ဝံတဂၤလၢ ဘၣ်တၢ်ဟီထီၣ်ကွံာ်အီၤလၢ အထံအကီၢ်န့ၣ် ဒိးန့ၢ်ဘၣ်ဝဲတၢ်ထံၣ်လၢညါခီ

စီၤဒၤနံးယ့လး မ့ၢ်ပှၤသးစၢ်တဂၤလၢအတီအလိၤ လၢအိၣ်ဆိးဝဲဖဲယူဒၤအဘီမုၢ်အပူၤလီၤ. ဒီးဘၣ်တၢ်က့ၤဖီၣ်အီၤဆူ ကီၢ်ဘၤဘူၤလိၣ်တချုးလၢ ဝ့ၢ်ယရူၤၡလ့ၣ် ဘၣ်တၢ်မၤဟးဂီၤအီၤအဆၢကတီၢ်န့ၣ်လီၤ. အဝဲဒီးပှၤယူဒၤဖိတနီၤ ဘၣ်တၢ်ဖီၣ်န့ၢ်အီၤသနာ်က့ ဒိးန့ၢ်ဘၣ်ဝဲတၢ်သဘျ့ ဖဲအကြၢးန့ၣ်လီၤ. ဖဲစီၤဒၤနံးယ့လးအိၣ်လၢ ဘၤဘူၤလိၣ်အတီၢ်ပူၤန့ၣ် ဒိးန့ၢ်ဘၣ်ဝဲကစၢ်ယွၤအတၢ်ဆိၣ်ဂ့ၤ လၢလၢပှဲၤပှဲၤလီၤ. အဒိဖဲပှၤတ့ၢ်လီၤအီၤဆူ ခ့ယုၢ်ကပိၤပူၤအဆၢကတီၢ် ယွၤမၤပူၤဖျဲးအီၤလၢတၢ်သံ ဒီးဒိးန့ၢ်ဘၣ်ဝဲတၢ်ထံၣ်လၢညါခီတဖၣ်စ့ၢ်ကီးန့ၣ်လီၤ. စီၤဒၤနံးယ့လး အတၢ်စံးပာ်လၢ အရ့ဒိၣ်ကတၢၢ်တဖၣ်န့ၣ်ဘၣ်ထွဲလိာ်သးဒီး မ့းၡံအၤဒီးအတၢ်ပၢအဂ့ၢ်န့ၣ်လီၤ.

စီၤဒၤနံးယ့လးဘၣ်တၢ်ဒုးသ့ၣ်ညါအီၤလၢ မ့းၡံအၤကဟဲဝဲအဆၢကတီၢ်. ဒ်သိးယွၤအပှၤဂီၢ်မုၢ်တဖၣ် ကသ့ၣ်ညါဝဲလၢ “ပှၤဒိးဖှူအသးတၢ်အခိၣ်တဂၤ” ကဟဲဖဲလဲၣ်အဆၢကတီၢ်လဲၣ်န့ၣ် စီၤဒၤနံးယ့လး ဘၣ်တၢ်ဒုးသ့ၣ်ညါဆိအီၤန့ၣ်လီၤ. ဒီးအဝဲပာ်ဖျါထီၣ်ဝဲလၢ စီၤပၤကဟ့ၣ်လီၤတၢ်မၤလိာ်လၢ ပှၤကဘှီထီၣ်က့ၤ ဝ့ၢ်ယရူၤၡလ့ၣ်အခိၣ်ဒူ မ့ၢ်ဝံၤအလီၢ်ခံန့ၣ် ကဘၣ်အိၣ်ခိးဒံးဝဲ “တၢ်နွံအဘျီ” ၆၉ ဘျီဒီး ပှၤဒိးဖှူအသးတဂၤအံၤ (မ့းၡံအၤ) ကဟဲတုၤဝဲလီၤ. ညီနုၢ်တနွံန့ၣ် အိၣ်ဒၣ်ထဲနွံသီလီၤ. ဘၣ်ဆၣ်ဒီး လၢလံာ်စီဆှံတတီၤအံၤအပူၤ ‘တၢ်တနွံ’ န့ၣ်အဲၣ်ဒိးစံးဝဲနွံနံၣ်လီၤ. စီၤဒၤနံးယ့လးသံဝဲယံာ်အနံၣ်အါမးဝံၤအလီၢ်ခံ ဖဲ ချ.ခ.န ၄၅၅ စီၤပၤဟ့ၣ်လီၤတၢ်မၤလိာ်လၢ ပှၤကဘှီထီၣ်က့ၤ ဝ့ၢ်ယရူၤၡလ့ၣ်အခိၣ်ဒူလီၤ. တၢ်န့ၣ်အလီၢ်ခံ တၢ်ဆၢကတီၢ်ကဘၣ်လဲၤပူၤကွံာ်ဝဲ ၆၉ “နွံ” လီၤ. တၢ်အံၤအဲၣ်ဒိးစံးဝဲ ၄၈၃ နံၣ်အဃိ ပမ့ၢ်စးထီၣ်ဂံၢ်အီၤလၢ ချ.ခ.န ၄၅၅ န့ၣ်ကကတၢၢ်ဝဲဖဲ ခ.န ၂၉ န့ၣ်လီၤ. ဖဲ ခ.န ၂၉ အတီၢ်ပူၤတၢ်မနုၤကဲထီၣ်အသးလဲၣ်န့ၣ် လံာ်တဘ့ၣ်အံၤကပာ်ဖျါဝဲလၢခံန့ၣ်လီၤ. စီၤဒၤနံးယ့လး ထံၣ်ဆိပာ်ဝဲလၢမ့းၡံအၤ ကပှ့ၤက့ၤပှၤလၢတၢ်ဒဲးဘးအဂီၢ်န့ၣ် ကဘၣ် “တၢ်ဒီၣ်တဲာ်ကွံာ်အီၤ” လီၤ.—ဒၤနံးယ့လး ၉:၂၄-၂၆.

