လဲၤနုာ်ဝဲဆူဒၢးလၢ အိၣ်ကးတံာ်ကျၢၤဃာ်အသး အဂ့ၢ်

ပ့းတရူးဒီးယိၤဟၣ် ဟဲက့ၤထီၣ်ဝဲသ့ၣ်လၢ ယ့ၣ်ၡူးအသွၣ်ခိၣ်ပူၤဝံၤအလီၢ်ခံ မၤရံအိၣ်တ့ၢ်ဖဲန့ၣ်ထဲတဂၤဧိၤလီၤ. အဝဲဒၣ်ဟီၣ်ဝဲန့ၣ်လီၤ. ဝံၤဒီး ဆုးလီၤအခိၣ်ဆူအပူၤဒီး ကွၢ်နုာ်ဝဲန့ၣ်လီၤ. ထဲန့ၣ်ဒီး, ဒ်တၢ်ဂီၤလၢညါတခါအသိး, ထံၣ်ဘၣ်ဝဲမူခိၣ်ကလူးခံဂၤန့ၣ်လီၤ. အဝဲသ့ၣ်သံကွၢ်အီၤ ‘ဘၣ်မနုၤနဘၣ်ဟီၣ်န့ၣ်လဲၣ်’

မၤရံစံးဆၢက့ၤဝဲ ‘အဝဲသ့ၣ်စိာ်ကွံာ်ယကစၢ်လံ, ပာ်ဝဲသ့ၣ်ဖဲလဲၣ်န့ၣ် ယတသ့ၣ်ညါဘၣ်.’ ဒီးဖဲမၤရံဃၣ်တရံးကွၢ်ဝဲအခါ ထံၣ်ဘၣ်ဝဲပှၤတဂၤလီၤ. ပှၤအဝဲန့ၣ်သံကွၢ်အီၤ ‘နဃုမတၤန့ၣ်လဲၣ်’ န့ၣ်လီၤ.

မၤရံဆိကမိၣ်ဝဲလၢ ပှၤန့ၣ် ပှၤပၢၤတၤသၣ်အလီၢ်ဒီး ပှၤလၢအစိာ်ကွံာ် အကစၢ်အစိၣ်စ့ၢ်ကီး ကဘၣ်မ့ၢ်ဒၣ် ပှၤအံၤန့ၣ်လီၤ. လၢတၢ်န့ၣ်အဃိ မၤရံစံးဝဲဒၣ် ‘နမ့ၢ်သုးကွံာ်ယကစၢ်အစိၣ်သၢပျၢၤ နပာ်အီၤဖဲလဲၣ်န့ၣ် တဲဘၣ်ယၤတက့ၢ်.’ ဘၣ်ဆၣ် နီၢ်နီၢ်တခီ ပှၤအံၤန့ၣ် မ့ၢ်ဒၣ်ယ့ၣ်ၡူးလီၤ. ဟံးထီၣ်ဃာ်ဝဲ နီၢ်ခိလၢမၤရံကွၢ်နီၢ်တဘၣ် န့ၣ်လီၤ. ဖဲကစၢ်ကိးထီၣ်အီၤလၢအမံၤအခါ မၤရံသ့ၣ်ညါလၢ ပှၤဝဲန့ၣ်မ့ၢ်ယ့ၣ်ၡူးလီၤ. အဃိ ဃ့ၣ်ဝဲပစုၢ်ပတ့ၤဆူ အပျဲၢ်အဘီၣ်တဖၣ်အအိၣ်ဝံၤ တဲဘၣ်ဝဲလၢ ‘ယထံၣ်ဘၣ်ကစၢ်’ န့ၣ်လီၤ.

လၢတၢ်န့ၣ်အလီၢ်ခံ, တနံၤဃီန့ၣ်လီၤ, အပျဲၢ်အဘီၣ်ခံဂၤ ဖဲအလဲၤဝဲသ့ၣ်ဆူသဝီအ့းမၤအူအခါ ပှၤတဂၤလဲၤသကိးဃုာ်တၢ်ဒီး အဝဲသ့ၣ်န့ၣ်လီၤ. အပျဲၢ်ခံဂၤတခီ သးအုးဒိၣ်မးလၢ ယ့ၣ်ၡူးဘၣ်တၢ်မၤသံအီၤအဃိန့ၣ်လီၤ. သနာ်က့ ဖဲအလဲၤတၢ်အခါ ပှၤအံၤ ကတိၤနၢ်ပၢၢ်အဝဲသ့ၣ် တၢ်ဂ့ၢ်လၢလံစီဆှံပူၤ အါမံၤအါမၠိဒီး မၤမုာ်အဝဲသ့ၣ်အသးဒိၣ်မးန့ၣ်လီၤ. ဖဲအဝဲသ့ၣ်အိၣ်ကတီၢ်တၢ်လဲၤတစိၤဖိ လၢကအီၣ်တၢ်အီၣ်အဂီၢ်အခါ သ့ၣ်ညါဝဲသ့ၣ်လၢ ပှၤအံၤ မ့ၢ်ဝဲယ့ၣ်ၡူးန့ၣ်လီၤ. ဖဲန့ၣ်အခါ ယ့ၣ်ၡူးပာ်တဒၢကွံာ်အသးန့ၣ်လီၤ. အပျဲၢ်ခံဂၤအံၤန့ၣ် က့ၤကဒါက့ၤဆူ ယရူၤၡလ့ၣ်တဘျီဃီ ဒ်သိးကစံးဘၣ်တဲဘၣ်တၢ်မၢဖိတဖၣ်လၢ ယ့ၣ်ၡူးအဂ့ၢ်န့ၣ်လီၤ.

