တၢ်ပိာ်ထွဲ
သွံၣ်အကူာ်အခီတဖၣ် ဒီးတၢ်ကူးကွဲးယါဘျါတၢ်
သွံၣ်အကူာ်အခီတဖၣ်. သွံၣ်အကူာ်အခီတဖၣ်န့ၣ် ဟဲလီၤစၢၤလၢ သွံၣ်အခီဖး အကါဒိၣ်လွံၢ်မံၤ လၢအမ့ၢ် သွံၣ်စဲလ်အဂီၢ်, သွံၣ်စဲလ်အဝါ, ဖလ့းထ်လဲးစ် (သွံၣ်စဲလ်တမံၤလၢ အမၤလီၤသကၤ တၢ်သွံၣ်), ဒီး သွံၣ်ထံဆှံလီၤ. အဒိ, သွံၣ်စဲလ်ဂီၤန့ၣ် ပာ်ဃုာ်ဒီး ဖရိၣ်ထံ(န်) ဟံၣ်မိၣ်ကလိၣ်ဘ့ၣ်လီၤ. ပနံာ်လၢ ဘၣ်တၢ်ထုးထီၣ်အီၣ်လၢ ပှၤကညီမ့တမ့ၢ် ဆၣ်ဖိကီၢ်ဖိ အဟံၣ်မိၣ်ကလိၣ်ဘ့ၢ်န့ၣ် ဘၣ်တၢ်သူအီၤလၢ တၢ်ကူစါပှၤဆါလၢ သွံၣ်ဂံၢ်စၢ် မ့တမ့ၢ် အသွံၣ်ယွၤလီၤမၢ်အါအါဂီၢ်ဂီၢ်န့ၣ်လီၤ.
သွံၣ်ထံဆှံ— လၢအပာ်ဃုာ်ဒီး ထံ မျးကယၤ ၉၀ န့ၣ်စိာ်ဝဲ ဟိၣ်မိ, အံသၣ်လၢတအိၣ်ဒီးတၢ်မူ, အ့ၣ်ဇါ, ဒီးတၢ်လၢအန့ၢ်ဂံၢ်န့ၢ်ဘါ လၢအပာ်ဃုာ်ဒီး ဟီၣ်လာ်ပနံာ် ဒီးအံသၣ်ဆၢန့ၣ်လီၤ. သွံၣ်ထံဆှံ စိာ်ခီစ့ၢ်ကီး တၢ်လၢအမၤလီၤသကၤတၢ်သွံၣ်, ဒီးတၢ်လၢအတြီဃာ်တၢ်ဆါ, ဒီးဖရိၣ်ထံ(န်) ဒ်သိး အဲၣ်လ်ဘျုၣ်မ့လီၤ. ပှၤတဂၤဂၤ မ့ၢ်ဘၣ်ကူဘၣ်ဂာ်လၢ တၢ်ဆါနီၢ်နီၢ် တမံၤန့ၣ်, ကသံၣ်သရၣ်တဖၣ် ကနဲၣ်အီၤလၢ ကဘၣ်ဆဲးဝဲ ကမၣ်ကလိၣ်ဘျုၣ်လ့ၣ်, လၢတၢ်ထုးထီၣ်အီၤလၢ ပှၤကညီအသွံၣ်ထံဆှံ လၢအအိၣ်ဒီးဂံၢ်တြီဆၢတၢ်ဆါန့ၣ်လီၤ. သွံၣ်စဲလ်အဝါန့ၣ် မ့ၢ်တၢ်အခီၣ်ထံးလၢ ဖရိၣ်ထံ(န်) လၢအထုးထီၣ် တၢ်တြီဆၢ တၢ်ဘၣ်ကူဘၣ်ဂာ်ဒီး ဂာ်တၢ်ဖိတၢ်လံၤလၢ အထိၣ်ဂဲၤထီၣ် တၢ်တြီဆၢတၢ်ဘၣ်ကူဘၣ်ဂာ်အဃိ ဘၣ်တၢ်သူအီၤလၢ တၢ်ကူစါ တၢ်ဆါဘၣ်ကူဘၣ်ဂာ်တနီၤဒီး ခဲစၢၣ်န့ၣ်လီၤ.
