ဘၣ်မနုၤအဃိ ပသူၣ်ထီၣ်ဘီမုၢ်ဘျီၣ်ဒိၣ်လဲၣ် ဒီးပသူၣ်ထီၣ်အီၤဒ်လဲၣ်

ပတၢ်ဘူၣ်ထီၣ်ဘါထီၣ်အလီၢ်န့ၣ် ဘၣ်တၢ်ကိးအီၤလၢ ဘီမုၢ်ဘျီၣ်ဒိၣ်လီၤ. တၢ်လၢဘီမုၢ်ဘျီၣ်ဒိၣ်န့ၣ် အဲၣ်ဒိးစံးဝဲ တၢ်လီၢ်လၢပှၤကတိၤသကိး လံာ်စီဆှံအတၢ်ဂ့ၢ်မိၢ်ပှၢ်လၢအမ့ၢ် ယွၤအဘီအမုၢ်တၢ်သးခုကစီၣ်အဂ့ၢ်လၢ ယ့ၣ်ၡူးစံၣ်တဲၤတဲလီၤတ့ၢ်ဝဲန့ၣ်လီၤ. —လူၤကၣ် ၈:၁.

ဘီမုၢ်ဘျီၣ်ဒိၣ်လၢ လီၢ်ကဝီၤပူၤန့ၣ် ပသူအီၤလၢတၢ်ဘူၣ်တၢ်ဘါ အမ့ၢ်အတီအဂီၢ်လီၤ. မ့ၢ်တၢ်လီၢ်လၢယဟိဝၤပှၤအုၣ်အသးတဖၣ် သုးကျဲၤဝဲတၢ်စံၣ်တဲၤတဲလီၤ တၢ်သးခုကစီၣ်တၢ်မၤန့ၣ်လီၤ. (မးသဲ ၂၄:၁၄) ဘီမုၢ်ဘျီၣ်ဒိၣ်တဖၣ် အဒိၣ်အလဲၢ်ဒီး အက့ၢ်အဂီၤန့ၣ်လီၤဆီလိာ်အသးလီၤ. ဒီးတဘၣ်တၢ်သူၣ်ထီၣ်အီၤ လီၤဘီလီၤမုၢ်ဘၣ်. ဘီမုၢ်ဘျီၣ်ဒိၣ်တနီၤန့ၣ် ဘၣ်တၢ်သူအီၤအါန့ၢ်ဒံး တၢ်အိၣ်ဖှိၣ်တဖုလီၤ. လၢပူၤကွံာ် အနံၣ်တယံာ်ဒံးဘၣ်အတီၢ်ပူၤ ပှၤစံၣ်တဲၤတဲလီၤတၢ်ဖိတဖၣ်အါထီၣ်ဒီး တၢ်အိၣ်ဖှိၣ်အါထီၣ်အဃိ ပသူၣ်ထီၣ်ဘီမုၢ်ဘျီၣ်ဒိၣ်အသီ အဖျၢၣ်လၢအကလး (လၢတၢ်ထိၣ်ဃူအပူၤန့ၣ် ပသူၣ်ထီၣ်တသီယဲၢ်ဖျၢၣ်) န့ၣ်လီၤ. ဘီမုၢ်ဘျီၣ်ဒိၣ်တဖၣ်အံၤန့ၣ် ပသူၣ်ထီၣ်အီၤသ့လၢကျဲဒ်လဲၣ်.—မးသဲ ၁၉:၂၆.

ပသူၣ်ထီၣ်အီၤလၢ တၢ်မၤဘူၣ်လၢဘၣ်တၢ်ဟံးန့ၢ်အီၤလၢ စ့ပာ်ဖှိၣ်လီၤ. တၢ်မၤဘူၣ်တဖၣ်အံၤ ဘၣ်တၢ်ဆှၢအီၤဆူ ဝဲၤတြၢ်လီၤ. စ့အံၤန့ၣ်ဘၣ်တၢ်သူအီၤဖဲ တၢ်သူၣ်ထီၣ်ဘီမုၢ်ဘျီၣ်ဒိၣ်အသီတဖၣ် မ့တမ့ၢ် တၢ်ဘှီဂ့ၤထီၣ်က့ၤ ဘီမုၢ်ဘျီၣ်ဒိၣ်တဖၣ်အခါန့ၣ်လီၤ.

