အဝဲသ့ၣ်လဲၤခီဖျိ တၢ်ဂ့ၢ်ကီန့ၢ်ဝဲ
ရံခါဒိၤ ဒီးအီဒြ့း အတၢ်လဲၤခီဖျိ
တၢ်ကူၣ်ဘၣ်ကူၣ်သ့ လၢအဒိးသန့ၤထီၣ်သးလၢ လံာ်စီဆှံန့ၣ် အအိၣ်ဒီး တၢ်စိတၢ်ကမီၤလၢ အမၤဂ့ၤထီၣ် ပှၤတဂၤအတၢ်အိၣ်မူသ့. ပကကွၢ်သကိး ရံခါဒိၤ ဒီးအီဒြ့း အတၢ်လဲၤခီဖျိ.
ရံခါဒိၤ– ဖဲယအိၣ် ၁၅ နံၣ် ဒီးယကဲဒံးပှၤသးစၢ်လၢ အသးဒံဝ့ၤဒံဝီၤညီအခါ ယနုာ်လီၤလၢ ပှၤမၢးဖိတဖုအကျါ. ယသကိးတဖၣ်အံၤ အသကဲာ်ပဝး ဒိၣ်စိလၢယဖီခိၣ်ဒိၣ်မး. အဃိ ယပာ်လီၤသးလၢ ယကလဲၤအိၣ်လၢ ဃိာ်ပူၤအနံၣ်တဆံ. ဘၣ်သ့ၣ်သ့ၣ် ဖျါလီၤဂာ်လၢ ယပာ်လီၤနါစိၤ ဖီတၢၣ်. သနာ်က့ ခီဖျိလၢ ပှၤလၢယဟံၣ်ခိၣ်ဟံၣ်ဃၢၤန့ၣ် အဝဲသ့ၣ်ပာ်ဒိၣ်ပာ်ကဲဝဲ ပှၤလၢအအိၣ်ဘၣ်လၢ ဃိာ်ပူၤဒိၣ်မး အဃိ ယအဲၣ်ဒိးကဲထီၣ် ဒ်သိးဒီးပှၤတဖၣ်န့ၣ်.
ပှၤမၢးဖိအတၢ်အိၣ်မူန့ၣ် ယမၤဘၣ်ခဲလၢာ်. ယသူကသံၣ်မူၤဘှီး, မံဃုာ်အိၣ်ဃုာ် ဒီးမၤဆူၣ်မၤစိးတၢ်. ဘၣ်တနၤ ယပၣ်ဃုာ်လၢ ပှၤခးလိာ်သးအကျါ. ဒီးယဆိကမိၣ်လၢ ပှၤကခးသံဘၣ်ယၤ သနာ်က့ ယပူၤဖျဲးထီၣ် ဒီးယတဘၣ်ဒိဘၣ်. ဖဲန့ၣ်ဝံၤအလီၢ်ခံ ယဆိကမိၣ်ထံက့ၤ ယတၢ်အိၣ်မူ ဒီးယဖီတၢၣ်တဖၣ် ဒီးယပာ်လီၤသးလၢ ယကဆီတလဲက့ၤ ယတၢ်အိၣ်မူ. ဘၣ်ဆၣ် ယကဘၣ်မၤဒ်လဲၣ်. ယကဘၣ်လဲၤဃု တၢ်မၤစၢၤဖဲလဲၣ်.