တၢ်ကူစါယါဘျါလၢ တၢ်သူတၢ်သွံၣ်အကူာ်အခီတဖၣ်န့ၣ် ခရံာ်ဖိတဖၣ် ကြၢးတူၢ်လိာ်ဝဲဧါ. ဘၣ်ဃးဒီးတၢ်အံၤန့ၣ် လံာ်စီဆှံတပာ်ဖျါဝဲ လီၤတံၢ်လီၤဆဲးအဃိ, ပှၤတဂၤစုာ်စုာ် ကဘၣ်သူအသးလၢအသ့ၣ်ညါဒၣ်တၢ် လၢကမၤတၢ်ပာ်လီၤသးလၢ ယွၤအမဲာ်ညါလီၤ. တနီၤနီၤ ကဂ့ၢ်လိာ်ဝဲ သွံၣ်အကူာ်အခီခဲလၢာ်, မ့ၢ်လၢဆိကမိၣ်ဝဲလၢ ယွၤအတၢ်မၤလိာ် စံးဘၣ်ပှၤအံၣ်စရ့လးဖိတဖၣ်လၢ တၢ်သွံၣ်လၢဘၣ်တၢ်ထုးထီၣ်အီၤလၢ တၢ်ဘၣ်တ့အပူၤန့ၣ် ကဘၣ် “လူလီၤအီၤလၢ ဟီၣ်ခိၣ်အဖီခိၣ်” အဃိလီၤ. (၅ မိၤၡ့ ၁၂:၂၂-၂၄) ပှၤတနီၤ ဂ့ၢ်လိာ်ဝဲ တၢ်သွီသွံၣ် ခဲလၢာ် မ့တမ့ၢ် သွံၣ်အခီဖးလၢအကါဒိၣ်တဖၣ် သနာ်က့, တူၢ်လိာ်ဝဲ တၢ်ယါဘျါလၢ အပာ်ဃုာ်ဒီး သွံၣ်အကူာ်အခီတမံၤလီၤ. အဝဲသ့ၣ် ကစံးဝဲလၢ သွံၣ်အကူာ်အခီတနီၤလၢ တၢ်ထုးထီၣ်အီၤလၢ သွံၣ်အပူၤန့ၣ် တခၢၣ်စးလၢၤဝဲ တၢ်ဘၣ်တ့လၢအိၣ်ဒီးအသးသမူတဖၣ် အသွံၣ်ဘၣ်လီၤ.
ဖဲပအိၣ်ဒီးတၢ်ပာ်လီၤသးဘၣ်ဃး သွံၣ်အကူာ်အခီတဖၣ်အခါ, ဆိကမိၣ်ကွၢ် တၢ်သံကွၢ်တဖၣ်အံၤတက့ၢ်. မ့ၢ်ယသ့ၣ်ညါ တၢ်ဂ့ၢ်လိာ် တၢ်သွံၣ်အကူာ်အခီခဲလၢာ်န့ၣ် အခီပညီမ့ၢ် ယတတူၢ်လိာ် ကသံၣ်ကသီတနီၤလၢ ဘၣ်တၢ်မၤလၢတၢ်သွံၣ် လၢကတြီဃာ်တၢ်ဆါ မ့တမ့ၢ် ကသံၣ်မၤလီၤသကၤ တၢ်သွံၣ်လၢ ကမၤတုာ်တၢ်သွံၣ်အဂီၢ်န့ၣ်ဧါ. ဘၣ်မနုၤအဃိ ယဂ့ၢ်လိာ် မ့တမ့ၢ် ယတူၢ်လိာ် တၢ်သူသွံၣ်အကူာ်အခီတမံၤ မ့တမ့ၢ် တနီၤန့ၣ် ယတဲနၢ်ပၢၢ် ကသံၣ်သရၣ်ကသ့ဧါ.
တၢ်ကူးကွဲး ယါဘျါတဖၣ်. တၢ်အံၤပာ်ဃုာ်ဒီး ဟံၣ်မိၣ်ဒလူၡ့ ဒီးတၢ်ထၢဖှိၣ်စဲလ်လီၤ. ဟံၣ်မိၣ်ဒလူၡ့န့ၣ် မ့ၢ်တၢ်ဘိးကပၤတၢ်သွံၣ်လၢ နီၢ်ခိအပူၤ, ဒီးထၢနုာ်ကဒါက့ၤ ကသံၣ်ထံလၢ မၤလဲၢ်ထီၣ် တၢ်သွံၣ်အသံးအကာ်လီၤ. ဒီးလၢခံ သွံၣ်လၢတၢ်ဘိးကပၤဃာ်န့ၣ် ဘၣ်တၢ်ထၢနုာ်ကဒါက့ၤလၢ ပှၤဆါလီၤ. တၢ်ထၢဖှိၣ်စဲလ်န့ၣ် မ့ၢ်တၢ်ဒၢဃာ် တၢ်သွံၣ်ဒီး သွီကဒါက့ၤ တၢ်သွံၣ်လၢ အဟးထီၣ်ဖဲ တၢ်ကူးကွဲးအဆၢကတီၢ်န့ၣ်လီၤ. သွံၣ်လၢဟးထီၣ်လၢ တၢ်ဘၣ်ဒိအလီၢ် မ့တမ့ၢ် နီၢ်ခိအပူၤတဖၣ်န့ၣ်, ဘၣ်တၢ်မၤကဆှီအီၤ မ့တမ့ၢ် ပှံၢ်အီၤ, ဒီးထၢနုာ်ကဒါက့ၤဆူ ပှၤဆါအပူၤလီၤ. တၢ်ကူစါဒ်သိးအံၤန့ၣ် ကသံၣ်သရၣ် တဂၤဒီးတဂၤ သူဝဲကျဲတလီၤဂာ်လိာ်သးအဃိ, ခရံာ်ဖိတဂၤ ကြၢးသ့ၣ်ညါလီၢ်တံၢ်ဝဲ အကသံၣ်သရၣ် တိာ်ပာ်ဝဲလၢ ကမၤဝဲဒ်လဲၣ်န့ၣ်လီၤ.
