ဘၣ်မနုၤအဃိ မိၤၡ့ဘၣ်ဃ့ၢ်ဟးထီၣ်ဝဲ အဂ့ၢ်

ကွၢ်မိၤၡ့ဃ့ၢ်ဟးထီၤလၢ ကီၢ်အဲၤကူပတူးအပူၤန့ၣ်တက့ၢ်. နထံၣ်ပှၤတဖၣ် လူၤထွဲအခံန့ၣ်ဧါ. ဘၣ်မနုၤအဃိ အဝဲသ့ၣ်အဲၣ်ဒိးမၤသံအီၤန့ၣ်လဲၣ် နသ့ၣ်ညါဧါ. ပကဃုထံၣ်သကိးအစၢတက့ၢ်.

မိၤၡ့န့ၣ် ဟဲဒိၣ်ထီၣ်ဝဲဒၣ်လၢ အဲၤကူပတူးကီၢ်ကစၢ်ဖၤရိၤအနီပူၤန့ၣ်လီၤ. ဟဲကဲထီၣ်ဝဲဒၣ် ​ပှၤကူၣ်ဘၣ်ကူၣ်သ့ဖးဒိၣ်တဂၤဝံၤ ကဲထီၣ်ပှၤအိၣ်ဒီးအစိကမီၤတဂၤန့ၣ်လီၤ. မိၤၡ့သ့ၣ်ညါလီၤက့ၤ အသးလၢအတမ့ၢ် ပှၤအဲၤကူပတူးဖိန့ၣ်ဘၣ်လီၤ. သ့ၣ်ညါဝဲလၢအမိၢ်, အပၢ်တံၢ်နီၢ်မ့ၢ် အံၣ်စရ့လးကုၢ်န့ၣ်လီၤ.

မုၢ်တနံၤလၢအသးအိၣ် အနံၣ် ၄၀ န့ၣ် ပာ်လီၤအသးလၢ ကလဲၤကွၢ်ဝဲအပှၤကလုာ် မ့ၢ်အိၣ်ဆိးဝဲသ့ၣ်ဒ်လဲၣ်န့ၣ်လီၤ. အဝဲသ့ၣ်တဖၣ်န့ၣ် ဘၣ်တၢ်မၤနးမၤဖှီၣ်အီၤ နးနးကျံၤကျံၤန့ၣ်လီၤ. အဝဲထံၣ်ဝဲဒၣ်လၢ ပှၤအဲၤကူပတူးဖိတဂၤ တီၢ်ဝဲဒၣ် ပှၤအံၣ်စရ့လးကုၢ်ဖိတဂၤန့ၣ်လီၤ. မိၤၡ့ကွၢ်ဝးတရံးအဃိၣ်အဃၢၤဝံၤ တထံၣ်ပှၤအိၣ်နီတဂၤအဃိ တီၢ်ဝဲပှၤအဲၤကူပတူးဖိဒီး ပှၤအဲၤကူတူးဖိသံဘၣ်အသးန့ၣ်လီၤ. ဝံၤဒီး ပာ်ခူသူၣ်ပှၤအဝဲန့ၣ်အစိၣ်လၢ မဲးလာ်န့ၣ်လီၤ.

လၢခံတနံၤ မိၤၡ့လဲၤကွၢ်ကဒီး အပှၤကလုာ်န့ၣ်လီၤ. ဆိကမိၣ်ဝဲဒၣ်လၢ အုၣ်က့ၤခီၣ်က့ၤအဝဲသ့ၣ်လၢကုၢ်အလီၢ် ကန့ၢ်ဝဲဒၣ်လီၤ. ဘၣ်ဆၣ် ထံၣ်ဝဲ ပှၤ​အံၣ်စရ့လးဖိခံဂၤအ့ၣ်လိာ်အသး ဒီးမိၤၡ့စံးဝဲဒၣ် ပှၤလၢအကမၣ်တဂၤ, ‘ဘၣ်မနုၤနဘၣ်တီၢ်နဒီပုၢ်ဝဲၢ်န့ၣ်လဲၣ်.’ န့ၣ်လီၤ.

ပှၤအဝဲအံၤတခီ စံးဝဲဒၣ်, ‘မ့ၢ်မတၤပာ်လီၤနၤ လၢပှၤပၢတၢ်ဒီး ပှၤစံၣ်ညီၣ်ကွီၢ်လၢပဖီခိၣ်လဲၣ်. ဒ်နမၤသံပှၤအဲၤကူပတူးဖိအသိး နကမၤသံယၤစ့ၢ်ကီးဧါ.’ န့ၣ်လီၤ.

မိၤၡ့ပျံၤထီၣ်ဝဲဒၣ်တၢ်လီၤ. အဝဲဒၣ်နၢ်ပၢၢ်ထီၣ်လၢ ပှၤသ့ၣ်ညါ အမၤတ့ၢ်ပှၤအဲၤကူပတူးဖိဒ်လဲၣ် လံန့ၣ်လီၤ. ဖၤရိၤစ့ၢ်ကီးသ့ၣ်ညါဝဲလံဒီး မၢလီၤအပှၤတဖၣ်လၢ ကမၤသံမိၤၡ့န့ၣ်လီၤ. လၢတၢ်န့ၣ်အဃိ မိၤၡ့ဘၣ်ဃ့ၢ်ဟးထီၣ်ဝဲလၢ ကီၢ်အဲၤကူပတူးအပူၤန့ၣ်လီၤ.

မိၤၡ့ဃ့ၢ်ပူၤဖျဲးအသးလၢ ကီၢ်အဲၤကူပတူးဝံၤအလီၢ်ခံ လဲၤဝဲဒၣ်ဆူ ကီၢ်မံးဒယၣ်လၢအအိၣ်ယံၤဒိၣ်မးန့ၣ်လီၤ. ဖဲန့ၣ် ထံၣ်လိာ်အသးဒီး ယံးသရိၤအပှၤဟံၣ်ဖိဃီဖိ ဒီးဒိးတ့ဒိးဖျီအသးလၢ ယံးသရိၤအဖိမုၣ်တဂၤ လၢအမံၤမ့ၢ်စံးဖိရၤန့ၣ်လီၤ. မိၤၡ့ကဲထီၣ်ပှၤကွၢ်သိဒီး ကွၢ်ဝဲယံးသရိၤအသိတဖၣ်လီၤ. အဝဲဒၣ်အိၣ်လၢကီၢ်မံးဒယၣ်အပူၤအနံၣ် ၄၀ န့ၣ်လီၤ. အခဲအံၤအသးအိၣ်အနံၣ် ၈၀ လံန့ၣ်လီၤ. ဘၣ်မုၢ်တနံၤ, ဖဲမိၤၡ့ကွၢ်အမံၤပှၢ်ယံးသရိၤအသိတဖၣ်အခါန့ၣ် ထံၣ်ဘၣ်ဝဲ တၢ်လီၤလးမၤအသးတခါလၢ အကဆီတလဲကွံာ် အတၢ်အိၣ်မူဒီကတီၢ်န့ၣ်လီၤ. အိးထီၣ်လံာ်ကဘျံးဒီး ပကွၢ်သကိး ​ပကထံၣ်ဘၣ်ပဝဲ တၢ်လီၤလိၢ်လီၤလးမနုၤလဲၣ်န့ၣ်တက့ၢ်.