အဆၢဒိၣ် ၂၁
ယ့ၣ်ၡူးမူထီၣ်က့ၤလံ
ယ့ၣ်ၡူးလီၣ်ဖျါထီၣ်အသးလၢ အပျဲၢ်အဘီၣ်သ့ၣ်တဖၣ်အမဲာ်ညါလၢကသိၣ်လိနဲၣ်လိ ဒီးဟ့ၣ်ဂံၢ်ဟ့ၣ်ဘါ အဝဲသ့ၣ်အဂီၢ်လီၤ
ယ့ၣ်ၡူးသံဝံၤအလီၢ်ခံ သၢသီတသီန့ၣ် ပိာ်မုၣ်တနီၤလၢအမ့ၢ် ကစၢ်အပျဲၢ်အဘီၣ်တဖၣ်ထံၣ်ဘၣ်ဝဲလၢ လၢၢ်တဖျၢၣ်လၢအတြီတံာ်ဃာ် တၢ်သွၣ်ခိၣ်အခိၣ်ထိးန့ၣ် တလ့ၣ်ကွံာ်အသးလံ. ဒီးတၢ်သွၣ်ခိၣ်စ့ၢ်ကီး အိၣ်ကလီဝဲလီၤ.
ဖဲန့ၣ်အဆၢကတီၢ် မူခိၣ်ကလူးခံဂၤလီၣ်ဖျါထီၣ်အသးလီၤ. ဒီးတဂၤန့ၣ်စံးဝဲလၢ “သုဃုပှၤနစၤရ့းဖိ ယ့ၣ်ၡူး . . . လီၤ. ဂဲၤဆၢထၢၣ်က့ၤလံဝဲလံ.” (မၢ်ကူး ၁၆:၆) ဒီးပိာ်မုၣ်တဖၣ် က့ၤဃ့ၢ်ဝဲတဘျီဃီဒ်သိး ကတဲဘၣ်တၢ်မၢဖိတဖၣ်အဂီၢ်လီၤ. ဘၣ်ဆၣ်လၢကျဲန့ၣ်အဝဲသ့ၣ် ထံၣ်လိာ်သးဒီး ယ့ၣ်ၡူးလီၤ. ကစၢ်စံးဘၣ်အီၤ “သူၣ်ပျံၤသးဖုးတဂ့ၤ. လဲၤစံးဘၣ်တဲဘၣ် ယဒီပုၢ်ဝဲၢ်သ့ၣ်တဖၣ်, ဒ်သိးအကလဲၤဆူ ကၤလံၤလါတက့ၢ်. ဒီးကထံၣ်ဘၣ်ယၤဖဲန့ၣ်လီၤ.”—မးသဲ ၂၈:၁၀.
လၢခံဖဲနံၤအဝဲန့ၣ် အပျဲၢ်အဘီၣ်လၢ ဝ့ၢ်ယရူၤၡလ့ၣ်ခံဂၤ လဲၤဝဲဆူသဝီအ့းမၤအူလီၤ. ဖဲအဝဲသ့ၣ်လဲၤတၢ် အဆၢကတီၢ်ပှၤတမှံၤတဂၤ ဟဲသုးဘူးအသးဒီး လဲၤဃုာ်တၢ်ဒီးအဝဲသ့ၣ်လီၤ. ဒီးသံကွၢ်အဝဲသ့ၣ်လၢ မ့ၢ်အကတိၤသကိး တၢ်ဂ့ၢ်မနုၤလဲၣ်န့ၣ်လီၤ. နီၢ်နီၢ် ပှၤတဂၤအံၤမ့ၢ်ယ့ၣ်ၡူးလၢ အဂဲၤဆၢထၢၣ်သမူထီၣ်က့ၤဒီး လီၣ်ဖျါထီၣ်အက့ၢ်အဂီၤလၢ အဝဲသ့ၣ်ကွၢ်နီၣ်ဝဲတဘၣ် တဘျီဃီဘၣ်. အဝဲသ့ၣ်အမဲာ်သၣ်ဖျါသးအုးဒီး စံးဆၢက့ၤဝဲလၢ အကတိၤသကိး ယ့ၣ်ၡူးအဂ့ၢ်န့ၣ်လီၤ. ဖဲန့ၣ်အခါ ပှၤတမှံၤအံၤ တဲနၢ်ပၢၢ်အဝဲသ့ၣ်လၢ ကယဲၢ်တၢ်ကွဲးအသးလၢ လံာ်စီဆှံပူၤလၢအဘၣ်ဃးဒီး မ့းၡံအၤန့ၣ်လီၤ. နီၢ်နီၢ်န့ၣ် ဝံအတၢ်စံးပာ်လၢ ဘၣ်ဃးဒီးမ့းၡံအၤန့ၣ် ယ့ၣ်ၡူးမၤလၢပှဲၤထီၣ်ဝဲဝံၤ လီၤတံၢ်လီၤဆဲးလံ.a ဖဲအပျဲၢ်အဘီၣ်တဖၣ် သ့ၣ်ညါဘၣ်ဝဲလၢ ပှၤတမှံၤအံၤ မ့ၢ်ယ့ၣ်ၡူး လၢအသမူထီၣ်က့ၤဒ် ပှၤနီၢ်သးဖိတဂၤအခါ ကစၢ်ဟါမၢ်ကွံာ်လၢအဝဲသ့ၣ်အမဲာ်ညါလီၤ.
