မုၢ်အိၣ်ကတီၢ်အဂ့ၢ်

ကွၢ်ယိၤၡူတက့ၢ်. စံးဝဲဒၣ်လၢ ‘မုၢ်ဧၢ အိၣ်ကတီၢ်တက့ၢ်.’ မုၢ်စ့ၢ်ကီး အိၣ်ကတီၢ်ဝဲဒၣ်လီၤ. လၢမူခိၣ်အခၢၣ်သးန့ၣ် အိၣ်ကတီၢ်ဝဲ ဒီနံၤညါန့ၣ်လီၤ. ကမၤအသးဒ်အံၤအဂီၢ် ယဟိဝၤမၤတ့ၢ်ဝဲလီၤ. ဘၣ်ဆၣ် ဘၣ်မနုၤယိၤၡူအဲၣ်ဒိးလၢ မုၢ်ကကပီၤဒီကတီၢ်ညါန့ၣ်လဲၣ်န့ၣ် ပကကွၢ်သကိးတက့ၢ်.

ဖဲစီၤပၤယဲၢ်ဂၤ ဟဲဒုးပှၤဝ့ၢ်ကံးဘိၣ်ဖိတဖၣ်အခါ ပှၤဝ့ၢ်ကံးဘိၣ်ဖိတဖၣ် မၢလီၤပှၤတဂၤလၢ ကလဲၤဃ့တၢ်မၤစၢၤလၢ ယိၤၡူအအိၣ်န့ၣ်လီၤ. ပှၤအံၤစံးဝဲဒၣ် ‘ဟဲမၤစၢၤပှၤလၢအချ့တက့ၢ်. ဟဲအုၣ်က့ၤခီၣ်က့ၤပှၤတက့ၢ်. စီၤပၤအိၣ်လၢကစၢၢ်ခိၣ်ခဲလၢာ် ဟဲဒုးနခ့နပှၤတဖၣ်လံ’ န့ၣ်လီၤ.

ယိၤၡူဒီးအသုးဖိတဖၣ် လဲၤပိာ်ထွဲပှၤအံၤအခံ တဘျီဃီန့ၣ်လီၤ. လဲၤဝဲသ့ၣ်သီတနၤကျၢၤန့ၣ်လီၤ. တုၤအတုၤလၢဝ့ၢ်ကံးဘိၣ်ဒီး စီၤပၤယဲၢ်ဂၤအသုးဖိတဖၣ် ဖုးဘၣ်အသးဒီး ဃ့ၢ်ကွံာ်ဝဲသ့ၣ်လီၤ. ဖဲဆၢကတီၢ်အဝဲန့ၣ် ယဟိဝၤဒုးဟဲစူၤလီၤသူၣ်တဖၣ်န့ၣ်လီၤ. တုၤနုၤတစု ပှၤသံလၢသူၣ်လီၤတဲာ်ဘၣ်အီၤန့ၣ် အါန့ၢ်ဒံး ပှၤသံလၢယိၤၡူအသုးမုၢ်သံၣ်ဘိတဖၣ် မၤသံန့ၣ်လီၤ.

ယိၤၡူထံၣ်ဘၣ်ဝဲလၢ တယံာ်ဘၣ်ဒီး မုၢ်ကလီၤနုာ်ဝဲဒၣ်န့ၣ်လီၤ. တယံာ်ဘၣ်န့ၣ် တၢ်ကခံးလီၤဝဲအဃိ စီၤပၤယဲၢ်ဂၤအသုးမုၢ်တဖၣ် ကထူၣ်ဖျဲးဝဲအါအါကလဲာ်န့ၣ်လီၤ. လၢတၢ်အံၤအဃိန့ၣ်သၢၣ်, ယိၤၡူဃ့ဘါထုကဖၣ်တၢ်ဆူ ယဟိဝၤအအိၣ် ဒီးစံးဝဲလၢ ‘မုၢ်ဧၢ, အိၣ်ကတီၢ်တက့ၢ်’ န့ၣ်လီၤ. တုၤနုၤတစု, မုၢ်အိၣ်ကတီၢ်ဒီးကပီၤဝဲအဃိ ပှၤအံၣ်စရ့လးဖိတဖၣ် မၤနၢၤဝဲသ့ၣ်တၢ်ဒုးန့ၣ်လီၤ.

စီၤပၤလၢအတဂ့ၤ လၢအသးဟ့ယွၤအပှၤဂီၤမုၢ်တဖၣ် အိၣ်တ့ၢ်လၢကီၤကနၤဧၣ် အါမးဒံးန့ၣ်လီၤ. ယိၤၡူဒီးအသုးမုၢ် ဂီၢ်မုၢ်ဖးဒိၣ် ဒ်သိးကဒုးနၢၤဝဲ စီၤပၤ ၃၁ ဂၤအဂီၢ်န့ၣ် ယံာ်ဝဲဒၣ် ၆ နံၣ်ညါန့ၣ်လီၤ. တၢ်န့ၣ်ဝံၤအလီၢ်ခံ ယိၤၡူပၢဆှၢသုးကျဲၤ တၢ်နီၤဟ့ၣ်ဟီၣ်ခိၣ်လၢ ပှၤအဒူၣ်တဖၣ်လၢ အတန့ၢ်ဘၣ်ဒံးတၢ်လီၢ်တဖၣ်န့ၣ်လီၤ.

နံၣ်လဲၤပူၤကွံာ်တ့ၢ်အါမးလံန့ၣ်လီၤ. ယိၤၡူသံဖဲ အသးအိၣ်အနံၣ် ၁၁၀ န့ၣ်လီၤ. ဖဲအဝဲဒၣ်ဒီး အတံၤသကိးတဖၣ် အိၣ်မူဝဲသ့ၣ်အခါ ပှၤသ့ၣ်တဖၣ် ဒိကနၣ်ယဟိဝၤအကလုၢ်န့ၣ်လီၤ. ဘၣ်ဆၣ်သနာ်က့ တုၤပှၤဂ့ၤတဖၣ်အံၤသံဝံၤအလီၢ်ခံ ပှၤတဖၣ်အံၣ် မၤဝဲသ့ၣ်တၢ်တဂ့ၤတဘၣ်တဖၣ်ဒီး ဘၣ်နးဘၣ်ဖှီၣ်ဝဲစ့ၢ်ကီးလီၤ. ဖဲဆၢကတီၢ်အဝဲအံၤန့ၣ် အဝဲသ့ၣ်လိၣ်ဘၣ် ယွၤအတၢ်မၤစၢၤန့ၣ်လီၤ.