တၢ်မၤဂ့ၤထီၣ် ပတၢ်သ့တၢ်ဘၣ်လၢ တၢ်သးခုကစီၣ်တၢ်မၤအပူၤ—တၢ်စံၣ်တဲၤတဲလီၤတၢ်လၢ တၢ်ဆါတၢ်ပှ့ၤအဟီၣ်ကဝီၤ

ဘၣ်မနုၤအဃိအရ့ဒိၣ်လဲၣ်– ခီဖျိလၢပှၤအါဂၤ မၤတၢ်မၤဒီတနံၤညါအဃိ ပမ့ၢ်လဲၤစံၣ်တဲၤတဲလီၤတၢ်လၢ အဝဲသ့ၣ်အတၢ်မၤလီၢ်န့ၣ် မ့ၢ်ကျဲအဂ့ၤကတၢၢ်လၢ အဝဲသ့ၣ်ကနၢ်ဟူဘၣ် ဘီမုၢ်တၢ်သးခုကစီၣ်လီၤ. ပမ့ၢ်စံၣ်တဲၤတဲလီၤတၢ်လၢ တၢ်ဆါတၢ်ပှ့ၤအဟီၣ်ကဝီၤအပူၤန့ၣ် ပကဒိးန့ၢ်ဘၣ် တၢ်သူၣ်ခုသးခု ဒီးကကဲဘျုးကဲဖှိၣ်လီၤ. ခီဖျိလၢ ပှၤအါဂၤတအိၣ်လၢဟံၣ်ဒီး ညီနုၢ်အိၣ်လၢ တၢ်မၤလီၢ်အဃိလီၤ. ပှၤမၤတၢ်ဖိအါတက့ၢ်န့ၣ် တူၢ်လိာ်ဝဲ ပှၤလၢအဟဲပှ့ၤတၢ်တဖၣ်လီၤ. ဘၣ်ဆၣ် ဒ်သိးကကဲဘျုးကဲဖှိၣ်အဂီၢ် ပှၤစံၣ်တဲၤတဲလီၤတၢ်ဖိသ့ၣ်တဖၣ် ကဘၣ်အိၣ်ဒီး တၢ်သ့ၣ်ညါနၢ်ပၢၢ်ပှၤဂၤ ဒီးကူသိးလၢအကြၢးအဘၣ် ဒီးကဆှဲကဆှီလီၤ. (၂ ကရံၣ်. ၆:၃) လၢတၢ်န့ၣ်အဃိ လၢတၢ်ဆါတၢ်ပှ့ၤအဟီၣ်ကဝီၤ ပှၤကဘၣ်လဲၤဝဲ တနံၣ်ပှဲၤဘျီလဲၣ် ဒီးမတၤတဖၣ်ကဘၣ်လဲၤဝဲလဲၣ်န့ၣ် ပှၤလၢအကွၢ်ထွဲ တၢ်စံၣ်တဲၤတဲလီၤတၢ်မၤန့ၣ် ကြၢးကွၢ်ထွဲဝဲလီၤ.

