အဆၢဒိၣ် ၁၀
တၢ်ဆီဟံၣ်ဆီဃီ တၢ်ဟ့ၣ်တမံၤလၢ ယွၤလၢအိၣ်ဒီးတၢ်အဲၣ်အအိၣ်
“ပျံၤပိၤအသးလၢ ပျံၤဖိသၢဘိန့ၣ် တၢ်မၤတဲာ်အီၤကီလီၤ.”—စံၣ်တဲၤတဲလီၤ ၄:၁၂, ခစ.
၁, ၂. (က) ဘၣ်ဃးဒီးပှၤထီၣ်ပှၢ်သီခံဂၤန့ၣ် ဘၣ်တဘျီဘျီ ပကဆိကမိၣ်ဘၣ် တၢ်မနုၤလဲၣ်. လၢမနုၤအဃိလဲၣ်. (ခ) အဆၢဒိၣ်အံၤအပူၤ ပကသမံသမိးကွၢ် တၢ်သံကွၢ်မနုၤတဖၣ်လဲၣ်.
နဘၣ်သူၣ်ဘၣ်သး တၢ်လဲၤတၢ်တ့တၢ်ဖျီအမူးန့ၣ်ဧါ. မူးဒ်သိးအံၤန့ၣ် လီၤသူၣ်ဖှံသးညီဒိၣ်မးအဃိ ပှၤအါဂၤ ဘၣ်သူၣ်ဘၣ်သးလီၤ. နကထံၣ်ဘၣ်လၢ ပှၤခံဂၤအံၤကူကၤ အဂ့ၤကတၢၢ်လီၤ. တကးဘၣ်အမဲာ်ညါ အဝဲသ့ၣ်အမဲာ်ပှဲၤမးဒီး တၢ်နံၤကမှံန့ၣ်လီၤ. မုၢ်နံၤအံၤန့ၣ် အဝဲသ့ၣ် အသးခုဒိၣ်မးဒီး ခါဆူညါ အဝဲသ့ၣ် အတၢ်အိၣ်မူန့ၣ် လီၤဂာ်လၢ ပှဲၤမးဒီး တၢ်မုၢ်လၢ်န့ၣ်လီၤ.
၂ ဘၣ်ဆၣ်, နကအၢၣ်လီၤတူၢ်လိာ်လၢ မုၢ်မဆါတနံၤအံၤ တၢ်ဆီဟံၣ်ဆီဃီန့ၣ် အိၣ်ပှဲၤဒီး တၢ်တဘၣ်လီၢ်ဘၣ်စးန့ၣ်လီၤ. ပမုၢ်လၢ်အဂ့ၤကတၢၢ်လၢ ပှၤထီၣ်ပှၢ်သီခံဂၤအံၤ ခါဆူညါ ကအိၣ်ဒီး ဟံၣ်မုာ်ဃီပၢၤ သနာ်က့ ဘၣ်တဘျီဘျီ ပကဆိကမိၣ်ဘၣ်လၢ ‘အဝဲသ့ၣ်အဟံၣ်ဃီအံၤ ကမုာ်ပၢၤကစီဒီဧါ, ကဂၢၢ်ကျၢၤစ့ၢ်ကီးဧါ’ လီၤ. တၢ်သံကွၢ်တဖၣ်အံၤ အတၢ်စံးဆၢန့ၣ် ကသန့ၤထီၣ်အသးလၢ မါဒီးဝၤခံဂၤအတၢ်နာ်ဒီး တၢ်မၤထွဲယွၤအတၢ် ဟ့ၣ်ကူၣ်ဟ့ၣ်ဖးလၢဘၣ်ဃး တၢ်ဆီဟံၣ်ဆီဃီန့ၣ်လီၤ. (ကတိၤဒိ ၃:၅, ၆) အဝဲသ့ၣ် ကအိၣ်ဂၢၢ်ဆိးကျၢၤလၢ ယွၤအတၢ်အဲၣ်ပူၤအဂီၢ် လိၣ်လၢကဘၣ်မၤဝဲ ဒ်သိးန့ၣ်လီၤ. ခဲအံၤ ပကသမံသမိးကွၢ် လံာ်စီဆှံအတၢ်စံးဆၢ တၢ်သံကွၢ်လွံၢ်မံၤအံၤတက့ၢ်. ဘၣ်မနုၤအဃိ ပှၤအဲၣ်ဒိးဆီဟံၣ်ဆီဃီလဲၣ်. နမ့ၢ်အဲၣ်ဒိးဆီဟံၣ်ဆီဃီဒီး နကြၢးဃုထၢမတၤလၢ သးသမူတံၤသကိးလဲၣ်. နအိၣ်ကတဲာ်ကတီၤနသးလၢ တၢ်ဆီဟံၣ်ဆီဃီအဂီၢ်ကသ့ဒ်လဲၣ်. တၢ်မနုၤကမၤစၢၤ ပှၤဒီမိဝၤခံဂၤအံၤလၢ ကအိၣ်ဒီး ဟံၣ်မုာ်ဃီပၢၤထီဘိအဂီၢ်လဲၣ်.
ဘၣ်မနုၤအဃိ ပှၤအဲၣ်ဒိး ဆီဟံၣ်ဆီဃီလဲၣ်
၃. တၢ်အဂ့ၢ်အခၢးလၢ တလီၤတံၢ်လီၤဆဲးတဖၣ်အဃိ တၢ်ဆီဟံၣ်ဆီဃီန့ၣ် ဘၣ်မနုၤအဃိတမ့ၢ် တၢ်အိၣ်ဒီး တၢ်ကူၣ်သ့လဲၣ်.
၃ ပှၤတနီၤနာ်ဝဲလၢ တၢ်ဆီဟံၣ်ဆီဃီန့ၣ် မ့ၢ်တၢ်အကါဒိၣ်လၢ ကဒိးန့ၢ်တၢ်သူၣ်ခုသးခုအဂီၢ်လီၤ. တနီၤနာ်ဝဲလၢ နမ့ၢ်တထံၣ်သးသမူတံၤသကိးဘၣ်ဒီး လၢနတၢ်အိၣ်မူပူၤ နတထံၣ်တၢ်သးမံ မ့တမ့ၢ် တၢ်သးခုဘၣ်. တၢ်အံၤ တဘၣ်လ့ၤတက့ၤဘၣ်. ယ့ၣ်ၡူးလၢအမ့ၢ် ပှၤအိၣ်သဘျ့တဂၤ စံးဝဲလၢ တၢ်အိၣ်သဘျ့န့ၣ် မ့ၢ်တၢ်ဟ့ၣ်တမံၤဒီး ဟ့ၣ်သဆၣ်ထီၣ်ဝဲလၢ ပှၤလၢ အိၣ်သဘျ့ကဲတဖၣ် ကအိၣ်ကဒီးဝဲဒ်သိးန့ၣ်အဂီၢ်လီၤ. (မးသဲ ၁၉: ၁၀- ၁၂) တၢ်မၢဖိ ပီလူးစ့ၢ်ကီး ပာ်ဖျါဝဲ တၢ်အိၣ်သဘျ့ အဘျုးအဂ့ၢ်လီၤ. (၁ ကရံၣ်သူး ၇: ၃၂-၃၈) တမ့ၢ်ယ့ၣ်ၡူးဒီး ပီလူးထုးထီၣ်တၢ်ဘျၢလၢ ပှၤကဘၣ်အိၣ်သဘျ့ဘၣ်. နီၢ်နီၢ်န့ၣ် တၢ်တြီတၢ်“န့ၢ်မါန့ၢ်ဝၤ” န့ၣ်ပာ်ဃုာ်လၢ “တၢ်ဝံတၢ်နါ အတၢ်သိၣ်တၢ်သီ” အကျါလီၤ. (၁ တံၤမသ့း ၄:၁-၃) ဘၣ်ဆၣ်, တၢ်အိၣ်သဘျ့န့ၣ် အဘျုးအိၣ်လၢ ပှၤလၢအသးအိၣ်မၤ ယဟိဝၤအတၢ်မၤလၢ တအဲၣ်ဒိးအိၣ်ဒီး တၢ်သးဘၣ်တံာ်တာ်တဖၣ်အဂီၢ်လီၤ. လၢတၢ်န့ၣ်အဃိ, တၢ်အဂ့ၢ်အခၢး တလီၤတံၢ်လီၤဆဲး ဒ်သိးဒီး တံၤသကိးအတၢ်မၢဆူၣ်အဃိ တၢ်ဆီဟံၣ်ဆီဃီန့ၣ် တမ့ၢ်တၢ်အိၣ်ဒီး တၢ်ကူၣ်သ့ဘၣ်.
