“ယဟိဝၤယွၤ တသးပ့ၤနီၣ်ယၤဘၣ်”

ယအိၣ်ဖျဲၣ်ထီၣ်ဖဲ ၁၉၈၃ လီၤ. ဖဲယအိၣ်ဖျဲၣ်ထီၣ်အခါန့ၣ်​ ယတၢ်အိၣ်ဆူၣ်အိၣ်ချ့ ဂ့ၤဝဲလီၤ. ဘၣ်ဆၣ်​ ဖဲယအိၣ်အနံၣ်​ ၁၀ အခါ ယမိၢ်ပှၢ်ဒီတဂၤန့ၣ်​ ဆါဝဲဒိၣ်မးလီၤ. ခံနံၣ်ဝံၤအလီၢ်ခံ ဘၣ်တဂီၤယပၢၢ်ထီၣ်​ ဒီးယဟူးထီၣ်တန့ၢ်လၢၤဘၣ်. ယဂုာ်ကျဲးစၢး မၤဟူးယခီၣ်​ ဘၣ်ဆၣ်​ ယမၤဟူးအီၤတန့ၢ်လၢၤဘၣ်. စးထီၣ်ဖဲန့ၣ်​ အလီၢ်ခံ ယဟးတသ့လၢၤဘၣ်. ယတၢ်အိၣ်ဆူၣ်အိၣ်ချ့ တဂ့ၤဘၣ်အဃိ ယနီၢ်တဒိၣ်ထီၣ်လၢၤဘၣ်. ခဲအံၤစ့ၢ်ကီး ယနီၢ်ဆံးဒ်ဖိသၣ်အသိးလီၤ.

ယဆိက့ဒီး ယဟးတသ့ဘၣ်​ စှၤကိာ်လါဝံၤအလီၢ်ခံ ယဟိဝၤပှၤအုၣ်အသးခံဂၤ ဟဲလၢယဟံၣ်လီၤ. ညီနုၢ် ဖဲပှၤတမှံၤဟဲဟးလၢ ယဟံၣ်အခါ ယအိၣ်ခူသူၣ်​ ဘၣ်ဆၣ်​ တၢ်တနံၤန့ၣ်​ ယတဲတၢ်ဒီအဝဲသ့ၣ်လီၤ. အဝဲသ့ၣ်တဲပၠးယၤ ပၤရဒံစူးအဂ့ၢ် ဒီးယသ့ၣ်နီၣ်ထီၣ်က့ၤလၢ ဖဲယအိၣ်ယဲၢ်နံၣ်အခါ ယနၢ်ဟူဘၣ်တၢ်ဂ့ၢ်အံၤလီၤ. ဖဲန့ၣ်အဆၢကတီၢ် မံးၡ့ၣ်နရ့ၣ်​ လၢမ့ၢ်ဝဲ ကၠ့ဟိၣ်​ အိၣ်လၢ စူရံနၤမံ ဟဲအိၣ်သကိး ပသဝီတလါတဘျီဒီး အမၤလိလံာ်စီဆှံဒီးယပါလီၤ. ကၠ့ဟိၣ်​ ရ့ဒီးယၤလၢ တၢ်အဲၣ်တၢ်ကွံပူၤအဃိ ယအဲၣ်အီၤဒိၣ်မးလီၤ. တဘျီတခီၣ်​ ယဖံယဖုလဲၤကိးယၤလၢ ယဟိဝၤပှၤအုၣ်အသး အတၢ်အိၣ်ဖှိၣ်လၢ အအိၣ်လၢပသဝီအပူၤလီၤ. အဃိ ဖဲ ဖြီရ့ၤ ဟဲဟးလၢယအိၣ်ဒီးသံကွၢ်ယၤလၢ ယအဲၣ်ဒိးမၤလိအါထီၣ်လံာ်စီဆှံဧါအခါ ယတဲဆၢက့ၤအီၤလၢ ယအဲၣ်ဒိးမၤလိလီၤ.

