တၢ်မၤလိ ၉
နအိၣ်ဒီး ဟံၣ်မုာ်ဃီပၢၤ ကသ့ဒ်လဲၣ်
၁. ဘၣ်မနုၤအဃိ တၢ်ဒိးတ့ဒိးဖျီသးန့ၣ် မ့ၢ်တၢ်အရ့ဒိၣ်လၢ ဟံၣ်မုာ်ဃီပၢၤအဂီၢ်လဲၣ်.
တၢ်သးခုကစီၣ်တခါအံၤ ဟဲလၢယွၤအိၣ်လီၤ. ယဟိဝၤယွၤလၢအမ့ၢ် “တၢ်သးခုကစၢ်” အံၤ အဲၣ်ဒိးဝဲလၢ ဟံၣ်ဖိဃီဖိတဖၣ် ကအိၣ်ဒီးတၢ်သူၣ်ခုသးခုလီၤ. (၁ တံၤမသ့း ၁:၁၁, nwt) ကစၢ်ဒုးအိၣ်ထီၣ်ဝဲ တၢ်ဆီဟံၣ်ဆီဃီလီၤ. တၢ်ဒိးတ့ဒိးဖျီသးလၢ အလီၤပလိာ်ဒီးထံကီၢ်တၢ်သိၣ်တၢ်သီန့ၣ် မ့ၢ်တၢ်အရ့ဒိၣ်လၢ ဟံၣ်မုာ်ဃီပၢၤအဂီၢ်လီၤ. တၢ်အံၤဒုးအိၣ်ထီၣ်ဝဲ တၢ်အဲၣ်တၢ်ကွံ ဒီးတၢ်သးခုလၢ မိၢ်ပၢ်ဒီးဖိတဖၣ်အဂီၢ်လီၤ. ဒ်သိးခရံာ်ဖိတဖၣ် အတၢ်ဒိးတ့ဒိးဖျီသး ကဘၣ်တၢ်ပာ်ပနီၣ်အီၤလၢ ပဒိၣ်အမဲာ်ညါအဂီၢ်န့ၣ် ကဘၣ်မၤထွဲဝဲ လီၢ်ကဝီၤအတၢ်သိၣ်တၢ်သီတဖၣ် ဘၣ်ဃးဒီးတၢ်ဒိးတ့ဒိးဖျီသးန့ၣ်လီၤ.—ဖး လူၤကၣ် ၂:၁, ၄, ၅ တက့ၢ်.
ဘၣ်ဃးတၢ်ဆီဟံၣ်ဆီဃီန့ၣ် ယွၤထံၣ်ဝဲဒ်လဲၣ်. ကစၢ်အဲၣ်ဒိးလၢပတၢ်ဆီဟံၣ်ဆီဃီန့ၣ် ကဂၢၢ်ကျၢၤဝဲထီဘိလီၤ. ယဟိဝၤယွၤအဲၣ်ဒိးလၢ မါဒီးဝၤန့ၣ် ကတီလိာ်သးတဂၤဒီးတဂၤလီၤ. (ဧ့ၤဘြံၤ ၁၃:၄) ကစၢ်သးဟ့ဝဲ တၢ်မၤကတၢၢ်ကွံာ်တၢ်ဆီဟံၣ်ဆီဃီလီၤ. (မၤလကံ ၂:၁၆) ဘၣ်ဆၣ်, ခရံာ်ဖိတဂၤ အသးသမူတံၤသကိး မ့ၢ်အဲၣ်ဘၢအီၤန့ၣ် ကစၢ်ဟ့ၣ်အခွဲးလၢ အဝဲကမၤကတၢၢ်ကွံာ်အတၢ်ဆီဟံၣ်ဆီဃီဒီး ဆီဟံၣ်ဆီဃီလၢအသီတဘျီလီၤ.—ဖး မးသဲ ၁၉:၃-၆, ၉ တက့ၢ်.
၂. မါဒီးဝၤ ကြၢးရ့လိာ်သး တဂၤဒီးတဂၤဒ်လဲၣ်.