အပျဲၢ်အဘီၣ်ခံဂၤ က့ၤက့ၤဆူဝ့ၢ်ယရူၤၡလ့ၣ် တဘျီဃီလီၤ. အဝဲသ့ၣ်ထံၣ်ဘၣ်ဝဲလၢ တၢ်မၢဖိတဖၣ်အိၣ်ဖှိၣ်လၢ ဒၢးပူၤဒီးကးတံာ်ဃာ်တြဲၤန့ၣ်လီၤ. ဖဲအဝဲသ့ၣ်ခံဂၤ တဲဘၣ်ဝဲတၢ်မၤအသးဒီးအဝဲသ့ၣ်အခါ ယ့ၣ်ၡူးလီၣ်ဖျါထီၣ်အသးလီၤ. ကစၢ်အပျဲၢ်အဘီၣ်တဖၣ် ကမၢကမၣ်ဝဲဒီး အသးဒ့ဒီလီၤ. ဖဲန့ၣ်အခါ ယ့ၣ်ၡူးသံကွၢ်အဝဲသ့ၣ်လၢ “တၢ်သးဒ့ဒီတဖၣ် အိၣ်ထီၣ်လၢသုသး ဘၣ်မနုၤလဲၣ်.” ဒီးစံးဘၣ်အဝဲသ့ၣ်လၢ “တၢ်ကွဲးအသးဒ်န့ၣ်, ဒီးလၢခရံာ်ဘၣ်ဒိးတၢ်, ဒီးလၢသၢနံၤတနံၤန့ၣ်, ဘၣ်ဂဲၤဆၢထၢၣ်က့ၤဝဲလီၤ.”—လူၤကၣ် ၂၄:၃၈, ၄၆.
ယ့ၣ်ၡူးဂဲၤဆၢထၢၣ်သမူထီၣ်က့ၤဝံၤ အသီ ၄၀ အတီၢ်ပူၤန့ၣ် အဝဲလီၣ်ဖျါထီၣ်အသးလၢ အပျဲၢ်အဘီၣ်တဖၣ်အမဲာ်ညါလၢတၢ်ဆၢကတီၢ်အဂၤစ့ၢ်ကီးလီၤ. တဘျီန့ၣ် လီၣ်ဖျါထီၣ်အသးလၢ ပှၤ ၅၀၀ ဘျဲၣ်အမဲာ်ညါလီၤ. ဖဲန့ၣ်အဆၢကတီၢ် လီၤဂာ်လၢ ကစၢ်ဟ့ၣ်တ့ၢ်အဝဲသ့ၣ် မူဒါလၢအရ့ဒိၣ်အံၤလီၤ– “လဲၤဒုးကဲထီၣ် ပှၤအကလုာ်တဖၣ် ခဲလၢာ်လၢ ယပျဲၢ်ယဘီၣ်တက့ၢ် . . . ဒီးသိၣ်လိသီလိအီၤ, ဒ်သိးအကတိၢ်န့ၢ် ကယဲၢ်တၢ်လၢ ယမၤလိာ်တ့ၢ်သု ခဲလၢာ်တက့ၢ်. ဒီးကွၢ်ကွၢ်, ယအိၣ်ဒီးသု ကိးမုၢ်နံၤမုၢ်နၤဒဲး, တုၤတၢ်အစိၤ ကတၢၢ်လီၤ.”—မးသဲ ၂၈:၁၉, ၂၀.
ဖဲယ့ၣ်ၡူးထံၣ်လိာ်အသးဒီး တၢ်မၢဖိလၢအသးတီ ၁၁ ဂၤအလီၢ်ခံကတၢၢ်တဘျီန့ၣ် အဝဲအၢၣ်လီၤအီလီၤဝဲဒ်အံၤလီၤ– “ဖဲသးစီဆှံ ဟဲလီၤလၢသုလိၤဝံၤဒီး, သုကဒိးန့ၢ်တၢ်အစိအကမီၤ, ဒီးသုကကဲထီၣ် ယပှၤအုၣ်အသးတဖၣ် . . . ပၢၢ်လၢဟီၣ်ခိၣ်အကတၢၢ်လီၤ.” (မၤတၢ် ၁:၈) တၢ်န့ၣ်အလီၢ်ခံ ဖဲယ့ၣ်ၡူးဘၣ်တၢ်စိာ်ထီၣ်အီၤဆူမူခိၣ်အခါ တၢ်အၢၣ်အိၣ်သဒၢအီၤအဃိအပျဲၢ်အဘီၣ်တဖၣ်တထံၣ်ဘၣ်အီၤလၢၤဘၣ်.
—ဘၣ်တၢ်ဒိးသန့ၤထီၣ်အီၤလၢ မးသဲ အဆၢဒိၣ် ၂၈; မၢ်ကူး အဆၢဒိၣ် ၁၆; လူၤကၣ် အဆၢဒိၣ် ၂၄; ယိၤဟၣ် အဆၢဒိၣ် ၂၀ ဒီး ၂၁; ၁ ကရံၣ်သူး ၁၅:၅, ၆ န့ၣ်လီၤ.
a တၢ်အဒိတဖၣ်လၢ ပာ်ဖျါထီၣ်ဝဲ တၢ်စံးပာ်ဘၣ်ဃးဒီးမ့းၡံအၤအံၤ လၢယ့ၣ်ၡူးမၤလၢထီၣ်ပှဲၤထီၣ်ဝဲအဂ့ၢ်န့ၣ် ကွၢ်ဖဲဘရိၣ်ခၠၣ်တဘ့ၣ်အံၤကဘျံးပၤ ၁၇-၁၉ ဒီး လံာ်စီဆှံသိၣ်လိတၢ် နီၢ်နီၢ် မ့ၢ်မနုၤလဲၣ် လံာ်ကဘျံးပၤ ၁၉၉-၂၀၁ တက့ၢ်.