မ့းၡံအၤကကဲထီၣ် စီၤပၤလၢမူခိၣ်လီၤ. စီၤဒၤနံးယ့လးအတၢ်ထံၣ်လၢညါခီအပူၤ အဝဲထံၣ်ဘၣ်ဝဲမ့းၡံအၤ “တၢ်မၤအသးဒ်ပှၤကညီဖိခွါတဂၤအသိးန့ၣ်” သုးဘူးအသးဆူယဟိဝၤယွၤ အလီၢ်ပစိာ်လၢမူခိၣ်န့ၣ်လီၤ. ဒီးယဟိဝၤယွၤဟ့ၣ်လီၤအီၤလၢ “တၢ်ပၢတၢ်အလီၢ်, ဒီးတၢ်လၤကပီၤ, ဒီးတၢ်အဘီအမုၢ်” လီၤ. ဘီမုၢ်အံၤ ကအိၣ်ဂၢၢ်ကျၢၤဝဲလီၤထူလီၤယိာ်လီၤ. စီၤဒၤနံးယ့လးသ့ၣ်ညါဘၣ်ဝဲ တၢ်ဂ့ၢ်လၢအလီၤသူၣ်ပိၢ်သးဝးအဂၤတမံၤ လၢဘၣ်ဃးဒီးကစၢ်ယွၤ အဘီအမုၢ်အဂ့ၢ်န့ၣ်လီၤ. အဝဲသ့ၣ်ညါဘၣ်ဝဲလၢစီၤပၤမ့းၡံအၤန့ၣ် ကပၢဃုာ်တၢ်ဒီးပှၤတကရူၢ်လၢ ဘၣ်တၢ်ကိးအီၤလၢ “တၢ်ထီကတၢၢ်တဂၤ အပှၤစီဆှံတဖၣ်” န့ၣ်လီၤ.—ဒၤနံးယ့လး ၇:၁၃, ၁၄, ၂၇.