ယဟိဝၤယွၤတ့လီၤဝဲ ပိာ်မုၣ်ဒီးပိာ်ခွါလၢ ကမၤစၢၤလိာ်သးတဂၤဒီးတဂၤ လၢအသနၢၣ်ဒၣ်ဝဲလီၤ. (၁ မိၤၡ့ ၂:၁၈) ဒ်ဟံၣ်ခိၣ်တဂၤအသိး ဝၤအံၤကဘၣ် တီခိၣ်ရိၣ်မဲဝဲဒ်သိး ကမၤလၢပှဲၤအဟံၣ်ဖိဃီဖိ တၢ်လိၣ်ဘၣ်လၢနီၢ်ခိ ဒီးသိၣ်လိအဝဲသ့ၣ်လၢယွၤအဂ့ၢ်န့ၣ်လီၤ. အဝဲကဘၣ်အဲၣ်အမါဒီး တူၢ်ဆါအသးလၢအဂီၢ်လီၤ. မါဒီးဝၤန့ၣ် ကြၢးအဲၣ်လိာ်အသးဒီး ယူးယီၣ်ပာ်ကဲလိာ်သး တဂၤဒီးတဂၤလီၤ. မါဒီးဝၤန့ၣ် တလၢတပှဲၤဘၣ်အဃိ ကဘၣ်ဂုာ်ကျဲးစၢးပျၢ်လိာ်သးတၢ်ကမၣ်လီၤ. တၢ်အံၤမ့ၢ်တၢ်အရ့ဒိၣ်လၢ ဟံၣ်မုာ်ဃီပၢၤအဂီၢ်လီၤ.—ဖး အ့းဖ့းစူး ၄:၃၁, ၃၂; ၅:၂၂-၂၅, ၃၃; ၁ ပ့းတရူး ၃:၇ တက့ၢ်.
၃. နမ့ၢ်တအိၣ်ဒီးဟံၣ်မုာ်ဃီပၢၤန့ၣ် မ့ၢ်နကြၢးပာ်တ့ၢ်ကွံာ် နသးသမူတံၤသကိးဧါ.
သုနီၢ်ဒီမါဝၤမ့ၢ်ကွၢ်ဆၢၣ်မဲာ်ဘၣ်ဝဲ တၢ်ကီတၢ်ခဲတဖၣ်န့ၣ်, သုကြၢးဂုာ်ကျဲးစၢးရ့လိာ်သးလၢ တၢ်အဲၣ်တၢ်ကွံအပူၤလီၤ. (၁ ကရံၣ်သူး ၁၃:၄, ၅) လံာ်စီဆှံတဆီၣ်ထွဲဝဲ နီၢ်ဒီမါဝၤလၢကအိၣ်လီၤဖးဝဲဒ်သိး ကသုးကျဲၤတၢ်သဘံၣ်သဘုၣ်လၢ ညီနုၢ်ကဲထီၣ်အသးန့ၣ်ဘၣ်.—ဖး ၁ ကရံၣ်သူး ၇:၁၀-၁၃ တက့ၢ်.
၄. ဖိသ့ၣ်ဧၢ, ကစၢ်ယွၤအဲၣ်ဒိးလၢ နကဒိးန့ၢ်ဘၣ်တၢ်မနုၤလဲၣ်.
ယဟိဝၤယွၤအဲၣ်ဒိးလၢန ကအိၣ်ဒီးတၢ်သူၣ်ခုသးခုလီၤ. ဖဲနမ့ၢ်ဒံးသးစၢ်အခါန့ၣ် ဒ်သိးနကအိၣ်ဒီးတၢ်သးခုအဂီၢ် ကစၢ်ဟ့ၣ်ကူၣ်နၤလၢ အဂ့ၤကတၢၢ်န့ၣ်လီၤ. ကစၢ်အဲၣ်ဒိးလၢ နကဒိးန့ၢ်ဘၣ်တၢ်အဘျုးလၢ နမိၢ်နပၢ်အတၢ်ဟ့ၣ်ကူၣ်ဒီး အတၢ်လဲၤခီဖျိန့ၣ်လီၤ. (ကလီးစဲ ၃:၂၀) ယဟိဝၤယွၤအဲၣ်ဒိးစ့ၢ်ကီးလၢ နကဒိးန့ၢ်ဘၣ်တၢ်သူၣ်ခုသးခုခီဖျိ နမၤတၢ်ဘၣ်တ့ကစၢ်ဒီးအဖိခွါအတၢ်မၤအဃိလီၤ.—ဖး စံၣ်တဲၤတဲလီၤတၢ် ၁၁:၉-၁၂:၁; မးသဲ ၁၉:၁၃-၁၅; ၂၁:၁၅, ၁၆ တက့ၢ်.