ဖြီရ့ၤ ဒီးအဝၤ ကၠၢစထၢၤ ဟဲစးထီၣ်မၤလိယၤ လံာ်စီဆှံလီၤ. ဖဲအဝဲသ့ၣ်သ့ၣ်ညါဝဲလၢ ယဖးလံာ်တဘၣ်ဘၣ်အခါ အဝဲသ့ၣ်မၤစၢၤယၤဒ်သိး ယဖးလံာ်ကသ့ထီၣ်အဂီၢ်လီၤ. တယံာ်ဘၣ်ဒီး ယဖးလံာ် သ့ထီၣ်ဝဲလီၤ. ဘၣ်တနံၤ ပှၤဒီမါဝၤခံဂၤအံၤ တဲဘၣ်ယၤလၢ အဝဲသ့ၣ်မူဒါလီၤဘၣ်လၢ စူရံနၤမံ လီၤ. ယသးဘၣ်ဒိ မ့ၢ်လၢပှၤလၢအအိၣ်လၢ အီရံၤအဲလၤ လၢကဆဲးမၤလိယၤလံာ်စီဆှံန့ၣ်​ တအိၣ်နီတဂၤလၢၤဘၣ်. ဘၣ်ဆၣ်​ ယသးခုဒံး မ့ၢ်လၢ ယဟိဝၤယွၤန့ၣ်​ တသးပ့ၤနီၣ်ယၤဘၣ်အဃိလီၤ.

တယံာ်ဘၣ်ဒီး ပှၤလဲၤလၢညါလၢအမ့ၢ် ဖြီၣ်​ ဟဲတုၤလၢ အီရံၤအဲလၤ ဒီးဖဲအဟးစံၣ်တဲၤတဲလီၤတၢ်အခါ အဝဲထံၣ်လိာ်သးဒီးယၤလီၤ. ဖဲအတဲပၠးယၤလံာ်စီဆှံအခါ ယနံၤကမှံထီၣ်လီၤ. အဝဲသံကွၢ်ယၤလၢ “ဘၣ်မနုၤအဃိ နနံၤထီၣ်လဲၣ်.” ယတဲဘၣ်အီၤလၢ ယမၤလိလံာ်ဘရိၣ်ခၠၣ်လၢအမ့ၢ် ကစၢ်ယွၤဃ့တၢ်လၢပအိၣ်န့ၣ်​ မ့ၢ်မနုၤလဲၣ်​ ဒီးယစးထီၣ်မၤလိ လံာ်လၢအမ့ၢ် Knowledge That Leads to Everlasting Lifea လံလီၤ. ဒီးယတဲဘၣ်အီၤလၢ ဘၣ်မနုၤအဃိ ယဘၣ်ပတုာ်မၤလိ လံာ်စီဆှံလဲၣ်န့ၣ်လီၤ. ဖြီၣ်​ စးထီၣ်မၤလိက့ၤယၤလံာ် Knowledge လီၤ. ဘၣ်ဆၣ်​ လၢခံအီၤစ့ၢ်ကီး အလီၤဘၣ်က့ၤ မူဒါလၢတၢ်လီၢ်အဂၤလီၤ. အဃိ ပှၤကသိၣ်လိယၤ လံာ်စီဆှံန့ၣ်​ တအိၣ်လၢၤဘၣ်.

