ပၤရဒံစူးအသီ လၢဟီၣ်ခိၣ်လီၤ အဂ့ၢ်

သ့ၣ်ဖးဒိၣ်သ့ၣ်တဖၣ်, ဖီဃံလၤသ့ၣ်တဖၣ်, ကစၢၢ်ထီၣ်ထီကလဲာ်တဖၣ်န့ၣ် ကွၢ်အီၤတဘီ. တဃံလၤဝဲဘၣ်ဧါ. ကွၢ်ကဒီး ဖိသၣ်ဒုးအီၣ်သမီၢ်အဆၣ် လၢအစုန့ၣ်တက့ၢ်. ကွၢ်ခ့ယုၢ်ဖးဒိၣ်ဒီး ကသ့ၣ်လၢအဆၢထၢၣ် လၢပျီပူၤန့ၣ်တဘီ. ဟံၣ်လၢဘၣ်တၢ်သူၣ်ထီၣ်အီၤ လၢတၢ်လီၢ်ဒ်အံၤအပူၤန့ၣ် သုတအဲၣ်ဒိးအိၣ်ဘၣ်ဧါ.

ကစၢ်ယွၤန့ၣ် အဲၣ်ဒိးသုအိၣ်သုဆိးလၢ ပၤရဒံစူးအပူၤ ဒီးအိၣ်မူလီၤထူလီၤယိာ်န့ၣ်လီၤ. ကစၢ်ယွၤတအဲၣ်ဒိးသုတူၢ်ဘၣ် တၢ်ဆူးတၢ်ဆါ, တၢ်အ့ၣ်ထုးအ့ၣ်စိၢ်, တၢ်တကံတကးတဖၣ် လၢမုၢ်မဆါတနံၤအံၤပှၤတူၢ်ဘၣ် န့ၣ်ဘၣ်. လံာ်စီဆှံစံးပာ်ဃာ်ဝဲ ပှၤလၢကအိၣ်လၢ ပၤရဒံစူးအသီသ့ၣ်တဖၣ်အဂီၢ် ဒ်အံၤလီၤ. ‘ယွၤကအိၣ်ဒီးအဝဲသ့ၣ်လီၤ. တၢ်သံ, တၢ်ဘၣ်ဟီၣ်ဘၣ်ယၢၤ, တၢ်ဆိးက့မံနီၤ တဘၣ်အိၣ်လၢၤဘၣ်. တၢ်မၤတ့ၢ်အသးတဖၣ် ပူၤကွံာ်ဝဲလံ.’

တၢ်ဂ့ၤဒ်အံၤသိးသ့ၣ်တဖၣ် ကကဲထီၣ်ဝဲအဂီၢ် ယ့ၣ်ၡူးကသုးကျဲၤဝဲန့ၣ်လီၤ. ကမၤဝဲအခါဖဲလဲၣ် သုသ့ၣ်ညါဧါ. အၢၣ်, မ့ၢ်လီၤ, ဖဲကစၢ်တြူာ်ကွံာ် တၢ်အၢတၢ်သီဒီး ပှၤအၢပှၤသီခဲလၢာ် စီဖ့ကလ့ၤဝံၤ အလီၢ်ခံန့ၣ်လီၤ. သ့ၣ်နီၣ်ထီၣ်သုဝဲလၢ ဖဲယ့ၣ်ၡူးအိၣ်လၢဟီၣ်ခိၣ်အခါ ကစၢ်ယါဘျါန့ၣ် တၢ်ဆူးတၢ်ဆါအကလုာ်ကလုာ်လၢ ပှၤတူၢ်ဘၣ်အီၤတဖၣ်လီၤ. ပှၤလၢအသံတ့ၢ်တဖၣ်ဒၣ်လဲာ် မၤမူထီၣ်က့ၤန့ၢ်ဝဲလီၤ. ယ့ၣ်ၡူးမၤတ့ၢ်တၢ်တဖၣ်အံၤန့ၣ် ပာ်ဖျါထီၣ်တၢ်လၢအကမၤဝဲလၢ ဟီၣ်ခိၣ်ဒီဘ့ၣ်ညါ ဖဲအဟဲကဲထီၣ် ယွၤအဘီမုၢ်အစီပၤအခါန့ၣ်လီၤ.

လၢဟီၣ်ခိၣ်ချၢ ပၤရဒံစူးအသီန့ၣ် တၢ်ကဂ့ၢ်ဒိၣ်မးဆံးအါလဲၣ်န့ၣ် ကွၢ်ဆိကမိၣ်တက့ၢ်. ယ့ၣ်ၡူးဒီးအပှၤဃုထၢဖိတဖၣ် ကပၢတၢ်လၢမူခိၣ်န့ၣ်လီၤ. ပှၤပၢတၢ်တဖၣ်အံၤန့ၣ် ကအံးထွဲကွၢ်ထွဲပှၤဟီၣ်ခိၣ်ဖိကိးဂၤဒဲး ဒီးကကျဲၤန့ၣ်ဝဲလၢ အဝဲသ့ၣ်ကအိၣ်ဘၣ်ဒီးတၢ်သူၣ်ခုသးခုန့ၣ်လီၤ. ဒ်သိးပကန့ၢ်ဘၣ် တၢ်မူအထူအယိာ် လၢပၤရဒံစူးအသီပူၤသပှၢ်ကတၢ်အဂီၢ် ပကဘၣ်မၤမနုၤလဲၣ်န့ၣ် မ်ပကွၢ်ကဒီးတက့ၢ်.