တၢ်သးဝံၣ်တဖၣ်အတၢ်သးဝံၣ်
၁ တၢ်သးဝံၣ်တဖၣ်အတၢ်သးဝံၣ် လၢစီၤၡလိၤမိၤ ကွဲးဝဲ.+
၂ ပှၤၡူလမးမုၣ်ဖိ တဲဝဲလၢ “မ်နနၢမူယၤလၢ နထးခိၣ်တက့ၢ်,
နတၢ်အဲၣ်လၢ နပာ်ဖျါထီၣ်န့ၣ် ဂ့ၤဒိၣ်န့ၢ်ဒံး စပံးထံလီၤ.+
၃ သိနၢမူလၢ နဖှူအီၤန့ၣ် နၢမူညါ+
ဒီးနမံၤန့ၣ် မၤအသးဒ် သိနၢမူလၢ အလူၤလီၤအသး,+
အဃိ မုၣ်လိၣ်ဘိတဖၣ် အဲၣ်ဘၣ်နၤလီၤ.
၄ စီၤပၤ က့ၤကိးယၤလၢ အဒၢးပူၤလံ.
အဃိ ဟဲကိးက့ၤယၤ ဒီးပကဃ့ၢ်ထီၣ်ကွံာ်မီၤ.
ပကသူၣ်ဖှံသးညီ ဒီးသူၣ်ခုသးခု ဒ်သိးသိး,
နတၢ်အဲၣ်လၢ နပာ်ဖျါထီၣ်အီၤန့ၣ် အဂ့ၤဒိၣ်န့ၢ်ဒံးစပံးထံ အဃိ ပကတဲသကိး အဂ့ၢ်နီၤ.
မုၣ်လိၣ်ဘိတဖၣ် အဲၣ်ဘၣ်နၤန့ၣ် တလီၤကမၢကမၣ်ဘၣ်.
၅ ပှၤယရူၤၡလ့ၣ်မုၣ်သ့ၣ်ဧၢ, ယညၣ်သူဘၣ်ဆၣ် ယလီၤအဲၣ်.
ယလီၤဂာ်ဒ် ပှၤက့ဒၢ်ဖိ+ အဒဲတဖၣ် ဒီးဒ်စီၤၡလိၤမိၤ အဒဲအတၢ်ကံးညာ်တဖၣ်လီၤ.+
၆ မ့ၢ်လၢမုၢ်အီၣ်ယၤဒီး
ယညၣ်ထီၣ်သူအဃိ ကွၢ်ထံယၤတဂ့ၤ.
ယကၠီတဖၣ်န့ၣ် သးထီၣ်ယၤအဃိ
အဝဲသ့ၣ် မၢယကွၢ်ထွဲ စပံးကျီး တဖၣ်လီၤ.
အဃိ ယကွၢ်ထွဲ ယနီၢ်ကစၢ် စပံးကျီးမး တချုးဘၣ်.
၇ ယတၢ်အဲၣ်ဖိလၢ ယအဲၣ်အီၤ ဒိၣ်မးဧၢ,
နလဲၤဒုးအီၣ်နသိဆၣ်ဖဲလဲၣ်,+
ဖဲမုၢ်ဆါခီန့ၣ် နဒုးကိာ်လီၤ နသိလၢ တၢ်လီၢ်ဖဲလဲၣ်, တဲဘၣ်ယၤမီၤ.
မ့တမ့ၢ်ဘၣ်န့ၣ် ယကလီၤဂာ်ဒီး ပိာ်မုၣ်လၢ အဘၣ်ကးဘၢဃာ်အမဲာ် လၢခိၣ်ဖၢၣ်
ဒီးဟးဃုနၤလၢ နသကိးတဖၣ် အသိကျါလီၤ.”
၈ ပှၤယရူၤၡလ့ၣ်မုၣ်တဖၣ် တဲဝဲလၢ “အိ မုၣ်ဃံလၤဖိလၢ အလီၤအဲၣ်ဒိၣ်ကတၢၢ်ဧၢ, နမ့ၢ်တသ့ၣ်ညါလၢ အအိၣ်ဖဲလဲၣ်ဘၣ်န့ၣ်
လဲၤပိာ်သိတဖၣ် အခီၣ်လီၢ်
ဒီးလဲၤဒုးအီၣ် နမဲာ်တဲးလဲးတဖၣ်အဆၣ်လၢ ပှၤကွၢ်သိတဖၣ် အဒဲကပၤမီၤ.”
၉ စီၤပၤ တဲဝဲလၢ “ပှၤလၢယအဲၣ်ဘၣ်အီၤ တဂၤဧၢ, နလီၤဂာ်ဒီး ကသ့ၣ်မိၢ်ဖိလၢ အဃံအလၤလၢ စီၤပၤဖၤရိၤ အလ့ၣ်ကဟၣ်တဖၣ် အကျါလီၤ.+
၁၀ နဘိးပၤဖိတဖၣ်လၢ နမၤဃံမၤလၤအီၤလၢ တၢ်ကယၢကယဲတဖၣ်န့ၣ် လီၤအဲၣ်ညါ.*
ဒီးနကိာ်ဘိအလိၤန့ၣ် အိၣ်ဒီးဖဲဘၢၣ်သၣ်တဖၣ် အဃိဃံလၤဂ့ၤမး.
၁၁ ပကတ့န့ၢ်နၤ တၢ်ကယၢကယဲလၢ ပှၤမၤအီၤလၢထူ
ဒီးစ့တဖၣ်လီၤ.”
၁၂ ပှၤၡူလမးမုၣ်ဖိ တဲဝဲလၢ “ဖဲစီၤပၤ ဆ့ၣ်နီၤလၢ အစီၢ်နီၤခိၣ်ကဝီၤ အဃၢၤအခါ
ယတၢ်နၢမူ+ အစိ နၢမူထီၣ်ဝဲလီၤ.
၁၃ ယပှၤသးဘိန့ၣ် လီၤဂာ်ဒ်သိးဒီး မူရၣ်တဘိၣ်+ လၢအနၢမူ
လၢအအိၣ်လၢ ယသးနါပှၢ်အလိၤ ဖဲမုၢ်နၤခီ အဆၢကတီၢ်လီၤ.
၁၄ ယပှၤသးဘိန့ၣ် လီၤဂာ်ဒ်သိးဒီး သ့ၣ်ဂီၤမုၢ် အဖီတချုၣ်+
လၢအဟဲဖးထီၣ်လၢ ဝ့ၢ်ဧ့ၣ်က့ဒံၤ အစပံးကျီးတဖၣ် အပူၤလီၤ.”+
၁၅ ပှၤကွၢ်သိဖိ တဲဝဲလၢ “အိ ယသးခိၣ်မ့ဧၢ, နဒိၣ်တၢ်ဂ့ၤဒီး
နလီၤအဲၣ်ညါ ဒီးနမဲာ်ချံန့ၣ် လီၤဂာ်ဒီး ထိၣ်လွံၢ်ဖိအမဲာ်ချံလီၤ.”+
၁၆ ပှၤၡူလမးမုၣ်ဖိ တဲဝဲလၢ “ယပှၤသးဘိဧၢ, နဒိၣ်တၢ်ဂ့ၤမး ဒီးနမၤသးခုယသးလီၤ.+
နီၢ်လါဟ့တဖၣ် မ့ၢ်ဝဲပလီၢ်မံလီၤ.
၁၇ ပဟံၣ်အတၢ်တီတဖၣ်န့ၣ် မ့ၢ်ဝဲ သ့ၣ်ဆှိအ့ရ့း
ဒီးအခိၣ်ဒုးလၢ အကိပူၤတပၤန့ၣ် မ့ၢ်ဝဲ သ့ၣ်ကၠူနံးဖၢၤလီၤ.