ဖဲတၢ်မၤတၢ်ပာ်လီၤသးဘၣ်ဃး တၢ်ကူစါယါဘျါအခါ, သံကွၢ်လီၤက့ၤနသးဒ်အံၤတက့ၢ်. ‘ယသွံၣ်တနီၤ မ့ၢ်ဘၣ်တၢ်ထုးထီၣ်ကွံာ်လၢ ယနီၢ်ခိအချၢ ဒီးသွံၣ်အတၢ်ယွၤလီၤ အိၣ်ကတီၢ်ဝဲ တစိၢ်ဖိအခါ, ယသးလၢအသ့ၣ်ညါဒၣ်တၢ် ကဟ့ၣ်အခွဲးလၢ ယကထံၣ် တၢ်သွံၣ်အံၤလၢ မ့ၢ်ဒံးယကူာ်ယခီအဖၢ, ဒီးတလိၣ်လၢ “ဘၣ်လူလီၤအီၤလၢ ဟီၣ်ခိၣ်” ဘၣ်ဧါ.’ (၅ မိၤၡ့ ၁၂:၂၃, ၂၄) ‘ဖဲတၢ်ကူစါယါဘျါအတီၢ်ပူၤ ယသွံၣ်တနီၤမ့ၢ်ဘၣ်တၢ်ထုးထီၣ်ကွံာ်အီၤ, မၤဂ့ၤထီၣ်က့ၤအီၤဒီး သွီနုာ်ကဒါက့ၤလၢ ယနီၢ်ခိပူၤန့ၣ် ယသးလၢအသ့ၣ်ညါဒၣ်တၢ်လၢ ယမၤလိပာ်လၢ လံာ်စီဆှံအံၤ ဘၣ်တၢ်မၤတံာ်တာ်အီၤဧါ. တၢ်ဂ့ၢ်လိာ် တၢ်ကူစါယါဘျါ ကိးမံၤဒဲးလၢ ပာ်ဃုာ်ဒီးတၢ်သူ ယနီၢ်ကစၢ်အသွံၣ်န့ၣ် အခီပညီမ့ၢ် ယတတူၢ်လိာ် တၢ်မၤကွၢ်တၢ်သွံၣ်, ဟံၣ်မိၣ်ဒၣ်လစ့းစ် လၢအမ့ၢ် တၢ်မၤကဆှီသွံၣ်, မ့တမ့ၢ် တၢ်သူသးဖျၢၣ်-ပသိၣ်စဲးန့ၣ် ယသ့ၣ်ညါကစီဒီဧါ.’
ဖဲတၢ်ကူးကွဲးယါဘျါအတီၢ်ပူၤ ဘၣ်ဃးဒီးအဝဲကဟ့ၣ်အခွဲးလၢ တၢ်ကသူအသွံၣ်ဒ်လဲၣ်န့ၣ် ခရံာ်ဖိတဂၤ ကဘၣ်ဃုထၢဝဲလၢ အကစၢ်ဒၣ်ဝဲလီၤ. တၢ်မၤကွၢ် တၢ်အိၣ်ဆူၣ်အိၣ်ချ့, တၢ်ကူစါယါဘျါလၢ စိၤခဲအံၤလၢ ပာ်ဃုာ်ဒီး တၢ်ထုးထီၣ်သွံၣ်တစဲး, ဒီးမၤဂ့ၤထီၣ်က့ၤအီၤ, ဒီးတၢ်သွီနုာ်ကဒါက့ၤအီၤန့ၣ် မ့ၢ်တၢ်ဒ်န့ၣ်အသိးလီၤ.