တၢ်ပိာ်ထွဲ
လံာ်စီဆှံ အတၢ်ထံၣ်လၢ တၢ်ထုးလီၤဖှၣ် ဒီးတၢ်အိၣ်လီၤဖး
ယဟိဝၤမုၢ်လၢ်ဝဲ ပှၤလၢဆီဟံၣ်ဆီဃီတဖၣ် ကတီဒီး အတၢ်အၢၣ်လီၤလီၤ. ဖဲပာ်ဃုာ်ဝဲ ပိာ်မုၣ်ဒီးပိာ်ခွါ အဆိကတၢၢ်ခံဂၤအခါ, ယဟိဝၤပာ်ဖျါဝဲလၢ “ပိာ်ခွါအံၤ . . . ကဘျုးအသးဆူ ပိာ်မုၣ်အအိၣ်, ဒီးတၢ်လၢပှၤခံဂၤန့ၣ် ကကဲထီၣ်တၢ်တသွံၣ်ဃီတညၣ်ဃီလီၤ.” လၢခံန့ၣ်, ယ့ၣ်ၡူးခရံာ်တဲကဒီးဝဲ တၢ်အံၤဝံၤဒီး တဲအါထီၣ်ဝဲလၢ “တၢ်လၢယွၤပာ်ဃုာ်ဝဲန့ၣ်, မ်ပှၤကညီသုတထုးဖှၣ်တဂ့ၤ.” (၁ မိၤၡ့ ၂:၂၄; မးသဲ ၁၉:၃- ၆) လၢတၢ်န့ၣ်အဃိ, ယဟိဝၤဒီးယ့ၣ်ၡူး ထံၣ်ဝဲ တၢ်ဆီဟံၣ်ဆီဃီဒ် တၢ်စၢဃာ်တစိၤသး လၢကတၢၢ်ဝဲဖဲ သးသမူအတံၤသကိးသံကွံာ်အခါန့ၣ်လီၤ. (၁ ကရံၣ်သူး ၇:၃၉) တၢ်ဆီဟံၣ်ဆီဃီန့ၣ် မ့ၢ်တၢ်ရဲၣ်တၢ်ကျဲၤလၢ စီဆှံအဃိ, တၢ်ထုးလီၤဖှၣ်န့ၣ် ပတကြၢးဆိကမိၣ်အီၤလၢ တၢ်တဒိၣ်တမုၢ်ဘၣ်. နီၢ်နီၢ်, ယဟိဝၤသးဟ့ တၢ်ထုးလီၤဖှၣ်လၢ တလီၤပလိာ်ဒီး လံာ်စီဆှံအဂ့ၢ်ခီၣ်ထံးန့ၣ်လီၤ.—မၤလကံ ၂:၁၅, ၁၆.
တၢ်အဂ့ၢ်အခၢး ဒိးသန့ၤထီၣ်အသးလၢ လံာ်စီဆှံလၢ တၢ်ထုးလီၤဖှၣ်အဂီၢ်န့ၣ်မ့ၢ်မနုၤလဲၣ်. မ့ၢ်လီၤ, ယဟိဝၤသးဟ့ တၢ်အဲၣ်ဘၢမါအဲၣ်ဘၢဝၤ ဒီးတၢ်မၤကမၣ်မုၣ်ကမၣ်ခွါလီၤ. (၁ မိၤၡ့ ၃၉:၉; ၂ ၡမူၤအ့လး ၁၁:၂၆, ၂၇; စံးထီၣ်ပတြၢၤ ၅၁:၄) အါန့ၢ်အန့ၣ်, ယဟိဝၤထံၣ်ဝဲလၢ တၢ်မၤကမၣ်မုၣ်ကမၣ်ခွါန့ၣ် လီၤသးဘၣ်အၢဒိၣ်မးအဃိ အဝဲဟ့ၣ်ဝဲအခွဲးလၢ တၢ်အံၤမ့ၢ် တၢ်အဂ့ၢ်အခၢးလၢ တၢ်ထုးလီၤဖှၣ်အဂီၢ်လီၤ. (တၢ်ကတိၤသကိးလၢ တၢ်မၤကမၣ်မုၣ်ကမၣ်ခွါ ပာ်ဃုာ်ဒီးတၢ်မနုၤလဲၣ်န့ၣ်, ဘၣ်တၢ်ပာ်ဖျါထီၣ်ဖဲ အဆၢဒိၣ် ၉, လံာ်အဆၢ ၇, န့ၣ်လီၤ.) ယဟိဝၤဟ့ၣ်အခွဲးလၢ သးသမူတံၤသကိးလၢ အတၢ်ကမၣ်တအိၣ်တဂၤ ကဃုထၢဝဲလၢ ကအိၣ်ဃုာ်ဝဲဒီး အသးသမူတံၤသကိးလၢ အတၢ်ကမၣ်အိၣ်မ့ၢ်ဂ့ၤ မ့တမ့ၢ် ကထုးလီၤဖှၣ်အသးမ့ၢ်ဂ့ၤန့ၣ်လီၤ. (မးသဲ ၁၉:၉) လၢတၢ်န့ၣ်အဃိ, သးသမူတံၤသကိးလၢ အတၢ်ကမၣ်တအိၣ်တဂၤ မ့ၢ်ဃုထၢလၢ ကထုးလီၤဖှၣ်အသးန့ၣ်, ယဟိဝၤတသးဟ့ တၢ်ထုးလီၤဖှၣ်အံၤဘၣ်. ဘၣ်ဆၣ်, တကတီၢ်ဃီန့ၣ်, ခရံာ်ဖိတၢ်အိၣ်ဖှိၣ် တဟ့ၣ်ဂံၢ်ဟ့ၣ်ဘါဝဲလၢ ပှၤတဂၤလၢ်လၢ် ကထုးလီၤဖှၣ်အသးဘၣ်. နီၢ်နီၢ်, တၢ်အိၣ်သးအိၣ်ဝဲတနီၤလၢ ကထိၣ်ဂဲၤထီၣ် သးသမူတံၤသကိးလၢ အတၢ်ကမၣ်တအိၣ်တဂၤလၢ ကအိၣ်ဃုာ်ဒီး ပှၤလၢအိၣ်ဒီးတၢ်ကမၣ်န့ၣ်လီၤ. လီၤဆီဒၣ်တၢ် ဖဲပှၤမၤတၢ်ကမၣ်အံၤ မ့ၢ်ပီၢ်ယၢ်လီၤအသး နီၢ်နီၢ်အခါန့ၣ်လီၤ. လၢခံကတၢၢ်, ပှၤလၢအိၣ်ဒီးတၢ်အဂ့ၢ်အခၢးလၢ ဒိးသန့ၤထီၣ်အသးလၢလံာ်စီဆှံလၢ ကထုးလီၤဖှၣ်အသးအဂီၢ်န့ၣ် ကဘၣ်မၤဝဲ အနီၢ်ကစၢ်ဒၣ်ဝဲ အတၢ်ပာ်လီၤသးဒီး ကဘၣ်တူၢ်လိာ်ဝဲ တၢ်ပိာ်ထွဲလၢ ဟဲအိၣ်ထီၣ်ကိးမံၤဒဲးန့ၣ်လီၤ.—ကလၤတံ ၆:၅.
သးသမူတံၤသကိးတဂၤ မ့ၢ်တမၤတၢ်မၤကမၣ်မုၣ်ကမၣ်ခွါဒၣ်လဲာ်, တၢ်အိၣ်သး တလၢကွံာ်အခၢးအဃိ ခရံာ်ဖိတနီၤ ပာ်လီၤအသးလၢ ကအိၣ်လီၤဖး မ့တမ့ၢ် ကထုးလီၤဖှၣ်အသးလီၤ. တၢ်မၤအသးဒ်သိးအံၤန့ၣ်, လံာ်စီဆှံ စံးဝဲလၢ ပှၤလၢအပာ်တီၢ်တၢ်တဂၤန့ၣ် “ကဘၣ်အိၣ်သဘျ့ဝဲဆူညါ, မ့တမ့ၢ် ကဘၣ်ဒိးတၢ်မၤဃူမၤဖိက့ၤအီၤ” လီၤ. (၁ ကရံၣ်သူး ၇:၁၁, ခစ) ခရံာ်ဖိဒ်သိးအံၤတဂၤန့ၣ် တအိၣ်ဒီးတၢ်သဘျ့လၢ ကဆီဟံၣ်ဆီဃီကဒီးတဘျီဘၣ်. (မးသဲ ၅:၃၂) ခဲအံၤပကဆိကမိၣ်ကွၢ် တၢ်အိၣ်အသး တလၢကွံာ်တနီၤလၢ ပှၤတနီၤထံၣ်ဝဲ တၢ်အဂ့ၢ်အခၢးလၢ တၢ်အိၣ်လီၤဖးအဂီၢ်န့ၣ်တက့ၢ်.
