သးစၢ်သ့ၣ်ဧၢ—နကသူ နတၢ်အိၣ်မူ ဒ်လဲၣ်

သးစၢ်မုၣ်ဖိတဂၤ စံးဝဲလၢ “ယအဲၣ်ဒိး အိၣ်ဒီးတၢ်အိၣ်မူ လၢအဂ့ၤကတၢၢ်” လီၤ. နၤစ့ၢ်ကီးနကအဲၣ်ဒိး ဒိးန့ၢ်ဘၣ်တၢ်အိၣ်မူဒ်န့ၣ်လီၤ. ဘၣ်ဆၣ်နဒိးန့ၢ်ဘၣ် တၢ်အိၣ်မူလၢအဂ့ၤကတၢၢ်ကသ့ဒ်လဲၣ်. နကနၢ်ဟူဘၣ်တၢ်ကစီၣ်တနီၤမ့တမ့ၢ် နတံၤသကိးဒီး သရၣ်တဖၣ် ကစံးဘၣ်နၤလၢ နမ့ၢ်ဒိးန့ၢ်ဘၣ် ကျိၣ်စ့အါအါဒီး တၢ်ဖံးတၢ်မၤလၢအပတီၢ်ထီန့ၣ် နကအိၣ်ဒီး တၢ်အိၣ်မူလၢအဂ့ၤကတၢၢ်န့ၣ်လီၤ.

ဘၣ်ဆၣ်လံာ်စီဆှံဟ့ၣ်ပလီၢ်ဝဲ သးစၢ်တဖၣ်လၢ အဝဲသ့ၣ်မ့ၢ်လူၤပိာ်ထွဲ ဟီၣ်ခိၣ်အတၢ်သူၣ်လီသးကွံန့ၣ် မ့ၢ်ဒၣ် “တၢ်မၤတဂိာ်တသီၣ်ဘၣ်တၢ်ဘၣ်” လီၤ. (စံၣ်တဲၤတဲလီၤတၢ် ၄:၄) အဒိ, ပှၤသးစၢ်လၢအဒိးန့ၢ်ဘၣ် တၢ်ထူးတၢ်တီၤဒီး တၢ်မံၤဟူသၣ်ဖျါန့ၣ် အိၣ်ထဲစှၤဂၤလီၤ. ဘၣ်ဆၣ်အဝဲသ့ၣ်တဒိးန့ၢ်ဘၣ် တၢ်သူၣ်မံသးမုာ် ဒ်အမုၢ်လၢ်ပာ်ဝဲအသိးဘၣ်. ဘြံးတၢၣ်သးစၢ်တဂၤလၢ အဂုာ်ကျဲးစၢးဝဲဒ်သိးကဒိးန့ၢ်ဘၣ် တၢ်ဖံးတၢ်မၤလၢအပတီၢ်ထီလၢ တၢ်ကူၣ်ဘၣ်ကူၣ်သ့တကပၤန့ၣ် စံးဝဲဒ်အံၤ “တၢ်ထူးတၢ်တီၤဒီး တၢ်မံၤဟူသၣ်ဖျါန့ၣ် လီၤဂာ်ဒ်တလါတဖျၢၣ်လၢ အအိၣ်ကလီလီၤ. ပမ့ၢ်အိးထီၣ်ကွၢ်လၢ အပူၤန့ၣ်တၢ်တအိၣ်နီတမံၤဘၣ်.” တဘျီတခီၣ် လၢတၢ်ဖံးတၢ်မၤအဃိ နကကဲဒိၣ်ဒီး နမံၤကဟူသၣ်ကဖျါဝဲလီၤ. ဘၣ်ဆၣ်နတၢ်မၤန့ၣ်မၤလၢပှဲၤနတၢ်လိၣ်ဘၣ်လၢနီၢ်သးတခီတသ့ဘၣ်. (မးသဲ ၅:၃) ၁ ယိၤဟၣ် ၂:၁၇ ဟ့ၣ်ပလီၢ်ပှၤလၢ “ဟီၣ်ခိၣ်အတၢ်သးကွံန့ၣ် ဒံကွံာ်ဝဲလီၤ.” လၢတၢ်န့ၣ်အဃိ ဖဲပအိၣ်မူဘၣ်လၢဟီၣ်ခိၣ်ချၢအဆၢကတီၢ် ပမ့ၢ်ကဲဒိၣ်ကဲပှၢ်သနာ်က့ မ့ၢ်ဒၣ်တၢ်တစိၢ်တလီၢ်လီၤ.

