တၢ်မၤလိ ၆
စီၤစတ့းဖၣ်—“ကစၢ်ယွၤ ဘၣ်သူၣ်ဘၣ်သးအီၤဒိၣ်မး ဒီးဟ့ၣ်အီၤ တၢ်စိတၢ်ကမီၤ”
စီၤစတ့းဖၣ် စံၣ်တဲၤတဲလီၤတၢ်လၢ ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ် လၢတၢ်သးဒူပူၤအဃိ ပမၤလိန့ၢ် တၢ်မနုၤလၢအအိၣ်လဲၣ်
တၢ်ဂ့ၢ်ဒိးသန့ၤထီၣ်သးလၢ မၤတၢ် ၆:၈–၈:၃
၁-၃. (က) စီၤစတ့းဖၣ် ထံၣ်ဘၣ်ဒီး တၢ်အိၣ်သးလၢ အလီၤပျံၤလီၤဖုးဒ်လဲၣ် ဒီးအဝဲမၤဝဲဒ်လဲၣ်. (ခ) ပကတဲသကိး တၢ်ဂ့ၢ်မနုၤလဲၣ်.
စီၤစတ့းဖၣ် အိၣ်ဝဲလၢ ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ်အပူၤလံ. ကွီၢ်ဘျီၣ်တဖျၢၣ်အံၤန့ၣ် အလီၤပျံၤလီၤဖုး ဒီးဘၣ်သ့ၣ်သ့ၣ် ကအိၣ်ဘူးဒီး တၢ်လုၢ်ဟံၣ်လၢ ဝ့ၢ်ယရူၤၡလ့ၣ်အပူၤ. ဒီးဖဲန့ၣ် အိၣ်ဝဲဒီးပှၤ ၇၁ ဂၤလၢကစံၣ်ညီၣ် စီၤစတ့းဖၣ်. ပှၤတဖၣ်အံၤန့ၣ် မ့ၢ်ပှၤလၢအအိၣ်ဒီး တၢ်စိကမီၤ, ပှၤလၢအမံၤဟူသၣ်ဖျါ ဒီးအဝဲသ့ၣ်အါတက့ၢ်န့ၣ် တပာ်ကဲ ယ့ၣ်ၡူးအပျဲၢ်အဘီၣ် နီတစဲးဘၣ်. ထဲန့ၣ်တကးဒံးဘၣ် ပှၤလၢအမၤလိာ် အဝဲသ့ၣ်လၢ အကဟဲလၢ ကွီၢ်ဘျီၣ်အံၤန့ၣ် မ့ၢ်ဝဲ ပှၤလုၢ်တၢ်ခိၣ် အဒိၣ်ကတၢၢ် စီၤကၤယါဖၤ. စီၤကၤယါဖၤန့ၣ်မ့ၢ်ဝဲ ပှၤလၢအတီခိၣ်ရိၤမဲတၢ်လၢ ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ်အပူၤ ဒီးလၢအပူၤကွံာ် စှၤကိာ်လါန့ၣ် အဝဲဟ့ၣ်လီၤ တၢ်ကလုၢ်လၢ ပှၤကမၤသံကွံာ်ယ့ၣ်ၡူး. အဃိ မ့ၢ်စီၤစတ့းဖၣ် ကပျံၤတၢ်ဖုးတၢ် စ့ၢ်ကီးဧါ.
၂ ဖဲန့ၣ်အဆၢကတီၢ် စီၤစတ့းဖၣ် အမဲာ်သၣ် ဖျါမၤသးဒ်လဲၣ်. ဖဲစံၣ်ညီၣ်ကွီၢ်တဖၣ် ကွၢ်စီၤစတ့းဖၣ် အမဲာ်အခါ စီၤစတ့းဖၣ်အမဲာ်သၣ်န့ၣ် “လီၤဂာ်ဒ်သိးဒီး မူခိၣ်ကလူး အမဲာ်သၣ်.” (မၤတၢ် ၆:၁၅) တၢ်လၢ စံၣ်ညီၣ်ကွီၢ်တဖၣ် ထံၣ်ဝဲအံၤ အဲၣ်ဒိးတဲဝဲ မနုၤလဲၣ်. မူခိၣ်ကလူးလၢ အစိာ် ယဟိဝၤယွၤ အတၢ်ကစီၣ်တဖၣ်န့ၣ် အတပျံၤတၢ်ဘၣ် ဒီးအပာ်အသးမုာ်မုာ်ခုၣ်ခုၣ်. ဒ်မူခိၣ်ကလူးတဖၣ်အသိး ဖဲစီၤစတ့းဖၣ် ဆၢထၢၣ်လၢ စံၣ်ညီၣ်ကွီၢ်တဖၣ်လၢ အသးဟ့အီၤ အကျါအခါ စီၤစတ့းဖၣ် အိၣ်ဒီးတၢ်သးဒူ ဒီးအမဲာ်သၣ် ဖျါလၢအပာ်အသး မုာ်မုာ်ခုၣ်ခုၣ်စ့ၢ်ကီး. တၢ်မနုၤမၤစၢၤအီၤလၢ အကပာ်အသး မုာ်မုာ်ခုၣ်ခုၣ်ဒ်န့ၣ်လဲၣ်.
၃ ခရံာ်ဖိလၢ ပစိၤခဲအံၤ မၤလိန့ၢ်တၢ်လၢ တၢ်သံကွၢ်တဖျၢၣ်အံၤ အတၢ်စံးဆၢသ့ဝဲအါမး. အဆိကတၢၢ်န့ၣ် ပကမၤလိ ဘၣ်ဃးဒီး ဘၣ်မနုၤအဃိ စီၤစတ့းဖၣ် ထံၣ်ဘၣ်ဒီး တၢ်အိၣ်သးလၢ အလီၤပျံၤလီၤဖုးဒိၣ်မးအံၤလဲၣ်. တချုးလၢ အဝဲထံၣ်ဘၣ် တၢ်အိၣ်သးလၢ အကီခဲဒံးဘၣ်အခါ အဝဲဆၢထၢၣ်ဂၢၢ်ကျၢၤလၢ အတၢ်နာ်အဂီၢ်ဒ်လဲၣ်. ဒီးပကွၢ်လိအီၤ ကသ့ဒ်လဲၣ်.
“အဝဲသ့ၣ် ဟ့ၣ်သဆၣ်ထီၣ် ပှၤဂီၢ်မုၢ်တဖၣ်” (မၤတၢ် ၆:၈-၁၅)
၄, ၅. (က) ဘၣ်မနုၤအဃိ စီၤစတ့းဖၣ်န့ၣ် အကဲ ပှၤလုၢ်ဒိၣ်ပှ့ၤဒိၣ်လၢ တၢ်အိၣ်ဖှိၣ်အဂီၢ်လဲၣ်. (ခ) စီၤစတ့းဖၣ်န့ၣ် “ကစၢ်ယွၤ ဘၣ်သူၣ်ဘၣ်သးအီၤဒိၣ်မး ဒီးဟ့ၣ်အီၤ တၢ်စိတၢ်ကမီၤ” န့ၣ်အဲၣ်ဒိးတဲဝဲ အခီပညီဒ်လဲၣ်.