၂ ပှၤၡူလမးမုၣ်ဖိ တဲဝဲလၢ “ယမ့ၢ်ဒၣ် ဖီဝံဒံၣ်တဖီးလၢ ပီၣ်လဲၣ်ကၢၢ်ခိၣ်
ဒီးဖီဒ့ၣ်ညါတဖီးလၢ တၢ်တြီၤပူၤလီၤ.”+
၂ ပှၤကွၢ်သိဖိ တဲဝဲလၢ “လၢမုၣ်လိၣ်ဘိတဖၣ်အကျါန့ၣ် ယသးခိၣ်မ့ လီၤဂာ်ဒီး
ဖီဒ့ၣ်ညါတဖီးလၢ တၤဆှုၣ်တၤမဲ အကျါလီၤ.”
၃ ပှၤၡူလမးမုၣ်ဖိ တဲဝဲလၢ “လၢဖိၣ်သၣ်ခွါတဖၣ် အကျါန့ၣ် ယပှၤသးဘိ
လီၤဂာ်ဒ်သိးဒီး ဖီသၣ်အထူၣ်တထူၣ်လၢ သ့ၣ်လၢပှၢ်လၢ်ကျါတဖၣ် အကျါလီၤ.
ယအဲၣ်ဒိးဆ့ၣ်နီၤဘၣ်ယဲလၢ အကဒုလာ် သပှၢ်တၢၢ်
ဒီးအသၣ်တဖၣ်န့ၣ် ဝံၣ်ဘၣ် ယၤလီၤ.
၄ အဝဲလဲၤကိးယၤလၢ တၢ်အီၣ်မူး အဒၢး,
အတၢ်အဲၣ် မ့ၢ်ထဲလၢယဂီၢ်န့ၣ် ပှၤထံၣ်ဝဲသ့ ကိးဂၤဒဲးလီၤ.
၆ ယတခၢၣ်ဃာ် အစုလၢအစ့ၣ်တခီ
ဒီးအစုထွဲ ဖိးဟုယၤလီၤ.+
၇ ပှၤယရူၤၡလ့ၣ်မုၣ်သ့ၣ်ဧၢ, ယကမၢသုအၢၣ်လီၤတၢ်လၢ
တၤဟိမိၢ်ဒီးတၤဟိဖါလၢ+ အအိၣ်လၢ တၢ်ပျီပူၤ အမဲာ်ညါလီၤ.
ယတၢ်အဲၣ် မ့ၢ်တဟဲအိၣ်ထီၣ် အနီၢ်ကစၢ်ဒံးဘၣ်န့ၣ် တဘၣ် ဂုာ်ကျဲးစၢး ထိၣ်ဟူးထိၣ်ဂဲၤထီၣ် ယတၢ်အဲၣ်တဂ့ၤ.+
၈ အိ ယပှၤသးဘိ အကလုၢ်မၢၤ.
အဟဲဝဲလံ.
အဟဲလၢ ကစၢၢ်ကလိတဖၣ်အကျါ ဒီးဟဲဃ့ၢ်ဝဲလၢ တၢ်လူၢ်တဖၣ် အကျါလံ.
၉ ယပှၤသးဘိန့ၣ် လီၤဂာ်ဒီး တၤဟိ ဒီးတၤဃီၤဖါဖိလီၤ.+
အဝဲဆၢထၢၣ်လၢ ပတၢ်ဒူၣ်အလီၢ်ခံ
ဒီးကွၢ်စိဃီၤတၢ်လၢ ပဲတြီဖိအပူၤ
ဒီးကွၢ်ဃီၤတၢ်လၢ ပဲတြီဖိ အတၢ်ထူၣ်ဖျိတဖၣ် အပူၤလီၤ.
၁၁ တၢ်ဂိၢ်ခါ လဲၤတလၢကွံာ်
ဒီးတၢ်စူၤခါ ပူၤကွံာ်လံ.
၁၂ ဖီဖိတဖၣ် ဘိၣ်ထီၣ်ဖးထီၣ်ဝဲလၢ ကီၢ်ပူၤလံ.+
အခါဘၣ်လၢ ပှၤကတံာ် စပံးဒ့တဖၣ်လံ.+
ဒီးပှၤနၢ်ဟူဘၣ် ထိၣ်လွံၢ်ဖိတဖၣ် ပှ့ၤထီၣ်ဝဲလၢ ပကီၢ်ပူၤလံ.+
၁၃ ချၢၣ်ဒၢသၣ်လၢ အသၣ်ဆိန့ၣ် မံထီၣ်လံ.+
စပံးမုၢ်တဖၣ် ဘိၣ်ထီၣ်ဖးထီၣ် ဒီးဟ့ၣ်ထီၣ် တၢ်နၢမူလံ.
ယသးခိၣ်မ့ဧၢ, ဂဲၤဆၢထၢၣ်,
ယမုၣ်ဃံလၤဖိဧၢ, က့ၤပိာ်ယခံဟီ.
၁၄ ယထိၣ်လွံၢ်ဖိလၢ အအိၣ်လၢ လၢၢ်ကဆူး+
ဒီးအအိၣ်ခူသူၣ်လၢ တၢ်အိၣ်ခူသူၣ်အလီၢ် လၢလ့ကပၤဧၢ,
မ့ၢ်လၢ နကလုၢ်မုာ်ကထါဆၢ ဒီးနဒိၣ်တၢ်လီၤအဲၣ်လီၤကွံအဃိ+
ဟ့ၣ်ကွၢ်ယၤလၢနမဲာ်ဖိ ဒီးဒုးနၢ်ဟူယၤလၢ နကလုၢ်ဖိမီၤ.’”+
၁၅ ပှၤၡူလမးမုၣ်ဖိ အကၠီတဖၣ် တဲဝဲလၢ “ပစပံးမုၢ်တဖၣ် ဖီထီၣ်ဖးထီၣ်လံ.
ထွံၣ်မံၤတဖၣ်လၢ အမၤဟးဂီၤ စပံးကျီးတဖၣ်န့ၣ်
လူၤဖီၣ်အဝဲသ့ၣ်သၢၤ.”
၁၆ ပှၤၡူလမးမုၣ်ဖိ တဲဝဲလၢ “ယပှၤသးဘိန့ၣ် မ့ၢ်ယတၢ် ဒီးယမ့ၢ်အတၢ်လီၤ.+
ဒီးအဝဲကွၢ်သိလၢ+ ဖီဒ့ၣ်ညါတဖၣ် အကျါလီၤ.+
၁၇ ယပှၤသးဘိဧၢ, တချုးဖဲ ကလံၤဖိဟဲအူထီၣ် ဒီးသ့ၣ်ကဒုဝၣ်ကဒု ဟါမၢ်ကွံာ်ဒံးဘၣ်န့ၣ်
ဟဲက့ၤချ့ချ့နီၤ.
ဒ်တၤဟိ+ မ့တမ့ၢ် တၤဃီၤဖါဖိ တဒုအသိးန့ၣ်+ ဟဲခီဂာ် ကစၢၢ်တဖၣ်လၢ အမၤလီၤဖးပှၤနီၤ.
၃ ပှၤၡူလမးမုၣ်ဖိ တဲဝဲလၢ “ဖဲမုၢ်နၤခါ လၢယလီၢ်မံခိၣ်န့ၣ်
ယဆိကမိၣ်ဘၣ် ယတၢ်အဲၣ်ဖိအဂ့ၢ်+
ဒီးယဆၢထံၣ်အီၤဘၣ်ဆၣ် အဝဲတအိၣ်ဖဲန့ၣ်ဘၣ်.+
၂ ယကဂဲၤဆၢထၢၣ် ဒီးဟးဆှၣ်တရံးတၢ်လၢဝ့ၢ်ပူၤ
လၢကျဲတဖၣ် ဒီးတၢ်ဆါတၢ်ပှ့ၤအလီၢ်တဖၣ်လီၤ.
ယကဟးဃု ယတၢ်အဲၣ်ဖိလီၤ.
ယဆၢထံၣ်အီၤဘၣ်ဆၣ် အဝဲတအိၣ်ဖဲန့ၣ်ဘၣ်.
၃ ပှၤခိးတၢ်ဖိတဖၣ်လၢ အဟးကွၢ်တရံးဝ့ၢ်န့ၣ်ထံၣ်ယၤ ဒီးယသံကွၢ် အဝဲသ့ၣ်လၢ+
‘သုထံၣ်ဘၣ် ယတၢ်အဲၣ်ဖိစ့ၢ်ဧါ.’
၄ ဖဲယလဲၤတလၢကွံာ် အဝဲသ့ၣ် တစဲးဖိဒီး
ယထံၣ်ဘၣ်က့ၤ ယတၢ်အဲၣ်ဖိလီၤ.
ယဖီၣ်တံၢ်ဃာ်အီၤ ဒီးယ တပျၢ်အီၤဘၣ်
တုၤလၢယဟဲက့ၤကိးအီၤလၢ ယမိအဟံၣ်လီၤ.+
ယက့ၤကိးအီၤလၢ ပှၤလၢအဒၢထီၣ်ယၤတဂၤန့ၣ် အဒၢးပူၤလီၤ.
၅ ပှၤယရူၤၡလ့ၣ်မုၣ်သ့ၣ်ဧၢ, ယကမၢသုအၢၣ်လီၤတၢ်လၢ
တၤဟိမိၢ်ဒီးတၤဟိဖါလၢ အအိၣ်လၢ တၢ်ပျီပူၤ အမဲာ်ညါလီၤ.
ယတၢ်အဲၣ် မ့ၢ်တဟဲအိၣ်ထီၣ် အနီၢ်ကစၢ်ဒံးဘၣ်န့ၣ် တဘၣ် ဂုာ်ကျဲးစၢး ထိၣ်ဟူးထိၣ်ဂဲၤထီၣ် ယတၢ်အဲၣ်တဂ့ၤ.”+
၆ ပှၤစံယိၣ်မုၣ်တဖၣ် တဲဝဲလၢ “တၢ်လၢ အဟဲထီၣ်လၢ ပှၢ်မုၢ်ကနၢ တခါအံၤ မ့ၢ်မနုၤလဲၣ်. အခုၣ်ထီၣ်ဒီး
အစိနၢ လီၤဂာ်ဒီး လီၢ်ဘၣ်,* မူရၣ်
ဒီးတၢ်နၢမူကမူၣ် အကလုာ်ကလုာ်လၢ ပှၤဆါတၢ်ပှ့ၤတၢ်ဖိတဖၣ် ဆါဝဲလီၤ.”+
၇ “ကွၢ်မီၤ, အမ့ၢ်ဝဲ စီၤၡလိၤမိၤ အလီၢ်ဆ့ၣ်နီၤ* ဒီးပှၤပိာ်ခွါလၢ အဂံၢ်ဆူၣ်ဘါဆူၣ် အဂၤဃုဆံ
လၢအမ့ၢ် အံၣ်စရ့လးခွါ လၢအဂံၢ်ဆူၣ်ဘါဆူၣ်တဖၣ်န့ၣ်+
အိၣ်ဝးတရံးအီၤလီၤ.
၈ အဝဲသ့ၣ်ခဲလၢာ်န့ၣ် အိၣ်ဝဲဒီးအနး
ဒီးအဝဲသ့ၣ် ထီၣ်ဘၣ်သုးအတၢ်မၤလိဝံၤလံ.
အဝဲသ့ၣ် တဂၤစုာ်စုာ်န့ၣ် အိၣ်ဒီးအနးလၢ အယီၢ်ဒ့လိၤ
ဒ်သိး ကတြီဆၢ တၢ်လီၤဘၣ်ယိၣ် လၢမုၢ်နၤခီအဂီၢ်လီၤ.”
၉ “အဝဲအံၤမ့ၢ်ဝဲ စီၤပၤအလီၢ်ဆ့ၣ်နီၤတဖျၢၣ်
လၢစီၤပၤၡလိၤမိၤတ့ဝဲလၢ လဘၤနိၣ်အသ့ၣ် လၢအနီၢ်ကစၢ် အဂီၢ်လီၤ.+
၁၀ လီၢ်ဆ့ၣ်နီၤ အထူၣ်တဖၣ်န့ၣ်* အဝဲတ့ဝဲလၢ စ့ညၣ်
ဒီးလီၢ်ဆ့ၣ်နီၤ အတၢ်သန့ၤသးအလီၢ်န့ၣ် အတ့ဝဲလၢထူလီၤ.
တၢ်ဆ့ၣ်နီၤအလီၢ်န့ၣ် မ့ၢ်ဝဲ သိဆူၣ်လၢ အလွဲၢ်လုးလီၤ.
မ့မ့ၢ်လၢ တၢ်ကိပူၤတခီန့ၣ် ပှၤယရူၤၡလ့ၣ်မုၣ်တဖၣ်
မၤဃံမၤလၤထီၣ်ဝဲလၢ တၢ်အဲၣ်တၢ်ကွံအပူၤလီၤ.”
၁၁ “အိ ပှၤစံယိၣ်မုၣ်တဖၣ်ဧၢ,
လဲၤထီၣ်ကွၢ် စီၤပၤၡလိၤမိၤလၢ
အဖျီၣ်ဃာ်တၢ်ဖျီအခိၣ်သလုး* လၢအမိ+ တ့န့ၢ်အီၤ
ဖဲမုၢ်နံၤလၢ အဖျီအသးအဂီၢ်
ဒီးဖဲမုၢ်နံၤလၢ အသးခုန့ၣ်သၢၤ.”
၄ ပှၤကွၢ်သိဖိ တဲဝဲလၢ “ယသးခိၣ်မ့ဧၢ, နဒိၣ်တၢ်ဂ့ၤ
ဒီးနလီၤအဲၣ်ညါ.
နမဲာ်ချံလၢ အအိၣ်လၢ တၢ်ကျၢၢ်ဘၢမဲာ် အဖီလာ်န့ၣ် မၤအသးဒ်သိးဒီး ထိၣ်လွံၢ်ဖိ အမဲာ်ချံလီၤ.
မ့မ့ၢ် နခိၣ်ဆူၣ်န့ၣ် လီၤဂာ်ဒ်သိးဒီး မဲာ်တဲးလဲးတဖုလၢ
အဟဲလီၤလၢ ကံးလဧး အကစၢၢ်လိၤလီၤ.+
၂ နမဲဝါဝါဖိတဖၣ် လီၤဂာ်ဒ် သိတဖုလၢ ပှၤတံာ်အဆူၣ်ဝံၤသီသီ
ဒီးပှၤဒုးလုၢ်အီၤထံဝံၤ အသိးလီၤ.
နမဲတဖၣ်န့ၣ် လီၤဂာ်ဒ်သိဖိသဃံာ်
လၢအတလီၤမၢ် နီတဒုဘၣ် အသိးလီၤ.
၃ နထးခိၣ်န့ၣ် လီၤဂာ်ဒ်သိးဒီး လုၣ်ဂီၤဆှုၣ်ကလာ်တဘိ
ဒီးနတၢ်ကတိၤတဖၣ် မုာ်ဒိၣ်မး
ဒီးနဘိးပၤဖိခံခီလၢ အအိၣ်လၢ တၢ်ကျၢၢ်ဘၢမဲာ် အဖီလာ်န့ၣ်
ဂီၤဒ်သိးဒီး သလဲသၣ် သ့ၣ်ဖး တခီလီၤ.
