ယ့ၣ်ၡူးမၤဘျါပှၤဆါလၢ မုၢ်အိၣ်ဘှံးနံၤ

ပှၤဖၤရံၤၡဲတဖၣ်​ သးဟ့ယ့ၣ်ၡူး ဒီးအဲၣ်ဒိးဖီၣ်ဝဲ ယ့ၣ်ၡူးအဃိ အဝဲသ့ၣ်​ ဃုဝဲကျဲလၢ ကဖီၣ်အီၤအဂီၢ်. အဝဲသ့ၣ်​ တဲဝဲလၢ ယ့ၣ်ၡူး တကြၢးမၤဘျါ ပှၤဆါလၢ မုၢ်အိၣ်ဘှံးနံၤဘၣ်. ဖဲမုၢ်အိၣ်ဘှံးနံၤ တနံၤန့ၣ်​ ယ့ၣ်ၡူးထံၣ်ဝဲ ပှၤမဲာ်တထံၣ်တၢ်ဘၣ်တဂၤ ဃ့အီၣ်တၢ်လၢ ကျဲမုၢ်ခိၣ်. ယ့ၣ်ၡူးတဲဘၣ်​ အပျဲၢ်အဘီၣ်တဖၣ်လၢ ‘ကစၢ်ယွၤ အစိကမီၤ ကမၤစၢၤ ပိာ်ခွါတဂၤအံၤဒ်လဲၣ်န့ၣ်​ ခိးကွၢ်.’ ယ့ၣ်ၡူး ကျဲၣ်ကျီဝဲ အထးခိၣ်ထံ ဒီးဟီၣ်ခိၣ်ကမူၣ်​ ဝံၤဒီးပဲထီၣ်ဝဲလၢ ပှၤမဲာ်တထံၣ်တၢ်ဘၣ်တဂၤန့ၣ်​ အမဲာ်ချံ. ယ့ၣ်ၡူး တဲဘၣ်အီၤလၢ “လဲၤပျၢ်နမဲာ်လၢ ကမါၡံလိၣ်နီၤ.” ပှၤမဲာ်တထံၣ်တၢ်ဘၣ်တဂၤန့ၣ်​ မၤဝဲဒ် ယ့ၣ်ၡူး တဲအီၤအသိး ဒီးအမဲာ်ထံၣ်ထီၣ်တၢ်.

ပှၤဂီၢ်မုၢ်တဖၣ်​ ကမၢကမၣ်ဝဲဒိၣ်မး. အဝဲသ့ၣ်​ တဲဝဲလၢ ‘လၢညါန့ၣ်​ ပှၤတဂၤအံၤ အကဲပှၤလၢ အဆ့ၣ်နီၤဃ့အီၣ်တၢ် တမ့ၢ်ဧီၤ. မ့ၢ်ပှၤလၢအလီၤဂာ်ဒီးအီၤ အိၣ်တဂၤဂၤဧါ.’ ပိာ်ခွါတဂၤအံၤ တဲက့ၤဝဲလၢ ‘ယကဲပှၤလၢ အမဲာ်ချံတထံၣ်တၢ်ဘၣ်​ တဂၤန့ၣ်လီၤ.’ ပှၤဂီၢ်မုၢ် သံကွၢ်အီၤလၢ “နထံၣ်ထီၣ်က့ၤတၢ်ဒ်လဲၣ်.” ဖဲပိာ်ခွါအံၤ တဲဘၣ်အဝဲသ့ၣ်​ တၢ်လၢအဟဲကဲထီၣ်သးဒီးအီၤ ဝံၤအလီၢ်ခံ ပှၤဂီၢ်မုၢ်တဖၣ်​ လဲၤကိးအီၤလၢ ပှၤဖၤရံၤၡဲအအိၣ်.