ဘၣ်ဆၣ်​ ဖဲ ၂၀၀၄ န့ၣ်​ ပှၤလဲၤလၢညါလီၤဆီခံဂၤ လၢအမ့ၢ် ကြဲဘ့လ် ဒီး ကၠါၡဝၤ န့ၣ်လီၤဘၣ်မူဒါလၢ အီရံၤအဲလၤ လီၤ. ဖဲအဝဲသ့ၣ်ဟးစံၣ်တဲၤတဲလီၤတၢ်အခါ အဝဲသ့ၣ်ထံၣ်ယၤလီၤ. ဒီးဖဲအဝဲသ့ၣ်သံကွၢ်ယၤလၢ နအဲၣ်ဒိးမၤလိလံာ်စီဆှံဧါအခါ ယနံၤကမှံထီၣ်လီၤ. ယတဲအဝဲသ့ၣ်လၢ ယအဲၣ်ဒိးမၤလိ လံာ် Knowledge လၢအခီၣ်ထံးလီၤ. ယအဲၣ်ဒိးသ့ၣ်ညါလၢ မ့ၢ်အဝဲသ့ၣ်​ ကသိၣ်လိယၤဒ် ပှၤလၢညါတဖၣ်သိၣ်လိတ့ၢ်ယၤ အသိးဧါန့ၣ်လီၤ. ကြဲဘ့လ် တဲယၤလၢ ပှၤမၤတၢ်အိၣ်ဖှိၣ်လၢ သဝီပူၤလီၤ. ယတဟးထီၣ်ဘၣ်လၢ ယဟံၣ်န့ၣ်အိၣ်လၢ အနံၣ်တဆံလံ ဘၣ်ဆၣ်​ ယအဲၣ်ဒိးလဲၤထီၣ်တၢ်အိၣ်ဖှိၣ်လီၤ. အဃိ ကြဲဘ့လ် ဟဲအိၣ်ယၤ ဒီးအဝဲပာ်လီၤယၤလၢ လ့ၣ်ဆီၣ်လိၤ ဒီးအဝဲလဲၤဆီၣ်ယၤလၢ ဘီမုၢ်ဘျီၣ်ဒိၣ်လီၤ.

လၢခံ ကြဲဘ့လ် ဟ့ၣ်ဂံၢ်ဟ့ၣ်ဘါယၤလၢ ယကပၣ်ဃုာ်လၢ တၢ်စံၣ်တဲၤတဲလီၤတၢ်ကၠိလီၤ. အဝဲတဲဝဲလၢ “နဟးတသ့ဘၣ်​ သနာ်က့ နကတိၤတၢ်သ့လီၤ. မုၢ်ကအိၣ်ဝဲတနံၤ နကဟ့ၣ်လီၤ ကမျၢၢ်တၢ်စံၣ်တဲၤတဲလီၤလီၤ. နမၤအီၤကသ့ သပှၢ်ကတၢၢ်လီၤ.” အတၢ်ဟ့ၣ်ဂံၢ်ဟ့ၣ်ဘါန့ၣ်​ မၤစၢၤယၤလၢ ယကအိၣ်ဒီး တၢ်နာ်န့ၢ်လီၤသးလီၤ.

ယစးထီၣ်ဟးစံၣ်တဲၤတဲလီၤတၢ်ဒီး ကြဲဘ့လ် လီၤ. ဘၣ်ဆၣ်​ ကျဲလၢသဝီပူၤအါတက့ၢ်န့ၣ်​ တဂ့ၤဘၣ်​ အဃိ တညီလၢ ယကဟးဒီးလ့ၣ်ဆီၣ်ဘၣ်. အဃိ ယမၢ ကြဲဘ့လ် ဆီၣ်က့ၤယၤလၢ လ့ၣ်ဆီၣ်လၢအပၣ်အိၣ်ထဲ တခါအလိၤလီၤ. ပမၤဒ်အံၤအဃိ ပဟးစံၣ်တဲၤတဲလီၤဘၣ်တၢ် ဂ့ၤဂ့ၤလီၤ. ဖဲ ၂၀၀၅ န့ၣ်​ ယဒိးဘျၢထံလီၤ. တယံာ်ဘၣ်ဒီး ဒီပုၢ်ဝဲၢ်ခွါတဖၣ်​ သိၣ်လိယၤလၢ ယကကွၢ်ထွဲ တၢ်အိၣ်ဖှိၣ်အလံာ်လဲၢ် ဒီးဘီမုၢ်ဘျီၣ်ဒိၣ်​ အတၢ်ကလုၢ်ဒၢလီၤ.

