ပမၤစၢၤပဒီပုၢ်ဝဲၢ်လၢ အဘၣ်ကီဘၣ်ခဲတဖၣ်ဒ်လဲၣ်

ဖဲတၢ်ကီတၢ်ခဲဖးဒိၣ် ဟဲအိၣ်ထီၣ်ဝဲအခါ ယဟိဝၤပှၤအုၣ်အသးတဖၣ် ကရၢကရိထီၣ်ဝဲတၢ်မၤစၢၤလၢ အဒီပုၢ်ဝဲၢ်လၢအဘၣ်ကီဘၣ်ခဲတဖၣ်အဂီၢ် တဘျီဃီလီၤ. ခီဖျိပမၤဒ်အံၤအဃိ ပပာ်ဖျါထီၣ်လၢ ပအဲၣ်ပဒီပုၢ်ဝဲၢ်နီၢ်နီၢ်လီၤ. (ယိၤဟၣ် ၁၃:၃၄, ၃၅; ၁ ယိၤဟၣ် ၃:၁၇, ၁၈) ပမၤစၢၤလၢ ကျဲမနုၤတဖၣ်လဲၣ်.

ပဟ့ၣ်လီၤတၢ်မၤဘူၣ်. ဖဲတၢ်သၣ်ဝံၤလီၤဒိဖးဒိၣ်အိၣ်ထီၣ်လၢ ကီၢ်ယူဒၤအခါ ခရံာ်ဖိတဖၣ် လၢအၣ်တံၤအီာ်န့ၣ် ဆှၢလီၤဝဲတၢ်မၤဘူၣ်ဆူ အဒီပုၢ်ဝဲၢ်တဖၣ်လၢ အိၣ်လၢကီၢ်ယူဒၤအပူၤလီၤ. (မၤတၢ် ၁၁:၂၇-၃၀) ဒ်န့ၣ်အသိး, ဖဲပသ့ၣ်ညါဘၣ်လၢ ပဒီပုၢ်ဝဲၢ်လၢတၢ်လီၢ်အဂၤတဖၣ် ဘၣ်ကီဘၣ်ခဲအခါ ပထၢနုာ်တၢ်မၤဘူၣ် လၢပတၢ်အိၣ်ဖှိၣ်ပူၤ ဒ်သိးပှၤကသူအီၤလၢ အဝဲသ့ၣ်အတၢ်လိၣ်ဘၣ်အဂီၢ်လီၤ.—၂ ကရံၣ်သူး ၈:၁၃-၁၅.

ပဟ့ၣ်တၢ်မၤစၢၤလၢအဘျုးအိၣ်. ဖဲတၢ်ကီတၢ်ခဲဖးဒိၣ်ကဲထီၣ်အခါန့ၣ် တၢ်အိၣ်ဖှိၣ်သးပှၢ်လၢအအိၣ်ဖဲန့ၣ်တဖၣ် လူၤဃုဝဲတၢ်အိၣ်ဖှိၣ်ဖိကိးဂၤဒဲး ဒ်သိးကမၤစၢၤဒီး ကဟုကယာ်အဝဲသ့ၣ်အဂီၢ်လီၤ. တၢ်မၤစၢၤကမံးတံာ်န့ၣ် ရဲၣ်ကျဲၤဝဲတၢ်နီၤလီၤ တၢ်အီၣ်, ထံကဆှီ, တၢ်ကူတၢ်သိး, တၢ်အိၣ်တၢ်ဆိးအလီၢ်, ဒီးကသံၣ်ကသီတဖၣ်လီၤ. ပှၤလၢအိၣ်ဒီး တၢ်သ့တၢ်ဘၣ်လၢ ကဘှီဂ့ၤထီၣ်က့ၤဟံၣ်ဒီး ဘီမုၢ်ဘျီၣ်ဒိၣ်လၢ အဟးဂီၤဝဲတဖၣ်န့ၣ် လဲၤမၤစၢၤဝဲလၢအနီၢ်ကစၢ်အတၢ်လၢာ်ဘူၣ်လၢာ်စ့ၤဒၣ်ဝဲလီၤ. ပတၢ်ကရၢကရိန့ၣ်အိၣ်ဒီး တၢ်ဃူတၢ်ဖိးဒီး တၢ်လဲၤခီဖျိလၢ တၢ်ပာ်ဖှိၣ်မၤသကိးတၢ်အဃိ ဖဲပဒီပုၢ်ဝဲၢ်တဖၣ်လိၣ်ဘၣ်တၢ်မၤစၢၤအခါန့ၣ် ပပာ်ဖှိၣ်ထီၣ်ပသးဒီး ရဲၣ်ကျဲၤတၢ်မၤစၢၤလၢအချ့သ့လီၤ. ပမၤစၢၤထဲဒၣ် “ပှၤစူၢ်က့ၤနာ်က့ၤတၢ်” တဖၣ်တကးဘၣ် မ့ၢ်သ့န့ၣ်ပမၤစၢၤပှၤအိၣ်လၢ တၢ်ဘူၣ်တၢ်ဘါအဂၤတဖၣ် အပူၤစ့ၢ်ကီးလီၤ.—ကလၤတံ ၆:၁၀.

ပမၤစၢၤလၢ နီၢ်သးတခီဒီး မၤမုာ်ထီၣ်အဝဲသ့ၣ်အသး. ပှၤလၢအတူၢ်ဘၣ်တၢ်ကီတၢ်ခဲဖးဒိၣ်တဖၣ်န့ၣ် လိၣ်ဘၣ်ဝဲ တၢ်မၤမုာ်ထီၣ်က့ၤအသးလီၤ. ဖဲန့ၣ်အဆၢကတီၢ်န့ၣ် ပဟံးန့ၢ်တၢ်ဂံၢ်တၢ်ဘါလၢ “တၢ်မၤမုာ်ခဲလၢာ်အကစၢ်” ယဟိဝၤယွၤအအိၣ်လီၤ. (၂ ကရံၣ်သူး ၁:၃, ၄) ပတဲနၢ်ပၢၢ် ပှၤလၢအသးဟးဂီၤတဖၣ်လၢ လံာ်စီဆှံအတၢ်စံးပာ်အဂ့ၢ်လီၤ. ဒီးပဒုးနာ်န့ၢ်အဝဲသ့ၣ်လၢ တယံာ်လၢၤဘၣ် ယွၤအဘီအမုၢ် ကမၤကတၢၢ်ကွံာ်ဝဲ တၢ်ကီတၢ်ခဲလၢ အဒုးအိၣ်ထီၣ်ဝဲ တၢ်သူၣ်အုးသးအုးဒီး တၢ်တူၢ်ဘၣ်ခီၣ်ဘၣ်တဖၣ်အံၤခဲလၢာ်န့ၣ်လီၤ.—လီၣ်ဖျါ ၂၁:၄.

• ဖဲတၢ်ကီတၢ်ခဲဖးဒိၣ် ဟဲအိၣ်ထီၣ်ဝဲအခါ ဘၣ်မနုၤအဃိ ယဟိဝၤပှၤအုၣ်အသးတဖၣ် လဲၤမၤစၢၤတၢ်လၢအချ့သ့န့ၣ်လဲၣ်.

• ပမၤမုာ်ထီၣ်က့ၤ ပှၤလၢအပူၤဖျဲးလၢ တၢ်ကီတၢ်ခဲဖးဒိၣ်တဖၣ် လၢနီၢ်သးတခီသ့ဒ်လဲၣ်.