၄ နကိာ်ဘိ+ လီၤဂာ်ဒီး စီၤဒၤဝံး အတၢးထီ+
လၢပှၤတ့အီၤဒီး လၢၢ်ဘ့ၣ်ဘၣ်
ဒီးကတီၤအဘ့ၣ် လၢအကထိတဖၣ်
ဒီးပှၤပိာ်ခွါလၢ အဂံၢ်ဆူၣ်ဘါဆူၣ် အကတီၤကဝီၤကျီၤတဖၣ် ဘျးလီၤအသးလၢအလိၤလီၤ.+
၆ ပှၤၡူလမးမုၣ်ဖိ တဲဝဲလၢ “ယပှၤသးဘိဧၢ, တချုးဖဲ ကလံၤဖိဟဲအူထီၣ် ဒီးသ့ၣ်ကဒုဝၣ်ကဒု ဟါမၢ်ကွံာ်ဒံးဘၣ်န့ၣ်
၇ ပှၤကွၢ်သိဖိ တဲဝဲလၢ “ယသးခိၣ်မ့ဧၢ, နဃံနလၤ ဒီဂၤ+
ဒီးနတၢ်လီၤတူာ်လီၤကာ် တအိၣ်နီတမံၤဘၣ်.
၈ ယတလးမူးပိာ်မုၣ်ဧၢ, ပကပာ်တ့ၢ်ကွံာ် လဘၤနိၣ်,
ပကဟးထီၣ်သကိးလၢ လဘၤနိၣ်နီၤ.+
ဟဲလီၤလၢ ကစၢၢ်အမါနၤအဒီခိၣ်,
ဟဲလီၤလၢ ကစၢၢ်စနံၢ် ဒီးကစၢၢ် ဃ့ရမိၣ် အဒီခိၣ်,+
ဟဲလီၤလၢ ခ့ယုၢ်တဖၣ် မံနီၤအလီၢ် ဒီးကစၢၢ်ကလိလၢ ခ့စံၣ်ပိၣ်အိၣ်ဝဲအလီၢ် အဖီလာ်ဟီ.
၉ ယဒ့မုၣ်ဧၢ, ယတလးမူးပိာ်မုၣ်ဧၢ,
နတၢ်ကွၢ်ယၤ ထဲတဘျးဖိန့ၣ် အိၣ်တ့ၢ်လၢ ယသးဖိအပူၤလံ.+
ယမ့ၢ်ထံၣ်ဘၣ် နဖဲချံထဲတတိၣ်န့ၣ် ယသးဖိကနိးထီၣ်လီၤ.
၁၀ ယဒ့မုၣ်ဧၢ, ယတလးမူးပိာ်မုၣ်ဧၢ, နတၢ်အဲၣ်လၢ နပာ်ဖျါထီၣ်အီၤန့ၣ် လီၤသူၣ်မံသးမုာ်ဒိၣ်မး.+
နတၢ်အဲၣ်လၢ နပာ်ဖျါထီၣ်အီၤန့ၣ် အဂ့ၤဒိၣ်န့ၢ်ဒံး စပံးထံ,+
ဒီးနတၢ်နၢမူန့ၣ် နၢမူဒိၣ်န့ၢ်ဒံး တၢ်နၢမူအဂၤ ခဲလၢာ်လီၤ.+
ဒီးနတၢ်ကူတၢ်ကၤ အစိန့ၣ် နၢမူဒ်သိးဒီး လဘၤနိၣ် အတၢ်နၢမူလီၤ.
၁၂ ယဒ့မုၣ်, ယတလးမူးပိာ်မုၣ်န့ၣ် လီၤဂာ်ဒ် တၤသၣ်လီၢ်လၢ တၢ်ခးတံၢ်ဃာ်သီးလီၤ.
နလီၤဂာ်ဒ် တၤသၣ်လီၢ်လၢ တၢ်ခးတံၢ်ဃာ်အီၤဒီးသီး ဒီးထံထီၣ်ပၢၢ် လၢအပံးဃာ်အသးလီၤ.
၁၃ နလီၤဂာ်ဒ် တၤသၣ်လီၢ်လၢ အအိၣ်ဒီးသ့ၣ်ထူၣ်တဖၣ်လၢ အသၣ်ထီၣ် သလဲသၣ်ပှဲၤပှဲၤ,
ဒီးအအိၣ်ဒီး တၤသူတၤသၣ်လၢ အဂ့ၤကတၢၢ် ဒီးဖီသ့ၣ်ဂီၤမုၢ်အထူၣ် ဒီးသ့ၣ်နၢ်ဒးလီၤ.
၁၄ ဒီးအအိၣ်ဒီး သ့ၣ်နၢ်ဒး,+ ဖီဝံဒံၣ်, ဂ့ၢ်နၢမူ+ ဒီးကဒါရၤ,+
ဒီးသ့ၣ်နၢမူ အကလုာ်ကလုာ်, မူရၣ် ဒီးသ့ၣ်တမၣ်ပျ့ၤ,+
ဒီးတၢ်နၢမူ လၢအဂ့ၤကတၢၢ် အကလုာ်ကလုာ်လီၤ.+
၁၅ နမ့ၢ်ထံထီၣ်ပၢၢ်လၢ ကရၢၢ်ပူၤ, ထံကမျၢ* လၢအအိၣ်ဒီး ထံဆှံလီၤ.
ဒီးနမ့ၢ် ထံကျိဖိလၢ အအိၣ်ဟဲယွၤလီၤလၢ လဘၤနိၣ်လီၤ.+
၁၆ အိ ကလံၤလၢ ကလံၤစိးတခီဧၢ, ပၢၢ်ထီၣ်သၢၤ.
အိ ကလံၤလၢ ကလံၤထံးတခီဧၢ, ဟဲအူထီၣ်မီၤ.
ဟဲအူလီၤကဖီကဖီလၢ ယတၤသၣ်လီၢ်ပူၤ
ဒ်သိး တၢ်နၢမူဖိ ကရၤလီၤအသးအဂီၢ်သၢၤ.”
ပှၤၡူလမးမုၣ်ဖိ တဲဝဲလၢ “ယဆၢမုၢ်လၢ်လၢ ယပှၤသးဘိ ကဟဲလၢ အတၤသၣ်လီၢ်ပူၤ
ဒီးကအီၣ်တၤသူတၤသၣ် လၢအဂ့ၤကတၢၢ်လီၤ.”
၅ ပှၤကွၢ်သိဖိ တဲဝဲလၢ “ယဟဲနုာ်လီၤလၢ ယတၤသၣ်လီၢ်ပူၤလံ,+
ယဒ့မုၣ်, ယတလးမူးပိာ်မုၣ်ဧၢ.
ယဒဲး ယမူရၣ် ဒီးတၢ်နၢမူအဂၤတဖၣ်လံ.+
ယအီၣ်ယကနဲစီအခိၣ်ထံ ဒီးယကနဲစီလံ.
ဒီးယအီယစပံးထံ ဒီးယ တၢ်နုၢ်ထံလံ.”+
ပှၤယရူၤၡလ့ၣ်မုၣ်တဖၣ် တဲဝဲလၢ “တံၤသကိးသးဘိသ့ၣ်ဧၢ,
အီၣ်အီတုၤလၢ သုမူၤလၢ တၢ်အဲၣ်အဃိသၢၤ.”+
၂ ပှၤၡူလမးမုၣ်ဖိ တဲဝဲလၢ “ယမံဘၣ်ဆၣ် ယနၢ်တလီၤဘၣ်.+
ယနၢ်ဟူ ယပှၤသးဘိ ဒိတကျိာ်တၢ်အသီၣ်
ဒီးတဲဝဲလၢ ‘ယဒ့မုၣ်ဧၢ, ယသးခိၣ်မ့ဧၢ,
ယထိၣ်လွံၢ်ဖိဧၢ, ပိာ်မုၣ်လၢပှဲၤဧၢ, အိးထီၣ်န့ၢ်ယၤ ပဲတြီမီၤ.