စံၣ်တဲၤတဲလီၤတၢ် ၁၂:၁ န့ၣ်ဟ့ၣ်သဆၣ်ထီၣ်ဝဲ သးစၢ်တဖၣ်လၢ– “နသးစၢ်ဒံးအမုၢ်နံၤန့ၣ် သ့ၣ်နီၣ်ထီၣ်က့ၤပှၤလၢ အတ့လီၤနၤတက့ၢ်.” လၢတၢ်န့ၣ်အဃိ ကျဲလၢအဂ့ၤကတၢၢ်တဘိန့ၣ် နကဘၣ်မၤယဟိဝၤယွၤအတၢ်မၤ လၢနတၢ်အိၣ်မူအပူၤလီၤ. အဆိကတၢၢ်န့ၣ် နကဘၣ်တုၤထီၣ်ထီၣ်ဘးလၢ နကမၤယဟိဝၤယွၤအတၢ်မၤအဂီၢ်လီၤ. နမၤကသ့ဒ်လဲၣ်. ဒီးတၢ်မၤယဟိဝၤယွၤ အတၢ်မၤန့ၣ်ပၣ်ဃုာ် ဒီးတၢ်မနုၤလဲၣ်.

နကဘၣ်တုၤထီၣ်ထီၣ်ဘးလၢ နကကဲထီၣ် ပှၤအုၣ်အသးလၢ ယဟိဝၤယွၤအဂီၢ်

တၢတမံၤန့ၣ် နကဘၣ်ဂုာ်ကျဲးစၢးဒ်သိး နကသးအိၣ်မၤယွၤအတၢ်မၤန့ၣ်လီၤ. နမိၢ်နပၢ်တဖၣ်မ့မ့ၢ်ယဟိဝၤပှၤအုၣ်အသးဒၣ်လဲာ် တမ့ၢ်လၢနကသးအိၣ်မၤ ကစၢ်ယွၤအတၢ်မၤတဘျီဃီဘၣ်. လၢတၢ်န့ၣ်အဃိ နကဘၣ်ဂုာ်ကျဲးစၢး ဒုးအိၣ်ထီၣ်နတၢ်ရ့လိာ်သးဒီး ယဟိဝၤယွၤလီၤ. သးစၢ်မုၣ်တဂၤစံးဝဲလၢ “တၢ်ဃ့ဘါထုကဖၣ်န့ၣ် မၤစၢၤနၤလၢ နကဘူးထီၣ်ဒီး ယဟိဝၤယွၤအဂီၢ်လီၤ.”—စံးထီၣ်ပတြၢၤ ၆၂:၈; ယၤကိာ် ၄:၈.

ခံမံၤတမံၤန့ၣ် ရိမ့ၤ ၁၂:၂ စံးဝဲလၢ- “သုကမၤကွၢ်ယွၤအတၢ်ဘၣ်အသးလၢ အမ့ၢ်တၢ်ဂ့ၤ ဒီးတၢ်လၢပဂ့ၤအဲၣ်ဒိး ဒီးတၢ်လၢတၢ်ပှဲၤမ့ၢ်တၢ်ဒ်လဲၣ်ဒ်လဲၣ်န့ၣ်တက့ၢ်.” တဘျီတခီၣ်န့ၣ် မ့ၢ်နသးဒ့ဒီဘၣ်ဃးဒီး တၢ်လၢနမၤလိတ့ၢ်တဖၣ်ဧါ. မ့မ့ၢ်ဒ်န့ၣ်န့ၣ် မၤထွဲလံာ်စီဆှံအတၢ်ဟ့ၣ်ဂံၢ်ဟ့ၣ်ဘါဒီး “မၤကွၢ်” ဒ်သိးနကသ့ၣ်ညါလၢ တၢ်သ့ၣ်တဖၣ်အံၤ မ့ၢ်တၢ်မ့ၢ်တၢ်တီတက့ၢ်. ဃုသ့ၣ်ညါတၢ်လၢ နနီၢ်ကစၢ်ဒၣ်နဲတက့ၢ်. ဖးလံာ်စီဆှံဒီး ပလံာ်လဲၢ်တဖၣ်လၢ ဘၣ်တၢ်ဒိးသန့ၤထီၣ်အီၤလၢ လံာ်စီဆှံအပူၤန့ၣ်တက့ၢ်. ပကသ့ၣ်ညါယွၤအဂီၢ် ပကဘၣ်ဃုသ့ၣ်ညါတကးဒံးဘၣ် ပကဘၣ်ဟံးန့ၢ်တၢ်ဆၢကတီၢ်လၢ ပကဆိကမိၣ်ထံတၢ်လၢပဃုသ့ၣ်ညါတဖၣ် ဒ်သိးကနုာ်လီၤဆူပသးပူၤအဂီၢ်လီၤ. ပမ့ၢ်မၤဒ်န့ၣ်န့ၣ် ပတၢ်အဲၣ်ယွၤကဒိၣ်ထီၣ်ဝဲလီၤ.—စံးထီၣ်ပတြၢၤ ၁:၂, ၃.

