နသ့ၣ်ညါဧါ
ဖဲတၢ်မၢဖိအစိၤန့ၣ် ဆၣ်ဖိကီၢ်ဖိလၢ ပှၤဟ့ၣ်လုၢ်ထီၣ်ဝဲတဖၣ် အသွံၣ်န့ၣ် ပှၤလုၢ်တၢ်ဒိၣ်တဖၣ် မၤဝဲဒ်လဲၣ်
လၢညါ လၢကီၢ်အံၣ်စရ့လး အပူၤန့ၣ် ပှၤလုၢ်တၢ်ဒိၣ်တဖၣ် လၢအမၤတၢ်ဖဲ တၢ်လုၢ်ဟံၣ်န့ၣ် ဟ့ၣ်လုၢ်ထီၣ်ဝဲ ဆၣ်ဖိကီၢ်ဖိလၢ တၢ်လုၢ်လီၢ်အလိၤ ကိးနံၣ်ဒဲး. ကၠိၤစံဖၢၤ လၢအကဲ ပှၤလၢအကွဲး ပှၤယူဒၤဖိ အတၢ်စံၣ်စိၤတဲစိၤန့ၣ် ကွဲးဖျါထီၣ်ဝဲလၢ ဖဲပှၤမၤ ဘူၣ်လဲၤကပာ်အခါ ပှၤလုၢ်ထီၣ်ဝဲ သိဖိအဒု ၂၅၀,၀၀၀ ဘျဲၣ်. အဃိ လၢတၢ်လုၢ်လီၢ် အလိၤန့ၣ် တၢ်သွံၣ်ယွၤလီၤဝဲအါမး. (၃ မိၤ ၁:၁၀, ၁၁; ၄ မိၤ ၂၈:၁၆, ၁၉) တၢ်သွံၣ်တဖၣ်န့ၣ် အလဲၤယွၤလီၤကွံာ်ဖဲလဲၣ်.
ပှၤကူၣ်ဘၣ်ကူၣ်သ့လၢ စဲအ့ၣ်တကပၤ ခူၣ်ဝဲတၢ်လီၢ်လၢ အအိၣ်ဘူးဒီး တၢ်လုၢ်ဟံၣ်လၢ စီၤဟ့ၤရိာ် တ့ထီၣ်ဝဲ. ဒီးဖဲန့ၣ် အဝဲသ့ၣ် ထံၣ်န့ၢ်ဝဲ တၢ်အကျိၤလၢ ပှၤဒုးယွၤလီၤကွံာ် တၢ်ထံတၢ်နိ. အဃိ ဆၣ်ဖိကီၢ်ဖိတဖၣ် အသွံၣ်န့ၣ် ယွၤလီၤဝဲလၢ တၢ်အကျိၤအံၤ ဒီးဟးထီၣ်ကွံာ်လၢ တၢ်လုၢ်ဟံၣ်အချၢ.
ဒ်သိးတၢ်လုၢ်လီၢ် ကကဆှီထီဘိအဂီၢ် ပှၤမၤဝဲဒ်လဲၣ်. ဆိကမိၣ်ကွၢ် တၢ်ဂ့ၢ်ခံထံၣ်–
တၢ်ပူၤဟိတဖၣ်လၢ တၢ်လုၢ်လီၢ် အနၢၣ်ထံး– လံာ်လၢပျၢၤတဘ့ၣ် လၢအဘၣ်ဃးဒီး ပှၤယူဒၤဖိ အတၢ်သိၣ်တၢ်သီ ဒီးအလုၢ်အလၢ် လၢပှၤကွဲးဝဲဖဲ အနံၣ် ၂၀၀ ဝံၤအလီၢ်ခံန့ၣ် ကွဲးဖျါထီၣ်ဝဲ ဘၣ်ဃးဒီး တၢ်ပူၤအကျိၤလၢ ဟီၣ်ခိၣ်လာ်အဂ့ၢ်. လံာ်တဘ့ၣ်န့ၣ် တဲဝဲလၢ “ဖဲတၢ်လုၢ်လီၢ် အနၢၣ်ထံးန့ၣ် တၢ်ပူၤဟိအိၣ်ဝဲခံခါ. ဆၣ်ဖိကီၢ်ဖိအသွံၣ် ဒီးထံလၢ ပှၤသ့ကဆှီကွံာ် တၢ်လုၢ်လီၢ်န့ၣ် ယွၤလီၤဝဲလၢ တၢ်ပူၤဟိခံခါလၢာ် ဒီးဆဲးယွၤလီၤဝဲ တုၤလၢ ကံဒြိၣ်အတၢ်တြီၤပူၤ.”
ပှၤစဲအ့ၣ်ဖိတဖၣ် တဲစ့ၢ်ကီးဝဲလၢ “တၢ်ပူၤဟိတဖၣ်အံၤ” ပှၤသူဝဲလၢ ကဒုးယွၤလီၤကွံာ် တၢ်သွံၣ်အဂီၢ်. ဒီးလံာ်လၢ အဘၣ်ဃးဒီး ပှၤယူဒၤဖိ အတၢ်စံၣ်စိၤတဲစိၤ (The Cambridge History of Judaism) ပာ်ဖျါထီၣ်စ့ၢ်ကီးလၢ ပှၤစဲအ့ၣ်ဖိတဖၣ် ထံၣ်န့ၢ်ဝဲ ထံကျိၤတဖၣ်လၢ အအိၣ်ဘူးဒီး တၢ်လုၢ်ဟံၣ်. ဒီးလံာ်အံၤ တဲဝဲလၢ “ဖျါလၢ ထံကျိၤတဖၣ်အံၤ ပှၤသူဝဲဒ်သိး ကဒုးယွၤလီၤကွံာ် ဆၣ်ဖိကီၢ်ဖိအသွံၣ် ဒီးထံလၢပှၤမၤကဆှီ တၢ်လုၢ်လီၢ်.”
ထံအိၣ်ဝဲအါအါ– ဒ်သိးပှၤလုၢ်တၢ်ဒိၣ်တဖၣ် ကမၤကဆှီ တၢ်လုၢ်လီၢ် ဒီးတၢ်သွံၣ်ဒီးထံ ယွၤလီၤလၢ တၢ်အကျိၤ ကညီအဂီၢ် အဝဲသ့ၣ် လိၣ်ဘၣ်ဝဲထံအါအါ. အဃိ ထံလၢအကဆှီန့ၣ် အဝဲသ့ၣ် န့ၢ်ဘၣ်ဝဲလၢ ဝ့ၢ်ယရူၤၡလ့ၣ်အပူၤ. ထံလၢအဝဲသ့ၣ် န့ၢ်ဘၣ်ဝဲန့ၣ် အဟဲလၢ ထံကျိၤတဖၣ်, ကမါပူၤ ဒီးလၢထံကမျၢ. ပှၤစဲအ့ၣ်ဖိ ကၠိစဲး ဖဲထြံး တဲဝဲလၢ “ဖဲန့ၣ်အခါ တၢ်လုၢ်ဟံၣ်အဂၤလၢ အအိၣ်ဒီး ထံကျိၤလၢ အဒိးန့ၢ်ဘၣ် ထံကဆှီ ဒီးတၢ်ရဲၣ်တၢ်ကျဲၤလၢ ကမၤကဆှီကွံာ် ထံဘၣ်အၢဒီးတၢ်သွံၣ် ဒ်အံၤန့ၣ် တအိၣ်နီတဖျၢၣ်ဘၣ်.”