လၢခံဖဲ ၂၀၀၇ န့ၣ်​ ယပၢ်သံဝဲခီဖျိလၢ ကဘီဟးဂီၤ သတူၢ်ကလာ်အဃိလီၤ. ပဟံၣ်ဖိဃီဖိသးဟးဂီၤဒိၣ်မးလီၤ. ကြဲဘ့လ် ဃ့ဘါထုကဖၣ်တၢ်ဒီးပှၤ ဒီးဟ့ၣ်ဂံၢ်ဟ့ၣ်ဘါပှၤလၢ လံာ်စီဆှံလီၤ. ခံနံၣ်ဝံၤအလီၢ်ခံ ပထံၣ်ဘၣ်ကဒီး တၢ်လၢအမၤဘၣ်ဒိ ပသးဒိၣ်မးလီၤ. ဒီပုၢ်ဝဲၢ်ခွါ ကြဲဘ့လ် သံဝဲလၢ ကဘီဟးဂီၤ သတူၢ်ကလာ်လီၤ.

ပတၢ်အိၣ်ဖှိၣ်ဆံးဆံးဖိတဖျၢၣ်အံၤ တၢ်အိၣ်ဖှိၣ်သးပှၢ်တအိၣ်လၢၤဘၣ်, အိၣ်တ့ၢ်က့ၤထဲ တၢ်အိၣ်ဖှိၣ်အပှၤမၤစၢၤတၢ်တဂၤလီၤ. ကြဲဘ့လ် သံန့ၣ်ယသးဘၣ်ဒိဒိၣ်မး အဝဲမ့ၢ် ယတံၤသကိးလၢ ယမုာ်ဒီးအီၤအဒိၣ်ကတၢၢ်လီၤ. အဝဲမၤစၢၤယၤဒ်သိး ယကဘူးထီၣ်ဒီး ယဟိဝၤယွၤ တကးဒံးဘၣ်​ အမၤစၢၤစ့ၢ်ကီးယၤလၢ ယတၢ်လိၣ်ဘၣ်လၢအဂၤတဖၣ်လီၤ. ဖဲအသံဝံၤအလီၢ်ခံ ပထီၣ်တၢ်အိၣ်ဖှိၣ်အခါန့ၣ်​ ယဒိးန့ၢ်ဘၣ်မူဒါလၢ ယဘၣ်ဖး တၢးထီခိးတၢ် တၢ်မၤလိလီၤ. ဖဲယဖးအီၤဝံၤ ခံဆၢအခါ ယစးထီၣ်ဟီၣ်ဒီး ယမဲာ်ထံလီၤဝဲ တကတၢၢ်လၢၤဘၣ်. အဃိ ယစံၢ်လီၤက့ၤလၢ ပျဲၢ်စီၢ်ခိၣ်လီၤ.

