၢ အအိၣ်န့ၣ်​ အကကဲထီၣ်​ ယကုၢ်လီၤ.+ မ့မ့ၢ် သုဝဲအဂၤတဖၣ်န့ၣ်​ သုက့ၤကဒါက့ၤလၢ သုပၢ်အအိၣ်​ မုာ်မုာ်ခုၣ်ခုၣ်​ သ့ဝဲလီၤ.”

၁၈ ဒီးစီၤယူဒၤ သုးဘူးဃီၤအသး လၢအအိၣ်​ ဒီးတဲဝဲလၢ “ကစၢ်ဧၢ, ယဃ့ကညးနၤလီၤ. နမ့ၢ်ပှၤလၢ အစိကမီၤ ထဲသိးဒီး ဖၤရိၤတဂၤလီၤ.+ ဝံသးစူၤ ပျဲယတဲနၤ တၢ်တမံၤ ဒီးတဘၣ်​ သးဒိၣ်ထီၣ်​ ယၤတဂ့ၤ. ၁၉ ကစၢ်ဧၢ, နသံကွၢ်ပှၤလၢ ‘မ့ၢ်သုပၢ် ဒီးသုဒီပုၢ်ဝဲၢ်ခွါ အိၣ်ဧါ.’ ၂၀ အဃိ ပတဲဘၣ်​ နၤလၢ ‘ပအိၣ်ဒီး ပပၢ်တဂၤလၢ အသးပှၢ်လံ ဒီးအဖိသဒါတဂၤ လၢအအိၣ်ဖျဲၣ်ထီၣ်​ ဖဲပပၢ် အသးပှၢ် အဆၢကတီၢ်လီၤ.+ မ့ၢ်လၢ အကၠီတဂၤသံလံ+ အဃိ လၢအမိၢ်အဖိတဖၣ်​ အကျါ အဝဲမ့ၢ် ပှၤထဲတဂၤလၢ အအိၣ်မူဒံးလီၤ.+ ဒီးအပၢ်အဲၣ်အီၤလီၤ.’ ၂၁ ဖဲန့ၣ်ဝံၤအလီၢ်ခံ နတဲဘၣ်ပှၤလၢ ‘ဟဲကိးအီၤလၢယအိၣ်​ ဒ်သိး ယကထံၣ်အီၤ အဂီၢ်တက့ၢ်.’+ ၂၂ ဘၣ်ဆၣ်​ ပတဲဘၣ်​ နၤလၢ ‘ယဒ့ခွါသဒါ ဟးယံၤဒီးအပၢ် တန့ၢ်ဘၣ်. အဝဲ မ့ၢ်ဟးယံၤဒီး အပၢ်န့ၣ်​ အပၢ်ကသံ သပှၢ်ကတၢၢ်လီၤ.’+ ၂၃ ဝံၤဒီး နတဲပှၤလၢ ‘သုဒ့ခွါ မ့ၢ်တဟဲဒီး သုဘၣ်န့ၣ်​ သုတဘၣ်​ ဟဲထံၣ်ယၤလၢၤတဂ့ၤ.’+

၂၄ “အဃိ ပက့ၤလၢ နကုၢ်နပှၤ ယပၢ်အအိၣ်​ ဒီးတဲအီၤ တၢ်လၢ နတဲတဖၣ်လီၤ. ၂၅ လၢခံ ပပၢ်တဲဝဲလၢ ‘လဲၤပှ့ၤကဒီးတၢ်အီၣ်​ လၢပဂီၢ်တစဲးမီၤ.’+ ၂၆ ဘၣ်ဆၣ်​ ပတဲလၢ ‘ပလဲၤလီၤ တသ့ဘၣ်. ပဒ့ခွါသဒါ မ့ၢ်လဲၤလီၤဒီးပှၤမး ပကလဲၤလီၤ. ဘၣ်ဆၣ်​ ပဒ့ခွါသဒါ မ့ၢ်တလဲၤလီၤဒီးပှၤဘၣ်န့ၣ်​ ပလဲၤထံၣ်​ ပှၤတဂၤန့ၣ်​ တသ့ဘၣ်.’+ ၂၇ ဒီးနကုၢ်နပှၤ ယပၢ်တဲဘၣ်ပှၤလၢ ‘ယမါ အိၣ်ဖျဲၣ်ထီၣ်န့ၢ်ယၤ ဖိခွါ ခံဂၤန့ၣ်​ သုသ့ၣ်ညါဂ့ၤဂ့ၤလီၤ.+ ၂၈ ဘၣ်ဆၣ်​ တဂၤန့ၣ်​ လဲၤသဒၣ်ယၤလံ. ဒီးယတဲလၢ “ဆၣ်ဖိကီၢ်ဖိ အမံၤတဒု အ့ၣ်ဖှီအီၤ လီၤတံၢ်လံ.”+ ဒီးတုၤခဲအံၤ ယတထံၣ်အီၤ နီတဘျီလၢၤဘၣ်. ၂၉ သုမ့ၢ်ဟံးန့ၢ်စ့ၢ်ကီး အအံၤတဂၤ လၢယအိၣ်​ ဒီးတၢ်မ့ၢ်ကဲထီၣ်အသးဒီးအီၤ တမံၤမံၤ ဒီးအဝဲမ့ၢ်သံန့ၣ်​ သုကဒုးလဲၤလီၤယၤလၢ တၢ်သွၣ်ခိၣ်အပူၤ*+ လၢယသးဘၣ်ဖှီၣ်အဃိ ဖဲယခိၣ်ဆူၣ်ဝါ ဒ်အံၤအခါလီၤ.’+

၃၀ “ဒီးမ့ၢ်လၢ ယပၢ်အဲၣ်​ အဖိခွါတဂၤအံၤ ထဲသိးဒီး အနီၢ်ကစၢ် အသးသမူအဃိ ယမ့ၢ်က့ၤကဒါက့ၤလၢ ယပၢ်အအိၣ်​ ဒီးယဒ့ခွါတဂၤအံၤ မ့ၢ်တပၣ်လၢ ပကျါဘၣ်​ ၃၁ ဒီးတုၤ အထံၣ်ဘၣ်ဝဲလၢ ယဒ့ခွါတဂၤအံၤ တပၣ်ဘၣ်န့ၣ်​ အကသံဝဲလီၤ. ဒီးပဝဲသ့ၣ်တဖၣ်အံၤ ကဒုးလဲၤလီၤ ပပၢ်လၢ တၢ်သွၣ်ခိၣ်အပူၤ* လၢတၢ်သးဘၣ်ဖှီၣ်အဃိ ဖဲအခိၣ်ဆူၣ်ဝါအခါ သပှၢ်ကတၢၢ်လီၤ. ၃၂ ဘၣ်ဃးဒီး ယဒ့ခွါတဂၤအံၤန့ၣ်​ နကုၢ်ယၤအံၤ ယတဲဘၣ်​ ယပၢ်လၢ ယကဟံးမူဒါလီၤ. ဒီးယတဲအီၤလၢ ‘ယမ့ၢ်တဟဲက့ၤကိးအီၤ လၢနအိၣ်ဘၣ်န့ၣ်​ မ်ယတၢ်ဒဲးဘး အိၣ်လၢနမဲာ်ညါ တစိၤသးတက့ၢ်.’+ ၃၃ အဃိ ဝံသးစူၤ ပျဲယကဲထီၣ်​ နကုၢ် လၢယဒ့ခွါအလီၢ် ဒ်သိးယဒ့ခွါ ကက့ၤပိာ် အဒီပုၢ်ဝဲၢ်ခွါတဖၣ်အခံတက့ၢ်. ၃၄ ယဒ့ခွါ မ့ၢ်တပၣ်ဘၣ်န့ၣ်​ ယက့ၤလၢ ယပၢ်အအိၣ်​ ကသ့ဒ်လဲၣ်. ယတအဲၣ်ဒိး ထံၣ်ဘၣ်လၢ ယပၢ်တူၢ်ဘၣ်​ တၢ်နးတၢ်ဖှီၣ်တခါအံၤဘၣ်.”

၄၅ ဒီးဖဲန့ၣ်​ စီၤယိၤသး ပၢၤအသးလၢ အခ့အပှၤတဖၣ်​ အမဲာ်ညါ တန့ၢ်လၢၤဘၣ်အဃိ+ အဝဲ ကိးပသူထီၣ်လၢ “မၢပှၤကိးဂၤဒဲး ဟးထီၣ်လၢ ယအိၣ်တက့ၢ်.” ဒီးဖဲစီၤယိၤသး တဲဘၣ်​ အဒီပုၢ်ဝဲၢ်ခွါတဖၣ်လၢ အဝဲမ့ၢ် မတဂၤလဲၣ်အခါ ပှၤအဂၤ တအိၣ်တ့ၢ်ဒီးအီၤ နီတဂၤဘၣ်.+

၂ ဒီးအဝဲ ဟီၣ်ထီၣ်ဝဲလၢ အကလုၢ်ဖးဒိၣ်​ တုၤဒၣ်လဲာ် ပှၤအဲၤကူပတူးဖိတဖၣ်​ နၢ်ဟူဝဲ ဒီးပှၤအိၣ်လၢ ဖၤရိၤအဟံၣ်ပူၤန့ၣ်​ နၢ်ဟူဝဲ စ့ၢ်ကီးလီၤ. ၃ ဒီးစီၤယိၤသး တဲအဒီပုၢ်ဝဲၢ်ခွါတဖၣ်လၢ “ယမ့ၢ် စီၤယိၤသးလီၤ. ယပၢ် အိၣ်မူဒံးဧါ.” ဘၣ်ဆၣ်​ အဒီပုၢ်ဝဲၢ်ခွါတဖၣ်​ အသးလီၤကတုၤ ဒီးစံးဆၢက့ၤအီၤ တထီၣ်လၢၤဘၣ်. ၄ ဒီးစီၤယိၤသး တဲဘၣ်​ အဒီပုၢ်ဝဲၢ်ခွါတဖၣ်လၢ “ဝံသးစူၤ ဟဲဘူးဒီးယၤနီၤ.” ဒီးအဝဲသ့ၣ်​ ဟဲဘူးဒီးအီၤလီၤ.

ဒီးအတဲဝဲလၢ “ယမ့ၢ် သုဒီပုၢ်ဝဲၢ်ခွါ စီၤယိၤသး လၢသုဆါလီၤကွံာ်အီၤ လၢကီၢ်အဲၤကူပတူးလီၤ.+ ၅ ဘၣ်ဆၣ်​ တဘၣ်သူၣ်ကိၢ်သးဂီၤ ဒီးတဘၣ်​ ပာ်ဒ့ၣ်ပာ်ကမၣ်လိာ်သုသး တဂၤဒီးတဂၤ ခီဖျိလၢ သုဆါလီၤကွံာ်ယၤ ဖဲအံၤအဃိတဂ့ၤ. နီၢ်ကီၢ်န့ၣ်​ ကစၢ်ယွၤ ဆှၢလီၤဆိယၤလၢ သုမဲာ်ညါ ဒ်သိး ကဒီသဒၢ ပှၤသးသမူ အဂီၢ်လီၤ.+ ၆ ဒီးတၢ်သၣ်ဝံၤလီၤဒိ အိၣ်ထီၣ်လၢ ကီၢ်ပူၤန့ၣ်​ ဘၣ်လၢ ခံနံၣ်တနံၣ်လံ.+ ဘၣ်ဆၣ်​ အိၣ်တ့ၢ်ဒံး ယဲၢ်နံၣ်လၢ ပှၤတထဲၣ်ဘၣ်တၢ် ဒီးပှၤတကူးဘၣ်တၢ်ဘၣ်လီၤ. ၇ ဘၣ်ဆၣ်​ ကစၢ်ယွၤ ဆှၢလီၤဆိယၤ လၢသုမဲာ်ညါ ဒ်သိးကပာ်မူသု ခီဖျိလၢ တၢ်မၤပူၤဖျဲးဖးဒိၣ်​ ဒီးဒ်သိး သုစၢၤသုသွဲၣ်တဖၣ်*+ ကဆဲးအိၣ်မူဘၣ်လၢ ဟီၣ်ခိၣ်ချၢ အဂီၢ်လီၤ. ၈ တမ့ၢ်လၢ သုဆှၢလီၤယၤ ဖဲအံၤဘၣ်. ယွၤလၢ အမ့ၢ်အတီတဂၤ ဆှၢလီၤယၤ ဒ်သိး ကပာ်ထီၣ်ယၤ ဒ်ဖၤရိၤ အပှၤဟ့ၣ်ကူၣ်ဟ့ၣ်ဖးတၢ်အခိၣ်, ပှၤလၢအတီခိၣ်ရိၤမဲတၢ်လၢ အနီပူၤ ဒီးပှၤလၢအပၢ ကီၢ်အဲၤကူပတူး ဒီဘ့ၣ်ညါလီၤ.+