၅. မိၢ်ပၢ်သ့ၣ်ဧၢ, သုဖိတဖၣ် ထံၣ်န့ၢ်တၢ်သးခုကသ့ဒ်လဲၣ်.
ကြၢးနမၤတၢ်ဆူၣ်ဆူၣ်လၢ တၢ်လုၢ်အီၣ်လုၢ်အီ, တၢ်အိၣ်တၢ်ဆိးဒီး တၢ်ကူတၢ်သိးလၢ နဖိတဖၣ်အဂီၢ်လီၤ. (၁ တံၤမသ့း ၅:၈) ဘၣ်ဆၣ် နဖိတဖၣ်ကထံၣ်န့ၢ် တၢ်သူၣ်ခုသးခုအဂီၢ်, နကဘၣ်သိၣ်လိ အဝဲသ့ၣ်လၢကအဲၣ်ယွၤဒီး ကမၤလိကစၢ်အဂ့ၢ်စ့ၢ်ကီးလီၤ. (အ့းဖ့းစူး ၆:၄) နတၢ်အဲၣ်ယွၤန့ၣ် ကဲထီၣ်တၢ်ဒိဂ့ၤတဲာ်ဘၣ်လၢ နဖိအဂီၢ် ဒ်သိးကထိၣ်ဟူးထိၣ်ဂဲၤထီၣ် အဝဲသ့ၣ်အသးလၢကအဲၣ်ယွၤန့ၣ်လီၤ. နမ့ၢ်သိၣ်လိသီလိနဖိလၢ ယွၤအကလုၢ်ကထါန့ၣ် ကမၤဒိၣ်ထီၣ်ထီထီၣ် အဝဲသ့ၣ်အတၢ်ဆိကမိၣ်လၢ အဂ့ၤတခီလီၤ.—ဖး ၅ မိၤၡ့ ၆:၄-၇; ကတိၤဒိ ၂၂:၆ တက့ၢ်.
ဖိသၣ်တဖၣ်ဒိးန့ၢ်ဘၣ် တၢ်အဘျုးဖဲနဟ့ၣ်ဂံၢ်ဟ့ၣ်ဘါအီၤဒီး စံးပတြၢၤအီၤအခါန့ၣ်လီၤ. အဝဲသ့ၣ်လိၣ်ဘၣ်စ့ၢ်ကီးလၢ နကသိၣ်က့ၤသီက့ၤအီၤလီၤ. တၢ်သိၣ်လိနဲၣ်လိဒ်အံၤန့ၣ် ဒီသဒၢအဝဲသ့ၣ်လၢ လုၢ်လၢ်သကဲာ်ပဝးလၢကမၤဟးဂီၤအဝဲသ့ၣ် အတၢ်သးခုလီၤ. (ကတိၤဒိ ၂၂:၁၅) ဘၣ်ဆၣ်, တၢ်သိၣ်က့ၤသီက့ၤတၢ်န့ၣ် တဘၣ်မ့ၢ်တၢ်လၢအဆူၣ်တလၢဘၣ်လီၤ.—ဖး ကလီးစဲ ၃:၂၁ တက့ၢ်.
ယဟိဝၤပှၤအုၣ်အသးတဖၣ် ထုးထီၣ်ရၤလီၤလံာ်လဲၢ်တနီၤနီၤလၢ ဘၣ်တၢ်ကွဲးအီၤလီၤဆီဒၣ်တၢ်လၢ ကမၤစၢၤမိၢ်ပၢ်ဒီး ဖိတဖၣ်အဂီၢ်လီၤ. လံာ်လဲၢ်တဖၣ်အံၤန့ၣ် ဒိးသန့ၤထီၣ်အသးလၢ လံာ်စီဆှံပူၤလီၤ.—ဖး စံးထီၣ်ပတြၢၤ ၁၉:၇, ၁၁ တက့ၢ်.