တၢ်ဆီဟံၣ်ဆီဃီ ကပှဲၤဒီးတၢ်သူၣ်ခုသးခုအဂီၢ် ဃုယွၤအတၢ်နဲၣ်လိတက့ၢ်

ယဟိဝၤa ယွၤဒုးအိၣ်ထီၣ်ဝဲ တၢ်ဆီဟံၣ်ဆီဃီ အဆိကတၢၢ်လီၤ. လံာ်စီဆှံစံးဝဲလၢယွၤတ့လီၤ ပိာ်မုၣ်အဆိကတၢၢ် တဂၤဒီး “ဆှၢအီၤဆူပိာ်ခွါအအိၣ်” လီၤ. စီၤအၤဒၣ် သူၣ်ခုသးခုဝဲဒိၣ်မးအဃိ စံးဝဲလၢ “မ့ၢ်ဃံလၢယဃံဒီး ညၣ်လၢယညၣ်လီၤ.” (၁ မိၤၡ့ ၂:၂၂, ၂၃) တုၤခဲအံၤ ယဟိဝၤမုၢ်လၢ်ဝဲလၢ ပှၤလၢအဆီဟံၣ်ဆီဃီတဖၣ် ကအိၣ်ဒီးတၢ်သူၣ်ခုသးခုလီၤ.

ဖဲနဆီဟံၣ်ဆီဃီအခါန့ၣ်, ဘၣ်သ့ၣ်သ့ၣ် နကဆိကမိၣ်လၢ တၢ်ခဲလၢာ်န့ၣ်ကလၢဝဲပှဲၤဝဲလီၤ. နီၢ်နီၢ်, မါဒီးဝၤန့ၣ်တဂၤဒီးတဂၤ မ့ၢ်အဲၣ်လိာ်အသးနီၢ်နီၢ်ဒၣ်လဲာ် တၢ်သဘံၣ်သဘုၣ် ကဟဲအိၣ်ထီၣ်ဝဲလီၤ. (၁ ကရံၣ်သူး ၇:၂၈) လံာ်အံၤအပူၤနကထံၣ်ဘၣ် လံာ်စီဆှံအတၢ်နဲၣ်လိလီၤ. နမ့ၢ်မၤထွဲတၢ်နဲၣ်လိတဖၣ်အံၤန့ၣ် နကအိၣ်ဒီးဟံၣ်မုာ်ဃီပၢၤလီၤ. —စံးထီၣ်ပတြၢၤ ၁၉:၈-၁၁.

၁ တူၢ်လိာ်မူဒါလၢ ယဟိဝၤယွၤဟ့ၣ်နၤတက့ၢ်

လံာ်စီဆှံစံးဝဲ– ဝၤန့ၣ်မ့ၢ် ဟံၣ်ခိၣ်လီၤ.—အ့းဖ့းစူး ၅:၂၃.

နမ့မ့ၢ်ဝၤတဂၤန့ၣ်, ယဟိဝၤယွၤမုၢ်လၢ်ဝဲလၢ နကကဟုကယာ်နမါလၢ တၢ်အဲၣ်တၢ်ကွံအပူၤလီၤ. (၁ ပ့းတရူး ၃:၇) ကစၢ်ယွၤဟ့ၣ်နၤပိာ်မုၣ် လၢကကဲထီၣ် တၢ်မၤစၢၤလၢနဂီၢ် ဒီးကစၢ်အဲၣ်ဒိးလၢ နကရ့ဒီးအီၤလၢတၢ်ပာ်ကဲ ဒီးတၢ်အဲၣ်တၢ်ကွံလီၤ. (၁ မိၤၡ့ ၂:၁၈) နကဘၣ်အဲၣ်နမါဒိၣ်မး ဒီးပာ်အဝဲအတၢ်လိၣ်ဘၣ်လၢညါ အါန့ၢ်ဒံးနတၢ်လိၣ်ဘၣ်န့ၣ်လီၤ.—အ့းဖ့းစူး ၅:၂၅-၂၉.

နမ့မ့ၢ်မါတဂၤန့ၣ်, ယဟိဝၤယွၤမုၢ်လၢ်ဝဲလၢ နကယူးယီၣ်ပာ်ကဲနဝၤ ဒီးနကမၤ စၢၤအီၤလၢ ကမၤလၢပှဲၤအမူဒါအဂီၢ်လီၤ. (၁ ကရံၣ်သူး ၁၁:၃; အ့းဖ့းစူး ၅:၃၃) နကဘၣ်ဆီၣ်ထွဲမၤစၢၤ အတၢ်ဆၢတဲာ် ဒီးတဘၣ်ကဒူးကဒ့ၣ်အီၤတဂ့ၤ. (ကလီးစဲ ၃:၁၈) နမ့ၢ်မၤဒ်န့ၣ်ဒီး နကဃံလၤလၢနဝၤ ဒီးယဟိဝၤယွၤအမဲာ်ညါလီၤ. —၁ ပ့းတရူး ၃:၁-၆.