ယဘူးယတံၢ် အါတက့ၢ်န့ၣ် အဝဲသ့ၣ် တအိၣ်ဒီး တၢ်သးခုဘၣ်. အဝဲသ့ၣ်အိၣ်ထဲ တၢ်ကီတၢ်ခဲ. သနာ်က့ ယတံတဂၤ အဟံၣ်ဖိဃီဖိန့ၣ် တမ့ၢ်ဒ်န့ၣ်ဘၣ်. ယသ့ၣ်ညါလၢ အဝဲသ့ၣ်ကဲပှၤဂ့ၤ ဒီးအဝဲသ့ၣ် အိၣ်မူမၤထွဲ လံာ်စီဆှံ အတၢ်ဟံးစုနဲၣ်ကျဲ. အဃိ အဝဲသ့ၣ်တဲပၠးယၤလၢ ကစၢ်ယွၤန့ၣ် အမံၤမ့ၢ်ယဟိဝၤ. ဖဲတၢ်ခးလိာ်သး ကဲထီၣ်ဝံၤ တယံာ်ဘၣ်န့ၣ် ယဃ့ထုကဖၣ်လၢ ယဟိဝၤယွၤအအိၣ်, ယကိးထီၣ်အမံၤ ဒီးဃ့အတၢ်မၤစၢၤ. လၢခံတနံၤန့ၣ် ယဟိဝၤပှၤအုၣ်အသးတဂၤ ဟဲဒိတကျိာ် ယတြဲၤအဃိ ယဖုးဘၣ်ယသးညါ. ဒီးလၢခံ ယဟိဝၤပှၤအုၣ်အသးတဂၤန့ၣ် အသိၣ်လိယၤ လံာ်စီဆှံ.
လၢခံတယံာ်ဘၣ်န့ၣ် ယထံၣ်ဘၣ် တၢ်ကီတၢ်ခဲဖးဒိၣ်တခါ. ယသကိးလီၢ်လံၤတဖၣ် ဘၣ်သးရ့ဒီးယၤအဃိ အဝဲသ့ၣ်ကိးယၤလၢ လီတဲစိခဲအံၤခဲအံၤ. ယဘၣ်ဟးဆှဲး အဝဲသ့ၣ်န့ၣ် တညီဘၣ် သနာ်က့ ယဟးဆှဲးအဝဲသ့ၣ်. ယပာ်လီၤသးလၢ ယကဆဲးမၤလိ လံာ်စီဆှံ ဒီးယဆဲးမၤဒ်န့ၣ်အဃိ ယသးခုဒိၣ်မး. ယတၢ်အိၣ်မူ ဟဲဂ့ၤထီၣ်ဒိၣ်မး ဒီးယအိၣ်ဒီး တၢ်သးခုနီၢ်ကီၢ်.
ယနီၣ်ဘၣ်ဒံး, လၢညါ ဖဲယဃ့ထုကဖၣ်အခါ ယတဲပၠးကစၢ်ယွၤလၢ ယဘၣ်သးလၢ ပှၤပာ်ဒိၣ်ပာ်ကဲယၤ ဒ်ပှၤမၢးဖိတဂၤအသိး အဃိ ယပာ်လီၤသးလၢ ယကလဲၤအိၣ်လၢဃိာ်ပူၤ အနံၣ်တဆံ. မ့မ့ၢ်ခဲအံၤန့ၣ် ယဃ့ကစၢ်ယွၤလၢ အကပျဲယၤလၢ ယကမၤအတၢ်မၤ လၢဆၢကတီၢ်လၢပှဲၤ အနံၣ်တဆံ ဒီးမၤစၢၤက့ၤပှၤဂၤ ဒ်ပှၤမၤစၢၤတ့ၢ်ယၤအသိး. ကစၢ်ယွၤစံးဆၢ ယတၢ်ထုကဖၣ် ဒီးယမၤအတၢ်မၤ လၢဆၢကတီၢ်လၢပှဲၤန့ၢ် ၁၇ နံၣ်လံ. ဘၣ်ဆၣ် ယတလဲၤအိၣ်ဘၣ်လၢဃိာ်ပူၤ နီတဘျီဘၣ်.
