ယ့ၣ်ၡူးမၤမူထီၣ်က့ၤပှၤသံတဖၣ် အဂ့ၢ်

ပိာ်မုၣ်ဖိသၣ်လၢသုထံၣ်ဘၣ်ဖဲအံၤ, လၢခရံာ်ဖီၣ်ဃာ်အစုန့ၣ် အသးအိၣ် ၁၂ နံၣ်လီၤ. အမိမိၢ်ဒီးအပါပၢ် ဆၢထၢၣ်လၢအကပၤန့ၣ်လီၤ. ဘၣ်မနုၤအဃိ အဝဲသ့ၣ်သးခုထဲအံၤလဲၣ်န့ၣ် သုသ့ၣ်ညါဧါ. ပကွၢ်သကိးတက့ၢ်.

ပိာ်မုၣ်ဖိသၣ်အပၢ် လၢအမံၤမ့ၢ် ယၤအ့ၤရူးန့ၣ် မ့ၢ်ပှၤလၢအကါဒိၣ်တဂၤလီၤ. ဘၣ်မုၢ်တနံၤန့ၣ် အဖိမုၣ်ဆါအဃိ ပုာ်မံဝဲလၢလီၢ်မံပူၤန့ၣ်လီၤ. သနာ်က့ ပိာ်မုၣ်ဖိသၣ်န့ၣ် အိၣ်တဆူၣ်ထီၣ်က့ၤဘၣ်. တၢ်ဆါဒံးယံာ်ဒံးနာ်ထီၣ်လီၤ. ပိာ်မုၣ်ဖိသၣ်န့ၣ် မၤသးဒ်အကသံအသိးအဃိ ယၤအ့ၤရူးဒီးအမါ ဘၣ်ယိၣ်တၢ်နးမးန့ၣ်လီၤသၢၣ်. အဝဲမ့ၢ်ဖိတဂၤဧိၤလီၤ. လၢတၢ်န့ၣ်အဃိ ယၤအ့ၤရူးလဲၤဃုဝဲယ့ၣ်ၡူးန့ၣ်လီၤ. မ့ၢ်လၢအနၢ်ဟူဘၣ်ဝဲ ယ့ၣ်ၡူးမၤတၢ်လီၤလး အမၠိမၠိအဃိန့ၣ်လီၤသၢၣ်.

ဖဲယၤအ့ၤရူးထံၣ်ဘၣ်ယ့ၣ်ၡူးအခါ ပှၤဂီၢ်မုၢ်ဖးဒိၣ် အိၣ်ကဝီၤဃာ်ယ့ၣ်ၡူးန့ၣ်လီၤ. ဘၣ်ဆၣ်, ယၤအ့ၤရူးန့ၣ် ဆီၣ်သနံးနုာ်လီၤဆူ ကမျၢၢ်အကဆူးပူၤဒီး လဲၤဝဲဆူယ့ၣ်ၡူးအအိၣ်, တီၤလီၤကဒွံကျိာ် လၢအခီၣ်ထံးဒီးစံး, ‘ယဖိမုၣ်ဆါ, သံကဲဂဲၤက့ၤန့ၣ်လီၤ. ဝံသးစူၤ, ဟဲဒီး မၤဘျါထီၣ်န့ၢ်အတၢ်ဆါတက့ၢ်’ န့ၣ်လီၤ. ယ့ၣ်ၡူးစံးဘၣ်အီၤလၢကဟဲဝဲန့ၣ်လီၤ.

ဖဲအဝဲသ့ၣ်ဟဲပိာ်ကျဲအခါ ပှၤဂီၢ်မုၢ်န့ၣ် ဒံးယံာ်ဒံးသုးဘူးအသးဒီး အဝဲသ့ၣ်န့ၣ်လီၤ. ဖဲန့ၣ်အခါ ယ့ၣ်ၡူးအိၣ်ကတီၢ်သတူၢ်ကလာ်ဒီး သံကွၢ်ဝဲ, ‘မ့ၢ်မတၤထိးယၤလဲၣ်.’ န့ၣ်လီၤ. ယ့ၣ်ၡူးသ့ၣ်ညါဝဲလၢ တၢ်စိကမီၤဟးထီၣ်လၢအပူၤအဃိ ကဘၣ်မ့ၢ်ပှၤတဂၤဂၤ ထိးအီၤန့ၣ်လီၤ. မ့ၢ်မတၤထိးအီၤလဲၣ်. မ့ၤပှၤပိာ်မုၣ်လၢအဆါနးနးကလဲာ် ယံာ်တ့ၢ် ၁၂ နံၣ် တဂၤန့ၣ်လီၤ. အဝဲသုးဘူးအသးဆူယ့ၣ်ၡူးအကပၤ ဒီးထိးအီၤဒီး အတၢ်ဆါဘျါတကီၢ်ခါန့ၣ်လီၤ.

