ယိၤသးအဝဲၢ်တဖၣ် သးဟ့အီၤ အဂ့ၢ်

ကွၢ်ပိာ်ခွါဖိသၣ်အံၤတက့ၢ်. အသးအုးဒီးအသးဟးဂီၤဝဲဒိၣ်မးန့ၣ်လီၤ. အဝဲဒၣ်မ့ၢ်ယိၤသးလီၤသၢၣ်. အဝဲၢ်တဖၣ်ဆါလီၤ ကွံာ်အီၤဆူ ပှၤလၢအလဲၤတၢ်ဆူ ကီၢ်အဲၤကူပတူးအစုပူၤခဲအံၤဖိန့ၣ်လီၤ. ယိၤသးဖိအံၤ မ့ၢ်လဲၤတုၤဆူကီၢ်အဲၤကူပတူးန့ၣ် ကကဲဘၣ်ပှၤအကုၢ်လီၤ. ဘၣ်မနုၤလၢအဝဲၢ်တဖၣ် ဘၣ်မၤဝဲတၢ်မၤအၢအၢသီသီထဲအံၤန့ၣ်လဲၣ်. မ့ၢ်လၢအသးကါယိၤသးအဃိလီၤသၢၣ်.

အဝဲသ့ၣ်အပါပၢ်ယၤကိာ်န့ၣ် အဲၣ်ဝဲယိၤသးဒိၣ်မးန့ၣ်လီၤ. လၢတၢ်ကွၢ်မဲာ်အီၤအပူၤ ဆးန့ၢ်ဝဲဆ့အဃံလၤဒိၣ်မးတဘ့ၣ် လၢအဂီၢ်န့ၣ်လီၤ. အဝဲၢ်အဂၤ ၁၀ တခီ ထံၣ်ဘၣ်ဝဲလၢ ယၤကိာ်အဲၣ်ယိၤသးထဲအံၤအဃိ တၢ်သးက့ၣ်, ဒီးတၢ်သးဟ့တဖၣ် အိၣ်ထီၣ်ဝဲလၢ ယိၤသးအဖီခိၣ်န့ၣ်လီၤသၢၣ်. အဝဲသ့ၣ်သးဟ့အီၤ တၢ်ဂ့ၢ်အိၣ်ဒံးအဂၤတမံၤန့ၣ်လီၤ.

ယိၤသးမံမီၢ်တၢ်မံမီၢ်ခံခါ. လၢအတၢ်မံမီၢ်ခံခါလိာ်အပူၤန့ၣ် အဝဲၢ်တဖၣ် ဘၣ်တီၤလီၤကဒွံကျိာ်လၢအမဲာ်ညါန့ၣ်လီၤ. ဖဲယိၤသးတဲဘၣ် အတၢ်မံမီၢ်ခံခါဆူအဝဲၢ်တဖၣ်အခါ အဝဲသ့ၣ် သးဟ့အီၤဒံးယံာ်ဒံး အါထီၣ်တခီလီၤ.

ဘၣ်မုၢ်တနံၤ ဖဲယိၤသးအဝဲၢ်တဖၣ် ကွၢ်အပါပၢ်အသိတဖၣ်အခါ ယၤကိာ်မၢယိၤသးလဲၤကွၢ် မ့ၢ်အဝဲၢ်တဖၣ်အိၣ်ဝဲသ့ၣ်ဒ်လဲၣ်န့ၣ်လီၤ. ယိၤသးအဝဲၢ်တဖၣ်တုၤအထံၣ်လၢ ယိၤသးဟဲအခါန့ၣ် လၢအကျါပှၤတနီၤစံးဝဲဒၣ်လၢ ‘ပကမၤသံအီၤ’ န့ၣ်လီၤ. ဘၣ်ဆၣ်သနာ်က့ အဝဲၢ်အဒိၣ်ကတၢၢ်ရူၤဘ့ၣ်တခီ တြီဝဲလၢသုတမၤဒ်အံၤတဂ့ၤလီၤ. ထဲန့ၣ်ဒီး ဖီၣ်ယိၤသးဝံၤတ့ၢ်လီၤဝဲဆူ ထံပူၤလၢအတအိၣ်ဒီးထံ အပူၤန့ၣ်လီၤ. လၢတၢ်န့ၣ်အလီၢ်ခံ ဆ့ၣ်နီၤတၢၣ်ပီၣ်လိာ်အသးလၢ ကဘၣ်မၤယိၤသးဒ်လဲၣ်န့ၣ်လီၤ.

ဖဲဆၢကတီၢ်အံၤန့ၣ် ပှၤယံးၡမၤဧ့လးဖိတဖၣ် ဟဲဝဲသ့ၣ်လီၤ. တုၤနုၤတစု ယူဒၤတဲဘၣ် အဒီပုၢ်ဝဲၢ်တဖၣ်လၢ, ‘မ်ပကဆါလီၤသကိးအီၤဆူ ပှၤယံးၡမၤဧ့လးဖိတဖၣ်အစုပူၤတက့ၢ်.’ ဒ်အတဲဝဲသ့ၣ်အသိးန့ၣ် ဆါလီၤကွံာ်ယိၤသးလၢ စ့ခံဆံန့ၣ်လီၤ. အၢဝဲသီဝဲနးနးကျံၤကျံၤမးလဲၣ်.

အဝဲၢ်တဖၣ် မ့ၢ်ကက့ၤတဲဘၣ်အပါပၢ်ဒ်လဲၣ်. အဝဲသ့ၣ်မၤသံမဲာ်တဲးလဲးတဒုဝံၤ ဘျုးလီၤဝဲယိၤသးအဆ့ဂ့ၤဂ့ၤဖိဆူ မဲာ်တဲးလဲးအသွံၣ်ပူၤ ဘျုးဝံၤဘျုးက့ၤန့ၣ်လီၤ. ဝံၤဒီးက့ၤစိာ်ဝဲဆူအပါပၢ်ယၤကိာ်အအိၣ်ဒီး တဲဝဲသ့ၣ် ‘ဖိခွါတဖၣ်ထံၣ်တၢ်အံၤလီၤ. ကွၢ်တဘီပါပၢ်ဧၢ, မ့ၢ်ယိၤသးအဆ့ကၤဧါ, တမ့ၢ်ဘၣ်လဲၣ်ဧါန့ၣ်လီၤ.’

ယၤကိာ်သ့ၣ်ညါဝဲလၢအမ့ၢ် ယိၤသးအဆ့ကၤလီၤသၢၣ်. တဲဝဲဒၣ်လၢ ‘တၢ်မံၤလးတဒုအ့ၣ်သံအီၤလံ’ ဒီးဟီၣ်ဝဲဒၣ်လီၤ. ယိၤသးအဝဲၢ်တဖၣ်န့ၣ် အဲၣ်ဒိးဝဲသ့ၣ်လၢ အပၢ်ကဆိကမိၣ်ဒၣ်ဒ်န့ၣ်လီၤ. ယၤကိာ်အသးအုးနးနးကလဲာ်ဒီး ဟီၣ်ဝဲဒၣ်အနံၤအသီတစှၤဘၣ်. နီၢ်နီၢ်တခီန့ၣ် ယိၤသးတသံဝဲဘၣ်. ဖဲအလဲၤတုၤဝဲအလီၢ်န့ၣ် အဝဲဟဲကဲထီၣ်ဝဲမနုၤလဲၣ်န့ၣ် ပကကွၢ်သကိးတက့ၤ.