ယခိၣ်သၣ်ဃံ ဘၣ်စီၣ်ဒီးပစီၤထံလံ.
ဒီးယခိၣ်ဆူၣ် ဘၣ်စီၣ်ဒီးမုၢ်နၤ အပစီၤထံလံ.’+
၃ ယဘ့ၣ်လီၤကွံာ် ယဆ့ကၤဖးထီဝံၤလံ.
ယကဘၣ်သိးထီၣ်ကဒါက့ၤအီၤဧါ.
ယသ့ယခီၣ်ဝံၤလံ.
ယကဘၣ် မၤဘၣ်အၢကဒီးအီၤဧါ.
၄ ဖဲယပှၤသးဘိ ထုးက့ၤအစုလၢ ပဲတြီအတၢ်ထူၣ်ဖျိအခါ
ယသးသယုၢ်ဘၣ်အီၤလီၤ.
၅ ယဆၢထၢၣ် ဒ်သိးကလဲၤအိးထီၣ်န့ၢ် ယပှၤသးဘိပဲတြီ
ဒီးမူရၣ် လီၤစီၤလၢ ယစုအလိၤလီၤ.
ဒီးမူရၣ်အထံ လၢယစုမုၢ်စုနၢလိၤန့ၣ်
ယွၤလီၤလၢ ပဲတြီအနီၣ်ဘိလီၤ.
၆ ယအိးထီၣ်န့ၢ် ယပှၤသးဘိ အပဲတြီ
ဘၣ်ဆၣ် ယပှၤသးဘိန့ၣ် ဃၣ်အသး ဒီးက့ၤဝဲလံ.
ဖဲအက့ၤဝဲအခါ ယသးအုးဒိၣ်မး.
ယဃုအီၤဘၣ်ဆၣ် ယတထံၣ် အီၤလၢၤဘၣ်.+
ယကိးအီၤဘၣ်ဆၣ် အဝဲ တစံးဆၢယၤ လၢၤဘၣ်.
၇ ဖဲပှၤခိးတၢ်ဖိတဖၣ် ဟးကွၢ်တရံးဝ့ၢ်အခါ အဝဲသ့ၣ်ထံၣ်ယၤ
ဒီးတီၢ်ယၤ ဒီးမၤဘၣ်ဒိယၤလီၤ.
ပှၤခိးတၢ်ဖိလၢ အခိးတၢ်လၢ ဝ့ၢ်ခိၣ်ဒူန့ၣ် ထုးကွံာ် ယခိၣ်ဖၢၣ်လၢ ယလိၤလီၤ.
၈ ပှၤယရူၤၡလ့ၣ်မုၣ်သ့ၣ်ဧၢ, ယကမၢသုအၢၣ်လီၤလၢ
သုမ့ၢ်ထံၣ် ယပှၤသးဘိန့ၣ်
တဲဘၣ်အီၤလၢ ယဘၣ်ဒိလၢ တၢ်အဲၣ်အဃိလံ.”
၉ ပှၤယရူၤၡလ့ၣ်မုၣ်တဖၣ် တဲဝဲလၢ “နပှၤသးဘိန့ၣ် ဂ့ၤဒိၣ်န့ၢ်ဒံး ပှၤဂၤအသးဘိ ဒ်လဲၣ်.
မုၣ်ဃံလၤဖိလၢ အလီၤအဲၣ် ဒိၣ်ကတၢၢ်ဧၢ,
တုၤလၢ နမၢပအၢၣ်လီၤတၢ် ဒ်န့ၣ်န့ၣ်
နပှၤသးဘိန့ၣ် ဂ့ၤဒိၣ်န့ၢ်ဒံး ပှၤဂၤအသးဘိ ဒ်လဲၣ်.”
၁၀ ပှၤၡူလမးမုၣ်ဖိ တဲဝဲလၢ “ယပှၤသးဘိန့ၣ် အဒိၣ်တၢ်ဂ့ၤ ဒီးအဂံၢ်ဆူၣ်မး.
ဒီးလၢပှၤအဂၤတကလး အကျါန့ၣ် အဝဲဖျါလီၤဆီလီၤ.
၁၁ အခိၣ်န့ၣ် အလုၢ်ဒိၣ်ပှ့ၤဒိၣ်ဒ် ထူစီအသိး
ဒီးအခိၣ်ဆူၣ်န့ၣ် လီၤဂာ်ဒ် သ့ၣ်စူၣ်ပလိၣ် အလၣ်လၢအဟူးဝးတဖၣ်
ဒီးအသူဝဲ ဒ်စိးဝၣ်ဃး အသိးလီၤ.
၁၂ အမဲာ်ချံန့ၣ် လီၤဂာ်ဒ်သိးဒီး ထိၣ်လွံၢ်ဖိတဖၣ် အိၣ်လၢထံဖိကျိအဃၢၤ
လၢအလုၢ်ထံလၢ တၢ်နုၢ်ထံအကျါ
ဒီးအိၣ်ဝဲလၢ ထံကမါလၢ အထံအိၣ်ပှဲၤပှဲၤ အကပၤလီၤ.
၁၃ အဘိးပၤန့ၣ် လီၤဂာ်ဒ်သိးဒီး ကရၢၢ်လၢဖီနၢမူတဖၣ် မဲထီၣ်ဝဲ လၢအပူၤ+
ဒီးတၢ်လူၢ်ဖိလၢ သ့ၣ်ဂံၢ်ဝၣ်စဲတဖၣ် မဲထီၣ်လၢအလိၤလီၤ.
အထးခိၣ်န့ၣ် လီၤဂာ်ဒီး ဖီဒ့ၣ်ညါ လၢမူရၣ်အထံ လီၤစီၤဝဲလၢ အလိၤလီၤ.+
၁၄ အစုမုၢ်စုနၢတဖၣ် လီၤဂာ်ဒီး ထူဖျၢၣ်ပီၤတဖၣ် ဒီးအစုမ့ၣ်တဖၣ် လီၤဂာ်ဒီး တၢ်မျၢ်ဘီလါ,
ဒီးအဟၢဖၢန့ၣ် လီၤဂာ်ဒီး ကဆီမဲလၢ ပှၤထူးဘျ့ကတြ့ၣ်ထီၣ်အီၤ ဒီးမၤဃံမၤလၤထီၣ်အီၤလၢ တၢ်မျၢ်နံၤလါအဲးလီၤ.
၁၅ အခီၣ်န့ၣ် လီၤဂာ်ဒီး လၢၢ်ဝါကံၣ်ဃ့အထူၣ်လၢ ဘၣ်တၢ်ဆီလီၤအီၤလၢ ထူစီဘ့ၣ်ဘၣ် အလိၤလီၤ.
ဒီးအဝဲဒိၣ်တၢ်ဂ့ၤ ဒ်သိးဒီး လဘၤနိၣ် ဒီးအနီၢ်ထီဒ်သိး သ့ၣ်ဆှိအ့ရ့းလီၤ.+
၁၆ အထးခိၣ်န့ၣ် ဆၢဝဲ
ဒီးအလီၤထုးန့ၢ်သူၣ်ထုးန့ၢ်သး လၢတၢ်ခဲလၢာ်အပူၤလီၤ.+
အိ ပှၤယရူၤၡလ့ၣ်မုၣ်သ့ၣ်ဧၢ, အဝဲမ့ၢ် ယပှၤသးဘိ ဒီးယ သးခိၣ်မ့လီၤ.”