သၢမံၤတမံၤန့ၣ် တၢ်လၢနမၤလိဘၣ်တဖၣ်န့ၣ် ဂုာ်ကျဲးစၢးဒုးသ့ၣ်ညါပှၤဂၤဒီး နတံၤသကိးလၢကၠိတက့ၢ်. နကခါထီၣ်ခီၣ်ခါလၢခံတခါအဂီၢ်န့ၣ် နကဘၣ်ဟးစံၣ်တဲၤတဲလီၤတၢ်လၢ တဟံၣ်ဘၣ်တဟံၣ်န့ၣ်လီၤ. တဘျီတခီၣ်ဖဲနဟး စံၣ်တဲၤတဲလီၤတၢ်အခါ နကထံၣ်လိာ်သးဒီး နတံၤသကိးလၢ ကၠိတဂၤဂၤလီၤ. အဆိကတၢၢ်န့ၣ် ဘၣ်သ့ၣ်သ့ၣ်နကမဲာ်ဆှးလီၤ. ဘၣ်ဆၣ်လံာ်စီဆှံ ဟ့ၣ်ဂံၢ်ဟ့ၣ်ဘါပှၤဒ်သိးပသု “မဲာ်တဆှးဘၣ်လၢ ခရံာ်အတၢ်သးခုကစီၣ်” တဂ့ၤအဂီၢ်န့ၣ်လီၤ. (ရိမ့ၤ ၁:၁၆) နီၢ်နီၢ်နတၢ်စံၣ်တဲၤတဲလီၤတၢ်န့ၣ် မၤစၢၤပှၤဟီၣ်ခိၣ်ဖိတဖၣ်လၢ ကအိၣ်ဒီးတၢ်မုၢ်လၢ် ဒီးကဒိးန့ၢ်ဘၣ်တၢ်မူအဂီၢ်လီၤ. ဘၣ်မနုၤအဃိ နဘၣ်မဲာ်ဆှးလဲၣ်.

နမိၢ်နပၢ်မ့မ့ၢ် ယဟိဝၤပှၤအုၣ်အသးန့ၣ် ဘၣ်သ့ၣ်သ့ၣ်နကလဲၤစံၣ်တဲၤတဲလီၤတၢ်ဒီးအဝဲသ့ၣ်စ့ၢ်ကီးလီၤ. ဖဲနလဲၤစံၣ်တဲၤတဲလီၤတၢ်လၢ တဟံၣ်ဘၣ်တဟံၣ်အခါ နအိၣ်ဘှီၣ်ကလာ်ဧါ. မ့တမ့ၢ်နဟ့ၣ်လီၤ မဲးကစံဒီး လံာ်ဖိတဖၣ်ဒီးဝံၤလီၤဧါ. နမ့ၢ်မၤဒ်န့ၣ်ဒီး မ့ၢ်နမၤဂ့ၤထီၣ်နတၢ်စံၣ်တဲၤတဲလီၤအါန့ၢ်အန့ၣ်ကသ့ဧါ. နသူလံာ်စီဆှံဒီး နတဲနၢ်ပၢၢ်ဟံၣ်ကစၢ်လၢ နနီၢ်ကစၢ်ဒၣ်နဲကသ့ဧါ. နမၤဒ်န့ၣ်မ့ၢ်တသ့ဘၣ်န့ၣ် နဃ့တၢ်မၤစၢၤလၢနမိၢ်နပၢ် မ့တမ့ၢ် ပှၤလၢအဒိၣ်တုာ်ခိၣ်ပှဲၤလၢ တၢ်အိၣ်ဖှိၣ်ပူၤသ့ဝဲလီၤ. ပာ်လီၤဖီတၢၣ်လၢ နကကဲထီၣ်ပှၤစံၣ်တဲၤတဲလီၤတၢ်ဖိ တဂၤတက့ၢ်.

