ယကဘၣ်တဲတၢ်ဒီး ယမိၢ်ယပၢ်ဒ်လဲၣ်

မ့မ့ၢ်နၤန့ၣ် နကမၤဒ်လဲၣ်

ဆိကမိၣ်ကွၢ်တၢ်ဂ့ၢ်အံၤတက့ၢ်– ကၠဲး မ့ၢ်သးစၢ်တဂၤ လၢအသးအိၣ် ၁၇ နံၣ်လီၤ. ဘၣ်ဖဲမုၢ်သၢနံၤမုၢ်နၤခီ, ဖဲအဝဲမၤတၢ်မၤလၢဟံၣ်ပူၤဝံၤအလီၢ်ခံ, ကၠဲး ဆ့ၣ်နီၤအိၣ်ဘှံးဝဲလၢလီၢ်ဆ့ၣ်နီၤအဖီခိၣ် ဒီးအိးထီၣ်ကွၢ် တၢ်ဂီၤမူလီၤ.

ဖဲန့ၣ်အဆၢကတီၢ် ဘၣ်လၢအပၢ်ဟဲက့ၤထံၣ်အီၤလၢ အဝဲဆ့ၣ်နီၤကွၢ် တၢ်ဂီၤမူအဃိ အပၢ်သးဒိၣ်ထီၣ်အီၤလီၤ.

နမ့ၢ်အိၣ်ဘၣ်လၢ ကၠဲး အလီၢ်န့ၣ်ဒ်သိးတၢ်အ့ၣ်လိာ်သုတကဲထီၣ်တဂ့ၤအဂီၢ် နကမၤဒ်လဲၣ်.

ဟံးန့ၢ်တၢ်ဆၢကတီၢ် ဒီးဆိကမိၣ်ထံတၢ် တက့ၢ်

တၢ်တဲသကိးတၢ်ဒီးနမိၢ်နပၢ်န့ၣ် လီၤဂာ်ဒ်နနီကါအသိးလီၤ. ဖဲကါကျဲပံးအခါ နလဲၤက့ၤကျဲလၢအဂၤတဘိသ့ဝဲလီၤ.

တၢ်အဒိ–

ပိာ်မုၣ်သးစၢ်တဂၤလၢ အမံၤမ့ၢ်လံအါန့ၣ်တဲဝဲလၢ “ယကတဲသကိးတၢ်ဒီးယပၢ်န့ၣ် ကီဝဲလၢယဂီၢ်ဒိၣ်မး တဘျီတခီၣ် ဖဲယတဲသကိးတၢ်ဒီးအီၤအခါ ယပၢ်တဲဆၢက့ၤယၤလၢ, ‘ဖဲမကၢာ် နတဲတၢ်မနုၤလဲၣ် ပါတနၢ်ဟူချုးဒၢး.’”

လံအါ အတၢ်ဃုထၢအိၣ်ဝဲသၢမံၤလီၤ.

1. က. ကိးဃါအပၢ်.

   လံအါ ကိးဃါအပၢ်ဒီးတဲဝဲလၢ “ယတဲတၢ်ဒီးနၤန့ၣ် အရ့ဒိၣ်, ကနၣ်မီၤ.”

2. ခ. တတဲတၢ်ဒီးအပၢ်လၢၤဘၣ်.

   လၢခံ လံအါ မ့ၢ်အိၣ်ဒီးတၢ်ကီတၢ်ခဲဘၣ်ဆၣ် အဝဲဆၢတဲာ်လီၤအသးလၢ တတဲသကိးတၢ်ဒီးအပၢ်နီတဘျီလၢၤဘၣ်.

3. ဂ. အိၣ်ခိးတၢ်ဆၢကတီၢ်လၢအကြၢးဝဲဘၣ်ဝဲ ဒီးတဲဖျါထီၣ်ကဒီးတၢ်ကီတၢ်ခဲအဂ့ၢ်.

   ဖဲတၢ်ဆၢကတီၢ်ကြၢးဝဲဘၣ်ဝဲအခါ လံအါ တဲတၢ်ဒီးအပၢ်လၢအသီတဘျီလီၤ. မ့တမ့ၢ် အဝဲကွဲးဖျါထီၣ်အတၢ်ကီတၢ်ခဲလၢ လံာ်ပူၤဒ်သိးအပၢ်ကသ့ၣ်ညါဝဲအဂီၢ်လီၤ.

