ယဟိဝၤယွၤ အမူခိၣ်ကလူးတဂၤ ဒီသဒၢစီၤဃံးစကံယၤ

အၤၡူၢ်အဘီမုၢ်ဒုးနၢၤဝဲ အံၣ်စရ့လးအဘီမုၢ် အဒူၣ်တဆံလံ. ခဲအံၤ အၤၡူၢ်အစီၤပၤ စၤနဃ့ရံာ် အဲၣ်ဒိးဒုးန့ၢ်ဝဲ ယူဒၤအဘီမုၢ်စ့ၢ်ကီး. စီၤပၤစၤနဃ့ရံာ် ဒုးနၢၤဝဲ ယူဒၤအဝ့ၢ် တဝ့ၢ်ဘၣ်တဝ့ၢ်. ဒီးဝ့ၢ်လၢ စီၤပၤစၤနဃ့ရံာ် အဲၣ်ဒိးဒုးန့ၢ်ဝဲ အဒိၣ်ကတၢၢ်န့ၣ်​ မ့ၢ်ဝ့ၢ်ယရူၤၡလ့ၣ်. ဘၣ်ဆၣ်​ ယဟိဝၤယွၤ ဒီသဒၢဝဲ ဝ့ၢ်ယရူၤၡလ့ၣ်န့ၣ်​ စီၤပၤစၤနဃ့ရံာ် တသ့ၣ်ညါဝဲဘၣ်.

စီၤဃံးစကံယၤ မ့ၢ်ဝဲယူဒၤအစီၤပၤ. စီၤဃံးစကံယၤ ဟ့ၣ်လီၤဝဲ စီၤပၤစၤနဃ့ရံာ်လၢ စ့အါအါဂီၢ်ဂီၢ် ဒ်သိးအသုတဟဲဒုး ဝ့ၢ်ယရူၤၡလ့ၣ်​ တဂ့ၤအဂီၢ်. စီၤပၤစၤနဃ့ရံာ် ဟံးန့ၢ်စ့ ဘၣ်ဆၣ်​ အဝဲဆှၢလီၤဒံးဝဲ အသုးမုၢ်လၢ အဂံၢ်ဆူၣ်ဘါဆူၣ်​ ဒ်သိး ကဒုးန့ၢ်ဝဲ ဝ့ၢ်ယရူၤၡလ့ၣ်အဂီၢ်. ခီဖျိလၢ အၤၡူၢ်အသုးဖိတဖၣ်​ ဟဲဘူးထီၣ်ဒီး ဝ့ၢ်ယရူၤၡလ့ၣ်​ အဃိ ပှၤဂီၢ်မုၢ်တဖၣ်​ ပျံၤတၢ်ဒိၣ်မး. ဘၣ်ဆၣ်​ စီၤဃံးစကံယၤတဲဘၣ်​ ပှၤဂီၢ်မုၢ်လၢ ‘ပျံၤတၢ်တဂ့ၤ. အၤၡူၢ်အသုးမုၢ် အဂံၢ်ဆူၣ်ဝဲ ဘၣ်ဆၣ်​ ယဟိဝၤယွၤ အဂံၢ်ဆူၣ်န့ၢ်ဒံး အဝဲသ့ၣ်​ ဒီးအဝဲကမၤစၢၤပှၤ.’

စီၤပၤစၤနဃ့ရံာ် ဆှၢလီၤဝဲ စီၤရၤဘၡါက့ၤဆူ ဝ့ၢ်ယရူၤၡလ့ၣ်​ ဒ်သိး ကတဲဟးဂီၤ ပှၤအိၣ်လၢဝ့ၢ်ပူၤတဖၣ်အသး. စီၤရၤဘၡါက့ၤ ဆၢထၢၣ်ဝဲ လၢဝ့ၢ်ချၢ ဒီးကိးပသူထီၣ်ဝဲလၢ ‘ယဟိဝၤယွၤ မၤစၢၤသုတသ့ဘၣ်. တဘၣ်ပျဲ စီၤဃံးစကံယၤ လီန့ၢ်သုတဂ့ၤ. ယွၤလၢအကမၤပူၤဖျဲး သုလၢပစုပူၤန့ၣ်​ တအိၣ်ဝဲ နီတဂၤဘၣ်.’