လၢခံနကအဲၣ်ဒိး ဟ့ၣ်လုၢ်ထီၣ်နသးဆူ ကစၢ်ယွၤအအိၣ်လီၤ. တၢ်ဟ့ၣ်လုၢ်ထီၣ်သး ဆူယွၤအအိၣ်န့ၣ်မ့ၢ်နမၤတၢ်အၢၣ်လီၤအီလီၤဒီး ကစၢ်ယွၤလၢနကမၤအတၢ်မၤ စးထီၣ်ခဲအံၤဒီးဆူညါန့ၣ်လီၤ. (ရိမ့ၤ ၁၂:၁) ဘၣ်ဆၣ်နဟ့ၣ်လုၢ်ထီၣ်နသးဆူ ယဟိဝၤယွၤအအိၣ်လၢတၢ်ထုကဖၣ်အပူၤန့ၣ် တလၢပှဲၤဒံးဘၣ်. ကစၢ်ယွၤဃ့ပဝဲကိးဂၤဒဲးဒ်သိး ပကအၢၣ်လီၤအီလီၤ “လၢပထးခိၣ်. . .တုၤလၢတၢ်အုၣ်က့ၤခီၣ်က့ၤ” အဂီၢ်လီၤ. (ရိမ့ၤ ၁၀:၁၀) ဖဲနကဒိးဘျၢထံအဆၢကတီၢ်န့ၣ် နကဘၣ်အၢၣ်လီၤအီလီၤလၢ နထးခိၣ်လၢနအိၣ်ဒီးတၢ်စူၢ်တၢ်နာ်လီၤ. မ့ၢ်ဝံၤဒီးနဒိးဘျၢထံသ့ဝဲလီၤ. (မးသဲ ၂၈:၁၉, ၂၀) တၢ်ဒိးဘျၢထံန့ၣ် မ့ၢ်ခီၣ်ခါလၢအရ့ဒိၣ်တခါလီၤ. ဘၣ်ဆၣ် တဘၣ်ဂုၤကဒါက့ၤလၢနလီၢ်ခံ ခီဖျိနဘၣ်ယိၣ်တၢ်လၢ ခါဆူညါနကမၤဘၣ်တၢ်ကမၣ်အဃိန့ၣ်တဂ့ၤ. နမ့ၢ်သန့ၤနသးလၢကစၢ်ယွၤ ဒ်သိးနကဒိးန့ၢ်ဘၣ်တၢ်ဂံၢ်တၢ်ဘါအဂီၢ်န့ၣ် ကစၢ်ကဟ့ၣ်နၤ “အစိအကမီၤဒိၣ်ကဲၣ်ဆိး” လၢနကအိၣ်ဂၢၢ်ဆိးကျၢၤအဂီၢ်လီၤ.—၂ ကရံၣ်သူး ၄:၇; ၁ ပ့းတရူး ၅:၁၀

ဖဲနဒိးဘျၢထံအဆၢကတီၢ် နကဲထီၣ်ယဟိဝၤ ပှၤအုၣ်အသးတဂၤလီၤ. (ယၡါယၤ ၄၃:၁၀) လၢတၢ်န့ၣ်အဃိ နတၢ်အိၣ်မူအတၢ်ပညိၣ်တဖၣ် ကဆီတလဲအသးလီၤ. တၢ်ဟ့ၣ်လုၢ်ထီၣ်သးန့ၣ် အခီပညီမ့ၢ်ဝဲနက ‘ညိကွံာ်နသး’ လီၤ. (မးသဲ ၁၆:၂၄) လၢတၢ်န့ၣ်အဃိ နကဘၣ်ပာ်တ့ၢ်ကွံာ် နနီၢ်ကစၢ်အဖီတၢၣ်ဒီး တၢ်မိၣ်န့ၢ်သးလီတနီၤ ဒ်သိးနက “ဃုဆိယွၤအဘီအမုၢ်” အဂီၢ်လီၤ. (မးသဲ ၆:၃၃) လၢတၢ်န့ၣ်အဃိ တၢ်ဟ့ၣ်လုၢ်ထီၣ်သး ဒီးတၢ်ဒိးဘျၢထံန့ၣ် ဒုးအိၣ်ထီၣ်တၢ်ခွဲးတၢ်ယာ်အါမးလၢ နကမၤကစၢ်ယွၤအတၢ်မၤအဂီၢ်လီၤ. ပကဆိကမိၣ်ကွၢ် တၢ်ခွဲးတၢ်ယာ်တနီၤတက့ၢ်.

တၢ်ခွဲးတၢ်ယာ်လၢ နကမၤကစၢ်ယွၤအတၢ်မၤလၢ ဆၢကတီၢ်အလၢအပှဲၤ

● ပှၤလဲၤလၢညါ တၢ်မၤန့ၣ် မ့ၢ်တၢ်ခွဲးတၢ်ယာ်လၢ နကမၤကစၢ်ယွၤအတၢ်မၤလၢ ဆၢကတီၢ်အလၢအပှဲၤန့ၣ်လီၤ. ပှၤလၢအကမၤပှၤလဲၤလၢညါန့ၣ် ကဘၣ်မ့ၢ်ပှၤလၢ အဘျၢထံဝံၤ, အဒိဂ့ၤတဲာ်ဘၣ် ဒီးတလါန့ၣ် ကဘၣ်ပၣ်ဃုာ်လၢ တၢ်စံၣ်တဲၤတဲလီၤတၢ်မၤအပူၤ အစှၤကတၢၢ်အနၣ်ရံၣ် ၇ဝ လီၤ. အဝဲမ့ၢ်သူအတၢ်ဆၢကတီၢ်လၢ တၢ်စံၣ်တဲၤတဲလီၤတၢ်မၤအပူၤအါအါန့ၣ် အတၢ်သ့တၢ်ဘၣ်လၢတၢ်စံၣ်တဲၤတဲလီၤဒီး တၢ်သိၣ်လိတကပၤန့ၣ် ကလဲၤထီၣ်လဲၤထီဝဲလီၤ. ပှၤလဲၤလၢညါတဖၣ်မၤစၢၤဘၣ်ဝဲ ပှၤလၢအမၤလိလံာ်စီဆှံဒီးအီၤတဖၣ် တုၤလၢအဝဲသ့ၣ်ဘျၢထံဝံၤဒီး ကဲထီၣ်ယဟိဝၤပှၤအုၣ်အသးအဃိ အဝဲသ့ၣ်ဒိးန့ၢ်ဘၣ်ဝဲတၢ်သူၣ်ခုသးခုလီၤ. တၢ်ဖံးတၢ်မၤလၢ ကဟ့ၣ်ပှၤတၢ်သးခုဒီး တၢ်သူၣ်မံသးမုာ်ထဲအံၤန့ၣ် တအိၣ်နီတမံၤဘၣ်.