၄ ပသ့ၣ်ညါဘၣ်လၢ စီၤစတ့းဖၣ်န့ၣ် မ့ၢ်ပှၤလၢအလုၢ်ဒိၣ်ပှ့ၤဒိၣ်လၢ ခရံာ်ဖိတၢ်အိၣ်ဖှိၣ်လၢ အအိၣ်ထီၣ်သီသီတဖျၢၣ်အဂီၢ်. လၢတၢ်မၤလိလၢ အပူၤကွံာ်တခါန့ၣ် ပထံၣ်ဘၣ်လၢ စီၤစတ့းဖၣ် ပၣ်ဃုာ်လၢ ပှၤပိာ်ခွါလၢ အဆီၣ်လီၤသးနွံဂၤအကျါ ဒီးဖဲတၢ်မၢဖိတဖၣ် လိၣ်ဘၣ်ပှၤလၢ ကမၤစၢၤတၢ်အခါ အဝဲသ့ၣ် သးအိၣ်မၤစၢၤတၢ်. ကစၢ်ယွၤဆိၣ်ဂ့ၤ စီၤစတ့းဖၣ်အဃိ စီၤစတ့းဖၣ် အိၣ်ဒီးတၢ်သ့တၢ်ဘၣ်အါမး. ဘၣ်ဆၣ် အတၢ်ဆီၣ်လီၤသးန့ၣ် လီၤကမၢကမၣ်ဒိၣ်မး. ဖဲ မၤတၢ် ၆:၈ န့ၣ်ပဖးဘၣ်လၢ ကစၢ်ယွၤ ဟ့ၣ်စီၤစတ့းဖၣ် တၢ်စိတၢ်ကမီၤဒ်သိး စီၤစတ့းဖၣ်မၤဝဲ “တၢ်လီၤလိၢ်လီၤလး ဒီးတၢ်ပနီၣ် ဒိၣ်ဒိၣ်မုၢ်မုၢ်တဖၣ်” ဒ်တၢ်မၢဖိတနီၤ မၤဝဲအသိး ကသ့အဂီၢ်. ဒီးပသ့ၣ်ညါဘၣ်စ့ၢ်ကီးလၢ အဝဲမ့ၢ် ပှၤလၢ “ကစၢ်ယွၤ ဘၣ်သူၣ်ဘၣ်သးအီၤဒိၣ်မး ဒီးဟ့ၣ်အီၤ တၢ်စိတၢ်ကမီၤ.” တၢ်အံၤ အဲၣ်ဒိးတဲဝဲ အခီပညီဒ်လဲၣ်.
၅ ကြံးအတၢ်ကတိၤလၢ ပှၤကွဲးကျိာ်ထံအီၤလၢ “ကစၢ်ယွၤ ဘၣ်သူၣ်ဘၣ်သးအီၤ” န့ၣ် ပှၤကွဲးကျိာ်ထံအီၤလၢ တၢ်သးကညီၤဒိၣ်ဒိၣ်မုၢ်မုၢ်စ့ၢ်ကီး. အဃိ ပသ့ၣ်ညါဘၣ်လၢ စီၤစတ့းဖၣ်န့ၣ် အသးဂ့ၤ ဒီးအသူၣ်ကပုာ်လုး အသးကဖီလီ အဃိ ပှၤဂၤတဖၣ် ဘၣ်သူၣ်ဘၣ်သးအီၤ. တကးဒံးဘၣ် အဝဲတဲတၢ်သ့မး ဒီးဖဲအတဲတၢ်အခါ အတဲဝဲလၢ တၢ်သူၣ်ဘျၢသးဘျၢ ဒီးပှၤလၢအဒိကနၣ်အီၤန့ၣ် အဝဲဒုးနာ်န့ၢ် အဝဲသ့ၣ်လၢ တၢ်မ့ၢ်တၢ်တီလၢ အဝဲတဲဝဲတဖၣ်န့ၣ် ကကဲဘျုးလၢ အဝဲသ့ၣ်အဂီၢ်. အဃိ တၢ်လၢ စီၤစတ့းဖၣ် တဲဝဲန့ၣ် ထုးန့ၢ်ပှၤဂီၢ်မုၢ်အသး. စီၤစတ့းဖၣ် ပျဲဝဲလၢ ကစၢ်ယွၤအသးစီဆှံ ကဟံးစုနဲၣ်ကျဲအီၤအဃိ ကစၢ်ယွၤအသးစီဆှံ မၤတၢ်လၢအပူၤ ဒီးအဝဲပှဲၤဝဲဒီး ကစၢ်ယွၤ အတၢ်စိတၢ်ကမီၤ. စီၤစတ့းဖၣ်န့ၣ် အအိၣ်ဒီးတၢ်ဂ့ၤတၢ်ဝါ ဒီးတၢ်သ့တၢ်ဘၣ်ဒီဒူၣ် သနာ်က့ အတပာ်ထီၣ်ထီအသးဘၣ်. အဝဲတပျဲလၢ ပှၤကပတြၢၤအီၤဘၣ်, အပျဲလၢ ပှၤကစံးထီၣ်ပတြၢၤ ယဟိဝၤယွၤ. တကးဒံးဘၣ် အဝဲပာ်ဖျါထီၣ် တၢ်အဲၣ်လၢ ပှၤလၢအစံၣ်တဲၤတဲလီၤဝဲ အဖီခိၣ်. အဃိ ပှၤထီဒါတၢ်တဖၣ် ထံၣ်အီၤဒ်အမ့ၢ်ပှၤလၢ အလီၤဘၣ်ယိၣ်လၢ အဝဲသ့ၣ် အတၢ်ဘူၣ်တၢ်ဘါအဂီၢ်န့ၣ် တမ့ၢ်တၢ်လၢ အလီၤကမၢကမၣ်ဘၣ်.
၆-၈. (က) ပှၤလၢအထီဒါတၢ်တဖၣ် ပာ်ဒ့ၣ်ပာ်ကမၣ် စီၤစတ့းဖၣ် ဒ်လဲၣ်. (ခ) နဆိမိၣ် ဘၣ်မနုၤအဃိ စီၤစတ့းဖၣ် အဒိအတဲာ်န့ၣ် ကကဲဘျုးလၢပဂီၢ်လဲၣ်.
၆ ပှၤပိာ်ခွါတနီၤန့ၣ် တဲအါလိာ်သးဒီး စီၤစတ့းဖၣ် “ဘၣ်ဆၣ် သးစီဆှံမၤစၢၤ စီၤစတ့းဖၣ် ဒီးအဝဲတဲတၢ်ပှဲၤဒီး တၢ်ကူၣ်သ့အဃိ အဝဲသ့ၣ် တဲအီၤတနၢၤဘၣ်.”a ခီဖျိလၢ အဝဲသ့ၣ် တဲစီၤစတ့းဖၣ် တနၢၤဘၣ်အဃိ “လၢတၢ်ခူသူၣ်အပူၤ အဝဲသ့ၣ် ကွဲန့ၢ်လွဲန့ၢ် ပှၤဂၤတဖၣ်” ဒ်သိး ကပာ်ဒ့ၣ်ပာ်ကမၣ် စီၤစတ့းဖၣ်အဂီၢ်. အဝဲသ့ၣ် “ဟ့ၣ်သဆၣ်ထီၣ် ပှၤဂီၢ်မုၢ်တဖၣ်,” ပှၤသူၣ်က့သးပှၢ်တဖၣ် ဒီးပှၤကွဲးလံာ်တဖၣ်အဃိ ပှၤက့ၤဖီၣ် စီၤစတ့းဖၣ် ဒီးလဲၤဆှၢအီၤလၢ ပှၤယူဒၤဖိအကွီၢ်ဘျီၣ်လၢ အဒိၣ်ကတၢၢ်တဖျၢၣ်အပူၤ. (မၤတၢ် ၆:၉-၁၂) အဝဲသ့ၣ် တဲဝဲလၢ စီၤစတ့းဖၣ်န့ၣ် မၤကမၣ် ကစၢ်ယွၤ ဒီးစီၤမိၤၡ့. အဝဲသ့ၣ်တဲဝဲ လၢကျဲဒ်လဲၣ်.
၇ ပှၤလၢအဃု စီၤစတ့းဖၣ် အတၢ်ကမၣ်န့ၣ် အဝဲသ့ၣ် တဲဝဲလၢ စီၤစတ့းဖၣ် တဲကမၣ် “တၢ်စီဆှံအလီၢ်” ဒီးတၢ်လုၢ်ဟံၣ်လၢ အအိၣ်လၢ ဝ့ၢ်ယရူၤၡလ့ၣ်အပူၤ. (မၤတၢ် ၆:၁၃) ဒီးတဲဝဲလၢ စီၤစတ့းဖၣ် မၤကမၣ် စီၤမိၤၡ့ ခီဖျိထီဒါဝဲစီၤမိၤၡ့ အတၢ်သိၣ်တၢ်သီ ဒီးဆီတလဲဝဲစီၤမိၤၡ့ အတၢ်သိၣ်တၢ်သီ. ဖဲန့ၣ်အဆၢကတီၢ် ပှၤယူဒၤဖိတဖၣ်န့ၣ် ပာ်ဒိၣ်ဝဲ တၢ်လုၢ်ဟံၣ်ဒီး စီၤမိၤၡ့ အတၢ်သိၣ်တၢ်သီဒိၣ်မး ဒီးပာ်ဒိၣ်ဝဲ လုၢ်လၢ်လၢ အဝဲသ့ၣ် ဖၢနုာ်အါထီၣ်ဝဲလၢ စီၤမိၤၡ့ အတၢ်သိၣ်တၢ်သီအပူၤဒိၣ်မး. အဃိ အဝဲသ့ၣ်ထံၣ်ဝဲလၢ စီၤစတ့းဖၣ်န့ၣ် အတၢ်ကမၣ်အိၣ်ဖးဒိၣ် ဒီးအလီၤဘၣ်ယိၣ်လၢ အဝဲသ့ၣ်အဂီၢ် အဃိ အကြၢးသံ.
