အိၣ်မူဒ် ခရံာ်ဖိအသိး
တၢ်အိၣ်ဖှိၣ်ဖးဒိၣ်လၢ ဘၣ်တၢ်မၤအီၤ ကိးနံၣ်ဒဲးန့ၣ် ဟ့ၣ်ပှၤတၢ်ခွဲးတၢ်ယာ်လၢ ပကပာ်ဖျါထီၣ် တၢ်အဲၣ်တၢ်ကွံ
ဖဲပထီၣ်တၢ်အိၣ်ဖှိၣ်ဖးဒိၣ်အခါ ဘၣ်မနုၤအဃိ ပသးခုဒိၣ်မးလဲၣ်. ဒ်လၢပျၢၤ ပှၤအံၣ်စရ့လးဖိတဖၣ်အစိၤအသိး မုၢ်မဆါတနံၤအံၤစ့ၢ်ကီး တၢ်အိၣ်ဖှိၣ်ဖးဒိၣ်န့ၣ် ဟ့ၣ်ပှၤတၢ်ခွဲးတၢ်ယာ်လၢ ပကဘူၣ်ထီၣ်ဘါထီၣ်ဘၣ် ယဟိဝၤယွၤ ဃုာ်ဒီး ပဒီပုၢ်ဝဲၢ်မုၣ်ခွါလၢ အကယၤ လၢအကထိတဖၣ်လီၤ. ပဘၣ်သူၣ်ဘၣ်သး တၢ်ဂ့ၢ်တၢ်ကျိၤတဖၣ်လၢ အမၤစၢၤပှၤ ဒ်သိးပကဘူးဒိၣ်ထီၣ်ဒီး ယဟိဝၤယွၤအဂီၢ်လီၤ. မ့ၢ်တၢ်ဆၢကတီၢ်လၢ ပကထံၣ်လိာ်ဘၣ်ပသးဒီး ပဟံၣ်ဖိဃီဖိ ဒီးပတံၤသကိးတဖၣ်စ့ၢ်ကီးလီၤ. အဃိ ပအဲၣ်ဒိးထီၣ် တၢ်အိၣ်ဖှိၣ်ဖးဒိၣ်သၢသီလၢာ်လီၤ.
ပတကြၢးဆိကမိၣ်ထဲ တၢ်လၢပကဒိးန့ၢ်ဘၣ်အီၤတဖၣ်ဘၣ်. လၢတၢ်န့ၣ်အလီၢ် ပကြၢးဆိကမိၣ်လၢ ပပာ်ဖျါထီၣ်တၢ်အဲၣ်လၢ ပှၤဂၤအဖီခိၣ် ကသ့ဒ်လဲၣ်န့ၣ်လီၤ. (ကလၤ. ၆:၁၀; ဧ့ၤ. ၁၀:၂၄, ၂၅) ပဆိကမိၣ်န့ၢ်တၢ်လၢ ပှၤဂၤအဂီၢ်သ့ခီဖျိ ပအိးထီၣ်န့ၢ်အဝဲသ့ၣ်ပဲတြီ ဒီးပဟံးန့ၢ်တၢ်လီၢ်ထဲလၢ ပလိၣ်ဘၣ်တဖၣ်လီၤ. (ဖံလံး. ၂:၃, ၄) တၢ်အိၣ်ဖှိၣ်ဖးဒိၣ်န့ၣ် ဒုးအိၣ်ထီၣ် တၢ်ခွဲးတၢ်ယာ်လၢ ပကမၤအါထီၣ် တံၤသကိးအဂီၢ်လီၤ. အဃိ တချုးလၢတၢ်အိၣ်ဖှိၣ်ထီၣ်, တၢ်အိၣ်ဖှိၣ်ဝံၤ ဒီးဖဲမုၢ်ဆါခီ တၢ်အိၣ်ဘှံးအဆၢကတီၢ်န့ၣ် ပပာ်လီၤဖီတၢၣ်လၢ ပကတဲသကိးတၢ်ဒီး ပှၤလၢပတသ့ၣ်ညါအီၤတဂၤသ့လီၤ. (၂ ကရံၣ်. ၆:၁၃) တံၤသကိးလၢ ပဒိးန့ၢ်ဘၣ်အီၤလၢ ဖဲန့ၣ်အဆၢကတီၢ်န့ၣ် ကဲထီၣ်ပတံၤသကိး လီၤထူလီၤယိာ်သ့လီၤ. ဖဲပှၤလၢအကွၢ်ပှၤတဖၣ် ထံၣ်ဝဲပပာ်ဖျါထီၣ် တၢ်အဲၣ်နီၢ်နီၢ်အခါ အဝဲသ့ၣ်စ့ၢ်ကီး ကဆၢတဲာ်လီၤအသးလၢ ကဟဲပာ်ဖှိၣ်ထီၣ်အသးဒီးပှၤ ဒီးကဘူၣ်ထီၣ်ဘါထီၣ် ယဟိဝၤယွၤလီၤ.—ယိၤ. ၁၃:၃၅
ကွၢ်တၢ်ဂီၤမူလၢ အခိၣ်တီမ့ၢ်ဝဲ“တၢ်အဲၣ်တၢ်ကွံန့ၣ် တလီၤတူာ်လီၤကာ်ဘၣ်” ဟီၣ်ခိၣ်ဒီဘ့ၣ်တၢ်အိၣ်ဖှိၣ်ဖးဒိၣ် ဒီးစံးဆၢတၢ်သံကွၢ်တဖၣ်အံၤ–
ဖဲ ၂၀၁၉ ဟီၣ်ခိၣ်ဒီဘ့ၣ် တၢ်အိၣ်ဖှိၣ်ဖးဒိၣ်န့ၣ် ဒီပုၢ်ဝဲၢ်လၢ ထံဂၤကီၢ်ဂၤတဖၣ် ဒိးန့ၢ်ဘၣ် တၢ်အဲၣ်ဒ်လဲၣ်.
တၢ်အဲၣ်ဒီး တၢ်ဃူတၢ်ဖိးလၢ ယဟိဝၤယွၤ အပှၤဂီၢ်မုၢ်အကျါန့ၣ် ဘၣ်မနုၤအဃိ လီၤဆီလဲၣ်.
ပှၤပၢဆှၢတၢ်ကမံးတံာ် ပာ်ဖျါထီၣ်ဝဲ ခရံာ်ဖိ အတၢ်အဲၣ်တၢ်ကွံအဂ့ၢ်ဒ်လဲၣ်.
လၢတၢ်အိၣ်ဖှိၣ်ဖးဒိၣ်န့ၣ် နပာ်ဖျါထီၣ် တၢ်အဲၣ်တၢ်ကွံကသ့ဒ်လဲၣ်
ခရံာ်ဖိ အတၢ်အဲၣ်တၢ်ကွံ မၤဃူမၤဖိး ပဒီပုၢ်ဝဲၢ်လၢ ကီၢ်ကၠၢမနံၣ် ဒီးကလံၤထံး ခိၣ်ရံယါတဖၣ်ဒ်လဲၣ်.
ပကြၢးဆၢတဲာ်လီၤပသးဒ်လဲၣ်.