၄. ဟံၣ်မုာ်ဃီပၢၤန့ၣ် တၢ်ကလုၢ်ဒိၣ်ထီၣ်ဖိတဖၣ်အဂီၢ် ပာ်လီၤဝဲတၢ်အခီၣ်တဃာ်မနုၤလဲၣ်.
၄ တၢ်ဂ့ၢ်လီၤတံၢ်အိၣ်လၢ ပကဘၣ်ဆီဟံၣ်ဆီဃီ အဂီၢ်န့ၣ်ဧါ. အိၣ်ဝဲလီၤ. တၢ်ဆီဟံၣ်ဆီဃီန့ၣ် မ့ၢ်တၢ်ဟ့ၣ်တမံၤလၢ ယွၤလၢအိၣ်ဒီး တၢ်အဲၣ်တၢ်ကွံအအိၣ်လီၤ. (၁ မိၤၡ့ ၂: ၁၈) လၢတၢ်န့ၣ်အဃိ, တၢ်ဆီဟံၣ်ဆီဃီန့ၣ် အဘျုးအိၣ်သပှၢ်တၢၢ်ဒီး ဒုးအိၣ်ထီၣ် တၢ်သူၣ်ခုသးခုစ့ၢ်ကီး ကသ့လီၤ. အဒိ, ဟံၣ်မုာ်ဃီပၢၤန့ၣ် မ့ၢ်တၢ်အခီၣ်တဃာ် အဂ့ၤကတၢၢ်လၢ ဟံၣ်ဖိဃီဖိတၢ်အိၣ်မူ အဂီၢ်လီၤ. ဖိသၣ်တဖၣ်လိၣ်ဘၣ် ခိၣ်ဃၢၤလၢအဂၢၢ်အကျၢၤဒီး မိၢ်ပၢ် အတၢ်လုၢ်ဒိၣ်ထီၣ်အီၤလၢ တၢ်အဲၣ်, တၢ်ဘျၢ, ဒီးတၢ်နဲၣ်လိန့ၣ်လီၤ. (စံးထီၣ်ပတြၢၤ ၁၂၇:၃; အ့းဖ့းစူး ၆:၁-၄) ဘၣ်ဆၣ်, တၢ်လုၢ်ဒိၣ်ထီၣ်ဖိန့ၣ် တမ့ၢ်တၢ်အဂ့ၢ်အခၢးလၢ တၢ်ကဆီဟံၣ်ဆီဃီအဂီၢ်ဘၣ်.
၅, ၆. (က) ဘၣ်ဃးဒီး စံၣ်တဲၤတဲလီၤ ၄:၉-၁၂ ပာ်ဖျါဝဲအသိး တၢ်ရ့လိာ်သး ဘူးဘူးတံၢ်တံၢ် အဘျုးတနီၤန့ၣ် မ့ၢ်မနုၤလဲၣ်. (ခ) တၢ်ဆီဟံၣ်ဆီဃီန့ၣ် လီၤဂာ်ဒီး ပျံၤပိၤအသးသၢဘိကသ့ဒ်လဲၣ်.
၅ ဆိကမိၣ်ကွၢ် လံာ်စီဆှံ အဆၢတၢ်ဂ့ၢ်မိၢ်ပှၢ်လၢ အဆၢဒိၣ်အံၤအဂီၢ်ဒီး တၢ်အံၤ အတၢ်ကတိၤလၢခံလၢညါတက့ၢ်. “ပှၤခံဂၤန့ၣ်ဂ့ၤဒိၣ်န့ၢ်ဒံး ပှၤတဂၤတက့ၢ်လီၤ. အဂ့ၢ်ဒ်အံၤ, မၤသကိးတၢ်တုၤလီၤတီၤလီၤသ့ ဒိၣ်တက့ၢ်လီၤ. တဂၤမ့ၢ်လီၤဃံၤဒီး, အဂၤတဂၤဝံၣ်ဆၢထၢၣ် က့ၤအီၤသ့လီၤ. ဘၣ်ဆၣ် ပှၤမ့ၢ်အိၣ်ဒၣ်ထဲတဂၤဒီး မ့ၢ်လီၤဃံၤန့ၣ်, ပှၤကမၤစၢၤအီၤ တအိၣ်ဘၣ်နီတဂၤအဃိဒီး မ့ၢ်တၢ်နးဖးဒိၣ်န့ၣ်လီၤ. တၢ်မ့ၢ်ခုၣ်န့ၣ်, ပှၤခံဂၤမံသကိးဒီးလၢၤဝဲသ့လီၤ. ဘၣ်ဆၣ် ဒီးနအိၣ်ထဲတဂၤဧိၤန့ၣ်, နမၤလၢၤနသးကသ့ဒ်လဲၣ်. တၢ်ဟဲထီဒါတမံၤလၢ အမၤနၢၤပှၤအိၣ်ထဲတဂၤဧိၤန့ၣ် ပှၤခံဂၤတြီဆၢဝဲသ့လီၤ. ပျံၤပိၤအသးလၢ ပျံၤဖိသၢဘိန့ၣ်, တၢ်မၤတဲာ်အီၤကီလီၤ.”—စံၣ်တဲၤတဲလီၤ ၄:၉-၁၂, ခစ.
၆ လံာ်စီဆှံ အဆၢအံၤ ပာ်ဖျါထီၣ်ဝဲ တၢ်ရ့တံၤရ့သကိး အကါဒိၣ်အဂ့ၢ်န့ၣ်လီၤ. နီၢ်နီၢ် တၢ်ဆီဟံၣ်ဆီဃီန့ၣ် မ့ၢ်တၢ်ရ့လိာ်သး အဘူးကတၢၢ်လီၤ. ဒ်လံာ်စီဆှံ အဆၢအံၤပာ်ဖျါဝဲအသိး ခီဖျိတၢ်အိၣ်ဃုာ်ဒ်သိးအံၤအဃိ ပှၤဒီမိဝၤခံဂၤန့ၣ် တဂၤဒီးတဂၤ မၤစၢၤလိာ်သးသ့ တကးဘၣ် ဟ့ၣ်ဂံၢ်ဟ့ၣ်ဘါလိာ်သးဒီး ကဟုကယာ်လိာ်သးသ့န့ၣ်လီၤ. တၢ်တမံၤမံၤ မ့ၢ်ပာ်ဃုာ်လၢ ပှၤခံဂၤအကျါန့ၣ် ဟံၣ်ဃီအံၤ ကဂၢၢ်ကျၢၤဝဲလီၤ. ဒ်အဆၢဖိအံၤ ပာ်ဖျါဝဲအသိး ပျံၤပိၤအသးခံဘိန့ၣ် ထီၣ်တဲာ်ညီလီၤ. ဘၣ်ဆၣ် ပျံၤပိၤအသးသၢဘိန့ၣ် ထီၣ်တဲာ်ကီဒိၣ်မးလီၤ. ဖဲပှၤဒီမိဝၤခံဂၤ မၤတၢ်ဘၣ် ယဟိဝၤအသးလၢညါအခါ အဝဲသ့ၣ် အဟံၣ်ဃီန့ၣ် ကလီၤဂာ်လၢ ပျံၤပိၤအသးသၢဘိလီၤ. ဟံၣ်ဃီအပူၤ ယဟိဝၤ ပာ်ဃုာ်လၢ တၢ်အသနၢၣ်လၢ အကါဒိၣ်အဃိ တၢ်အိၣ်ဃုာ်လိာ်သးအံၤ ကဂၢၢ်ကျၢၤဝဲနီၢ်နီၢ်လီၤ.