၈ ပထံၣ်ဘၣ်လၢ ပှၤလၢအသးဆူၣ်လၢ တၢ်ဘူၣ်တၢ်ဘါတဖၣ်န့ၣ် သူဝဲကျဲတဘိအံၤလၢ ကမၤအၢမၤနး ကစၢ်ယွၤ အပှၤဂီၢ်မုၢ် အဃိ လီၤသးအုးဒိၣ်မး. မုၢ်မဆါတနံၤအံၤစ့ၢ်ကီး ပှၤလၢအသးဆူၣ်လၢ တၢ်ဘူၣ်တၢ်ဘါတနီၤန့ၣ် အထီဒါတၢ် ဒီးတဘျီတခီၣ် ဆီၣ်သနံးဝဲ ပဒိၣ်တဖၣ် ဒ်သိးကမၤအၢမၤနး ယဟိဝၤပှၤအုၣ်အသးတဖၣ်. ဖဲပထံၣ်ဘၣ် တၢ်ပာ်ဒ့ၣ်ပာ်ကမၣ်ဒ်န့ၣ်အခါ ပကြၢးမၤဒ်လဲၣ်. ပဟံန့ၢ်တၢ်မၤလိလၢ စီၤစတ့းဖၣ်အအိၣ် သ့ဝဲအါမး.
စံၣ်တဲၤတဲလီၤ “ကစၢ်ယွၤ လၢအပှဲၤဒီး တၢ်လၤကပီၤတဂၤ” အဂ့ၢ် လၢတၢ်သးဒူအပူၤ (မၤတၢ် ၇:၁-၅၃)
၉, ၁၀. ဘၣ်ဃးဒီး စီၤစတ့းဖၣ် တဲဆၢက့ၤတၢ်လၢ ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ်အပူၤန့ၣ် ပှၤတနီၤထံၣ်ဝဲဒ်လဲၣ်. ဒီးပကဘၣ်သ့ၣ်နီၣ်ထီၣ် တၢ်ဂ့ၢ်မနုၤလဲၣ်.
၉ ဒ်ပတဲတ့ၢ်လၢ တၢ်မၤလိအခီၣ်ထံးအသိး ဖဲပှၤပာ်ဒ့ၣ်ပာ်ကမၣ် စီၤစတ့းဖၣ်အခါ စီၤစတ့းဖၣ် အမဲာ်သၣ်ဖျါလၢ အပာ်အသးမုာ်မုာ်ခုၣ်ခုၣ် ဒ်မူခိၣ်ကလူးအသိး. ဘၣ်ဃးဒီးတၢ်ဂ့ၢ်လၢ ပှၤပာ်ဒ့ၣ်ပာ်ကမၣ်အီၤန့ၣ် စီၤကၤယါဖၤ တဲအီၤလၢ “တၢ်ဂ့ၢ်တဖၣ်န့ၣ် မ့ၢ်အမ့ၢ်ဧါ.” (မၤတၢ် ၇:၁) ဒီးစီၤစတ့းဖၣ် တဲဆၢက့ၤအီၤလၢ တၢ်သးဒူအပူၤ.
၁၀ ပှၤတနီၤနီၤ တဲဝဲလၢ စီၤစတ့းဖၣ် တဲဆၢက့ၤတၢ်ဒီဒူၣ် ဘၣ်ဆၣ်အတၢ်စံးဆၢန့ၣ် တဘၣ်လိာ်သးဒီး တၢ်သံကွၢ် လၢပှၤသံကွၢ်အီၤဘၣ်. နီၢ်ကီၢ်န့ၣ် စီၤစတ့းဖၣ် ပာ်လီၤန့ၢ်ပှၤ တၢ်အဒိလၢအဂ့ၤလၢ ပှၤမ့ၢ်သံကွၢ်ပှၤ ဘၣ်ဃးဒီး တၢ်သးခုကစီၣ်န့ၣ် ပကဘၣ် “တဲဆၢ” က့ၤအဝဲသ့ၣ်ဒ်လဲၣ်. (၁ ပ့း ၃:၁၅) ဒီးပကဘၣ်သ့ၣ်နီၣ်ထီၣ်လၢ ပှၤသ့ၣ်တဖၣ်န့ၣ် ပာ်ဒ့ၣ်ပာ်ကမၣ် စီၤစတ့းဖၣ်လၢ စီၤစတ့းဖၣ်န့ၣ် အတဲတၢ်လၢ အထီဒါတၢ်လုၢ်ဟံၣ် ဒီးစီၤမိၤၡ့အတၢ်သိၣ်တၢ်သီ အဃိ အကဲပှၤလၢ အတပာ်ကဲကစၢ်ယွၤဘၣ်. ဖဲစီၤစတ့းဖၣ် တဲဆၢက့ၤတၢ်အခါ အတဲဝဲဘၣ်ဃးဒီး စိၤသၢစိၤလၢ အံၣ်စရ့လး အတၢ်စံၣ်စိၤတဲစိၤအပူၤအဂ့ၢ်. ပကတဲသကိး တၢ်ဂ့ၢ်သၢခါအံၤ တခါဘၣ်တခါ.
၁၁, ၁၂. (က) ဘၣ်မနုၤအဃိ စီၤစတ့းဖၣ် တဲဝဲ စီၤအၤဘြၤဟၣ်အဂ့ၢ်လဲၣ်. (ခ) ဘၣ်မနုၤအဃိ စီၤစတ့းဖၣ် တဲဝဲ စီၤယိၤသးအဂ့ၢ်လဲၣ်.
၁၁ အံၣ်စရ့လး အမိၢ်ပၢ်ဖံဖုလၢပျၢၤတဖၣ်အစိၤ. (မၤတၢ် ၇:၁-၁၆) ပှၤယူဒၤဖိတဖၣ် ပာ်ဒိၣ်ဝဲ စီၤအၤဘြၤဟၣ်အဃိ စီၤစတ့းဖၣ် စးထီၣ်တဲဝဲ စီၤအၤဘြၤဟၣ်အဂ့ၢ်. အဝဲတဲဝဲလၢ “ကစၢ်ယွၤလၢ အပှဲၤဒီး တၢ်လၤကပီၤတဂၤ” န့ၣ်အလီၣ်ဖျါထီၣ်အသးလၢ စီၤအၤဘြၤဟၣ် လၢအအိၣ်လၢ မ့းစပတၤမံ. (မၤတၢ် ၇:၂) အဃိ ပထံၣ်ဘၣ်လၢ စီၤစတ့းဖၣ်န့ၣ် အစးထီၣ်တဲဝဲ တၢ်ဂ့ၢ်လၢ ပှၤယူဒၤဖိတဖၣ် တူၢ်လိာ်ဝဲ. စီၤအၤဘြၤဟၣ် ဘၣ်လဲၤအိၣ်လၢ ကီၢ်တၢ်စံးပာ် ဒ်ပှၤထံဂၤကီၢ်ဂၤဖိအသိး ဒီးဖဲအစိၤန့ၣ် တၢ်လုၢ်ဟံၣ် ဒီးစီၤမိၤၡ့အတၢ်သိၣ်တၢ်သီ တအိၣ်ဘၣ်. အဃိ ပကတဲလၢ ပှၤကတီဒီး ကစၢ်ယွၤအဂီၢ် ပှၤလိၣ်ဘၣ် တၢ်လုၢ်ဟံၣ် ဒီးစီၤမိၤၡ့အတၢ်သိၣ်တၢ်သီန့ၣ် ပတဲတသ့ဘၣ်.
