နီၢ်ပၤမုၣ်အ့ၤစတၢ် မၤပူၤဖျဲး အပှၤကလုာ်

လၢအပူၤကွံာ်န့ၣ်​ စီၤပၤနဘူၤကးန့စၢ် ဖီၣ်န့ၢ်ဝဲနီၢ်အ့ၤစတၢ် အဟံၣ်ဖိဃီဖိ. အဃိ နီၢ်အ့ၤစတၢ် မ့ၢ်ပှၤယူဒၤမုၣ်တဂၤ ဘၣ်ဆၣ်​ အဘၣ်အိၣ်လၢ ဝ့ၢ်ၡူၡၣ်​ လၢဖၢၡၢၣ်အတၢ်ပၢ အဖီလာ်. နီၢ်အ့ၤစတၢ် အတခွါ စီၤမၢ်ဒကဲၤန့ၣ်​ ကွၢ်ဒိၣ်ထီၣ်က့ၤအီၤ. ဒီးစီၤမၢ်ဒကဲၤန့ၣ်​ မ့ၢ်ဝဲ စီၤပၤအဃၤၡဝ့ရိၣ်​ အခ့အပှၤတဂၤလၢ ကီၢ်ဖၢၡၢၣ်အပူၤ.

စီၤပၤအဃၤၡဝ့ရိၣ်​ သးလီဝဲနီၢ်ပၤမုၣ်​ လၢအသီတဂၤ. အဃိ အခ့အပှၤတဖၣ်​ ဟဲကိးန့ၢ်အီၤ ကယဲၢ်ပိာ်မုၣ်လၢ အဒိၣ်တၢ်ဂ့ၤ လၢကီၢ်ပူၤ ပၣ်ဃုာ်ဒီး နီၢ်အ့ၤစတၢ်. လၢပိာ်မုၣ်တဖၣ်အံၤ အကျါန့ၣ်​ စီၤပၤဃုထၢဝဲ နီၢ်အ့ၤစတၢ် လၢနီၢ်ပၤမုၣ်. စီၤမၢ်ဒကဲၤ တဲဘၣ်​ နီၢ်အ့ၤစတၢ်လၢ အတဘၣ်​ တဲဖျါထီၣ်အသးလၢ အကဲပှၤယူဒၤမုၣ်ဘၣ်.

စီၤဟၤမၣ်​ ကဲပှၤလၢ အပာ်ထီၣ်ထီသး ဒီးအကဲစ့ၢ်ကီး ပဒိၣ်တဖၣ်အခိၣ်. အအဲၣ်ဒိးလၢ ပှၤကိးဂၤဒဲး ကဆုးလီၤခိၣ်​ လၢအမဲာ်ညါ. မ့မ့ၢ်စီၤမၢ်ဒကဲၤန့ၣ်​ တဆုးလီၤအခိၣ်လၢ စီၤဟၤမၣ်​ အမဲာ်ညါဘၣ်. အဃိ စီၤဟၤမၣ်​ သးပှံၢ်ထီၣ်​ စီၤမၢ်ဒကဲၤ ဒီးအဲၣ်ဒိးမၤသံအီၤ. ဖဲစီၤဟၤမၣ်​ သ့ၣ်ညါဝဲလၢ စီၤမၢ်ဒကဲၤ ကဲဝဲပှၤယူဒၤဖိအခါ အကူၣ်ထီၣ်ဝဲလၢ ကမၤသံ ပှၤယူဒၤဖိခဲလၢာ် လၢကီၢ်ပူၤ. အဃိ စီၤဟၤမၣ်​ တဲဘၣ်​ စီၤပၤလၢ ‘ပှၤယူဒၤဖိ တဒူၣ်အံၤ မ့ၢ်ပှၤလၢ အလီၤဘၣ်ယိၣ်အဃိ နဘၣ်မၤသံကွံာ် အဝဲသ့ၣ်ခဲလၢာ်.’ စီၤပၤအဃၤၡဝ့ရိၣ်​ တဲဘၣ်အီၤလၢ ‘ကွၢ်လၢနအဲၣ်ဒိးမၤန့ၣ်​ မၤဟီ.’ ဒီးစီၤပၤဟ့ၣ်​ စီၤဟၤမၣ်​ အခွဲးလၢ အကထုးထီၣ်​ တၢ်သိၣ်တၢ်သီတခါ. ဝံၤဒီး စီၤဟၤမၣ်​ ထုးထီၣ်ဝဲ တၢ်သိၣ်တၢ်သီ တခါလၢ ဖဲလါအးဒၢ် ၁၃ သီန့ၣ်​ ထံဖိကီၢ်ဖိ ကဘၣ်မၤသံကွံာ် ပှၤယူဒၤဖိခဲလၢာ်. ဘၣ်ဆၣ်​ တၢ်ကူၣ်လၢ အအၢအသီအံၤ ယဟိဝၤယွၤ သ့ၣ်ညါဝဲ.