နကဟ့ၣ်ကူၣ် လံအါ လၢကဃုထၢဝဲကျဲဖဲလဲၣ်တဘိလဲၣ်.

ဆိကမိၣ်ကွၢ်– လံအါ အပၢ်န့ၣ်အိၣ်ဒီးတၢ်သူၣ်ကိၢ်သးဂီၤအဃိ ဖဲအဖိမုၣ်တဲတၢ်ဒီးအီၤအခါ အဝဲတနၢ်ဟူဝဲခဲလၢာ်ဘၣ်. အဃိ လံအါ မ့ၢ်မၤပိာ်ထွဲဝဲ တၢ်ဟ့ၣ်ကူၣ် (က) န့ၣ်, ဖဲအဝဲကိးဃါအပၢ်အခါ တမ့ၢ်လၢအပၢ်ကနၢ်ပၢၢ်အါထီၣ် အတၢ်ဂ့ၢ်ကီဘၣ်. ဒီးအဝဲမ့ၢ်မၤဝဲဒ်အံၤန့ၣ် ဘၣ်သ့ၣ်သ့ၣ် အပၢ်တတူၢ်လိာ်အတၢ်ကတိၤစ့ၢ်ကီးဘၣ်. ဒီး လံအါ အတၢ်ဟူးတၢ်ဂဲၤအံၤကပာ်ဖျါထီၣ်လၢ အဝဲတယူးယီၣ်ပာ်ကဲအပၢ်ဘၣ်. (အ့းဖ့းစူး ၆:၂) အဃိ ကျဲတဘိအံၤန့ၣ် တမ့ၢ်တၢ်ဃုထၢလၢအဂ့ၤဘၣ်.

လံအါ မ့ၢ်မၤပိာ်ထွဲဝဲ တၢ်ဟ့ၣ်ကူၣ် (ခ) န့ၣ်ညီဝဲလီၤ. ဘၣ်ဆၣ် တမ့ၢ်ကျဲလၢအအိၣ်ဒီးတၢ်ကူၣ်သ့ဘၣ်. ဒ်သိး လံအါ လဲၤခီဖျိအတၢ်ကီတၢ်ခဲကန့ၢ်အဂီၢ် အဝဲကဘၣ်တဲသကိးတၢ်ဒီးအပၢ်လီၤ. ဘၣ်မနုၤအဃိလဲၣ်. ဒ်သိးအပၢ်မၤစၢၤအီၤကသ့အဂီၢ် အပၢ်ကဘၣ်သ့ၣ်ညါ အဖိမုၣ်အတၢ်ဂ့ၢ်တၢ်ကျိၤလီၤ. လံအါ မ့ၢ်အိၣ်လၢအကျိာ်အကျာ်န့ၣ် အတၢ်ကီတၢ်ခဲကအိၣ် ဒ်အလီၢ်လီၢ်ဒီး တဒိးန့ၢ်ဘၣ်အပၢ်အတၢ်မၤစၢၤဘၣ်.

လံအါ မ့ၢ်မၤပိာ်ထွဲဝဲ တၢ်ဟ့ၣ်ကူၣ် (ဂ) န့ၣ်ဖျါလၢအဝဲတတူၢ်ၡူအသးဘၣ်, အဝဲဃုကျဲအဂၤတဘိလၢ ကတဲသကိးတၢ်ဒီးအပၢ်လီၤ. ဖဲတၢ်ဆၢကတီၢ်လၢအကြၢးဝဲဘၣ်ဝဲအခါ အဝဲဂုာ်ကျဲးစၢးတဲသကိးတၢ်ဒီးအပၢ် လၢအသီတဘျီန့ၣ်လီၤ. ဒီး လံအါ မ့ၢ်ဃုထၢလၢ ကကွဲးဖျါထီၣ်အတၢ်ကီတၢ်ခဲလၢ လံာ်ပူၤဒ်သိးအပၢ်ကသ့ၣ်ညါဝဲအဂီၢ်န့ၣ် ဘၣ်သ့ၣ်သ့ၣ် လံအါ အတၢ်တူၢ်ဘၣ်ကကိညၢ်လီၤဝဲတဘျီဃီလီၤ.