မ့မ့ၢ်ယသကိးလၢညါတဖၣ်န့ၣ် လီၤဘၣ်လၢဃိာ်ပူၤ တဘျုးနံၣ်ညါ. အဂၤတနီၤန့ၣ် သံကွံာ်လံ. ယမ့ၢ်ဘၣ်ကွၢ်ကဒါက့ၤန့ၣ် ယစံးဘျုးဘၣ် ယဘူးယတံၢ်လၢအကဲ ယဟိဝၤပှၤအုၣ်အသးတဖၣ် ဒိၣ်မး. အဝဲသ့ၣ် လီၤဆီဒီးပှၤဂၤ ဒီးအဝဲသ့ၣ် အိၣ်မူမၤထွဲ ဒ်လံာ်စီဆှံ အတၢ်ဟံးစုနဲၣ်ကျဲအသိး. ယပာ်ကဲအဝဲသ့ၣ် ဒိၣ်န့ၢ်ဒံး ယပာ်ကဲယသကိးလၢညါတဖၣ်ဒံး. တကးဒံးဘၣ် ယစံးဘျုးဘၣ် ကစၢ်ယွၤလၢ အသိၣ်လိယၤ ဒ်သိးယကအိၣ်မူ လၢအဂ့ၤကတၢၢ်.
အီဒြ့း– ယအိၣ်ဖျဲၣ်ထီၣ် ဒီးဒိၣ်ထီၣ်ဘၣ်လၢ တၢ်လီၢ်လၢအဖှီၣ်အယာ် ဒီးတၢ်လီၢ်ဖဲန့ၣ် ပှၤသူကသံၣ်မူၤဘှီး, ပှၤဃ့ဆူၣ်ဃ့စိးတၢ်, ပှၤမၤသံလိာ်သး ဒီးပှၤဆါလီၤအီၣ်သး အိၣ်အါမး. ယပါန့ၣ် အကဲပှၤလၢ အစွဲသံး ဒီးအစွဲပံၤ. ဒီးယမိယပါန့ၣ် အဝဲသ့ၣ်အ့ၣ်လိာ်သး ဒီးမၤဒၢၣ်မၤဆါလိာ်သး ထီဘိ.
ဖဲယသးစၢ်အခါန့ၣ် ယစးထီၣ်အီသံး ဒီးသူကသံၣ်မူၤဘှီး. ညီနုၢ်န့ၣ် ယအိၣ်လၢကျဲပူၤ ဒီးယဟုၣ်တၢ် ဒီးတၢ်လၢယဟုၣ်န့ၢ်တဖၣ်န့ၣ် ယလဲၤဆါက့ၤအီၤ. လၢခံ ဖဲယညါအိၣ်ထီၣ်ဘျီ ယပါရ့အါထီၣ်ဒီးယၤ ဒီးအသိၣ်လိယၤလၢ ယကဆှၢထီၣ်ဆှၢလီၤ ဒီးဆါဟုၣ်ကသံၣ်မူၤဘှီး ဒီးတၢ်ဖိတၢ်လံၤလၢ အတဘၣ်တၢ်သိၣ်တၢ်သီဘၣ်. ယမၤဒ်န့ၣ်အဃိ ယန့ၢ်ဘၣ်စ့ချ့မး ဒီးယန့ၢ်ဘၣ်စ့အါမး. လၢခံဘျီ ပလံး ဟဲလၢယဟံၣ် ဒီးအဝဲသ့ၣ်ဖီၣ်ယၤ. ပှၤစံၣ်ညီၣ်ယၤလၢ ယကဲပှၤမၤသံတၢ်အဃိ ပှၤဖၢနုာ်ယၤလၢ ဃိာ်ပူၤ ၅ နံၣ်.
ဘၣ်တဂီၤ လၢဃိာ်ပူၤန့ၣ် ပှၤဘိးဘၣ်သ့ၣ်ညါလီၤဝဲလၢ ပှၤကွဲမုာ်ပှၤဃိာ်ဖိတဖၣ်လၢ ကဟဲထီၣ်ဝဲ တၢ်တဲသကိးလံာ်စီဆှံ အတၢ်ရဲၣ်တၢ်ကျဲၤ လၢယဟိဝၤပှၤအုၣ်အသးတဖၣ်မၤဝဲ. အဃိ ယလဲၤထီၣ်စ့ၢ်ကီး. တၢ်လၢယနၢ်ဟူဘၣ်န့ၣ် ယဆိကမိၣ်လၢ အဘၣ်နီၢ်ကီၢ် အဃိ ယစးထီၣ် မၤလိလံာ်စီဆှံဒီး ယဟိဝၤပှၤအုၣ်အသး. အဝဲသ့ၣ် တပာ်ခူသူၣ် လံာ်စီဆှံအတၢ်သိၣ်လိ နီတမံၤဘၣ် ဒီးဒုးနဲၣ်ယၤလၢ ကစၢ်ယွၤအတၢ်ဘျၢခဲလၢာ်.