နီၢ်ပၤမုၣ်အ့ၤစတၢ် တသ့ၣ်ညါဝဲလၢ ပှၤထုးထီၣ်​ တၢ်သိၣ်တၢ်သီအံၤဘၣ်. အဃိ စီၤမၢ်ဒကဲၤ ဆှၢလီၤတၢ်ကစီၣ်လၢ နီၢ်ပၤမုၣ်အ့ၤစတၢ်အအိၣ်​ ဒီးတဲဝဲလၢ ‘လဲၤတဲတၢ်ဒီး စီၤပၤ.’ နီၢ်ပၤမုၣ်​ တဲဝဲလၢ ‘ပှၤလၢ စီၤပၤတကိးထံၣ်အီၤ ဒီးအမ့ၢ်လဲၤထံၣ်လိာ်သးဒီး စီၤပၤန့ၣ်​ ပှၤကမၤသံအီၤ. စီၤပၤတကိးထံၣ်ယၤဘၣ်​ အိၣ်ဝဲ အသီ ၃၀ လံ. ဘၣ်ဆၣ်​ ယကလဲၤ. စီၤပၤမ့ၢ်ယူာ်ဃီၤ အနီၣ်ထိးဘိထူ လၢယအိၣ်န့ၣ်​ ယကအိၣ်မူဘၣ်ဒံး ဒီးစီၤပၤ မ့ၢ်တယူာ်ဃီၤဝဲဘၣ်န့ၣ်​ ယကဘၣ်သံ.’

နီၢ်ပၤမုၣ်အ့ၤစတၢ် လဲၤဝဲလၢ စီၤပၤအကရၢၢ်. ဒီးဖဲစီၤပၤ ထံၣ်အီၤအခါ စီၤပၤယူာ်ဃီၤ အနီၣ်ထိးဘိထူ လၢအအိၣ်. နီၢ်ပၤမုၣ်​ လဲၤဃီၤလၢ စီၤပၤအအိၣ်​ ဒီးစီၤပၤသံကွၢ်အီၤလၢ ‘နီၢ်ပၤမုၣ်ဧၢ, ယကဘၣ်မၤန့ၢ်နၤ မနုၤလဲၣ်.’ နီၢ်ပၤမုၣ်​ တဲက့ၤအီၤလၢ ‘ယအဲၣ်ဒိးကွဲမုာ်နၤ ဒီးစီၤဟၤမၣ်လၢ ကဟဲအီၣ်သကိးတၢ်ဒီးယၤ.’ ဖဲအဝဲသ့ၣ်​ အီၣ်သကိးတၢ် အခါ နီၢ်ပၤမုၣ်အ့ၤစတၢ် ကွဲမုာ်ကဒီး အဝဲသ့ၣ်လၢ ကဟဲအီၣ်တၢ် လၢအသီတဘျီ. ဖဲအဝဲသ့ၣ်​ အီၣ်သကိးတၢ် ခံဘျီတဘျီအခါ စီၤပၤသံကွၢ်ကဒီး နီၢ်ပၤမုၣ်အ့ၤစတၢ်လၢ ‘ယကဘၣ်​ မၤန့ၢ်နၤ မနုၤလဲၣ်.’ အတဲက့ၤ စီၤပၤလၢ ‘ပှၤတဂၤ အဲၣ်ဒိးမၤသံယၤ ဒီးယပှၤကလုာ်. ဝံသးစူၤမၤပူၤဖျဲးပှၤမီၤ.’ စီၤပၤသံကွၢ်အီၤလၢ ‘မတဂၤ အဲၣ်ဒိးမၤသံနၤလဲၣ်.’ နီၢ်ပၤမုၣ်​ တဲက့ၤအီၤလၢ ‘ပှၤအၢပှၤသီတဂၤန့ၣ်​ မ့ၢ်ဝဲစီၤဟၤမၣ်.’ စီၤပၤအဃၤၡဝ့ရိၣ်​ သးပှံၢ်ထီၣ်တၢ် ဒိၣ်မးအဃိ အမၢပှၤမၤသံကွံာ် စီၤဟၤမၣ်​ တဘျီဃီ.

ဘၣ်ဆၣ်​ တၢ်သိၣ်တၢ်သီလၢ စီၤဟၤမၣ်ထုးထီၣ်ဝဲန့ၣ်​ ပှၤမၤလီၤမၢ်ကွံာ်ဝဲ တန့ၢ်နီတဂၤဘၣ်. စီၤပၤစ့ၢ်ကီး မၤလီၤမၢ်ကွံာ်ဝဲ တန့ၢ်ဘၣ်. အဃိ စီၤပၤဒုးကဲထီၣ်​ စီၤမၢ်ဒကဲၤ လၢပဒိၣ်အခိၣ်​ ဒီးဟ့ၣ်လီၤအီၤ တၢ်စိတၢ်ကမီၤလၢ ကထုးထီၣ်​ တၢ်သိၣ်တၢ်သီ လၢအသီတခါ. စီၤမၢ်ဒကဲၤ ထုးထီၣ်​ တၢ်သိၣ်တၢ်သီတခါလၢ အဟ့ၣ်ဝဲ ပှၤယူဒၤဖိတဖၣ်​ တၢ်ခွဲးတၢ်ယာ်လၢ ကဒုးဆၢက့ၤ အဒုၣ်အဒါ. အဃိ ဖဲလါအးဒၢ် ၁၃ သီန့ၣ်​ ပှၤယူဒၤဖိတဖၣ်​ မၤနၢၤက့ၤဝဲ အဒုၣ်အဒါ. စးထီၣ်ဖဲန့ၣ်န့ၣ်​ ပှၤယူဒၤဖိတဖၣ်​ မၤဝဲမူးပွဲလၢ ကမၤလၤကပီၤ အတၢ်မၤနၢၤအံၤ ကိးနံၣ်ဒဲး.