ပှၤလဲၤလၢညါအါတက့ၢ်န့ၣ် ကဘၣ်ဖံးတၢ်မၤတၢ်လၢ တၢ်လုၢ်အီၣ်သးသမူအဂီၢ်စ့ၢ်ကီးလီၤ. ပှၤအါဂၤန့ၣ် ဒ်သိးကလုၢ်အီၣ်အသးသမူအဂီၢ် မၤလိန့ၢ်တၢ်သ့တၢ်ဘၣ်တခါခါလၢကၠိ မ့တမ့ၢ် လၢမိၢ်ပၢ်အအိၣ်လီၤ. နဖျိထီၣ်ကၠိမ့ၢ်ဝံၤဒီး နၤဒီးနမိၢ်နပၢ် မ့ၢ်ဆိကမိၣ်ဝဲလၢ အဘျုးကအိၣ်လၢ နကထီၣ်တၢ်မၤလိအသီတခါန့ၣ် တဘၣ်မ့ၢ်လၢ နကဒိးန့ၢ်ဘၣ်ကျိၣ်စ့အါအါအဂီၢ်ဘၣ်. ကဘၣ်မ့ၢ်ဒ်သိးကကဲဘျုးလၢ နကမၤအါထီၣ်တၢ်စံၣ်တဲၤတဲလီၤတၢ်မၤအဂီၢ် ဒီးလၢနကကဲထီၣ်ပှၤလၢ အစံၣ်တဲၤတဲလီၤတၢ်လၢ ဆၢကတီၢ်အလၢအပှဲၤအဂီၢ်လီၤ.

ပှၤလဲၤလၢညါတဂၤန့ၣ် တဘၣ်သးစၢၢ်ဆၢတၢ်ဖံးတၢ်မၤလၢ နီၢ်ခိအဂီၢ်ဘၣ်. အဝဲကဘၣ်သးစၢၢ်ဆၢဝဲ အတၢ်စံၣ်တဲၤတဲလီၤတၢ်မၤ လၢကမၤစၢၤပှၤဂၤလၢ ကဒိးန့ၢ်ဘၣ်တၢ်မူအဂီၢ်လီၤ. မ့ၢ်နအဲၣ်ဒိးပာ်လီၤ ဖီတၢၣ်လၢ နကမၤပှၤလဲၤလၢညါဧါ. နမ့ၢ်စးထီၣ်မၤပှၤလဲၤလၢညါ အတၢ်မၤန့ၣ် နကဒိးန့ၢ်ဘၣ်တၢ်ခွဲးတၢ်ယာ်လၢ အဂၤစ့ၢ်ကီးလီၤ. အဒိ, ပှၤလဲၤလၢညါတနီၤန့ၣ် ကသုးအသးဆူ တၢ်လီၢ်လၢပှၤလိၣ်ဘၣ် ပှၤစံၣ်တဲၤတဲလီၤတၢ်ဖိ အလီၢ်န့ၣ်လီၤ. တနီၤန့ၣ်မၤလိဝဲကျိာ်လၢအဂၤဒီး နုာ်လီၤမၤသကိးတၢ်ဒီးတၢ်အိၣ်ဖှိၣ်တဖုလၢ ကတိၤဝဲကျိာ်အံၤန့ၣ်လီၤ. မ့တမ့ၢ် အဝဲသ့ၣ်သုးအသးဆူ ထံကီၢ်တဘ့ၣ်လၢ ထံဖိကီၢ်ဖိတဖၣ်ကတိၤဝဲကျိာ်အံၤန့ၣ်လီၤ. နမ့ၢ်မၤပှၤလဲၤလၢညါန့ၣ် နတၢ်အိၣ်မူကပှဲၤဒီး တၢ်သးခုလီၤ.