၆ ပှၤယရူၤၡလ့ၣ်မုၣ်တဖၣ် တဲဝဲလၢ “အိ မုၣ်ဃံလၤဖိလၢ အလီၤအဲၣ်ဒိၣ်ကတၢၢ်ဧၢ,
နပှၤသးဘိ လဲၤဖဲလဲၣ်.
အလဲၤဖဲလဲၣ် တတီၤလဲၣ်.
ပကလဲၤဃုစၢၤနၤမီၤ.”
၂ ပှၤၡူလမးမုၣ်ဖိ တဲဝဲလၢ “ယပှၤသးဘိန့ၣ် လဲၤလီၤလၢ အတၤသၣ်လီၢ်ပူၤလံ.
အလဲၤဝဲဆူ ကရၢၢ်လၢ ဖီနၢမူတဖၣ် မဲထီၣ်ဝဲ
ဒ်သိး ကကွၢ်အသိတဖၣ်လၢ တၤသၣ်လီၢ်တဖၣ်အကျါ
ဒီးကဒဲးဝဲ ဖီဒ့ၣ်ညါတဖၣ် အဂီၢ်လီၤ.+
၃ ယမ့ၢ် ယပှၤသးဘိအတၢ်
ဒီးယပှၤသးဘိန့ၣ် မ့ၢ်ယတၢ်လီၤ.+
ဒီးအဝဲကွၢ်သိလၢ ဖီဒ့ၣ်ညါတဖၣ် အကျါလီၤ.”+
၄ စီၤပၤတဲဝဲလၢ “ပှၤလၢယအဲၣ်ဘၣ်အီၤတဂၤဧၢ,+ နဃံလၤ ဒ်သိးဒီး ဝ့ၢ်တံးရစၣ်*+
ဒီးနလီၤအဲၣ်လီၤကွံဒ် ဝ့ၢ်ယရူၤၡလ့ၣ် အသိးလီၤ.+
ဒီးနဒုးလီၤကတုၤယသး ဒ်သုးမုၢ်တဖၣ်လၢ အပာ်ဖှိၣ်ထီၣ်အသးလၢ ကဒုးတၢ် အဂီၢ်လီၤ.+
၅ ဖဲနကွၢ်ယၤအခါ ယသးတအိၣ်လၢ ယလိၤလၢၤဘၣ်,
အဃိ ဃၣ်ကွံာ်နမဲာ် လၢယအိၣ်သၢၤ.+
နခိၣ်ဆူၣ်န့ၣ် လီၤဂာ်ဒ်သိးဒီး မဲာ်တဲးလဲးတဖုလၢ
အဟဲလီၤလၢ ကံးလဧး အ တၢ်လီၤဘံလီၤ.+
၆ နမဲဝါဝါဖိတဖၣ် လီၤဂာ်ဒ် သိတဖုလၢ
ပှၤဒုးလုၢ်အီၤထံဝံၤ အသိးလီၤ.
နမဲတဖၣ်န့ၣ် လီၤဂာ်ဒ်သိဖိသဃံာ်
လၢအတလီၤမၢ် နီတဒုဘၣ် အသိးလီၤ.
၇ နဘိးပၤဖိခံခီလၢ အအိၣ်လၢ တၢ်ကျၢၢ်ဘၢမဲာ် အဖီလာ်န့ၣ်
ဂီၤဒ်သိးဒီး သလဲသၣ် သ့ၣ်ဖး တခီလီၤ.
၉ ဘၣ်ဆၣ် ထဲဒၣ်အီၤန့ၣ် အမ့ၢ်ဝဲ ယထိၣ်လွံၢ်ဖိ+ ဒီးပိာ်မုၣ်လၢပှဲၤလီၤ.
အဝဲမ့ၢ် ဖိမုၣ်လီၤဆီကတၢၢ်တဂၤ လၢအမိၢ်အဂီၢ်လီၤ.
ဒီးမ့ၢ်ဖိမုၣ်လၢ အမိၢ်အဲၣ်အီၤ ဒိၣ်ကတၢၢ်လီၤ.
ဖဲပိာ်မုၣ်သးစၢ်တဖၣ် ထံၣ်အီၤအခါ ပတြၢၤအီၤလီၤ.
နီၢ်ပၤမုၣ်တဖၣ် ဒီးသံၣ်မါတဖၣ်စ့ၢ်ကီး ပတြၢၤအီၤလီၤ.
၁၀ ပှၤပိာ်မုၣ်တဖၣ် တဲဝဲလၢ ‘အဝဲ ကပီၤဝဲဒ် မုၢ်ဝါထီၣ် အတၢ်ကပီၤ
ဒီးဃံလၤဝဲ ဒ်လါဖိကပီၤအသိး
ဒီးအစီဆှံဝဲဒ် မုၢ်အတၢ်ကပီၤအသိး
ဒီးအဒုးလီၤကတုၤယသး ဒ်သုးမုၢ်တဖၣ်လၢ အပာ်ဖှိၣ်ထီၣ်အသးလၢ ကဒုးတၢ် အဂီၢ်လီၤ.’”+
၁၁ ပှၤၡူလမးမုၣ်ဖိ တဲဝဲလၢ “ယလဲၤလီၤလၢ တၤသၣ်လီၢ်လၢ အအိၣ်ဒီး သ့ၣ်သူဝၣ်သၣ် အထူၣ်တဖၣ်+
ဒ်သိးယကလဲၤကွၢ် တၢ်လၢအဟဲဘိၣ်ထီၣ်ဖးထီၣ်တဖၣ် လၢတၢ်တြီၤပူၤ
ဒီးဒ်သိး ယကလဲၤကွၢ် စပံးမုၢ်တဖၣ် ဟဲဒိးထီၣ်လံဧါ,
ဒီးသလဲထူၣ်တဖၣ် ဟဲဖီထီၣ် ဖးထီၣ်လံဧါ.
၁၂ ခီဖျိလၢ ယအဲၣ်ဒိးလဲၤကွၢ် တၢ်သ့ၣ်တဖၣ်န့ၣ်အဃိ
ယလဲၤဘၣ်အတီၤလၢ
ယပှၤကလုာ် အပှၤဒိၣ်ပှၤပှၢ် အလ့ၣ်ကဟၣ်တဖၣ် အိၣ်ဝဲအလီၢ်လီၤ.”
၁၃ စီၤပၤဒီးပှၤဂၤတဲဝဲလၢ “အိ, ပှၤၡူလမးမုၣ်ဖိဧၢ, ဟဲက့ၤနီၤ. ဟဲက့ၤနီၤ.
ပအဲၣ်ဒိးကွၢ်နၤအဃိ
ဟဲက့ၤနီၤ, ဟဲက့ၤနီၤ.”
ပှၤၡူလမးမုၣ်ဖိ တဲဝဲလၢ “ဘၣ်မနုၤအဃိ သုအဲၣ်ဒိးကွၢ်ယၤ, ပှၤၡူလမးမုၣ်ဖိလဲၣ်.”+
စီၤပၤဒီးပှၤဂၤ တဲဝဲလၢ “အဝဲလီၤဂာ်ဒ် ပှၤဂဲၤကလံၣ် ခံဖုအသိးလီၤ.”*
၇ စီၤပၤတဲဝဲလၢ “ပိာ်မုၣ်လၢ အလီၤပာ်ကဲဧၢ,
နခီၣ်ဖိလၢ အဒိးဃာ်ခီၣ်ဖံးန့ၣ် ဃံလၤဒိၣ်မး
ဒီးနခီၣ်ကံၣ်ဒုၣ် အက့ၢ်အဂီၤန့ၣ် လီၤဂာ်ဒ်
တၢ်ကယၢကယဲလၢ ပှၤလၢအတ့တၢ်ဖၠဲး တ့ဝဲအသိးလီၤ.