၇, ၈. (က) ခရံာ်ဖိသဘျ့လၢ ဘၣ်တြီဆၢဝဲ တၢ်အဲၣ်ဒိး တၢ်မုာ်ဖံးမုာ်ညၣ်တဖၣ်အဂီၢ် ပီလူးကွဲးဝဲတၢ်ဟ့ၣ်ကူၣ်မနုၤလဲၣ်. (ခ) ဘၣ်ဃးဒီး တၢ်ဆီဟံၣ်ဆီဃီန့ၣ် လံာ်စီဆှံဟ့ၣ်ပှၤ တၢ်ကွၢ်ဆိကမိၣ်မနုၤလဲၣ်.
၇ တၢ်ဆီဟံၣ်ဆီဃီန့ၣ် မ့ၢ်စ့ၢ်ကီး တၢ်အိၣ်သးထဲတမံၤဧိၤလၢ အမၤသးမံ သးအတၢ်အဲၣ်ဒိးလၢ တၢ်မုာ်ဖံးမုာ်ညၣ်သ့လီၤ. တၢ်အိၣ်အသးအံၤအပူၤ တၢ်မံဃုာ်လိာ်သးန့ၣ် တၢ်ထံၣ်အီၤဒ် တၢ်မုာ်လၤသးခု အဂ့ၢ်ခီၣ်ထံးန့ၣ်လီၤ. (ကတိၤဒိ ၅:၁၈) ပှၤအိၣ်သဘျ့တဂၤ မ့ၢ်လဲၤပူၤကွံာ်ဝဲ က့းအတၢ်သးဂဲၤဆူၣ် ဖဲသးစၢ်အဆၢကတီၢ်ဒၣ်လဲာ် အဝဲကဘၣ်ဂုာ်ကျဲးစၢး တြီဆၢဝဲ တၢ်အဲၣ်ဒိး တၢ်မုာ်ဖံးမုာ်ညၣ်အဖၢဒံးလီၤ. မ့ၢ်တပၢၤဃာ်တၢ်သးအဲၣ်ဒိး ဒ်သိးန့ၣ်တဖၣ်ဒီး မၤဘၣ်တၢ်တကဆှီ မ့တမ့ၢ် လုၢ်လၢ်လၢတကဆှီသ့လီၤ. ပီလူး ဟ့ၣ်ကူၣ်ဝဲ ပှၤအိၣ်သဘျ့တဖၣ်လၢ “ကီၤအသးမ့ၢ်တကဲဘၣ်ဒီး, ကန့ၢ်မါန့ၢ်ဝၤဒၣ်ဝဲတက့ၢ်. အဂ့ၢ်ဒ်အံၤ, န့ၢ်မါန့ၢ်ဝၤဂ့ၤန့ၢ် တၢ်အိၣ်ဒီး သးကတၢတက့ၢ်လီၤ.”—၁ ကရံၣ်သူး ၇:၉, ယၤကိာ် ၁:၁၅.
၈ တၢ်အဂ့ၢ်အခၢး အိၣ်အါမံၤလၢ ကထိၣ်ဂဲၤထီၣ် ပှၤတဂၤလၢ ကဆီဟံၣ်ဆီဃီ သနာ်က့ အဝဲကြၢးကွၢ်ဆိကမိၣ်တၢ် ဂ့ၤဂ့ၤဘၣ်ဘၣ်လီၤ. ဒ်ပီလူးပာ်ဖျါဝဲအသိး ပှၤလၢဆီဟံၣ်ဆီဃီတဖၣ် “ကဘၣ်တၢ်နးတၢ်ဖှီၣ်လၢ ပဖံးပညၣ်အပူၤလီၤ.” (၁ ကရံၣ်သူး ၇:၂၈) ပှၤဆီဟံၣ်ဆီဃီတဖၣ် ကကွၢ်ဆၢၣ်မဲာ်ဘၣ်ဝဲ တၢ်ကီတၢ်ခဲလၢ ပှၤအိၣ်သဘျ့တဖၣ် တကွၢ်ဆၢၣ်မဲာ်ဘၣ်ဝဲန့ၣ်လီၤ. နမ့ၢ်ဃုထၢလၢ နကဆီဟံၣ်ဆီဃီဒီး ဒ်သိးတၢ်ကီတၢ်ခဲကစှၤဒီး နကဒိးန့ၢ်တၢ်ဆိၣ်ဂ့ၤအဂီၢ် နမၤကသ့ဒ်လဲၣ်. ကျဲတမံၤန့ၣ် မ့ၢ်တၢ်ဃုထၢ သးသမူတံၤသကိးလၢ တၢ်ကူၣ်သ့လီၤ.
မတၤလၢကကဲထီၣ် သးသမူတံၤသကိးလၢ အဂ့ၤလဲၣ်
၉, ၁၀. (က) တၢ်ဘၣ်ယိၣ်အိၣ်လၢ တၢ်ဆီဟံၣ်ဆီဃီဒီး ပှၤတစူၢ်တၢ်နာ်တၢ်တဖၣ်န့ၣ် ပီလူးပာ်ဖျါထီၣ်ဝဲဒ်လဲၣ်. (ခ) တၢ်အဘျုးအၢ မနုၤအိၣ်ထီၣ်လၢ တၢ်လုၢ်သ့ၣ်ခါပတာ် ယွၤအတၢ်ဟ့ၣ်ကူၣ်လၢ တဘၣ်ဆီဟံၣ်ဆီဃီဒီး ပှၤလၢတစူၢ်တၢ်နာ်တၢ်တဖၣ်တဂ့ၤန့ၣ်လဲၣ်.
၉ ပီလူးကွဲးဝဲ တၢ်သိၣ်တၢ်သီမိၢ်ပှၢ်လၢအကါဒိၣ်တမံၤ လၢကြၢးမၤထွဲအီၤဖဲ ပဃုထၢသးသမူတံၤသကိးအခါန့ၣ်မ့ၢ် “သုတယိးနီၣ်ယိးဘိ ဖုၣ်ထံၣ်ဖုၣ်ထီ ဒီးပှၤလၢအတစူၢ်တနာ်ဘၣ်တဖၣ် န့ၣ်တဂ့ၤ.” (၂ ကရံၣ်သူး ၆:၁၄) အဝဲဟ့ၣ်တၢ်အဒိအံၤ သန့ၤထီၣ်ဝဲလၢ တၢ်ထူစံာ်ထူပှဲၤ အတၢ်အိၣ်မူန့ၣ်လီၤ. ဆၣ်ဖိကီၢ်ဖိလၢ အဒုတထဲသိးလိာ်သး မ့တမ့ၢ် ဂံၢ်ဘါတဂာ်လိာ်သးခံဒု မ့ၢ်ယိးနီၣ်ယိးဘိ ဒ်သိးသိးန့ၣ် ကဘၣ်နးဘၣ်ဖှီၣ်ခံဒုလၢာ်လီၤ. ဒ်န့ၣ်အသိး, ပှၤစူၢ်တၢ်နာ်တၢ်ဒီး ပှၤတစူၢ်တၢ်နာ်တၢ် ခံဂၤမ့ၢ်ဆီဟံၣ်ဆီဃီန့ၣ် အဝဲသ့ၣ်ကကွၢ်ဆၢၣ်မဲာ်ဘၣ်ဒီး တၢ်ထီဒါလိာ်သး သပှၢ်တၢၢ်လီၤ. သးသမူတံၤသကိးတဂၤ မ့ၢ်အဲၣ်ဒိးအိၣ်လၢ ယဟိဝၤအတၢ်အဲၣ်အပူၤဒီး အတဂၤမ့ၢ်တသးစဲဝဲ တၢ်အံၤန့ၣ်အဝဲသ့ၣ်အတၢ် အိၣ်မူပူၤတၢ်မုာ်လၤတအိၣ်ဘၣ်, ဒီးတၢ်ပိာ်ထွဲမ့ၢ် တၢ်ကိၢ်တၢ်ဂီၤအါမးလီၤ. လၢတၢ်န့ၣ်အဃိ, ပီလူးဟ့ၣ်သဆၣ်ထီၣ်ဝဲ ခရံာ်ဖိတဖၣ်လၢ ကဆီဟံၣ်ဆီဃီ “ထဲလၢကစၢ် အပူၤဧိၤလီၤ.” —၁ ကရံၣ်သူး ၇:၃၉.