၉ “က့ၤချ့ချ့လၢ ယပၢ်အအိၣ်​ ဒီးသုကဘၣ်တဲအီၤလၢ ‘နဖိခွါ စီၤယိၤသး တဲဝဲဒ်အံၤ, “ကစၢ်ယွၤ ပာ်ထီၣ်ယၤလၢ ကီၢ်အဲၤကူပတူး ဒီဘ့ၣ်ညါ အကစၢ်လီၤ.+ ဟဲလီၤဆူယအိၣ်​ ဒီးထုးယံာ် တၢ်ဆၢကတီၢ်တဂ့ၤ.+ ၁၀ နကဘၣ်​ ဟဲအိၣ်လၢ ကိၡ့ၣ်​ အဟီၣ်ကဝီၤ+ ဒီးဖဲန့ၣ်န့ၣ်​ နၤ, နဖိတဖၣ်, နလံၤတဖၣ်, နသိဒီးမဲာ်တဲးလဲးတဖၣ်, နကျီၢ်တဖၣ်​ ဒီးတၢ်လၢ အအိၣ်ဒီးနၤခဲလၢာ်န့ၣ်​ ကအိၣ်ဘူးဒီးယၤလီၤ. ၁၁ ဒီးတၢ်သၣ်ဝံၤလီၤဒိ ကအိၣ်ဒံး ယဲၢ်နံၣ်အဃိ ယကဟ့ၣ်လီၤနၤ တၢ်အီၣ်ဖဲန့ၣ်လီၤ.+ မ့တမ့ၢ် ဒ်န့ၣ်ဘၣ်န့ၣ်​ နၤဒီးနဟံၣ်ဖိဃီဖိ ကဘၣ်ဖှီၣ်ဘၣ်ယာ် ဒီးတၢ်လၢ အအိၣ်ဒီးနၤန့ၣ်​ ကလီၤမၢ်ကွံာ်ဝဲ ခဲလၢာ်လီၤ.”’ ၁၂ သုဒီးယဒ့ခွါ စီၤဘံၣ်ယၤမံၣ်န့ၣ်​ ထံၣ်ဘၣ်လၢ သုနီၢ်ကစၢ် အမဲာ်ချံ လၢယမ့ၢ် ပှၤတဂၤလၢ အတဲတၢ်ဒီးသု နီၢ်ကီၢ်လီၤ.+ ၁၃ အဃိ သုကဘၣ်တဲဘၣ်​ ယပၢ် ဘၣ်ဃးဒီး ယတၢ်လၤကပီၤလၢ သုထံၣ်လၢ ကီၢ်အဲၤကူပတူးအပူၤ ခဲလၢာ် ဒီးတၢ်ခဲလၢာ်လၢ သုထံၣ်အီၤန့ၣ်လီၤ. ဒီးခဲအံၤ မၤကရီ ဒီးဟဲက့ၤကိးယပၢ် ဖဲအံၤတက့ၢ်.”

၁၄ ဒီးအဝဲဖိးဟု အဒ့ခွါ စီၤဘံၣ်ယၤမံၣ်​ ဒီးဟီၣ်ဝဲလီၤ. ဒီးစီၤဘံၣ်ယၤမံၣ်​ ဖိးဟုအီၤ ဒီးဟီၣ်ဝဲ စ့ၢ်ကီးလီၤ.+ ၁၅ ဒီးအနၢမူ အဒီပုၢ်ဝဲၢ်ခွါခဲလၢာ် ဒီးအမဲာ်ထံလီၤလၢ အဝဲသ့ၣ်အလိၤ ဒီးတၢ်န့ၣ်ဝံၤအလီၢ်ခံ အဒီပုၢ်ဝဲၢ်ခွါတဖၣ်​ တဲတၢ်ဒီးအီၤလီၤ.

၁၆ တၢ်ကစီၣ်​ ဟူထီၣ်လၢ ဖၤရိၤအဟံၣ်လၢ “စီၤယိၤသး အဒီပုၢ်ဝဲၢ်တဖၣ်​ ဟဲဝဲလီၤ.” ဖဲဖၤရိၤ ဒီးအခ့အပှၤတဖၣ်​ နၢ်ဟူဝဲအခါ အဝဲသ့ၣ်​ သူၣ်ခုသးခုလီၤ. ၁၇ ဒီးဖၤရိၤတဲဘၣ်​ စီၤယိၤသးလၢ “တဲဘၣ်​ နဒီပုၢ်ဝဲၢ်ခွါတဖၣ်လၢ ‘မၤဒ်အံၤတက့ၢ်. ပာ်ထီၣ်တၢ်လၢ သုဆၣ်ဖိကီၢ်ဖိတဖၣ်အလိၤ ဒီးက့ၤလၢ ကီၢ်ကနၤဧၣ်တက့ၢ်. ၁၈ က့ၤကိးသုပၢ် ဒီးသုဟံၣ်ဖိဃီဖိတဖၣ်​ ဒီးဟဲလၢယအိၣ်​ ဖဲအံၤတက့ၢ်. ဒီးယကဟ့ၣ်သု တၢ်လၢအဂ့ၤတဖၣ်လၢ ကီၢ်အဲၤကူပတူး ဒီးသုကအီၣ်တၢ်လၢ အဝံၣ်သိ ဒိၣ်ကတၢၢ်လၢ ထံကီၢ်အပူၤလီၤ.+ ၁၉ ဒီးနကဘၣ်တဲ အဝဲသ့ၣ်လၢ+ ‘မၤဒ်အံၤတက့ၢ်. ဟံးန့ၢ် လ့ၣ်တဖၣ်+ လၢကီၢ်အဲၤကူပတူးအပူၤ လၢသုဖိသုမါတဖၣ်အဂီၢ် ဒီးသုကဘၣ်​ ဟဲကိးသုပၢ်လၢ လ့ၣ်တခိၣ်အပူၤ ဖဲအံၤစ့ၢ်ကီးလီၤ.+ ၂၀ ဒီးတၢ်လၢအဂ့ၤကတၢၢ် လၢအအိၣ်လၢ ကီၢ်အဲၤကူပတူးအပူၤ ခဲလၢာ်န့ၣ်​ ကကဲထီၣ်​ သုတၢ်အဃိ တဘၣ်​ ဘၣ်ယိၣ်တၢ် ဘၣ်ဃးဒီး သုတၢ်စုလီၢ်ခီၣ်ခိၣ်တဂ့ၤ.’”+

၂၁ ဒီးစီၤအံၣ်စရ့လး အဖိခွါသ့ၣ်တဖၣ်​ မၤဝဲဒ်န့ၣ်လီၤ. ဒီးစီၤယိၤသး ဟ့ၣ်လီၤအဝဲသ့ၣ်​ လ့ၣ်တဖၣ်​ ဒ်ဖၤရိၤ မၤလိာ်ဝဲအသိး ဒီးအဟ့ၣ်လီၤစ့ၢ်ကီး တၢ်အီၣ်တၢ်အီတဖၣ်​ လၢအဝဲသ့ၣ်အတၢ်လဲၤတၢ်က့ၤ အဂီၢ်လီၤ. ၂၂ ဒီးစီၤယိၤသး ဟ့ၣ်အဝဲသ့ၣ်​ ဆ့ကၤအသီ တဂၤတဘ့ၣ်လီၤ. မ့မ့ၢ် စီၤဘံၣ်ယၤမံၣ်န့ၣ်​ စီၤယိၤသးဟ့ၣ်လီၤအီၤ စ့ညၣ်အဘ့ၣ်​ ၃၀၀ ဒီးဆ့ကၤအသီ ယဲၢ်ဘ့ၣ်လီၤ.+ ၂၃ ဒီးစီၤယိၤသး ဆှၢလီၤန့ၢ်အပၢ်လၢ ကသ့ၣ်ယီၤ အဒုတဆံလၢ အတီၣ်ဝဲ ကီၢ်အဲၤကူပတူး အတၢ်ဖိတၢ်လံၤ လၢအဂ့ၤတဖၣ်​ ဒီးကသ့ၣ်ယီၤမိၢ် အဒုတဆံလၢ အတီၣ်ဝဲ ဘုဧိၤဟုဧိၤဒီးကိၣ်​ ဒီးတၢ်အီၣ်တၢ်အီ အဂၤလၢ အပၢ်ကဟဲလၢ ကျဲအဂီၢ်လီၤ. ၂၄ အဃိ စီၤယိၤသးပျဲက့ၤ အဒီပုၢ်ဝဲၢ်ခွါတဖၣ်​ ဒီးဖဲအဝဲသ့ၣ်​ ဟးထီၣ်အခါ အတဲဘၣ်​ အဝဲသ့ၣ်လၢ “တဘၣ်သးထီၣ်လိာ်သုသး တဂၤဒီးတဂၤ လၢကျဲတဂ့ၤ.”+

၂၅ ဒီးအဝဲသ့ၣ်​ ဟးထီၣ်လၢ ကီၢ်အဲၤကူပတူးအပူၤ ဒီးက့ၤဝဲလၢ အပၢ်စီၤယၤကိာ်အအိၣ်​ လၢကီၢ်ကနၤဧၣ်​ အပူၤလီၤ. ၂၆ အဝဲသ့ၣ်​ တဲအီၤလၢ “စီၤယိၤသး အိၣ်မူဒံးဝဲ ဒီးအဝဲမ့ၢ် ပှၤလၢအပၢတၢ်လၢ ကီၢ်အဲၤကူပတူး ဒီတဘ့ၣ်​ အဖီခိၣ်လီၤ.”+ ဘၣ်ဆၣ်​ ခီဖျိလၢ စီၤယၤကိာ် တနာ် အဝဲသ့ၣ်ဘၣ်အဃိ အတထိၣ်ဟူးထိၣ်ဂဲၤထီၣ်​ အသးဘၣ်.+ ၂၇ ဖဲအဝဲသ့ၣ်​ ဆဲးတဲဘၣ်အပၢ်လၢ တၢ်ခဲလၢာ်လၢ စီၤယိၤသးတဲဝဲ ဒီးဖဲစီၤယၤကိာ် ထံၣ်ဝဲလ့ၣ်လၢ စီၤယိၤသး ဆှၢလီၤဝဲဒ်သိး ကက့ၤကိးအီၤအဂီၢ်အခါ အပၢ်စီၤယၤကိာ် အသးအဂံၢ်အဘါ ဆူၣ်ထီၣ်ဝဲလီၤ. ၂၈ ဒီးစီၤအံၣ်စရ့လး တဲဝဲလၢ “ယနာ်လံ. ယဖိခွါ စီၤယိၤသးန့ၣ်​ အမူဒံးမၢၤ. အဃိ တချုးလၢ ယသံဒံးဘၣ်န့ၣ်​ ယကဘၣ်​ လဲၤလီၤထံၣ်အီၤသၢၤ.”+

၄၆ ဒီးစီၤအံၣ်စရ့လး စိာ်ဝဲ တၢ်လၢအအိၣ်ဒီးအီၤခဲလၢာ် ဒီးလဲၤတၢ်လီၤ. ဖဲအလဲၤတုၤလၢ ဘ့ၢ်ၡဘၤအခါ+ အဝဲလုၢ်ထီၣ်တၢ်လၢ အပၢ်စီၤအံၤစဲး အကစၢ်ယွၤ အအိၣ်လီၤ.+ ၂ လၢမုၢ်နၤခီန့ၣ်​ ကစၢ်ယွၤ တဲတၢ်ဒီး စီၤအံၣ်စရ့လး လၢတၢ်ထံၣ်လၢညါခီအပူၤ ဒီးတဲဝဲလၢ “စီၤယၤကိာ်ဧၢ, စီၤယၤကိာ်ဧၢ” ဒီးစီၤယၤကိာ် စံးဆၢက့ၤဝဲလၢ “မ့ၢ်, ကစၢ်ဧၢ.” ၃ ဒီးကစၢ်ယွၤတဲဝဲလၢ “ယမ့ၢ် နပၢ်အကစၢ်ယွၤ လၢအမ့ၢ်အတီတဂၤလီၤ.+ ယကဒုးကဲထီၣ်နၤလၢ ပှၤကလုာ်ဖးဒိၣ်​ တကလုာ်လၢ ကီၢ်အဲၤကူပတူး အပူၤအဃိ တဘၣ်ဘၣ်ယိၣ်တၢ်လၢ နကလဲၤလီၤဖဲန့ၣ်တဂ့ၤ.+ ၄ ယကလဲၤလီၤဒီးနၤလၢ ကီၢ်အဲၤကူပတူးအပူၤ ဒီးယကဟဲက့ၤ ကိးထီၣ်စ့ၢ်ကီးနၤလၢ တၢ်လီၢ်ဖဲန့ၣ်လီၤ.+ ဒီးဖဲနသံအခါ စီၤယိၤသး ကပာ်အစုလၢ နမဲာ်ချံအလိၤလီၤ.”+

၅ ဖဲစီၤယၤကိာ် ဟးထီၣ်လၢ ဘ့ၢ်ၡဘၤ ဝံၤအလီၢ်ခံ စီၤအံၣ်စရ့လး အဖိခွါတဖၣ်​ တီၣ်ထီၣ်အပၢ် စီၤယၤကိာ်, အဝဲသ့ၣ်​ အဖိတဖၣ်​ ဒီးအမါသ့ၣ်တဖၣ်လၢ လ့ၣ်ပူၤ လၢဖၤရိၤဆှၢလီၤဝဲ ဒ်သိးကဟဲတီၣ်ဝဲ စီၤယၤကိာ်အဂီၢ်လီၤ. ၆ အဝဲသ့ၣ်​ ကိးဃုာ်ဒီး အဆၣ်ဖိကီၢ်ဖိ ဒီးလဲၤစိာ်အတၢ်ဖိတၢ်လံၤတဖၣ်​ လၢအမၤန့ၢ်ဝဲလၢ ကီၢ်ကနၤဧၣ်​ အပူၤန့ၣ်လီၤ. ဒီးစီၤယၤကိာ် ဒီးအစၢၤအသွဲၣ်လၢ အအိၣ်ဒီးအီၤခဲလၢာ် လဲၤလီၤလၢ ကီၢ်အဲၤကူပတူး အပူၤလီၤ. ၇ စီၤယၤကိာ် လဲၤကိးဃုာ်ဝဲ အစၢၤအသွဲၣ်​ ခဲလၢာ်လၢအမ့ၢ် အဖိမုၣ်ဖိခွါတဖၣ်​ ဒီးအလံၤမုၣ်လံၤခွါတဖၣ်လီၤ.