လံအါ မ့ၢ်ကွဲးဝဲလၢလံာ်ပူၤန့ၣ် အဝဲပာ်ဖျါထီၣ်ဝဲအတၢ်တူၢ်ဘၣ် ခဲလၢာ်ကသ့ဝဲလီၤ. ဒီးဖဲအပၢ်ဖးဝဲလံာ်ပရၢအခါ ကသ့ၣ်ညါဝဲ အဖိမုၣ်အတၢ်တူၢ်ဘၣ်ဒီး ကနၢ်ပၢၢ်ထီၣ်ဝဲအဖိမုၣ် အတၢ်ကီတၢ်ခဲလီၤ. အဃိ တၢ်ဟ့ၣ်ကူၣ် (ဂ) န့ၣ်ကကဲဘျုးလၢ လံအါ ဒီး အပၢ်အဂီၢ်လီၤ. အဝဲတဲသကိးတၢ်ဒီးအပၢ်မ့ၢ်ဂ့ၤ, ကွဲးဝဲလၢလံာ်ပူၤမ့ၢ်ဂ့ၤ မ့ၢ်အဝဲလူၤပိာ်ထွဲဝဲ လံာ်စီဆှံအတၢ်ဟ့ၣ်ကူၣ်လၢအမ့ၢ် “လူၤတၢ်ဘၣ်ဃးဒီးတၢ်ဃူတၢ်ဖိး” န့ၣ်လီၤ.​—ရိမ့ၤ ၁၄:၁၉.

မ့ၢ်နတၢ်ဟ့ၣ်ကူၣ်လၢ လံအါ အဂီၢ်န့ၣ် အိၣ်တမံၤမံၤဒံးဧါ.

နတၢ်ဟ့ၣ်ကူၣ်မ့ၢ်အိၣ်ဒံးတမံၤမံၤန့ၣ် ကွဲးလီၤအီၤလၢလာ်အံၤတက့ၢ်. ဒီးနတၢ်ဟ့ၣ်ကူၣ်အံၤ အဘျုးကအိၣ်ဒ်လဲၣ်န့ၣ် ကွဲးဖျါထီၣ်အီၤတက့ၢ်.

ဟးဆှဲးတၢ်ကတိၤလၢ ကဒုးကဲထီၣ်တၢ်နၢ်ပၢၢ်ကမၣ်လိာ်သး

သ့ၣ်နီၣ်ထီၣ်လၢ ဘၣ်သ့ၣ်သ့ၣ် နအဲၣ်ဒိးတဲတၢ်တမံၤ ဘၣ်ဆၣ်နမိၢ်နပၢ်ကနၢ်ပၢၢ်လၢအဂၤတမံၤသ့ဝဲလီၤ.

တၢ်အဒိ–

နမိၢ်နပၢ်ကသံကွၢ်နၤလၢ ဘၣ်မနုၤအဃိ နမဲာ်သၣ်တမုာ်ဘၣ်လဲၣ်. နတဲဆၢက့ၤအီၤလၢ “တၢ်ဂ့ၢ်တခါအံၤဒု ယတအဲၣ်ဒိးတဲဘၣ်.”

ဘၣ်ဆၣ် နမိၢ်နပၢ်ကဆိကမိၣ်လၢနအဲၣ်ဒိးတဲအီၤလၢ “ယတနာ်န့ၢ်သုဘၣ်ဒီး ယတအဲၣ်ဒိးတဲဘၣ်သုလၢ ယတၢ်ကီတၢ်ခဲဘၣ်. ယကတဲသကိးဒီး ယတံၤသကိးလီၤ.”

ဆိကမိၣ်ကွၢ်, ဖဲနအိၣ်ဒီးတၢ်ကီတၢ်ခဲအခါ နမိၢ်နပၢ်ကသံကွၢ်နၤလၢ ‘ပကဘၣ်မၤစၢၤနၤဒ်လဲၣ်.’ ဘၣ်ဆၣ် နတဲဆၢက့ၤအဝဲသ့ၣ်လၢ– “တဘၣ်ကိၢ်တဂ့ၤ. ယနီၢ်ကစၢ်တၢ်ကီတၢ်ခဲန့ၣ် ယမၤဘၣ်လီၤ.”

• နမိၢ်နပၢ်ကဆိကမိၣ်ဝဲလၢ

• ကျဲလၢအဂ့ၤန့ၣ် နစံးဆၢက့ၤအဝဲသ့ၣ်လၢ