၁၀ ဘၣ်တဘျီဘျီ ခရံာ်ဖိလၢအိၣ်သဘျ့တဖၣ် လၢခံကတၢၢ်ကဆိကမိၣ်ဝဲလၢ တၢ်ယိးနီၣ်ယိးဘိ ဖုၣ်ထံၣ်ဖုၣ်ထီန့ၣ် ဂ့ၤန့ၢ်ဒံး တၢ်အိၣ်သယုၢ်လၢ အဝဲသ့ၣ်တူၢ်ဘၣ်ဝဲ ခဲအံၤန့ၣ်လီၤ. တနီၤပာ်လီၤအသးလၢ ကလုၢ်သ့ၣ်ခါပတာ် လံာ်စီဆှံအတၢ် ဟ့ၣ်ကူၣ်ဒီး ဆီဟံၣ်ဆီဃီဒီးပှၤလၢ တဘူၣ်ထီၣ်ဘါထီၣ် ယဟိဝၤန့ၣ်လီၤ. ဘၣ်ဆၣ်, ညီနုၢ်ဒိးန့ၢ်ဘၣ် တၢ်အဘျုးအၢလၢ လီၤသးအုးတဖၣ်လီၤ. ပှၤဒ်သိးအံၤတဖၣ်န့ၣ် ဆီဟံၣ်ဆီဃီဘၣ်တ့ၢ်လံဒီး ပှၤလၢကကတိၤသကိး ဃုာ်တၢ်တသ့လၢ ဘၣ်ဃးတၢ်လၢအကါဒိၣ်တဖၣ်လၢ အတၢ်အိၣ်မူပူၤန့ၣ်လီၤ. တၢ်တူၢ်ဘၣ်တၢ်အိၣ်သယုၢ်ဒ်သိးအံၤန့ၣ် အၢန့ၢ်ဒံး တၢ်အိၣ်သယုၢ်လၢ တချုးဆီဟံၣ်ဆီဃီဒ်ဘၣ်န့ၣ်လီၤ. လီၤသးခုဒိၣ်မးလၢ ခရံာ်ဖိသဘျ့လၢ အကထိတဖၣ်န့ၣ် ဘၣ်ဃးဒီးတၢ်ဂ့ၢ်အံၤန့ၣ် မ့ၢ်ပှၤတဖၣ်လၢ အနာ်ယွၤဒီး ဒိကနၣ်တၢ်ဟ့ၣ်ကူၣ်တဖၣ်လၢ တၢ်သးတီန့ၣ်လီၤ. (စံးထီၣ်ပတြၢၤ ၃၂:၈) အဝဲသ့ၣ်မုၢ်လၢ်ဝဲလၢ ကဆီဟံၣ်ဆီဃီ တနံၤနံၤသနာ်က့ အိၣ်သဘျ့ဝဲတုၤဒၣ်လဲာ်လၢ အထံၣ်ဝဲသးသမူတံၤသကိးလၢ ပှၤဘူၣ်ထီၣ်ဘါထီၣ် ယဟိဝၤအကျါန့ၣ်လီၤ.
၁၁. နကဃုထၢ သးသမူတံၤသကိးလၢ တၢ်ကူၣ်သ့အဂီၢ် တၢ်မနုၤကမၤစၢၤနၤလဲၣ်. (ကွၢ်တၢ်လွံၢ်နၢၣ်လၢ လံာ်ကဘျံး ၁၁၄ အပူၤတက့ၢ်.)
၁၁ နီၢ်နီၢ်, ယဟိဝၤအကုၢ်ကိးဂၤဒဲးန့ၣ် တကြၢးဒံးလၢ သးသမူအတံၤသကိးဘၣ်. နမ့ၢ်ဆိကမိၣ်လၢ နကဆီဟံၣ်ဆီဃီဒီး ဃုထၢပှၤလၢ အသကဲာ်ပဝး, နီၢ်သးတၢ်တိာ်ပာ်, ဒီးအတၢ်အဲၣ်ယွၤလီၤဂာ်ဒီးနၤတက့ၢ်. ကုၢ်လၢအတီတဖု ကတဲာ်ကတီၤဝဲ လံာ်အါမးလၢ ဘၣ်ဃးဒီးတၢ်ဂ့ၢ်အံၤအါမးလီၤ. နမ့ၢ်ဃ့ဘါထုကဖၣ်ဒီး ဆိကမိၣ်လံာ်စီဆှံ တၢ်ဟ့ၣ်ကူၣ်တဖၣ်ဒီး ဖဲတၢ်ဃုထၢတၢ် အကါဒိၣ်အံၤအခါ နမ့ၢ်မၤထွဲဒ်သိးန့ၣ်ဒီး မ့ၢ်နအိၣ်ဒီးတၢ်ကူၣ်သ့လီၤ.a—စံးထီၣ်ပတြၢၤ ၁၁၉:၁၀၅.
၁၂. ဘၣ်ဃးဒီးတၢ်ဆီဟံၣ်ဆီဃီန့ၣ် လုၢ်လၢ်မနုၤအိၣ်လၢ ထံကီၢ်အါဘ့ၣ်အပူၤလဲၣ်. ဒီးလံာ်စီဆှံအဒိအတဲာ်မနုၤ ဟ့ၣ်ဝဲတၢ်နဲၣ်လိတနီၤလဲၣ်.
၁၂ ထံကီၢ်အါဘ့ၣ်အပူၤအိၣ်ဒီးလုၢ်လၢ်လၢ မိၢ်ပၢ်တဖၣ်ဃုထၢန့ၢ် သးသမူအတံၤသကိးလၢ အဖိတဖၣ်အဂီၢ်လီၤ. လုၢ်လၢ်ဒ်သိးန့ၣ်တဖၣ် တူၢ်လိာ်ဝဲလၢ မိၢ်ပၢ်တဖၣ်အိၣ်ဒီး တၢ်ကူၣ်သ့ဒီး တၢ်လဲၤခီဖျိအါမးလၢ တၢ်ဃုထၢလၢအကါဒိၣ်အံၤအဂီၢ်လီၤ. ဒ်လံာ်စီဆှံအစိၤအသိး, တၢ်ဆီဟံၣ်ဆီဃီလၢ မိၢ်ပၢ်ကတဲာ်ကတီၤန့ၢ်ဝဲတဖၣ်န့ၣ် ညီနုၢ်ဂၢၢ်ကျၢၤလီၤ. တၢ်အဒိလၢ အၤဘြၤဟၣ်ပျဲလီၤအကုၢ်လၢ ကဃုန့ၢ် အံၤစဲးအဂီၢ် မါတဂၤန့ၣ် မ့ၢ်တၢ်မၤလိလၢ မုၢ်မဆါတနံၤအံၤ မိၢ်ပၢ်လၢ အိၣ်ဒီးတၢ်အိၣ်သးဒ်သိးန့ၣ်တဖၣ်အဂီၢ်လီၤ. ကျိၣ်စ့ဒီး တၢ်အိၣ်မူအတီၤန့ၣ် တမ့ၢ်တၢ်အကါဒိၣ်လၢ အၤဘြၤဟၣ်အဂီၢ်ဘၣ်. လၢတၢ်န့ၣ်အလီၢ်, အဝဲဂုာ်ကျဲးစၢးဃုဝဲ အံၤစဲးအမါလၢ ပှၤဘူၣ်ထီၣ်ဘါထီၣ် ယဟိဝၤအကျါလီၤ.b—၁ မိၤၡ့ ၂၄:၃, ၆၇.