ဖဲတၢ်မၤအသးဒ်န့ၣ်အခါ ယ့ၣ်ၡူးပာ်ဖျါထီၣ်အသးလၢ ပ့းတရူးစ့ၢ်ကီးန့ၣ်လီၤ. ပှၤအဂၤတဖၣ်စ့ၢ်ကီး သူၣ်ဟူးသးဝးဝဲသ့ၣ်လၢ နၢ်ဟူဘၣ်တၢ်ဂ့ၢ်အံၤအဃိန့ၣ်လီၤ. မကၢာ်အပျဲၢ်အဘီၣ်ခံဂၤန့ၣ် လဲၤတူၤလၢဝ့ၢ်ယရူၤၡလ့ၣ်ဒီး လူၤကွၢ်ဃုတၢ်မၢဖိတဖၣ်န့ၣ်လီၤ. ဖဲထံၣ်လိာ်သးဒီးတၢ်မၢဖိတဖၣ်အခါ စံးဘၣ်တဲဘၣ်အဝဲသ့ၣ်လၢ ယ့ၣ်ၡူးလီၢ်ဖျါထီၣ်အသးလၢအဝဲသ့ၣ်စ့ၢ်ကီးန့ၣ်လီၤ. ဖဲစံးကတိၤလိာ်သးဒံးန့ၣ်အခါန့ၣ် တၢ်လီၤလးမနုၤတခါကဲထီၣ်အသးလဲၣ်န့ၣ် သုသ့ၣ်ညါဧါ.

ကွၢ်လၢတၢ်ဂီၤပူၤန့ၣ်တက့ၢ်. ယ့ၣ်ၡူးဟဲနုာ်လီၢ်ဖျါထီၣ်အသးလၢ ဒၢးလၢအိၣ်ကးတံာ်ကျၢၤဃာ်သးအပူၤ န့ၣ်လီၤ. အပျဲၢ်တဖၣ် သးခုဝဲသ့ၣ်နးနးကလဲာ်လီၤ. တမ့ၢ်မုၢ်တနံၤလၢ အလီၤသူၣ်ပိၢ်သးဝးဒီး လီၤသးခုတလ့ၢ်ဘၣ်ဧါ. တုၤလီၤလၢဆၢကတီၢ်အဝဲန့ၣ်, ယ့ၣ်ၡူးလီၢ်ဖျါထီၣ်အသးလၢ အပျဲၢ်တဖၣ်အမဲာ်ညါန့ၣ် အိၣ်ပှံၤဘျီလံလဲၣ်. တမ့ၢ်ယဲၢ်ဘျီဘၣ်ဧါ.

ဖဲယ့ၣ်ၡူးပာ်ဖျါထီၣ်အသးအခါ တၢ်မၢဖိသိၤမါ တအိၣ်ဘၣ်. လၢတၢ်န့ၣ်အဃိ ဖဲအပျဲၢ်တဖၣ်စံးဘၣ်အီၤလၢ ‘ပထံၣ်ဘၣ်လံကစၢ်’ အခါန့ၣ် သိၤမါစံးဆၢဝဲလၢ ယမ့ၢ်ထံၣ်မးယကနာ်လီၤ. ဃိးသီဝံၤအလီၢ်ခံန့ၣ် အဝဲသ့ၣ်စူးရိဖှိၣ်ကဒီးဝဲသ့ၣ်လၢ ဒၢးလၢအအိၣ်ကးတံာ်ကျၢၤဃာ်သးအပူၤအခါ သိၤမါစ့ၢ်ကီး အိၣ်ဒီးအဝဲသ့ၣ်လီၤ. ယ့ၣ်ၡူးဖျါထီၣ်သတူၢ်ကလာ်ဖဲန့ၣ်လီၤ. မ့မ့ၢ်ခဲအံၤ သိၤမါနာ်ဝဲဒၣ်လံ.