အဝဲသ့ၣ် ထံၣ်န့ၢ်ဝဲ တၢ်လၢအဂ့ၤဒိၣ်တခါ

ခရံာ်ဖိလၢ အကကွဲၢ်တဖၣ်န့ၣ် တမၤဝဲခရံာ်အိၣ်ဖျဲၣ်အမူးဘၣ်. အဃိ မ့ၢ်အဝဲသ့ၣ် တူၢ်ဘၣ်ဝဲဒ်လဲၣ်. မ့ၢ်အဝဲသ့ၣ် တူၢ်ဘၣ်ဝဲလၢ အဘၣ်တူၢ်ၡူကွံာ် တၢ်တမံၤမံၤဧါ မ့တမ့ၢ် မ့ၢ်အဖိတဖၣ် အသးဆံးစ့ၢ်ကီးဧါ. ဘၣ်ဃးဒီး တၢ်ဂ့ၢ်အံၤန့ၣ် ယဟိဝၤပှၤအုၣ်အသး လၢအအိၣ်လၢ ဟီၣ်ခိၣ်ဒီဘ့ၣ်န့ၣ် တဲဝဲဒ်လဲၣ်.

တၢ်သ့ၣ်နီၣ်ထီၣ်က့ၤ ယ့ၣ်ၡူးခရံာ် အံး(ဖ်) လၢအအိၣ်လၢ အီးစတြ့လံယါန့ၣ် တဲဝဲလၢ “တချုးလၢ ယကဲထီၣ် ယဟိဝၤပှၤအုၣ်အသးဒံးဘၣ်အခါန့ၣ် ယတလဲၤလၢ တၢ်ဘါယွၤသရိာ်ကြီကြီဘၣ်. ယမ့ၢ်လဲၤန့ၣ် ယလဲၤဖဲ ပှၤမၤခရံာ်အိၣ်ဖျဲၣ် ဒီးအံးစထၢၤမူးပွဲအခါ. ယလဲၤနာ်က့ ယမၣ်တဆိကမိၣ် ယ့ၣ်ၡူးခရံာ်အဂ့ၢ်ဘၣ်. ခဲအံၤန့ၣ် ယတမၤ ခရံာ်အိၣ်ဖျဲၣ်လၢၤဘၣ်. ယထီၣ်ခရံာ်ဖိအတၢ်အိၣ်ဖှိၣ် တနွံခံဘျီ ဒီးယသိၣ်လိပှၤဂၤ ယ့ၣ်ၡူးအဂ့ၢ် လၢလံာ်စီဆှံပူၤ.”

 သးခုလၢ ဟ့ၣ်ဘၣ်တၢ်အဃိ ရူဘဲ(န်) လၢအအိၣ်လၢ ကလံၤစိး အၣ်ယ့ၣ်လဲ(န်)န့ၣ် တဲဝဲလၢ “ပှၤမ့ၢ်ဟ့ၣ်ယၤတၢ်ဟ့ၣ် ဖဲယတမုၢ်လၢ်အီၤအခါန့ၣ် ယသးခုဒိၣ်မး. ပှၤမၤဒ်အံၤန့ၣ် ယဘၣ်သးညါ. ယတ့န့ၢ်ပှၤဂၤခးက့ ဒီးယဆွဲန့ၢ်အဝဲသ့ၣ်တၢ်ဂီၤ မုာ်မး, မ့ၢ်လၢယသ့ၣ်ညါလၢ အဝဲသ့ၣ် သးခုအဃိ ယၤနာ်က့ ယသးခုစ့ၢ်ကီး.”

 မၤစၢၤ ပှၤလၢအလိၣ်ဘၣ် တၢ်မၤစၢၤ အဲမလံၤ လၢအအိၣ်လၢ အီးစတြ့လံယါန့ၣ် တဲဝဲလၢ “ပဖီဒုးအီၣ် ပှၤဆါတဖၣ်တၢ်အီၣ် မုာ်မး. တဘျီတခီၣ် ပလဲၤဟ့ၣ်အဝဲသ့ၣ် ဖီဖိ, ကိၣ်ဖိ မ့တမ့ၢ် တၢ်ဟ့ၣ်ဆံးဆံးဖိ ဒ်သိး အဝဲသ့ၣ် ကသးခုအဂီၢ်. ပလဲၤလၢ အဝဲသ့ၣ်အအိၣ် ဖဲပဘၣ်သးလဲၤအခါ သ့ဝဲအဃိ ပသးခုဒိၣ်မး.”

ဒူၣ်ဖိထၢဖိ ထံၣ်ဖှိၣ်လိာ်သးတပူၤဃီ ဝဲဒံၤ လၢအအိၣ်လၢ က့ၣ်မဲ ကီးတဖၣ်န့ၣ် တဲဝဲလၢ “ဖဲပဘူးပတံၢ်တဖၣ် ထံၣ်ဖှိၣ်လိာ်သးအခါ ပဖိတဖၣ်န့ၣ် ရ့ဘၣ်ဒီး အမုၢ်ဂၢ်ဖါတံၢ်, အဖံအဖု ဒီးအတခွါတဖၣ် အ့အ့ဆ့ဆ့. ဒ်သိးပကမၤ ဒ်အံၤအဂီၢ် တလိၣ်ပပာ်ပနီၣ်ဃာ် မုၢ်နံၤမုၢ်သီ လီၤလီၤဆီဆီဘၣ်အဃိ တကဲထီၣ် တၢ်ဝံတၢ်ယိးလၢပဂီၢ်ဘၣ် ဒီးပဘူးပတံၢ်တဖၣ်န့ၣ် သ့ၣ်ညါဝဲလၢ ပလဲၤအိၣ်သကိး အဝဲသ့ၣ်န့ၣ် မ့ၢ်လၢ ပအဲၣ်အဝဲသ့ၣ်အဃိ.”

တၢ်မုာ်တၢ်ခုၣ် စဲဒရၣ် လၢအအိၣ်လၢ စပ့ၣ်န့ၣ် တဲဝဲလၢ “ဖဲခရံာ်အိၣ်ဖျဲၣ်ဘၣ်အခါ ပှၤဘၣ်မၤတၢ် အိၣ်အါမးအဃိ ဖျါလၢပှၤအါဂၤန့ၣ် ဆိကမိၣ် တၢ်မုာ်တၢ်ခုၣ်အဂ့ၢ် တချုးဘၣ်. ယမၤလိဘၣ် လံာ်စီဆှံအတၢ်အၢၣ်လီၤ လၢပှၤဟီၣ်ခိၣ်ဖိအဂီၢ်အဃိ ယသးမုာ်ဒိၣ်မး. ဒီးယသ့ၣ်ညါလၢ ယဖိတဖၣ် အတၢ်အိၣ်မူ လၢခါဆူညါန့ၣ် ကအိၣ်ဒီး တၢ်မုာ်တၢ်ခုၣ်.”