၁၂ ပှၤလၢအဒိကနၣ် စီၤစတ့းဖၣ် တဲတၢ်တဖၣ်န့ၣ် အပာ်ကဲဝဲ စီၤအၤဘြၤဟၣ်အစၢၤအသွဲၣ် စီၤယိၤသးစ့ၢ်ကီး. အဃိ စီၤစတ့းဖၣ် တဲဘၣ်အဝဲသ့ၣ်လၢ စီၤယိၤသးအဂ့ၢ်. အဝဲတဲဝဲလၢ စီၤယိၤသးန့ၣ် အကဲ ပှၤတီပှၤလိၤ. ဘၣ်ဆၣ် စီၤယိၤသး အဒီပုၢ်ဝဲၢ်ခွါလၢ ပှၤအံၣ်စရ့လးဖိအဒူၣ် ဟဲလီၤစၢၤလၢ အအိၣ်တဖၣ်န့ၣ် မၤနၢၤအီၣ် စီၤယိၤသး ဒီးဆါလီၤကွံာ် စီၤယိၤသး ဒ်သိးဒီးကုၢ်. ဘၣ်ဆၣ် ဖဲတၢ်သၣ်ဝံၤလီၤဒိ အိၣ်ထီၣ်အခါ ကစၢ်ယွၤသူဝဲ စီၤယိၤသး ဒ်သိးကမၤစၢၤဝဲ ပှၤအံၣ်စရ့လးဖိ. စီၤယိၤသး ဒီးယ့ၣ်ၡူး အတၢ်အိၣ်သးအိၣ်ဒ်လဲၣ်န့ၣ် စီၤစတ့းဖၣ် သ့ၣ်ညါဝဲ ဘၣ်ဆၣ် အဝဲတထိၣ်သတြီၤဝဲ ပှၤခံဂၤအံၤ အတၢ်အိၣ်သးဘၣ်. အဝဲမ့ၢ်ထိၣ်သတြီၤဝဲန့ၣ် ပှၤဒိကနၣ်တၢ်ဖိတဖၣ် ဆဲးဒိကနၣ်အီၤ တမုာ်လၢၤဘၣ်.
၁၃. ဖဲပှၤထီဒါတၢ်တဖၣ် ပာ်ဒ့ၣ်ပာ်ကမၣ် စီၤစတ့းဖၣ် ဘၣ်ဃးဒီး စီၤမိၤၡ့အဂ့ၢ်အခါန့ၣ် စီၤစတ့းဖၣ် ပာ်ဖျါထီၣ်လၢ အဝဲသ့ၣ်ကမၣ်ဒ်လဲၣ် ဒီးစီၤစတ့းဖၣ် ပာ်ဖျါထီၣ်ဝဲ တၢ်ဂ့ၢ်မနုၤ တဆီဘၣ်တဆီလဲၣ်.
၁၃ စီၤမိၤၡ့အစိၤ. (မၤတၢ် ၇:၁၇-၄၃) စီၤစတ့းဖၣ် တဲဝဲစီၤမိၤၡ့အဂ့ၢ်အါမး. ဒီးအဝဲတဲဝဲ ဒ်န့ၣ်န့ၣ် မ့ၢ်တၢ်လၢ အဂ့ၤဒိၣ်မး, မ့ၢ်လၢ ပှၤလၢအပၣ်ဃုာ်လၢ ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ်အကျါန့ၣ် အါတက့ၢ် အဝဲသ့ၣ်ကဲဝဲ ပှၤစးဒူၤကဲဖိ. ဒီးတၢ်လၢ ပှၤစးဒူၤကဲဖိတဖၣ်န့ၣ် အဝဲသ့ၣ် တူၢ်လိာ်ထဲ စီၤမိၤၡ့တၢ်သိၣ်တၢ်သီ ဒီးအဝဲသ့ၣ် တတူၢ်လိာ် တၢ်ကွဲးအသးအဂၤတဖၣ်လၢ လံာ်စီဆှံပူၤဘၣ်. စီၤစတ့းဖၣ်န့ၣ် ပှၤပာ်ဒ့ၣ်ပာ်ကမၣ်အီၤလၢ အတပာ်ကဲ စီၤမိၤၡ့ဘၣ်. ဘၣ်ဆၣ် တၢ်လၢအတဲဆၢက့ၤပှၤတဖၣ်န့ၣ် အပာ်ဖျါထီၣ်ဝဲလၢ အဝဲကဲပှၤလၢ အပာ်ကဲစီၤမိၤၡ့ ဒီးစီၤမိၤၡ့အတၢ်သိၣ်တၢ်သီ. အဃိ အပာ်ဖျါထီၣ်လၢ ပှၤလၢအပာ်ဒ့ၣ်ပာ်ကမၣ်အီၤန့ၣ် အဝဲသ့ၣ် တဲတၢ်ကမၣ်. (မၤတၢ် ၇:၃၈) ဒီးစီၤစတ့းဖၣ် သ့ၣ်ညါဝဲလၢ စီၤမိၤၡ့စ့ၢ်ကီး ဖဲအအိၣ်အနံၣ် ၄၀ အခါ အဝဲကျဲးစၢးမၤစၢၤ အဒီပုၢ်ဝဲၢ် ပှၤအံၣ်စရ့းလးဖိတဖၣ် ဘၣ်ဆၣ် ပှၤအံၣ်စရ့လးဖိတဖၣ် တတူၢ်လိာ်စီၤမိၤၡ့ဘၣ်. ဒီးလၢခံအနံၣ် ၄၀ ဘျဲၣ်ဝံၤအလီၢ်ခံ ဖဲစီၤမိၤၡ့ တီခိၣ်ရိၤမဲအဝဲသ့ၣ်အခါ အဝဲသ့ၣ် ထီဒါစီၤမိၤၡ့ တဘျုးဘျီဒံး.b အဃိ ပထံၣ်ဘၣ်လၢ တဆီဘၣ်တဆီန့ၣ် စီၤစတ့းဖၣ် တဲဖျါထီၣ် တၢ်လၢကစၢ်ယွၤအပှၤဂီၢ်မုၢ်တဖၣ် မၤတ့ၢ်ဝဲ. ကစၢ်ယွၤအပှၤဂီၢ်မုၢ်တဖၣ် တတူၢ်လိာ်ဝဲ ပှၤလၢကစၢ်ယွၤ ဃုထၢထီၣ်ဝဲလၢ ကတီခိၣ်ရိၤမဲအဝဲသ့ၣ်န့ၣ် အိၣ်တဘျုးဘျီညါ.
၁၄. စီၤစတ့းဖၣ် သူဝဲတၢ်အဒိ ဘၣ်ဃးဒီး စီၤမိၤၡ့အဂ့ၢ်ဒ်သိးကပာ်ဖျါထီၣ် တၢ်ဂ့ၢ်အရ့ဒိၣ်မနုၤလဲၣ်.
၁၄ စီၤစတ့းဖၣ် တဲဘၣ်ဝဲ ပှၤဒိကနၣ်တၢ်ဖိတဖၣ်လၢ စီၤမိၤၡ့တဲဆိပာ်စၢၤဝဲလၢ လၢအံၣ်စရ့လးအပူၤန့ၣ် ကစၢ်ယွၤကဒုးအိၣ်ထီၣ် ဝံတဂၤလၢ အလီၤဂာ်ဒီးစီၤမိၤၡ့. ဝံတဂၤန့ၣ် ကကဲဝဲမတဂၤလဲၣ် ဒီးဝံတဂၤအံၤ ပှၤကရ့အီၤဒ်လဲၣ်န့ၣ် စီၤစတ့းဖၣ် တတဲဖျါထီၣ်ဝဲ တဘျီဃီဘၣ်. အဝဲဆဲးတဲဝဲ တၢ်ဂ့ၢ်လၢအရ့ဒိၣ်တခါ. အဝဲတဲဝဲလၢ ဖဲကစၢ်ယွၤ တဲတၢ်ဒီးစီၤမိၤၡ့ လၢသ့ၣ်သပှီာ်တၤဆှုၣ် အိၣ်ဝဲအလီၢ်အခါ တၢ်လီၢ်တတီၤန့ၣ် စီဆှံဝဲ. အဃိ စီၤမိၤၡ့သ့ၣ်ညါဘၣ်ဝဲလၢ ကစၢ်ယွၤ ပာ်စီဆှံဝဲ တၢ်လီၢ်တတီၤဂ့ၤတတီၤဂ့ၤ ဒ်န့ၣ်အသိးသ့ဝဲ. မ့မ့ၢ်ဒ်န့ၣ်န့ၣ် မ့ၢ်ယဟိဝၤယွၤအဲၣ်ဒိးလၢ ပှၤကဘူၣ်ထီၣ်ဘါထီၣ်အီၤ ထဲလၢ တၢ်လုၢ်ဟံၣ်လၢ ဝ့ၢ်ယရူၤၡလ့ၣ်အပူၤလီၤဧါ. ပကကွၢ်သကိး အတၢ်စံးဆၢ.