နကတဲာ်ကတီၤပာ်လၢ ဟံၣ်မုာ်ဃီပၢၤအဂီၢ်သ့ဒ်လဲၣ်
၁၃-၁၅. (က) ပိာ်ခွါသးစၢ်တဂၤလၢ ပာ်လီၤအသးလၢ ကဆီဟံၣ်ဆီဃီန့ၣ် တၢ်သိၣ်တၢ်သီမိၢ်ပှၢ်လၢ ပထံၣ်ဘၣ်ဖဲ ကတိၤဒိ ၂၄:၂၇ အံၤမၤစၢၤအီၤသ့ဒ်လဲၣ်. (ခ) ပိာ်မုၣ်သးစၢ်တဂၤ အိၣ်ကတဲာ်ကတီၤအသးလၢ တၢ်ဆီဟံၣ်ဆီဃီအဂီၢ်ကသ့ဒ်လဲၣ်.
၁၃ နမ့ၢ်ဆိကမိၣ်လီၤတံၢ်လီၤဆဲးလၢ နကဆီဟံၣ်ဆီဃီဒီး ကြၢးနသံကွၢ်လီၤက့ၤနသးလၢ, ‘မ့ၢ်ယအိၣ်ကတဲာ်ကတီၤယသး နီၢ်နီၢ်လံဧါ’ လီၤ. တၢ်သံကွၢ်အံၤအတၢ်စံးဆၢန့ၣ် တဒိးသန့ၤထီၣ်အသးလၢ သးအတၢ်တူၢ်ဘၣ်လၢ ဘၣ်ဃးဒီးတၢ်အဲၣ်, က့း, တၢ်အိၣ်ဒီးတံၤသကိး, တၢ်လုၢ်ဒိၣ်ထီၣ်ဖိဘၣ်. လၢတၢ်န့ၣ်အလီၢ်, ပိာ်မုၣ်မ့တမ့ၢ် ပိာ်ခွါလၢ ကထီၣ်မိၢ်လီၢ်ပၢ်လီၢ်တဂၤစုာ်စုာ်အံၤ ကြၢးဆိကမိၣ်မူဒါလၢ ကပိာ်ထွဲလိာ်အသးဒီး တၢ်ဆီဟံၣ်ဆီဃီန့ၣ်လီၤ.
၁၄ ပှၤဖိၣ်သၣ်ခွါလၢ အဃုအမါတဂၤန့ၣ် ကြၢးဆိကမိၣ်ဝဲ တၢ်သိၣ်တၢ်သီအံၤလီၤတံၢ်လီၤဆဲးလီၤ. “ကတဲာ်ကတီၤနတၢ်မၤလၢခိ, ဒီးမၤတၢ်လၢစံာ်ဧိၤပှဲၤဧိၤအပူၤတက့ၢ်. လၢခံက့ၤဒီးသူၣ်ထီၣ်နဟံၣ်တက့ၢ်.” (ကတိၤဒိ ၂၄:၂၇) တၢ်အံၤအဲၣ်ဒိးတဲထီၣ်ဖျါဝဲ တၢ်မနုၤလဲၣ်. ဆၢကတီၢ်ဖဲန့ၣ်အခါ, ပိာ်ခွါလၢအဲၣ်ဒိး “သူၣ်ထီၣ် [အ] ဟံၣ်” မ့တမ့ၢ် သူၣ်ထီၣ်ဟံၣ်ဖိဃီဖိ ခီဖျိဖျီအသးန့ၣ် အဝဲလိၣ်လၢကဘၣ်သံကွၢ်လီၤအသးလၢ, “မ့ၢ်ယအိၣ်ကတဲာ်ကတီၤယသးလၢ ယကအံးထွဲကွၢ်ထွဲဒီး ကဟုကယာ်ယမါဒီး ဖိသၣ်လၢကဟဲအိၣ်ဖျဲၣ်ထီၣ်တဖၣ်ဧါ.” အဝဲကဘၣ်မၤတၢ်ဒီး အံးထွဲကွၢ်ထွဲအစံၣ်ဧိၤပှဲၤဧိၤလၢညါကတၢၢ်လီၤ. တၢ်သိၣ်တၢ်သီမိၢ်ပှၢ်အံၤ ဘၣ်ထွဲလိာ်သးလၢ စိၤခဲအံၤစ့ၢ်ကီးလီၤ. ပိာ်ခွါလၢအဲၣ်ဒိးဆီဟံၣ်ဆီဃီတဂၤန့ၣ် လိၣ်လၢကဘၣ်အိၣ်ကတဲာ်ကတီၤအသးလၢ ကဟံးန့ၢ်မူဒါအဂီၢ်လီၤ. အဝဲမၤတၢ်မ့ၢ်ကဲန့ၣ် ကဘၣ်အိၣ်ဒီးတၢ်မၤလီၤ. ယွၤအကလုၢ်ကထါပာ်ဖျါဝဲလၢ ပိာ်ခွါလၢတအံးထွဲကွၢ်ထွဲ ဟံၣ်ဖိဃီဖိအနီၢ်ခိ, တၢ်သးဂဲၤဒီး နီၢ်သးအတၢ်လိၣ်ဘၣ်တဖၣ်န့ၣ် အၢန့ၢ်ဒံးပှၤတနာ်တၢ်တဂၤလီၤ.—၁ တံၤမသ့း ၅:၈.
၁၅ ဒ်န့ၣ်အသိးလီၤ ပိာ်မုၣ်လၢပာ်လီၤအသးလၢ ကဆီဟံၣ်ဆီဃီတဂၤစ့ၢ်ကီး ကဘၣ်အၢၣ်လီၤတူၢ်လိာ်ဝဲလၢ ကဟံးန့ၢ်မူဒါ အဒိၣ်အမုၢ်တဖၣ်လီၤ. လံာ်စီဆှံ ပတြၢၤဝဲ မါလၢ အိၣ်ဒီးတၢ်သ့တၢ်ဘၣ်ဒီး တၢ်ဂ့ၤတၢ်ဝါတနီၤလၢ မၤစၢၤအဝၤဒီး အံးထွဲကွၢ်ထွဲ အဟံၣ်ဖိဃီဖိန့ၣ်လီၤ. (ကတိၤဒိ ၃၁:၁၀-၃၁) ပိာ်မုၣ်ပိာ်ခွါလၢ ဆီဟံၣ်ဆီဃီ ချ့သဒံးလၢ တအိၣ်ကတဲာ်ကတီၤသးလၢ ကဟံးန့ၢ်ဟံၣ်ဃီအမူဒါတဖၣ်န့ၣ် အဲၣ်လီၤထဲအသးဒီး တဆိကမိၣ်ဝဲတၢ်လၢ ကဘၣ်ဟ့ၣ်ဝဲ အသးသမူအတံၤသကိးဘၣ်. ဘၣ်ဆၣ်, အကါဒိၣ်ကတၢၢ်န့ၣ် ပှၤလၢပာ်လီၤအသးလၢ ကဆီဟံၣ်ဆီဃီတဖၣ် လိၣ်လၢကဘၣ် ကတဲာ်ကတီၤပာ်တၢ်လၢနီၢ်သးလီၤ.
၁၆, ၁၇. ပှၤလၢကတဲာ်ကတီၤအသးလၢ ကဆီဟံၣ်ဆီဃီတဖၣ် ကြၢးဆိကမိၣ်ဆိကမး လံာ်စီဆှံ တၢ်သိၣ်တၢ်သီမိၢ်ပှၢ် မနုၤတဖၣ်လဲၣ်.