တၢ်လၢနမၤသ့–

• နကဲထီၣ်မါမ့တမ့ၢ်ဝၤ လၢအဂ့ၤကတၢၢ်သ့ဒ်လဲၣ်န့ၣ် သံကွၢ်နသးသမူတံၤသကိးတက့ၢ်. ဒိကနၣ် အတၢ်ကတိၤလီၤတံၢ်လီၤဆဲး ဒီးမၤဂ့ၤထီၣ်နသး တသ့ဖဲအသ့န့ၣ်တက့ၢ်

• အိၣ်ဒီးတၢ်သူၣ်စူၤ သးစူၤတက့ၢ်. သုကဘၣ်မၤသးခုလိာ်သုသး တဂၤဒီးတဂၤဒ်လဲၣ်န့ၣ် သုကသ့ၣ်ညါအဂီၢ် တၢ်ဆၢကတီၢ်ကလိၣ်ဝဲလီၤ

၂ သးအိၣ်နီၢ်နီၢ် နသးသမူတံၤသကိး အသးတၢ်တူၢ်ဘၣ်

လံာ်စီဆှံစံးဝဲ– မၤတၢ်လၢကကဲဘျုးလၢ နသးသမူတံၤသကိးအဂီၢ်တက့ၢ်. (ဖံလံးပံၤ ၂:၃, ၄) ပာ်လုၢ်ပာ်ပှ့ၤ နသးသမူတံၤသကိးတက့ၢ်. သ့ၣ်နီၣ်ထီၣ်လၢ ယဟိဝၤယွၤ အဲၣ်ဒိးလၢအခ့အပှၤတဖၣ်ကမ့ၢ် “ပှၤဝံသးစူၤလၢပှၤခဲလၢာ်” န့ၣ်တက့ၢ်. (၂ တံၤမသ့း ၂:၂၄) “ပှၤလၢအကတိၤဖဲအခိၣ်စၢၢ်ဆၢ ဒ်နးဧိၤဘီဧိၤဆဲးတၢ် အသိးန့ၣ်အိၣ်ဝဲလီၤ. မ့မ့ၢ်ပှၤကူၣ်တၢ်သ့အပျ့ၤန့ၣ် မၤဘျါက့ၤတၢ်လီၤ.” လၢတၢ်န့ၣ်အဃိ ပလီၢ်နသးဘၣ်ဃး နတၢ်ကတိၤတက့ၢ်. (ကတိၤဒိ ၁၂:၁၈) ယဟိဝၤအသးစီဆှံကမၤစၢၤနၤလၢ နကကတိၤတၢ်လၢတၢ်သးကညီၤ ဒီးတၢ်အဲၣ်တၢ်ကွံလီၤ. —ကလၤတံ ၅:၂၂, ၂၃; ကလီးစဲ ၄:၆.

တၢ်လၢနမၤသ့–

• တချုးနကတိၤ တၢ်ဂ့ၢ်အရ့ဒိၣ်ဒီး နသးသမူတံၤသကိးအခါ ဃ့ဘါထုကဖၣ်လၢ နကပၢၤနသး ဒီးနကဒိကနၣ်အတၢ်ကတိၤလၢ တၢ်သးစူၤအပူၤန့ၣ်တက့ၢ်

• တၢ်လၢနကတဲ ဒီးနကဘၣ်တဲအီၤဒ်လဲၣ်န့ၣ် ဆိကမိၣ်အီၤလီၤတံၢ်လီၤဆဲးတက့ၢ်

၃ ဆိကမိၣ်တၢ်ဒ် ပှၤမၤသကိးဃုာ်တၢ်

လံာ်စီဆှံစံးဝဲ– ဖဲနဆီဟံၣ်ဆီဃီအခါန့ၣ်, နကဲထီၣ် “တၢ်တသွံၣ်ဃီတညၣ်ဃီ” ဒီးနသးသမူတံၤသကိးလီၤ. (မးသဲ ၁၉:၅) ဘၣ်ဆၣ်သုမ့ၢ်ဒံးပှၤခံဂၤဒီး သုကအိၣ်ဒီးတၢ်ထံၣ်လၢ အလီၤဆီလိာ်အသးလီၤ. လၢတၢ်န့ၣ်အဃိ နကဘၣ်ဒိသူၣ်ဒိသး ဒီးဂုာ်ကျဲးစၢးဆိကမိၣ်တၢ် တမံၤဃီလီၤ. (ဖံလံးပံၤ ၂:၂) ဖဲသုဆၢတဲာ်တၢ်အခါန့ၣ် သုခံဂၤကဘၣ်အိၣ်ဒီး တၢ်သးတဖျၢၣ်ဃီလီၤ. လံာ်စီဆှံစံးဝဲလၢ- “တၢ်ကူၣ်ထီၣ်ဖးလီၤန့ၣ် အိၣ်ဂၢၢ်ဆိးကျၢၤလၢ တၢ်ကူၣ်လိာ်အသးလီၤ.” (ကတိၤဒိ ၂၀:၁၈) ဖဲသုဆၢတဲာ်ဘၣ်ဃး တၢ်ဂ့ၢ်လၢအရ့ဒိၣ်အခါ ပျဲလံာ်စီဆှံအတၢ်ဟ့ၣ်ကူၣ် နဲၣ်လိသုတက့ၢ်. —ကတိၤဒိ ၈:၃၂, ၃၃.

တၢ်လၢနမၤသ့–

• တဘၣ်ဒုးသ့ၣ်ညါ နသးသမူတံၤသကိးထဲဒၣ် တၢ်ဂ့ၢ်တၢ်ကျိၤမ့တမ့ၢ် နတၢ်ထံၣ်န့ၣ်တဂ့ၤ, ဒုးသ့ၣ်ညါစ့ၢ်ကီးအီၤ နသးအတၢ်တူၢ်ဘၣ်တဖၣ်တက့ၢ်

• တချုးနမၤတၢ်အၢၣ်လီၤလၢ နကမၤတၢ်တမံၤမံၤအခါန့ၣ် တၢၣ်ပီၣ်ဒီးနသးသမူတံၤသကိးတက့ၢ်