● ပှၤစိာ်ဘီမုၢ်တၢ်သးခုကစီၣ်ဖိအကၠိ အံၤမ့ၢ်တၢ်ခွဲးတၢ်ယာ်လၢ နကမၤအါထီၣ်ယွၤအတၢ်မၤအဂီၢ်လီၤ. ကၠိလၢအယံာ်ဝဲခံလါအံၤ ဘၣ်တၢ်ကတဲာ်ကတီၤအီၤလၢ ကသိၣ်လိပှၤလဲၤလၢညါလၢ အအိၣ်ဒီးတၢ်လဲၤခီဖျိတဖၣ်လီၤ. အဝဲသ့ၣ်အသးအိၣ်ပာ်တ့ၢ်အတၢ်အိၣ်တၢ်ဆိးအလီၢ်လၢ ကလဲၤမၤတၢ်သးခုကစီၣ်တၢ်မၤလၢ တၢ်လီၢ်လၢပှၤလိၣ်ဘၣ် တၢ်မၤစၢၤန့ၣ်လီၤ. မ့ၢ်ဒၣ်အဝဲသ့ၣ်စံးဝဲ “ကွၢ်ကွၢ်, ယၤလီၤ. မၢလီၤယၤတက့ၢ်” ဒီးကွၢ်လိမၤဒိးဝဲ ယ့ၣ်ၡူးခရံာ်လၢအမ့ၢ် ပှၤစိာ်တၢ်သးခုကစီၣ် အဒိၣ်ကတၢၢ်တဂၤလၢ ဟီၣ်ခိၣ်ချၢလီၤ. (ယၡါယၤ ၆:၈; ယိၤဟၣ် ၇:၂၉) အဝဲသ့ၣ်ကဘၣ်လဲၤသုးအသးဆူ တၢ်လီၢ်လၢအယံၤအဃိ ဘၣ်သ့ၣ်သ့ၣ် ကဘၣ်မၤဘၣ်လိာ် အတၢ်အိၣ်မူအပတီၢ် ဒ်ပှၤပတီၢ်မုၢ်အသိးလီၤ. ဘၣ်သ့ၣ်သ့ၣ် တၢ်ဆဲးတၢ်လၤ, မူခိၣ်ကလံၤသီၣ်ဂီၤဒီး တၢ်အီၣ်တၢ်အီကလီၤဆီဝဲလီၤ. ဒီးကဘၣ်မၤလိသ့အသးလၢ ကျိာ်အသီစ့ၢ်ကီးန့ၣ်လီၤ. ကၠိအံၤမၤစၢၤဝဲ ဒီပုၢ်ဝဲၢ်မုၣ်ဒီပုၢ်ဝဲၢ်ခွါလၢ အအိၣ်သဘျ့တဖၣ် ဒီးနီၢ်ဒီမါဝၤတဖၣ်လၢ အသးအိၣ် ၂၃ နံၣ်တုၤ ၆၅ နံၣ်လၢ ကမၤဒိၣ်ထီၣ်အါထီၣ် နီၢ်သးတၢ်ဂ့ၤတၢ်ဝါတဖၣ်အဂီၢ်လီၤ. တၢ်ဂ့ၤတၢ်ဝါတဖၣ်အံၤကကဲထီၣ်တၢ်မၤစၢၤဖဲ အဝဲသ့ၣ်ဒိးန့ၢ်ဘၣ်မူဒါအခါ တကးဒံးဘၣ် မၤစၢၤအဝဲသ့ၣ်လၢ ကမၤဒိၣ်ထီၣ်အါထီၣ် အတၢ်သ့တၢ်ဘၣ် ဒ်သိးယဟိဝၤယွၤ ဒီးအတၢ်ကရၢကရိသူအဝဲသ့ၣ် လၢလၢပှဲၤပှဲၤကသ့အဂီၢ်န့ၣ်လီၤ.

● ဘ့ၤသ့လးတၢ်မၤ န့ၣ်မ့ၢ်တၢ်ခွဲးတၢ်ယာ်တခါလၢ ပှၤကဟ့ၣ်လီၤအသးလၢ ကမၤတၢ်လၢယဟိဝၤပှၤအုၣ်အသး အဝဲၤတြၢ်တတီၤတီၤအပူၤလီၤ. ပှၤဘ့ၤသ့လးဖိတနီၤန့ၣ် မၤတၢ်လၢကထုးထီၣ်ရၤလီၤ လံာ်လဲၢ်တဖၣ်လၢ ဘၣ်တၢ်ဒိးသန့ၤထီၣ်အီၤလၢ လံာ်စီဆှံအပူၤလီၤ. အဂၤတနီၤန့ၣ် ဘၣ်တၢ်ဟ့ၣ်အီၤမူဒါလၢ ကကွၢ်ထွဲဘှီဂ့ၤထီၣ်က့ၤ ဘ့ၤသ့လးအတၢ်သူၣ်ထီၣ်ဒီး တၢ်အပီးအလီတဖၣ် မ့တမ့ၢ် တၢ်ကွၢ်ထွဲဘ့ၤသ့လးဟံၣ်ဖိဃီဖိတဖၣ် အတၢ်လိၣ်ဘၣ်လၢ နီၢ်ခိတခီအဂီၢ်န့ၣ်လီၤ. မူဒါတဖၣ်လၢအဝဲသ့ၣ်ဒိးန့ၢ်ဘၣ်ဝဲန့ၣ် မ့ၢ်တၢ်ခွဲးတၢ်ယာ်လီၤဆီလၢ ကမၤတၢ်လၢ ယဟိဝၤယွၤအဂီၢ်န့ၣ်လီၤ. ပှၤဘ့ၤသ့လးဖိတဖၣ် သ့ၣ်ညါဝဲလၢအတၢ်ဖံးတၢ်မၤန့ၣ် ကဲဘျုးလၢ ဒီပုၢ်ဝဲၢ်လၢဟီၣ်ခိၣ်ဒီဘ့ၣ်အဂီၢ်အဃိ အဝဲသ့ၣ်သးခုဝဲဒိၣ်မးလီၤ.