၈ အအံၤမ့ၢ် စီၤအံၣ်စရ့လး အစၢၤအသွဲၣ်တဖၣ်​ အမံၤလီၤ. စီၤယၤကိာ် ဒီးအဖိခွါတဖၣ်​ လဲၤလီၤလၢ ကီၢ်အဲၤကူပတူး အပူၤလီၤ.+ စီၤယၤကိာ် အဖိခွါဝဲၢ်ကိန့ၣ်​ အမံၤမ့ၢ်ဝဲ စီၤရူၤဘ့ၣ်လီၤ.+

၉ စီၤရူၤဘ့ၣ်​ အဖိခွါတဖၣ်န့ၣ်​ မ့ၢ်ဝဲ စီၤဃနိး, စီၤပးလူ, စီၤဃ့ၤစရိၣ်​ ဒီးစီၤကၢ်မံၤလီၤ.+

၁၀ စီၤစူၤမ့းအိၣ်+ အဖိခွါတဖၣ်န့ၣ်​ မ့ၢ်ဝဲ စီၤယမူးအ့လး, စီၤယၤမံၣ်, စီၤအိၤဟး, စီၤယၤကံၣ်, စီၤစိၤဃၢ် ဒီးပှၤကနၤဧၣ်မုၣ်​ အဖိခွါ စီၤၡီအူးလီၤ.+

၁၁ စီၤလ့ၤဝံ+ အဖိခွါတဖၣ်န့ၣ်​ မ့ၢ်ဝဲ စီၤက့ရၡိၣ်, စီၤကဃး ဒီးစီၤမရၤရံၤလီၤ.+

၁၂ စီၤယူဒၤ+ အဖိခွါတဖၣ်န့ၣ်​ မ့ၢ်ဝဲ စီၤအ့ၢ်, စီၤအိၤနၣ်, စီၤစ့ၤလါ,+ စီၤဖ့ၤရ့း+ ဒီးစီၤစ့ရၤလီၤ.+ ဘၣ်ဆၣ်​ စီၤအ့ၢ် ဒီးစီၤအိၤနၣ်န့ၣ်​ သံဝဲလၢ ကီၢ်ကနၤဧၣ်​ အပူၤလီၤ.+

စီၤဖ့ၤရ့း အဖိခွါတဖၣ်န့ၣ်​ မ့ၢ်ဝဲ စီၤဃ့ၤစရိၣ်​ ဒီးစီၤဃမူလီၤ.+

၁၃ စီၤယံးစၣ်ကၢ် အဖိခွါတဖၣ်န့ၣ်​ မ့ၢ်ဝဲ စီၤတိလၤ, စီၤဖူဝၤ, စီၤယိဘး ဒီးစီၤၡံးမရိၣ်လီၤ.+

၁၄ စီၤစဘူလိၣ်+ အဖိခွါတဖၣ်န့ၣ်​ မ့ၢ်ဝဲ စီၤစ့ရ့း, စီၤအ့လိၣ်, ဒီးစီၤယၤလအ့လးလီၤ.+

၁၅ အဝဲသ့ၣ်တဖၣ်န့ၣ်​ မ့ၢ်ဝဲ နီၢ်လ့ၤအၤ အဖိခွါတဖၣ်​ လၢအအိၣ်ဖျဲၣ်ထီၣ်န့ၢ် စီၤယၤကိာ် လၢကီၢ်ပၤဒနါရၣ်​ အပူၤလီၤ. ဒီးအဝဲအိၣ်ဖျဲၣ်ထီၣ်စ့ၢ်ကီး အဖိမုၣ်​ နီၢ်ဒံနၤ+ လၢတၢ်လီၢ် ဖဲန့ၣ်လီၤ. ပှၤလၢ အဟဲလီၤစၢၤလီၤသွဲၣ်​ လၢစီၤယၤကိာ် ဒီးနီၢ်လ့ၤအၤန့ၣ်​ အိၣ်ဝဲ ၃၃ ဂၤလီၤ.

၁၆ စီၤကး+ အဖိခွါတဖၣ်န့ၣ်​ မ့ၢ်ဝဲ စီၤစံးဖယိၣ်, စီၤဃးကံၤ, စီၤၡူနံၤ, စီၤအ့စဘိၣ်, စီၤဧ့ရံၤ, စီၤအရိး ဒီးစီၤအၤအ့ၤလံလီၤ.+

၁၇ စီၤအၤၡ့ၢ်+ အဖိခွါတဖၣ်န့ၣ်​ မ့ၢ်ဝဲ စီၤယံးမနၤ, စီၤယံးၡဝၤ, စီၤယံးၡဝံၤ ဒီးစီၤဘရံဧၤလီၤ. ဒီးအဝဲသ့ၣ်​ အဒီပုၢ်ဝဲၢ်မုၣ်န့ၣ်​ မ့ၢ်ဝဲ နီၢ်စ့ရၤလီၤ.

စီၤဘရံဧၤ အဖိခွါတဖၣ်န့ၣ်​ မ့ၢ်ဝဲ စီၤဃ့ဘ့ၢ် ဒီးစီၤမးလကံၤအ့လးလီၤ.+

၁၈ အဝဲသ့ၣ်တဖၣ်န့ၣ်​ မ့ၢ်ဝဲ နီၢ်စံၤလပၤ+ ဒီးစီၤယၤကိာ် အစၢၤအသွဲၣ်​ ၁၆ ဂၤလီၤ. နီၢ်စံၤလပၤန့ၣ်​ မ့ၢ်ကုၢ်ပိာ်မုၣ်လၢ စီၤလၤဘၣ်​ ဟ့ၣ်လီၤအဖိမုၣ်​ နီၢ်လ့ၤအၤလီၤ.

၁၉ စီၤယၤကိာ်အမါ နီၢ်ရၤဃ့လး အဖိခွါတဖၣ်န့ၣ်​ မ့ၢ်ဝဲ စီၤယိၤသး+ ဒီးစီၤဘံၣ်ယၤမံၣ်လီၤ.+

၂၀ စီၤယိၤသး အဖိခွါတဖၣ်​ လၢအအိၣ်ဖျဲၣ်ထီၣ်​ လၢကီၢ်အဲၤကူပတူးအပူၤန့ၣ်​ မ့ၢ်ဝဲ စီၤမနၤၡ့ၤ+ ဒီးစီၤအ့ဖရဲၣ်လီၤ.+ ဝ့ၢ်အိၣ်​ အပှၤလုၢ်တၢ်ဒိၣ်​ စီၤပိၤတံၤဖ့ရၤ အဖိမုၣ်​ နီၢ်အၤစနး+ အိၣ်ဖျဲၣ်ထီၣ်​ အဝဲသ့ၣ်​ လၢစီၤယိၤသး အဂီၢ်လီၤ.

၂၁ စီၤဘံၣ်ယၤမံၣ်+ အဖိအလံၤတဖၣ်န့ၣ်​ မ့ၢ်ဝဲ စီၤဘ့လၤ, စီၤဘ့က့ၢ်, စီၤအၤၡဘ့လး, စီၤက့ရၤ,+ စီၤနဧၤမၣ်, စီၤအ့ဃံၤ, စီၤရိဃး, စီၤမူးဖံၣ်, စီၤဃူဖံၣ်+ ဒီးစီၤအၤရးလီၤ.+

၂၂ အဝဲသ့ၣ်တဖၣ်န့ၣ်​ နီၢ်ရၤဃ့လးဒီးစီၤယၤကိာ် အစၢၤအသွဲၣ်​ ၁၄ ဂၤလီၤ.

၂၃ စီၤဒၣ်+ အဖိခွါန့ၣ်​ မ့ၢ်ဝဲ စီၤဃူၡံၣ်လီၤ.+

၂၄ စီၤနးသၤလံ+ အဖိခွါတဖၣ်န့ၣ်​ မ့ၢ်ဝဲ စီၤယၤစအ့လး, စီၤကူနံၤ, စီၤယ့စ့ၢ် ဒီးစီၤၡံးလ့ၣ်လီၤ.+

၂၅ အဝဲသ့ၣ်တဖၣ်န့ၣ်​ မ့ၢ်ဝဲ နီၢ်ဘံၤလဟၤ အဖိအလံၤတဖၣ်လီၤ. စီၤလၤဘၣ်န့ၣ်​ ဟ့ၣ်လီၤအကုၢ်မုၣ်​ နီၢ်ဘံၤလဟၤ ဆူအဖိမုၣ်​ နီၢ်ရၤဃ့လး အအိၣ်လီၤ. ပှၤလၢ အဟဲလီၤစၢၤလီၤသွဲၣ်​ လၢစီၤယၤကိာ် ဒီးနီၢ်ဘံၤလဟၤန့ၣ်​ အိၣ်ဝဲ နွံဂၤလီၤ.

၂၆ စီၤယၤကိာ် အဒဲၣ်မုၣ်တဖၣ်​ မ့ၢ်တပၣ်ဘၣ်န့ၣ်​ ပှၤလၢ အဟဲလီၤစၢၤလီၤသွဲၣ်လၢ စီၤယၤကိာ် ဒီးလဲၤပိာ်အခံဆူ ကီၢ်အဲၤကူပတူးန့ၣ်​ ခဲလၢာ် အိၣ်ဝဲ ၆၆ ဂၤလီၤ.+ ၂၇ ဒီးစီၤယိၤသး အဖိခွါလၢ အအိၣ်ဖျဲၣ်ထီၣ်လၢ ကီၢ်အဲၤကူပတူး အပူၤန့ၣ်​ အိၣ်ဝဲ ခံဂၤလီၤ. အဃိ စီၤယၤကိာ် အဒူၣ်ဖိထၢဖိလၢ အလဲၤနုာ်လီၤလၢ ကီၢ်အဲၤကူပတူးအပူၤန့ၣ်​ ခဲလၢာ် အိၣ်ဝဲအဂၤ ၇၀ လီၤ.+

၂၈ စီၤယၤကိာ် မၢစီၤယူဒၤ+ လဲၤဆိဒီး တဲဘၣ်​ စီၤယိၤသးလၢ အဝဲလဲၤလီၤ လၢကိၡ့ၣ်​ အဟီၣ်ကဝီၤလံ.+ ၂၉ အဃိ စီၤယိၤသးန့ၣ်​ မၢပှၤကတဲာ်ကတီၤန့ၢ်အီၤ အလ့ၣ်ကဟၣ်​ ဒီးအဝဲ လဲၤဝဲဒ်သိး ကသဂၢၢ်အပၢ် စီၤအံၣ်စရ့လး လၢကိၡ့ၣ်​ အဟီၣ်ကဝီၤလီၤ. ဖဲအထံၣ်အီၤအခါ အဖိးဟုအီၤ တဘျီဃီ ဒီးဟီၣ်ဝဲ ဖးယံာ်ဖိညါလီၤ. ၃၀ ဒီးစီၤအံၣ်စရ့လး တဲဘၣ်​ စီၤယိၤသးလၢ “ယထံၣ်ဘၣ်နမဲာ် ဒီးသ့ၣ်ညါလၢ နအိၣ်မူဒံးအဃိ ခဲအံၤ ယသံမုာ်လံ.”