၁၅, ၁၆. (က) ဘၣ်မနုၤအဃိ စီၤစတ့းဖၣ် တဲဝဲ ဒဲစီဆှံအဂ့ၢ်လဲၣ်. (ခ) ဘၣ်ဃးဒီး စီၤၡလိၤမိၤ အတၢ်လုၢ်ဟံၣ်န့ၣ် စီၤစတ့းဖၣ်တဲဝဲဒ်လဲၣ်.
၁၅ ဒဲစီဆှံ ဒီးတၢ်လုၢ်ဟံၣ်. (မၤတၢ် ၇:၄၄-၅၀) လၢကွီၢ်ဘျီၣ်ပူၤန့ၣ် စီၤစတ့းဖၣ် တဲဝဲလၢ တချုးလၢ တၢ်လုၢ်ဟံၣ်အိၣ်ထီၣ်လၢ ဝ့ၢ်ယရူၤၡလ့ၣ်ဒံးဘၣ်န့ၣ် ကစၢ်ယွၤမၢ စီၤမိၤၡ့တ့ထီၣ် ဒဲစီဆှံတဖျၢၣ်လၢ ပှၤဘ့ၣ်လီၤထီထီၣ်အီၤညီ လၢတၢ်ဘူၣ်ထီၣ်ဘါထီၣ်အဂီၢ်. စီၤမိၤၡ့စ့ၢ်ကီး ဘူၣ်ထီၣ်ဘါထီၣ် ယဟိဝၤယွၤလၢ ဒဲစီဆှံအပူၤအဃိ ပှၤဒိကနၣ်တၢ်တဖၣ် ကတဲဝဲလၢ ဒဲစီဆှံန့ၣ် အပတီၢ်ဖုၣ်န့ၢ်ဒံး တၢ်လုၢ်ဟံၣ်န့ၣ် တဲဝဲတသ့နီတဂၤဘၣ်.
၁၆ ဖဲစီၤၡလိၤမိၤ တ့ထီၣ်တၢ်လုၢ်ဟံၣ်လၢ ဝ့ၢ်ယရူၤၡလ့ၣ်ပူၤဝံၤအခါ လၢအတၢ်ထုကဖၣ်အပူၤန့ၣ် အဝဲတဲဝဲ တၢ်ဂ့ၢ်လၢအရ့ဒိၣ်တခါ. အဃိ စီၤစတ့းဖၣ် တဲက့ၤဝဲလၢ “ကစၢ်ယွၤလၢ အထီကတၢၢ်တဂၤန့ၣ် တအိၣ်ဝဲဆိးဝဲလၢ ဟံၣ်တဖၣ်လၢ ပှၤတ့အီၤလၢပှၤစုဘၣ်.” (မၤတၢ် ၇:၄၈; ၂ ကွဲး ၆:၁၈) ယဟိဝၤယွၤ သူဝဲတၢ်လုၢ်ဟံၣ် ဒ်သိး ကမၤလၢပှဲၤထီၣ် အတၢ်တိာ်ပာ်အဂီၢ်, ဘၣ်ဆၣ် ဒ်သိး အကမၤလၢပှဲၤ အတၢ်တိာ်ပာ်အဂီၢ် တၢ်လုၢ်ဟံၣ် မ့ၢ်တအိၣ်နာ်က့ အမၤဝဲသ့. အဃိ ပှၤလၢအဘူၣ်ထီၣ်ဘါထီၣ် ယဟိဝၤယွၤန့ၣ် တကြၢးဆိမိၣ်ဝဲလၢ အဝဲသ့ၣ် ဘူၣ်ထီၣ်ဘါထီၣ် ယဟိဝၤယွၤ သ့ထဲလၢ တၢ်လုၢ်ဟံၣ်ပူၤဘၣ်. စီၤစတ့းဖၣ် ကျၢၢ်တံၢ်ဝဲ အတၢ်ကတိၤလၢ လံာ်စီဆှံအဆၢ လၢလံာ်ယၡါယၤအပူၤ. ဖဲန့ၣ် အဝဲတဲဝဲ ယဟိဝၤယွၤအတၢ်ကတိၤ လၢအမ့ၢ် “မူခိၣ် မ့ၢ်ယလီၢ်ပစိာ် ဒီးဟီၣ်ခိၣ် မ့ၢ်ယခီၣ်ယီၢ်လီၤ အလီၢ်လီၤ. ဒီးယဟိဝၤယွၤ တဲဝဲလၢ သုကတ့ထီၣ်န့ၢ်ယၤဟံၣ် ဒ်လဲၣ်တကလုာ်လဲၣ်. ဒီးယတၢ်အိၣ်တၢ်ဆိးအလီၢ် ကအိၣ်လၢ တၢ်လီၢ်ဖဲလဲၣ်. ယတ့လီၤ တၢ်သ့ၣ်တဖၣ်အံၤခဲလၢာ် လၢယစု တမ့ၢ်ဧီၤ.” စီၤစတ့းဖၣ် တဲဝဲဒ်အံၤန့ၣ် အဂ့ၤဒိၣ်မး.—မၤတၢ် ၇:၄၉, ၅၀; ၡါ ၆၆:၁, ၂.
၁၇. (က) စီၤစတ့းဖၣ် ပာ်ဖျါထီၣ်ဝဲလၢ ပှၤဒိကနၣ်အီၤတဖၣ် တအိၣ်ဒီး တၢ်သူၣ်ဘျၢသးဘျၢဘၣ် ဒ်လဲၣ်. (ခ) စီၤစတ့းဖၣ် အတၢ်ကမၣ်တအိၣ်ဘၣ်န့ၣ် အပာ်ဖျါထီၣ်ဝဲဒ်လဲၣ်.