ပမၤကသ့ဒ်လဲၣ်–

ကတဲာ်ကတီၤပာ်စၢၤ တၢ်ဂ့ၢ်ဖုၣ်ကိာ်ဖိလၢ ပကတဲသကိးဒီးပှၤဂၤအဂီၢ်တက့ၢ်. ပမ့ၢ်ဟံးန့ၢ်တၢ်ဆၢကတီၢ်အါတလၢ လၢပကတဲသကိးတၢ် ဒီးပှၤမၤတၢ်ဖိန့ၣ် ဘၣ်သ့ၣ်သ့ၣ် လၢခံလၢလာ် အဝဲသ့ၣ်တဟ့ၣ်ပှၤတၢ်ခွဲးတၢ်ယာ်လၢ ပကတဲသကိးတၢ် ဒီးအီၤလၢၤဘၣ်.
ဃုထၢတၢ်ဆၢကတီၢ်လၢ တၢ်မၤတအိၣ်အါဒံးဘၣ်အခါ, ဒ်သိးဒီး ဂီၤခီ ဖဲတၢ်မၤစှၤဒံးအဆၢကတီၢ်န့ၣ်တက့ၢ်.
လဲၤသံကွၢ်ဆိ ပှၤဘၣ်မူဘၣ်ဒါန့ၣ်တက့ၢ်. အိၣ်ဒီးတၢ်အဲၣ်တၢ်ကွံ ဒီးတၢ်မဲာ်မုာ်နါဆၢတက့ၢ်. နတဲဒ်အံၤသ့လီၤ “ပဟဲဟးအိၣ်သကိးပှၤလၢတၢ်မၤလီၢ် ခီဖျိပထံၣ်ဘၣ်လၢ ပှၤအါဂၤအိၣ်လၢဟံၣ်တချုးအါအါဘၣ်အဃိလီၤ.” တဲပၠးအီၤတၢ်ဂ့ၢ်ဖုၣ်ကိာ် ဒီးဟ့ၣ်လီၤအီၤ လံာ်ဖိ, မဲးကစံ မ့တမ့ၢ် လံာ်လဲၢ်အဂၤန့ၣ်တက့ၢ်. ဒ်သိးပှၤသုတဆိကမိၣ်လၢ ပမ့ၢ်ပှၤဟးဆါတၢ်ဖိတဂ့ၤအဂီၢ် တလိၣ်လၢပတဲဖျါထီၣ်တၢ်မၤဘူၣ်အဂ့ၢ်ဘၣ်. ဘၣ်ဆၣ် ပှၤမ့ၢ်သံကွၢ်ဘၣ်ဃးဒီး ကျိၣ်စ့အဂ့ၢ်န့ၣ် ပတဲသ့လီၤ.
ပှၤလၢအဘၣ်မူဘၣ်ဒါန့ၣ် အသးမ့ၢ်ဂ့ၤဒီး ဃ့အီၤအခွဲးလၢ နကလဲၤကတိၤတၢ်ဒီး ပှၤမၤတၢ်ဖိလၢ အဂၤတဖၣ်န့ၣ်တက့ၢ်. လၢတၢ်မၤလီၢ်တနီၤနီၤန့ၣ်, နမ့ၢ်သံကွၢ်အီၤလၢ နပာ်တ့ၢ်လံာ်လဲၢ်လၢ အဝဲသ့ၣ်အိၣ်ဘှံးအလီၢ် မ့တမ့ၢ် တၢ်အီၣ်အလီၢ် သ့ဧါတသ့ဧါန့ၣ်ဂ့ၤဝဲလီၤ.
အိၣ်ဒီးတၢ်သ့ၣ်ညါနၢ်ပၢၢ်ပှၤဂၤတက့ၢ်. အဒိ, ပှၤမၤတၢ်ဖိ မ့ၢ်ကတိၤတၢ်ဒီးပှၤအဂၤ မ့တမ့ၢ် အတၢ်မၤမ့ၢ်အါန့ၣ် အိၣ်ခိးအီၤတုၤလၢ အချုးတက့ၢ်.

မၤကွၢ်တၢ်အံၤ လၢတလါညါအံၤအတီၢ်ပူၤတက့ၢ်–

လၢနဟံၣ်ဖိဃီဖိ တၢ်မၤလိလံာ်စီဆှံအပူၤ, ဂုာ်ကျဲးစၢးမၤကွၢ် တၢ်အဒိဖုၣ်ကိာ်ဖိတက့ၢ်. နမ့ၢ်ဘၣ်လဲၤစံၣ်တဲၤတဲလီၤတၢ်လၢ တၢ်ဆါတၢ်ပှ့ၤအဟီၣ်ကဝီၤအခါ နသူအီၤသ့လီၤ.