၃၁ ဒီးစီၤယိၤသး တဲဘၣ်​ အဒီပုၢ်ဝဲၢ်ခွါတဖၣ်​ ဒီးအပၢ် အဒူၣ်ဖိထၢဖိလၢ “ယကလဲၤထီၣ်​ ဒီးတဲဘၣ်​ ဖၤရိၤလၢ+ ‘ယဒီပုၢ်ဝဲၢ်ခွါတဖၣ်​ ဒီးယပၢ် အဒူၣ်ဖိထၢဖိတဖၣ်​ လၢအအိၣ်လၢ ကီၢ်ကနၤဧၣ်အပူၤန့ၣ်​ ဟဲတုၤလၢ ယအိၣ်လံ.+ ၃၂ အဝဲသ့ၣ်တဖၣ်န့ၣ်​ မ့ၢ်ပှၤကွၢ်သိ+ ဒီးအဝဲသ့ၣ်​ ကွၢ်ထွဲဝဲဆၣ်ဖိကီၢ်ဖိအဒၢတဖၣ်လီၤ.+ ဒီးအဝဲသ့ၣ်​ ဟဲကိးဃုာ်ဒီး အသိ ဒီးမဲာ်တဲးလဲး ဒီးအကျီၢ် ဒီးကယဲၢ် တၢ်လၢအအိၣ်ဒီး အဝဲသ့ၣ်​ ခဲလၢာ်လီၤ.’+ ၃၃ ဖၤရိၤကကိးသု ဒီးကသံကွၢ်သုလၢ ‘သုမၤ တၢ်မၤမနုၤလဲၣ်.’ ၃၄ မ့ၢ်လၢ ပှၤအဲၤကူပတူးဖိတဖၣ်န့ၣ်​ သးဘၣ်အၢဝဲ ပှၤကွၢ်သိ ကိးဂၤဒဲးအဃိ+ ဒ်သိးသုကအိၣ်ဘၣ်လၢ ကိၡ့ၣ်​ အဟီၣ်ကဝီၤအပူၤအဂီၢ်+ သုကဘၣ်တဲလၢ ‘ကစၢ်ဧၢ, ပဝဲမ့ၢ်ဂ့ၤ, ပမိၢ်ပၢ်ဖံဖု လၢပျၢၤတဖၣ်မ့ၢ်ဂ့ၤ, စးထီၣ်လၢ ပသးစၢ် တုၤခဲအံၤန့ၣ်​ ပမ့ၢ်ပှၤလၢ အကွၢ်ထွဲ ဆၣ်ဖိကီၢ်ဖိ အဒၢတဖၣ်လီၤ.’”+

၄၇ ဒီးစီၤယိၤသး က့ၤတဲဘၣ်​ ဖၤရိၤလၢ+ “ယပၢ် ဒီးယဒီပုၢ်ဝဲၢ်ခွါတဖၣ်​ ဒီးအဝဲသ့ၣ်​ အသိဒီးအမဲာ်တဲးလဲး ဒီးအကျီၢ်တဖၣ်​ ဒီးတၢ်လၢအအိၣ်ဒီး အဝဲသ့ၣ်​ လၢကီၢ်ကနၤဧၣ်အပူၤ ခဲလၢာ်န့ၣ်​ ဟဲလီၤတုၤလၢ ကိၡ့ၣ်​ အဟီၣ်ကဝီၤပူၤလံ.”+ ၂ ဒီးအလဲၤကိးဃုာ်ဝဲ အဒီပုၢ်ဝဲၢ်ခွါယဲၢ်ဂၤ ဒီးဒုးထံၣ်အီၤဒီး ဖၤရိၤလီၤ.+

၃ ဖဲဖၤရိၤ သံကွၢ် စီၤယိၤသး အဒီပုၢ်ဝဲၢ်ခွါတဖၣ်လၢ “သုမၤတၢ်မၤ မနုၤလဲၣ်” အခါ အဝဲသ့ၣ်​ တဲဆၢဝဲ ဖၤရိၤလၢ “ကစၢ်ဧၢ, ပဝဲ ဒီးပမိၢ်ပၢ်ဖံဖု လၢပျၢၤတဖၣ်​ မ့ၢ်ပှၤကွၢ်သိလီၤ.”+ ၄ ဒီးအဝဲသ့ၣ်တဲဘၣ်​ ဖၤရိၤလၢ “မ့ၢ်လၢ တၢ်သၣ်ဝံၤလီၤဒိ အိၣ်ထီၣ်လၢ ကီၢ်ကနၤဧၣ်အပူၤ နးမးအဃိ+ ဒီးပသိဒီး ပမဲာ်တဲးလဲးတဖၣ်​ အဆၣ်တအိၣ်ဘၣ်အဃိ ပဟဲအိၣ်လၢ ကီၢ်တဘ့ၣ်အံၤအပူၤ ဒ်ပှၤထံဂၤကီၢ်ဂၤဖိတဖၣ်+ အသိးလီၤ. အဃိ ကစၢ်ဧၢ, ဝံသးစူၤ ဟ့ၣ်အခွဲးလၢ ပကအိၣ်လၢ ကိၡ့ၣ်​ အဟီၣ်ကဝီၤ အပူၤမီၤ.”+ ၅ ဖဲန့ၣ်​ ဖၤရိၤ တဲစီၤယိၤသးလၢ “နပၢ် ဒီးနဒီပုၢ်ဝဲၢ်ခွါတဖၣ်​ ဟဲတုၤလၢ နအိၣ်ဖဲအံၤလံ. ၆ ကီၢ်အဲၤကူပတူးန့ၣ်​ အိၣ်ဝဲလၢ နစုပူၤလီၤ. မၢနပၢ် ဒီးနဒီပုၢ်ဝဲၢ်ခွါတဖၣ်​ အိၣ်လၢ တၢ်လီၢ်လၢ အဂ့ၤကတၢၢ်တတီၤ လၢထံကီၢ်အပူၤတက့ၢ်.+ မ်အဝဲသ့ၣ်​ အိၣ်လၢ ကိၡ့ၣ်​ အဟီၣ်ကဝီၤ အပူၤတက့ၢ်. ဒီးနမ့ၢ်သ့ၣ်ညါ ပိာ်ခွါတဖၣ်လၢ အမၤတၢ်သ့ဂ့ၤဂ့ၤ လၢအဝဲသ့ၣ်အကျါန့ၣ်​ ဒုးကဲထီၣ်​ အဝဲသ့ၣ်လၢ ပှၤကွၢ်ထွဲ ယဆၣ်ဖိကီၢ်ဖိတဖၣ်တက့ၢ်.”

၇ စီၤယိၤသး လဲၤကိးအပၢ် စီၤယၤကိာ် ဒီးဒုးထံၣ်အီၤဒီး ဖၤရိၤလီၤ. ဒီးစီၤယၤကိာ်န့ၣ်​ ဆိၣ်ဂ့ၤဝဲ ဖၤရိၤလီၤ. ၈ ဖၤရိၤသံကွၢ် စီၤယၤကိာ်လၢ “နသးအိၣ်​ ပှဲၤနံၣ်လဲၣ်.” ၉ ဒီးစီၤယၤကိာ် တဲဖၤရိၤလၢ “ယသးအိၣ်အနံၣ်​ ၁၃၀ ဒီးလၢယတၢ်အိၣ်မူ ဒီတကတီၢ်အပူၤန့ၣ်​ ယဟးဝ့ၤဝီၤတၢ်လီၤ. ယတၢ်အိၣ်မူ ပှဲၤဒီး တၢ်ကိၢ်တၢ်ဂီၤတဖၣ်+ ဒီးယအိၣ်မူ အနံၣ်စှၤန့ၢ်ဒံး ယမိၢ်ပၢ်ဖံဖု လၢပျၢၤတဖၣ်​ လၢအဟးဝ့ၤဝီၤတၢ်ဒံး.”+ ၁၀ ဒီးစီၤယၤကိာ် ဆိၣ်ဂ့ၤ ဖၤရိၤဝံၤဒီး ဟးထီၣ်လၢ အမဲာ်ညါလီၤ.

၁၁ ဒ်ဖၤရိၤ မၤလိာ်အီၤအသိး စီၤယိၤသး ဒုးအိၣ်ဒုးဆိးအပၢ် ဒီးအဒီပုၢ်ဝဲၢ်တဖၣ်​ ဒီးဟ့ၣ်အဝဲသ့ၣ်​ တၢ်လီၢ်လၢ အဂ့ၤကတၢၢ်လၢ ရၤမစ့ အဟီၣ်ကဝီၤ+ လၢကီၢ်အဲၤကူပတူး အပူၤလီၤ. ၁၂ စီၤယိၤသး ဟ့ၣ်လီၤဝဲအပၢ် ဒီးအဒီပုၢ်ဝဲၢ်တဖၣ်​ ဒီးအပၢ် အဒူၣ်ဖိထၢဖိခဲလၢာ် လၢတၢ်အီၣ်တၢ်အီ ဒ်အဝဲသ့ၣ်​ အဖိတဖၣ်​ အနီၣ်ဂံၢ် အိၣ်ဝဲအသိးန့ၣ်လီၤ.

၁၃ လၢကီၢ်အဲၤကူပတူး အပူၤ ဒီးလၢကီၢ်ကနၤဧၣ်​ အပူၤန့ၣ်​ တၢ်သၣ်ဝံၤလီၤဒိ အိၣ်ဝဲ နးမးအဃိ တၢ်အီၣ်တၢ်အီ တအိၣ်လၢၤဘၣ်. ဒီးပှၤဂီၢ်မုၢ်တဖၣ်လၢ ကီၢ်အဲၤကူပတူး ဒီးကီၢ်ကနၤဧၣ်​ အပူၤန့ၣ်​ အဂံၢ်အဘါ လီၤစၢ်ဝဲ ခီဖျိလၢ တၢ်သၣ်ဝံၤလီၤဒိ အဃိလီၤ.+ ၁၄ စ့လၢအအိၣ်လၢ ကီၢ်အဲၤကူပတူး ဒီးကီၢ်ကနၤဧၣ်အပူၤ လၢပှၤဟ့ၣ်လီၤဝဲ ဒ်သိး ကပှ့ၤဘုဧိၤဟုဧိၤအဂီၢ်န့ၣ်+ စီၤယိၤသး ထၢဖှိၣ်အီၤခဲလၢာ် ဒီးလဲၤစိာ်ဝဲလၢ ဖၤရိၤအဟံၣ်ပူၤလီၤ. ၁၅ လၢခံ စ့လၢ ကီၢ်အဲၤကူပတူး ဒီးကီၢ်ကနၤဧၣ်အပူၤ လၢာ်ဝဲ ဒီးပှၤအဲၤကူပတူးဖိခဲလၢာ် ဟဲလၢ စီၤယိၤသးအအိၣ် ဒီးတဲအီၤလၢ “ဟ့ၣ်လီၤပှၤ တၢ်အီၣ်သၢၤ. မ့ၢ်လၢ ပစ့တအိၣ်လၢၤဘၣ်အဃိ မ့ၢ်နကပျဲသံပှၤဧါ.” ၁၆ ဒီးစီၤယိၤသး တဲဝဲလၢ “သုစ့မ့ၢ်လၢာ်န့ၣ်​ ဟဲစိာ် သုဆၣ်ဖိကီၢ်ဖိတဖၣ်သၢၤ. သုမ့ၢ်ဟ့ၣ်လီၤ သုဆၣ်ဖိကီၢ်ဖိတဖၣ်န့ၣ်​ ယကဟ့ၣ်သု တၢ်အီၣ်တၢ်အီလီၤ.” ၁၇ အဃိ အဝဲသ့ၣ်​ ဟဲစိာ် အဆၣ်ဖိကီၢ်ဖိတဖၣ်​ လၢစီၤယိၤသး အအိၣ်လီၤ. ခီဖျိလၢ အဝဲသ့ၣ်​ ဟ့ၣ်လီၤစီၤယိၤသးလၢ အကသ့ၣ်တဖၣ်, အသိဒီးအမဲာ်တဲးလဲးတဖၣ်, အကျီၢ်တဖၣ်​ ဒီးအကသ့ၣ်ယီၤတဖၣ်အဃိ စီၤယိၤသး ဟ့ၣ်လီၤအဝဲသ့ၣ်​ တၢ်အီၣ်တၢ်အီလီၤ. ဒီးတၢ်တနံၣ်န့ၣ်​ စီၤယိၤသး ဆဲးဟ့ၣ်အဝဲသ့ၣ်​ တၢ်အီၣ်တၢ်အီ ခီဖျိလၢ အဝဲသ့ၣ်​ ဟ့ၣ်လီၤအီၤ အဆၣ်ဖိကီၢ်ဖိ ခဲလၢာ်အဃိလီၤ.

၁၈ နံၣ်အဝဲန့ၣ်​ ကတၢၢ်ဝဲဒီး လၢခံတနံၣ်န့ၣ်​ အဝဲသ့ၣ်​ လဲၤလၢအအိၣ်​ ဒီးတဲအီၤလၢ “ကစၢ်ဧၢ, ပအဲၣ်ဒိး ဒုးသ့ၣ်ညါနၤလၢ ပဟ့ၣ်လီၤနၤ ပစ့ ဒီးပဆၣ်ဖိကီၢ်ဖိ အဒၢတဖၣ်​ ဝံၤလံ. ကစၢ်ဧၢ, တၢ်လၢ ပကဟ့ၣ်လီၤနၤန့ၣ်​ တအိၣ်နီတမံၤလၢၤဘၣ်. အိၣ်တ့ၢ်ထဲဒၣ်​ ပဟီၣ်ခိၣ်​ ဒီးပနီၢ်ကစၢ်လီၤ. ၁၉ မ့ၢ်နကပျဲသံပှၤ ဒီးပျဲလၢ ပဟီၣ်ခိၣ်တဖၣ်​ ကဟးဂီၤဧါ. ပှ့ၤပှၤ ဒီးပဟီၣ်ခိၣ်တဖၣ်​ လၢတၢ်အီၣ်တၢ်အီ အဂီၢ်သၢၤ. ဒီးပကကဲထီၣ်​ ဖၤရိၤအကုၢ်တဖၣ်​ ဒီးပဟီၣ်ခိၣ်တဖၣ်န့ၣ်​ ကကဲထီၣ်​ ဖၤရိၤအတၢ်လီၤ. ဒီးဟ့ၣ်ပှၤ တၢ်ချံတဖၣ်​ ဒ်သိးပသုတသံတဂ့ၤ ဒီးပဟီၣ်ခိၣ်တဖၣ်​ သုတအိၣ်သယုၢ် တဂ့ၤအဂီၢ် န့ၣ်တက့ၢ်.” ၂၀ မ့ၢ်လၢတၢ်သၣ်ဝံၤလီၤဒိ အိၣ်ဝဲ နးမးအဃိ ပှၤအဲၤကူပတူးဖိခဲလၢာ် ဆါလီၤကွံာ်ဝဲ အဟီၣ်ခိၣ်လီၤ. အဃိ ဟီၣ်ခိၣ်ခဲလၢာ်လၢ ပှၤအဲၤကူပတူးဖိ ဆါလီၤဝဲန့ၣ်​ စီၤယိၤသး ပှ့ၤဝဲလၢ ဖၤရိၤအဂီၢ်လီၤ. ဒီးဟီၣ်ခိၣ်ခဲလၢာ်န့ၣ်​ ကဲထီၣ်ဝဲ ဖၤရိၤအတၢ်လီၤ.