ဘၣ်တၢ်သူၣ်ထီၣ်အီၤလၢ ပှၤမၤစၢၤတၢ်ဖိလၢ ဟဲလၢတၢ်အိၣ်သးအကလုာ်ကလုာ်လၢ တဟံးန့ၢ်အဘူးအလဲန့ၣ်လီၤ. လၢထံကီၢ်အါမးအပူၤ ပကရၢကရိထီၣ် တၢ်သူၣ်ထီၣ်ဘီမုၢ်ဘျီၣ်ဒိၣ်ကရူၢ်တဖၣ် န့ၣ်လီၤ. ပှၤဘှီတၢ်ဖိဒီး ပှၤမၤစၢၤတၢ်ဖိတဖၣ် လဲၤဝဲဆူတၢ်အိၣ်ဖှိၣ်တဖုဘၣ်တဖု ပၢၢ်လၢတၢ်လီၢ်လၢအယံၤ လၢအိၣ်လၢထံကီၢ်အပူၤလီၤ. အဝဲသ့ၣ်လဲၤဝဲ ဒ်သိးကမၤစၢၤပှၤအုၣ်အသးလၢ အိၣ်ဖဲန့ၣ်တဖၣ်လၢ ကသူၣ်ထီၣ်ဘီမုၢ်ဘျီၣ်ဒိၣ်အဂီၢ်လီၤ. လၢထံကီၢ်အဂၤတနီၤန့ၣ် ပဟ့ၣ်လီၤမူဒါလၢ ပှၤအုၣ်အသးလၢအတုၤထီၣ်ထီၣ်ဘးတဖၣ် လၢကပၢဆှၢရဲၣ်ကျဲၤ တၢ်သူၣ်ထီၣ်ဘှီထီၣ်ဒီး ဘှီဂ့ၤထီၣ်က့ၤဘီမုၢ်ဘျီၣ်ဒိၣ်တဖၣ်န့ၣ်လီၤ. လၢတၢ်လီၢ်ကိးတီၤဒဲးန့ၣ် ဖဲပှၤသူၣ်ထီၣ်ဘီမုၢ်ဘျီၣ်ဒိၣ်တဖၣ်အခါ ပှၤလၢဘှီတၢ်သ့ဂ့ၤဂ့ၤတဖၣ် ဟ့ၣ်လီၤအသးလၢ ကမၤစၢၤတၢ်လီၤ. ဘၣ်ဆၣ်သနာ်က့ ပှၤမၤစၢၤတၢ်အါကတၢၢ်န့ၣ်မ့ၢ်ဒၣ် လီၢ်ကဝီၤတၢ်အိၣ်ဖှိၣ်ဖိတဖၣ်လီၤ. တၢ်မၤသ့ၣ်တဖၣ်အံၤကဲထီၣ်လိၣ်ထီၣ်လၢ ယဟိဝၤယွၤအသးစီဆှံဒီး ကစၢ်အပှၤဂီၢ်မုၢ်တဖၣ် အတၢ်ဂုာ်ကျဲးစၢးလၢ သးဒီဖျၢၣ်အဃိလီၤ.—စံးထီၣ်ပတြၢၤ ၁၂၇:၁; ကလီးစဲ ၃:၂၃.

• ပတၢ်ဘူၣ်ထီၣ်ဘါထီၣ်အလီၢ်န့ၣ် ဘၣ်မနုၤအဃိ ပကိးအီၤလၢ ဘီမုၢ်ဘျီၣ်ဒိၣ်လဲၣ်.

• လၢဟီၣ်ခိၣ်ဒီဘ့ၣ်န့ၣ် ဘီမုၢ်ဘျီၣ်ဒိၣ်တဖၣ် ဘၣ်တၢ်သူၣ်ထီၣ်အီၤလၢကျဲဒ်လဲၣ်.