ဖဲဒီပုၢ်ဝဲၢ်ခွါတဖၣ်လၢ တၢ်အိၣ်ဖှိၣ်အဂၤ ဟဲမၤစၢၤဝဲပတၢ်အိၣ်ဖှိၣ်လၢ အီရံၤအဲလၤ အခါ ယသးခုထီၣ်က့ၤဝဲလီၤ. တကးဒံးဘၣ်​ လၢဝဲၤတြၢ်အရူန့ၣ်​ ပှၤဆှၢလီၤ ဒီပုၢ်ဝဲၢ်ခွါ ခိကၠိၤ လၢအမ့ၢ်ပှၤလဲၤလၢညါလီၤဆီလီၤ. ယသးခုဒိၣ်မးလၢ ယမိၢ် ဒီးယပုၢ် စးထီၣ်မၤလိလံာ်စီဆှံ ဒီးဒိးဘျၢထံလီၤ. ဖဲ ၂၀၁၅ လါမၢ်ၡး ၁ သီန့ၣ်​ ယကဲထီၣ်​ တၢ်အိၣ်ဖှိၣ်အပှၤမၤစၢၤတၢ်တဂၤလီၤ. တယံာ်ဘၣ်ဒီး ယဟ့ၣ်လီၤဘၣ်​ ကမျၢၢ်တၢ်စံၣ်တဲၤတဲလီၤတၢ် အဆိကတၢၢ်တဘျီလီၤ. ဖဲတၢ်တနံၤန့ၣ်​ ယနံၤကမှံထီၣ်ဒီး ယမဲာ်ထံထီၣ်ဝဲ မ့ၢ်လၢယနီၣ်ဘၣ်က့ၤ ဒီပုၢ်ဝဲၢ်ခွါ ကြဲဘ့လ် အတၢ်ကတိၤလၢ အတဲတ့ၢ်ယၤလၢ အပူၤကွံာ်အနံၣ်တဖၣ်န့ၣ်လၢ “မုၢ်ကအိၣ်ဝဲတနံၤ နကဟ့ၣ်လီၤ ကမျၢၢ်တၢ်စံၣ်တဲၤတဲလီၤလီၤ. နမၤအီၤကသ့သပှၢ်ကတၢၢ်လီၤ.”

လၢ JW တၢ်ဂီၤမူတၢ်ရဲၣ်တၢ်ကျဲၤအပူၤန့ၣ်​ ယထံၣ်ဘၣ်လၢ ပဒီပုၢ်ဝဲၢ်မုၣ်ခွါလၢ အတၢ်အိၣ်မူ လၢအလီၤဂာ်ဒီးယၤ အိၣ်ဝဲလီၤ. အဝဲသ့ၣ်အိၣ်တဆူၣ်ဘၣ်​ သနာ်က့ အဝဲသ့ၣ်မၤတၢ် ကဲထီၣ်လိၣ်ထီၣ်ဝဲ အါမံၤဒီး အဝဲသ့ၣ်သးခုလီၤ. ယၤစ့ၢ်ကီး ယမၤတၢ်သ့ဒံးအါမံၤလီၤ. ယအဲၣ်ဒိး မၤယဟိဝၤယွၤအတၢ်မၤလၢ အဂ့ၤကတၢၢ် အဃိ ယစးထီၣ်မၤဝဲ ပှၤလဲၤလၢညါလီၤ. ဒီးယကမၢကမၣ်ဒိၣ်မးလၢ ဖဲ ၂၀၁၉ လါစဲးပတ့ဘၢၣ် န့ၣ်​ ယကဲထီၣ်ဘၣ်​ တၢ်အိၣ်ဖှိၣ်သးပှၢ် ဒီးပတၢ်အိၣ်ဖှိၣ်န့ၣ်​ ပှၤစံၣ်တဲၤတဲလီၤတၢ်ဖိကအိၣ်ဝဲ အဂၤ ၄၀ ဃၣ်ဃၣ်လီၤ.

ယစံးဘျုးဘၣ်​ ယဒီပုၢ်ဝဲၢ်မုၣ်ခွါတဖၣ်ဒိၣ်မး မ့ၢ်လၢ အဝဲသ့ၣ်သိၣ်လိယၤလံာ်စီဆှံ ဒီးမၤစၢၤယၤလၢ ယကမၤယဟိဝၤယွၤ အတၢ်မၤအဂီၢ်လီၤ. တကးဒံးဘၣ်​ တၢ်လၢ ယပာ်လုၢ်ပာ်ပှ့ၤအီၤအဒိၣ်ကတၢၢ်န့ၣ်​ မ့ၢ်ဝဲယဟိဝၤယွၤ တသးပ့ၤနီၣ်ယၤ နီတဘျီဘၣ်.