စီၤဃံးစကံယၤသံကွၢ် ယဟိဝၤယွၤလၢ အဝဲကဘၣ်မၤဝဲဒ်လဲၣ်. ယဟိဝၤယွၤ တဲဆၢက့ၤအီၤလၢ ‘တဘၣ်ပျံၤတၢ်လၢ စီၤရၤဘၡါက့ၤ အတၢ်ကတိၤ အဃိတဂ့ၤ. စီၤပၤစၤနဃ့ရံာ်ဒုးဝဲ ဝ့ၢ်ယရူၤၡလ့ၣ်​ တန့ၢ်ဘၣ်.’ လၢခံ စီၤဃံးစကံယၤ ဒိးန့ၢ်ဘၣ်ဝဲ လံာ်ပရၢတနီၤလၢ စီၤပၤစၤနဃ့ရံာ်အအိၣ်. စီၤပၤစၤနဃ့ရံာ် ကွဲးဝဲလၢ ‘တူၢ်ၡူနသးသၢၣ်. ယဟိဝၤယွၤ မၤပူၤဖျဲးနၤ တသ့ဘၣ်.’ ဒီးစီၤဃံးစကံယၤ ဃ့ဘါထုကဖၣ်ဝဲလၢ ‘ယဟိဝၤယွၤဧၢ, ဒ်သိး ပှၤခဲလၢာ် ကသ့ၣ်ညါဝဲလၢ နမ့ၢ်ယွၤလၢ အမ့ၢ်အတီ ထဲတဂၤဧိၤအဂီၢ် ဝံသးစူၤ မၤပူၤဖျဲးပှၤ.’ ယဟိဝၤယွၤ တဲဆၢက့ၤအီၤလၢ ‘အၤၡူၢ်အစီၤပၤ တဟဲနုာ်လီၤဘၣ်လၢ ဝ့ၢ်ယရူၤၡလ့ၣ်အပူၤဘၣ်. ယကဒီသဒၢယဝ့ၢ်.’

စီၤပၤစၤနဃ့ရံာ် ဆိကမိၣ်ဝဲလၢ တယံာ်လၢၤဘၣ်န့ၣ်​ ဝ့ၢ်ယရူၤၡလ့ၣ်​ ကအိၣ်လၢအစုပူၤ. ဘၣ်ဆၣ်​ ဘၣ်တနၤန့ၣ်​ ယဟိဝၤယွၤဆှၢလီၤ အမူခိၣ်ကလူးတဂၤဆူ အၤၡူၢ် အသုးဖိတဖၣ်လၢ အိၣ်လၢဝ့ၢ်ချၢ. မူခိၣ်ကလူးတဂၤအံၤ မၤသံကွံာ်ဝဲ အၤၡူၢ်အသုးဖိအဂၤ ၁၈၅,၀၀၀. စီၤပၤစၤနဃ့ရံာ် အသုးဖိလၢ အဂံၢ်ဆူၣ်ဘါဆူၣ်တဖၣ်​ သံကွံာ်ဝဲ. လၢတၢ်န့ၣ်အဃိ စီၤပၤစၤနဃ့ရံာ် တမၤနၢၤတၢ်ဘၣ်​ ဒီးအဝဲက့ၤဝဲ. ယဟိဝၤယွၤ ဒီသဒၢဝဲ စီၤဃံးစကံယၤ ဒီးဝ့ၢ်ယရူၤၡလ့ၣ်​ ဒ်အဝဲအၢၣ်လီၤအီလီၤဝဲအသိး. ဖဲန့ၣ်အဆၢကတီၢ် နမ့ၢ်အိၣ်ဘၣ်လၢ ဝ့ၢ်ယရူၤၡလ့ၣ်​ အပူၤန့ၣ်​ မ့ၢ်နကနာ်န့ၢ် ယဟိဝၤယွၤ စ့ၢ်ကီးဧါ.