ပိာ်ခွါတဂၤအံၤ တဲဘၣ်​ ပှၤဖၤရံၤၡဲလၢ ‘ယ့ၣ်ၡူး ပဲထီၣ်ကပံာ်လၢ ယမဲာ်ချံလိၤ ဒီးမၢယလဲၤပျၢ်ကွံာ် ယမဲာ်. ယမၤဒ်အတဲယၤအဃိ ခဲအံၤ ယထံၣ်ထီၣ်တၢ်လံ.’ ပှၤဖၤရံၤၡဲ တဲဘၣ်အီၤလၢ ‘ယ့ၣ်ၡူး မၤဘျါတၢ်ဆါလၢ မုၢ်အိၣ်ဘှံးနံၤအဃိ အတၢ်စိတၢ်ကမီၤ တဟဲလၢ ကစၢ်ယွၤအအိၣ်ဘၣ်’ ဘၣ်ဆၣ်​ ပှၤအဂၤတနီၤ တဲဝဲလၢ ‘အတၢ်စိတၢ်ကမီၤ မ့ၢ်တဟဲလၢ ကစၢ်ယွၤအအိၣ်ဘၣ်န့ၣ်​ အမၤဘျါပှၤဆါ တသ့ဘၣ်.’

ပှၤဖၤရံၤၡဲတဖၣ်​ ကိးန့ၢ်ဝဲ ပိာ်ခွါတဂၤန့ၣ်​ အမိၢ်အပၢ် ဒီးသံကွၢ်ဝဲလၢ ‘နဖိခွါ ထံၣ်ထီၣ်က့ၤတၢ်ဒ်လဲၣ်’ အမိၢ်အပၢ် ပျံၤတၢ် ခီဖျိလၢ ပှၤဖၤရံၤၡဲတဖၣ်​ တဲဝဲလၢ ပှၤတဂၤဂၤ မ့ၢ်နာ်ခရံာ်န့ၣ်​ ပှၤကနီဟးထီၣ်ကွံာ်အီၤ လၢဘူၣ်ဘျီၣ်ပူၤ. အဃိ အဝဲသ့ၣ်​ တဲဝဲလၢ ‘ပတသ့ၣ်ညါဘၣ်. သံကွၢ်အနီၢ်ကစၢ်သၢၤ.’ ပှၤဖၤရံၤၡဲတဖၣ်​ သံကွၢ်အီၤအါဘျီအဃိ ပိာ်ခွါန့ၣ်​ တဲဝဲလၢ ‘တၢ်လၢယသ့ၣ်ညါန့ၣ်​ ယတဲဘၣ်သုလၢာ်လံ. ဘၣ်မနုၤအဃိ သုသံကွၢ်ဒံးယၤလဲၣ်.’ ပှၤဖၤရံၤၡဲတဖၣ်​ သးပှံၢ်ထီၣ်တၢ်ဒိၣ်မး ဒီးနီဟးထီၣ်ကွံာ်အီၤ.

ယ့ၣ်ၡူးလဲၤဃုဝဲ ပိာ်ခွါတဂၤန့ၣ်​ ဒီးသံကွၢ်အီၤလၢ ‘နနာ်မ့းၡံအၤဧါ.’ ပိာ်ခွါတဂၤအံၤ တဲဝဲလၢ ‘အဝဲမ့ၢ်မတဂၤလဲၣ်န့ၣ်​ ယမ့ၢ်သ့ၣ်ညါဒု ယကနာ်အီၤသၢၤ.’ ယ့ၣ်ၡူး တဲအီၤလၢ ‘ယမ့ၢ်မ့းၡံအၤ.’ ယ့ၣ်ၡူးမ့ၢ်ပှၤလၢ အသးဂ့ၤတဂၤ. ယ့ၣ်ၡူး တမၤဘျါထဲ ပိာ်ခွါတဂၤအံၤ အတၢ်ဆါဘၣ်. အမၤစၢၤအီၤလၢ ကအိၣ်ဒီး တၢ်နာ်စ့ၢ်ကီး.