၂ နဒ့လီၤဂာ်ဒ် လီခီဖျၢၣ်အသိးလီၤ.
မ်လီခီဖျၢၣ်အံၤ အိၣ်ဒီးစပံးထံ ဃါဃုာ်အသး ထီဘိတက့ၢ်.
နဟၢဖၢန့ၣ် လီၤဂာ်ဒ် ဘုကၠူၣ် တပူၣ်လၢ
ဖီဒ့ၣ်ညါတဖၣ် အိၣ်ဝးတရံးအီၤ အသိးလီၤ.
၃ နနုၢ်ခံတိၣ်န့ၣ် လီၤဂာ်ဒ်သိးဒီး
တၤဟိဖိသဃံာ်ခံဒုလီၤ.+
၄ နကိာ်ဘိန့ၣ်+ လီၤဂာ်ဒ်သိးဒီး တၢးထီကဆီမဲ+
ဒီးနမဲာ်ချံဖိတဖၣ်+ လီၤဂာ်ဒ် ဝ့ၢ်ဃ့ၡဘိၣ်အထံကမါ*+
လၢအအိၣ်လၢ ဘ့ၤသရးဘံၣ် အတြဲၤကပၤလီၤ.
ဒီးနနါဒ့န့ၣ် လီၤဂာ်ဒ်သိးဒီး လဘၤနိၣ် အတၢးထီ
လၢအမဲာ်ဃၣ်အသးလၢ ဝ့ၢ်ဒၤမ့ၤစ့းအအိၣ်လီၤ.
နခိၣ်ဆူၣ်ဖးထီ လၢအဃံအလၤန့ၣ် ထုးန့ၢ်စီၤပၤအသးလီၤ.
၆ အိ ပှၤလၢယအဲၣ်ဘၣ်အီၤဧၢ, န ဃံလၤလီၤအဲၣ်ဒိၣ်မး,
ဒီးနဂ့ၤလၢာ်ကတၢၢ်လီၤ.
၇ နက့ၢ်နဂီၤ လီၤဂာ်ဒ်သိးဒီး သ့ၣ်စူၣ်ပလိၣ်တထူၣ်
ဒီးနနုၢ်န့ၣ် လီၤဂာ်ဒ် စူၣ်ပလိၣ်သၣ် အချုၣ်အသိးလီၤ.+
၈ ယတဲလၢ ‘ယကလဲၤထီၣ် ဒဲးသ့ၣ်စူၣ်ပလိၣ်အသၣ်
လၢအထူၣ်ခံလီၤ.’
မ်နနုၢ်န့ၣ် လီၤဂာ်ဒ်သိးဒီး စပံးသၣ် အချုၣ်တဖၣ်
ဒီးမ်နတၢ်ကသါထီၣ်ကသါလီၤန့ၣ် နၢမူဒ် ဖီသၣ်အသိးတက့ၢ်.
၉ ဒီးနထးခိၣ်န့ၣ် လီၤဂာ်ဒ်သိးဒီး စပံးထံလၢ အဂ့ၤကတၢၢ်လီၤ.”
ပှၤၡူလမးမုၣ်ဖိ တဲဝဲလၢ “မ်စပံးထံလၢ အဂ့ၤကတၢၢ်အံၤ ကလဲၤလီၤဘျ့ဘျ့ဆှီဆှီလၢ ယပှၤသးဘိ တဂၤအဂီၢ်
ဒ်စပံးထံယွၤလီၤဝဲ ကယီကယီလၢ ပှၤလၢအမံတဖၣ် အထးခိၣ်အလိၤ အသိးန့ၣ်တက့ၢ်.
၁၀ ယမ့ၢ် ယပှၤသးဘိအတၢ်+
ဒီးအဝဲ လီကီထဲ ယၤတဂၤလီၤ.
၁၁ အိ ယပှၤသးဘိဧၢ, ခါထီၣ်နခီၣ်ခါ ဆူယအိၣ်
ဒီးပကလဲၤသကိးလၢ တၢ်ပျီပူၤ
ဒီးလဲၤအိၣ်ဘှံးအိၣ်သါလၢ ဖီသ့ၣ်ဂီၤမုၢ်အကျါမီၤ.+
၁၂ မ်ပကပၢၢ်ထီၣ်ဂီၤဂီၤ ဒီးလဲၤလၢ စပံးကျီးတဖၣ်
ဒ်သိးပကလဲၤကွၢ် မ့ၢ်စပံးမုၢ် ဒိးထီၣ်လံဧါ,
မ့ၢ်အဖီဖိတဖၣ် ဖးထီၣ်လံဧါ,+
မ့ၢ်သလဲထူၣ်တဖၣ် ဘိၣ်ထီၣ်ဖးထီၣ်လံဧါ.+
ဖဲန့ၣ်န့ၣ် ယကပာ်ဖျါထီၣ်န့ၢ်နၤ ယတၢ်အဲၣ်လီၤ.+
၁၃ တၤသၣ်လၢအဝံၣ် အကလုာ်ကလုာ်န့ၣ် အိၣ်ဝဲလၢ ပတြဲၤအခီၣ်ထံးလီၤ.+
ဒီးဒူးဒးသၣ်+ ဟ့ၣ်ထီၣ်အတၢ်နၢမူလံ.
ယပှၤသးဘိဧၢ, တၤသၣ်အသီမ့ၢ်ဂ့ၤ တၤသၣ်အလီၢ်လံၤမ့ၢ်ဂ့ၤ
ယပာ်ဃာ်န့ၢ်နၤလီၤ.
၈ ပှၤၡူလမးမုၣ်ဖိ တဲဝဲလၢ “နမ့မ့ၢ်ဘၣ်ဖုး ယဒီပုၢ်ဝဲၢ်ခွါလၢ
ယမိဒုးအီအီၤနုၢ်န့ၣ်
ဖဲယထံၣ်နၤလၢ တၢ်ချၢအခါ ယမ့ၢ် နၢမူနၤန့ၣ်+
ပှၤဒုၣ်ဒွဲၣ်စံးအၢယၤ တသ့ နီတဂၤဘၣ်.
ဒီးယကဟ့ၣ်ဒုးအီနၤ စပံးထံလၢ အနၢမူ
ဒီးသလဲသၣ်အထံ လၢအဝံၣ်အဆၢလီၤ.
၃ ယကတခၢၣ်ဃာ် နစုလၢအစ့ၣ်တခီ
ဒီးနစုထွဲ ကဖိးဟုယၤလီၤ.+
၄ ပှၤယရူၤၡလ့ၣ်မုၣ်သ့ၣ်ဧၢ, ယကမၢသုအၢၣ်လီၤတၢ်လၢ
ယတၢ်အဲၣ် မ့ၢ်တဟဲအိၣ်ထီၣ် အနီၢ်ကစၢ်ဒံးဘၣ်န့ၣ် တဘၣ် ဂုာ်ကျဲးစၢး ထိၣ်ဟူးထိၣ်ဂဲၤထီၣ် ယ တၢ်အဲၣ်တဂ့ၤ.”+
၅ ပှၤၡူလမးမုၣ်ဖိ အကၠီတဖၣ် တဲဝဲလၢ “ပှၤလၢ အဟးသန့ၤအသးလၢ အပှၤသးဘိအလိၤ
လၢအဟဲထီၣ်လၢ ပှၢ်မုၢ်ကနၢန့ၣ် မ့ၢ်မတဂၤလဲၣ်.”
ပှၤၡူလမးမုၣ်ဖိ တဲဝဲလၢ “ယကိးပၢၢ်ထီၣ်နၤလၢ ဖီသၣ်အထူၣ် ဖီလာ်လီၤ.