၂၁ ဒီးပှၤအဲၤကူပတူးဖိခဲလၢာ် လၢအအိၣ်ဝဲသကုၤလၢ ကီၢ်အဲၤကူပတူးအပူၤန့ၣ်​ စီၤယိၤသးမၢအဝဲသ့ၣ်​ လဲၤအိၣ်လၢ ဝ့ၢ်တဖၣ်အပူၤလီၤ.+ ၂၂ ထဲဒၣ်ပှၤလုၢ်တၢ်ဒိၣ်တဖၣ်​ အဟီၣ်ခိၣ်န့ၣ်​ စီၤယိၤသး တပှ့ၤဝဲဘၣ်+ မ့ၢ်လၢ ဖၤရိၤ ဟ့ၣ်လီၤဝဲ ပှၤလုၢ်တၢ်ဒိၣ်တဖၣ်​ တၢ်အီၣ်တၢ်အီ အဃိလီၤ. ဒီးပှၤလုၢ်တၢ်ဒိၣ်တဖၣ်န့ၣ်​ အီၣ်ဝဲတၢ်လၢ ဖၤရိၤ ဟ့ၣ်ဒုးအီၣ်အဝဲသ့ၣ်အဃိ အဝဲသ့ၣ်တဖၣ်န့ၣ်​ တလိၣ်ဆါလီၤဝဲ အဟီၣ်ခိၣ်ဘၣ်. ၂၃ ဒီးစီၤယိၤသး တဲပှၤဂီၢ်မုၢ်လၢ “သုထံၣ်ဧါ, တနံၤအံၤ ယပှ့ၤသု ဒီးသုဟီၣ်ခိၣ်တဖၣ်လၢ ဖၤရိၤအဂီၢ်လံ. အအံၤ မ့ၢ်တၢ်ချံတဖၣ်​ လၢသုဂီၢ် ဒီးသုကဘၣ်ဖှံလီၤအီၤလၢ သုစံာ်ပျီတဖၣ်အပူၤလီၤ. ၂၄ ဖဲအမဲထီၣ်​ သၣ်ထီၣ်အခါ သုကဘၣ်ဟ့ၣ်ဖၤရိၤ ယဲၢ်ပူတပူလီၤ.+ ဒီးအဝဲလွံၢ်ပူန့ၣ်​ ကကဲထီၣ်​ သုတၢ်လၢ သုကဖှံလီၤတၢ်ချံ လၢသုစံာ်ပျီတဖၣ်အပူၤ ဒီးလၢတၢ်အီၣ်တၢ်အီ လၢသုဂီၢ် ဒီးပှၤလၢအအိၣ်​ ဟံၣ်တဖျၢၣ်ဃီဒီးသုအဂီၢ် ဒီးလၢသုဖိတဖၣ်​ အဂီၢ်လီၤ.” ၂၅ အဃိ အဝဲသ့ၣ်​ တဲဝဲလၢ “နမၤပူၤဖျဲး ပသးသမူလံ.+ အဃိ ကစၢ်ဧၢ, မ့ၢ်ဘၣ်နသးန့ၣ်​ ပကကဲ ဖၤရိၤအကုၢ်လီၤ.”+ ၂၆ ဒီးစီၤယိၤသး ဒုးအိၣ်ထီၣ်​ တၢ်သိၣ်တၢ်သီလၢ ယဲၢ်ပူတပူန့ၣ်​ ကဘၣ်ကဲထီၣ်​ ဖၤရိၤအတၢ်လီၤ. တၢ်သိၣ်တၢ်သီအံၤ ဘၣ်တၢ်ပာ်ဂၢၢ်ပာ်ကျၢၤအီၤ တုၤလၢ မုၢ်မဆါတနံၤအံၤလၢ ကီၢ်အဲၤကူပတူး အပူၤလီၤ. ထဲဒၣ်​ ပှၤလုၢ်တၢ်ဒိၣ်တဖၣ်​ အဟီၣ်ခိၣ်န့ၣ်​ တကဲထီၣ်​ ဖၤရိၤအတၢ်ဘၣ်.+

၂၇ ဒီးစီၤအံၣ်စရ့လး အိၣ်ဝဲလၢ ကိၡ့ၣ်​ အဟီၣ်ကဝီၤလၢ+ ကီၢ်အဲၤကူပတူးအပူၤ ဒီးအိၣ်ဝဲဖဲန့ၣ်​ ဒီးသၣ်ထီၣ်အါထီၣ်​ ဒီးအါထီၣ်ဂီၢ်ထီၣ်​ ဒီဒူၣ်လီၤ.+ ၂၈ စီၤယၤကိာ် ဆဲးအိၣ်ဝဲလၢ ကီၢ်အဲၤကူပတူးအပူၤ ၁၇ နံၣ်ဒီး အသးနံၣ်အိၣ်ဝဲ ၁၄၇ နံၣ်လီၤ.+

၂၉ တၢ်ဆၢကတီၢ် ဘူးထီၣ်လၢ စီၤအံၣ်စရ့လး ကသံဝဲအဃိ+ အဝဲကိးဝဲ အဖိခွါစီၤယိၤသး ဒီးတဲဝဲလၢ “နမ့ၢ်ဘၣ်သူၣ်ဘၣ်သးယၤန့ၣ်​ ဝံသးစူၤ ပာ်လီၤနစုလၢ ယခီၣ်ကံၣ်ဒုၣ်​ အဖီလာ် ဒီးပာ်ဖျါထီၣ်​ တၢ်အဲၣ်လၢအတီ ဒီးတၢ်သးတီ လၢယဖီခိၣ်တက့ၢ်. ဝံသးစူၤ တဘၣ်ခူၣ်လီၤယၤလၢ ကီၢ်အဲၤကူပတူး အပူၤတဂ့ၤ.+ ၃၀ ဖဲယသံအခါ နကဘၣ်​ စိာ်ထီၣ်ကွံာ်ယၤလၢ ကီၢ်အဲၤကူပတူးအပူၤ ဒီးခူၣ်လီၤယၤလၢ ယမိၢ်ပၢ်ဖံဖု လၢပျၢၤတဖၣ်​ အတၢ်သွၣ်ခိၣ်အပူၤလီၤ.”+ အဃိ စီၤယိၤသး တဲဝဲလၢ “ယကမၤ ဒ်နတဲအသိးလီၤ.” ၃၁ ဝံၤဒီး စီၤယၤကိာ် တဲဝဲလၢ “အၢၣ်လီၤယၤတက့ၢ်.” အဃိ စီၤယိၤသး အၢၣ်လီၤအီၤလီၤ.+ ဒီးစီၤအံၣ်စရ့လး ဆုးလီၤအခိၣ်လၢ အလီၢ်မံခိၣ်လီၤ.+

၄၈ ဖဲန့ၣ်ဝံၤအလီၢ်ခံ ပှၤတဲဘၣ်​ စီၤယိၤသးလၢ “ကွၢ်မီၤ, နပၢ်န့ၣ်​ အဂံၢ်အဘါ လီၤစၢ်လံ.” အဃိ စီၤယိၤသးလဲၤကိး အဖိခွါခံဂၤ လၢအမ့ၢ် စီၤမနၤၡ့ၤ ဒီးစီၤအ့ဖရဲၣ်​ ဆူစီၤယၤကိာ် အအိၣ်လီၤ.+ ၂ ဒီးပှၤတဲဘၣ်​ စီၤယၤကိာ်လၢ “လၢအံၤ, နဖိခွါ စီၤယိၤသး ဟဲလၢနအိၣ်လံ.” အဃိ စီၤအံၣ်စရ့လး ပာ်ဆူၣ်ထီၣ်အသး ဒီးဆ့ၣ်နီၤဝဲလၢ အလီၢ်မံခိၣ်လီၤ. ၃ ဒီးစီၤယၤကိာ် တဲစီၤယိၤသးလၢ

“သ့တၢ်လၢာ်ကစၢ် လီၣ်ဖျါထီၣ်အသး လၢယအိၣ်​ ဖဲဝ့ၢ်လူးစး လၢကီၢ်ကနၤဧၣ်အပူၤ ဒီးဆိၣ်ဂ့ၤယၤလီၤ.+ ၄ ဒီးအတဲယၤလၢ ‘ယကဒုးသၣ်ထီၣ်နၤ ဒီးယကဒုး အါထီၣ်နၤ ဒီးယကဒုးကဲထီၣ်နၤလၢ ပှၤဂီၢ်မုၢ်ဖးဒိၣ်တဖု+ ဒီးကီၢ်တဘ့ၣ်အံၤ ယကဟ့ၣ်လီၤအီၤလၢ နချံနသၣ်​ လၢနလီၢ်ခံ ဒ်သိး အကကဲထီၣ်အတၢ် အစိၤစိၤအဃၣ်ဃၣ်လီၤ.’+ ၅ နဖိခွါခံဂၤလၢ အအိၣ်ဖျဲၣ်ထီၣ်လၢ ကီၢ်အဲၤကူပတူးအပူၤ တချုးလၢ ယဟဲတုၤလၢ ကီၢ်အဲၤကူပတူး ဒံးဘၣ်န့ၣ်​ စးထီၣ်ခဲအံၤ အဝဲသ့ၣ်​ မ့ၢ်ယတၢ်လံ.+ စီၤအ့ဖရဲၣ်​ ဒီးစီၤမနၤၡ့ၤန့ၣ်​ ကကဲထီၣ်ယတၢ် ဒ်စီၤရူၤဘ့ၣ်​ ဒီးစီၤစူၤမ့းအိၣ်​ မ့ၢ်ယတၢ်အသိးလီၤ.+ ၆ ဘၣ်ဆၣ်​ နဖိလၢ အအိၣ်ဖျဲၣ်ထီၣ်လၢ စီၤအ့ဖရဲၣ်​ ဒီးစီၤမနၤၡ့ၤ အလီၢ်ခံန့ၣ်​ ကကဲထီၣ်​ နတၢ်လီၤ. ဒီးအဝဲသ့ၣ်​ ကန့ၢ်သါဘၣ်​ ဟီၣ်ခိၣ်တနီၤ လၢအဒီပုၢ်ဝဲၢ်ခွါခံဂၤအံၤ အတၢ်န့ၢ်သါ အကျါလီၤ.+ ၇ ဖဲယဟးထီၣ်လၢ ကီၢ်ပၤဒနါရၣ်အခါ နမိၢ်နီၢ်ရၤဃ့လး သံဝဲလၢ+ ယကပၤ လၢကီၢ်ကနၤဧၣ်အပူၤ တချုးလၢ ပလဲၤတုၤလၢ ဝ့ၢ်အ့ဖရးသးလီၤ.+ အဃိ ယခူၣ်လီၤအီၤလၢ ကျဲလၢ အလဲၤလီၤဆူ ဝ့ၢ်အ့ဖရးသးလီၤ. ဝ့ၢ်တဖျၢၣ်အံၤမ့ၢ်ဝဲ ဝ့ၢ်ဘ့ၤသလ့ဃ့ၣ်လီၤ.”+

၈ ဒီးစီၤအံၣ်စရ့လး ထံၣ်ဝဲ စီၤယိၤသး အဖိခွါတဖၣ်​ ဒီးသံကွၢ်ဝဲလၢ “အဝဲသ့ၣ်​ မ့ၢ်မတၤတဖၣ်လဲၣ်.” ၉ ဒီးစီၤယိၤသး တဲအပၢ်လၢ “အဝဲသ့ၣ်​ မ့ၢ်ယဖိခွါ လၢကစၢ်ယွၤ ဟ့ၣ်လီၤယၤ လၢတၢ်လီၢ်ဖဲအံၤလီၤ.”+ ဒီးစီၤအံၣ်စရ့လး တဲဝဲလၢ “ဒ်သိး ယကဆိၣ်ဂ့ၤ အဝဲသ့ၣ်အဂီၢ် ဝံသးစူၤ ဟဲကိး အဝဲသ့ၣ်​ လၢယအိၣ်တက့ၢ်.”+ ၁၀ စီၤအံၣ်စရ့လးန့ၣ်​ အသးပှၢ်ထီၣ်​ ဒီးအမဲာ်ကဒု တုၤဒၣ်လဲာ် အတထံၣ်တၢ်လၢၤဘၣ်. အဃိ စီၤယိၤသး လဲၤကိးအဝဲသ့ၣ်​ လၢအအိၣ်ဘူးဘူး ဒီးစီၤအံၣ်စရ့လး ဖိးဟုနၢမူ အဝဲသ့ၣ်လီၤ. ၁၁ စီၤအံၣ်စရ့လး တဲစီၤယိၤသးလၢ “ယဆိကမိၣ်လၢ ယတထံၣ်ဘၣ်​ နမဲာ်သၣ်​ နီတဘျီလၢၤဘၣ်.+ ဘၣ်ဆၣ်​ ကစၢ်ယွၤ ဒုးထံၣ်စ့ၢ်ကီးယၤလၢ နစၢၤနသွဲၣ်လီၤ.” ၁၂ ဒီးစီၤယိၤသး ဟံးထီၣ်ကွံာ် အဝဲသ့ၣ်လၢ စီၤအံၣ်စရ့လး အအိၣ်* ဒီးအဝဲ ထိၣ်လီၤပှီၤအသး ဒီးကျးလီၤအမဲာ်လၢ ဟီၣ်ခိၣ်လိၤလီၤ.

