ယိၤသးလီၤဆူဃိာ်ပူၤ အဂ့ၢ်

ဖဲယိၤသးလဲၤတုၤဆူကီၢ်အဲၤကူပတူးအခါ အသးအိၣ်ဒံးဒၣ် ၁၇ နံၣ်န့ၣ်လီၤ. ဘၣ်တၢ်ဆါအီၣ်လီၤကွံာ်အီၤဆူ ပှၤလၢတၢ်ကိးအီၤလၢ ပိၤတံၤဖၢ် အအိၣ်န့ၣ်လီၤ. ပိၤတံၤဖၢ်မ့ၢ် အဲၤကူပတူာ်အစီၤပၤ ဖၤရိၤ အပှၤမၤတၢ်ဖိတဂၤလီၤ.

ယိၤသးဖိန့ၣ် ဂုာ်ကျဲးစၢးမၤတၢ်လၢ အကစၢ်ပိၤတံၤဖၢ်အဂီၢ်လီၤ. တုၤနုၤတစု, တုၤယိၤသးဒိၣ်ထီၣ်ဝဲအခါ ပိၤတံၤဖၢ် ဟ့ၣ်စိဟ့ၣ်ကမီၤအီၤလၢ အကပၢဟံၣ်ဒီဖျၢၣ်န့ၣ်လီၤ. မ့မ့ၢ်ဒ်အံၤသၢပျၢၤ ယိၤသးမၤဝဲဒ်လဲၣ်အဃိ ဘၣ်လီၤဆူဃိာ်ပူၤန့ၣ်လဲၣ်. လၢပိၤတံၤဖၢ်အမါအဃိသၢၣ်.

ဖဲယိၤသးဒိၣ်ထီၣ်အခါ ကဲထီၣ်ဝဲပှၤလၢအဒိၣ်တၢ်ဂ့ၤ ဒိၣ်မးတဂၤန့ၣ်လီၤ. ထဲန့ၣ်ဒီး ပိၤတံၤဖၣ်အမါန့ၣ် အဲၣ်ဒိးလၢယိၤသးကဟဲမံဃုာ်ဒီးအီၤလီၤ. ဘၣ်ဆၣ်သနာ်က့ မ့ၢ်မၤဒ်အံၤ ကမၣ်လီၤန့ၣ် ယိၤသးသ့ၣ်ညါဝဲလီၤ. လၢတၢ်န့ၣ်အဃိ တမံဝဲဒီးအီၤဘၣ်. ပိၤတံၤဖၢ်အမါသးထီၣ်ဝဲဒိၣ်မးန့ၣ်လီၤ. လၢတၢ်န့ၣ်အဃိ ဖဲအဝၤဟဲက့ၤတုၤဟံၣ်အခါ ကတိၤလီန့ၢ်အဝၤလီၤ. ကတိၤခဲၣ်ဝဲတၢ်ဒီးစံးဝဲ, ‘ပှၤဟးဂီၤလၢအမ့ၢ်ယိၤသးအံၤ ဂုာ်ကျဲးစၢးဝဲလၢ ကမံဃုာ်ဒီးယၤလီၤ.’ ပိၤတံၤဖၢ်စ့ၢ်ကီး နာ်ဝဲအမါအတၢ်ကတိၤဝံၤ အသးထီၣ်ယိၤသးဒိၣ်မးန့ၣ်လီၤ. လၢတၢ်န့ၣ်အဃိ တ့ၢ်လီၤအီၤဆူဃိာ်ပူၤန့ၣ်လီၤသၢၣ်.