တလုၢ်အီၣ်လုၢ်အီတၢ်. ဝၤအံၤမၤတၢ်ကဲသနာ်က့ မ့ၢ်လၢတလုၢ်အီၣ် အဟံၣ်ဖိဃီဖိအဃိ, အဝဲသ့ၣ်ဘၣ်အိၣ်ဖှီၣ်အိၣ်ယာ်, လၢအတၢ်အိၣ်မူ တၢ်လိၣ်ဘၣ်အခီၣ်ထံး တလၢပှဲၤဘၣ်လီၤ. လံာ်စီဆှံ ပာ်ဖျါဝဲလၢ “ပှၤမ့ၢ်တအံးတကွၢ်ဘၣ် . . . အဟံၣ်ဖိဒၣ်ဝဲဒီး, မ့ၢ်အညိကွံာ်တၢ်နာ်ဒီး အၢန့ၢ်ပှၤတနာ်ဘၣ်တၢ်တက့ၢ်လီၤ.” (၁ တံၤမသ့း ၅:၈) ပိာ်ခွါဒ်သိးအံၤတဂၤ မ့ၢ်တလဲလိာ်အသးန့ၣ်, မါအံၤ ကဒီတဒၢအသးဒီး အဖိတဖၣ်အဘျုးအဂီၢ် ကအိၣ်လီၤဖးလၢအဖိးသဲစး လိၣ်ဧါ,တလိၣ်ဧါန့ၣ် ကဘၣ်ဃုထၢဝဲလီၤ. နီၢ်နီၢ်, ခရံာ်ဖိအပှၤပၢဘၣ်ကွၢ်ထွဲတၢ်တဖၣ် ကြၢးသမံသမိး လီၢ်တံၢ် ဝဲတၢ်ဆှိးလၢ ခရံာ်ဖိတဂၤ ဂ့ၢ်လိာ်လၢ ကလုၢ်အီၣ်လုၢ်အီ အဟံၣ်ဖိဃီဖိန့ၣ်လီၤ. ပှၤလၢအဂ့ၢ်လိာ်လၢ ကအံးထွဲကွၢ်ထွဲ အဟံၣ်ဖိဃီဖိန့ၣ် လိၣ်လၢကဘၣ်တၢ်ဟီထီၣ်ကွံာ်အီၤလၢ တၢ်အိၣ်ဖှိၣ်ပူၤလီၤ.
တၢ်မၤဆူးမၤဆါနီၢ်ခိ တလၢအခၢး. ဝၤလၢ အအၢသီတဂၤ မ့ၢ်မၤဆူၣ်မၤစိးတၢ်နးနးကလဲာ်န့ၣ် တၢ်ဘၣ်ယိၣ်အလီၢ်အိၣ်လၢ အမါအတၢ်အိၣ်ဆူၣ်အိၣ်ချ့ဒီး အသးသမူအဂီၢ်လီၤ. ပှၤဒီမိဝၤလၢအဟံၣ်ဃီအိၣ်ဒီး တၢ်သဘံၣ်ဘူၣ်အံၤ မ့မ့ၢ်ခရံာ်ဖိန့ၣ်, ပှၤပၢဘၣ်ကွၢ်ထွဲတၢ်အိၣ်ဖှိၣ်တဖၣ် ကြၢးသမံသမိးဝဲ တၢ်ဂ့ၢ်အံၤမ့ၢ်ဧါတမ့ၢ်ဧါန့ၣ်လီၤ. တၢ်သးထီၣ်တလၢအခၢးဒီး လုၢ်လၢ်အၢလၢ အမၤဆူၣ်မၤစိးတၢ်န့ၣ် မ့ၢ်တၢ်အဂ့ၢ်အခၢးလၢ တၢ်ကဟီထီၣ်ကွံာ်လၢ တၢ်အိၣ်ဖှိၣ်ပူၤလီၤ.—ကလၤတံ ၅:၁၉-၂၁.
တၢ်ဘၣ်ယိၣ်အလီၢ်အိၣ် လၢာ်လၢာ်ဆ့ဆ့လၢ နီၢ်သးတၢ်အိၣ်မူအဂီၢ်. မါမ့တမ့ၢ်ဝၤတဂၤ ကဂုာ်ကျဲးစၢးမၤဝဲထီဘိလၢ အသးသမူတံၤသကိး လူၤထွဲတၢ်ဘူၣ်တၢ်ဘါအမ့ၢ်အတီတသ့ မ့တမ့ၢ် ကမၤဆူၣ်ဝဲလၢ အဝဲကလုၢ်သ့ၣ်ခါပတာ် ယွၤအတၢ်သိၣ်တၢ်သီလၢ ကျဲတမံၤမံၤလီၤ. တၢ်အိၣ်သးဒ်သိးအံၤန့ၣ်, သးသမူတံၤသကိးလၢ ဘၣ်တၢ်မၤပျံၤမၤဖုးအံၤ ‘ကစူၢ်ယွၤအါန့ၢ်ကစူၢ်ပှၤကညီ’ အဂီၢ် ကဘၣ်အိၣ်လီၤဖးလၢ အဖိးသဲစးလိၣ်ဧါ,တလိၣ်ဧါန့ၣ် ကဘၣ်ဃုထၢဝဲလီၤ.—မၤတၢ် ၅:၂၉.
