ပမၤစၢၤတၢ်လၢ တၢ်ကွၢ်ထွဲဘှီဂ့ၤ ထီၣ်က့ၤ ဘီမုၢ်ဘျီၣ်ဒိၣ်သ့ဒ်လဲၣ်

ယဟိဝၤပှၤအုၣ်အသးတဖၣ် အဘီမုၢ်ဘျီၣ်ဒိၣ်န့ၣ် မ့ၢ်တၢ်ဘူၣ်ထီၣ်ဘါထီၣ် ယဟိဝၤယွၤအလီၢ်လီၤ. လၢတၢ်န့ၣ်အဃိ, တၢ်မၤကဆှဲကဆှီ ဘျီၣ်ဒိၣ်ဒ်သိးကဖျါ ဃံဃံလၤလၤအဂီၢ်ဒီး တၢ်ကွၢ်ထွဲဘှီဂ့ၤထီၣ်က့ၤအီၤဂ့ၤဂ့ၤန့ၣ် ပပာ်အီၤဒ်တၢ်ခွဲးတၢ်ယာ်လီၤဆီတခါလီၤ. ပပာ်တၢ်မၤတဖၣ်အံၤ ဒ်သနၢၣ်လၢအရ့ဒိၣ်တမံၤလၢ ပတၢ်ဘူၣ်ထီၣ်ဘါထီၣ်စီဆှံအဂီၢ်န့ၣ်လီၤ. ပှၤပၣ်ဃုာ်လၢတၢ်မၤအံၤသ့ ကိးဂၤဒဲးလီၤ.

တၢ်အိၣ်ဖှိၣ်ဝံၤအလီၢ်ခံ ပမၤကဆှဲကဆှီတၢ်သ့လီၤ. တၢ်အိၣ်ဖှိၣ်ဝံၤအလီၢ်ခံ ဒီပုၢ်ဝဲၢ်မုၣ် ဒီးဒီပုၢ်ဝဲၢ်ခွါတဖၣ် မၤကဆှဲကဆှီဘီမုၢ်ဘျီၣ်ဒိၣ် လၢတၢ်သူၣ်ခုသးခုအပူၤကိးဘျီဒဲးလီၤ. ပမၤကဆှဲကဆှီတၢ် တနွံတဘျီစ့ၢ်ကီးလီၤ. ဖဲပမၤကဆှဲကဆှီတၢ်အခါ တၢ်အိၣ်ဖှိၣ်သးပှၢ် မ့တမ့ၢ် တၢ်အိၣ်ဖှိၣ်အပှၤမၤစၢၤတၢ်တဂၤန့ၣ် ကတီခိၣ်ရိၣ်မဲဝဲဒ် တၢ်မၤကဆှဲကဆှီတၢ်စရီပာ်ဖျါဝဲအသိးလီၤ. ပှၤလၢအဲၣ်ဒိးမၤစၢၤတၢ်တဖၣ်န့ၣ် ခွဲသိၣ်တၢ်, ထွါပျီတၢ်, မၤပျီဖၣ်ကမူၣ်, ကျဲၤက့ၤလီၢ်ဆ့ၣ်နီၤ, မၤပျီတၢ်ဟးလီၢ်, ထွါကွံာ် ပဲတြီဖိဒီးမဲာ်ထံကလၤ, တၢၤကွံာ်တၢ်ကမှံၤ မ့တမ့ၢ် မၤကဆှီတၢ်ချၢ ဒီးကရၢၢ်ပူၤလီၤ. ပမၤကဆှဲကဆှီတၢ်လီၢ်တံၢ်လီၤဆဲး အစှၤကတၢၢ်တနံၣ်တဘျီစ့ၢ်ကီးလီၤ. ဒ်သိးပဖိတဖၣ် ကပာ်ကဲပတၢ်ဘူၣ်ထီၣ်ဘါထီၣ်အလီၢ်အဂီၢ်န့ၣ် ပမၢအဝဲသ့ၣ်မၤစၢၤပှၤဖဲ ပမၤကဆှဲကဆှီတၢ်အခါလီၤ.—စံၣ်တဲၤတဲလီၤ ၅:၁.

ဖဲပှၤဘှီဂ့ၤထီၣ်က့ၤ ဘီမုၢ်ဘျီၣ်ဒိၣ်အခါ ပမၤစၢၤတၢ်သ့လီၤ. တနံၣ်တဘျီ ပှၤဃုကွၢ်သမံသမိးဘီမုၢ်ဘျီၣ်ဒိၣ် အပူၤဒီးအချၢလီၤတံၢ်လီၤဆဲးလီၤ. ပှၤဃုကွၢ်သမံသမိးဝံၤအလီၢ်ခံ တၢ်ကရဲၣ်ကျဲၤတၢ်ကွၢ်ထွဲဘှီဂ့ၤထီၣ်တၢ် ဘၣ်ဆၢဘၣ်ကတီၢ်ဒ်သိး တၢ်လၢာ်ဘူၣ်လၢာ်စ့ၤလၢတကြၢးလၢာ်တဖၣ် သုတလၢာ်တဂ့ၤအဂီၢ်လီၤ. (၂ ကွဲးနီၣ်တၢ် ၂၄:၁၃; ၃၄:၁၀) ဘီမုၢ်ဘျီၣ်ဒိၣ်န့ၣ် မ့ၢ်တၢ်ဘူၣ်ထီၣ်ဘါထီၣ်ယွၤအလီၢ်အဃိ ပကြၢးကွၢ်ထွဲဘှီဂ့ၤထီၣ်အီၤဒီး မၤကဆှဲကဆှီအီၤန့ၣ်လီၤ. ခီဖျိပမၤဒ်အံၤအဃိ ပပာ်ဖျါထီၣ်ပတၢ်အဲၣ်ယဟိဝၤယွၤဒီး ပာ်လုၢ်ပာ်ပှ့ၤ ပတၢ်ဘူၣ်ထီၣ်ဘါထီၣ်အလီၢ်လီၤ. (စံးထီၣ်ပတြၢၤ ၁၂၂:၁) ဒီးကဲထီၣ်စ့ၢ်ကီး တၢ်မၤလၤကပီၤ ယဟိဝၤယွၤအမံၤလၢ လီၢ်ကဝီၤပူၤလီၤ.—၂ ကရံၣ်သူး ၆:၃.

• ဘၣ်မနုၤအဃိ ပကွၢ်ထွဲဘှီဂ့ၤထီၣ် ပတၢ်ဘူၣ်ထီၣ်ဘါထီၣ်အလီၢ်လဲၣ်.

• ဒ်သိးဘီမုၢ်ဘျီၣ်ဒိၣ် ကကဆှဲကဆှီအဂီၢ် ပရဲၣ်ကျဲၤဒ်လဲၣ်.