၁၃ စီၤယိၤသး တွံၢ်ထီၣ်ဝဲ စီၤအ့ဖရဲၣ်+ လၢအစုထွဲ ဒီးမ့မ့ၢ် စီၤမနၤၡ့ၤလၢ+ အစုစ့ၣ်တခီလီၤ. ဒီးလဲၤကိး အဖိခံဂၤအံၤ လၢစီၤအံၣ်စရ့လး အအိၣ်​ ဘူးဘူးလီၤ. အဝဲပာ်ဝဲ စီၤအ့ဖရဲၣ်​ လၢစီၤအံၣ်စရ့လး အစုစ့ၣ်တခီ ဒီးမ့မ့ၢ် စီၤမနၤၡ့ၤန့ၣ်​ အဝဲပာ်ဝဲလၢ စီၤအံၣ်စရ့လး အစုထွဲ တခီလီၤ. ၁၄ စီၤအ့ဖရဲၣ်န့ၣ်​ မ့ၢ်ပှၤလၢ အဆံးတဂၤ ဘၣ်ဆၣ်​ စီၤအံၣ်စရ့လး ယူာ်ထီၣ်အစုထွဲ ဒီးပာ်လီၤဝဲလၢ စီၤအ့ဖရဲၣ်​ အခိၣ်လိၤလီၤ. ဒီးစီၤအံၣ်စရ့လးန့ၣ်​ ပာ်ထီၣ်အစုစ့ၣ်တခီ လၢစီၤမနၤၡ့ၤ အခိၣ်လိၤလီၤ. စီၤအံၣ်စရ့လး သ့ၣ်ညါဝဲလၢ စီၤမနၤၡ့ၤ မ့ၢ်ဖိဝဲၢ်ကိ+ ဘၣ်ဆၣ်​ အအဲၣ်ဒိး ပာ်ထီၣ်ဝဲအစု ဒ်န့ၣ်လီၤ. ၁၅ ဒီးအဝဲ ဆိၣ်ဂ့ၤစီၤယိၤသး ဒီးတဲဝဲလၢ+

“ယွၤလၢ အမ့ၢ်အတီတဂၤ လၢယဖု စီၤအၤဘြၤဟၣ်​ ဒီးယပၢ် စီၤအံၤစဲး လဲၤတၢ်လၢ အမဲာ်ညါ,+

ယွၤလၢ အမ့ၢ်အတီတဂၤ လၢအမၤအသး ဒ်ပှၤကွၢ်သိတဂၤ လၢယဂီၢ်လၢ ယတၢ်အိၣ်မူ တစိၤသး တုၤလၢ တနံၤညါအံၤ,+

၁၆ ယွၤတဂၤလၢ အမၤပူၤဖျဲးယၤလၢ တၢ်နးတၢ်ဖှီၣ်ခဲလၢာ်အပူၤ ခီဖျိလၢ မူခိၣ်ကလူးန့ၣ်+ မ်အဆိၣ်ဂ့ၤ ပိာ်ခွါဖိတဖၣ်အံၤတက့ၢ်.+

မ်တၢ်ကိး အဝဲသ့ၣ်လၢ ယမံၤ ဒီးလၢယပၢ် စီၤအံၤစဲး ဒီးယဖု စီၤအၤဘြၤဟၣ်​ အမံၤတက့ၢ်.

ဒီးမ်အဝဲသ့ၣ်​ အါထီၣ်တုၤလၢ အအိၣ်ဝဲ အါအါဂီၢ်ဂီၢ်လၢ ဟီၣ်ခိၣ်ချၢ န့ၣ်တက့ၢ်.”+

၁၇ ဖဲစီၤယိၤသး ထံၣ်ဝဲလၢ အပၢ်ပာ်အစုထွဲ လၢစီၤအ့ဖရဲၣ်​ အခိၣ်လိၤအခါ အဝဲ အသးတမုာ်ဘၣ်. အဃိ အဝဲ ဂုာ်ကျဲးစၢးထုးထီၣ်ဝဲ အပၢ်အစု လၢစီၤအ့ဖရဲၣ်​ အခိၣ်လိၤ ဒ်သိးကပာ်ထီၣ်ဝဲလၢ စီၤမနၤၡ့ၤ အခိၣ်လိၤလီၤ. ၁၈ ဒီးစီၤယိၤသး တဲဘၣ်အပၢ်လၢ “ပၢ်ဧၢ, တမ့ၢ်ဒ်န့ၣ်ဘၣ်. ပှၤဝဲၢ်ကိန့ၣ်​ လၢအံၤတဂၤဟီ.+ အဃိ ပာ်နစုထွဲလၢ အခိၣ်လိၤမီၤ.” ၁၉ ဘၣ်ဆၣ်​ အပၢ်ဂ့ၢ်လိာ်အီၤ ဒီးတဲအီၤလၢ “ယသ့ၣ်ညါဧဲၤ, ဖိခွါဧၢ, ယသ့ၣ်ညါ. အဝဲစ့ၢ်ကီး ကကဲထီၣ်​ ပှၤတဖု ဒီးအဝဲကကဲထီၣ်စ့ၢ်ကီး ပှၤလၢ အရ့ဒိၣ်လီၤ. ဘၣ်ဆၣ်​ မ့မ့ၢ် အဒ့ခွါန့ၣ်​ အကကဲထီၣ်​ ပှၤလၢ အရ့ဒိၣ်​ ဒိၣ်န့ၢ်ဒံးအီၤ+ ဒီးအစၢၤအသွဲၣ်န့ၣ်​ ကအါထီၣ်​ တုၤဒၣ်လဲာ် အအိၣ်အါထဲသိးဒီး ပှၤအကလုာ်တဖၣ်လီၤ.”+ ၂၀ ဒီးစီၤအံၣ်စရ့လး ဆဲးဆိၣ်ဂ့ၤအဝဲသ့ၣ်​ ဖဲတၢ်တနံၤန့ၣ်+ ဒီးတဲဝဲလၢ

အဃိ အဝဲဆဲးပာ်ဝဲ စီၤအ့ဖရဲၣ်​ လၢစီၤမနၤၡ့ၤ အမဲာ်ညါလီၤ.

၂၁ ဒီးစီၤအံၣ်စရ့လး တဲစီၤယိၤသးလၢ “ယကသံ ဘူးထီၣ်လံ.+ ဘၣ်ဆၣ်​ ကစၢ်ယွၤ ကဆဲးအိၣ်ဒီးသု ဒီးကဒုးက့ၤသုလၢ သုမိၢ်ပၢ်ဖံဖု လၢပျၢၤတဖၣ်​ အကီၢ်လီၤ.+ ၂၂ ဒီးဟီၣ်ခိၣ်တဖၣ်လၢ ထံကီၢ်လၢ ယဟံးန့ၢ်အီၤလၢ ပှၤအမိၢ်ဖိ အစုပူၤ ခီဖျိလၢ ယနးဒီး ယချံၣ်အဃိန့ၣ်​ ယဟ့ၣ်လီၤနၤ အါန့ၢ်ဒံး နဒီပုၢ်ဝဲၢ်ခွါတဖၣ်န့ၣ်​ တကဝီၤလီၤ.”

၄၉ စီၤယၤကိာ် ကိးဃီၤဝဲ အဖိခွါတဖၣ်​ ဒီးတဲဝဲလၢ “ပာ်ဖှိၣ်ထီၣ်သုသး ဒ်သိး ယကတဲဘၣ်သု တၢ်လၢအကမၤအသးဒီးသု လၢခါဆူညါ အဂ့ၢ်န့ၣ်တက့ၢ်. ၂ စီၤယၤကိာ် အဖိခွါသ့ၣ်ဧၢ, ပာ်ဖှိၣ်ထီၣ်သုသး ဒီးဒိကနၣ်​ တၢ်လၢ သုပၢ်စီၤအံၣ်စရ့လး ကတဲသုန့ၣ်တက့ၢ်.

၃ “စီၤရူၤဘ့ၣ်ဧၢ,+ နမ့ၢ် ယဖိဝဲၢ်ကိ,+ ယဂံၢ်ယဘါ ဒီးယတၤသၣ်ဆိ ဘၣ်ဃးဒီး ယတၢ်စိတၢ်ကမီၤ လၢယကဒုးအိၣ်ထီၣ်ယဖိ, ပှၤလၢ အလီၤပာ်ကဲဒိၣ်​ ဒီးအဂံၢ်အဘါ ဆူၣ်ဒိၣ်လီၤ. ၄ ဒ်ထံယွၤလီၤ ဆူၣ်ဆူၣ်အသိး နတပၢၤနသးဘၣ်​ ဒီးနလဲၤလၢ နပၢ်အလီၢ်မံခိၣ်​ အဃိ+ တမ့ၢ်လၢ နကဒိၣ်န့ၢ်ဒံး နဒီပုၢ်ဝဲၢ်ခွါတဖၣ်ဘၣ်. ဖဲန့ၣ်အခါ နမၤဘၣ်အၢ ယလီၢ်မံခိၣ်လီၤ. အဝဲလဲၤထီၣ်လၢ ယလီၢ်မံခိၣ် အနီၢ်ကီၢ်လီၤ.

၅ “စီၤစူၤမ့းအိၣ်​ ဒီးစီၤလ့ၤဝံ မ့ၢ်ဒီပုၢ်ဒီဝဲၢ်လီၤ.+ အဝဲသ့ၣ်​ အနးတဖၣ်န့ၣ်​ မ့ၢ်ဝဲ တၢ်စုကဝဲၤလၢ အဝဲသ့ၣ်​ ကမၤဆူၣ်မၤစိးတၢ်အဂီၢ်လီၤ.+ ၆ လၢတၢ်သးထီၣ်အဃိ အဝဲသ့ၣ်​ မၤသံပိာ်ခွါတဖၣ်+ ဒီးအဝဲသ့ၣ်​ ကျီတဲာ်ကျီၢ်ဖါတဖၣ်​ အခီၣ်ကစၢၢ်လာ်အထူၣ်လၢ တၢ်သူၣ်ဖှံသးညီ အဂီၢ်လီၤ. လၢတၢ်န့ၣ်အဃိ ယသးဧၢ, တဘၣ်ရ့လိာ်သးဒီး အဝဲသ့ၣ်တဂ့ၤ. ယတၢ်လၤကပီၤဧၢ, တဘၣ်​ မၤဘၣ်ထွဲလိာ်အသး ဒီးအဝဲသ့ၣ်​ အတၢ်အိၣ်ဖှိၣ်တဂ့ၤ. ၇ အဝဲသ့ၣ်​ အတၢ်သးထီၣ်န့ၣ်​ မ့ၢ်တၢ်လၢ အဆှုၣ်မဲာ်ကဲၤမဲာ် ဒီးအတၢ်သးဒိၣ်​ မ့ၢ်တၢ်လၢ အဆူၣ်အကိၤလီၤ. အဃိ မ်အဝဲသ့ၣ်​ အတၢ်သးထီၣ်​ ဒီးအတၢ်သးဒိၣ်​ ဘၣ်တၢ်ဆိၣ်အၢအီၤတက့ၢ်.+ မ်ယမၤ လီၤမုၢ်လီၤဖး အဝဲသ့ၣ်လၢ ယၤကိာ်အကီၢ်ပူၤ ဒီးမ်ယမၤလီၤပြံလီၤပြါ အဝဲသ့ၣ်လၢ အံၣ်စရ့လး အကီၢ်ပူၤတက့ၢ်.+

၈ “စီၤယူဒၤဧၢ,+ မ့မ့ၢ်နၤန့ၣ်​ နဒီပုၢ်ဝဲၢ်ခွါတဖၣ်​ ကစံးပတြၢၤနၤလီၤ.+ နစုကအိၣ်လၢ နဒုၣ်နဒါတဖၣ်​ အကိာ်ဘိအလိၤလီၤ.+ ဒီးနပၢ်အဖိခွါတဖၣ်​ ကထိၣ်လီၤပှီၤအသးလၢ နမဲာ်ညါလီၤ.+ ၉ ဒီးစီၤယူဒၤမ့ၢ် ခ့ယုၢ်ဖိ တဒုလီၤ.+ ဖိခွါဧၢ, နကအီၣ်ဆၣ်ဖိကီၢ်ဖိ ဝံၤဒီး က့ၤထီၣ်လီၤ. အဝဲကိာ်လီၤ ဒီးမံနီၤဝဲ ဒ်ခ့ယုၢ်အသိးလီၤ. ဒီးအလီၤဂာ်ဒ် ခ့ယုၢ်အသိးအဃိ မ့ၢ်မတၤတဂၤ မၤသးထီၣ်အီၤ ကဘူၣ်လဲၣ်. ၁၀ စီၤပၤအနီၣ်ထိးဘိ ကအိၣ်ဒီး စီၤယူဒၤ+ ဒီးခိၣ်နၢ် အနီၣ်ထိးဘိ ကအိၣ်ဝဲလၢ အခီၣ်လၣ်​ အကဆူး တုၤလၢၡံလိၤ* ဟဲတစု+ ဒီးပှၤဂီၢ်မုၢ်တဖၣ်​ ကဒိကနၣ်အီၤလီၤ.+ ၁၁ အဝဲကစၢဃာ် အကသ့ၣ်ယီၤ လၢစပံးမုၢ်တမုၢ်အလိၤ ဒီးအကသ့ၣ်ယီၤမိၢ် အဖိလၢ စပံးမုၢ် အဂ့ၤဒိၣ်မး တမုၢ်အလိၤလီၤ. အဝဲကဆှုၣ်ဝဲ အတၢ်ကူတၢ်သိးလၢ စပံးထံ ဒီးအဆ့ကူဆ့ကၤ လၢစပံးသၣ်​ အသွံၣ်လီၤ. ၁၂ ဒီးအမဲာ်ချံန့ၣ်​ ကဂီၤသူ ခီဖျိလၢ စပံးထံအဃိ ဒီးအမဲတဖၣ်​ ကဝါဝဲလၢ တၢ်နုၢ်ထံအဃိလီၤ.