၁၆ တၢ်ကတဲာ်ကတီၤဆိပာ်လၢ တၢ်ဆီဟံၣ်ဆီဃီအဂီၢ်န့ၣ် ပာ်ဃုာ်ဒီး တၢ်ဆိကမိၣ် တၢ်အသနၢၣ်တဖၣ်လၢ ယွၤသုးကျဲၤပာ်ဝဲလၢ မါဒီးဝၤအဂီၢ်လီၤ. ပိာ်ခွါတဂၤလိၣ်လၢ ကဘၣ်သ့ၣ်ညါဝဲ ခရံာ်ဖိဟံၣ်ဖိဃီဖိအခိၣ် အခီပညီန့ၣ်မ့ၢ်မနုၤလဲၣ်လီၤ. တၢ်အံၤတမ့ၢ် တၢ်ဟ့ၣ်အခွဲးလၢ ကဘၣ်မၤဝဲဒ် ပှၤပၢတၢ်လၢ မၤဖဲဒၣ်အသးဘၣ်. လၢတၢ်န့ၣ်အလီၢ်, အဝဲကဘၣ်ကွၢ်လိမၤဒိး ယ့ၣ်ၡူးအတၢ်ကဲခိၣ်ကဲနၢ်လီၤ. (အ့းဖ့းစူး ၅:၂၃) ဒ်န့ၣ်အသိး, ခရံာ်ဖိပိာ်မုၣ်တဂၤ လိၣ်လၢကဘၣ်နၢ်ပၢၢ်ဝဲ မါအသနၢၣ်လၢ အိၣ်ဒီးအလၤကပီၤန့ၣ်လီၤ. အဝဲအသးအိၣ်အၢၣ်လီၤဒိကနၣ်ဝဲ “အဝၤအတၢ်သိၣ်တၢ်သီ” ကစီဒီဧါ. (ရိမ့ၤ ၇:၂) ထီဘိန့ၣ် အဝဲအိၣ်လၢ ယဟိဝၤဒီး ခရံာ်အတၢ်သိၣ်တၢ်သီအဖီလာ်လီၤ. (ကလၤတံ ၆:၂) အဝၤအတၢ်ပၢအခွဲးလၢ ဟံၣ်ဃီပူၤန့ၣ် ကဲထီၣ်တၢ်သိၣ်တၢ်သီလၢခံတမံၤလီၤ. ဖဲအဝဲတုၤလၢ ပှၤတလၢပှဲၤတဂၤ အတၢ်ပၢအခွဲးအဖီလာ်န့ၣ် အဝဲကဆီၣ်ထွဲမၤစၢၤဒီး အၢၣ်လီၤဝဲကစီဒီဧါ. တူၢ်လိာ်ဝဲ တၢ်သ့ၣ်တဖၣ်အံၤ မ့ၢ်တန့ၢ်ဒီး အဝဲတကြၢးဆီဟံၣ်ဆီဃီဘၣ်.
၁၇ အါန့ၢ်အန့ၣ်, မါဒီးဝၤ တဂၤစုာ်စုာ်လိၣ်လၢ ကဘၣ်အိၣ်ကတဲာ်ကတီၤသးလၢ ကအံးထွဲကွၢ်ထွဲ တဂၤဒီးတဂၤ အတၢ်လိၣ်လီၤဆီဒၣ်တၢ်တဖၣ်လီၤ. (ဖံလံးပံၤ ၂:၄) ပီလူးကွဲးဝဲလၢ “ဘၣ်ဆၣ်ဒီး သုဝဲဒၣ်အံၤ, ဒ်သုအဲၣ်လီၤသုသးအသိး, တဂၤအဲၣ်အမါ, တဂၤအဲၣ်အမါဒၣ်ဝဲတက့ၢ်. ဒီးပိာ်မုၣ်န့ၣ် မ်အယူးယီၣ်အဝၤတက့ၢ်.” ခီဖျိသးစီဆှံဒီး ပီလူးနၢ်ပၢၢ်ဘၣ်ဝဲလၢ ပိာ်ခွါအံၤ လိၣ်လၢကဘၣ်သ့ၣ်ညါဝဲလၢ အမါပာ်ကဲအီၤဒိၣ်မးဒီး မါစ့ၢ်ကီးလိၣ်လၢ ကဘၣ်သ့ၣ်ညါဝဲလၢ အဝၤအဲၣ်အီၤန့ၣ်လီၤ.—အ့းဖ့းစူး ၅:၂၁-၃၃.
ဖဲတၢ်ပာ်အဲၣ်တီအတီၢ်ပူၤ, ပှၤဒီတၢ်အဲၣ်တီအါမးန့ၣ် လၢတၢ်ကူၣ်သ့အပူၤ သုးကျဲၤဝဲလၢ ကကိးဃုာ်အသကိးတဂၤလီၤ
၁၈. ဖဲပှၤခံဂၤပာ်အဲၣ်တီအခါ ဘၣ်မနုၤအဃိကြၢးအိၣ်ဒီး တၢ်ကီၤသူၣ်ကီၤသးလဲၣ်.
၁၈ လၢတၢ်န့ၣ်အဃိ, တၢ်ပာ်အဲၣ်တီ အဆၢကတီၢ်န့ၣ် တမ့ၢ်ထဲဒၣ် တၢ်မုာ်တၢ်ပၠီၣ် အဆၢကတီၢ်ဘၣ်. တၢ်အံၤမ့ၢ် ဆၢကတီၢ်လၢ ပိာ်ခွါဒီးပိာ်မုၣ် ကဘၣ်မၤလိဝဲလၢ တဂၤဒီးတဂၤ ကဘၣ်ရ့လိာ်သး သ့သ့ဘၣ်ဘၣ်ဒ်လဲၣ်, ကဘၣ်ထံၣ်သ့ၣ်ညါဝဲလၢ တၢ်ဆီဟံၣ်ဆီဃီန့ၣ် မ့ၢ်တၢ်အိၣ်ဒီး တၢ်ကူၣ်သ့ဧါ, တမ့ၢ်ဧါန့ၣ်လီၤ. မ့ၢ်စ့ၢ်ကီး ဆၢကတီၢ်လၢ ကဘၣ်အိၣ်ဒီး တၢ်ကီၤသူၣ်ကီၤသးန့ၣ်လီၤ. မ့ၢ်လၢသးလၢ အဲၣ်ဒိးအိၣ်ဘူးလိာ်သး ဆူၣ်ထီၣ်သ့အဃိလီၤ. နီၢ်နီၢ်န့ၣ် တၢ်မဲာ်ဘၣ်သးစီၣ်လိာ်သး တဂၤဒီးတဂၤန့ၣ် မ့ၢ်န့ဆၢၣ်လီၤ. ဘၣ်ဆၣ်, ပှၤလၢအဲၣ်လိာ်သးတဂၤဒီးတဂၤ လၢတၢ်အဲၣ်နီၢ်နီၢ်န့ၣ် ကဟးဆှဲးဝဲ တၢ်လၢကမၤဘၣ်ဒိ ပှၤလၢအဲၣ်ဝဲတဂၤ အတၢ်ရ့လိာ်သးဒီးယွၤလီၤ. (၁ သ့းစၤလနံ ၄:၆) မ့မ့ၢ်ဒ်န့ၣ်ဒီး ဖဲတၢ်ပာ်အဲၣ်တီ အဆၢကတီၢ်န့ၣ် အိၣ်ဒီးတၢ်ကီၤသူၣ်ကီၤသးတက့ၢ်. နမ့ၢ်ဆီဟံၣ်ဆီဃီမ့ၢ်ဂ့ၤ တဆီဟံၣ်ဆီဃီမ့ၢ်ဂ့ၤ လၢနတၢ်အိၣ်မူဒီကတီၢ်အပူၤ နကဒိးန့ၢ်ဘၣ်တၢ်အဘျုးလၢ တၢ်ဂ့ၤတၢ်ဝါအံၤလီၤ.
နမၤဂၢၢ်ကျၢၤ နဟံၣ်ဃီကသ့ဒ်လဲၣ်
၁၉, ၂၀. ခရံာ်ဖိတဂၤအတၢ်ထံၣ်လၢ ဘၣ်ဃးတၢ်ဆီဟံၣ်ဆီဃီန့ၣ် ကြၢးလီၤဆီဒီး မုၢ်မဆါတနံၤအံၤ ဟီၣ်ခိၣ်ပှၤအါဂၤအတၢ်ထံၣ်ဒ်လဲၣ်. ဟ့ၣ်အဒိတက့ၢ်.