ယၤအ့ၤရူးထံၣ်ဘၣ်တၢ်အံၤအဃိ အသးဆူၣ်ထီၣ်ဝဲန့ၣ်လီၤ. သ့ၣ်ညါဘၣ်ဝဲလၢ ယ့ၣ်ၡူးမၤဘျါပှၤညီကဒၣ်သ့အဃိန့ၣ်လီၤ. ဘၣ်ဆၣ် ဖဲန့ၣ်အခါ ပှၤဆှၢတၢ်ကစီၣ်တဂၤ ဟဲဒီး စံးဘၣ်ဝဲယၤအ့ၤရူးလၢ ‘မၤတံာ်တၢ်ယ့ၣ်ၡူးန့ၣ်လၢၤတဂ့ၤ, နဖိမုၣ်သံလံ’ န့ၣ်လီၤ. ယ့ၣ်ၡူးနၢ်ဟူတၢ်အံၤဝံၤအလီၢ်ခံန့ၣ် စံးဘၣ်ယၤအ့ၤရူး ‘ဘၣ်ယိၣ်တၢ်တဂ့ၤ, နဖိမုၣ်ကဂ့ၤထီၣ်က့ၤဝဲလီၤ.’

ဖဲအတုၤလၢယၤအ့ၤရူးအဟံၣ်အခါ ပှၤတဖၣ်သးအုးဒီး ဟီၣ်ဝဲသ့ၣ်ဒိၣ်မးန့ၣ်လီၤ. ယ့ၣ်ၡူးစံးဝဲဒၣ်, ‘သုတဟီၣ်တဂ့ၤ, ပိာ်မုၣ်ဖိတသံဘၣ်, မ့ၢ်အမံသပ့ၤဝဲလီၤ.’ ဘၣ်ဆၣ်, အဝဲသ့ၣ်နံၤဘၣ်ဖၣ်လဲအီၤဒီး ကတိၤကလီာ်ကလာ်အီၤန့ၣ်လီၤ. မ့ၢ်လၢအသ့ၣ်ညါပာ်ဝဲသ့ၣ်လၢ ဖိသၣ်မုၣ်သံလံအဃိန့ၣ်လီၤ.

ဖဲအခါန့ၣ် ယ့ၣ်ၡူးကိးဝဲ ပိာ်မုၢ်ဖိသၣ် အပါပၢ်, အမိမိၢ်, ဒီးအတၢ်မၢဖိသၢဂၤဝံၤ လဲၤဝဲဆူပိာ်မုၣ်ဖိသၣ်အိၣ်အလီၢ်န့ၣ်လီၤ. ဝံၤဒီး ဖီၣ်ဃာ်ပိာ်မုၣ်ဖိသၣ်အစုဒီး စံးဝဲဒၣ်, ‘ပိာ်မုၣ်ဖိသၣ်ဧၢ, ဂဲၤဆၢထၢၣ်တက့ၢ်’ န့ၣ်လီၤ. ဒီးပိာ်မုၣ်ဖိသၣ်န့ၣ် မူထီၣ်က့ၤဝဲ ဒ်ပထံၣ်လၢတၢ်ဂီၤပူၤအံၤအသိးန့ၣ်လီၤ. ဝံၤဒီးဂဲၤဆၢထၢၣ်ဟးဝဲန့ၣ်လီၤ. လၢတၢ်န့ၣ်အဃိ, အပါပၢ်ဒီးအမိမိၢ်န့ၣ် သးခုလၢာ်တသ့ဘၣ် တကုၤသ့ၣ်န့ၣ်လီၤ.

ဖိသၣ်မုၣ်အံၤ တမ့ၢ်ပှၤအဆိကတၢၢ်လၢ ယ့ၣ်ၡူးမၤမူထီၣ်က့ၤန့ၣ်ဘၣ်. ဒ်လံာ်စီဆှံစံးဝဲအသိး ပှၤအဆိကတၢၢ်န့ၣ်မ့ၢ်ဝဲ ပှၤဝ့ၢ်နၤအံၣ် မုၣ်ကမဲအဖိခွါန့ၣ်လီၤ. လၢခံန့ၣ် ယၣ်ၡူးမၤမူထီၣ်က့ၤဝဲစ့ၢ်ကီး မၤရံဒီးမၢ်သၤအပုၢ် လါစရူးန့ၣ်လီၤ. ယ့ၣ်ၡူးမ့ၢ်ပၢတၢ်ဒ်စီၤပၤလၢ ယွၤဟ့ၣ်စိဟ့ၣ်ကမီၤအီၤအခါန့ၣ် အဝဲကမၤမူထီၣ်က့ၤပှၤသံတဖၣ်အါမးန့ၣ်လီၤ. တမ့ၢ်တၢ်သးခုဖးဒိၣ်လၢပဂီၢ်ဘၣ်ဧါ.