၁၃ “စီၤစဘူလိၣ်+ ကအိၣ်ဝဲလၢ ပီၣ်လဲၣ်ကၢၢ်နံၤ ဖဲကဘီကတၢၤလီၤ အနီၣ်သက့ၤ အလီၢ်န့ၣ်လီၤ.+ ဒီးစဘူလိၣ်​ အကီၢ်ဆၢန့ၣ်​ ကတုၤလီၤလၢ ဝ့ၢ်စံဒိၣ်​ အအိၣ်တခီလီၤ.+

၁၄ “စီၤယံးစၣ်ကၢ်န့ၣ်+ မ့ၢ်ဝဲ ကသ့ၣ်ယီၤ တဒုလၢ အဃံကျၢၤ ဒီးမံနီၤဝဲလၢ တၢ်ဝံဃၢခံဘိၣ်​ အကဆူးလီၤ. ၁၅ ဒီးအဝဲ ကထံၣ်ဘၣ်ဝဲလၢ တၢ်အိၣ်ဘှံးအလီၢ်န့ၣ်​ မ့ၢ်တၢ်လၢအဂ့ၤ ဒီးဟီၣ်ခိၣ်လီၢ်ကဝီၤန့ၣ်​ မ့ၢ်တၢ်လၢ အမုာ်လီၤ. အဝဲ ကသကူးလီၤအပျိၢ်* ဒ်သိး အကယိးတၢ် ဒီးအဝဲ ကဘၣ်​ တၢ်မၢဆူၣ်အီၤလၢ အကမၤတၢ်ဆူၣ်ဆူၣ်​ ဒ်ကုၢ်အသိးလီၤ.

၁၆ “စီၤဒၣ်+ မ့ၢ်အံၣ်စရ့လး အဒူၣ်တဒူၣ်လၢ ကစံၣ်ညီၣ်န့ၢ်တၢ်လၢ အပှၤဂီၢ်မုၢ်အဂီၢ်လီၤ.+ ၁၇ မ်စီၤဒၣ်​ ကဲဂုၢ်အၢတဘိ လၢကျဲကပၤ ဒီးဂုၢ်ပွ့တဘိလၢ ကျဲကပၤ လၢအအ့ၣ်​ ကသ့ၣ်အခီၣ်နၢၣ်ခံ ဒ်သိး ပှၤဒိးကသ့ၣ်ဖိ ကလီၤတဲာ် လၢအချၢဃံ တကပၤ န့ၣ်တက့ၢ်.+ ၁၈ အိ ယဟိဝၤယွၤဧၢ, ယကအိၣ်ခိးကွၢ်လၢ် နတၢ်အုၣ်က့ၤခီၣ်က့ၤလီၤ.

၁၉ “မ့မ့ၢ် စီၤကးန့ၣ်+ တမျာ်တဒူၣ်​ ကဟဲထီၣ်ဒုးအီၤ ဘၣ်ဆၣ်​ အဝဲ ကလူၤဒုးဆၢက့ၤ အဝဲသ့ၣ်လီၤ.+

၂၀ “စီၤအၤၡ့ၢ်+ အတၢ်အီၣ်​ ကအိၣ်ဝဲ အါအါဂီၢ်ဂီၢ် ဒီးအဝဲ ကကတဲာ်ကတီၤ တၢ်အီၣ်လၢ အကြၢးဝဲဘၣ်ဝဲဒီး စီၤပၤတဂၤ အဂီၢ်လီၤ.+

၂၁ “စီၤနးသၤလံ+ မ့ၢ်တၤဟိမိၢ်လၢ အဖျဲၣ်အဆှါတဒုလီၤ. အဝဲ တဲတၢ်ကတိၤလၢ အဖျါဃံဖျါလၤလီၤ.+

၂၂ “စီၤယိၤသး+ မ့ၢ်ဝဲ သ့ၣ်လၢ အအိၣ်လၢ ထံထီၣ်ပၢၢ်အကပၤ ဒီးအသၣ်ထီၣ်အါမးတထူၣ်​ အဒ့လီၤ. ဒီးအဒ့သ့ၣ်တဖၣ်​ ထီဝဲ တုၤလၢ အတလၢကွံာ် တၢ်ဒူၣ်လီၤ. ၂၃ ဘၣ်ဆၣ်​ ပှၤခးချံၣ်ဖိတဖၣ် သးဟ့အီၤ ဒီးဒုးအီၤ ဒီးခးအီၤလီၤ.+ ၂၄ ဘၣ်ဆၣ်​ အချံၣ်န့ၣ်​ အိၣ်ဂၢၢ်ကျၢၤဝဲ+ ဒီးအစုဆူၣ်​ ဒီးအစုချ့,+ ခီဖျိလၢ ပှၤလၢ အဂံၢ်ဆူၣ်ဘါဆူၣ်တဂၤ မၤစၢၤယၤ, စီၤယၤကိာ် အဃိလီၤ. အဝဲဒၣ်​ မ့ၢ်ပှၤကွၢ်သိ ဒီးအံၣ်စရ့လး အလၢၢ်လီၤ. ၂၅ စီၤယိၤသးဧၢ, နမ့ၢ်တၢ်ဟ့ၣ်လၢ ယကစၢ်ယွၤအအိၣ်​ ဒီးကစၢ်ယွၤ ကမၤစၢၤနၤလီၤ. နအိၣ်ဘူးဒီး သ့တၢ်လၢာ်ကစၢ် ဒီးကစၢ်ယွၤ ကဆိၣ်ဂ့ၤနၤလၢ တၢ်ဆိၣ်ဂ့ၤတဖၣ်လၢ မူခိၣ်ထး, တၢ်ဆိၣ်ဂ့ၤတဖၣ်လၢ ထံယိာ်ပူၤ+ ဒီးကဆိၣ်ဂ့ၤနၤလၢ ဆၣ်ဖိကီၢ်ဖိ ဒီးဖိသၣ်အါအါဂီၢ်ဂီၢ်လီၤ.* ၂၆ ယတၢ်ဆိၣ်ဂ့ၤတဖၣ်​ ကဒိၣ်န့ၢ်ဒံး ကစၢၢ်အထူအယိာ် အတၢ်ဆိၣ်ဂ့ၤတဖၣ်​ ဒီးတၢ်လူၢ်လၢ အအိၣ်ဂၢၢ်ဆိးကျၢၤ ဖးယံာ်တဖၣ်​ အတၢ်ဃံတၢ်လၤလီၤ.+ စီၤယိၤသး လၢအမ့ၢ် ပှၤတဂၤလၢ အဘၣ်​ တၢ်ပာ်လီၤဆီအီၤ ဒီးအဒီပုၢ်ဝဲၢ်ခွါတဖၣ်န့ၣ်​ တၢ်ဆိၣ်ဂ့ၤတဖၣ်​ ကဆဲးအိၣ်လၢ အခိၣ်လိၤလီၤ.+

၂၇ “စီၤဘံၣ်ယၤမံၣ်န့ၣ်+ ကအ့ၣ်ဖှီဝဲ အဒုၣ်အဒါ ဒ်ထွံၣ်မံၤအသိးလီၤ.+ လၢဂီၤခီန့ၣ်​ အကအီၣ်ဝဲ ဆၣ်ဖိကီၢ်ဖိ ဒီးလၢမုၢ်ဟါန့ၣ်​ အကနီၤလီၤဝဲ တၢ်လၢ အဘၣ်တၢ်ဂုာ်န့ၢ်ဆူၣ်အီၤတဖၣ်လီၤ.”+

၂၈ ပှၤအံၣ်စရ့လး ၁၂ ဒူၣ်​ ကဟဲလီၤစၢၤလၢ အဝဲသ့ၣ်အအိၣ်​ ဒီးဖဲအပၢ် ဆိၣ်ဂ့ၤ အဝဲသ့ၣ်အခါ အပၢ် တဲအဝဲသ့ၣ်​ တၢ်ဂ့ၢ်တဖၣ်န့ၣ်လီၤ. ဒီးအဆိၣ်ဂ့ၤ အဝဲသ့ၣ်​ တဂၤစုာ်စုာ် ဒ်အကြၢးဝဲဘၣ်ဝဲ အသိးလီၤ.+

၂၉ ဝံၤဒီး စီၤယၤကိာ်မၤလိာ် အဝဲသ့ၣ်လၢ “ယကသံ ဘူးထီၣ်လံ. သုကဘၣ်​ ခူၣ်လီၤယၤ ဃုာ်ဒီး ယမိၢ်ပၢ်ဖံဖု လၢပျၢၤတဖၣ်လၢ+ လ့ကအိ လၢအအိၣ်လၢ ပှၤဃ့ၤသးဖိ စီၤဧ့ၤဖရိၣ်​ အဟီၣ်ခိၣ်​ တကဝီၤအပူၤလီၤ.+ ၃၀ မးကပ့လၤ အလ့ကအိအံၤ အိၣ်ဝဲလၢ မးမရ့ အမဲာ်ညါ လၢကီၢ်ကနၤဧၣ်အပူၤ ဒီးမ့ၢ်ဝဲ ဟီၣ်ခိၣ်တကဝီၤလၢ စီၤအၤဘြၤဟၣ်​ ပှ့ၤဝဲလၢ ပှၤဃ့ၤသးဖိ စီၤဧ့ၤဖရိၣ်​ အအိၣ်​ လၢတၢ်သွၣ်ခိၣ်​ အဂီၢ်လီၤ. ၃၁ စီၤအၤဘြၤဟၣ်​ ဒီးအမါ နီၢ်စၤရါန့ၣ်​ ဘၣ်တၢ်ခူၣ်လီၤအီၤ ဖဲန့ၣ်လီၤ.+ စီၤအံၤစဲး ဒီးအမါနီၢ်ရံးဘကၤန့ၣ်​ ဘၣ်တၢ်ခူၣ်လီၤအီၤ ဖဲန့ၣ်လီၤ.+ ဒီးယခူၣ်လီၤယမါ နီၢ်လ့ၤအၤ ဖဲန့ၣ်စ့ၢ်ကီးလီၤ. ၃၂ ဟီၣ်ခိၣ်တကဝီၤ လၢအအိၣ်ဒီး လ့ကအိန့ၣ်​ ဘၣ်တၢ်ပှ့ၤအီၤလၢ စီၤဃ့သး အဖိခွါတဖၣ်​ အအိၣ်လီၤ.”+

၃၃ စီၤယၤကိာ်ဟ့ၣ်လီၤ အဖိခွါတဖၣ်​ တၢ်ဟံးစုနဲၣ်ကျဲတဖၣ်အံၤ ဝံၤဝဲအလီၢ်ခံ အဝဲထုးထီၣ်အခီၣ်​ လၢအလီၢ်မံခိၣ်​ ဒီးသံဝဲ ဒီးအဘၣ်တၢ် ပာ်ဖှိၣ်အီၤဃုာ်ဒီး အမိၢ်ပၢ်ဖံဖု လၢပျၢၤတဖၣ်လီၤ.+

၅၀ ဒီးစီၤယိၤသး ဖိးဟုအပၢ်+ ဒီးဟီၣ်ဝဲလၢအလိၤ ဒီးနၢမူအီၤလီၤ. ၂ ဝံၤဒီး စီၤယိၤသး မၤလိာ်အခ့အပှၤ လၢအမ့ၢ် ကသံၣ်သရၣ်တဖၣ်​ ဒ်သိး အဝဲသ့ၣ်​ ကကတဲာ်ကတီၤ* အပၢ်အစိၣ်+ အဂီၢ်လီၤ. အဃိ ကသံၣ်သရၣ်တဖၣ်​ ကတဲာ်ကတီၤဝဲ စီၤအံၣ်စရ့လး အစိၣ်​ ၃ ဒီးအယံာ်ဝဲ အသီ ၄၀ လၢအမ့ၢ် တၢ်ဆၢကတီၢ် ပှဲၤထီၣ်လၢ တၢ်ကတဲာ်ကတီၤ ပှၤသံအစိၣ်အဂီၢ်လီၤ. ဒီးပှၤအဲၤကူပတူးဖိတဖၣ်​ ဟီၣ်ဝဲလၢအဃိ အသီ ၇၀ လီၤ.