၁၇ ပမ့ၢ်ဆိမိၣ်ကွၢ် စီၤစတ့းဖၣ် အတၢ်ကတိၤတဖၣ်ထံထံန့ၣ် ပကသ့ၣ်ညါဘၣ်လၢ အဝဲအဲၣ်ဒိးပာ်ဖျါထီၣ်ဝဲလၢ ပှၤလၢအထီဒါအီၤတဖၣ် တအိၣ်ဒီး တၢ်သူၣ်ဘျၢသးဘျၢဘၣ်. အဝဲပာ်ဖျါထီၣ်ဝဲလၢ ယဟိဝၤယွၤန့ၣ် တဖီၣ်ဃံးတၢ်သိၣ်တၢ်သီဘၣ်, အဝဲမၤတၢ်ဆီတလဲ ဒ်တၢ်အိၣ်သးအိၣ်ဝဲအသိး ဒီးအမၤလၢပှဲၤ အတၢ်တိာ်ပာ်လၢ ကျဲအါဘိသ့. ပှၤဟီၣ်ခိၣ်ဖိ အလုၢ်လၢ်မ့ၢ်ဂ့ၤ တၢ်တမံၤဂ့ၤတမံၤဂ့ၤမ့ၢ်ဂ့ၤ တြီယဟိဝၤယွၤ တန့ၢ်ဘၣ်. မ့မ့ၢ် ပှၤလၢအဒိကနၣ် တၢ်လၢစီၤစတ့းဖၣ် တဲဝဲတဖၣ်န့ၣ် အဝဲသ့ၣ် ပာ်ဒိၣ်ဝဲ တၢ်လုၢ်ဟံၣ်လၢ ဝ့ၢ်ယရူၤၡလ့ၣ်အပူၤ ဒီးပာ်ဒိၣ်ဝဲ တၢ်ဆဲးတၢ်လၤ ဒီးလုၢ်လၢ်လၢ အဝဲသ့ၣ်မၤအါထီၣ်ဝဲလၢ စီၤမိၤၡ့အတၢ်သိၣ်တၢ်သီအပူၤ. ဘၣ်ဆၣ် ဘၣ်မနုၤအဃိ ကစၢ်ယွၤဟ့ၣ်လီၤ စီၤမိၤၡ့အတၢ်သိၣ်တၢ်သီလဲၣ် ဒီးဘၣ်မနုၤအဃိ အဒုးတ့ထီၣ်ပှၤ တၢ်လုၢ်ဟံၣ်လဲၣ်န့ၣ် အဝဲသ့ၣ် တနၢ်ပၢၢ်ဝဲဘၣ်. အဃိ စီၤစတ့းဖၣ် အတၢ်ကတိၤန့ၣ် ဒုးဆိကမိၣ်ပှၤလၢ တၢ်ဒိကနၣ် ယဟိဝၤယွၤအကလုၢ်န့ၣ် အဂ့ၤဒိၣ်န့ၢ်ဒံး တၢ်ပာ်ဒိၣ်ပာ်ကဲ တၢ်လုၢ်ဟံၣ် ဒီးစီၤမိၤၡ့အတၢ်သိၣ်တၢ်သီဒံး. စီၤစတ့းဖၣ်န့ၣ် အဒိကနၣ် ယဟိဝၤယွၤ အကလုၢ်လၢ အဂ့ၤကတၢၢ်အဃိ တၢ်လၢအတဲဝဲတဖၣ်န့ၣ် အပာ်ဖျါထီၣ်ဝဲလၢ အတၢ်ကမၣ်တအိၣ်ဘၣ်.
၁၈. ပကွၢ်လိ စီၤစတ့းဖၣ် ကသ့ဒ်လဲၣ်.
၁၈ ပန့ၢ်ဘၣ်တၢ်မၤလိလၢ စီၤစတ့းဖၣ် အအိၣ်ဒ်လဲၣ်. စီၤစတ့းဖၣ်န့ၣ် အသ့ၣ်ညါဝဲ လံာ်စီဆှံအဆၢတဖၣ်ဂ့ၤဂ့ၤ. ပဝဲစ့ၢ်ကီး ပမ့ၢ်အဲၣ်ဒိးကဲထီၣ် ပှၤလၢအသူ “ကစၢ်ယွၤ ကလုၢ်ကထါ တၢ်မ့ၢ်တၢ်တီ တီတီလိၤလိၤ” န့ၣ်ပကဘၣ်ဃုသ့ၣ်ညါ လံာ်စီဆှံ မူာ်မူာ်နီၢ်နီၢ်. (၂ တံၤ ၂:၁၅) တကးဒံးဘၣ် ပန့ၢ်ဘၣ် တၢ်မၤလိလၢ ဖဲပစံၣ်တဲၤတဲလီၤပှၤဂၤအခါ ပကဘၣ်တဲတၢ်လၢ တၢ်အဲၣ်တၢ်ကွံအပူၤ ဒီးပတဘၣ်တဲဆါ အဝဲသ့ၣ်ဘၣ်. ပှၤလၢ စီၤစတ့းဖၣ် တဲတၢ်ဒီးအီၤတဖၣ်န့ၣ် အဝဲသ့ၣ်ထီဒါ စီၤစတ့းဖၣ်ဒိၣ်မး. အဃိ ဒ်သိး စီၤစတ့းဖၣ် ဆဲးတဲတၢ်ကသ့အဂီၢ် တသ့ဖဲအသ့ အဝဲကျဲးစၢး တဲဝဲတၢ်ဂ့ၢ်တဖၣ်လၢ အဝဲသ့ၣ်တူၢ်လိာ်ဝဲ. တကးဒံးဘၣ် အဝဲကိးပှၤသူၣ်က့သးပှၢ်တဖၣ်လၢ “ပၢ်သ့ၣ်ဧၢ.” အဃိ အပာ်ဖျါထီၣ်ဝဲလၢ အပာ်ကဲအဝဲသ့ၣ်. (မၤတၢ် ၇:၂) ပဝဲနာ်က့ ပကဘၣ်တဲဖျါထီၣ် ကစၢ်ယွၤကလုၢ်ကထါလၢ “တၢ်သးစူၤ ဒီးတၢ်ပာ်ကဲဒိၣ်မး.”—၁ ပ့း ၃:၁၅.
၁၉. လၢပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ် အပူၤန့ၣ် စီၤစတ့းဖၣ် တဲဖျါထီၣ်ဝဲ ယဟိဝၤယွၤ အတၢ်စံၣ်ညီၣ်ကစီၣ် လၢတၢ်သးဒူအပူၤဒ်လဲၣ်.
၁၉ ပှၤလၢအထီဒါတၢ်တဖၣ် မ့ၢ်တြီပှၤသနာ်က့ ပတပျံၤတၢ်ဘၣ် ဒီးပကဆဲးစံၣ်တဲၤတဲလီၤ ကစၢ်ယွၤ အကလုၢ်ကထါ တၢ်မ့ၢ်တၢ်တီ. တကးဒံးဘၣ် ပတဆီတလဲ ယဟိဝၤယွၤ အတၢ်စံၣ်ညီၣ်ကစီၣ် ဒ်သိး ပှၤဂၤကဘၣ်သူၣ်ဘၣ်သး တၢ်လၢပတဲအဂီၢ်ဘၣ်. စီၤစတ့းဖၣ် ပာ်လီၤန့ၢ်ပှၤ တၢ်အဒိလၢအဂ့ၤ. စီၤစတ့းဖၣ် ထံၣ်ဝဲလၢ အတဲဖျါထီၣ် တၢ်အုၣ်သးလီၤတံၢ်လီၤဆဲး ဘၣ်ဆၣ် စံၣ်ညီၣ်ကွီၢ်လၢ အခိၣ်ကိၤတဖၣ်အံၤ တဆီတလဲ အတၢ်ပာ်သူၣ်ပာ်သးဘၣ်. ဒီးခီဖျိသးစီဆှံ ထိၣ်ဟူးထိၣ်ဂဲၤထီၣ်အီၤအဃိ လၢတၢ်သးဒူအပူၤ လၢခံကတၢၢ်န့ၣ် အတဲဝဲလၢ အဝဲသ့ၣ်န့ၣ် လီၤဂာ်ဒီး အမိၢ်ပၢ်ဖံဖုလၢပျၢၤလၢ အတတူၢ်လိာ်ဝဲ စီၤယိၤသး, စီၤမိၤၡ့ ဒီးဝံတဖၣ်ဘၣ်. (မၤတၢ် ၇:၅၁-၅၃) စံၣ်ညီၣ်ကွီၢ်တဖၣ်အံၤ မၤသံဝဲ မ့းၡံအၤ လၢစီၤမိၤၡ့ ဒီးဝံတဖၣ် တဲဆိပာ်စၢၤဝဲလၢ အကဟဲတဂၤန့ၣ်အဂ့ၢ်. အဃိ အဝဲသ့ၣ် တဒိကနၣ်ဝဲ စီၤမိၤၡ့ အတၢ်သိၣ်တၢ်သီနီတစဲးဘၣ်.
“ကစၢ်ယ့ၣ်ၡူးဧၢ, ယအးလီၤယသးလၢ နစုပူၤလီၤ” (မၤတၢ် ၇:၅၄–၈:၃)
“ဖဲအဝဲသ့ၣ် နၢ်ဟူ တၢ်ကတိၤတဖၣ်အံၤအခါ အဝဲသ့ၣ် သးဒိၣ်ထီၣ်တၢ် ဒီးကွၢ်အီၤ ဒီးအ့ၣ်တဃံးအမဲလီၤ.”—မၤတၢ် ၇:၅၄
၂၀, ၂၁. ဖဲစီၤစတ့းဖၣ် တဲတၢ်ဝံၤအခါ ပှၤလၢအအိၣ်လၢ ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ်အပူၤတဖၣ်န့ၣ် မၤဝဲဒ်လဲၣ်. ဒီးယဟိဝၤယွၤ ဟ့ၣ်ဂံၢ်ဟ့ၣ်ဘါ စီၤစတ့းဖၣ်ဒ်လဲၣ်.
