နကနာ် ဖဲလဲၣ်တခါလဲၣ်
ဖဲ ၂၀၁၀ န့ၣ် စတံၤဖ့ၣ် ဟီခ့ ဒီးလံၤဧိၤနၣ် မလိၤဒံနီၤ လၢအကဲ ပှၤကူၣ်ဘၣ်ကူၣ်သ့လၢ အဃုသ့ၣ်ညါ မူခိၣ်ဟီၣ်ခိၣ်ဒီး တၢ်အိၣ်လၢအပူၤအဂ့ၢ် တဲဝဲလၢ— “မူခိၣ်ဟီၣ်ခိၣ်ဒီး တၢ်အိၣ်လၢအပူၤန့ၣ် ဟဲအိၣ်ထီၣ်သးလၢ အကစၢ်ဒၣ်ဝဲသ့.”
လံာ်စီဆှံတဲဝဲ “လၢအခီၣ်ထံးန့ၣ် ကစၢ်ယွၤတ့လီၤ မူခိၣ်ဒီးဟီၣ်ခိၣ်လီၤ.”—၁ မိၤၡ့ ၁:၁.
မူခိၣ်ဟီၣ်ခိၣ်ဒီး တၢ်အိၣ်လၢအပူၤန့ၣ် ဟဲအိၣ်ထီၣ်သးလၢ အကစၢ်ဒၣ်ဝဲဧါ မ့တမ့ၢ် ကစၢ်ယွၤ တ့လီၤဝဲဧါ. တၢ်လၢ ပှၤကူၣ်ဘၣ်ကူၣ်သ့ခံဂၤ တဲဝဲ ဒီးတၢ်လၢ လံာ်စီဆှံတဲဝဲန့ၣ် ပာ်ဖျါန့ၢ်ပှၤ တၢ်ထံၣ်လၢ အလီၤဆီလိာ်သးဒိၣ်မး. ပှၤတနီၤ နာ်ဝဲတၢ်လၢ ပှၤကူၣ်ဘၣ်ကူၣ်သ့ခံဂၤ တဲဝဲ ဒီးတနီၤန့ၣ် နာ်ဝဲတၢ်လၢ လံာ်စီဆှံတဲဝဲ. မ့မ့ၢ် ပှၤအဂၤတနီၤန့ၣ် တၢ်ထံၣ်ခံခါအံၤ အဘၣ်ဖဲလဲၣ်တခါလဲၣ်န့ၣ် တသ့ၣ်ညါဝဲ လီၤတံၢ်ဘၣ်. ဒီးတၢ်ဂီၤမူ ဒီးလံာ်လဲၢ်လၢ အမံၤဟူသၣ်ဖျါန့ၣ် ပာ်ဖျါထီၣ်ဝဲလၢ ပှၤအါဂၤတဲအါလိာ်သး ဘၣ်ဃးဒီး တၢ်ဂ့ၢ်တခါအံၤ.
ဘၣ်သ့ၣ်သ့ၣ် လၢကၠိန့ၣ် နသရၣ်တဖၣ် ကသိၣ်လိနၤလၢ မူခိၣ်ဟီၣ်ခိၣ်ဒီး တၢ်အိၣ်လၢအပူၤန့ၣ် ဟဲအိၣ်ထီၣ်သးလၢ အကစၢ်ဒၣ်ဝဲ ဒီးတၢ်ဘၣ်တ့ကစၢ် တအိၣ်ဘၣ်. ဘၣ်ဆၣ် အဝဲသ့ၣ် ဒုးနဲၣ်နၤ တၢ်အုၣ်သးသ့ဧါ. ဘၣ်သ့ၣ်သ့ၣ် နကနၢ်ဟူဘၣ် တၢ်ဘူၣ်တၢ်ဘါခိၣ်နၢ်တဖၣ် သိၣ်လိဝဲလၢ တၢ်ဘၣ်တ့ကစၢ် အိၣ်ဝဲ. ဘၣ်ဆၣ် အဝဲသ့ၣ် ဒုးနဲၣ်နၤ တၢ်အုၣ်သးသ့ဧါ. မ့တမ့ၢ် အဝဲသ့ၣ် တဲနၤလၢ နကနာ် တၢ်ဘၣ်တ့ကစၢ်အဂီၢ် နတလိၣ်ဘၣ် တၢ်အုၣ်သးဘၣ်ဧါ.
နၤစ့ၢ်ကီး ဘၣ်သ့ၣ်သ့ၣ် နကဆိကမိၣ် ဘၣ်ဃးဒီး တၢ်ဂ့ၢ်အံၤ. ဘၣ်သ့ၣ်သ့ၣ် နကဆိကမိၣ်လၢ တၢ်ဘၣ်တ့ကစၢ် အိၣ်ဧါတအိၣ်ဧါန့ၣ် ပှၤတသ့ၣ်ညါဝဲလီၤတံၢ် နီတဂၤဘၣ်. အဃိ နကဆိကမိၣ်ဘၣ်လၢ နမ့ၢ်သ့ၣ်ညါ တၢ်စံးဆၢမ့ၢ်ဂ့ၤ တသ့ၣ်ညါဘၣ်မ့ၢ်ဂ့ၤ အရ့တဒိၣ်ဘၣ်.
ပၢၢ်ထီၣ် မဲးကစံတဘ့ၣ်အံၤ ကပာ်ဖျါန့ၢ်ပှၤ တၢ်အုၣ်သးတနီၤလၢ အမၤစၢၤ ပှၤအါဂၤဒ်သိး အဝဲသ့ၣ်ကနာ်လၢ တၢ်ဘၣ်တ့ကစၢ် အိၣ်ဝဲ. ဒီးအကပာ်ဖျါစ့ၢ်ကီး ဘၣ်မနုၤအဃိ အရ့ဒိၣ်လၢ ပကသ့ၣ်ညါ တၢ်စံးဆၢ ဘၣ်ဃးဒီး တၢ်သးသမူ လၢဟီၣ်ခိၣ်ချၢ အိၣ်ထီၣ်သး ဒ်လဲၣ်အဂ့ၢ်.