မုၢ်မဆါတနံၤအံၤ ပှၤပၢဆှၢတၢ်ကမံးတံာ် မၤတၢ်ဒ်လဲၣ်

လၢတၢယၤဖှိၣ်နံၣ်န့ၣ်, တၢ်ဂ့ၢ်အရ့ဒိၣ်မ့ၢ်ဟဲထီၣ်တမံၤမံၤန့ၣ် “ပှၤတၢ်မၢဖိတဖၣ်, ဒီးပှၤသူၣ်က့သးပှၢ်တဖၣ်အိၣ်လၢ ယရူၤၡလ့ၣ်အပူၤ” ဆၢတဲာ်န့ၢ်တၢ်လၢ ခရံာ်ဖိတၢ်အိၣ်ဖှိၣ်ခဲလၢာ်အဂီၢ်လီၤ. လၢတၢ်န့ၣ်အဃိ အဝဲသ့ၣ်စှၤဂၤတကရူၢ် မၤတၢ်ဒ်ပှၤပၢဆှၢတၢ်ကမံးတံာ် အသိးလီၤ. (မၤတၢ် ၁၅:၂) တချုးအဝဲသ့ၣ်ဆၢတဲာ်အသးတဘျီလၢ်လၢ်န့ၣ် ကတိၤသကိးဝဲလံာ်စီဆှံအဆၢတဖၣ် ဒီးမၤထွဲဝဲယွၤအသးစီဆှံအတၢ်နဲၣ်လိလီၤ. (မၤတၢ် ၁၅:၂၅) မုၢ်မဆါတနံၤအံၤ ပှၤပၢဆှၢတၢ်ကမံးတံာ် မၤထွဲအဝဲသ့ၣ်အဒိအတဲာ်လီၤ.

ပှၤပၢဆှၢတၢ်ကမံးတံာ် ဘၣ်တၢ်သူအီၤလၢ ကမၤကစၢ်ယွၤ အတၢ်ဘၣ်သးအဂီၢ်လီၤ. ဒီပုၢ်ဝဲၢ်ခွါလၢဘၣ်တၢ်ဒိးဖှူအီၤတဖၣ် လၢပၣ်ဃုာ်လၢပှၤပၢဆှၢတၢ်ကမံးတံာ်အပူၤန့ၣ် သးစၢၢ်ဆၢဝဲယွၤအကလုၢ်ကထါဒိၣ်မး ဒီးအိၣ်ဒီးတၢ်လဲၤခီဖျိအါမးလၢ တၢ်သုးကျဲၤတၢ်လၢဘၣ်ဃးဒီးနီၢ်သး ဒီးနီၢ်ခိတခီစ့ၢ်ကီးလီၤ. အဝဲသ့ၣ်အိၣ်ဖှိၣ်ဝဲတနွံတဘျီလၢ ကသမံသမိးဝဲ ဟီၣ်ခိၣ်ဒီဘ့ၣ်ဒီပုၢ်ဝဲၢ်တၢ်ကရၢကရိ အတၢ်လိၣ်ဘၣ်တဖၣ်အဂီၢ်လီၤ. ဒ်တၢယၤဖှိၣ်နံၣ်အသိး, မုၢ်မဆါတနံၤအံၤ ပှၤပၢဆှၢတၢ်ကမံးတံာ် အတၢ်နဲၣ်လိတဖၣ်လၢ သန့ၤထီၣ်အသးလၢလံာ်စီဆှံန့ၣ် ဘၣ်တၢ်ဟ့ၣ်လီၤအီၤခီဖျိလၢ လံာ်ပရၢတဖၣ် မ့တမ့ၢ် ပှၤလဲၤတရံးအံးက့ၤကွၢ်က့ၤတၢ် ဒီးပှၤအဂၤတဖၣ်န့ၣ်လီၤ. အဝဲသ့ၣ်မၤဝဲဒ်အံၤအဃိ ကဲထီၣ်တၢ်မၤစၢၤလၢ ကစၢ်ယွၤအပှၤဂီၢ်မုၢ်တဖၣ် ကအိၣ်ဃူလိာ်ဖိးလိာ်အသးလၢ အတၢ်ဆိကမိၣ်ဒီး အတၢ်ဖံးတၢ်မၤအပူၤလီၤ. (မၤတၢ် ၁၆:၄, ၅) ပှၤပၢဆှၢတၢ်ကမံးတံာ်န့ၣ် အံးထွဲကွၢ်ထွဲ တၢ်ကတဲာ်ကတီၤနီၢ်သးတၢ်အီၣ်, ဆီၣ်ထွဲဝဲဘီမုၢ်တၢ်သးခုကစီၣ်တၢ်မၤ, ဒီးကွၢ်ထွဲဝဲတၢ်ဃုထၢပာ်လီၤ ဒီပုၢ်ဝဲၢ်ခွါတဖၣ်အမူဒါန့ၣ်လီၤ.

ပှၤပၢဆှၢတၢ်ကမံးတံာ် မၤဝဲဒ်ယွၤအသးစီဆှံနဲၣ်လိအီၤ အသိးလီၤ. ပှၤပၢဆှၢတၢ်ကမံးတံာ်န့ၣ် ဒိးပၢအသးလၢ မူဟီၣ်ကယၢပၢတၢ်ကစၢ် ယဟိဝၤယွၤ ဒီးတၢ်အိၣ်ဖှိၣ်အခိၣ် ယ့ၣ်ၡူးအဖီလာ် ဒီးဃုဝဲအတၢ်နဲၣ်လိလီၤ. (၁ ကရံၣ်သူး ၁၁:၃; အ့းဖ့းစူး ၅:၂၃) အဝဲသ့ၣ်တပာ်လီၤအသးလၢ အမ့ၢ်ယွၤအပှၤကလုာ် အခိၣ်နၢ်တဖၣ်ဘၣ်. အဝဲသ့ၣ်, ဃုာ်ဒီးခရံာ်ဖိလၢ အဘၣ်တၢ်ဒိးဖှူအီၤ အဂၤတဖၣ်န့ၣ် “ပိာ်သိဖိ [ယ့ၣ်ၡူး] အခံဖဲအဆှၢအီၤ တပူၤလၢ်လၢ်လီၤ.” (လီၣ်ဖျါ ၁၄:၄) ပှၤပၢဆှၢတၢ်ကမံးတံာ်န့ၣ် အိၣ်ဒီးတၢ်စံးဘျုးစံးဖှိၣ် ဖဲပဃ့ဘါထုကဖၣ်န့ၢ်တၢ်လၢ အဝဲသ့ၣ်အဂီၢ်အခါလီၤ.

• လၢတၢယၤဖှိၣ်နံၣ်အတီၢ်ပူၤန့ၣ် ပှၤလၢအမၤတၢ်ဒ် ပှၤပၢဆှၢတၢ်ကမံးတံာ်အသိးန့ၣ် မ့ၢ်မတၤတဖၣ်လဲၣ်.

• မုၢ်မဆါတနံၤအံၤ ပှၤပၢဆှၢတၢ်ကမံးတံာ်န့ၣ် ဃုဝဲယွၤအတၢ်နဲၣ်လိဒ်လဲၣ်.