ဒီပုၢ်ဝဲၢ်တနီၤလၢ အိၣ်ဒီးတၢ်သ့တၢ်ဘၣ်လီၤဆီန့ၣ် ဘၣ်တၢ်ကွဲမုာ်အီၤလၢ ကမၤတၢ်လၢ ဘ့ၤသ့လးန့ၣ်လီၤ. ဘၣ်ဆၣ်ပှၤအါတက့ၢ်န့ၣ် ဖဲအဝဲသ့ၣ်ဟဲတုၤဝံၤအလီၢ်ခံ ကဒိးန့ၢ်ဘၣ်ဝဲတၢ်မၤလိန့ၣ်လီၤ. အဝဲသ့ၣ်တမၤတၢ်လၢ ကဒိးန့ၢ်ဘၣ်ဝဲ ကျိၣ်စ့အဂီၢ်ဘၣ်. ဘၣ်ဆၣ် အဝဲသ့ၣ်သးမံဝဲလၢ ဒိးန့ၢ်ဘၣ်ဝဲ တၢ်အိၣ်တၢ်ဆိးအလီၢ်, တၢ်အီၣ်တၢ်အီဒီး ကျိၣ်စ့တစဲးလၢ အနီၢ်ကစၢ်တၢ်လၢာ်ဘူၣ်လၢာ်စ့ၤအဂီၢ်လီၤ. ပှၤဘ့ၤသ့လးဖိတဂၤ စံးဝဲလၢ “တၢ်လၢယဘၣ်မၤအီၤ ကိးနံၤဒဲးန့ၣ် တညီဝဲထီဘိဘၣ်. ဘၣ်ဆၣ်မ့ၢ်တၢ်လၢအလီၤသးခုဒိၣ်မးလီၤ. ခီဖျိယမၤဘၣ်တၢ် ဖဲဘ့ၤသ့လးအဃိ ယဒိးန့ၢ်ဘၣ်တၢ်ဆိၣ်ဂ့ၤ အါမးလီၤ.”

● တၢ်သူၣ်ထီၣ်တၢ်မၤ န့ၣ်မ့ၢ်တၢ်ခွဲးတၢ်ယာ်တခါလၢ ကမၤစၢၤတၢ်ဖဲ ပှၤသူၣ်ထီၣ်ဝဲၤတြၢ်ဒီး ဘီမုၢ်ဘျီၣ်ဒိၣ်အဆၢကတီၢ်န့ၣ်လီၤ. ပှၤမၤတၢ်လၢတၢ်သူၣ်ထီၣ်ဘှီထီၣ်တကပၤန့ၣ် ဘၣ်တၢ်ကိးအဝဲသ့ၣ်လၢ ပှၤဘှီတၢ်ဖိန့ၣ်လီၤ. တၢ်အံၤမ့ၢ်တၢ်ခွဲးတၢ်ယာ်လီၤဆီဒီး လီၤဂာ်ဒ်တၢ်မၤလၢ တၢ်သူၣ်ထီၣ်စီၤၡလိၤမိၤ အတၢ်လုၢ်ဟံၣ်အသိးန့ၣ်လီၤ. (၁ စီၤပၤ ၈:၁၃-၁၈) ပှၤဘှီတၢ်ဖိတဖၣ်န့ၣ် ဘၣ်တၢ်ကတဲာ်ကတီၤန့ၢ်အီၤ နီၢ်ခိအတၢ်လိၣ်ဘၣ်တဖၣ် ဒ်ပှၤဘ့ၤသ့လးဖိအသိးလီၤ. ဒီပုၢ်ဝဲၢ်မုၣ်ဒီပုၢ်ဝဲၢ်ခွါတဖၣ်အံၤ ဒိးန့ၢ်ဘၣ်တၢ်ခွဲးတၢ်ယာ်လီၤဆီလၢ ကမၤဘၣ်ဝဲတၢ်မၤလၢ ကကဲထီၣ်တၢ်စံးထီၣ်ပတြၢၤလၢ ယဟိဝၤယွၤအဂီၢ်န့ၣ်လီၤ.