၄ ဖဲတၢ်သးအုး အမုၢ်နံၤတဖၣ်လၢ စီၤယၤကိာ်အဂီၢ် ပှဲၤထီၣ်ဝဲအခါ စီၤယိၤသး တဲဘၣ်​ ဖၤရိၤ အပဒိၣ်ပပှၢ်တဖၣ်လၢ “သုမ့ၢ် ဘၣ်သူၣ်ဘၣ်သးယၤန့ၣ်​ လဲၤတဲဘၣ်​ ဖၤရိၤလၢ ၅ ‘ယပၢ်မၢ ယမၤတၢ်အၢၣ်လီၤဒီးအီၤ+ ဒီးတဲဝဲလၢ “ကွၢ်လၢအံၤ, ယကသံ ဘူးထီၣ်လံအဃိ+ နကဘၣ်​ ခူၣ်လီၤယၤလၢ ယတၢ်သွၣ်ခိၣ်+ လၢယခူၣ်ပာ်စၢၤအီၤလၢ ကီၢ်ကနၤဧၣ်အပူၤလီၤ.”+ အဃိ ဝံသးစူၤ, ပျဲယလဲၤ ခူၣ်လီၤယပၢ်တက့ၢ်. ယမၤမ့ၢ်ဝံၤန့ၣ်​ ယကဟဲက့ၤလီၤ.’” ၆ ဖၤရိၤ တဲဆၢက့ၤဝဲလၢ “လဲၤခူၣ်လီၤနပၢ် ဒ်အမၢနအၢၣ်လီၤအီၤ အသိးတက့ၢ်.”+

၇ ဒီးစီၤယိၤသး လဲၤတၢ်ဒ်သိး ကခူၣ်လီၤအပၢ်အဂီၢ်လီၤ. ဖၤရိၤ အခ့အပှၤခဲလၢာ် ဒီးအပဒိၣ်ပပှၢ်တဖၣ်+ ဒီးပှၤလၢအတီခိၣ်ရိၤမဲတၢ်လၢ ကီၢ်အဲၤကူပတူးအပူၤ ခဲလၢာ် ၈ ဒီးစီၤယိၤသး အဒူၣ်ဖိထၢဖိ ကိးဂၤဒဲး ဒီးစီၤယိၤသး အဒီပုၢ်ဝဲၢ်ခွါတဖၣ်​ ဒီးအပၢ် အဒူၣ်ဖိထၢဖိ ကိးဂၤဒဲးန့ၣ်​ လဲၤဃုာ်ဒီးအီၤလီၤ.+ အဝဲသ့ၣ်​ ပာ်တ့ၢ်ထဲဒၣ်​ အဖိလၢ အဆံးသ့ၣ်တဖၣ်​ ဒီးအသိ ဒီးအမဲာ်တဲးလဲး ဒီးအကျီၢ်တဖၣ်လၢ ကိၡ့ၣ်​ အဟီၣ်ကဝီၤအပူၤလီၤ. ၉ ဒီးပှၤဒိးလ့ၣ်ကဟၣ်တဖၣ်+ ဒီးပှၤဒိးကသ့ၣ်တဖၣ်​ လဲၤပိာ်အခံအဃိ ပှၤအိၣ်ဝဲ အါအါဂီၢ်ဂီၢ်လီၤ. ၁၀ ဒီးအဝဲသ့ၣ်​ လဲၤတုၤလၢ အၤတၤ အတၢ်ပျီပူၤ လၢအအိၣ်ဘူးဒီး ထံကျိယၢ်ဒ့ၣ်​ ဒီးဖဲန့ၣ်​ အဝဲသ့ၣ်​ ဟီၣ်ဝဲယၢၤဝဲ ဒိၣ်ဒိၣ်မုၢ်မုၢ် ဒီးဟီၣ်ဝဲနးမးလီၤ. ဒီးစီၤယိၤသး ဟီၣ်ဝဲယၢၤဝဲ လၢအပၢ်အဃိ နွံသီလီၤ. ၁၁ ဒီးဖဲ ပှၤကနၤဧၣ်ဖိတဖၣ်​ ထံၣ်ဝဲလၢ ပှၤသ့ၣ်တဖၣ်န့ၣ်​ ဟီၣ်ဝဲယၢၤဝဲ လၢအၤတၤ အတၢ်ပျီပူၤအခါ အဝဲသ့ၣ်​ တဲဝဲလၢ “ပှၤအဲၤကူပတူးဖိတဖၣ်​ ဟီၣ်ဝဲယၢၤဝဲ ဒိၣ်ဒိၣ်မုၢ်မုၢ်လီၤမၢၤ.” အဃိ ပှၤကိးဝဲ တၢ်လီၢ်အဝဲအံၤလၢ ဟ့းဘ့ၤလးမံစရၣ်ယံၣ်လီၤ.* ဒီးတၢ်လီၢ်အံၤ အိၣ်လၢ ယၢ်ဒ့ၣ်​ အဟီၣ်ကဝီၤလီၤ.

၁၂ ဒီးစီၤယၤကိာ် အဖိခွါတဖၣ်​ မၤဝဲဒ် အပၢ်မၤလိာ် အဝဲသ့ၣ်​ အသိးလီၤ.+ ၁၃ ဒီးအဖိခွါတဖၣ်​ လဲၤစိာ်အစိၣ်ဆူ ကီၢ်ကနၤဧၣ်​ ဒီးခူၣ်လီၤအီၤလၢ မးကပ့လၤ အလ့ကအိ လၢအအိၣ်လၢ ဟီၣ်ခိၣ်တကဝီၤလၢ မးမရ့အမဲာ်ညါလီၤ. ဒီးဟီၣ်ခိၣ်တကဝီၤအံၤ စီၤအၤဘြၤဟၣ်​ ပှ့ၤဝဲလၢ ပှၤဃ့ၤသးဖိ စီၤဧ့ၤဖရိၣ်အအိၣ်​ လၢတၢ်သွၣ်ခိၣ်အဂီၢ်လီၤ.+ ၁၄ ဖဲစီၤယိၤသး ခူၣ်လီၤအပၢ် ဝံၤအခါ အဝဲ ဒီးအဒီပုၢ်ဝဲၢ်ခွါတဖၣ်​ ဒီးပှၤကိးဂၤဒဲးလၢ အလဲၤပိာ်အခံ ဒ်သိးကလဲၤခူၣ်လီၤအပၢ်အဂီၢ်န့ၣ်​ က့ၤကဒါက့ၤလၢ ကီၢ်အဲၤကူပတူး အပူၤလီၤ.

၁၅ ဖဲစီၤယိၤသး အပၢ်သံဝံၤ အလီၢ်ခံ အဒီပုၢ်ဝဲၢ်ခွါတဖၣ်​ တဲဝဲလၢ “ဘၣ်သ့ၣ်သ့ၣ်​ စီၤယိၤသး ကသးဆါပှၤဒံး ဒီးကဟ့ၣ်ကၣ်က့ၤပှၤ ခီဖျိတၢ်အၢကိးမံၤဒဲး လၢပမၤအၢတ့ၢ်အီၤ အဃိလီၤ.”+ ၁၆ အဃိ အဝဲသ့ၣ်ဆှၢလီၤ တၢ်ကစီၣ်​ လၢစီၤယိၤသးအအိၣ်လၢ “တချုးလၢ နပၢ်သံဒံးဘၣ်န့ၣ်​ အမၤလိာ်ဝဲလၢ ၁၇ ‘သုကဘၣ်တဲ စီၤယိၤသးဒ်အံၤ, “ဝံသးစူၤ ယဃ့ကညးနၤလၢ နကပျၢ်ကွံာ် နဒီပုၢ်ဝဲၢ်ခွါတဖၣ်​ အတၢ်ကမၣ်​ ဒီးအတၢ်ဒဲးဘး ခီဖျိလၢ အဝဲသ့ၣ်​ မၤဘၣ်ဒိနၤဒိၣ်မး အဃိန့ၣ်တက့ၢ်.”’ ခဲအံၤန့ၣ်​ ဝံသးစူၤ ပျၢ်ကွံာ်နပၢ်အယွၤ အခ့အပှၤတဖၣ်​ အတၢ်ကမၣ်တက့ၢ်.” ဒီးဖဲအဝဲသ့ၣ်​ တဲအီၤအခါ စီၤယိၤသး ဟီၣ်ဝဲလီၤ. ၁၈ ဒီးအဒီပုၢ်ဝဲၢ်ခွါတဖၣ်​ ဟဲထိၣ်လီၤပှီၤအသးလၢ အမဲာ်ညါ ဒီးတဲဝဲလၢ “ပအိၣ်လၢ နမဲာ်ညါဖဲအံၤ ဒ်နကုၢ်တဖၣ်​ အသိးလီၤ.”+ ၁၉ စီၤယိၤသး တဲအဝဲသ့ၣ်လၢ “ပျံၤတၢ်တဂ့ၤ. မ့ၢ်ယအိၣ်လၢ ကစၢ်ယွၤအလီၢ်ဧါ. ၂၀ လၢညါန့ၣ်​ သုကူၣ်ထီၣ်တၢ်လၢ ကမၤဘၣ်ဒိယၤ+ ဘၣ်ဆၣ်​ ကစၢ်ယွၤ ဒုးကဲထီၣ်အီၤလၢ တၢ်လၢအဂ့ၤ ဒ်သိးအကပာ်မူ ပှၤအါဂၤအဂီၢ် ဒ်အမၤဝဲလၢ မုၢ်မဆါတနံၤအံၤ အသိးလီၤ.+ ၂၁ အဃိ ခဲအံၤန့ၣ်​ ပျံၤတၢ်တဂ့ၤ. ယကဆဲးဟ့ၣ်လီၤ သုဒီးသုဖိတဖၣ်​ တၢ်အီၣ်တၢ်အီလီၤ.”+ အဃိ စီၤယိၤသး မၤမုာ်ထီၣ်က့ၤ အဝဲသ့ၣ်​ ဒီးတဲဆူၣ်ထီၣ်က့ၤ အဝဲသ့ၣ်​ အသးလီၤ.

၂၂ ဒီးစီၤယိၤသး ဒီးအပၢ်အဒူၣ်ဖိထၢဖိတဖၣ်န့ၣ်​ ဆဲးအိၣ်ဝဲလၢ ကီၢ်အဲၤကူပတူးအပူၤလီၤ. စီၤယိၤသးန့ၣ်​ အိၣ်မူဘၣ်ဝဲ အနံၣ်​ ၁၁၀ လီၤ. ၂၃ ဒီးစီၤယိၤသး ထံၣ်ဘၣ်ဝဲ စီၤအ့ဖရဲၣ်​ အလံၤခွါတဖၣ်+ ဒီးထံၣ်ဘၣ်စ့ၢ်ကီး စီၤမနၤၡ့ၤ အဖိခွါ စီၤမၤကံၢ် အဖိအလံၤတဖၣ်လီၤ.+ အဝဲသ့ၣ်တဖၣ်န့ၣ်​ ဒိၣ်ထီၣ်လၢ စီၤယိၤသး အခီၣ်လ့ၢ်ခိၣ်အလိၤလီၤ. ၂၄ လၢခံ စီၤယိၤသး တဲဘၣ်​ အဒီပုၢ်ဝဲၢ်ခွါတဖၣ်လၢ “ယကသံလီၤ. ဘၣ်ဆၣ်​ ကစၢ်ယွၤ ကမၤစၢၤသု သပှၢ်ကတၢၢ်+ ဒီးအဝဲ ကဒုးဟးထီၣ်သု လၢကီၢ်တဘ့ၣ်အံၤအပူၤ သပှၢ်ကတၢၢ်လီၤ. ဒီးအဝဲကဆှၢသု လၢကီၢ်တဘ့ၣ်လၢ အအၢၣ်လီၤပာ်စၢၤ စီၤအၤဘြၤဟၣ်, စီၤအံၤစဲး ဒီးစီၤယၤကိာ်လီၤ.”+ ၂၅ ဒီးစီၤယိၤသး တဲစီၤအံၣ်စရ့လး အဖိခွါတဖၣ်လၢ “ကစၢ်ယွၤ ကမၤစၢၤသု သပှၢ်ကတၢၢ်လီၤ. အၢၣ်လီၤယၤလၢ သုက စိာ်ထီၣ်ကွံာ် ယဃံယကွဲ လၢတၢ်လီၢ်ဖဲအံၤတက့ၢ်.”+ ၂၆ ဒီးစီၤယိၤသး သံဝဲဖဲ အသးနံၣ်အိၣ်ဝဲ ၁၁၀ ဒီးအဝဲသ့ၣ်​ ကတဲာ်ကတီၤအစိၣ်+ ဒီးပာ်အီၤလၢ တလါတဖျၢၣ်အပူၤ လၢကီၢ်အဲၤကူပတူးလီၤ.