၂၀ စီၤစတ့းဖၣ် တဲတၢ်န့ၣ်အဘၣ် ဒီးစံၣ်ညီၣ်ကွီၢ်တဖၣ် ဂ့ၢ်လိာ်အီၤတသ့ဘၣ်. အဃိ အဝဲသ့ၣ် သးထီၣ်တၢ်ဒိၣ်မး, ပၢၤအသးတန့ၢ်လၢၤဘၣ် ဒီးအ့ၣ်တဃံးအမဲ. အဃိ စီၤစတ့းဖၣ် ကဆိမိၣ်ဘၣ်ဝဲလၢ ပှၤကစံၣ်ညီၣ်အီၤ ဒ်ပှၤစံၣ်ညီၣ် အကစၢ်ယ့ၣ်ၡူးအသိး.
၂၁ ဒ်သိးစီၤစတ့းဖၣ် လဲၤခီဖျိဝဲ တၢ်လၢကကဲထီၣ်အသးဒီးအီၤ ကန့ၢ်အဂီၢ် အဝဲကလိၣ်ဘၣ် တၢ်သးဒူ. ဘၣ်ဆၣ် ဖဲန့ၣ်အခါ အထံၣ် တၢ်ထံၣ်လၢညါခီလၢ အဟဲလၢ ယဟိဝၤယွၤအအိၣ် အဃိ အဂံၢ်ဘါကထီၣ်ဒိၣ်မး. စီၤစတ့းဖၣ် ထံၣ်ဘၣ်ဝဲ ကစၢ်ယွၤအလၤကပီၤ ဒီးယ့ၣ်ၡူးဆၢထၢၣ်လၢ ကစၢ်ယွၤ အစုထွဲတကပၤ. ဒီးဖဲအဝဲတဲဖျါထီၣ် အတၢ်ထံၣ်လၢညါခီအံၤအခါ စံၣ်ညီၣ်ကွီၢ်တဖၣ် မၤဘၢဃာ်အနၢ်လၢအစု. ဘၣ်မနုၤအဃိ အဝဲသ့ၣ်မၤဝဲဒ်န့ၣ်လဲၣ်. မ့ၢ်လၢ အပူၤကွံာ် ဖဲကွီၢ်ဘျီၣ်တဖျၢၣ်အံၤအပူၤန့ၣ် အဝဲသ့ၣ် နၢ်ဟူဘၣ်ဝဲလၢ ယ့ၣ်ၡူးတဲလီၤအသးလၢ အကဲမ့းၡံအၤ ဒီးတယံာ်လၢၤဘၣ်န့ၣ် အကအိၣ်လၢအပၢ်အစုထွဲတခီအဃိ. (မၢ်ကူး ၁၄:၆၂) စီၤစတ့းဖၣ် အတၢ်ထံၣ်လၢညါခီန့ၣ် ပာ်ဖျါထီၣ်ဝဲလၢ ယ့ၣ်ၡူးတဲတၢ်န့ၣ်အဘၣ် ဒီးပာ်ဖျါထီၣ်ဝဲလၢ ပှၤလၢကွီၢ်ဘျီၣ်ပူၤတဖၣ်န့ၣ် အဝဲသ့ၣ်တအိၣ်ဒီး တၢ်သးတီဘၣ် ဒီးမၤသံဝဲ မ့းၡံအၤ. အဃိ ဖဲအဝဲသ့ၣ်နၢ်ဟူဝဲ စီၤစတ့းဖၣ် တဲဝဲဒ်န့ၣ်အခါ အဝဲသ့ၣ် လဲၤဃ့ၢ်သဖှိလၢ စီၤစတ့းဖၣ်အအိၣ် ဒီးကွံာ်သံအီၤလၢလၢၢ်လီၤ.c
၂၂, ၂၃. စီၤစတ့းဖၣ် သံဝဲဒ် အကစၢ်ယ့ၣ်ၡူးအသိး လၢကျဲဒ်လဲၣ် ဒီးဒ်စီၤစတ့းဖၣ်အသိး ခရံာ်ဖိလၢ ပစိၤခဲအံၤတဖၣ် နာ်န့ၢ်ဝဲ တၢ်မနုၤသ့လဲၣ်.
၂၂ စီၤစတ့းဖၣ် ဘၣ်သံဝဲဒ် အကစၢ်ယ့ၣ်ၡူးသံဝဲအသိး. ဘၣ်ဆၣ် ဖဲအတချုးသံအခါန့ၣ် အဝဲပာ်အသး မုာ်မုာ်ခုၣ်ခုၣ်, အနာ်န့ၢ်ယဟိဝၤယွၤ လၢလၢပှဲၤပှဲၤ ဒီးအပျၢ်ကွံာ်ပှၤလၢ မၤသံအီၤတဖၣ် အတၢ်ကမၣ်. အဝဲကသ့ၣ်ညါပာ်စၢၤဝဲ ယ့ၣ်ၡူးအတၢ်ကတိၤလၢ အကဲထီၣ်တၢ်ဂံၢ်တၢ်ဘါ လၢအတဲဝဲ “ယမ့ၢ် တၢ်ဂဲၤဆၢထၢၣ် ဒီးတၢ်မူ.” (ယိၤဟၣ် ၁၁:၂၅) အဃိ အဝဲတဲဝဲလၢ “ကစၢ်ယ့ၣ်ၡူးဧၢ, ယအးလီၤယသးလၢ နစုပူၤ.” လၢခံကတၢၢ်န့ၣ် စီၤစတ့းဖၣ် ဃ့ထုကဖၣ်လၢ ကစၢ်ယွၤအအိၣ်လၢ အကလုၢ်ဖးဒိၣ်လၢ “ယဟိဝၤယွၤဧၢ, တဘၣ်စံၣ်ညီၣ် အဝဲသ့ၣ်လၢ တၢ်ဒဲးဘးအံၤ အဃိတဂ့ၤ.” ဖဲအတဲဝဲ ဒ်န့ၣ်ဝံၤအခါ အသံဝဲ.—မၤတၢ် ၇:၅၉, ၆၀.
၂၃ စီၤစတ့းဖၣ်န့ၣ် အကဲဝဲ ခရံာ်ဖိအဆိကတၢၢ်တဂၤလၢ အဘၣ်သံဝဲဒ် ပှၤဒူပှၤဃိၤတဂၤအသိး. (ကွၢ်တၢ်လွံၢ်နၢၣ်လၢအမ့ၢ် “‘ပှၤဒူပှၤဃိၤ’ န့ၣ်အဲၣ်ဒိးတဲဝဲ မနုၤလဲၣ်.”) လၢခံန့ၣ် ပှၤလၢအဘၣ်သံဒ် စီၤစတ့းဖၣ်အသိးန့ၣ် အိၣ်ဝဲအါမးဒံးအဃိ လီၤသးအုးဒိၣ်မး. တုၤလၢပစိၤခဲအံၤန့ၣ် ပှၤလၢအသးဆူၣ်လၢ တၢ်ဘူၣ်တၢ်ဘါ, ထံဂ့ၢ်ကီၢ်ဂ့ၢ် ဒီးပှၤအၢပှၤသီလၢ အထီဒါတၢ်တဖၣ်န့ၣ် အဝဲသ့ၣ် မၤသံဝဲ ယဟိဝၤယွၤ အခ့အပှၤလၢ အအိၣ်ဒီးတၢ်သးတီတဖၣ်. ဘၣ်ဆၣ် ဒ်စီၤစတ့းဖၣ်အသိး ပနာ်န့ၢ် ယဟိဝၤယွၤသ့ဝဲ သပှၢ်တၢၢ်. မ့ၢ်လၢ ယ့ၣ်ၡူးကဲစီၤပၤလံ ဒီးယဟိဝၤယွၤ ဟ့ၣ်အီၤ တၢ်စိတၢ်ကမီၤ ဖးဒိၣ် အဃိ ပနာ်သ့သပှၢ်တၢၢ်လၢ အဝဲ မၤဂဲၤဆၢထၢၣ်သမူထီၣ်က့ၤ အပျဲၢ်အဘီၣ်လၢ အအိၣ်ဒီး တၢ်သးတီတဖၣ်သ့ ဒီးပှၤတြီအီၤ တသ့နီတဂၤဘၣ်.—ယိၤ ၅:၂၈, ၂၉.