တၢ်အိၣ်သးတလၢအခၢးဒ်သိးအံၤလၢ ပကတိၤသကိးလၢ ထးခဲလၢာ်န့ၣ်, မတၤတဂၤဂ့ၤဂ့ၤ တကြၢးမၢဆူၣ် သးသမူတံၤသကိးလၢ အတၢ်ကမၣ်တအိၣ်တဂၤ လၢကအိၣ်လီၤဖးမ့ၢ်ဂ့ၤ ကအိၣ်ဒ်သိးသိးမ့ၢ်ဂ့ၤဘၣ်. ခရံာ်ဖိလၢ ဒိၣ်တုာ်ခိၣ်ပှဲၤလၢ နီၢ်သးတဖၣ်ဒီး ပှၤပၢဘၣ်ကွၢ်ထွဲတၢ်တဖၣ် ကဟ့ၣ်ဂံၢ်ဟ့ၣ်ဘါတၢ် ဒီးကဟ့ၣ်ကူၣ်ဟ့ၣ်ဖးတၢ်လၢ သန့ၤထီၣ်အသးလၢလံာ်စီဆှံ သနာ်က့, အဝဲသ့ၣ်တသ့ၣ်ညါ တၢ်အိၣ်သးနီၢ်နီၢ်လၢ မါဒီးဝၤအဘၢၣ်စၢၤဘၣ်. ထဲဒၣ်ယဟိဝၤတဂၤဧိၤ သ့ၣ်ညါတၢ်အံၤလီၤ. နီၢ်နီၢ်, မါမ့တမ့ၢ်ဝၤ လၢအမ့ၢ်ခရံာ်ဖိတဂၤ ထဲဒၣ်အဲၣ်ဒိးအိၣ်လီၤဖးဒီး အသးသမူတံၤသကိးအဃိ မ့ၢ်တဲကါတၢ်နးနးကလဲာ် လၢအဟံၣ်ဃီတၢ်သဘံၣ်ဘူၣ်န့ၣ် တမ့ၢ်တၢ်မၤလၤကပီၤ ယွၤဒီး ဟံၣ်ဃီအတၢ်ရဲၣ်တၢ်ကျဲၤဘၣ်လီၤ. ယဟိဝၤသ့ၣ်ညါ တၢ်ကူၣ်ထီၣ်ဖးလီၤကိးမံၤဒဲးလၢ တၢ်ကအိၣ်လီၤဖးအဂီၢ်န့ၣ်လီၤ. ပာ်ခူသူၣ်တၢ်ဂ့ၢ်မနုၤဂ့ၤဂ့ၤ တန့ၢ်ဘၣ်. အါန့ၢ်အန့ၣ်, “ကယဲၢ်တၢ်တမံၤလၢ်လၢ်အိၣ်ဘ့ၣ်ဆ့, ဒီးအိၣ်ဖျါထီၣ်ဝဲလၢ ပှၤအကလုၢ်ဘၣ်ဃးဒီး ပှၤန့ၣ်အမဲာ်လီၤ.” (ဧ့ၤဘြံၤ ၄:၁၃) ဘၣ်ဆၣ်, တၢ်အိၣ်သးလၢ တၢ်ဘၣ်ယိၣ်အလီၢ်အိၣ် တလၢအခၢးအံၤ မ့ၢ်အိၣ်ကဒီးဆူညါန့ၣ်, ခရံာ်ဖိတဂၤ မ့ၢ်ဃုထၢဝဲလၢ ကအိၣ်လီၤဖးန့ၣ် မတၤတဂၤဂ့ၤဂ့ၤ တကြၢးပာ်တၢ်ကမၣ်လၢအလိၤဘၣ်. လၢခံကတၢၢ်န့ၣ်, “ပဘၣ်ဟ့ၣ်တၢ်စံးဆၢလၢ ယွၤလၢပကစၢ်ဒၣ်ပဝဲအဂ့ၢ်ကိးဂၤဒဲးလီၤ.”—ရိမ့ၤ ၁၄:၁၀-၁၂.