ပိာ်မုၣ်ဖိသၣ်တဂၤ မၤစၢၤပှၤဒိၣ်စိဒိၣ်ကမီၤတဂၤ အဂ့ၢ်

ဖိသၣ်မုၣ်စံးဝဲမနုၤလဲၣ်န့ၣ် နသ့ၣ်ညါဧါ. စံးဘၣ်တဲဘၣ်ဝဲ ပိာ်မုၣ်အဒိၣ်တဂၤလၢ ယဟိဝၤအဝံအလံၤၡါအဂ့ၢ်ဒီး တၢ်လီၤလးတဖၣ်လၢအမၤဝဲဒၣ်လၢ ယဟိဝၤအတၢ်မၤစၢၤအဂ့ၢ်န့ၣ်လီၤ. ပိာ်မုၣ်အဒိၣ်တဂၤတခီ တမ့ၢ်ပှၤအံၣ်စရ့လးမုၣ်အဃိ တသ့ၣ်ညါဝဲယဟိဝၤအဂ့ၢ်ဘၣ်. ဖိသၣ်မုၣ်အံၤ ဟဲတုၤဝဲလၢ ပိာ်မုၣ်လၢအဒိၣ်တဂၤအဟံၣ် ဒ်လဲၣ်အဂ့ၢ်န့ၣ် ပကကွၢ်သကိးတက့ၢ်.

ပိၣ်မုၣ်အံၤ မ့ၢ်ပှၤစူၤရံမုၣ်န့ၣ်လီၤ. အဝၤတခီ မ့ၢ်စူၤရံသုးခိၣ်ဖးဒိၣ် နဧၤမၣ်န့ၣ်လီၤ. ပှၤစူၤရံဖိတဖၣ် ဟဲက့ၤဖီၣ်ဝဲ ပိာ်မုၣ်ဖိသၣ်အံၤဒီး အဝဲဟဲကဲထီၣ် နဧၤမၣ်အမါအတၢ်မၢဖိန့ၣ်လီၤ.

နဧၤမၣ်န့ၣ် အိၣ်ဒီးတၢ်ဆါအၢဖးဒိၣ်တခါ လၢတၢ်ကိးလၢ တၢ်ဆါအၢလိၤဟးဂီၤတခါန့ၣ်လီၤ. ပှၤလၢအန့ၢ်ဘၣ်တၢ်ဆါအံၤ အတၢ်အီၣ်ကွံာ်အညၣ်ဒီး အညၣ်လီၤဆှူသ့န့ၣ်လီၤ. လၢတၢ်န့ၣ်အဃိ ပိာ်မုၣ်ဖိသၣ်အံၤ စံးဘၣ်တဲဘၣ်ဝဲနဧၤမၣ်အမါဒ်အံၤန့ၣ်လီၤ. ‘ကစၢ်မုၣ်ဧၢ, ယကစၢ်မ့ၢ်လဲၤဘၣ်ဆူ ယဟိဝၤအဝံအအိၣ်သၢပျၢၤ ကဂ့ၤဝဲဒိၣ်မးလီၤ. အဝဲဒၣ်ကမၤဘျါန့ၢ်အီၤ အတၢ်ဆါအၢအံၤလီၤ.’ လၢခံ ပိာ်မုၣ်န့ၣ် စံးဘၣ်က့ၤ ပိာ်မုၣ်ဖိသၣ်အတၢ်ကတိၤအံၤဆူ အဝၤန့ၣ်လီၤ.

နဧၤမၣ်သးအိၣ်ဝဲဒိၣ်မးလၢ အတၢ်ဆါကဘျါအဂီၢ်အဃိ ပာ်လီၤအသးလၢ အကလဲၤဝဲဆူ အံၣ်စရ့လးအကီၢ်န့ၣ်လီၤ. ဖဲလဲၤတုၤဝဲဖဲန့ၣ်အခါ လဲၤဝဲဒၣ်ဆူ အလံၤၡါအဟံၣ်န့ၣ်လီၤ. အလံၤၡါမၢလီၤအကုၢ်လၢ ကစံးဘၣ်နဧၤမၣ်လၢ ကဘျူးလီၤအသးဆူ ထံကျိယၢ်ဒ့ၣ်ပူၤနွံဘျီန့ၣ်လီၤ. နဧၤမၣ်အသးထီၣ်ဒိၣ်မး လၢအနၢ်ဟူတၢ်အံၤအဃိဒီး စံးဝဲဒၣ်, ‘ထံကျိလၢအအိၣ်လၢ ယကီၢ်ပူၤတဖၣ် ဂ့ၤန့ၢ်ဒံး ထံကျိလၢအအိၣ်လၢ အံၣ်စရ့လးအကီၢ် တဘိလၢ်လၢ်န့ၣ်လီၤ’ ဒီးဟးထီၣ်ဝဲလီၤ.

ဘၣ်ဆၣ်, အကုၢ်တဂၤ စံးဘၣ်အီၤလၢ ‘ကစၢ်ဧၢ, အလံၤၡါမ့ၢ်မၢနမၤ တၢ်လၢအကီတခါန့ၣ် နကမၤလီၤတမ့ၢ်ဘၣ်ဧါ. ဒ်အဝဲစံးဝဲအသိး ထဲဒၣ်နကဘၣ်လုၢ်ထံန့ၣ် နမၤတကဲအလီၢ်တအိၣ်ဘၣ်’ န့ၣ်လီၤ. နဧၤမၣ်ဒိကနၣ်အကုၢ်အတၢ်ကတိၤဒီး လဲၤဘျုးလီၤအသးလၢ ထံကျိယၢ်ဒ့ၣ်အပူၤ နွံဘျီလီၤ. မၤဝဲဒ်န့ၣ်ဝံၤဒီး အဖံးအညၣ်ဂ့ၤထီၣ်က့ၤဝဲဒၣ်န့ၣ်လီၤ.