၁၉ ပှၤခံဂၤမ့ၢ်အဲၣ်ဒိးမၤဂၢၢ်ကျၢၤ အဟံၣ်ဃီန့ၣ် လိၣ်လၢအဝဲသ့ၣ်ကဘၣ်အိၣ်ဒီး တၢ်ထံၣ်လၢအဘၣ်လၢ တၢ်အၢၣ်လီၤအီလီၤဘၣ်ဃး တၢ်ဆီဟံၣ်ဆီဃီန့ၣ်လီၤ. တၢ်တဲဒီးတၢ်ဂီၤမူတဖၣ်အပူၤန့ၣ်, ညီနုၢ်မၤကတၢၢ်ဝဲ လၢတၢ်လီၤသူၣ်ခုသးခုဒ် ပှၤကညီအဲၣ်ဒိးအသိးန့ၣ်လီၤ. ဘၣ်ဆၣ်, လၢတၢ်အိၣ်မူနီၢ်နီၢ်တခီ, တၢ်ဆီဟံၣ်ဆီဃီန့ၣ် တမ့ၢ်တၢ်အကတၢၢ်ဘၣ်. မ့ၢ်တၢ်အစးခီၣ်ထံးလၢ ယဟိဝၤသုးကျဲၤပာ်လီၤဝဲလၢ ကဂၢၢ်ကျၢၤထီဘိအဂီၢ်လီၤ. (၁ မိၤၡ့ ၂:၂၄) လီၤသးအုးမးလၢ မုၢ်မဆါတနံၤအံၤ ဟီၣ်ခိၣ်ချၢန့ၣ် ပှၤအါဂၤတထံၣ်ဝဲဒ်န့ၣ်ဘၣ်. တၢ်ဆဲးတၢ်လၤတနီၤအပူၤ, ပှၤကညီတဖၣ်ထံၣ်ဝဲလၢ တၢ်ဆီဟံၣ်ဆီဃီန့ၣ် လီၤဂာ်ဒီး တၢ်စၢကမီာ်ပျံၤခံကူးလာ်လီၤ. တၢ်အဒိအံၤ ကြၢးဝဲဘၣ်ဝဲဒီး ပှၤအါဂၤအတၢ်ထံၣ်လၢ ဘၣ်ဃးတၢ်ဆီဟံၣ်ဆီဃီထဲလဲၣ်န့ၣ် အဝဲသ့ၣ်တမ့ၢ်ကသ့ၣ်ညါဝဲဘၣ်. ဘၣ်မနုၤအဃိ ဘၣ်ဒ်သိးန့ၣ်လဲၣ်. မ့ၢ်စၢကမီာ်ဃာ် ပျံၤခံဘိဂ့ၤဂ့ၤန့ၣ် ကကျၢၤလီၤ. တၢ်အကါဒိၣ်အဂၤတမံၤလၢ ပျံၤလၢတၢ်စၢကမီာ်ဃာ်အီၤအံၤန့ၣ် မ့ၢ်တၢ်စၢဃာ်အီၤညီဒီးဃ့ၣ်လီၤအီၤညီလီၤ.
၂၀ မုၢ်မဆါတနံၤအံၤ ပှၤအါဂၤထံၣ်ဝဲ တၢ်ဆီဟံၣ်ဆီဃီလၢ တၢ်တစိၢ်တလီၢ်လီၤ. အဝဲသ့ၣ်ဆိကမိၣ်ဝဲလၢ တၢ်အံၤကမၤပှဲၤအတၢ်လိၣ်ဘၣ်တဖၣ်အဃိ ဆီဟံၣ်ဆီဃီလၢ အဆိအချ့လီၤ. ဘၣ်ဆၣ် ဖဲအဝဲသ့ၣ်ထံၣ်ဘၣ်တၢ်ကီတၢ်ခဲအခါ မုၢ်လၢ်ဝဲလၢ မၤကတၢၢ်ကွံာ်တၢ်အံၤကန့ၢ်လီၤ. ဘၣ်ဆၣ်, သ့ၣ်နီၣ်ထီၣ်လၢ, ဘၣ်ဃးဒီးဟံၣ်ဃီအတၢ်စၢဃာ်န့ၣ် လံာ်စီဆှံသူဝဲတၢ်အဒိအတဲာ်လၢ ပျံၤပိၤအသးလၢ ပျံၤဖိသၢဘိန့ၣ်တက့ၢ်. ကဘီအိၣ်ဒီးယၢ်လၢ်တဖၣ် ညီနုၢ်သူဝဲပျံၤတဖၣ်န့ၣ်ဘၣ်တၢ်ပိၤဃာ်အီၤ ဒ်သိးကကျၢၤယံာ်ယံာ်အဂီၢ်ဒီး ပျံၤအံၤန့ၣ် ဖဲကလံၤမုၢ်ဆူၣ်အဆၢကတီၢ်ဒၣ်လဲာ် တလီၤဃ့ၣ်ကွံာ်ဘၣ်. ဒ်န့ၣ်အသိး, ဟံၣ်ဃီန့ၣ် ဘၣ်တၢ်ကတဲာ်ကတီၤအီၤ ဒ်သိးကဂၢၢ်ကျၢၤထီဘိန့ၣ်လီၤ. သ့ၣ်နီၣ်ထီၣ်က့ၤ ယ့ၣ်ၡူးအတၢ်ကတိၤလၢ “တၢ်လၢယွၤပာ်ဃုာ်ဝဲန့ၣ် မ်ပှၤကညီသုတထုးဖှၣ်တဂ့ၤ.” (မးသဲ ၁၉:၆) နမ့ၢ်ဆီဟံၣ်ဆီဃီဒီး လိၣ်လၢနကဘၣ်အိၣ်ဒီးတၢ်ထံၣ်ဒ်သိးန့ၣ်လီၤ. တၢ်အၢၣ်လီၤဒ်သိးအံၤအဃိ တၢ်ဆီဟံၣ်ဆီဃီန့ၣ် ကဲထီၣ်တၢ်ဝံတၢ်ယိးဧါ. တမ့ၢ်ဘၣ်.
၂၁. မါဒီးဝၤန့ၣ်လိၣ်လၢတဂၤဒီးတဂၤ ကဘၣ်ပၢၤဃာ် တၢ်ပာ်သူၣ်ပာ်သးမနုၤလဲၣ်. ဒီးတၢ်မနုၤကမၤစၢၤအဝဲသ့ၣ်လၢ ကမၤဝဲဒ်သိးန့ၣ်လဲၣ်.
၂၁ ဝၤဒီးမါန့ၣ် လိၣ်လၢကဘၣ်ပၢၤဃာ် တၢ်ထံၣ်ဂ့ၤလိာ်သးတဂၤဒီးတဂၤလီၤ. မ့ၢ်သးစဲတဂၤဒီးတဂၤ အတၢ်ဂ့ၤတၢ်ဝါဒီး တၢ်ထုးဂံၢ်ထုးဘါန့ၣ် ဟံၣ်ဃီအံၤကအိၣ်ဒီးတၢ်သးခုဒီး တၢ်သးမုာ်လီၤ. တၢ်ထံၣ်ဂ့ၤသးသမူတံၤသကိးလၢ တလၢပှဲၤတဂၤန့ၣ် အခီပညီအိၣ်ကစီဒီဧါ. ယဟိဝၤမၤတၢ်လၢ အဘျုးအိၣ်ထီဘိလီၤ. ဘၣ်ဆၣ် ပနာ်သပှၢ်တၢၢ်လၢ ကစၢ်ကထံၣ်ဂ့ၤပှၤလီၤ. ပှၤကွဲးထါစံးထီၣ်ပတြၢၤစံးဝဲလၢ “ယွၤဧၢ, နမ့ၢ်ကွၢ်ဟုၣ်ပလီၤကမၣ်တၢ်ဒီး, ကစၢ်ဧၢ, မ့ၢ်မတၤကဆၢထၢၣ်တဂၤလဲၣ်.” (စံးထီၣ်ပတြၢၤ ၁၃၀:၃) မါဒီးဝၤတဖၣ်လိၣ်လၢကဘၣ်ထံၣ်ဂ့ၤလိာ်သး ဒီးပျၢ်လိာ်အတၢ်ကမၣ်တဂၤဒီးတဂၤလီၤ.—ကလီးစဲ ၃:၁၃.