တယံာ်ဘၣ်ဒီး ဃိာ်အမူဒါခိၣ်သ့ၣ်ညါထီၣ်ဝဲဒၣ်လၢ ယိၤသးမ့ၢ်ပှၤအဂ့ၤန့ၣ်လီၤ. လၢတၢ်န့ၣ်အဃိ ပာ်ယိၤသးလၢကပၢ ပှၤဃိာ်ဖိအဂၤခဲလၢာ်န့ၣ်လီၤ. လၢခံန့ၣ် ဖၤရိၤသးထီၣ်ဘၣ်ဝဲ အပှၤကွၢ်တၢ်အီအခိၣ်ဒီး အပှၤကုၢ်ကိၣ်အခိၣ်အဃိ တ့ၢ်လီၤအဝဲသ့ၣ်ဆူဃိာ်ပူၤန့ၣ်လီၤ. ဘၣ်မုၢ်တနၤန့ၣ် အဝဲသ့ၣ်ခံဂၤလိာ်န့ၣ် မံမီၢ်တၢ်မံမီၢ်လၢအလီၤဆီ တဂၤတခါစုာ်စုာ်လီၤ. ဘၣ်ဆၣ်, အဝဲသ့ၣ်တသ့ၣ်ညါဝဲ တၢ်မံမီၢ်အခီပညီဘၣ်. လၢခံတနံၤ ယိၤသးစံးဘၣ်အဝဲသ့ၣ်လၢ, ‘တဲဘၣ်ယၤသုတၢ်မံမီၢ်တက့ၢ်’ န့ၣ်လီၤ. ဖဲအခါန့ၣ် လၢယွၤအတၢ်မၤစၢၤအဃိ ယိၤသးတဲဖျါထီၣ် အဝဲသ့ၣ်အတၢ်မံမီၢ်အခီပညီန့ၣ်လီၤသၢၣ်.

ယိၤသးတဲဘၣ်ပှၤကွၢ်တၢ်အီအခိၣ်ဒ်အံၤလီၤ. ‘မ့ၢ်ယံာ်သၢသီန့ၣ် နကဘၣ်တၢ်ထုးထီၣ်နၤလၢဃိာ်ပူၤလီၤ. နဲဒၣ်အံၤ, နကကဲထီၣ်က့ၤ ဖၤရိၤအပှၤကွၢ်တၢ်အီအခိၣ်လီၤ. နမ့ၢ်တုၤလၢတၢ်ချၢန့ၣ် တဲဘၣ်ယဂ့ၢ်လၢဖၤရိၤဒီး မၤစၢၤယၤဒ်သိးယကထူၣ်ဖျဲး လၢဃိာ်ပူၤတက့ၢ်.’ ပှၤကုၢ်ကိၣ်အခိၣ်တခီ ​ယိၤသးစံးအီၤဒ်အံၤလီၤ. ‘လၢသၢသီအတီၢ်ပူၤအံၤ ဖၤရိၤကကျီတဲာ်နခိၣ်လီၤ.’

လၢသၢသီအတီၢ်ပူၤန့ၣ် တၢ်ဟဲကဲထီၣ် ဒ်ယိၤသးစံးဝဲအသိးန့ၣ်လီၤ. ဖၤရိၤန့ၣ် ကျီတဲာ်ကွံာ်ဝဲပှၤကုၢ်ကိၣ်အခိၣ် တဂၤန့ၣ်အခိၣ်လီၤ. မ့မ့ၢ်ပှၤကွၢ်တၢ်အီအခိၣ်တခီ ဟးထီၣ်ဘၣ်ဝဲလၢဃိာ်ပူၤဝံၤ မၤဘၣ်က့ၤစီၤပၤဖးဒိၣ်အတၢ်မၤ ဒ်လၢညါအသိးန့ၣ်လီၤ. ဘၣ်ဆၣ်, အဝဲဒၣ် သးပ့ၤနီၣ်တ့ၢ်ဝဲယိၤသးနီၢ်နီၢ်န့ၣ်လီၤ. တတဲဘၣ်ဝဲအဂ့ၢ်လၢဖၤရိၤဘၣ်. လၢတၢ်န့ၣ်အဃိ ယိၤသးဖိန့ၣ် ပကစၢ်ဘၣ်အိၣ်ဒံးဒၣ်လၢဃိာ်ပူၤန့ၣ်လီၤသၢၣ်.