၂၄. ဖဲပှၤမၤသံ စီၤစတ့းဖၣ်အခါ စီၤပီလူးမၤမနုၤလဲၣ် ဒီးစီၤစတ့းဖၣ် သံဝဲလၢ တၢ်သးတီအပူၤအဃိ ကဲဘျုးလၢ ခရံာ်ဖိအဂၤတဖၣ်အဂီၢ်ဒ်လဲၣ်.
၂၄ ဖဲပှၤမၤသံ စီၤစတ့းဖၣ်အခါ စီၤစီလူးထံၣ်ဘၣ်ဝဲ. ဖဲန့ၣ်အဆၢကတီၢ် စီၤစီလူးန့ၣ် မ့ၢ်ပှၤသးစၢ်တဂၤ. အဝဲအိၣ်ဃူဝဲ ပှၤလၢအမၤသံ စီၤစတ့းဖၣ် ဒီးအဝဲအိၣ်ခိးန့ၢ်ဝဲ ပှၤလၢအကွံာ်သံ စီၤစတ့းဖၣ်လၢလၢၢ်တဖၣ် အဆ့ကၤ. ဖဲစီၤစတ့းဖၣ် သံဝံၤတယံာ်ဘၣ်န့ၣ် စီၤစီလူး စးထီၣ်မၤအၢမၤနးဝဲ ယ့ၣ်ၡူးအပျဲၢ်အဘီၣ်တဖၣ်. စီၤစတ့းဖၣ်န့ၣ် ပှၤမၤသံအီၤဘၣ်ဆၣ် အဒိအတဲာ်န့ၣ် ကဲဘျုးလၢ ခရံာ်ဖိအဂၤတဖၣ်အဂီၢ် ဒ်သိးဒီး အဝဲသ့ၣ်ကဆဲးတီဒီး ယဟိဝၤယွၤတုၤလၢအသံ. တကးဒံးဘၣ် စီၤစီလူးလၢ ပှၤကိးက့ၤအီၤလၢ စီၤပီလူးန့ၣ် ဖဲပှၤမၤသံ စီၤစတ့းဖၣ်အခါ အဝဲပၣ်ဃုာ်ဘၣ်လၢ ပှၤကျါအဃိ လၢခံအသးအုးဝဲ. (မၤတၢ် ၂၂:၂၀) ဖဲပှၤမၤသံစီၤစတ့းဖၣ်အခါ စီၤစီလူးမၤစၢၤဘၣ် ပှၤတဖၣ်န့ၣ်အဃိ လၢခံအဝဲတဲက့ၤဝဲလၢ “ယမ့ၢ်ပှၤလၢ အကတိၤထီဒါ ကစၢ်ယွၤ, ယမၤအၢမၤနး အပှၤဂီၢ်မုၢ် ဒီးယမ့ၢ်ပှၤလၢ အပာ်ထီၣ်ထီသး.” (၁ တံၤ ၁:၁၃) ဒီးဖဲစီၤပီလူးတဲတၢ် ဒီးကွဲးလံာ်အခါန့ၣ် အသူဝဲစီၤစတ့းဖၣ် အတၢ်ကတိၤလၢ အတဲဝဲဖဲတၢ်တနံၤန့ၣ် အဃိ ပသ့ၣ်ညါဘၣ်လၢ အတသးပ့ၤနီၣ် စီၤစတ့းဖၣ် ဒီးတၢ်လၢစီၤစတ့းဖၣ်တဲဝဲဘၣ်. (မၤတၢ် ၇:၄၈; ၁၇:၂၄; ဧ့ၤ ၉:၂၄) စီၤစတ့းဖၣ်န့ၣ် အကဲပှၤလၢ “ကစၢ်ယွၤ ဘၣ်သူၣ်ဘၣ်သးအီၤဒိၣ်မး ဒီးဟ့ၣ်အီၤ တၢ်စိတၢ်ကမီၤ” အဃိ လၢခံန့ၣ် စီၤပီလူး ကွၢ်လိ စီၤစတ့းဖၣ်အဒိအတဲာ်. အဃိ ပဝဲစ့ၢ်ကီး ပကွၢ်လိ စီၤစတ့းဖၣ် အဒိအတဲာ်သ့.
a ပှၤလၢအထီဒါတၢ်တနီၤန့ၣ် အကဲဝဲ “ပှၤသဘျ့ဖိအဘူၣ်ဘျီၣ်” အကရၢဖိ. ဘၣ်သ့ၣ်သ့ၣ် အဝဲသ့ၣ်န့ၣ် ကမ့ၢ်ဝဲ ပှၤလၢ ပှၤရိမ့ၤဖိ က့ၤဖီၣ်ဝဲ ဒီးလၢခံပျၢ်ထီၣ်က့ၤအီၤ. မ့တမ့ၢ် လၢညါန့ၣ် အဝဲသ့ၣ်ကဲကုၢ် ဒီးလၢခံအဝဲသ့ၣ် ကဲထီၣ်က့ၤပှၤသဘျ့ဖိ ဒီးဟဲနုာ်လီၤလၢ ပှၤယူဒၤဖိ အတၢ်ဘူၣ်တၢ်ဘါအပူၤ. အဝဲသ့ၣ်တနီၤန့ၣ် အိၣ်လၢ ကံၤလံၤကံ လၢပှၤတၢ်စူးဖိ စီၤစီလူး အိၣ်တၢ်လီၢ်. လၢပှၤကံၤလံၤကံဖိလၢ အတဲစီၤစတ့းဖၣ် တနၢၤဘၣ်အကျါန့ၣ် မ့ၢ်အပၣ်ဃုာ်ဒီး စီၤစီလူးဧါ တပၣ်ဘၣ်ဧါန့ၣ် လံာ်စီဆှံ တပာ်ဖျါထီၣ်ဝဲဘၣ်.
b စီၤစတ့းဖၣ် တဲဝဲတၢ်ဂ့ၢ်ဘၣ်ဃးဒီး စီၤမိၤၡ့မၤလိဘၣ်ဝဲ အဲၤကူပတူး အတၢ်ကူၣ်ဘၣ်ကူၣ်သ့ ဒီးဖဲအဟးထီၣ်လၢ အဲၤကူပတူးအပူၤအခါ အသးအိၣ်ပှဲၤနံၣ်လဲၣ် ဒီးအအိၣ်လၢ မံးဒယၣ်အပူၤယံာ်ဝဲထဲလဲၣ်. လၢလံာ်စီဆှံပူၤန့ၣ် ပတထံၣ်န့ၢ် တၢ်ဂ့ၢ်အံၤလၢ တၢ်လီၢ်အဂၤ နီတတီၤဘၣ်.
c ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ်န့ၣ် အအိၣ်လၢ ရိမ့ၤအပဒိၣ် အတၢ်သိၣ်တၢ်သီ အတၢ်ပၢအဖီလာ်အဃိ အဝဲသ့ၣ်တအိၣ်ဒီး တၢ်ခွဲးတၢ်ယာ်လၢ ကဟ့ၣ်လီၤတၢ်ကလုၢ်လၢ ကမၤသံပှၤဂၤဘၣ်. (ယိၤဟၣ် ၁၈:၃၁) အဃိ ဖျါလၢ စီၤစတ့းဖၣ်န့ၣ် ပှၤတစံၣ်ညီၣ်သံအီၤ ခီဖျိလၢ ပဒိၣ်တၢ်သိၣ်တၢ်သီအဃိဘၣ်, အိၣ်ဒၣ် ပှၤလၢအသးထီၣ်အီၤတဖၣ် သးဒိၣ်ထီၣ်အီၤ ဒီးမၤသံအီၤ.