နဧၤမၣ်အသးခုဝဲဒိၣ်မးအဃိ က့ၤကဒါက့ၤဝဲဆူ အလံၤၡါအအိၣ်ဒီးစံးဝဲဒၣ်, ‘ယသ့ၣ်ညါလံလၢ ယွၤလၢအံၣ်စရ့လးအကီၢ်န့ၣ် မ့ၢ်ယွၤနီၢ်နီၢ်လၢ အမ့ၢ်ဝဲတီဝဲတဲတဂၤဧိၤ လၢဟီၣ်ခိၣ်ဒီဘ့ၣ်ညါန့ၣ်လီၤ. လၢတၢ်န့ၣ်အဃိ ဝံသးစူၤတူၢ်လိာ်ဘၣ် ယတၢ်ဟ့ၣ်ဆံးအံၤတက့ၢ်’ န့ၣ်လီၤ. ဘၣ်ဆၣ်သနာ်က့ အလံၤၡါစံးဆၢက့ၤအီၤ ‘ယတဟံးန့ၢ်ဘၣ်.’ အလံၤၡါသ့ၣ်ညါဝဲလၢ အတကြၢးဟံးန့ၢ်ဝဲ နဧၤမၣ်အတၢ်ဟ့ၣ်န့ၣ်ဘၣ်. ဘၣ်မနုၤအဃိလဲၣ်န့ၣ် ပှၤလၢအမၤဘျါ နဧၤမၣ်အတၢ်ဆါနီၢ်နီၢ်န့ၣ် မ့ၢ်ဒၣ်ယဟိဝၤန့ၣ်လီၤ. ဘၣ်ဆၣ်သနာ်က့ အလံၤၡါအကုၢ် က့ၤဃစံတခီ သးလီဝဲဒၣ်န့ၣ်လီၤ.

လၢတၢ်န့ၣ်အဃိ က့ၤဃစံ မၤဝဲဒ်အံၤလီၤ. ဃ့ၣ်လူၤထွဲနဧၤမၣ်အခံချ့သဒံးဒီး တုၤအချုးန့ၢ်အီၤန့ၣ် စံးဝဲဒၣ်, ‘အလံၤၡါမၢလီၤယၤလၢ ယကစံးဘၣ်နၤ လၢနကဟ့ၣ်လီၤတၢ်ဟ့ၣ်လၢနဟ့ၣ် ဆူတံၤသကိးတဖၣ်လၢ အဟဲအိၣ်သကိးအီၤခဲအံၤလီၤ’ န့ၣ်လီၤ. နီၢ်နီၢ်တခီ, တၢ်အံၤမ့ၢ်တၢ်လီတၢ်ဝ့ၤန့ၣ်လီၤ. ဘၣ်ဆၣ် နဧၤမၣ်တသ့ၣ်ညါလၢ အမ့ၢ်တၢ်လီတၢ်ဝ့ၤဘၣ်. လၢတၢ်န့ၣ်အဃိ, ဟ့ၣ်လီၤဝဲက့ၤဃစံ တၢ်ဖိတၢ်လံၤတနီၤန့ၣ်လီၤ.

ဖဲက့ၤဃစံ ဟဲက့ၤတုၤဟံၣ်အခါ မၤတ့ၢ်ဝဲတၢ်မနုၤလဲၣ်န့ၣ် အလံၤၡါသ့ၣ်ညါဝဲလီၤ. မ့ၢ်လၢယဟိဝၤ စံးဘၣ်အီၤအဃိန့ၣ်လီၤ. လၢတၢ်န့ၣ်အဃိ အလံၤၡါစံးဘၣ်အီၤ ‘လၢနမၤတ့ၢ်တၢ်အၢဒ်အံၤအဃိ နဧၤမၣ်အတၢ်ဆါအၢကဟဲဘၣ်နၤန့ၣ်လီၤ.’ ဒ်တဲဝဲအသိး ဟဲကဲထီၣ်ဝဲတကီၢ်ခါန့ၣ်လီၤ.

နကွၢ်တၢ်တဖၣ်အံၤဒီး နမၤန့ၢ်တၢ်မၤလိသ့ဒ်လဲၣ်. အဆိတမံၤန့ၣ် ပကဘၣ်ကတိၤယဟိဝၤအဂ့ၢ် ဒ်ဖိသၣ်မုၣ်အံၤအသိးန့ၣ်လီၤ. တၢ်အံၤ ကဲဘျုးကဲဖှိၣ်သ့ဒိၣ်မးန့ၣ်လီၤ. ခံမံၤတမံၤန့ၣ် ပတဘၣ်ပာ်ဒိၣ်ပသးဒ် နဧၤမၣ်ပာ်ဒိၣ်အသး လၢအခီၣ်ထံးအသိးဘၣ်. ပကဘၣ်ဒိကနၢ် ယွၤအကုၢ်အပှၤတဖၣ် အတၢ်ကတိၤန့ၣ်လီၤ. သၢမံၤတမံၤန့ၣ် ပတဘၣ်လီတၢ်ဒ်က့ၤဃစံအသိးဘၣ်. ဖဲပဖးလံာ်စီဆှံအခါ ပမၤန့ၢ်တၢ်မၤလိအါမး တမ့ၢ်ဘၣ်ဧါ.