ယ့ၣ်ၡူးအိၣ်ဒီး တၢ်ဒိကနၣ်ထီဘိ

နကဒိကနၣ် နမိမိၢ်ပါပၢ်အကလုၢ်န့ၣ် ညီထီဘိလၢနဂီၢ်ဧါ.— ဘၣ်တဘျီဘျီကကီလီၤ. နဆိကမိၣ်လၢ ယ့ၣ်ၡူးဒိကနၣ်ဝဲ မတၤသ့ၣ်တဖၣ်အကလုၢ်လဲၣ်.— အဝဲဒိကနၣ်ဝဲယဟိဝၤယွၤ ဒီးအမိမိၢ်ပါပၢ်အကလုၢ်လီၤ. ဖဲကီလၢနကဒိကနၣ် နမိမိၢ်ပါပၢ်အကလုၢ်အခါ ယ့ၣ်ၡူးအဒိအတဲာ် ကကဲထီၣ်တၢ်မၤစၢၤလၢနဂီၢ်လီၤ. ပကကွၢ်သကိးတၢ်ဂ့ၢ်အံၤမီၣ်.

တချုးယ့ၣ်ၡူးဟဲဆူဟီၣ်ခိၣ်န့ၣ် အဝဲအိၣ်ဒီးအပၢ်ယဟိဝၤယွၤ လၢမူခိၣ်လီၤ. ဘၣ်ဆၣ်ယ့ၣ်ၡူးအိၣ်ဒီး အမိမိၢ်ပါပၢ်လၢဟီၣ်ခိၣ် စ့ၢ်ကီးလီၤ. အဝဲသ့ၣ်အမံၤမ့ၢ် စီၤယိၤသးဒီးနီၢ်မၤရံလီၤ. နဆိကမိၣ်လၢ အဝဲသ့ၣ်ကဲထီၣ် ယ့ၣ်ၡူးအမိမိၢ်ပါပၢ်ဒ်လဲၣ်.—

ယဟိဝၤယွၤဟံးန့ၢ်ယ့ၣ်ၡူး အသးသမူလၢမူခိၣ်ဒီးထၢနုာ်အီၤဆူ နီၢ်မၤရံအဟၢဖၢပူၤလီၤ. လၢတၢ်န့ၣ်အဃိ ယ့ၣ်ၡူးဟဲအိၣ်ဖျဲၣ်ထီၣ်ဒီး အိၣ်မူဝဲလၢဟီၣ်ခိၣ်လီၤ. တၢ်န့ၣ်မ့ၢ်တၢ်လီၤလးလီၤ. ယ့ၣ်ၡူးဒိၣ်ထီၣ်လၢ နီၢ်မၤရံအဟၢဖၢပူၤ ဒ်ဖိသၣ်အဂၤတဖၣ်အသိးလီၤ. ယံာ်ခွံလါဃၣ်ဃၣ် ဒီးယ့ၣ်ၡူးဟဲအိၣ်ဖျဲၣ်ထီၣ်ဝဲလီၤ. လၢတၢ်န့ၣ်အဃိ နီၢ်မၤရံဒီးအဝၤစီၤယိၤသး ကဲထီၣ်ယ့ၣ်ၡူးအမိမိၢ်ပါပၢ် လၢဟီၣ်ခိၣ်ချၢလီၤ.

ဖဲယ့ၣ်ၡူးအသးအိၣ်ဒံးဒၣ် ၁၂ နံၣ်အခါ အဝဲမၤတၢ်တမံၤလၢ ပာ်ဖျါအတၢ်အဲၣ်လၢ အပၢ်ယဟိဝၤယွၤအဂီၢ်လီၤ. တၢ်အံၤမၤအသးဖဲယ့ၣ်ၡူးဒီး အဟံၣ်ဖိဃီဖိလဲၤတၢ်ဖးယံၤဆူယရူၤၡလ့ၣ် လၢကဘူၣ်ထီၣ်ဘါထီၣ် ယဟိဝၤယွၤအခါန့ၣ်လီၤ. ဖဲအဝဲသ့ၣ်ဟဲက့ၤလၢကျဲအခါ စီၤယိၤသးဒီးနီၢ်မၤရံ ဃုယ့ၣ်ၡူးတဘၣ်နီတတီၤဘၣ်. နဆိကမိၣ်လၢ အဝဲကအိၣ်ဖဲလဲၣ်.—

စီၤယိၤသးဒီးနီၢ်မၤရံ က့ၤကဒါက့ၤချ့ချ့ဆူယရူၤၡလ့ၣ်ဒီး လူၤဃုဝဲယ့ၣ်ၡူးလၢတၢ်လီၢ်ကိးပူၤဒဲးလီၤ. အဝဲသ့ၣ်အသူၣ်ကိၢ်သးဂီၤဒိၣ်မးလၢ တထံၣ်အီၤအဃိန့ၣ်လီၤ. ဘၣ်ဆၣ်ပူၤကွံာ်သၢသီဝံၤအလီၢ်ခံ အဝဲသ့ၣ်လဲၤထံၣ်အီၤလၢ တၢ်လုၢ်ဟံၣ်အပူၤလီၤ. ဘၣ်မနုၤအဃိယ့ၣ်ၡူးအိၣ်လၢ တၢ်လုၢ်ဟံၣ်အပူၤလဲၣ်.— ဖဲန့ၣ်န့ၣ်အဝဲမၤလိအါထီၣ် အပၢ်ယဟိဝၤယွၤအဂ့ၢ်သ့ဝဲအဃိန့ၣ်လီၤ. အဝဲအဲၣ်ယဟိဝၤယွၤဒီး သးအိၣ်ဃုသ့ၣ်ညါအတၢ်ဘၣ်သးလီၤ. ဖဲအဝဲအနီၢ်ဒိၣ်ထီၣ်အခါဒၣ်လဲာ် ဒိကနၣ်ဝဲယဟိဝၤယွၤ အကလုၢ်ထီဘိလီၤ. မ့ၢ်ကီလၢအဂီၢ်ဒီးမ့ၢ်ဘၣ်တူၢ်ဆါအသးသနာ်က့ ယ့ၣ်ၡူးဒိကနၣ်ဝဲလီၤ. ယ့ၣ်ၡူးဒိကနၣ်ဝဲ စီၤယိၤသးဒီးနီၢ်မၤရံ အကလုၢ်စ့ၢ်ကီးဧါ.— မ့ၢ်လီၤ. လံာ်စီဆှံတဲဝဲလၢ ဒိကနၣ်ဝဲလီၤ.

လၢယ့ၣ်ၡူးအဒိအတဲာ်န့ၣ် နမၤလိန့ၢ်တၢ်မနုၤလဲၣ်.— ဖဲကီလၢနဂီၢ်အခါဒၣ်လဲာ် လိၣ်လၢနကဘၣ်ဒိကနၣ် နမိမိၢ်ပါပၢ်အကလုၢ်န့ၣ်လီၤ. နကမၤဒ်န့ၣ်ဧါ.—