ကစၢ်ယွၤအတၢ်စံးပာ်အိၣ်လၢ ကဟ့ၣ်ပၤရဒံစူးတခါ အဂ့ၢ်

တၢ်ဂီၤအံၤ ပၤရဒံစူးအဂီၤတခါလၢ ဘၣ်တဘၣ်ယဟိဝၤဒုးနဲၣ်တ့ၢ် ယၡါယၤန့ၣ်လီၤသၢၣ်. ယၡါယၤမ့ၢ်ဝံလၢ အအိၣ်မူတ့ၢ်တဂၤလၢ ယိၤနါသံဝံၤအလီၢ်ခံန့ၣ်လီၤ.

ပၤရဒံစူးစံးတၢ်န့ၣ် မ့ၢ် ‘တၤသၣ်အလီၢ်’ မ့တမ့ၢ် ‘ဖီကရၢၣ်’ န့ၣ်လီၤ. နတသ့ၣ်နီၣ်ထီၣ်က့ၤ တၢ်ဂီၤတခါလၢ နထံၣ်ဘၣ်တ့ၢ်အီၤ လၢလံာ်အံၤအပူၤန့ၣ်ဘၣ်ဧါ. တလီၤဂာ်ဒီး တၤသၣ်လီၢ်ဃံလၤတဘ့ၣ် လၢယဟိဝၤမၤတ့ၢ်ဝဲလၢ အၤဒၣ်ဒီးအံၣ်အုအဂီၢ်န့ၣ်ဘၣ်ဧါ. ဘၣ်ဆၣ်သနာ်က့ ဟီၣ်ခိၣ်ဒီဘ့ၣ် ဘၣ်ကဟဲကဲထီၣ်ဒ်ပၤရဒံစူးဒံးဧါ.

ယဟိဝၤမၢဝံယၡါယၤကွဲး ပၤရဒံစူးအသီကဟဲလၢ ယွၤအပှၤကလုာ်အဂီၢ် အဂ့ၢ်န့ၣ်လီၤ. အဝဲဒၣ်ကွဲးဝဲဒ်အံၤလီၤ. ‘ထွံၣ်မံၤဒီးသိဖိ ကအိၣ်ဒီးတၢ်ဘၣ်လိာ်ဖိးဒ့ တပူၤဃီလီၤ. ဂီၤဖံးဖိဒီးခ့ယုၢ်ဖိတဖၣ် ကအီၣ်အဆၣ်တပူၤဃီ ဒီးပှၤဖိသၣ်တဖၣ်ကကၠိအီၤလီၤ. ဖိသၣ်အီၣ်နုၢ်ဖိတဖၣ် မ့ၢ်လိာ်ကွဲလၢ ဂုၢ်လၢအအိၣ်ဒီးအစုၣ် အကပၤဒၣ်လဲာ် တမ့ၢ်လၢ တၢ်ဘၣ်ယိၣ်အလီၢ်ကအိၣ်ဝဲဘၣ် န့ၣ်လီၤ.’

ပှၤအါဒံအါဂၤ ကစံးဝဲသ့ၣ်လၢ ‘တၢ်အံၤ တမ့ၢ်ကကဲထီၣ်နီတဘျီဘၣ်. တၢ်ကီတၢ်ခဲအိၣ်ထီၣ်ဝဲလၢ ဟီၣ်ခိၣ်အံၤတဘိယူၢ်ဃီအဃိ တၢ်န့ၣ်ကအိၣ်ဝဲဒၣ်ထီဘိန့ၣ်လီၤ.’ ဘၣ်ဆၣ်သနာ်က့, ကွၢ်ဆိကမိၣ်တက့ၢ်. တၢ်လီၢ်လၢကစၢ်ယွၤမၤတ့ၢ် လၢအၤဒၣ်ဒီးအံၣ်အုအဂီၢ်န့ၣ် ဒ်လဲၣ်.

ယွၤပာ် အၤဒၣ်ဒီးအံၣ်အုလၢ ပၤရဒံစူးအပူၤန့ၣ်လီၤ. မ့ၢ်လၢ အဝဲသ့ၣ်တဒိကနၣ် ယွၤအတၢ်ကတိၤအဃိ အဟံၣ်ဃံလၤဖိ ဘၣ်လီၤမၢ်ကွံာ်ဝဲလီၤ. အဝဲသ့ၣ် သးပှၢ်ထီၣ်ဝံၤ ဘၣ်သံဝဲဒၣ်လီၤ. ယွၤအတၢ်စံးပာ်အိၣ်ဝဲဒၣ်လၢ ကဟ့ၣ်က့ၤဝဲ ပှၤလၢအအဲၣ်အီၤသ့ၣ်တဖၣ် ကယဲၢ်တၢ်လၢ အၤဒၣ်ဒီးအံၣ်အု မၤလီၤမၢ်တ့ၢ်တဖၣ်န့ၣ်လီၤ.

လၢပၤရဒံစူးအသီ လၢအကဟဲအပူၤန့ၣ် တၢ်မၤနးမၤဖှီၣ်မၤကီမၤခဲတၢ်, တၢ်ဃုမၤဟးဂုာ်ဟးဂီၤတၢ်တဖၣ် တမ့ၢ်ကအိၣ်နီတမံၤလၢာ်ဘၣ် ကဒိးန့ၢ်ဘၣ်တၢ်အိၣ်မုာ်အိၣ်ခုၣ်အလၢအပှဲၤန့ၣ်လီၤ. ပှၤခဲလၢာ် ကအိၣ်ဘၣ်လၢ တၢ်အိၣ်ဆူၣ်အိၣ်ချ့ဒီးတၢ်သူၣ်ဖှံသးညီအပူၤန့ၣ်လီၤ. ကမၤက့ၤအသးဒ်လၢအခီၣ်ထံး ဒ်သိးယွၤသးအိၣ်မၤဝဲအသိးန့ၣ်လီၤ. ဒ်သိးကကဲထီၣ်ဝဲဒ်န့ၢ်အဂီၢ် ကစၢ်ယွၤကမၤဒ်လဲၣ်အဂ့ၢ်န့ၣ် ပကသ့ၣ်ညါဘၣ်လၢခံန့ၣ်လီၤ.