၂၂, ၂၃. အၤဘြၤဟၣ်ဒီးစၤရါ ပာ်ဖျါဝဲဒိဂ့ၤတဲာ်ဘၣ်လၢ မုၢ်မဆါတနံၤအံၤ ပှၤဒီမိၤဝၤတဖၣ် အဂီၢ်ဒ်လဲၣ်.
၂၂ တၢ်ဆီဟံၣ်ဆီဃီအနံၣ်မ့ၢ်ယံာ်ထီၣ်ဒီး တၢ်မုာ်တၢ်ပၢၤအိၣ်အါထီၣ်လီၤ. လံာ်စီဆှံပာ်ဖျါဝဲ သးပှၢ်အၤဘြၤဟၣ်ဒီး စၤရါဒီမိဝၤအဟံၣ်ဃီအဂ့ၢ်လီၤ. အဝဲသ့ၣ်အတၢ်အိၣ်မူပူၤ ကွၢ်ဆၢၣ်မဲာ်ဘၣ်ဝဲဒီးတၢ်ကီတၢ်ခဲတဖၣ်လီၤ. ဆိကမိၣ်ကွၢ်ဖဲ စၤရါအသးအိၣ် ၆၀ အခါ, အဝဲဟးထီၣ်လၢအဟံၣ်အိၣ်ဒီးတၢ်လၢတၢ်ပှဲၤလၢ ဝ့ၢ်အူၤရံလၢအဂုၤထီၣ်ပသီထီၣ်အပူၤဒီး အတၢ်အိၣ်မူလၢ အိၣ်လီၤတဲာ်တ့ၢ်န့ၣ် ဘၣ်အိၣ်ဝဲလၢဒဲန့ၣ်တက့ၢ်. ဘၣ်ဆၣ် အဝဲအၢၣ်လီၤတူၢ်လိာ်ဝဲ အဝၤအတၢ်ကဲခိၣ်ကဲနၢ်လီၤ. စၤရါမ့ၢ် တံၤသကိးဒီး ပှၤမၤစၢၤတၢ်နီၢ်နီၢ်လၢ အၤဘြၤဟၣ်အဂီၢ်လီၤ. အၤဘြၤဟၣ်အတၢ်ပာ်လီၤသးတဖၣ် ကလၢပှဲၤထီၣ်အဂီၢ် အဝဲမၤစၢၤဝဲလၢ တၢ်ယူးယီၣ်ပာ်ကဲလီၤ. အဝဲအတၢ်အၢၣ်လီၤတူၢ်လိာ်န့ၣ် တမ့ၢ်ထဲလၢ တၢ်အိၣ်ဖျါလၢခိဘၣ်. အဝဲ “အသးကံၢ်ပူၤ” ဒၣ်လဲာ်ကိးအဝၤလၢ ကစၢ်လီၤ. (၁ မိၤၡ့ ၁၈:၁၂; ၁ ပ့းတရူး ၃:၆) အဝဲအတၢ်ပာ်ကဲ အၤဘြၤဟၣ်န့ၣ် ဟဲထီၣ်လၢအသးပူၤလီၤ.
၂၃ ဘၣ်ဆၣ် တၢ်အံၤတအဲၣ်ဒိးစံးဝဲလၢ အၤဘြၤဟၣ်ဒီး စၤရါအတၢ်ထံၣ်လီၤဂာ်လိာ်သး ထီဘိဘၣ်. တဘျီခါ အဝဲအတၢ်ဟ့ၣ်ကူၣ်တမံၤန့ၣ် “ကီမးလၢ” အၤဘြၤဟၣ်အဂီၢ်လီၤ. သနာ်က့ ဒ်ယဟိဝၤအတၢ်နဲၣ်လိအသိး အၤဘြၤဟၣ်ဒိကနၣ်အမါအတၢ် ကတိၤလၢ တၢ်ဆီၣ်လီၤသးအဃိ အဟံၣ်ဖိဃီဖိ ဒိးန့ၢ်ဘၣ်တၢ်ဆိၣ်ဂ့ၤလီၤ. (၁ မိၤၡ့ ၂၁:၉- ၁၃) မုၢ်မဆါတနံၤအံၤ, ပှၤဒီမိဝၤလၢ ထီၣ်ပှၢ်အိၣ်လံအနံၣ် အါမးတဖၣ်ဒၣ်လဲာ် မၤလိန့ၢ်တၢ်မၤလိသ့ အါမးလၢ ပှၤဒီမိဝၤလၢ အပျံၤယွၤခံဂၤအအိၣ်န့ၣ်လီၤ.
၂၄. ဟံၣ်ဃီဒ်လဲၣ် တကလုာ်န့ၣ် မၤလၤကပီၤ ယဟိဝၤလဲၣ်. လၢမနုၤအဃိလဲၣ်.
၂၄ ဟံၣ်မုာ်ဃီပၢၤအကထိလၢ ခရံာ်ဖိတၢ်အိၣ်ဖှိၣ်ပူၤန့ၣ် မါတဖၣ်ပာ်ကဲအဝၤဒိၣ်မးဒီး ဝၤတဖၣ်စ့ၢ်ကီးအဲၣ်အမါဒီး မၤလၤကပီၤဝဲလီၤ. လၢတၢ်ကိးမံၤဒဲးအပူၤ ပာ်ယဟိဝၤအတၢ်ဘၣ်သးလၢညါဒီး မၤသကိးဃုာ်တၢ် ဒ်သိးသိးန့ၣ်လီၤ. နမ့ၢ်ပာ်လီၤနသးလၢ နကဆီဟံၣ်ဆီဃီဒီး ဃုထၢသးသမူတံၤသကိးလၢ တၢ်ကူၣ်သ့ဒီး ကတဲာ်ကတီၤ ဂ့ၤဂ့ၤလၢတၢ်ဆီဟံၣ်ဆီဃီအဂီၢ်ဒီး မ်ကကဲထီၣ်ဟံၣ်ဃီလၢ အမၤလၤကပီၤယဟိဝၤ ဒီးအိၣ်ဒီးတၢ်အဲၣ်ဒီး တၢ်ဃူတၢ်ဖိးတက့ၢ်. မ့ၢ်မၤဒ်န့ၣ်ဒီး နဟံၣ်ဃီအံၤကမၤစၢၤနၤ နီၢ်နီၢ်လၢ နကအိၣ်ဂၢၢ်ဆိးကျၢၤလၢ ယွၤအတၢ်အဲၣ်အပူၤန့ၣ်လီၤ.
a ကွၢ်ယဟိဝၤအပှၤအုၣ်အသးတဖၣ် ထုးထီၣ်ဝဲလံာ်လၢအမ့ၢ်, မိသားစုပျော်ၡွင်မှု၏လျှို့ဝှက်ချက်, အခန်း ၂ တက့ၢ်.
b ယဟိဝၤအခ့အပှၤလၢအတီဒီးအီၤတနီၤ, ဒ်သိး အၤဘြၤဟၣ်ဒီးယၤကိာ်န့ၣ် အမါအိၣ်အါန့ၢ်ဒံးတဂၤလီၤ. ဖဲယဟိဝၤရ့ဒီးအခ့အပှၤလၢ အတီဒီးအီၤတဖၣ် ဒီးပှၤအံၣ်စရ့လးဖိတဖၣ်အခါ, ကစၢ်ဟ့ၣ်အခွဲးလၢ ကဟံးန့ၢ်အမါအါန့ၢ်ဒံး တဂၤလီၤ. ကစၢ်တစးထီၣ်ဝဲ တၢ်အံၤဘၣ်ဆၣ် ပၢၤဃာ်ဝဲလၢ အလီၢ်ဘၣ်ဘၣ်လီၤ. ဘၣ်ဆၣ်, ခရံာ်ဖိတဖၣ် ကဘၣ်ပာ်သူၣ်ပာ်သးလၢ ခဲအံၤယဟိဝၤတဟ့ၣ်အခွဲးလၢ ပှၤဘူၣ်ထီၣ်ဘါထီၣ်အီၤတဖၣ် ကဟံးန့ၢ်အမါအါန့ၢ်ဒံးတဂၤဘၣ်.—မးသဲ ၁၉:၉; ၁ တံၤမသ့း ၃:၂.