တၢ်သံကွၢ်လၢ ပှၤစံးဆၢအီၤတညီဘၣ်

ဘၣ်ဃး တၢ်အိၣ်မူဒီးတၢ်သံန့ၣ် ပှၤတၢ်ထံၣ်အိၣ်ဝဲ အကလုာ်ကလုာ်လီၤ. ပှၤတနီၤနီၤဆိကမိၣ်ဝဲလၢ ဖဲအဝဲသ့ၣ်သံဝံၤအလီၢ်ခံန့ၣ် ကဆဲးအိၣ်မူဒံးဝဲလီၤ. အဒိ ပှၤတနီၤနီၤဆိကမိၣ်ဝဲလၢ ဖဲအဝဲသ့ၣ်သံဝံၤအလီၢ်ခံ ကကဲထီၣ်တၢ်အသီတမံၤမံၤ မ့တမ့ၢ် ကလဲၤအိၣ်မူဘၣ်ဝဲလၢ တၢ်လီၢ်အဂၤတတီၤတီၤလီၤ. မ့မ့ၢ် ပှၤအဂၤတနီၤဆိကမိၣ်ဝဲလၢ အဝဲသ့ၣ်ကအိၣ်ဖျဲၣ်ထီၣ်က့ၤလၢ အသီတဘျီလီၤ. ဘၣ်ဆၣ် မ့မ့ၢ်ပှၤအဂၤတနီၤ ဆိကမိၣ်ဝဲလၢ အဝဲသ့ၣ်မ့ၢ်သံန့ၣ် အကျဲကတၢၢ်ဝဲလီၤ.

ဘၣ်ဃးဒီးတၢ်ဂ့ၢ်အံၤန့ၣ် နကအိၣ်ဒီးနနီၢ်ကစၢ် အတၢ်ထံၣ်စ့ၢ်ကီးလီၤ. နီၢ်နီၢ်န့ၣ် ဖဲပှၤသံအခါ တၢ်မၤအသးဒီးအဝဲသ့ၣ်ဒ်လဲၣ်. ဒီးခီဖျိလၢ ပှၤအါဂၤအတၢ်ထံၣ် လီၤဆီလိာ်သးအဃိ ပဃုထံၣ်န့ၢ်တၢ်မ့ၢ်တၢ်တီ ကသ့ဖဲလဲၣ်.

အနံၣ်လၢအကထိတဖၣ်အတီၢ်ပူၤန့ၣ် တၢ်ဘူၣ်တၢ်ဘါခိၣ်နၢ်တဖၣ် သိၣ်လိဝဲလၢ ပှၤဟီၣ်ခိၣ်ဖိအိၣ်ဒီးအကလၤလၢ အသံတသ့ဘၣ်လီၤ. လၢတၢ်န့ၣ်အဃိ ပှၤခရံာ်ဖိ, ပှၤဟ့ၣ်ဒူၢ်ဖိ, ပှၤယူဒၤဖိ, ပှၤမူးစလ့ၣ်ဖိ ဒီးပှၤဂၤတဖၣ်န့ၣ် နာ်ဝဲလၢအဝဲသ့ၣ်မ့ၢ်သံ သနာ်က့ အကလၤတသံဘၣ်. မ့မ့ၢ် ပှၤဘူးဒးဖိတခီ နာ်ဝဲလၢပှၤတုၤလၢ နံးဘၢ် (Nirvana) သ့ဝဲလီၤ.

ခီဖျိလၢ ပှၤသိၣ်လိတၢ်ဒ်အံၤအဃိ ပှၤဟီၣ်ခိၣ်ဖိအါတက့ၢ် နာ်ဝဲလၢတၢ်သံန့ၣ် အိးဟိထီၣ်ကျဲလၢ တၢ်အိၣ်မူလၢအသီတပတီၢ်လီၤ. ပှၤအါဂၤနာ်ဝဲလၢ တၢ်အိၣ်မူဒီးတၢ်သံန့ၣ် လဲၤတရံးအသး ဒီး ကစၢ်ယွၤဘၣ်အသးလၢ ပှၤကသံဝဲလီၤ. ဘၣ်ဆၣ် ဘၣ်ဃးဒီးတၢ်သံန့ၣ် လံာ်စီဆှံတဲဝဲဒ်လဲၣ်. တၢ်မၤလိလၢခံတခါ ကပာ်ဖျါထီၣ်တၢ်သံကွၢ်အံၤ အတၢ်စံးဆၢလီၤ.