ဘီမုၢ်အံၤကမၤဟးဂီၤကွံာ် ဟီၣ်ခိၣ်အတၢ်ပၢတၢ်ပြးတဖၣ်လီၤ. ကစၢ်ယွၤမၤစၢၤဝဲ စီၤဒၤနံးယ့လး ဒ်သိးတဲဖျါထီၣ်ဝဲဘၤဘူၤလိၣ်အစီၤပၤနဘူၤကးန့စၢ် အတၢ်မံမီၢ်အခီပညီကသ့အဂီၢ်န့ၣ်လီၤ. စီၤပၤမံမီၢ်ဝဲတၢ်ဂီၤဖးဒိၣ်တခါလၢ အခိၣ်မ့ၢ်ထူစီ, အသးနါပှၢ်ဒီး အစုမ့ၢ်စ့, အဟၢဖၢဒီးအကံၣ်ဒုၣ်မ့ၢ်တိၢ်, အခီၣ်ဒုၣ်မ့ၢ်ထး ဒီးအခီၣ်လၣ်မ့ၢ်ထးတနီၤ ကပံာ်တနီၤလီၤ. ဒီးလၢၢ်တဖျၢၣ်လၢ ဘၣ်တၢ်ကူးတဲာ်ကွံာ်အီၤလၢကစၢၢ်န့ၣ် လဲၤဘၣ်တိဘၣ်ထံးဝဲ တၢ်ဂီၤအခီၣ်လၣ်ဒီး မၤလီၤကလဲဝဲတၢ်ဂီၤဖးဒိၣ်တခါအံၤန့ၣ်လီၤ. ဘၣ်ဃးဒီးတၢ်ဂီၤအကူာ်တကူာ်ဘၣ်တကူာ်န့ၣ် စီၤဒၤနံးယ့လး ပာ်ဖျါထီၣ်ဝဲလၢ အမ့ၢ်ဝဲဒၣ် ဘီမုၢ်တဖၣ်လၢအဒိၣ်စိဝဲလၢ ဟီၣ်ခိၣ်ဒီဘ့ၣ်လီၤ. ဒီးဘီမုၢ်တဖၣ်အံၤစးထီၣ်ဝဲဖဲဘၤဘူၤလိၣ်လၢအမ့ၢ် တၢ်ဂီၤအခိၣ်သၣ်ဃံထူန့ၣ်လီၤ. စီၤဒၤနံးယ့လးထံၣ်ဆိပာ်စ့ၢ်ကီးဝဲ ဖဲဘီမုၢ်လၢအဒိၣ်စိဝဲလၢ ဟီၣ်ခိၣ်ဒီဘ့ၣ်အလီၢ်ခံကတၢၢ်တခါ ပၢတၢ်အဆၢကတီၢ်န့ၣ် ယွၤအဘီအမုၢ်ကစံၣ်ညီၣ်တၢ်န့ၣ်လီၤ. ဘီမုၢ်အံၤကမၤဟးဂီၤကွံာ် ဟီၣ်ခိၣ်အတၢ်ပၢတၢ်ပြးခဲလၢာ်န့ၣ်လီၤ. တၢ်န့ၣ်အလီၢ်ခံ ကပၢဝဲလီၤထူလီၤယိာ်လီၤ.—ဒၤနံးယ့လး အဆၢဒိၣ် ၂.

ဖဲစီၤဒၤနံးယ့လး အသးပှၢ်ထီၣ်ဖးဒိၣ် အဆၢကတီၢ်န့ၣ် ထံၣ်ဘၣ်ဝဲဘၤဘူၤလိၣ် အတၢ်လီၤပှီၢ်န့ၣ်လီၤ. ဒ်ဝံတဖၣ် တဲဆိပာ်ဝဲအသိး စီၤပၤကိရ့ၣ် မၤဟးဂီၤကွံာ်ဝဲဝ့ၢ်ဘၤဘူၤလိၣ်န့ၣ်လီၤ. တၢ်န့ၣ်ဝံၤအလီၢ်ခံတယံာ်ဘၣ်ဒီး ပှၤယူဒၤဖိတဖၣ်ထူၣ်ဖျဲးထီၣ်ကွံာ်ဝဲလီၤ. အဝဲသ့ၣ်ထူၣ်ဖျဲးထီၣ်ဝဲ ဖဲအထံအကီၢ်အိၣ်သယုၢ်ဝဲအနံၣ် ၇၀ ဝံၤအလီၢ်ခံ ဒ်တၢ်တဲဆိပာ်အိၣ်ဝဲအသိးန့ၣ်လီၤ. တၢ်ဆၢကတီၢ်လဲၤပူၤကွံာ်ဒီး ပှၤယူဒၤဖိတဖၣ် ဘှီထီၣ်က့ၤဝ့ၢ်ယရူၤၡလ့ၣ် ဒီးမၤဂ့ၤထီၣ်က့ၤ ယဟိဝၤယွၤ အတၢ်လုၢ်ဟံၣ် လၢပှၤပၢတၢ်လၢအတီတဖၣ်, ပှၤလုၢ်တၢ်အဒိၣ်တဖၣ် ဒီးဝံတဖၣ်အတၢ်နဲၣ်လိအဖီလာ်န့ၣ်လီၤ. ဘၣ်ဆၣ်အနံၣ် ၄၈၃ အလီၢ်ခံန့ၣ် တၢ်ကမၤအသးဒ်လဲၣ်.

​—ဘၣ်တၢ်ဒိးသန့ၤထီၣ်အီၤလၢ လံာ်ဒၤနံးယ့လးန့ၣ်လီၤ.