ဖဲန့ၣ်န့ၣ် နမိအဟုးဆါလၢနဃိ,
အဟုးဆါ ဒီးအိၣ်ဖျဲၣ်ထီၣ်နၤဖဲန့ၣ်လီၤ.
၆ စဲပနီၣ်ယၤလၢ နသးလိၤ
ဒ်တၢ်စဲပနီၣ်ဃာ်တခါလၢ နစုဒုၣ်အလိၤ အသိးန့ၣ်တက့ၢ်.
တၢ်အဲၣ်န့ၣ် အသဟီၣ်ဆူၣ် ထဲသိးဒီး တၢ်သံ+
ဒီးတၢ်အဲၣ်လၢ အသဟီၣ်ဆူၣ်န့ၣ် လီၤဂာ်ဒ်သိးဒီး တၢ်သွၣ်ခိၣ်* လၢအတဟ့ၣ်အၡူညီညီဘၣ်.
တၢ်အဲၣ်အံၤ လီၤဂာ်ဒ် မ့ၣ်အူလၣ်လၢ အကဲၤကပျီၤထီၣ်အသိး ဒီးမ့ၢ်ဝဲ ယဟိဝၤယွၤ အမ့ၣ်အူလၣ်လီၤ.+
၇ ထံလၢ အယွၤလီၤဆူၣ်ဆူၣ် ဒၣ်လဲာ် မၤလီၤပံာ်ကွံာ် တၢ်အဲၣ် တန့ၢ်ဘၣ်,+
ဒီးထံကျိတဖၣ် မၤလီၤထွံအီၤ တန့ၢ်ဘၣ်.+
ပှၤတဂၤ မ့ၢ်ဟ့ၣ်လီၤ အတၢ်ထူးတၢ်တီၤ လၢအအိၣ်လၢ အဟံၣ်ပူၤ ခဲလၢာ် ဒ်သိး အကန့ၢ်ဘၣ် တၢ်အဲၣ်အဂီၢ် ဘၣ်ဆၣ်
တၢ်တတူၢ်လိာ်အီၤဘၣ်.”
၈ ပှၤၡူလမးမုၣ်ဖိ အကၠီတဖၣ်တဲဝဲလၢ “ပဒ့မုၣ်ဖိအိၣ်တဂၤ+
ဒီးအနုၢ်တထီၣ်ဒံးဘၣ်.
ဖဲမုၢ်နံၤလၢ ပှၤဟဲဃ့ဖျီသး ဒီးအီၤန့ၣ်
ပကဘၣ်မၤန့ၢ်အီၤ တၢ်မနုၤလဲၣ်.”
၉ “အဝဲမ့မ့ၢ် တၢ်ဒူၣ်န့ၣ်
ပကတ့ထီၣ်န့ၢ်အီၤ တၢ်အခိၣ် လၢစ့ညၣ်လီၤ.
ဒီးအဝဲမ့မ့ၢ် ပဲတြီန့ၣ်
ပကတြီတံာ်ဃာ်န့ၢ်အီၤလၢ သ့ၣ်ဆှိအ့ရ့း အသ့ၣ်ဘ့ၣ်ဘၣ်လီၤ.”
၁၀ ပှၤၡူလမးမုၣ်ဖိ တဲဝဲလၢ “ယမ့ၢ်တၢ်ဒူၣ်
ဒီးယနုၢ်လီၤဂာ် တၢးထီတဖၣ်လီၤ.
လၢအတၢ်ထံၣ်န့ၣ်
ယမ့ၢ် ပှၤခုၣ်ခုၣ်ဖိတဂၤလီၤ.
၁၁ စီၤၡလိၤမိၤ အိၣ်ဒီးအစပံးတကျီးလၢ+ ဘဧၤလဟမိၣ်လီၤ.
ဒီးအဝဲ အးလီၤဝဲ အစပံးကျီး လၢပှၤကွၢ်ထွဲတၢ်ဖိတဖၣ် အစုပူၤလီၤ.
အဝဲသ့ၣ် ဟဲစိာ်န့ၢ်အီၤ စ့ညၣ်အဘ့ၣ် တဂၤတကထိ လၢစပံးသၣ်အပှ့ၤ အဂီၢ်လီၤ.
၁၂ ယနီၢ်ကစၢ် စပံးကျီးအိၣ်ဝဲ ဒီးအမ့ၢ်ယတၢ်လီၤ.
စီၤၡလိၤမိၤဧၢ, စ့ညၣ်အဘ့ၣ် တကထိန့ၣ် မ်အမ့ၢ်နတၢ်ဒၣ်ဝဲ.
ဒီးစ့ညၣ်အဘ့ၣ်ခံကယၤန့ၣ် မ်အမ့ၢ်ပှၤလၢ အကွၢ်ထွဲ တၤသူတၤသၣ်တဖၣ် အတၢ်ဒၣ်ဝဲတက့ၢ်.”
၁၃ ပှၤကွၢ်သိဖိ တဲဝဲလၢ “အိ ပှၤလၢအအိၣ်ညီနုၢ်လၢ တၤသၣ်လီၢ်ပူၤတဂၤဧၢ,+
ယသကိးတဖၣ် ဆၢနၢ်ဟူဘၣ် နကလုၢ်
ဒီးယအဲၣ်ဒိးနၢ်ဟူစ့ၢ်ကီးလီၤ.”+
၁၄ ပှၤၡူလမးမုၣ်ဖိ တဲဝဲလၢ “ယပှၤသးဘိဧၢ, ဟဲဃ့ၢ်လီၤချ့ချ့
လၢကစၢၢ်လၢ ဖီနၢမူတဖၣ် မဲထီၣ်ဝဲအလိၤ
ဒ်သိးဒီး တၤဟိ+
မ့တမ့ၢ် တၤဃီၤဖါဖိ လၢအဃ့ၢ်ဝဲ ချ့ချ့မီၤ.”
ဘၣ်သ့ၣ်သ့ၣ် ကမ့ၢ် “နခိၣ်ဆူၣ်လၢ နသံၣ်အီၤဒီး လီၤစဲၤဝဲလၢ နဘိးပၤဖိတဖၣ်အလိၤ.”
မ့ၢ်ဝဲ တၢ်နၢမူ တကလုာ်.
မ့ၢ်ဝဲ လီၢ်ဆ့ၣ်နီၤလၢ အအိၣ်ဒီး အခိၣ်ဒုး လၢညီနုၢ်ပှၤသူဝဲလၢ ပှၤကစိာ်ဝဲ ပှၤလၢအအိၣ်ဒီး အလီၢ်အလၤ.
ဖျါလၢအဲၣ်ဒိးတဲဝဲ တၢ်အထူၣ်လၢ အတီဃာ် လီၢ်ဆ့ၣ်နီၤ အခိၣ်ဒုး လၢစီၤပၤကန့ၢ်ဘၣ် တၢ်ကဒုအဂီၢ်.
မ့ၢ်စ့ၢ်ကီး “ဖီကွီၤ မ့တမ့ၢ် ဖီကျီၤ.”
မ့ၢ်ဝဲ တၢ်နၢမူ တကလုာ်.
မ့ၢ်စ့ၢ်ကီး “ထံပူၤ.”
မ့ၢ်စ့ၢ်ကီး “ဝ့ၢ်လၢအမုာ်.”
ကွၢ် တၢ်ကတိၤအခီပညီ.
မ့ၢ်စ့ၢ်ကီး “မၤဃန့ၤ အတၢ်ဂဲၤကလံၣ်.”
မ့ၢ်စ့ၢ်ကီး “ရ့ၣ်ကီၣ်.”
လၢဧ့ၤဘြံၤကျိာ် မ့ၢ်ဝဲ “ၡံအိ(လ်).” ကွၢ် တၢ်ကတိၤအခီပညီ.