မၤယွၤအတၢ်မၤလၢ သးဒီဖျၢၣ်တက့ၢ်

နမ့ၢ်သူနတၢ်အိၣ်မူလၢ နကမၤယဟိဝၤယွၤ အတၢ်မၤအဂီၢ်န့ၣ်မ့ၢ်ကျဲလၢအဂ့ၤကတၢၢ်လီၤ. လၢတၢ်န့ၣ်အဃိ ပာ်လီၤနဖီတၢၣ်လၢ နကမၤယွၤအတၢ်မၤလၢ ဆၢကတီၢ်အလၢအပှဲၤတက့ၢ်. ဘၣ်ဃးဒီးနကမၤတၢ်လၢ ဆၢကတီၢ်အလၢအပှဲၤအဂီၢ်န့ၣ် တၢၣ်ပီၣ်တၢၣ်ပီတၢ်ဂ့ၢ်အဝဲအံၤဒီး နမိၢ်နပၢ်, နတၢ်အိၣ်ဖှိၣ်သးပှၢ်တဖၣ်ဒီး ကဝီၤအပှၤကွၢ်တၢ်တက့ၢ်. နမ့ၢ်အဲၣ်ဒိးမၤတၢ်လၢဘ့ၤသ့လး မ့တမ့ၢ် နမ့ၢ်အဲၣ်ဒိးထီၣ် ပှၤစိာ်ဘီမုၢ်တၢ်သးခုကစီၣ်ဖိအကၠိ န့ၣ်လဲၤထီၣ်တၢ်အိၣ်ဖှိၣ်ရိဖှိၣ်လၢ ပှၤအဲၣ်ဒိးပတံထီၣ်တၢ်တဖၣ်အဂီၢ်လၢ ဘၣ်တၢ်မၤအီၤဖဲ ကီၢ်ရ့ၣ်တၢ်အိၣ်ဖှိၣ်ဖးဒိၣ်အဆၢကတီၢ်န့ၣ်တက့ၢ်.

ပှၤမၤယွၤအတၢ်မၤလၢဆၢကတီၢ်အလၢအပှဲၤတန့ၢ်ကိးဂၤဒဲးဘၣ်. ဒီးပှၤကိးဂၤဒဲးန့ၣ် တမ့ၢ်လၢကတုၤထီၣ်ထီၣ်ဘးလၢ တၢ်မၤအံၤအဂီၢ်ဘၣ်. တဘျီတခီၣ်န့ၣ်မ့ၢ်လၢ တၢ်အိၣ်ဆူၣ်အိၣ်ချ့, ကျိၣ်စ့ဒီး ဘၣ်ကွၢ်ထွဲဝဲဟံၣ်ဖိဃီဖိအဃိ ကဲထီၣ်တၢ်ကီတၢ်ခဲလၢ ကမၤအါထီၣ်ဝဲယွၤအတၢ်မၤအဂီၢ်လီၤ. လၢတၢ်န့ၣ်အဃိ ခရံာ်ဖိလၢ အဟ့ၣ်လုၢ်ထီၣ်အသးဝံၤတဖၣ်န့ၣ် ကဘၣ်ဒိကနၣ်ဝဲ လံာ်စီဆှံအတၢ်မၤလိာ်လၢအစံးဝဲ– “အဲၣ်ယွၤနကစၢ်လၢ နသူၣ်ကံၢ်သးလဲ ဒီးနသးဒီဖျၢၣ်ညါ ဒီးနတၢ်ကူၣ်တၢ်ဖးတုၤအလၢာ်တက့ၢ်.” (မးသဲ ၂၂:၃၇) တသ့ဖဲအသ့န့ၣ် ယဟိဝၤယွၤအဲၣ်ဒိးလၢ နကဂုာ်ကျဲးစၢးမၤအတၢ်မၤလၢ အဂ့ၤကတၢၢ်လီၤ. နတၢ်အိၣ်မူအတၢ်အိၣ်သး မ့ၢ်အိၣ်ဒ်လဲၣ်ဂ့ၤဒ်လဲၣ်ဂ့ၤန့ၣ် သးစၢၢ်ဆၢလၢနကမၤယဟိဝၤယွၤအတၢ်မၤ ဒီးပာ်လီၤနဖီတၢၣ်တဖၣ်လၢ ယွၤအတၢ်မၤအဂီၢ်တက့ၢ်. ဖဲ “နသးစၢ်ဒံးအမုၢ်နံၤန့ၣ် သ့ၣ်နီၣ်ထီၣ်က့ၤပှၤလၢ အတ့လီၤနၤတက့ၢ်.” နမ့ၢ်မၤဒ်န့ၣ်ဒီး နကဒိးန့ၢ်ဘၣ်တၢ်ဆိၣ်ဂ့ၤ လီၤထူလီၤယိာ်လီၤ.