လၢခံ ယသ့ၣ်ညါဘၣ်လၢ ယမၤလိလံာ်စီဆှံန့ၣ် ပှၤဃိာ်ဖိတနီၤ တဘၣ်သးဝဲဘၣ် ဒီးဖဲအဝဲသ့ၣ် တဲပျံၤတဲဖုးယၤအခါ ပှၤမၤစၢၤယၤ မ့ၢ်တအိၣ်ဘၣ်ဒု ယဆီတလဲယသး တန့ၢ်ဘၣ်. အဃိ ယဃ့ထုကဖၣ်လၢ ယဟိဝၤယွၤ ကဟ့ၣ်ယၤတၢ်ဂံၢ်တၢ်ဘါ ဒီးတၢ်ကူၣ်သ့ ဒီးယထံၣ်ဘၣ်လၢ အမၤစၢၤယၤနီၢ်ကီၢ်. တကးဒံးဘၣ် ပှၤဃိာ်ဖိလၢ အတဲပျံၤတဲဖုးယၤတဖၣ်န့ၣ် ယတပျံၤအဝဲသ့ၣ်လၢၤဘၣ် ဒီးယတဲဘၣ်အဝဲသ့ၣ်လၢ လံာ်စီဆှံအဂ့ၢ်ဒူဒူ.
ယကဟးထီၣ်ဘၣ်လၢ ဃိာ်ပူၤ ဘၣ်ဆၣ် ယတဘၣ်သး ဟးထီၣ်ဘၣ်. ဖဲယဟးထီၣ်လၢ ဃိာ်ပူၤအခါ ပှၤဃိာ်ဖိတဖၣ် ဝံၢ်ဝၢ်အစု ဒီးဆၢဂ့ၤဆၢဝါယၤ. အဝဲသ့ၣ်တနီၤ တဲဝဲလၢ “သရၣ်ဖိဧၢ, က့ၤလၢနဟံၣ်ဟီ.”
ယမ့ၢ်တပျဲလၢ ကစၢ်ယွၤ ကသိၣ်လိယၤဘၣ်ဒု ယတၢ်အိၣ်မူ ကမၤအသးဒ်လဲၣ်န့ၣ် ယဆိကမိၣ်မၣ်တဘူၣ်ဘၣ်. ယသ့ၣ်ညါဘၣ်လၢ ကစၢ်ယွၤအဲၣ်ယၤ ဒီးအထံၣ်ယၤဒ် ပှၤတဂၤလၢ အတၢ်မုၢ်လၢ်အိၣ်ဒံး အဃိ ယစံးဘျုးဘၣ်အီၤ နီၢ်ကီၢ်.a
a တၢ်လဲၤခီဖျိအဂၤ လၢအပာ်ဖျါထီၣ်ဝဲလၢ လံာ်စီဆှံအိၣ်ဒီး တၢ်စိတၢ်ကမီၤလၢ အဆီတလဲ ပှၤတၢ်အိၣ်မူသ့န့ၣ် အအိၣ်လၢ jw.org အပူၤ. လၢဝဲးပဆဲး လၢကီၤလၤဝါကျိာ်န့ၣ် ဆီၣ်လီၤ LIBRARY ဝံၤဒီးဆီၣ်လီၤ Article Series ဒီးဆီၣ်လီၤ တၢ်ဂ့ၢ်ခိၣ်တီ လၢအမ့ၢ် “The Bible Changes Lives.”